ཤིང་རྟ་ཆེན་པོ་གསུམ་གྱི་ལུགས་ལས་བྱུང་བའི་ལྟ་བའི་དཀའ་གནད་མཐར་ཐུག་པ་དང་ཐ་སྙད་དུ་ཡོད་པའི་དོན་ལ་དཔྱད་པ།

ནང་དོན་གནད་བསྡུས།  དཔྱད་གཞི་འདིར་རང་ངོས་ནས་གྲུབ་པ་རྡུལ་ཙམ་ཡང་མེད་ནའང་བྱ་བྱེད་ཀྱི་རྣམ་བཞག་འཐད་པ་དང་།  དེ་ལ་ཐལ་འགྱུར་བའི་ལུགས་ཀྱི་སློབ་དཔོན་དག་གི་ལུང་ཁུངས་གཞིར་བཞག་ནས་འགྲེལ་ལུགས་སོ་སོར་ངོས་འཛིན་དང་། ཐ་སྙད་དུ་ཡོད་པ་ལ་ཐ་སྙད་ཁྱད་པར་གསུམ་ལྡན་གྱིས་གནོད་པ་མི་འབབ་པ་རྗེ་རིན་པོ་ཆེའི་དགོངས་པ་དང་མཐུན་ཚུལ་བཀོད་ཡོད།

བརྡ་ཆད་གཙོ་བོ། དབུ་མ།   རྟོག་པ།   ཐ་སྙད།   རིགས་ཤེས།

གླེང་སློང་བའི་གཏམ།

དེ་ལ་གཞུང་ཕྱི་མོའི་དབུ་མ་པ་དང་ཕྱོགས་འཛིན་པའི་དབུ་མ་པ་རྣམས་ཀྱི་འགྲེལ་ལུགས་ཐུན་མོང་མ་ཡིན་པ་མང་དུ་མཆིས་ནའང་འདིར་མཚན་གཞི་ཙམ་ངོས་བཟུང་ནས་ཕྱོགས་གཅིག་ཏུ་བསྡུས་ཏེ། དབུ་མའི་གཞུང་ལ་མཇལ་སྐབས་དཔྱད་གཞི་འཚོལ་བདེ་བ་དང་ཀློག་སླ་བའི་ཕྱིར་དུ་དཀྱུས་གཅིག་ཏུ་བཀོད་ནས། རྟོག་པས་བཞག་པ་ལ་རྟེན་འབྱུང་གི་རྣམ་བཞག་འཇོག་ཚུལ་དང་། རང་བཞིན་གྱིས་སྟོང་པ་ལ་བྱ་བྱེད་ཀྱི་རྣམ་བཞག་འཐད་པ་ལྟ་བའི་དཀའ་གནད་དུ་འགྱུར་ཚུལ་སོགས་གང་གླེང་བར་བྱ་བའི་གཞིའོ། །

གཅིག  རྟོག་པས་བཏགས་ཙམ་གྱི་དོན་ལ་དཔྱད་པ།

དེ་ལ་འདིར་ཆོས་རྣམས་ཀྱི་གཤིས་ལུགས་སམ་རང་བཞིན་དེ་ཉིད་གཏན་ལ་དབབ་པ་ལ། གནས་སྐབས་དང་མཐར་ཐུག་པའི་གནས་ལུགས་གཉིས་སུ་ངེེས་ཤིང་། དེ་ལ་ཡང་སྣང་བ་གཙོ་བར་བྱེད་པའི་ཀུན་རྫོབ་ཀྱི་གནས་ལུགས་དང་སྟོང་པ་གཙོ་བར་བྱེད་པའི་དོན་དམ་གྱི་གནས་ལུགས་གཉིས་སུ་ངེས་ལ།  ཕྱི་མ་དོན་དམ་གྱི་གནས་ལུགས་དེ་ལ་རང་སྡེའི་གྲུབ་མཐའ་གོང་འོག་དང་བོད་སྔ་ཕྱིའི་མཁས་པའི་དབང་པོའི་རྣམས་ཀྱི་བཞེད་ཚུལ་མི་མཐུན་པ་མང་དུ་སྣང་ཞིང་། དོན་སྨྲ་གཉིས་དང་རྣལ་འབྱོར་སྤྱོད་པ་བ་དང་རང་རྒྱུད་པ་རྣམས་ཀྱིས་རང་གི་མཚན་གྱི་གྲུབ་པ་ཞལ་གྱིས་བཞེས་ཤིང་འདུས་བྱས་ཀྱི་རྟེན་འབྲེལ་དང་ཆ་ཤས་ལ་བལྟོས་པའི་རྟེན་འབྲེལ་ཙམ་ལས་རྟོག་པས་བཏགས་པའི་རྟེན་འབྲེལ་འཇོག་མ་ནུས་པས་ཆད་ལྟའི་གནས་སུ་ལྷུངས་ཤིང་། དེ་ཡང་རྟེན་འབྱུང་གི་དོན་དེ་ཉིད་རང་བཞིན་གྱིས་སྟོང་པའི་དོན་དུ་འཇོག་མ་ཐུབ་པ་ཉིད་ཀྱིས་ཡིན་ནོ། །

