མངོན་པའི་ལུགས་ཀྱི་བར་སྲིད་སྐོར་གླེང་བ།

ནང་དོན་གནད་བསྡུས། དཔྱད་རྩོམ་འདི་ནི་བར་སྲིད་ཡོད་མེད་སྐོར་གྱི་གླེང་གཞི་གཙོ་བོར་མ་བྱས་པར། འབྱུང་འགྱུར་བར་སྲིད་ལ་ཞིབ་འཇུག་གནང་མཁན་དག་ལ་ནང་པའི་མདོ་ཕྱོགས་ཀྱི་གཞུང་ལུགས་ནང་དུ་བར་སྲིད་ཅེས་པའི་ངོས་འཛིན་དང་། དེའི་ཁྱད་ཆོས། རྣམ་པ་བཅས་ཇི་ལྟར་བཤད་ཡོད་མེད་ཀྱི་སྐོར་རྩལ་དུ་བཏོན་ནས་བྲིས་ཡོད།

བརྡ་ཆད།  བར་སྲིད། རིག་པའི་རྣམ་གཞག  བར་སྲིད་ཀྱི་ཁྱད་ཆོས། སྒྲུབ་བྱེད། མངལ་འཇུག

ཐོག་མའི་གླེང་གཞི། 

སྐྱེ་འགྲོའི་སྲོག་ཆགས་ཚང་མ་ཤི་བའི་རྗེས་སུ་མར་མེ་ནུབ་པ་བཞིན་དུ་རྣམ་ཤེས་རྒྱུན་ཆད་པ་ཡིན་ནམ། ཡང་ན་སྐྱེ་བ་གཞན་ཞིག་ལེན་པར་བྱེད། སྐྱེ་བ་གཞན་ཞིག་ལེན་ན་འཆི་བ་དང་སྐྱེ་བ་གཉིས་ཀྱི་བར་ལ་སྲིད་པ་གཞན་ཞིག་བརྒྱུད་དགོས་སམ། ཡང་ན་ཤི་བའི་དེ་མ་ཐག་ཏུ་སྐྱེ་བ་གཞན་ལེན་ནམ་སྙམ་པའི་དོགས་པ་ཞིག་ང་ཚོ་ནང་པའི་གྲུབ་མཐའ་སྨྲ་བའམ།   ཡང་ན་གཞན་ལའང་གནའ་ནས་ད་བར་དུ་འབྱུང་གི་ཡོད་པ་བཤད་མ་དགོས་པ་ཞིག་རེད། ང་ཚོ་ནང་པའི་གྲུབ་མཐའ་སྨྲ་བའི་མི་སྣ་ཞིག་ལ་མཚོན་ན་འདི་ལྟ་བུའི་དོགས་པ་ཞིག་ཡོང་བ་ནི་ཆེས་ངོ་མཚར་བའི་གནས་ཤིག་མཐོང་།  རྒྱུ་མཚན་ཅིའི་ཕྱིར་ཞེ་ན།  ལས་འབྲས་ཀྱི་གནས་ལུགས་ཚུལ་གཞིན་དུ་ཁས་ལེན་པའི་གྲུབ་མཐའ་སྨྲ་བའི་གང་ཟག་ཅིག་ལ་མཚོན་ན་འདི་ལྟ་བུ་དོགས་པ་ཞིག་འབྱུང་བའི་གནས་གང་ཡང་མ་ཡིན་པ་ལྟ་བུར་སྣང་སྟེ། ནང་པའི་རིག་གཞུང་དག་ལས་བར་སྲིད་ཡོད་པའི་སྒྲུབ་བྱེད་ཀྱི་རིགས་པ་དང་། བར་སྲིད་ཀྱི་ངོ་བོ། བར་སྲིད་ཀྱི་རྣམ་པ་སོགས་རྒྱས་པར་གསུངས་ཡོད་པས། ཕལ་ཆེར་བས་དེ་ལ་ཡིད་ཆེས་པའི་དད་པ་ཙམ་གྱིས་ཅི་གསུང་བཀའ་བཞིན་དུ་བརྩི་བ་ལས། དོགས་པ་ཤར་བའམ་དཔྱད་པ་བཏང་མཁན་ནི་ཉིན་མོའི་སྐར་མ་ཙམ་དུ་གནས་པས་སོ། །  དེས་ན་ནང་པའི་གཞུང་ལུགས་ཁག་ནས་གནས་ཚུལ་འདི་དག་གི་ཐད་ལ་སྔར་ནས་འགྲེལ་བཤད་དང་གསལ་བཤད་བྱས་ཟིན་པ་རེད། སེམས་ཅན་གང་ཡིན་ན་ཤི་བའི་རྗེས་སུ་རྣམ་ཤེས་རྒྱུན་ཆད་མི་འགྲོ་བར་སྐྱེ་བ་ལེན་དགོས་པ་ནི་ནང་པའི་གཞུང་ལུགས་སྨྲ་བ་རྣམས་ཀྱིས་འདོད་ལ། ཤི་བ་དང་སྐྱེ་བ་གཉིས་ཀྱི་བར་དུ་ཡང་སེམས་ཅན་གཞན་ཞིག་བརྒྱུད་དགོས་མིན་ཐད་ལ་ནང་པའི་མཁས་པ་དག་ལ་བཞེད་ཚུལ་མི་འདྲ་བ་མང་དུ་བྱུང་ཡོད། ད་སྐབས་དཔྱད་རྩོམ་འདིའི་ནང་ནས་བར་སྲིད་ཡོད་པའི་ངེས་ཤེས་བརྟན་ཚུགས་ཡོད་པའི་མི་རྣམས་ལ་ནང་པའི་གཞུང་ལུགས་ལས་ཇི་ལྟར་བཤད་ཡོད་པའི་སྐོར་དེ་གསལ་བཤད་ཉུང་ངུ་ཞིག་བྲིས་ཡོད།

༡   མངོན་པ་མཛོད་ལས་བར་སྲིད་ཅེས་པ་ངོས་འཛིན་བྱེད་སྟངས་སྐོར།

གང་ཟག་ཅིག་ཡུལ་གཅིག་ནས་འཆི་སྲིད་གྲུབ་ནས་ཡུལ་གཞན་དུ་སྐྱེ་སྲིད་མ་འགྲུབ་པའི་བར་གྱི་བར་མ་དོའི་སེམས་ཅན་ཡོད་ན་དེ་ལ་བར་སྲིད་ཅེས་པའི་ཐ་སྙད་འདོགས་ཤིང་། དེ་ནི་ནང་པའི་གཞུང་ལུགས་སྨྲ་བ་དག་གིས་འཆི་བ་དང་སྐྱེ་བའི་བར་གྱི་སྲིད་པ་ཡིན་པས་བར་གྱི་སྲིད་པ་ཞེས་བར་སྲིད་ངོས་འཛིན་བྱས་ཡོད་དེ། དབྱིག་གཉེན་གྱིས། 《མཛོད་རང་འགྲེལ》   (སྡེ་བསྟན། )པོད་༡༤༠ ཤོག་ངོས། ༡༡༦ ལས། ”ལུས་གང་ཡུལ་གཞན་དུ་སྐྱེ་བ་ཐོབ་པར་བྱ་བའི་ཕྱིར་འཆི་བའི་སྲིད་པ་དང་སྐྱེ་བའི་སྲིད་པའི་བར་དུ་མངོན་པར་འགྲུབ་པ་དེ་ནི་སྲིད་པ་བར་མ་ཞེས་བྱ་སྟེ། འགྲོ་བའི་བར་མ་ཡིན་པའི་ཕྱིར་རོ། ། ཞེས་གསུངས་སོ། །  བར་སྲིད་ཡོད་མེད་སོགས་ཀྱི་རྩོད་པ་དང་བར་སྲིད་ཅེས་པ་གང་ལ་ངོས་འཛིན་བྱེད་ཀྱིན་ཡོད་མེད་སྐོར་ནས་རྒྱས་པར་བཀྲལ་ནས་སློབ་དཔོན་རང་ཉིད་ཀྱིས་བར་སྲིད་ཡོད་པར་འདོད་པའི་ཕྱོགས་བཟུང་ཡོད། སྤྱིར་བཏང་བར་སྲིད་ཡོད་མེད་སྐོར་ནས་སྡེ་པ་སོ་སོར་འདོད་ཚུལ་མི་འདྲ་བ་མདོའི་ཁུངས་བཀྲལ་ཚུལ་དང་གོ་བ་ལེན་སྟངས་སོགས་ལ་མི་འདྲ་བ་མང་པོ་བྱུང་བ་ཡིན་མོད། ཕྱིས་སུ་ནང་བསྟན་རིག་པའི་ཆེད་མཁས་པ་མང་ཆེ་བས་བར་སྲིད་ཡོད་པའི་སྐོར་དེ་ཁས་བླངས་ནས་འཐད་ཕྱོགས་སུ་བཟུང་ཡོད། ནང་པའི་གཞུང་ལུགས་ནང་ནས། འདོད་ཁམས་དང་གཟུགས་ཀྱི་ཁམས་སུ་འཆི་སྲིད་དང་སྐྱེ་སྲིད་བར་དུ་བར་སྲིད་བརྒྱུད་དགོས་ཀྱི་གཟུགས་མེད་ཁམས་ནི་གནས་གང་དུ་ཤི་བ་དེ་ཉིད་ལ་སྐྱེ་སྲིད་འགྲུབ་ཀྱི་བར་སྲིད་མེད་དོ་ཞེས་སྨྲ་བར་བྱེད་དོ། །

༢ བར་སྲིད་མེད་པར་འདོད་པའི་ཁུངས་བཅོལ་སའི་མདོ་ལུང་གི་སྐོར།

ཁུངས་གཏད་སའི་མདོ་དེ་དག་ལས།  “དེ་ནས་བདུད་སུན་འབྱིན་བྱེད་ཅེས་བྱ་བས་སངས་རྒྱས་འོད་སྲུང་གི་ཉན་ཐོས་མཁས་མགུ་ཞེས་བྱ་བའི་ཀླད་དུ་ཁུ་ཚུར་བསྣུན་པ་ལས་དེས་མ་རངས་པའི་སྐད་ཕྱུང་བ་དང་སྐད་ཅིག་དེ་ཉིད་ལ་རང་གི་ལུས་ཁོ་ནས་སེམས་ཅན་མནར་མེད་པའི་དམྱལ་པ་ཆེན་པོ་ལྷུང་བར་བཤད་པའི་ཕྱིར། ”ཞེས་པ་དང་།  《མཛོད་རང་འགྲེལ》ཞལ་འཕངས་བའི། སྡེ་བསྟན།) པོད། ༡༤༠ ཤོག་ངོས། ༡༡༩ མདོ་ལས།  “མཚམས་མེད་པ་ལྔའི་ལས་གང་དག་བྱས་ཤིང་བསགས་ནས་དེ་མ་ཐག་ཏུ་དམྱལ་བ་དག་ཏུ་སྐྱེའོ། ། ”ཞེས་དང་། 《མཛོད་རང་འགྲེལ》ཞལ་འཕངས་བའི། སྡེ་བསྟན། ༡༤༠ ཤོག་ངོས། ༡༡༩ མདོ་ལས། “བཅོམ་ལྡན་འདས་ཀྱིས་བྲམ་ཟེ་རྒན་པོའི་དབང་དུ་མཛད་ནས། བྲམ་ཟེ་ན་ཚོད་ཁྱེར་ཟིན་རྒ་བ་དང་། ། ན་བ་ཡིན་ཏེ་གཤིན་རྗེའི་དྲུང་དུ་ཕྱིན། ། བར་ན་ཁྱོད་ཀྱི་གནས་ཀྱང་ཡོད་མིན་ཞིང་། ། ཁྱོད་ཀྱི་ལམ་བརྒྱགས་ཀྱང་ནི་ཡོད་མ་ཡིན། ། ”ཞེས་པ་རྣམས་ཡིན་ནོ། ། གོང་གི་མདོ་ལུང་དང་པོས། ཚེ་འདིའི་ལུས་དེ་ཉིད་མ་བོར་བར་དམྱལ་བར་སྐྱེ་བ་བསྟན་པ་དང་།  《མདོ་ལུང་གཉིས་པས། 》མཚམས་མེད་བྱས་པ་དེ་མ་ཐག་ཏུ་དམྱལ་བར་སྐྱེ་བ་བསྟན་པས་བར་དུ་སྲིད་པ་གཞན་བརྒྱུད་མི་དགོས་པ་གྲུབ་བོ། ། 《མདོ་ལུང་གསུམ་པས། 》ཤི་བའི་རྗེས་ནས་གཤིན་རྗེའི་དྲུང་དུ་ཕྱིན་གྱི་བར་དུ་གནས་གཞན་མེད་པར་གསུངས་སོ། ། མདོ་ལུང་དེ་དག་ཁས་ལེན་སྟངས་དང་གོ་བ་ལེན་ཚུལ་མི་འདྲ་བའི་དབང་གི་མདོ་ལུང་དེ་བཀྲལ་ཚུལ་ཡང་མི་མཐུན་པ་བྱུང་ཡོད།