བོད་སྔ་ཕྱིའི་མཁས་པའི་དབང་པོའི་རྣམས་ཀྱིས་ཀྱང་ཀུན་རྫོབ་དང་དོན་དམ་པའི་རྣམ་བཞག་ལེགས་པར་ཕྱེས་མ་ཤེས་པར་དོམ་དམ་བདེན་པ་རིགས་པའི་དཔྱད་བཟོད་དུ་འདོད་པ་དང་། དོམ་དམ་བདེན་པ་རིགས་ཤེས་ཀྱི་ངོར་མེད་པར་བཟུང་ནས། དེ་ཤེས་བྱ་མ་ཡིན་པར་བཞེད་པ་ལ་སོགས་པའི་ལོག་རྟོག་མང་དུ་བྱུང་སྟེ།《སྤྱི་དོན་སྐལ་བཟང་མགུལ་རྒྱན་ལས།》 ལོ་ཙྪ་བ་ཆེན་པོ་སོགས་ཁ་ཅིག དོན་དམ་བདེན་པ་ཡང་དེ་ཁོ་ན་ཉིད་ལ་དཔྱོད་པའི་རིགས་ཤེས་ཀྱི་རིག་ངོར་མེད་པར་བཟུང་ནས་དོན་དམ་བདེན་པ་ཤེས་བྱ་མ་ཡིན་པར་བཞེད་པ་དང་། ཆ་བ་སོགས་ཁ་ཅིག དོན་དམ་བདེན་པ་དེ་ཁོ་ན་ཉིད་ལ་དཔྱོད་པའི་རིགས་ཤེས་ཀྱི་ངོར་ཡོད་པར་བཟུང་ནས་དོན་དམ་པ་བདེན་གྲུབ་ཏུ་འདོད་པ་རྣམས་མི་འཐད་དེ། དེ་ཁོ་ན་ཉིད་ལ་དཔྱོད་པའི་རིགས་ཤེས་ཀྱི་ངོར་མེད་བ་དོན་དམ་པར་མེད་པའི་དོན་དུ་ལུང་དེས་མ་བསྟན་ཅིང་། ལུང་དེས་ཀུན་རྫོབ་ཀྱི་ཆོས་རྣམས་དེ་ཁོ་ན་ཉིད་ལ་དཔྱོད་པའི་རིགས་ཤེས་ཀྱིས་དེ་ཁོ་ན་ཉིད་ངེས་པའི་ངེས་ངོར་མེད་པ་ཀུན་རྫོབ་ཀྱི་ཆོས་རྣམས་དོན་དམ་པར་མེད་པའི་སྒྲུབ་བྱེད་དུ་བསྟན་པའི་ཕྱིར།^[1]ཞེས་གསུངས་ཤིང་། ལོག་རྟོག་དེ་དག་ཀྱང་དགག་བྱའི་ཚད་ལེགས་པར་མ་ཤེས་པའི་གནད་ཀྱིས་ཡིན་ལ། དགག་བྱ་ཁྱབ་ཆེ་བའི་དབང་གིས་ཆད་ལྟར་འགྱུར་བ་དང་། དགག་བྱ་ཁྱབ་ཆུང་བའི་དབང་གིས་ཞེན་པ་ཕྲ་མོ་ནས་མི་འགོག་པར་ལུས་ཏེ་རྟག་མཐར་འགྱུར་ལ། དེས་ན་མཐའ་གཉིས་སུ་མ་ལྷུང་བའི་སྟེང་ནས་དགག་བྱའི་མཚམས་འཛིན་མི་འཆུགས་པར་བྱ་དགོས་པ་གནད་དུ་མཐོང་སྟེ། དེ་ངོས་ཟིན་པ་ལ་ཆོས་རྣམས་རྟོག་པའི་དབང་གིས་བཞག་པ་ཙམ་གྱིས་འཇོག་ཚུལ་ཤེས་ན་དེ་ལས་ལྡོག་སྟེ་འཛིན་པའི་བདེ་འཛིན་བདེ་ལེགས་སུ་རྟོགས་པར་འགྱུར་བས་དེའི་དོན་ལ་ཅུང་ཟད་དཔྱད་ན། གདགས་གཞི་རང་ངོས་ནས་རྡུལ་ཙམ་ཡང་མ་གྲུབ་པར་མིང་རྐྱང་བཏགས་ཡོད་ཙམ་དུ་གྲུབ་པ་རྟོག་པས་བཏགས་ཙམ་གྱི་དོན་དུ་བཞེད་པ་ནི་གྲུབ་མཐའ་སྨྲ་བ་གཞན་གྱིས་བློར་མི་ཤོང་བའི་དཔལ་ལྡན་ཐལ་འགྱུར་བའི་འཇོག་ཚུལ་ཐུན་མོང་མ་ཡིན་པ་ཉིད་ཡིན་ལ། དེ་ལྟར་རྒྱལ་བའི་དགོངས་པ་མཐར་ཐུག་པ་དེ་ཉིད་དཔལ་མགོན་འཕགས་པ་ཀླུ་སྒྲུབ་དང་རྗེ་བདག་ཉིད་ཆེན་མོས་འཕགས་བོད་གཉིས་སུ་རྒྱ་ཆེར་བཀྲལ་ལ། དེ་ལ་འདིར་དབུ་མ་པ་མ་གཏོགས་གཞན་སུའི་བློ་ངོར་ཡང་འགལ་འདུར་མཐོང་བས་མི་འགལ་བར་འཆད་མི་ཤེས་ལ། ཕྲ་ཞིང་འཛངས་ལ་ཤིན་ཏུ་རྣམ་དཔྱོད་དང་ལྡན་པའི་དཔལ་ལྡན་ཐལ་འགྱུར་བ་དེ་ཉིད་ཀྱིས་བདེན་པ་གཉིས་རྟོགས་པའི་ཐབས་ལ་འགལ་བའི་དྲི་ཙམ་ཡང་མེད་པར་གདན་ལ་ཕབ་ནས། རང་གི་སྟོན་པ་དང་བསྟན་པ་ལ་གུས་པ་རྨད་དུ་བྱུང་བ་སྐྱེས་ཤིང་། ངག་ཚིག་རྣམ་པར་དག་པས་ཤེས་ལྡན་དག་རང་བཞིན་གྱིས་སྟོང་པའི་དོན་ནི་རྟེན་ཅིང་འབྲེལ་བར་འབྱུང་བའི་དོན་ཡིན་གྱི། དོན་བྱེད་ནུས་པའི་སྟོང་པའི་དོན་མ་ཡིན་ནོ་ཞེས་སྐད་གསང་མཐོན་པོས་སྒྲོགས་པར་སྣང་ངོ་། །