༣ སློབ་དཔོན་དབྱིག་གཉེན་གྱིས་མདོ་ལུང་དེ་དག་གི་དགོངས་པ་ལེན་ཚུལ་གྱི་སྐོར།

སློབ་དཔོན་དབྱིག་གཉེན་གྱིས་《མཛོད་རང་འགྲེལ》ལས་ཞལ་འཕངས་བའི་ལུང་དེ་དག་ལ་འགྲེལ་བཤད་ཇི་ལྟར་གནང་ཚུལ་ཞུས་ན།  《མདོ་ལུང་དང་པོ། 》དེ་ནས་བདུད་སུན་འབྱིན་བྱེད་ཅེས་བྱ་བས་སངས་རྒྱས་འོད་སྲུང་གི་ཉན་ཐོས་མཁས་མགུ་ཞེས་བྱ་བའི་ཀླད་དུ་ཁུ་ཚུར་བསྣུན་པ་ལས་དེས་མ་རངས་པའི་སྐད་ཕྱུང་བ་དང་སྐད་ཅིག་དེ་ཉིད་ལ་རང་གི་ལུས་ཁོ་ནས་སེམས་ཅན་མནར་མེད་པའི་དམྱལ་བ་ཆེན་པོར་ལྷུང་ངོ་ཞེས་གང་གསུངས་པ་དེའི་དགོངས་པ་ནི། གསོན་པོ་ཁོ་ནར་དམྱལ་བའི་མེ་དག་གིས་བསྐོར་ཏེ་ཤི་ནས་སྲིད་པ་བར་མས་མནར་མེད་པར་སོང་ངོ་སྙམ་དུ་དགོངས་པ་ཡིན་ནོ། ། ལས་དེ་ཤིན་ཏུ་དྲག་པོ་ཡོངས་སུ་རྫོགས་པ་རྣམས་ནི་ལུས་འདོར་བ་མི་སྡོད་པས་དེའི་ཕྱིར་འདིའི་མཐོང་བའི་ཆོས་ལ་མྱང་བར་འགྱུར་བའི་ལས་ནི་དང་པོར་སྨིན་ལ། སྐྱེས་ནས་མྱོང་བར་འགྱུར་བའི་ལས་ནི་ཕྱིས་སྨིན་ཏོ། ། ཞེས་འགྲེལ་བཤད་དེ་ལྟར་གནང་ཡོད། 《མཛོད་རང་འགྲེལ་》 (སྡེ་བསྟན།) པོད། ༡༤༠ ཤོག་ངོས། ༡༡༩ ལས་ཞལ་འཕངས་བའི་མདོ་ལུང་གཉིས་པ་དེ་ཉིད་ལ་འགྲེལ་བཤད་གནང་ཚུལ་ནི།   “མཚམས་མེད་བྱས་པ་དེ་མ་ཐག་ཏུ་དམྱལ་བ་དག་ཏུ་སྐྱེའོ་ཞེས་གསུངས་པ་དེའི་དགོངས་དོན་ནི། འགྲོ་བ་གཞན་དུ་མི་འགྲོ་བར་ཞེས་བྱ་བའི་དོན་ཡིན་ཏེ། དེར་ནི་སྐྱེས་ནས་མྱོང་བར་འགྱུར་བའི་ལས་སུ་གསུངས་སོ། ། འོན་ཏེ་སྒྲ་ཇི་བཞིན་དུ་བརྟགས་ན་ནི་ལྔ་ཁོ་ན་བྱས་ནས་ཡིན་གྱི་གཅིག་ཅེས་བྱ་བར་ཡང་མི་འགྱུར་ལ། བྱས་མ་ཐག་ཏུ་ཡིན་གྱི་དུས་གཞན་གྱི་བར་དུ་གསོན་པོར་འདུག་ནས་ཀྱང་མ་ཡིན་ནོ། ། སྲིད་པ་བར་མ་སྐྱེ་བ་ཉིད་ཡིན་པར་ཀོ་སུ་ཞིག་མི་འདོད་དེ།  འདི་འཆི་བའི་སྲིད་པའི་མཇུག་ཐོགས་སུ་སྐྱེ་བ་ལ་མངོན་དུ་ཕྱོགས་པའི་ཕྱིར་སྲིད་པ་བར་མ་ཁོ་ནས་དམྱལ་བ་དག་ཏུ་སྐྱེ་བ་ཡིན་གྱི་སྐྱེས་པ་ཡིན་ནོ་ཞེས་ནི་མི་སྨྲའོ། །   ཞེས་འགྲེལ་བཤད་གནང་ཡོད། 《མཛོད་རང་འགྲེལ》 ལས། (སྡེ་བསྟན། )པོད། ༡༤༠ ཤོག་ངོས། ༡༡༩ ལས་ཞལ་འཕངས་བའི་མདོ་ལུང་གསུམ་པ་དེ་ཉིད་ལ་འགྲེལ་གནང་ཚུལ་ནི།  “བྲམ་ཟེ་ན་ཚོད་ཁྱེར་ཟིན་རྒ་བ་དང་། ། ན་བ་ཡིན་ཏེ་གཤིན་རྗེའི་དྲུང་དུ་ཕྱིན། ། བར་ན་ཁྱོད་ཀྱི་གནས་ཀྱང་ཡོད་མིན་ཞིང་། ། ཁྱོད་ཀྱི་ལམ་བརྒྱགས་ཀྱང་ནི་ཡོད་མ་ཡིན། །ཞེས་གསུངས་པའི་ཚིགས་སུ་བཅད་པའི་དགོངས་དོན་ནི།  མི་དག་གི་ནང་ན་གནས་སུ་མེད་དོ་སྙམ་པ་ཡིན་ནོ། ། ” མདོ་ལུང་དེ་དག་ལ་མཛོད་རང་འགྲེལ་གྱིས་འགྲེལ་བཤད་དེ་ལྟར་གནང་ཡོད།

༤ མཛོད་ལས་བར་སྲིད་ཡོད་པར་སྒྲུབ་བྱེད་ཀྱི་རིགས་པའི་རྣམ་གཞག་གི་སྐོར།

བར་སྲིད་མི་འདོད་པའི་སྡེ་པ་དེ་དག་གིས་ཁུངས་བཅོལ་སའི་མདོ་ལུང་དེ་དག་སློབ་དཔོན་གྱིས་དགོངས་པ་དེ་ལྟར་བཀྲལ་ནས་བར་སྲིད་ཡོད་པ་སྒྲུབ་བྱེད་ཀྱི་རིགས་པའི་རྣམ་གཞག་དངོས་ལ་ཞུགས་ནས་བར་སྲིད་སྒྲུབ་བྱེད་ལ་བརྟགས་ན།   《མཛོད་རང་འགྲེལ་》 (སྡེ་བསྟན།) པོད།  ༡༤༠ ཤོག་ངོས།  ༥༡༢ལས།  “སྡེ་པ་གཞན་དག་ན་རེ། འཆི་བའི་སྲིད་པ་ཆད་པ་ཁོ་ན་ལས་སྐྱེ་བའི་སྲིད་པ་འབྱུང་ངོ་ཞེས་ཟེར་ཏེ། དེ་ནི་མི་འདོད་དོ། །དེ་ཅིའི་ཕྱིར་ཞེ་ན། རིགས་པ་དང་ལུང་ལས་ཏེ། རེ་ཞིག་རིགས་པ་ལ་བརྟེན་ནས། ” གཞུང་ཚན་དེས་མཚམས་སྦྱར་ནས་བར་སྲིད་སྒྲུབ་བྱེད་ཀྱི་རིགས་པ་དངོས་ནི།  དབྱིག་གཉེན་གྱི་《མཛོད་རྩ་བ་》 ( སྡེ་བསྟན།) པོད། ༡༤༠ ཤོག་ངོས།  ༧ལས།  “འབྲུ་ཡི་རྒྱུན་དང་ཆོས་མཐུན་ཕྱིར། །སྲིད་པ་ཆད་ལས་བྱུང་བ་མིན། །”ཞེས་བར་སྲིད་སྒྲུབ་བྱེད་ཀྱི་རིགས་པ་གསུངས་པ་དེ་《རྒྱལ་པོའི་སྲས་ཀྱི་འགྲེལ་བཤད་》 (སེར་གཙུག་ནང་བསྟན་དཔེ་རྙིང་འཚོལ་བསྡུ་ཁང་ནས་སྒྲིག་པའི་( སྡེ་བསྟན།) པོད། ༢ ཤོག་ངོས། ༣༢ ལས། “ སྐྱེ་བའི་སྲིད་པའི་གཟུགས་ནི་གང་དང་འབྲལ་བ་དང་གང་དུ་འབྱུང་བ་དེ་དག་གི་བར་མའི་རྒྱུན་ལ་ཡོད་པའི་གཟུགས་སྔོན་དུ་འགྲོ་བ་ཅན་ཡིན་ཏེ།  རང་གི་ཉེ་བར་ལེན་པ་གཟུགས་ཀྱི་རྒྱུན་གྱི་ངོ་བོའི་ངོ་བོ་ཉིད་ཅན་ཡིན་པའི་ཕྱིར། དཔེར་ན་རྒྱུན་ཕྱིས་འབྱུང་བའི་གཟུགས་ལྟ་བུའོ། ། ”ཞེས་གསུངས་སོ། ། དེའི་དོན་གནད་བསྡུས་པའི་ཚུལ་གྱིས་སྦྱོར་ངག་ཏུ་བཀོད་ན། སྐྱེ་བའི་སྲིད་པས་བསྡུས་པའི་གཟུགས་ཆོས་ཅན། གང་དང་འབྲལ་བ་དང་གང་དུ་འབྱུང་བ་དེ་དག་གི་བར་མའི་རྒྱུན་ལ་ཡོད་པའི་གཟུགས་སྔོན་དུ་འགྲོ་བ་ཅན་ཡིན་ཏེ། རང་གི་ཉེ་བར་ལེན་པ་འཆི་བའི་སྲིད་པས་བསྡུས་པའི་གཟུགས་ཀྱི་རྒྱུན་གྱི་ངོ་བོ་ཡིན་པའི་ཕྱིར། དཔེར་ན། རྒྱུན་ཕྱིས་འབྱུང་བའི་གཟུགས་ལྟ་བུའོ། །

ཡང་《རྒྱལ་པོའི་སྲས་ཀྱི་འགྲེལ་བཤད་》  (སེར་གཙུག་ནང་བསྟན་དཔེ་རྙིང་འཚོལ་བསྡུ་ཁང་ནས་སྒྲིག་པའི་( སྡེ་བསྟན།) པོད། ༢ ཤོག་ངོས། ༣༢ལས།   “རྒྱུན་གྱི་འབྱུང་བའི་ཆོས་རྣམས་ནི་རྒྱུན་མི་འཆད་པར་ཡུལ་གཞན་དུ་འབྱུང་བའི་སྒོ་ནས་ཡུལ་གཞན་དག་ཏུ་འབྱུང་བ་མཐོང་སྟེེ། དཔེར་ན་འབྲུའི་རྒྱུན་ལྟ་བུའོ། ། འབྲུ་ཡུལ་གཞན་དང་གཞན་དུ་ཁྱེར་བ་ན་འབྲུ་དེ་གྲོང་སྔ་མར་འགགས་ནས་གང་ནས་འབྲལ་བའི་ཡུལ་དང་གང་དུ་ཕྱིན་པའི་གྲོང་དེ་གཉིས་བར་དུ་མི་འབྱུང་བར་དཔག་ཚད་དུ་མས་བཅད་པའི་གྲོང་གཞན་དུ་ཆད་ནས་འབྱུང་བ་མ་ཡིན་ནོ། ། འོ་ན་ཅི་ཞེ་ན། ནམ་མཁའི་ཕྱོགས་སུ་འབྲུའི་རྒྱུན་སྔ་མ་སྔ་མ་འགགས་པ་དང་བར་མ་དང་ཕྱི་མ་རིམ་གྱིས་གྲོང་གཞན་དུ་འབྱུང་ངོ་། ། “ ཞེས་གསུངས་སོ། ། དེ་ལྟར་དུ་གང་དུ་འཆི་བའི་གཟུགས་དེ་གང་དུ་སྐྱེ་བའི་གཟུགས་ཀྱི་བར་དུ་དཔག་ཚད་དུ་མས་ཆོད་པ་ལ་མཚོན་ན་འཆི་བའི་གཟུགས་དེའི་སྐད་ཅིག་བར་མ་ཆད་པར་བརྒྱུད་དེ་རིམ་གྱིས་སྐྱེ་བའི་གཟུགས་ཀྱི་ངོ་བོར་འགྱུར་དགོས་ཀྱི། དེ་ལྟར་མིན་པར་བར་དུ་རྒྱུན་ཆད་ནས་སྐྱེ་བའི་གཟུགས་ཀྱི་ངོ་བོར་འགྱུར་བ་མི་སྲིད་དོ། །དེས་ན་འཆི་བའི་སྲིད་པས་བསྡུས་པའི་གཟུགས་དང་སྐྱེ་བའི་སྲིད་པས་བསྡུས་པའི་གཟུགས་གཉིས་ཀྱི་བར་དུ་གཟུགས་སྐད་ཅིག་མ་དུ་མ་བརྒྱུད་དགོས་ལ་དེ་ནི་བར་མ་དོའི་སྲིད་པའི་གཟུགས་ཡིན་ནོ་ཞེས་པའོ། །  དེ་ཡང་གཟུགས་ལ་ཆགས་པ་དང་བཅས་ཡིན་པས་སྐྱེ་བ་ལེན་པའི་རྣམ་ཤེས་ནི་དབང་པོ་གཟུགས་ཅན་པ་དང་འབྲལ་མི་རུང་བར་སྐྱེ་ལ་དབང་པོ་དེ། ཤི་བའི་ཡུལ་གཅིག་ནས་སྐྱེ་བའི་ཡུལ་གཞན་དུ་འགྲོ་བ་ལ་བར་གྱི་གཟུགས་རྒྱུན་རིམ་གྱིས་བརྒྱུད་དགོས་པའི་རྒྱུ་མཚན་གྱིས་བར་སྲིད་ཡོད་པར་ཁས་ལེན་དགོས་ལ། གཟུགས་ལ་ཆགས་པ་དང་བྲལ་བའི་རྒྱུ་མཚན་གྱིས་གཟུགས་མེད་དུ་སྐྱེ་བ་ལེན་པའི་ཚེ་རྣམ་ཤེས་དེ་གང་དུ་ཤི་བ་དེ་ཉིད་དུ་སྐྱེ་སྲིད་གྲུབ་ཀྱི་དབང་པོ་གཟུགས་ཅན་པ་དེ་ཉིད་རྒྱུན་གྱི་སྒོ་ནས་ཡུལ་གཞན་དུ་འགྲོ་བ་མེད་པས་བར་སྲིད་བརྒྱུད་མི་དགོས་སོ། །  རྒྱུ་མཚན་དེའི་ཕྱིར་གཟུགས་མེད་ལ་བར་དོ་མེད་པའི་རྒྱུ་མཚན་ཡང་དེ་ལྟར་སྨྲ་བར་བྱེད་ཀྱིན་ཡོད་དོ། །

དཔྱད་པར་བྱ་བའི་གནད་གལ་ཆེ་བ་ཞིག་ལ།  དཔེར་ན་འདོད་གཟུགས་ལྟ་བུ་ལ་གང་དུ་འཆི་སྲིད་འགག་མ་ཐག་པའི་གནས་དེར་བ་གླང་ལྟ་བུ་ཞིག་ཏུ་སྐྱེ་སྲིད་གྲུབ་ན་དེ་ལ་གོང་ནས་བཤད་པ་ལྟར་བར་སྲིད་དེ་ཡོད་དགོས་པའི་རྒྱུ་མཚན་མེད་པའི་ཕྱིར། དེ་ལ་བར་སྲིད་མེད་ཀྱང་རུང་ངམ་ཅི། གལ་སྲིད་དེ་ལྟར་རུང་ན་ནང་བསྟན་གྱི་གཞུང་ལུགས་མང་ཆེ་ཤོས་ནང་དུ་བར་དོ་མེད་པའི་དམིགས་བསལ་ཞིག་གཟུགས་མེད་ལས་གཞན་དག་གང་ཡང་མ་བཤད་པས་དེ་དང་འགལ་བའི་སྐྱོན་མེད་དམ། མི་རུང་ན་དེ་ལ་བར་སྲིད་ཡོད་པའི་རྒྱུ་མཚན་གང་ཡོད་བློ་གཟུ་བོའི་ངང་ནས་དཔྱད་བརྗོད་ཅིག་བྱེད་དགོས་པ་གནད་ཆེ་ཤོས་ཤིག་ཡིན་པར་འདུག ། བར་སྲིད་མེད་པར་འདོད་པའི་སྡེ་པ་གཞན་དག་མང་ཆེ་ཤོས་ཀྱིས་སྐྱེ་སྲིད་དེ་འཆི་སྲིད་ཆད་ཙམ་ནས་བྱུང་གི་དེའི་བར་སྲིད་པ་གཞན་བརྒྱུད་མི་དགོས་པར་གསུངས། དེ་དག་གིས་དེའི་དཔེ་ལ་གདོང་གི་གཟུགས་བརྙན་མེ་ལོང་ལ་ཆ་འཕོ་བར་བཞག་པར་མཛད། དེ་ལ་སློབ་དཔོན་དབྱིག་གཉེན་གྱིས་དཔེ་མ་གྲུབ་པ་དང་དཔེ་དོན་གཉིས་མི་མཚུངས་སོགས་ཀྱི་སྒོ་ནས་སུན་འབྱིན་མང་དུ་བྱས་ཡོད།  ང་ཚོ་གཅིག་བྱས་ན་བར་སྲིད་གླེང་ན་བར་སྲིད་སྒྲུབ་ཚུལ་གྱི་རིགས་པ་འདི་དག་གལ་གནད་ཆེ་ཤོས་ཡིན་པ་མཐོང་མཁན་མང་པོ་ཡོད། ཡིན་ནའང་ད་སྐབས་ངས་བར་སྲིད་སྐོར་གྱི་ཞིབ་གླེང་རགས་བསྡུས་ནི་བར་སྲིད་ཡོད་པ་ང་ཚོ་ནང་པའི་ལྟ་གྲུབ་ལ་སྦྱོང་པ་སྔོན་སོང་ཅན་དང་དེ་མ་ཡིན་པའི་ལས་རྒྱུ་འབྲས་དང་། སྐྱེ་བ་སྔ་ཕྱི་ཡོད་པར་ཁས་ལེན་མཁན་ཞིག་ལ་མཚོན་ན་བར་སྲིད་སྒྲུབ་ཚུལ་གྱི་རིགས་པ་འདི་ནམ་རྒྱུན་གྱི་སྐད་ཆ་ཞིག་ལས་མ་འདས། ཡིན་ནའང་བར་སྲིད་དེ་ནང་པའི་གཞུང་ལུགས་ཆེ་ཁག་ནང་ནས་ངོས་འཛིན་བྱེད་སྟངས་དང་བར་སྲིད་ཀྱི་ཁྱད་ཆོས། མངལ་དུ་འཇུག་ཚུལ་སོགས་ཀྱི་རྣམ་གཞག་དེ་དག་ནང་པའི་གཞུང་ལུགས་ཀྱིས་ཅི་འདྲ་ངོས་འཛིན་བྱས་ཡོད་མེད་ཀྱི་ཐད་ལ་མི་མང་ཤོས་དེ་ལྐོག་གྱུར་གྱི་སྣང་བ་ཞིག་ལས་ངེས་ཤེས་བརྟན་ཚུགས་ཤིག་མེད་པས། རྒྱུ་མཚན་དེའི་དབང་གིས་ད་རེས་བར་སྲིད་སྐོར་ཀྱི་རྣམ་གཞག་རགས་བསྡུས་བྲིས་པ་ཡིན།

༥ དབྱིག་གཉེན་གྱི་བར་སྲིད་ཡོད་པར་འདོད་པའི་ཁུངས་ཀྱི་མདོ་ལུང་གི་སྐོར།

《སྲིད་པ་བདུན་པའི་མདོ་》ལས། “སྲིད་པ་ནི་བདུན་ཏེ། དམྱལ་བའི་སྲིད་པ་དང་། དུད་འགྲོའི་སྲིད་པ་དང་། ཡི་དྭགས་ཀྱི་སྲིད་པ་དང་། ལྷའི་སྲིད་པ་དང་། མིའི་སྲིད་པ་དང་། ལས་ཀྱི་སྲིད་པ་དང་། སྲིད་པ་བར་མའོ། །” ཞེས་དང་།  《མངལ་དུ་འཇུག་པའི་མདོ་》ལས།  “གནས་གསུམ་མངོན་དུ་གྱུར་པས་མའི་མངལ་དུ་བུ་ཆགས་པར་གྱུར་ཏེ། མ་རུང་ཞིང་ཟླ་མཚན་དང་ལྡན་པ་དང༌། ཕ་མ་ཆགས་པར་གྱུར་ཅིང་ཕྲད་པ་དང༌། དྲི་ཟ་ཡང་ཉེ་བར་གནས་པར་གྱུར་ནའོ་ཞེས་དྲི་ཟ་གསུངས་ཤིང་དྲི་ཟ་ནི་སྲིད་པ་བར་མ་ཡིན་པའི་ཕྱིར།” ཡང་ 《རྟ་ལེན་གྱི་བུའི་མདོ་》ལས། “ བཅོམ་ལྡན་འདས་ཀྱིས་བྲམ་ཟེ་རྟ་ལེན་གྱི་བུ་ལ། རྟ་ལེན་གྱི་བུ་ཁྱོད་ཀྱིས་མཆིམས་བྲང་ལ་དྲི་ཟ་ཉེ་བར་གནས་པ་གང་ཡིན་པ་དེ་རྒྱལ་རིགས་སམ། བྲམ་ཟེའམ། རྗེའུ་རིགས་སམ། དམངས་རིགས་སམ། འོན་ཏེ་ཤར་ཕྱོགས་ནས་འོངས་པ་ཞིག་གམ། འོན་ཏེ་ལྷོ་དང་ནུབ་དང་བྱང་ནས་འོངས་པ་ཞིག་ཤེས་སམ།  ཞེས་གསུངས་སོ། །”  《ལུང་ཕྲན་ཚེགས་》ལས།  “དགའ་བོ་ཕ་མར་ཆགས་པར་གྱུར་ཅིང་ཕྲད་པ་དང་། མ་ཡང་རུང་བར་གྱུར་ཅིང་ཟླ་མཚན་དང་ལྡན་པ་དང་།  དྲི་ཟ་ཡང་ཉེ་བར་གནས་པར་གྱུར་ཅིང་འཇུག་པར་འདོད་ན་སྟེ། དགའ་བོ་དྲི་ཟ་ཞེས་བྱ་བ་དེ་ནི་སྲིད་པ་བར་མ་བའི་སེམས་ཅན་གྱི་ཚིག་བླ་དྭགས་ཡིན་ནོ་ཞེས་གསུངས་བའི་ཕྱིར་རོ། །