དེས་ན་རང་སྡེ་དངོས་པོ་སྨྲ་བ་རྣམས་ཀྱིས་ཀྱང་དབུ་མའི་ལྟ་བ་ཁས་མི་ལེན་ཡང་དབུ་མ་པ་ལ་རྩོད་པ་ནི། རང་བཞིན་གྱིས་སྟོང་པ་ན་བཅིངས་གྲོལ་སོགས་འཁོར་འདས་ཀྱི་རྣམ་གཞག་ཐམས་ཅད་འཇོག་ས་མེད་སྙམ་པ་འདི་ཁོ་ན་ཡིན་ནོ། །དེ་ལྟར་ཡང《རྩ་བ་ཤེས་རབ་ལས།》 གལ་ཏེ་འདི་དག་ཀུན་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། །ཁྱེད་ལ་མེད་པར་ཐལ་བར་འགྱུར། །^[2]ཞེས་གསུངས། དེ་ལྟར་ཡང་རང་བཞིན་གྱི་སྟོང་པ་ལ་འཁོར་འདས་ཀྱི་རྣམ་བཞག་མི་རུང་བར་རྩོད་པ་འདི་ནི། དབུ་མ་པས་ཕར་ལ་འཕང་རྒྱུའི་སྐྱོན་ཚུར་ལ་འཕངས་པ་ཡིན་པས་ལྡོག་ནས་སྐྱོན་འཕེན་པ་ནི།《རྩ་ཤེས་རབ་བྱེད་ཉེར་བཞི་བ་ལས།》གལ་ཏེ་འདི་ཀུན་མི་སྟོང་ན། །འབྱུང་བ་མེད་ཅིང་འཇིག་པ་མེད། །འཕགས་པའི་བདེན་པ་བཞི་པོ་རྣམས། །ཁྱོད་ལ་མེད་པར་ཐལ་བར་འགྱུར། །^[3] ཞེས་གསུངས་པ་ལྟར་རོ། །