《 ཕྱིར་མི་འོང་བ་ལྔར་གསུངས་པའི་མདོ་》 ལས། བཅོམ་ལྡན་འདས་ཀྱིས་ཕྱིར་མི་འོང་བ་ནི་ལྔ་སྟེ། བར་མ་དོ་དང་། སྐྱེས་ནས་དང་། མངོན་པར་འདུ་བྱེད་པ་མེད་པ་དང་། མངོན་པར་འདུ་བྱེད་པ་དང་བཅས་པར་ཡོངས་སུ་མྱ་ངན་ལས་འདའ་བ་དང་། གོང་དུ་འཕོ་བའོ། ། ” ཞེས་གསུངས་སོ། །  《རྣམ་པར་གཏན་ལ་དབབ་པའི་བསྡུ་བ་》སྡེ་བསྟན། པོད། ༤༠༣༨ ཤོག་ངོས། ༥༢ལས།   “ཤི་འཕོས་ནས་སེམས་དང་སེམས་བྱུང་རྟེན་[ཡང] མེད་པ་རྣམས་ནི་ཡུལ་གཞན་དུ་ཕྱིན་མི་སྲིད་པའི་ཕྱིར་དང་། རྣམ་པར་འཁྲུལ་བ་ཙམ་ཡིན་པས་བྲག་ཆ་ལྟ་བུར་[ཡང] མི་རུང་བ་དང་། མ་འགགས་པའི་ཕྱིར་གཟུགས་བརྙན་ལྟ་བུར་ཡང་མི་རུང་ངོ་། ། [འགྲོ་བ]མེད་པའི་ཕྱིར་དམིགས་པ་འཛིན་པ་ལྟ་བུར་ཡང་མི་རུང་སྟེ། གང་གི་ཕྱིར་དཔེ་དེ་དག་མི་རུང་བ་དེའི་ཕྱིར་བར་མ་དོའི་སྲིད་པ་ཡོད་པར་རིགས་པར་བྱའོ། ། ཞེས་གསུངས་སོ། །  མདོ་ལུང་དེ་དག་གིས་བར་སྲིད་ཡོད་པར་གྲུབ་བོ། །”  《འགྲེལ་བཤད་ཉེ་བར་མཁོ་བ་》 སྡེ་བསྟན། པོད།   ༡༡༣ ཤོག་ངོས། ༡༨ལས།  “བསམ་གཏན་དག་གི་བཅུ་ཚན་བཞི། ། གཟུགས་མེད་དག་གི་བདུན་ཚན་གསུམ། ། འདུ་ཤེས་ཀྱི་ནི་དྲུག་ཚན་དུ། ། མཛད་ནས་ཚོམས་སུ་ཡང་དག་བསྡེབས། །  ཞེས་བསམ་གཏན་རེ་རེ་ལ་གནས་གསུམ་གསུམ་དང་། སྔར་བཤད་པའི་བར་མ་དོར་མྱ་ངན་ལས་འདའ་བ་ནས་གོང་དུ་འཕོ་བའི་བར་རྣམ་པ་ལྔ་དང་།  འཆི་བ་མེད་པའི་དབྱིངས་ལ་སེམས་གཏོད་པ་དང་། སེམས་རྣམ་པར་གྲོལ་བ་ཞེས་བྱ་བའི་བཅུ་བཅུ་དང་། གཟུགས་མེད་དང་པོ་གསུམ་ལ་བར་མ་དོར་མྱ་ངན་ལས་འདའ་བ་མ་གཏོགས་པ་བཞི་བཞི་དང་།  གནས་གཞན་ཐ་དད་མེད་པའི་རིས་གཅིག་དང་། འཆི་བ་མེད་པའི་དབྱིངས་ལ་སེམས་གཏོད་པ་དང་།  སེམས་རྣམ་པར་གྲོལ་བ་བདུན་བདུན་དང་།  འདུ་ཤེས་མེད་འདུ་ཤེས་མེད་མིན་ལ་གོང་དུ་འཕོ་བ་མ་གཏོགས་པ་དྲུག་གསུངས་པས་ཀྱང་གྲུབ་སྟེ། དེ་ལ་འཆི་བ་མེད་པ་ལས་འདས་པ་དང་། སེམས་རྣམ་པར་གྲོལ་བ་ནི་ཟག་པ་ལས་གྲོལ་བའི་ཡེ་ཤེས་ཏེ་ལྷག་བཅས་ལྷག་མེད་ཀྱི་མྱང་འདས་ཡིན་པར་མངོན་ནོ། ། དེས་ན་གཟུགས་ཁམས་སུ་བར་མ་དོར་མྱ་ངན་ལས་འདའ་བ་གསུངས་ལ། གཟུགས་མེད་དུ་མ་གསུངས་པའི་ཕྱིར་ཡང་བར་སྲིད་ཡོད་པར་ཤེས་སོ། །  ” ཞེས་གསུངས་སོ། །

༦ བར་སྲིད་ཀྱི་ཁྱད་ཆོས་མཛོད་རང་འགྲེལ་དང་ཀུན་བཏུས་སོགས་ལས་ཇི་ལྟར་བཤད་པའི་སྐོར།

མཛོད་ཀྱི་གནས་གསུམ་པའི་ཁ་ཐོགས་སུ་བར་སྲིད་ཀྱི་ཁྱད་ཆོས་བཤད་པའི་སྐབས་སུ་རྩ་གཞུང་དང་སྦྲགས་ནས་ཁྱད་ཆོས་སོགས་རིམ་བཞིན་འབྲི་བར་བྱའོ། །  《མངོན་པ་མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༧ལས།   “དེ་ནི་འཕེན་པ་གཅིག་པའི་ཕྱིར། ། སྔོན་དུས་སྲིད་འབྱུང་ཤ་ཚུགས་ཅན། ། ” ཞེས་པ་ནས་བར་སྲིད་ཀྱི་ཁྱད་ཆོས་ནི་རིམ་བཞིན་བསྟན་ནོ། །

༡ བར་སྲིད་ཀྱི་སེམས་ཅན་ཤ་ཚུགས་ཅན་ཡིན་མིན།  《མཛོད་རྩ་བ་》  སྡེ་བསྟན། པོད། ༡༤༠ ཤོག་ངོས། ༧ ལས། “ དེ་ནི་འཕེན་པ་གཅིག་པའི་ཕྱིར། ། སྔོན་དུས་སྲིད་འབྱུང་ཤ་ཚུགས་ཅན། ། ”ཞེས་གསུངས། དེའི་དོན་ནི། འགྲོ་བ་གང་དུ་སྐྱེ་བར་འགྱུར་བ་དེའི་ཤ་ཚུགས་ཡིན་པ་སྟེ། དཔེར་ན། བ་གླང་དུ་སྐྱེ་བར་འགྱུར་བ་ཡིན་ན་བ་གླང་གི་ཤ་ཚུགས་ཅན་ཡིན་པ་ལྟ་བུའོ། ། རྒྱུ་མཚན་ཅིའི་ཕྱིར་ཞེ་ན། དེ་གཉིས་འཕེན་བྱེད་ཀྱི་ལས་གཅིག་གིས་འཕངས་པའི་ཕྱིར་རོ་ཞེས་སྨྲ་བར་བྱེད་དོ། །  《རྩ་བ་ལས། 》དེ་ནི་འཕེན་པ་གཅིག་པའི་ཕྱིར། ། ཞེས་གསུངས་སོ། །   《མཛོད་རང་འགྲེལ་》 (སྡེ་བསྟན། )པོད། ༡༤༠ ཤོག་ངོས། ༡༡༩ ལས། “ ལས་གང་གིས་འགྲོ་བ་འཕེན་པ་དེ་ཉིད་ཀྱི་དེར་ཕྱིན་པར་བྱ་བའི་ཕྱིར་སྲིད་པ་བར་མ་ཡང་འཕེན་ཏེ། དེའི་ཕྱིར་དེ་ནི་འགྲོ་བ་གང་དུ་འགྲོ་བར་འགྱུར་བའི་འགྲོ་བ་དེ་དུས་སྔ་མའི་སྲིད་པ་འབྱུང་བར་འགྱུར་བ་གང་ཡིན་པ་དེའི་ཤ་ཚུགས་ལྟ་བུར་འགྱུར་རོ། ། དེ་ལྟ་ན་འོ་ན་ཁྱི་མོ་ལ་སོགས་པའི་མངལ་གཅིག་ཏུ་འགྲོ་བ་ལྔ་པའི་སྲིད་པ་བར་མ་མངོན་པར་འགྲུབ་པས་དམྱལ་བའི་སྲིད་པ་བར་མས་མའི་མངལ་ཚིག་པར་འགྱུར་རོ་ཞེ་ན། རེ་ཞིག་སྲིད་པ་སྔ་མ་ལ་ཡང་དམྱལ་བ་པ་རྣམས་ལྷག་པ་དག་ན་འཕྱན་པ་ན་རྟག་ཏུ་འབར་བ་མ་ཡིན་ན་སྲིད་པ་བར་མ་པ་རྣམས་ལྟ་སྨོས་ཀྱང་ཅི་དགོས། ཡང་ན་འབར་དུ་ཆུག་ན་ཡང་དེ་ནི་ལུས་ཤིན་ཏུ་དང་བའི་ཕྱིར་ཇི་ལྟ་བ་བལྟར་མི་ནུས་པ་དེ་ལྟར་རེག་པ་ཡང་མི་མི་ནུས་པས་འདི་ནི་ཀླན་ཀར་མི་རུང་ངོ་། ། སྲིད་པ་བར་མ་རྣམས་ཀྱང་མངལ་ན་ཕན་ཚུན་མ་རེག་པའི་ཕྱིར་དང་། ལས་ལ་རག་ལུས་པའི་ཕྱིར་མི་འཚིག་གོ་ཞེས་གསུངས་སོ། ། ”

༢ བར་སྲིད་ཀྱི་སེམས་ཅན་གྱི་བོངས་ཚོད།  དཔེར་ན་བྱིས་པ་ལོ་ལྔ་འམ་དྲུག་ལོན་ལྟ་བུ་དང་། དེ་ཡང་དབང་པོ་གསལ་བ་ཡིན་ནོ། ། 《མཛོད་རང་འགྲེལ》་ལས། “ བོངས་ཚད་ནི། དཔེར་ན་བྱིས་པ་ལོ་ལྔའམ་དྲུག་ལོན་པ་ལྟ་བུ་སྟེ། དེ་ཡང་དབང་པོ་གསོ་བ་ཡིན་ནོ།  ཞེས་གསུངས་སོ། ། ”

༣ བར་སྲིད་ཀྱི་སེམས་ཅན་གོས་དང་བཅས་མིན་ནི། ངོ་ཚ་ཤེས་པ་ཤས་ཆེ་བའི་ཕྱིར་གཟུགས་ཁམས་ཀྱི་བར་སྲིད་གོས་དང་བཅས་ཤིང་། ངོ་ཚ་ཆུང་བའི་ཕྱིར་འདོད་པའི་བར་སྲིད་ཕལ་ཆེ་བ་གཅེར་བུ་དང་། དེ་ལ་ཡང་འགའ་ཞིག་གོས་དང་བཅས་པར་གསུངས་ཏེ།  《མཛོད་རང་འགྲེལ་》སྡེ་བསྟན། པོད། ༡༤༠ ཤོག་ངོས། ༡༢༠ ལས། “ གཟུགས་ན་སྤྱོད་པའི་སྲིད་པ་བར་མ་ཡང་བོངས་ཚོད་རྫོགས་པ་དང་། ངོ་ཚ་ཤེས་པ་ཤས་ཆེ་བའི་ཕྱིར་གོས་དང་བཅས་པར་འབྱུང་ངོ་། ། བྱང་ཆུབ་སེམས་དཔའི་ཡང་གོས་དང་བཅས་པ་ཡིན་ནོ། ། དགེ་སློང་མ་དཀར་མོའི་ཡང་གོས་དང་བཅས་པ་ཡིན་ཏེ། སྨོན་ལམ་གྱི་དབང་གིས་དེ་ཉིད་ཀྱིས་དཀྲིས་ནས་བསྲེགས་པའི་བར་དུ་ཡིན་ནོ། །  འདོད་པའི་ཁམས་ན་ངོ་ཚ་མེད་པའི་ཤས་ཆེ་བའི་ཕྱིར་གཞན་ནི་གཅེར་བུ་ཡིན་ནོ། །  ”ཞེས་གསུངས་སོ། །

༤ བར་སྲིད་ཀྱི་སེམས་ཅན་གང་གིས་མཐོང་མིན་ནི།《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༡༢༠  ལས“རིས་མཐུན་ལྷ་མིག་དག་པས་མཐོང་། ། “ཞེས་པའི་དོན་ནི།  ལྷའི་མིག་གི་མངོན་ཤེས་ཀྱིས་མཐོང་ཞིང་། སྐྱེས་ཐོབ་ཀྱི་མིག་གིས་མི་མཐོང་ངོ་། ། རང་དང་རིགས་མཐུན་པའི་བར་སྲིད་རྣམས་ཕན་ཚུན་མཐོང་ཡང་རིགས་མི་མཐུན་པ་རྣམས་མི་མཐོང་ངོ་། །གཞན་དག་ན་རེ་ལྷའི་བར་སྲིད་ཀྱིས་འགྲོ་བ་ལྔ་གའི་བར་སྲིད་མཐོང་བ་ནས་མི་དང་ཡི་དྭགས་དང་དུད་འགྲོའི་བར་སྲིད་ཀྱིས་བཞི་དང་གསུམ་དང་གཉིས་དང་དམྱལ་བའི་བར་སྲིད་ཀྱིས་དམྱལ་བའི་བར་སྲིད་ཁོ་ན་མཐོང་བས་གོང་མ་གོང་མའི་སྲིད་པ་བར་མ་དང་ལྷའི་མིག་རྣམ་པར་དག་པ་གསུམ་གྱིས་མཐོང་ངོ་ཟེར་རོ། །  《མཛོད་རང་འགྲེལ་》སྡེ་བསྟན། པོད། ༡༤༠ ཤོག་ངོས། ༡༢༠ ལས།  “སྲིད་པ་བར་མ་རིས་མཐུན་པ་དག་གིས་མཐོང་ངོ་། ། གང་དག་ལ་ལྷའི་མིག་ཤིན་ཏུ་རྣམ་པར་དག་པ་མངོན་པར་ཤེས་པ་ལས་བྱུང་བ་ཡོད་པ་དེ་དག་གིས་འདི་མཐོང་གི།  ཤིན་ཏུ་དང་བའི་ཕྱིར་སྐྱེས་ནས་ཐོབ་པའི་མིག་གིས་ནི་མི་མཐོང་ངོ་། ། གཞན་དག་ལྷའི་སྲིད་པ་བར་མ་པས་ནི་ཐམས་ཅད་མཐོང་ངོ་། ། མི་དང་། ཡི་དྭགས་དང་། དུད་འགྲོ་དང་། དམྱལ་བའི་སྲིད་པ་བར་མ་རྣམས་ཀྱིས་ནི་གོང་མ་མ་གཏོགས་པའོ་ཞེས་ཟེར་རོ། ། ཞེས་གསུངས་སོ། །  ”

༥ བར་སྲིད་སེམས་ཅན་གྱི་རྫུ་འཕྲུལ་ནི། 《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༡༢༠ ལས། “ ལས་ཀྱི་རྫུ་འཕྲུལ་ཤུགས་དང་ལྡན། ། ”ཞེས་པའི་སྐབས་ནས་སྔོན་གྱི་ལས་ཀྱིས་བསྐྱེད་པའི་རྫུ་འཕྲུལ་གྱི་ཤུགས་ཆེན་པོ་དང་ལྡན་པས་ཤིན་ཏུ་མགྱོགས་པ་དང་ནམ་མཁའ་ལ་ཐོགས་མེད་དུ་འགྲོ་བའི་ཤུགས་དང་ལྡན་ནོ། །ལུས་ཀྱང་རྫུ
་འཕྲུལ་དང་ལྡན་པ་བཞིན་དུ་ཐོགས་པ་མེད་དོ། ། 《མཛོད་རང་འགྲེལ》སྡེ་བསྟན། པོད། ༡༤༡ ཤོག་ངོས། ༡༣༧ ལས། “རྫུ་འཕྲུལ་ནི་ནམ་མཁའ་ལ་འགྲོ་བའོ། ། ལས་ཀྱི་རྫུ་འཕྲུལ་བྱེད་པས་ན་ལས་རྫུ་འཕྲུལ་ལོ། ། དེའི་ཤུགས་ནི་ལས་ཀྱི་རྫུ་འཕྲུལ་གྱི་ཤུགས་དེ་མགྱོགས་པ་ཉིད་དོ། ། དེ་འདི་ལ་ཡོད་པས་ན་ལས་ཀྱི་རྫུ་འཕྲུལ་གྱི་ཤུགས་དང་ལྡན་པའོ། ། དེས་ན་འདི་ནི་སངས་རྒྱས་རྣམས་ཀྱིས་ཀྱང་དགག་པར་མི་སྤྱོད་དོ། ། ལས་སྟོབས་དང་ལྡན་པའི་ཕྱིར་རོ། ། ཞེས་གསུངས་སོ། ། ”

༦ བར་སྲིད་ཀྱི་སེམས་ཅན་དབང་པོ་ཚང་མིན་ནི།《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༨ ལས། “ དབང་པོ་ཀུན་ཚང་ཐོགས་མེད་ལྡན། ། ”ཞེས་པའི་དོན་ནི།   དབང་པོ་ཀུན་ཚང་ཞེས་པའི་སྐབས་ནས་སྲིད་པ་འཚོལ་བ་ཡིན་པའི་ཕྱིར་མིག་ལ་སོགས་པའི་དབང་པོ་གཟུགས་ཅན་ཀུན་ཚང་ཞིང་དེ་ལ་ལོང་བ་སོགས་མེད་དོ། ། 《མཛོད་རང་འགྲེལ་》སྡེ་བསྟན། པོད། ༡༤༠ ཤོག་ངོས  ༡༢༠ ལས། “ དབང་པོ་ཀུན་ཚང་། དབང་པོ་ལྔ་ཆར་ཚང་པའོ། ། ཞེས་གསུངས་སོ། ། ”

༧ བར་སྲིད་ཀྱི་སེམས་ཅན་ཐོགས་བཅས་ཡིན་མིན་ནི། 《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༨ ལས། “ཐོགས་མེད་ལྡན། ། ” ཞེས་པའི་སྐབས་ནས་གཟུགས་ཤིན་ཏུ་ཕྲ་བས་རྩིག་པ་དང་རི་བྲག་ལ་སོགས་པ་ལ་མི་ཐོགས་པར་གསུངས་འདུག་ལ། གཞུང་དོན་དེ་ལྟར་ཡིན་པའང་གྲགས་ཀྱིན་འདུག་མོད།  གཞན་རི་བྲག་དང་ཁང་རྩིགས་སོགས་གང་ལ་ཡང་མི་ཐོགས་པར་བཤད་པའི་དོན་དེ་དེ་ལྟར་ཡིན་མིན་ཞིབ་ཏུ་དཔྱད་དགོས་པའི་ཚུལ་ཡང་འདུག་སྟེ། རྒྱུ་མཚན།   《མཛོད་རང་འགྲེལ》 སྡེ་བསྟན། པོད། ༡༤༠ ཤོག་ངོས། ༡༢༠ ལས། “  ཐོགས་མེད་ལྡན། ཐོགས་པ་ནི་རྡུགས་པའོ། ། དེ་འདི་ལ་ཡོད་པས་ཐོགས་པ་དང་ལྡན་པའོ། ། ཐོགས་པ་མེད་པ་དང་ལྡན་པས་ན་ཐོགས་མེད་ལྡན་ཏེ། རྡོ་རྗེ་ལ་སོགས་པས་ཀྱང་མི་ཟློག་པའི་ཕྱིར་རོ། ། འདི་ལྟར་ལྕགས་ཀྱི་ཐུ་ལུམ་འབར་བ་གཤགས་ནས་དེའི་ནང་ནས་བྱུང་བའི་སྲིན་བུ་དམིགས་སོ་ཞེས་གྲག་གོ། ། ཞེས་གསུངས་སོ། ། ”  དེའི་སྐབས་ནས་བར་སྲིད་དེ་མའི་མངལ་དང་རྡོ་རྗེ་གདན་མ་གཏོགས་པ་གཞན་རིའི་རྒྱལ་པོ་རི་རབ་ལ་ཡང་ཕར་ཚུར་ཐོགས་མེད་དུ་འགྲོ་བ་བར་དོའི་ངོ་སྤྲོད་སོགས་ལས་མང་པོ་གསུངས་མོད།  རི་དང་བྲག་དང་རྩིགས་པ་སོགས་ལ་མ་ཐོགས་ན་ལྷག་པར་མའི་མངལ་དང་རྡོ་རྗེ་གདན་ལ་ཐོགས་འགྲོ་དོན་ཅི་ཞིག་ཡིན་ནམ།  རྡོ་རྗེ་གདན་གྱི་རི་བྲག་སོགས་རི་བྲག་གཞན་ལས་སྲ་བའི་རྒྱུ་མཚན་བྱས་ན། ལྕགས་དང་ཨར་འདམ་གྱི་ཁང་བརྩིགས་སོགས་ལ་ཐོགས་ངེས་པའི་ཚུལ་ཡང་འདུག ། རྡོ་རྗེ་གདན་གྱི་ས་གཞི་དེ་ལྕགས་དང་ཨར་འདམ་ལས་ཀྱང་སྲ་བ་ཡིན་པའི་ཚུལ་མེད་དོ། །  དེའི་ཕྱིར་ཐོགས་བཅས་དང་ཐོགས་མེད་ཀྱི་གོ་དོན་ནི་ཆུ་ལ་ཉ་བཞིན་རྡུལ་གྱི་གསེབ་ཏུ་རྒྱུ་བའི་དོན་ཡིན་གྱི། གཟུགས་ཅན་གཞན་གྱི་གོ་སར་གཟུགས་ཅན་གཞན་ཐོགས་མེད་དུ་འཇུག་པའི་དོན་དེ་ལྟར་མ་ཡིན་ནོ་སྙམ།  གོང་ནས་གཟུགས་ཅན་གྱི་དབང་པོ་བཤད་པའི་སྐབས་སུ་བསྟན་མེད་ཐོགས་བཅས་ཀྱི་གཟུགས་སུ་གསུངས་པའི་ཕྱིར་ཞེ་ན། བདེན་མོད་ཀྱི།  ཐོགས་མེད་དུ་གསུངས་པའི་ལུང་དེ་དག་གི་དོན་གཏན་ནས་མི་ཐོགས་པའི་དོན་ཡང་མིན་པར་གོང་དེ་དག་ལས་ཤེས་སོ། །

༨ བར་སྲིད་ཀྱི་སེམས་ཅན་ལྡོག་མི་ལྡོག་ནི།《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༨ ལས། “མི་ཟློག། ”ཞེས་པའི་སྐབས་ནས་དམྱལ་བ་ལ་སོགས་པ་འགྲོ་བ་གང་དུ་སྐྱེ་བར་འགྱུར་བའི་སྲིད་པ་བར་མ་གྲུབ་ན་ནི་ལྷ་ལ་སོགས་པའི་བར་སྲིད་གཞན་དུ་མི་བཟློག་ཏེ། ལས་ཀྱིས་འཕངས་པའི་རྣམ་པར་སྨིན་པ་མྱང་བའི་འགོ་བརྩམས་ཟིན་པའི་ཕྱིར་རོ། །  ཐོགས་མེད་ཀྱི་《ཀུན་བཏུས》སྡེ་བསྟན། པོད། ༡༣༠ ཤོག་ངོས། ༢༤༦ལས། ཅི་སྟེ་ན་ལྡོག་གོ། དེ་ན་གནས་པ་ཡང་ལས་གསོག་གོ་ཞེས་དམྱལ་བ་ལ་སོགས་པའི་སྲིད་པ་བར་མ་གྲུབ་ནས་མིའི་སྲིད་པ་བར་མར་འགྱུར་ཏེ་མིར་སྐྱེ་བ་ལ་སོགས་པའང་ཡོད་པ་བཤད་དེ།  《མཛོད་རང་འགྲེལ་》སྡེ་བསྟན། པོད། ༡༤༠ ཤོག་ངོས། ༡༢༠ ལས། “  དེ་འགྲོ་བ་གང་དུ་སྐྱེ་བར་འགྱུར་བ་དེ་ལས་རྣམ་པ་ཐམས་ཅད་དུ་མི་ཟློག་སྟེ། མིའི་སྲིད་པ་བར་མ་མེད་པར་གྱུར་ནས་ལྷའི་སྲིད་པ་བར་མའམ། གཞན་དུ་འགྱུར་བ་ནི་ནམ་ཡང་མེད་ཀྱི་འདི་འགྲོ་བ་གང་གི་དབང་དུ་བྱས་ནས་མངོན་པར་འགྲུབ་པ་དེ་ཁོ་ནར་སྐྱེ་བར་འགྱུར་གྱི་གཞན་དུ་ནི་མ་ཡིན་ནོ་ཞེས་བྱ་བར་ངེས་སོ། ། ཞེས་གསུངས་སོ། ། ”

༩ བར་སྲིད་ཀྱི་སེམས་ཅན་གྱི་ཟས་ནི།《མངོན་པ་མཛོད་རྩ་བ་》སྡེ་བསྟན། པོད། ༡༤༠ ཤོག་ངོས  ༨ ལས། “དེ་ནི་དྲི་ཟའོ། ། ”ཞེས་པའི་སྐབས་ནས་འདོད་པའི་བར་སྲིད་དེ་ནི་སྐལ་པ་བཟང་ངན་གྱིས་དྲི་ཞིམ་པ་དང་མི་ཞིམ་པ་ཟ་བའི་ཕྱིར་དེ་ལ་དྲི་ཟ་ཞེས་ཀྱང་བྱའོ། ། གཟུགས་ཀྱི་བར་སྲིད་ཀྱིས་ཁམ་ཟས་ལོངས་སུ་མི་སྤྱོད་ཅིང་འདོད་པའི་བར་སྲིད་ཀྱིས་དྲི་ལ་ལོངས་སྤྱོད་ཀྱི། ཁམ་གྱི་ཟས་རགས་པ་ལ་ལོངས་སུ་མི་སྤྱོད་དོ། ། 《མཛོད་རང་འགྲེལ་》སྡེ་བསྟན། པོད  ༡༤༠ ཤོག་ངོས། ༡༢༠ ལས།  “ ཡང་ཅི་འདོད་པ་ན་སྤྱོད་པའི་སྲིད་པ་བར་མ་ཡང་ཁམ་གྱི་ཟས་ཟའམ་ཞེ་ན། སྨྲས་པ་དེ་བཞིན་ཏེ། རགས་པ་ནི་མ་ཡིན་ནོ། ། འོ་ན་ཇི་ལྟ་བུ་ཞེ་ན། དེ་ནི་དྲི་ཟའོ། ། དེ་ཉིད་ཀྱི་ཕྱིར་དྲི་ཟ་ཞེས་བྱའོ། ། དབང་ཆུང་བར་གྲགས་པ་ནི་དྲི་མི་ཞིམ་པ་ཟ་བའོ། ། དབང་ཆེ་བར་གྲགས་པ་ནི་དྲི་ཞིམ་པོ་ཟ་བའོ། ། ཞེས་གསུངས་སོ། ། ”