དེ་ལྟར་རང་ངོས་ནས་མ་གྲུབ་ཀྱང་འཁོར་འདས་དང་སྐྱེ་མཆེད་ཀྱི་རྣམ་བཞག་འཇོག་ཐུབ་པ་ནི་འཕགས་པ་ཡབ་སྲས་ཀྱི་ལྟ་བའི་འབབ་སྟེགས་དང་། དབུ་མའི་ལྟ་བའི་མཐར་ཐུག་པའི་དཀའ་ས་ཡིན་པའི་གནད་ཀྱང་འདི་ཉིད་དུ་སེམས་སོ། །དེས་ན་འདི་ཉིད་ཀྱི་དོན་ལ་སངས་རྒྱས་བསྐྱངས་དང་ཞི་བ་ལྷ། ཟླ་བ་གྲགས་པ་འདི་གསུམ་གྱིས་འཕགས་པ་ཡབ་སྲས་ཀྱི་འགྲེལ་ལུགས་ཐུན་མོང་ཡིན་པར་རྗེ་ཐམས་ཅད་མཁྱེན་པས་གསུངས་ཤིང་། ^[4]དེ་གསུམ་གྱིས་འབྲེལ་ལུགས་དོན་གྱི་ངོ་བོ་སྟོན་པ་ལ་ཁྱད་པར་མེད་ཀྱང་འགྲེལ་བྱེད་དང་འགྲེལ་གཞིའི་གཞུང་མི་འདྲ་བས་འདིར་དེ་རྣམས་ཀྱི་ལུང་ཁུངས་གསལ་བོར་དཀྱུས་གཅིག་ཏུ་བཀོད་ན། 《རྩ་བ་ཤེས་རབ་ལས།》གང་ལ་སྟོང་བ་ཉིད་རུང་བ། །དེ་ལ་ཐམས་ཅད་རུང་བར་འགྱུར། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་མི་རུང་འགྱུར། །^[5]ཞེས་དང་།《བཞི་བརྒྱ་པ་ལས།》  རྟོག་པ་མེད་པར་འདོད་ཆགས་ལ། །སོགས་ལ་ཡོད་ཉིད་ཡོད་མིན་ན། །ཡང་དག་དོན་དང་རྟོག་པ་ཞེས། །བློ་དང་ལྡན་པ་སུ་ཞིག་འཛིན། །^[6]ཞེས་དང་། 《བུདྡྷ་པ་ལི་ཏ་ལས།》གང་ལ་ངོ་བོ་ཉིད་སྟོང་པ་ཉིད་རུང་བ་དེ་ལ་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་རུང་བར་འགྱུར་རོ། །གང་ལ་ངོ་བོ་ཉིད་སྟོང་པ་ཉིད་མི་རུང་བ་དེ་ལ་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་མི་རུང་བར་འགྱུར་རོ། །^[7]ཞེས་དང་།《འཇུག་པ་རང་འགྲེལ་ལས།》ཇི་ལྟར་ཡན་ལག་ཚོགས་རྣམས་ལ། །བརྟེན་ནས་ཤིང་རྟ་བརྗོད་པ་ལྟར། །དེ་བཞིན་ཕུང་པོ་རྣམས་བརྟེན་ནས། །ཀུན་རྫོབ་སེམས་ཅན་ཞེས་བྱའོ། ། ^[8]ཞེས་དང་།《སྤྱོད་འཇུག་ལས།》སྒྱུ་མའི་སྐྱེས་བུ་བསད་སོགས་ལ། །སེམས་མེད་ཕྱིར་ན་སྡིག་མེད་དེ། །སྒྱུ་མའི་སེམས་དང་ལྡན་པ་ལ། །བསོད་ནམས་དང་ནི་སྡིག་པ་འབྱུང་། །  ^[9]ཞེས་ཐལ་འགྱུར་བའི་སློབ་དཔོན་དག་གི་དགོངས་པ་མཐར་ཐུག་པ་ལྟ་བའི་གནད་དང་འབྲེལ་བའི་ལེགས་བཤད་ཐོར་བུ་རྣམས་ཕྱོགས་གཅིག་ཏུ་བསྡུས་ཏེ་ཉེ་བར་སྦྱར་བ་ཡིན་ནོ། །

གཉིས་པ།  ཐ་སྙད་དུ་ཡོད་པའི་དོན་ལ་དཔྱད་པ།

རྟོག་པས་བཞག་པ་ལ་ཡང་བྱ་བྱེད་ཀྱི་རྣམ་གཞག་འཐད་པ་དང་མི་འཐད་པའི་ཚུལ་གཉིས་བྱུང་ཞིང་། དེ་གཉིས་ཀྱི་ཁྱད་པར་ཡང་རང་གི་ཡུལ་ཐ་སྙད་དམ་ཀུན་རྫོབ་ཏུ་ཡོད་པ་ཉིད་ལ་རག་ལས་པས། ཐ་སྙད་དུ་ཡོད་པ་དང་མེད་པའི་དོན་ཇི་ལྟ་བུ་ཞེ་ན། ཡུལ་དེ་ལ་ཐ་སྙད་ཁྱད་པར་གསུམ་ལྡན་གྱིས་མི་གནོད་པ་ནི་ཐ་སྙད་དུ་ཡོད་པ་དང་དེས་གནོད་པ་ཐ་སྙད་དུ་མེད་པར་འདོད་དེ།《ལྷག་མཐོང་ཆེན་མོ་ལས།》དེ་ལ་ཐ་སྙད་དུ་ཡོད་པར་འདོད་པ་དང་མེད་པར་འདོད་པ་ནི་ཅི་འདྲ་བ་ཞིག་གི་སྒོ་ནས་འཇོག་པ་ཡིན་སྙམ་ན། ཐ་སྙད་པའི་ཤེས་པ་ལ་གྲགས་པ་ཡིན་པ་དང་། ཇི་ལྟར་གྲགས་པའི་དོན་དེ་ལ་ཐ་སྙད་པའི་ཚད་མ་གཞན་གྱིས་གནོད་པ་མེད་པ་དང་། དེ་ཁོ་ན་ཉིད་ལའང་རང་བཞིན་ཡོད་མེད་ཚུལ་བཞིན་དུ་དཔྱོད་པའི་རིགས་པས་གནོད་པ་མི་འབབ་པ་ཞིག་ནི་ཐ་སྙད་དུ་ཡོད་པར་འདོད་ལ། དེ་དག་ལས་བཟློག་པ་ནི་མེད་པར་འདོད་དོ། །^[10]ཞེས་གསུངས་པ་ལྟར། དཔེར་ན་ཐག་ཁྲ་ལ་སྦྲུལ་དུ་བཏགས་པ་དང་། ཕུང་སོགས་ལ་ངར་བཏགས་པ་གཉིས་རྟོག་པས་བཏགས་པ་ཙམ་དུ་མཚུངས་ཀྱང་། བཏགས་པའི་དོན་ལ་ཐ་སྙད་པའི་ཚད་མས་གནོད་པ་འབབ་པས་བྱ་བ་བྱེད་པར་ནུས་མི་ནུས་ཀྱང་མི་མཚུངས་ཏེ།《དབུ་མ་དགོངས་པ་རབ་གསལ་ལས།》བུམ་པ་ལ་སོགས་པ་རྣམས་རྟོག་པས་བཞག་ལུགས་ཀྱི་ཆ་དེ་ཙམ་ཞིག་ཐག་པ་ལ་སྦྲུལ་དུ་བཏགས་པ་དང་འདྲ་བ་ཡིན་ཡང་། བུམ་སོགས་རྣམས་དང་ཐག་པའི་སྦྲུལ་གཉིས་ཡོད་མེད་དང་བྱ་བ་བྱེད་པར་ནུས་མི་ནུས་སོགས་ནི་གཏན་མི་འདྲ་སྟེ། དེ་གཉིས་ཀྱི་ཐ་སྙད་ངེས་པར་བྱ་དགོས་མི་དགོས་དང་། ཐ་སྙད་བྱེད་པ་ལ་གནོད་པ་ཡོད་མེད་སོགས་རྣམ་པ་ཐམས་ཅད་དུ་མི་མཚུངས་པའི་ཕྱིར་རོ། ། ^[11]ཞེས་གསུངས་སོ། །