༡༠ བར་སྲིད་ཀྱི་སེམས་ཅན་གྱི་ཚེ་ཚད་ནི། ཚེ་ཚད་ཅི་ཙམ་གནས་ཚུལ་སྐོར་ལ་བོད་ཀྱི་མཁས་པ་རྣམས་ཀྱིས་འདོད་ཚུལ་མི་འདྲ་བ་མང་པོ་ཡོད། 《བཙུན་པ་དབྱིག་བཤེས་》ཀྱིས། ཞག་བདུན་ལ་གནས། ཞེས་གསུངས།  《བཙུན་པ་ཆོས་སྐྱོབ་》ཀྱིས། སྐྱེ་གནས་ཀྱི་ཚོགས་པ་མ་རྙེད་བར་དུ་གནས། ཞེས་གསུངས།  《གཞན་འགའ་ཞིག་》གིས། ཞག་བདུན་ཕྲག་བདུན་དུ་གནས་པར་གསུངས། མདོ་སྡེ་བཙུན་པ་ན་རེ་དེ་ལྟ་བུའི་ངེས་པ་མེད་དེ་ཇི་སྲིད་སྐྱེ་གནས་ཀྱི་ཚོགས་པ་མ་རྙེད་ཀྱི་བར་དུ་གནས་ཞེས་གསུངས། ཐོགས་མེད་ཀྱི 《ཀུན་བཏུས་》ལས། རེ་ལྟར་ཐོགས་ན་ཞག་བདུན་གནས་ཏེ་ཚུན་ཆད་ཀྱིས་འཆི་འཕོའོ་ཞེས་གསུངས་སོ། །    《བྱེ་བྲག་ཏུ་སྨྲ་བ་》རྣམས་ཀྱིས། འདི་སྲིད་པ་འཚོལ་བ་ཡིན་པས་དུས་ཐུང་ངུ་བར་གནས་ཏེ་སྐྱེ་བའི་གནས་སུ་འཇུག་གོ། ། སྐྱེ་བའི་གནས་མ་རྙེད་ན་ཇི་ལྟར་ཞེ་ན། གལ་ཏེ་དེར་ངེས་པར་སྐྱེ་བར་འགྱུར་བ་ཞིག་ཡིན་ན་ནི་དེའི་ལས་ཀྱིས་སྐྱེ་གནས་ཀྱི་ཚོགས་པ་ཕ་མ་སོགས་འདྲེན་ལ། འོན་ཏེ་དེར་སྐྱེ་བར་མ་ངེས་ན་ནི་དེ་ལས་གཞན་པའི་ཡུལ་དུ་སྐྱེ་བར་འགྱུར་རོ་ཞེས་ཟེར་རོ། །  གཞན་དག་ན་རེ། དེ་དང་འདྲ་བའི་སྐྱེ་གནས་སུ་འཇུག་པར་འགྱུར་ཏེ་དབྱར་ལྟ་བུ་དུས་ངེས་པར་ཅན་བ་ལང་གི་༼སྲིད་པ་བར་མ་རང་གི་སྐྱེ་གནས་མ་རྙེད་པ་རྣམས་ནི་དུས་མ་ངེས་པ་བ་མེན༽་དང་། ཁྱི་རྣམས་ནི་ལྕེ་སྤྱང་དང་། རྟ་རྣམས་ནི་བོང་བུ་དང་། དོམ་རྣམས་ནི་དྲེད་རྣམས་སུ་སྐྱེའོ་ཞེས་ཟེར་རོ། ། 《རྣལ་འབྱོར་སྤྱོད་པའི་ས》ལས།   སྡེ་བསྟན་པོད། ༡༢༧  བར་མ་དོའི་སྲིད་པ་དེ་ཡང་སྐྱེ་བའི་རྐྱེན་མ་རྙེད་ཀྱི་བར་དུ་དེ་ལྟར་ཐོགས་ན་ཡང་ཞག་བདུན་གནས་པར་ཟད་དོ། །རྐྱེན་རྙེད་ན་ནི་ངེས་པ་མེད་དོ། །  ཡང་མ་རྙེད་ན་ནི་ལུས་བརྗེས་ནས་ཡང་ཞག་བདུན་དུ་གནས་སོ། །སྐྱེ་བའི་རྐྱེན་མ་རྙེད་ན་ཞག་བདུན་ཕྲག་བདུན་གྱི་བར་དུ་ཡང་གནས་སོ། །དེ་ལས་འདས་ཕན་ཆད་ནི། གདོན་མི་ཟ་བར་སྐྱེ་བའི་རྐྱེན་རྙེད་པར་འགྱུར་རོ། །ཞག་བདུན་གྱིས་ཤི་འཕོས་པ་དེ་ཡང་།  ཡང་ན་ནི་དེ་ཉིད་དུ་མངོན་པར་འགྲུབ་པར་འགྱུར་རོ། །ཡང་ན་ནི་སྐལ་བ་མི་མཉམ་པ་གཞན་དུ་སྟེ། གལ་ཏེ་ལས་གཞན་གྱི་བྱ་བ་ཡོངས་སུ་གྱུར་པས། བར་མ་དོའི་སྲིད་པའི་ས་བོན་ཡོངས་སུ་འགྱུར་བར་བྱེད་པའི་ཕྱིར་རོ། །

༡༡ བར་སྲིད་སྐབས་ཀྱི་འདུ་ཤེས།《མཛོད་རྩ་བ》 སྡེ་བསྟན། པོད། ༡༤༠ ཤོག་ངོས། ༡༢༢ ལས།  “བློ་ནི་ཕྱིན་ཅི་ལོག་གྱུར་པས། ། རྩེ་དགའས་འགྲོ་བའི་ཡུལ་དུ་འགྲོ། ། ”ཞེས་གསུངས་པའི་དོན་ནི།  མངལ་སྐྱེས། སྒོང་སྐྱེས། དྲོད་སྐྱེས། རྫུས་སྐྱེས་ཏེ་སྐྱེས་གནས་བཞི་བཤད་པའི་སྐབས་སུ་མངལ་སྐྱེས་དང་སྒོང་སྐྱེས་ཀྱི་དབང་དུ་བྱས་ན་ལས་ཀྱི་མཐུ་ལ་སོགས་པའི་དབང་གི་བྱུང་བའི་མིག་གིས་རང་གི་སྐྱེ་བའི་ཡུལ་ཐག་རིང་པོ་ན་འདུག་ཀྱང་མཐོང་ཞིང་།  ཡུལ་དེ་ན་ཕ་མ་ཉལ་པོ་བྱེད་པ་དེ་མཐོང་ནས་བུ་ཞིག་ཡིན་ན་ནི་མ་ལ་ཕོའི་འདོད་ཆགས་སྐྱེ་ཞིང་ཕ་ལ་ཁོང་ཁྲོ་བར་འགྱུར། མོ་ཞིག་ཡིན་ན་ནི་ཕ་ལ་མོའི་འདོད་ཆགས་སྐྱེ་ཞིང་མ་ལ་ཁོང་ཁྲོ་བར་སྐྱེ། དེ་ལྟ་བུའི་ཕྱིན་ཅི་ལོག་གི་བློ་ཡིས་མངལ་དུ་བརྩེ་བར་འདོད་པས་ཞུགས་ཤིང་དེ་ནས་དེའི་ཕུང་པོ་མཁྲང་པོར་འགྱུར་ལ་སྲིད་པ་བར་མ་ཡང་འགག་ཏེ་སྐྱེ་བ་ཡིན་ནོ། ། འོ་ན་བར་སྲིད་ཀྱི་སེམས་ཅན་ཚང་མ་དེ་ལྟ་བུའི་འདུ་ཤེས་ངེས་པར་སྐྱེའམ་ཞེ་ན། དེ་ཡང་ངེས་པ་མེད་དེ་སེམས་ཅན་དབང་ཐང་ཆུང་བ་འགའ་མའི་མངལ་དུ་འཇུག་པའི་ཚེ་འདི་ལྟར་སྙམ་དུ་རླུང་ལངས་པའམ། ཆར་པ་འབབ་པའམ། གྲང་བའམ། ཡུལ་ངན་ནམ། སྐྱེ་བོ་མང་ཆེ་བ་དག་ཀུ་ཅོ་འདོན་པའི་སྣང་བ་ལངས་ནས། རང་ཉིད་གང་གི་མངལ་དུ་འཇུག་པའི་མའིི་མངལ་དེ་རྩྭ་ཐིབས་པོའམ། ནགས་ཐིབས་པོའམ། རྩྭའི་སྤྱིལ་པོའམ།   ལོ་མའི་སྤྱིལ་པོ་དང་། ཤིང་དྲུང་ངམ། རྩིག་པའི་དྲུང་གི་སྣང་བ་འཆར་ནས་འཇུག་ཅིང་། གནས་པའི་ཚེ་ཡང་དེ་དག་ཏུ་གནས་སོ་སྙམ་ལ། འབྱུང་ན་ཡང་དེ་དག་ནས་འབྱུང་ངོ་སྙམ་དུ་ལོག་པའི་འདུ་ཤེས་དང་མོས་པ་དག་འབྱུང་བར་འགྱུར། སེམས་ཅན་དབང་ཐང་ཆེ་བ་དག་ནི་མངལ་དུ་འཇུག་པའི་ཚེ་མའི་མངལ་དེ་ཀུན་དགའ་ར་བའམ། སྐྱེད་མོས་ཚལ་ལམ། ཁང་བཟངས་སུ་འཇུག་པའམ། ཁང་པ་བརྩེགས་པའམ། ཁྲི་ལ་འཛེག་གོ་སྙམ་པ་དང་། གནས་པའི་ཚེ་དེ་དག་ཏུ་གནས་སོ་སྙམ་པ་དང་། འབྱུང་བའི་ཚེ་ཡང་དེ་དག་ལས་འབྱུང་ངོ་སྙམ་དུ་སེམས་སོ། ། དྲོད་གཤེར་ལས་སྐྱེ་བ་ནི་ལས་ཇི་ལྟ་བ་བཞིན་དུ་སྐྱེ་བའི་གནས་གཙང་མའམ་མི་གཙང་བ་གང་རུང་དུ་དྲི་འདོད་པས་འགྲོ་ཞིང་། རྫུས་ཏེ་སྐྱེ་བ་ནི་གནས་འདོད་པས་འགྲོ། འོ་ན་དམྱལ་བ་པ་དག་རྫུས་ཏེ་སྐྱེ་བ་མ་ཡིན་ནམ་དེ་དག་ཇི་ལྟར་གནས་འདོད་ཅེ་ན། བློ་ཕྱིན་ཅི་ལོག་ཏུ་གྱུར་པའི་ཕྱིར་ཏེ། དེ་ནི་རང་ཉིད་རླུང་དང་ཆར་པ་ཤིན་ཏུ་གྲང་མོ་དག་གིས་སྡུག་བསྔལ་བའི་ཚེ་དམྱལ་བ་དག་ན་མེ་འབར་བ་མཐོང་སྟེ། དེའི་ཕྱིར་དྲོ་བར་འདོད་དེ་རྒྱུག་གོ། །ཡང་བདག་ཉིད་རླུང་ཚ་བ་དང་ཉི་མ་དང་མེའི་གདུང་བ་དག་གིས་སྡུག་བསྔལ་བའི་ཚེ་དམྱལ་བ་དག་ན་བསིལ་བ་མཐོང་བས་བསིལ་བ་འདོད་པས་རྒྱུག་གོ་ཞེས་སྨྲའོ། །