དོགས་འཕྲོས།

འཁོར་འདས་ཀྱི་ཆོས་རྣམས་ལ་ངེས་པར་ཐ་སྙད་ཁྱད་པར་གསུམ་ལྡན་གྱིས་གྲུབ་པ་ཞིག་དགོས་ན། ཡུལ་སྟོང་པ་ཉིད་ལྟ་བུའང་ཐ་སྙད་པའི་ཤེས་པ་ལ་གྲགས་པ་ངེས་པར་དགོས་ལ། དེ་འདྲའི་ཐ་སྙད་པའི་ཤེས་པ་དེ་ཡང་རིགས་ཤེས་རྗེས་དཔག་ལྟ་བུ་ལ་བྱེད་ན་ཐ་སྙད་པའི་ཤེས་པའི་དོན་མ་བརྟགས་མ་དཔྱད་པར་སྣང་ཙམ་གྱིས་འཇོག་པར་ལྷག་མཐོང་ཆེན་མོར་^[12]གསུངས་པས། ཡུལ་སྟོང་པ་ཉིད་ལྟ་བུ་ཐ་སྙད་པའི་ཤེས་པ་ལ་གྲགས་པའི་ཤེས་པ་དེ་ཉིད་ཆེས་ཤིན་ཏུ་འཇོག་དཀའ་བར་སྣང་ཞིང་དཀའ་བའི་གནས་སུ་མཐོང་བས་གཟུར་གནས་རིགས་པ་སྨྲ་བ་རྣམས་ཀྱིས་དཔྱད་པའི་གནས་སུ་སྣང་ངོ་། །

དེ་ཁོ་ན་ཉིད་ལ་དཔྱོད་པའི་རིགས་ཤེས་ཀྱིས་མི་གནོད་པའི་དོན་ཡང་། རིགས་ཤེས་ཀྱིས་གྲུབ་པའི་དོན་དུ་བྱས་ན་འཁོར་འདས་ཀྱི་ཆོས་རྣམས་ཐ་སྙད་དུ་ཡོད་པར་འགལ་ཞིང་། དགེ་སྡུག་ལས་བདེ་སྡུག་འབྱུང་བ་དང་། དབང་ཕྱུག་དང་གཙོ་བོས་བདེ་སྡུག་བསྐྱེད་པ་གཉིས་རང་བཞིན་ཡོད་མེད་ཚུལ་བཞིན་དཔྱོད་པའི་རིགས་པས་མི་འགྲུབ་པ་མཚུངས་ཀྱང་། རིགས་པའི་གནོད་མི་གནོད་རྣམ་པ་ཐམས་ཅད་དུ་མི་མཚུངས་པ་ལྷག་མཐོང་ཆེན་མོར་^[13]གསུངས་ཤིང་། དེས་ན་དེ་ཁོ་ན་ཉིད་ལ་དཔྱོད་པའི་རིགས་ཤེས་ཀྱིས་གནོད་མི་གནོད་ལེགས་པར་ཕྱེས་ནས་རྟོག་པས་བཞག་པའི་དོན་ལ་ཐ་སྙད་དུ་གྲུབ་པའི་གྲུབ་ཚུལ་ལ་ངེས་པར་བྱས་ལ། ཐེག་པ་ཆེན་པོ་གཞི་ལམ་འབྲས་གསུམ་གྱི་རྣམ་བཞག་ལ་ངེས་པ་གཏིང་ཚུགས་ཏེ་གདམ་པའི་མཐིལ་དུ་བཟུང་བ་གནད་དུ་མཐོང་ངོ་། །

མཇུག་གི་གཏམ།

ཞེས་བཀའ་གདམས་བསྟན་པའི་གདན་ས་ཆེན་མོ་རྭ་རྒྱ་དགའ་ལྡན་བཀྲ་ཤིས་འབྱུང་གནས་བཤད་སྒྲུབ་དར་རྒྱས་གླིང་དུ་ཕྱི་ལོ་2024ལོའི་བགྲོ་གླེང་ལ་ཆ་ཤས་ལེན་པའི་སྐལ་བཟང་ཐོབ་པར་དྲི་བ་ཞེ་དགུ་བའི་བརྗོད་དོན་ཤིང་རྟ་ཆེན་པོ་གསུམ་གྱིས་རྟོགས་པའི་འཇོག་ལུགས་དང་།  དབུ་མའི་ལྟ་བའི་མཐར་ཐུག་པའི་དཀའ་གནད་ལ་བསླབ་གསུམ་འཕགས་ནོར་མདུན་གྱི་བང་མཛོད་ལ་མངའ་བརྙེས་པའི་མཁས་མང་འདུས་པའི་སྡེ་རིན་པོ་ཆེ་མདུན་སར་རྨོངས་འཆར་ཙམ་ཞུས་པ་ལགས་ན། གཟུར་གནས་རིགས་པ་སྨྲ་བ་རྣམས་ཀྱིས་ལེགས་སྤེལ་ཉེས་འགོག་དང་བཅས་དགོངས་འཆར་གང་ཡོད་ལྷུག་པོར་སྩོལ་བའི་རེ་འདུན་དང་བཅས་དགེ་སློང་དགེ་འདུན་རིག་གསལ་དུ་འབོད་པས་བོད་ཟླ་8ཚེས་1ཉིན་སྦྱར་རོ།། །།

དཔྱད་ཡིག་དང་ཞབས་མཆན། 

^[1] རྗེ་བཙུན་ཆོས་ཀྱི་རྒྱལ་མཚན་གྱི་གསུང་འབུམ།  ༼   ཐ ༽ སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  ཤོག་ངོས་192ན་གསལ།

^[2] དབུ་མ་རྩ་བ་ཤེས་རབ།   དཔལ་མགོན་འཕགས་པ་ཀླུ་སྒྲུབ་ཀྱིས་མཛད། ཀྲུང་གོའི་ཤེས་རིག་དཔེ་སྐྲུན་ཁང་།  2019ལོར་དཔར་དུ་བསྐྲུན།  ཤོག་ངོས་34ན་གསལ།

^[3] དབུ་མ་རྩ་བ་ཤེས་རབ།  དཔལ་མགོན་འཕགས་པ་ཀླུ་སྒྲུབ་ཀྱིས་མཛད། ཀྲུང་གོའི་ཤེས་རིག་དཔེ་སྐྲུན་ཁང་།  2019ལོར་དཔར་དུ་བསྐྲུན།  ཤོག་ངོས་35ན་གསལ།

^[4] དབུ་མ་དགོངས་པ་རབ་གསལ་ལས།     རྗེ་ཙོང་ཁ་པས་མཛད།   སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  པོད་ཕྲེང་ཉེར་བཞི། ཤོག་ངོས་161ལས།  རྟོག་པས་བཞག་པ་དེ་ལ་རང་རང་གི་བྱ་བྱེད་འཐད་པ་ནི། ཚིག་དང་དོན་གྱི་འགྲེལ་མཛད་རྣམས་ཀྱི་ནང་ནས། སངས་རྒྱས་བསྐྱངས་དང་ཞི་བ་ལྷ་དང་སློབ་དཔོན་འདི་གསུམ་གྱིས་འཕགས་པ་ཡབ་སྲས་གཉིས་ཀྱི་འགྲེལ་ལུགས་ཐུན་མོང་མ་ཡིན་པའོ། །དབུ་མའི་ལྟ་བ་མཐར་ཐུག་པའི་དཀའ་ས་ཡང་འདི་ཉིད་དོ། །ཞེས་གསུངས་སོ། །

^[5] དབུ་མ་རྩ་བ་ཤེས་རབ།   དཔལ་མགོན་འཕགས་པ་ཀླུ་སྒྲུབ་ཀྱིས་མཛད། ཀྲུང་གོའི་ཤེས་རིག་དཔེ་སྐྲུན་ཁང་།  2019ལོར་དཔར་དུ་བསྐྲུན།  ཤོག་ངོས་35ན་གསལ།

^[6] བཞི་བརྒྱ་པ།  འཕགས་པ་ལྷས་མཛད། སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  པོད་ཕྲེང་བཅུ་དགུ་བ།  ཤོག་ངོས་106ན་གསལ།