ཐོགས་མེད་ཀྱི《རྣལ་འབྱོར་སྤྱོད་པའི་ས》ལས།(སྡེ་བསྟན་པོད།127_ཤོག་ངོས།0022)“བར་མ་དོའི་སྲིད་པ་ལ་གནས་པ། དེ་སྐལ་བ་མཉམ་པའི་སེམས་ཅན་ལ་བལྟ་བ་དང༌། རྩེ་བ་ལ་སོགས་པ་བྱ་བར་འདོད་པས་སྐྱེ་བའི་གནས་སུ་འགྲོ་འདོད་པ་སྐྱེད་པར་གྱུར་ལ། ཕ་མ་ལས་བྱུང་བའི་ཁུ་བ་དང༌། ཁྲག་དེ་ཡང༌། དེའི་ཚེ་ཕྱིན་ཅི་ལོག་ཏུ་མཐོང་བར་འཇུག་པར་འགྱུར་རོ། །དེ་ལ་ཕྱིན་ཅི་ལོག་ནི་འདི་ཡིན་ཏེ། ཕ་མ་གཉིས་ཉལ་པོ་བྱེད་པར་མཐོང་ན། དེའི་ཚེ་ན་ཕ་མ་གཉིས་ཉལ་པོ་བྱེད་པ་ཡང་མེད་བཞིན་དུ་དེས་ཕྱིན་ཅི་ལོག་གི་བློས་དེ་ལྟར་མཐོང་སྟེ། སྒྱུ་མ་བྱས་པ་མཐོང་བ་བཞིན་ནོ། །ཉལ་པོ་བྱེད་པ་དེ་མཐོང་ནས་ཀྱང་དེ་དེར་ཆགས་པ་སྐྱེ་བར་འགྱུར་ཏེ། གལ་ཏེ་བུད་མེད་དུ་འགྱུར་བར་འདོད་ན་ནི་དེ་སྐྱེས་པ་ལ་ཆགས་ཏེ། ཉལ་བར་འདོད་པ་སྐྱེའོ། །གལ་ཏེ་སྐྱེས་པར་འགྱུར་བར་འདོད་ན་ནི་དེ་བུད་མེད་དེ་ལ་ཆགས་ནས་ཉལ་བར་འདོད་པ་སྐྱེ་བར་འགྱུར་རོ། །དེ་ནས་དེའི་དྲུང་དུ་སོང་ནས་བུད་མེད་དུ་འགྱུར་ན་ནི། བུད་མེད་དང་བྲལ་བར་འདོད་པ་སྐྱེའོ། །སྐྱེས་པར་འགྱུར་ན་ནི། སྐྱེས་པ་དང་བྲལ་བར་འདོད་པ་སྐྱེའོ། །དེ་བསྐྱེད་པས་སྐྱེས་པ་འམ། བུད་མེད་འབའ་ཞིག་མཐོང་བར་འགྱུར་རོ། །དེ་ཇི་ལྟ་ཇི་ལྟར་ཕྱོགས་དེར་ཉེ་བར་སྦྱོར་བ་དེ་ལྟ་དེ་ལྟར་སྐྱེས་པ་འམ། བུད་མེད་གང་ཡང་རུང་བ་དེའི་ཡན་ལག་གཞན་སྣང་བ་ནི་མེད་པར་འགྱུར་ལ། སྐྱེས་པ་དང་བུད་མེད་དེ་ལ། མོ་མཚན་དུ་མཐོང་བ་འམ། ཕོ་མཚན་དུ་མཐོང་བ་འབའ་ཞིག་ཉེ་བར་གནས་པར་འགྱུར་རོ། །དེ་ལ་ཁོང་ཁྲོ་བར་གྱུར་ནས་ནི་འཆི་འཕོ་བ་དང་སྐྱེ་བར་འགྱུར་བ་ནི་སྔ་མ་བཞིན་དུ་རིག་པར་བྱའོ། །

གལ་ཏེ་བསོད་ནམས་ཆུང་ངུ་ཞིག་ཡིན་ན་ནི། རིགས་དམའ་བར་སྐྱེ་བར་འགྱུར་ཏེ། འཕོ་བའི་ཚེ་དང༌། འཇུག་པའི་ཚེ་དེ་ལ་ཀུ་ཅོའི་སྒྲ་དང༌། འདམ་བུ་དང༌། ནགས་ཚལ་ཐིབས་པོ་ལ་སོགས་པའི་ནང་དུ་འགྲོ་བའི་མཚན་མ་འབྱུང་བར་འགྱུར་རོ། །གལ་ཏེ་ལེགས་པའི་ལས་བྱེད་པ་ཞིག་ཡིན་ན་ནི། རིགས་མཐོན་པོར་སྐྱེ་བར་འགྱུར་ཏེ། དེ་ལ་ཞི་བ་དང༌། སྙན་པའི་སྒྲ་འབྱུང་ཞིང༌། ཁང་བཟངས་དང༌། གཞལ་མེད་ཁང་ལ་སོགས་པའི་གནས་སུ་འགྲོ་བའི་མཚན་མ་འབྱུང་བར་འགྱུར་རོ། །ཞེས་དང་། དེ་ལ་ཕ་མ་གཉིས་ཆགས་པར་གྱུར་ཏེ། འདོད་ཆགས་དྲག་པོའི་སྐབས་སུ་བབ་པ་ནི། མཇུག་ཁོ་ནར་ཁུ་བ་སྐ་བ་འབྱུང་བར་འགྱུར་རོ། །དེའི་རྗེས་ལ་གཉི་ག་ལས་ཁུ་བ་དང་ཁྲག་གི་ཐིགས་པ་གཉིས་གདོན་མི་ཟ་བར་འབྱུང་བར་འགྱུར་ཏེ། གཉིས་ཀའི་ཁུ་བ་དང་ཁྲག་གི་ཐིགས་པ་དེ་གཉིས་མའི་སྐྱེ་གནས་སུ་འདྲེས་པར་གྱུར་ནས། དཔེར་ན་འོ་མ་བསྐོལ་བ་གྲངས་པའི་སྤྲིས་མ་བཞིན་དུ་སྤྲིས་མ་ལྟ་བུར་ཆགས་ནས་འདུས་ཤིང་འདུག་པར་འགྱུར་ཏེ། དེས་ས་བོན་ཐམས་ཅད་པ་རྣམ་པར་སྨིན་པ་བསྡུས་པ། ལུས་ལེན་པར་བྱེད་པ་ཀུན་གཞི་རྣམ་པར་ཤེས་པ་འཇུག་པར་འགྱུར་རོ། །ཇི་ལྟར་འཇུག་པར་འགྱུར་ཞེ་ན། ཁུ་བ་དང་ཁྲག་འདུས་ནས་སྤྲིས་མ་ལྟ་བུར་གྱུར་པ་དེ་དང་ལྷན་ཅིག་ཏུ་སྟེ། ཕྱིན་ཅི་ལོག་ཏུ་དམིགས་པ་བར་མ་དོའི་སྲིད་པ་དེ་འགག་པར་འགྱུར་ལ། དེ་འགག་པ་དང་དུས་གཅིག་ཏུ་རྣམ་པར་ཤེས་པ་ས་བོན་ཐམས་ཅད་པ་དེའི་མཐུས་དེ་ལས་གཞན་པ་དབང་པོའི་འབྱུང་བ་ཆེན་པོ་འབྱུང་བ་ཆེན་པོ་ཆ་ཕྲ་བ་དང་འདྲེས་པ། དེ་དང་མཐུན་པའི་ཁུ་བ་དང་། ཁྲག་འདུས་པ་དབང་པོ་དང་བཅས་པ་གཞན་འབྱུང་བར་འགྱུར་ཏེ། དེའི་དུས་སྐབས་སུ་རྣམ་པར་ཤེས་པ་གནས་པར་གྱུར་པ་ནི་ཉིང་མཚམས་སྦྱོར་བ་ཞེས་བྱ་སྟེ། དེ་ནི་མེར་མེར་པོའི་དུས་ཡིན་ནོ། །མེར་མེར་པོ་དེའི་དབང་པོའི་འབྱུང་བ་ཆེན་པོ་དེ་དག་ཀྱང་ལུས་ཀྱི་དབང་པོའི་དང་ལྷན་ཅིག་འབྱུང་ངོ་། །

དབང་པོའི་རྟེན་གྱི་འབྱུང་བ་ཆེན་པོ་རྣམས་དང་། དབང་པོའི་འབྱུང་བ་ཆེན་པོ་དེ་དག་ཉིད་དང་། ལུས་ཀྱི་དབང་པོ་ཡང་ལྷན་ཅིག་ཏུ་འབྱུང་བར་འགྱུར་རོ། །དེ་ནས་དབང་པོའི་འབྱུང་བ་ཆེན་པོ་དེ་དག་རྒྱུར་བྱས་ནས། མིག་གི་དབང་པོ་ལ་སོགས་པ་རིམ་གྱིས་འགྲུབ་པར་འགྱུར་རོ། །དབང་པོའི་རྟེན་གྱི་འབྱུང་བ་ཆེན་པོ་དེ་དག་ཀྱང་རྒྱུར་བྱས་ནས་རིམ་གྱིས་དབང་པོའི་རྟེན་རྣམས་ཀྱང་འགྲུབ་པར་འགྱུར་རོ། །དབང་པོ་རྣམས་དང་། དེ་དག་གི་རྟེན་རྣམས་བྱུང་བ་ལས་ལུས་ཐམས་ཅད་འགྲུབ་ཅིང་འཐོབ་པར་འགྱུར་རོ། །མེར་མེར་པོའི་གཟུགས་དེ་ཡང་སེམས་དང་སེམས་ལས་བྱུང་བའི་ཆོས་དེ་དག་དང་། གཅིག་ལ་གཅིག་གྲུབ་པ་དང་བདེ་བས་ཞུགས་པ་ཞེས་བྱའོ། །སེམས་ཅན་གྱི་དབང་གིས་ཀྱང་དེ་རུལ་བར་མི་འགྱུར་རོ། །དེའི་ཕན་པ་དང་གནོད་པ་ལས་ཀྱང་། སེམས་དང་སེམས་ལས་བྱུང་བ་རྣམས་ལ་ཕན་པ་དང་། གནོད་པར་འགྱུར་རོ། །དེ་བས་ན་གཅིག་ལ་གཅིག་གྲུབ་པ་དང་བདེ་བ་ཞེས་བྱའོ། །མེར་མེར་པོའི་ཕྱོགས་གང་དུ་རྣམ་པར་ཤེས་པ་ཞུགས་པར་གྱུར་པ་དེ་ནི་དེའི་ཚེ་དེའི་སྙིང་གི་ཕྱོགས་ཡིན་ནོ། །དེ་ལྟར་ན་རྣམ་པར་ཤེས་པ་དེ་ནི་ཕྱོགས་གང་ནས་འཆི་འཕོ་བའི་ཕྱོགས་དེ་ཉིད་དུ་ཐོག་མ་ཁོ་ནར་འཇུག་གོ། །རྣམ་པར་ཤེས་པ་ས་བོན་ཐམས་ཅད་པ་དེ་ཡང་ཡོངས་སུ་མྱ་ངན་ལས་འདའ་བའི་ཆོས་ཅན་དག་གི་ནི་ས་བོན་ཡོངས་སུ་ཚང་བ་ཡིན་ནོ། །ཡོངས་སུ་མྱ་ངན་ལས་འདའ་བའི་ཆོས་ཅན་མ་ཡིན་པ་དག་གི་ནི། བྱང་ཆུབ་རྣམ་པ་གསུམ་གྱི་ས་བོན་མེད་པ་ཡིན་ནོ།། །། ”ཞེས་གསུངས་སོ། ། རྣལ་འབྱོར་སྤྱོད་པའི་གཞུང་ཚན་དེར་བར་སྲིད་པ་འགའ་སྔོན་བྱ་བ་ག་འདྲ་ཞིག་ལ་གོམས་པའི་ཤུགས་རྐྱེན་གྱི་དབང་གིས་བར་སྲིད་ཀྱི་ཚེ་ཡང་དེ་ལྟ་བུ་གོམས་ཕྱོགས་ཤུགས་ཆེར་ལྡན་པའི་བྱ་བ་དེ་དག་མཐོང་ནས་དགའ་བར་རྒྱུག་པས་མངལ་དུ་ཉིང་མཚམས་སྦྱོར་བ་ཡང་གསུངས་སོ། ། དཔེར་ན། སྔོན་མ་དུད་འགྲོ་གསོད་མཁན་ལྟ་བུ་ཞིག་ཡིན་ན་བར་སྲིད་ཀྱི་སྐབས་སུ་དུད་འགྲོ་མཐོང་ནས་དགའ་བར་རྒྱུག་པའི་སྣང་ཚུལ་དེ་འདྲ་ཡོད་པ་གསུངས་སོ། །

༧ རྩ་འགྲེལ་གཉིས་ལས་གནས་སུ་འཇུག་ཚུལ་གྱི་སྐོར།

《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས། ༡༢༢ ལས། “དྲི་དང་གནས་ལ་མངོན་འདོད་གཞན། ། ” ཞེས་གསུངས་པའི་དོན་ནི།  ལས་ཇི་ལྟ་བ་བཞིན་དུ་དྲི་དང་གནས་ལ་འདོད་ཅིང་སྲེད་པས་སྐྱེ་བའི་གནས་སུ་འཇུག་པ་ནི་སྐྱེས་གནས་དྲོད་སྐྱེས་དང་རྫུས་སྐྱེས་གཉིས་སུ་འཇུག་ཚུལ་ལོ།  ། དམྱལ་བ་དག་ཏུ་གནས་ཇི་ལྟར་འདོད་ཅེ་ན། བློ་ཕྱི་ཅི་ལོག་ཏུ་གྱུར་པའི་ཕྱིར་ཏེ། དེ་ནི་རང་ཉིད་རླུང་དང་ཆར་བ་སོགས་ཤིན་ཏུ་གྲང་མོ་དག་གིས་བཏབ་ནས་ཉེན་པ་དང་དམྱལ་བ་དག་ན་མེ་འབར་བ་མཐོང་སྟེ། དེའི་ཕྱིར་དྲོ་བར་འདོད་དེ་རྒྱུག་གོ། ། ཡང་རང་ཉིད་རླུང་ཚ་བ་དང་ཉི་མ་དང་མེའི་གདུང་བ་དག་གིས་ཉེན་པ་དང་དམྱལ་བ་དག་ན་བསིལ་བ་མཐོང་བས་བསིལ་བར་འདོད་ནས་རྒྱུག་པའི་ཕྱིར་ཚ་བ་དང་གྲང་བའི་དམྱལ་བར་སྐྱེ་བ་ལེན་ནོ། ། ཞེས་གསུངས་སོ། །  ལྷའི་སྲིད་པ་བར་མ་རྣམས་ནི་སྟན་ལས་ལྡང་བ་བཞིན་དུ་གྱེན་དུ་འགྲོ་བ་དང་། མི་དང་དུད་འགྲོ་ཡི་དྭགས་རྣམས་ཀྱི་སྲིད་པ་བར་མ་མི་ལ་སོགས་འགྲེང་ནས་འགྲོ་བ་དང་། དམྱལ་བ་དག་ནི་སྤྱི་ཚུགས་སུ་འགྲོའོ་ཞེས་གསུངས་དེ་ཡང།  《མཛོད་རང་འགྲེལ་》སྡེ་བསྟན། པོད། ༡༤༡ ཤོག་ངོས། ༡༣༧ ལས།  “ དེ་ལ་ལྷའི་སྲིད་པ་བར་མ་ནི་སྟན་ལས་ལྡང་བ་བཞིན་དུ་གྱེན་དུ་འགྲོའོ། ། མི་དང་དུད་འགྲོ་དང་། ཡི་དྭགས་རྣམས་ཀྱི་ནི་མི་ལ་སོགས་པ་བཞིན་ནོ། ། ” ཞེས་གསུངས་སོ། །

 ༨ མངལ་དུ་འཇུག་པ་ཐམས་ཅད་དེ་ལྟར་ཡིན་པའི་ངེས་པ་ཡོད་མེད་ཀྱི་སྐོར།

《མཛོད་རྩ་བ་》སྡེ་བསྟན། པོད། ༡༤༠ ཤོག་ངོས།  ༨ ལས།  “མངལ་དུ་འཇུག་པ་གསུམ་དག་སྟེ། ། འཁོར་ལོས་སྒྱུར་དང་རང་བྱུང་གཉིས། ། ” ཞེས་གསུངས་པའི་དོན་ནི།    འཁོར་ལོས་བསྒྱུར་བའི་རྒྱལ་པོ་དང་། རང་བྱུང་རང་སངས་རྒྱས་དང་། སྲིད་པ་ཐ་མའི་བྱང་སེམས་སོགས་ཀྱིས་རིམ་པ་བཞིན་མངལ་དུ་འཇུག་པ་དང་། འཇུག་གནས་གཉིས་དང་། འཇུག་གནས་འབྱུང་གསུམ་ཀ་ཤེས་པའི་སྒོ་ནས་འཇུག་པར་བཤད།  《མཛོད་རང་འགྲེལ་》སྡེ་བསྟན། པོད། ༡༤༠ ཤོག་ངོས། ༡༢༣ ལས། “འཁོར་ལོས་སྒྱུར་བ་དང་། རང་བྱུང་རང་སངས་རྒྱས་དང་། རྫོགས་པའི་སངས་རྒྱས་དག་སྟེ། འོག་ནས་གོ་རིམ་བཞིན་ཞེས་འཆད་པར་འགྱུར་རོ། ། དེ་ལ་འཁོར་ལོས་སྒྱུར་བ་ནི་དང་པོ་སྟེ། དེ་ནི་འཇུག་པའི་ཁོ་ན་ཤེས་བཞིན་ཡིན་གྱི་གནས་པ་ཡང་མ་ཡིན་ལ། འབྱུང་བ་ཡང་མ་ཡིན་ནོ། ། རང་སངས་རྒྱས་ནི་གནས་པ་ཡང་ངོ་། ། སངས་རྒྱས་ནི་འབྱུང་བ་ཡང་ངོ་། ། འདིར་ཡང་འབྱུང་བར་འགྱུར་བའི་མིང་གིས་བསྟན་ཏོ། ། ཞེས་གསུངས་སོ། །    《མཛོད་རྩ་བ་》 སྡེ་བསྟན། པོད། ༡༤༠ ཤོག་ངོས། ༡༢༣ ལས། “ ལས་སམ་ཡེ་ཤེས་སམ་གཉི་ག། རྒྱ་ཆེའི་ཕྱིར་ན་གོ་རིམ་བཞིན། ། ” ཞེས་གསུངས་པའི་དོན་ནི།  ལས་སམ་བསོད་ནམས་ཚོགས་རྒྱ་ཆེན་པོ་བསགས་པ་རྣམས་ནི་འཁོར་ལོ་བསྒྱུར་བའི་རྒྱལ་པོ་ནི་དང་པོ་དང་། ཡེ་ཤེས་རྒྱ་ཆེན་པོ་ཐོས་པ་དང་མང་བ་རབ་ཏུ་འབྱེད་པ་བྱས་རྣམས་ནི་རང་བྱུང་རང་རྒྱལ་དང་གཉིས་ནི་གཉིས་པ་ཡིན་ནོ། ། བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་རྒྱ་ཆེ་བ་རྣམས་རྫོགས་པའི་སངས་རྒྱས་བཅོམ་ལྡན་འདས་ནི་གསུམ་པ་ཡིན་ནོ། ། རྒྱུ་མཚན་ཅིའི་ཕྱིར་ཞེ་ན། འཁོར་ལོས་བསྒྱུར་བའི་བར་སྲིད་ནི་བསོད་ནམས་ཀྱི་ལས་རྒྱ་ཆེ་བ་ཡིན་པའི་ཕྱིར་དང་། རང་སངས་རྒྱས་ནི་བསྐལ་བ་བརྒྱར་གོམས་ཤིང་དངོས་པོ་དྲུག་ཤེས་པའི་ཡེ་ཤེས་ཀྱི་རྒྱ་ཆེ་བའི་ཕྱིར་དང་།  སངས་རྒྱས་ནི་བསོད་ནམས་དང་ཡེ་ཤེས་ཀྱི་ལས་གཉིས་ཀ་རྒྱ་ཆེ་བའི་ཕྱིར་ན་གོ་རིམ་བཞིན་ཡིན་ནོ། ། 《མཛོད་རང་འགྲེལ》 སྡེ་བསྟན། པོད། ༡༤༠ ཤོག་ངོས། ༡༢༣ ལས།“ ལས་རྒྱ་ཆེན་པོ་བསོད་ནམས་རྒྱ་ཆེན་པོ་བྱེད་པ་རྣམས་ནི་དང་པོ་ཡིན་ནོ། ། ཡེ་ཤེས་རྒྱ་ཆེན་པོ་ཐོས་པ་མང་བ་དང་རབ་ཏུ་འབྱེད་པ་བྱས་པ་རྣམས་ནི་གཉིས་པ་ཡིན་ནོ། ། བསོད་ནམས་ཀྱི་ལས་དང་ཡེ་ཤེས་རྒྱ་ཆེ་བ་རྣམས་ནི་གསུམ་པ་ཡིན་ཏེ། དེ་ལྟ་བུར་གྱུར་པ་དེ་དག་ནི་རིམ་བཞིན་དུ་འཁོར་ལོས་སྒྱུར་བ་ལ་སོགས་པའི་ཡིན་པར་རིག་པར་བྱའོ། ། ལྷག་མ་རྣམས་ནི་བཞི་པ་ཡིན་ནོ་ཞེས་བྱ་བར་གྲུབ་བོ། ། ཞེས་གསུངས་སོ། །

མཇུག་བསྡུ་བ། 

སྤྱིར་ང་ཚོ་འགྲོ་བ་མི་དང་སེམས་ཅན་སྲོག་ཆགས་སུ་ཡིན་ན་ཤི་བའི་རྗེས་སུ་མར་མེ་ནུབ་པ་བཞིན་དུ་རྒྱུན་ཆད་པ་ཡིན་ནམ། ཡང་ན་རྒྱུན་དེ་མཐུད་དེ་སྐྱེ་བ་ལེན་པ་གང་ཡིན། དེང་སྐབས་ལ་སྐྱེ་བ་སྔ་ཕྱི་དྲན་པ་དང་། བར་དོའི་འཆར་སྣང་སོགས་གནས་ཚུལ་ཇི་བཞིན་དྲན་མཁན་ཡང་མང་དུ་མཐོང་ཞིང་།  ས་སྒང་གོ་ལ་ཧྲིལ་པོ་འདིར་འཚོ་ཞིང་སྡོད་པའི་སྐྱེ་འགྲོ་སྲོག་ཆགས་ཚང་མ་ལ་འཆི་སྲིད་འགག་མ་ཐག་ནས་ངེས་པར་བར་སྲིད་བརྒྱུད་ནས་སྐྱེ་སྲིད་ཀྱི་ཉམས་སྣང་མངོན་འགྱུར་ཡོང་དགོས་པའི་ངེས་པ་ཡོད་དམ། དེ་ལྟར་བརྒྱུད་དགོས་པ་དེ་ཡང་སེམས་ཅན་སྲོག་ཆགས་འགའ་རེ་ཙམ་ཡིན་ནམ། ཆ་ཚང་ལ་དེ་ལྟར་ངེས་པ་ཡོད་སྲིད་དམ། ཤི་ནས་སྐྱེ་བ་ལེན་པ་དེ་དག་གཏན་དུ་ཡོད་སྲིད་དམ། དེ་དག་གི་སྐོར་ནས་ཞིབ་ཐག་ཆོད་པའི་སྐད་ཆ་དང་དྲི་བའི་ལན་ཞིག་དེ་སྔོན་མེད་པ་ཞིག་རེད། ད་སྐབས་ངས་བྲིས་པའི་བར་སྲིད་སྐོར་གྱི་དཔྱད་རྩོམ་འདིའི་ནང་ལ་ངེས་པར་དུ་གོང་གི་དྲི་བ་དེ་དག་ལ་ཁ་ཚོན་དང་ཐག་བཅད་བྱེད་པའི་གདེང་ཚད་ཅིག་རྙེད་མ་སོང་། ཡིན་ནའང་ནང་པའི་གཞུང་ལུགས་ཁག་ནས་བར་སྲིད་ངོས་འཛིན་བྱེད་སྟངས་དང་ཁྱད་ཆོས་སོགས་ལ་མངོན་པ་མཛོད་དཔེ་ཀློག་ཞར་ཞོར་བྱེད་པ་དང་བསྟུན་ནས་བར་སྲིད་སྐོར་གྱི་དཔྱད་རྩོམ་ཟེར་ན་འདྲ། གང་ལྟར་བར་སྲིད་སྐོར་གྱི་སྐད་ཆ་ཉུང་ངུ་ཞིག་བྲིས་པ་ཡིན། འདི་ནས་ནང་པའི་གཞུང་ལུགས་ནང་གི་བར་སྲིད་ཟེར་བ་འདི་གང་འདྲ་ཞིག་ལ་ངོས་འཛིན་བྱེད་ཀྱིན་ཡོད་མེད་སྐོར་ལ་ངེས་པ་ཅུང་ཙམ་རྙེད་སྲིད་ན་ཐང་། གང་ལྟར་ནོར་བའི་ཆ་དང་འཁྲུལ་བའི་ཆ་གང་ཡོད་དེ་ཀློག་པ་པོའི་སྡེ་ལ་བཟོད་གསོལ་ཞུ་བ་ཡིན།