^[7] བུདྡྷ་པ་ལི་ཏ། སློབ་དཔོན་སངས་རྒྱས་བསྐྱངས་ཀྱིས་མཛད།  ཀྲུང་གོའི་ཤེས་རིག་དཔེ་སྐྲུན་ཁང་།  2019ལོར་དཔར་དུ་བསྐྲུན།  ཤོག་ངོས་344ན་གསལ།

^[8] དབུ་མ་འཇུག་པའི་རང་འགྲེལ།  དཔལ་ལྡན་ཟླ་བ་གྲགས་པས་མཛད། ཀྲུང་གོའི་ཤེས་རིག་དཔེ་སྐྲུན་ཁང་།  2019ལོར་དཔར་དུ་བསྐྲུན།  ཤོག་ངོས་256ན་གསལ།

^[9] བྱང་ཆུབ་སེམས་དཔའི་སྤྱོད་པ་ལ་འཇུག་པ།   རྒྱལ་སྲས་ཞི་བ་ལྷས་མཛད།  ཀྲུང་གོའི་ཤེས་རིག་དཔེ་སྐྲུན་ཁང་།  2019ལོར་དཔར་དུ་བསྐྲུན།  ཤོག་ངོས་69ན་གསལ།

^[10] ལྷག་མཐོང་ཆེན་མོ།  རྗེ་ཙོང་ཁ་པས་མཛད།  སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  པོད་ཕྲེང་གོ་གཉིས། ཤོག་ངོས་592ན་གསལ།

^[11] དབུ་མ་དགོངས་པ་རབ་གསལ།     རྗེ་ཙོང་ཁ་པས་མཛད།   སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  པོད་ཕྲེང་ཉེར་བཞི། ཤོག་ངོས་161ནས།

^[12] ལྷག་མཐོང་ཆེན་མོ།  རྗེ་ཙོང་ཁ་པས་མཛད།  སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  པོད་ཕྲེང་གོ་གཉིས། ཤོག་ངོས་592ལས།  དེ་ལ་ཐ་སྙད་པའི་ཤེས་པ་ནི། ཆོས་གང་ལའང་ཇི་ལྟར་སྣང་བ་ལྟར་གྱི་རྗེས་སུ་འཇུག་པ་ཙམ་ཡིན་གྱི། སྣང་བའི་དོན་དེ་བློ་ལ་དེ་ལྟར་སྣང་བ་ཙམ་ཡིན་ནམ། འོན་ཏེ་དོན་གྱི་ཡིན་ཚུལ་ལ་དེ་ལྟར་གྲུབ་པ་ཡིན་སྙམ་དུ་མི་དཔྱོད་པའི་ཤེས་པ་མ་བརྟགས་པར་འཇུག་པ་རྣམས་སོ། །ཞེས་གསུངས།

^[13]  ལྷག་མཐོང་ཆེན་མོ།  རྗེ་ཙོང་ཁ་པས་མཛད།  སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས། གངས་ཅན་ཁྱད་ནོར་དཔེ་ཚོགས།  པོད་ཕྲེང་གོ་གཉིས། ཤོག་ངོས་593ལས། དེའི་ཕྱིར་རིགས་ཤེས་ཀྱིས་མི་གནོད་པ་དང་དེས་གྲུབ་པ་གཉིས་གཅིག་ཏུ་བཟུང་ནས། ཐ་སྙད་དུ་དགེ་སྡིག་ལས་བདེ་སྡུག་འབྱུང་བ་དང་། དབང་ཕྱུག་དང་གཙོ་བོ་ལས་བདེ་སྡུག་འབྱུང་བ་གཉིས་ཡིན་ན་ཡིན་མཉམ་དང་མིན་ན་མིན་མཉམ་དུ་འཛིན་པའི་ལོག་རྟོག་གི་གནས་མེད་དེ། དབང་ཕྱུག་དང་གཙོ་བོས་བདེ་སྡུག་བསྐྱེད་པ་དང་དགེ་མི་དགེས་བདེ་སྡུག་བསྐྱེད་པ་གཉིས་རང་བཞིན་ཡོད་མེད་ཚུལ་བཞིན་དུ་དཔྱོད་པའི་རིགས་པས་མི་འགྲུབ་པར་མཚུངས་ཀྱང་། རིགས་པས་གནོད་མི་གནོད་རྣམ་པ་ཐམས་ཅད་དུ་མི་མཚུངས་པའི་ཕྱིར་རོ། །