སྒོམ་གྱི་སྐོར་ལ་དཔྱད་པ།

ནང་དོན་གནད་བསྡུས།  གང་ཟག་བཏགས་ཡོད་པ་ཡིན་ན་རྒྱུད་ན་སྒོམ་ཡོད་ལ། སྒོམ་ནི་རྣམ་ཤེས་ཀྱི་འཁོར་དུ་བྱུང་བའི་སེམས་བྱུང་འགའི་བྱེད་པ་ཟུང་འབྲེལ་གཙོ་བོ་ལ་བརྟེན་ནས་བྱུང་བར་འདོད་པ་དང་།  ཏོན་མུན་དང་རྩེན་མུན་སྒོམ་གྱི་རྩོད་པའི་རྣམ་གཞག་ཟུར་འདེབས་དང་སྒོམ་ནི་ཆོས་འཇིག་རྟེན་ལ་གལ་ཆེ་ཚུལ་གླེང་སློང་རོབ་ཙམ་ཞུས་ཡོད།

གནད་ཚིག   སྒོམ།  སེམས་པ་དང་ཡིད་བྱེད།  བྱེད་པ་ཟུང་འབྲེལ།   ཏོན་མུན་རྩེན་མུན།  ཆོས་འཇིག་རྟེན།

ཐོག་མའི་གླེང་སློང་།

ཐེངས་འདིར་བདག་གིས་སྒོམ་གྱི་ངོ་བོ་གཙོར་བཟུང་སྟེ་སྒོམ་གྱི་སྐོར་ནས་གང་ཤེས་པ་རྣམས་སྤྱན་ཡངས་མཁས་པའི་གཟིགས་མོར་འབུལ་རྒྱུ་ཡིན། སྤྱིར་སྒོམ་ལ་རིགས་ཀྱི་དབྱེ་བ་མང་བོ་ཡོད་ལ་དེ་དག་ནི་ཆོས་ལུགས་དང་ཆོས་བརྒྱུད་སོ་སོའི་ལྟ་གྲུབ་དང་སྒོམ་གྱི་ངོ་བོ་ངོས་འཛིན་སྟངས་མ་འདྲ་བས་རིགས་དུ་མ་བྱུང་ཡོད་ལ། ཁ་ཅིག་གིས་ཕྱི་ལུས་ཀྱི་རྩོལ་བ་དང་སྦྱོར་བའམ་སྤྱོད་སྟངས་ཤིག་ལ་ཟེར་ཞིང་། ཡང་འགའ་ཞིག་གིས་ནང་ཤེས་པའི་བྱེད་པ་དང་ཤེས་པ་དེའི་འཕོ་འགྱུར་ལ་སྒོམ་དུ་བྱེད་མཁན་ཡང་ཡོད་པ་ཡིན།   ཆོས་ལུགས་དང་གྲུབ་མཐའི་བཤད་སྲོལ་ལ་ཕྱོགས་འཛིན་མ་བྱས་པར་བློ་དབུ་མའི་ལམ་ནས་བསམ་ན།     སྒོམ་རྒྱག་པའི་དགོས་དོན་ནི་ཉོན་མོངས་ཇེ་ཆུང་དང་སེམས་ཀྱི་དཀའ་ངལ་སེལ་ཆེད་གཙོ་བོ་ཡིན་པ་ལས་ལུས་ཀྱི་དཀའ་ངལ་ཙམ་སེལ་ཕྱིར་དུ་སྒོམ་བརྒྱབ་པ་མིན། རྙོག་འཛིང་ཅན་གྱི་བསམ་བློ་དང་ཉོན་མོངས་དག་ནི་ཡུལ་ལ་སྒྲོ་སྐུར་སྣ་ཚོགས་པ་ཞིག་གིས་འཛིན་སྟངས་ནོར་བ་དང་ཡང་ན་བློ་དེ་འཁྲུལ་བའི་སྒོ་ནས་ཡོང་བ་ཡིན་པས་སྒོམ་རྒྱག་པ་ནི་བློ་དེ་དག་བཅོས་བསྒྱུར་བྱེད་པའི་དོན་དུ་ཡིན་ལ།  དེ་འདྲའི་འཛིན་སྟངས་ནོར་འཁྲུལ་ཅན་གྱི་བློ་དེ་བཅོས་བསྒྱུར་བྱེད་པ་ལ་ཁོ་དང་འཛིན་སྟངས་་འགལ་བའི་བློ་ཞིག་མངོན་དུ་བྱེད་པ་ལ་ཡང་ཡང་གོམས་རྒྱུ་དེ་རེད།   དེ་འདྲའི་གོམས་པ་བྱེད་མཁན་དེ་ཡང་ཤེས་པ་ཞིག་ཡིན།   དེའི་སྟབས་ཀྱིས་བདག་གིས་འདོད་པའི་སྒོམ་ནི་ནང་ཤེས་པ་གཉིས་ཀྱིས་བྱེད་པ་ཟུང་འབྲེལ་ལ་བརྟེན་ནས་ཡུལ་ལ་གཡོ་བ་སྒོམ་དུ་འདོད་པ་ཡིན།   མྱོང་ཚོར་སྟངས་འཛིན་གྱི་སྒོམ་ཡང་དེ་བཞིན་རེད།   རང་ཉིད་ཀྱི་འཚོ་བ་ལ་ཡིད་མ་ཚིམ་པ་དང་འཚོ་བ་ལ་ཆོག་ཤེས་མ་བརྟེན་པས་སེམས་ལ་དཀའ་ངལ་དང་ན་ཚ་མང་པོ་ཞིག་འབྱུང་བཞིན་ཡོད་པ་རེད།    དེ་དག་སེལ་བ་ལ་སྒོམ་ནི་ཕུལ་དུ་བྱུང་བའི་སྨན་མཆོག་ཅིག་ཡིན་པས་སྐབས་འདིར་ཁོ་བོས་ཏོན་རྩེན་རྩོད་པའི་སྒོམ་དང་དེ་སུན་འབྱིན་ཚུལ་དང་སྤྱིར་སྒོམ་གྱི་ངོ་བོ་དང་དེའི་དབྱེ་བ་ཉེ་རབས་སྒོམ་གྱི་མཛད་འཕྲིན་དང་གལ་ཆེ་ཚུལ་སོགས་ས་བཅད་གསུམ་གྱི་ནང་དུ་སྒོམ་གྱི་ངོ་བོ་གཙོར་བཟུང་ནས་དེའི་སྐོར་གྱི་རྒྱུན་ཤེས་འགའ་སྒོམ་ལ་འཇུག་མཁན་གྱི་ལས་དང་བོ་བ་རྣམས་ལ་ཕན་པའི་ཀུན་སློང་དང་བཅས་བྲིས་པ་ཡིན།  །

༡ ཏོན་རྩེན་རྩོད་པའི་སྒོམ་དང་དེ་སུན་འབྱིན་ཚུལ།

བོད་གངས་ཅན་གྱི་ལྗོངས་སུ་སངས་རྒྱས་ཀྱི་བསྟན་པ་དབུ་བརྙེས་བའི་ཐོག་མ་ནི་བོད་ཀྱི་རྒྱལ་རབས་ཉེར་བརྒྱད་པ་ཀུན་ཏུ་བཟང་པོའི་སྤྲུལ་པར་གྲགས་པའི་ལྷ་ཐོ་ཐོ་རི་སྙན་བཙན་གྱི་སྐབས་སུ་རྒྱལ་པོའི་ཕོ་བྲང་གི་སྟེང་དུ་དཔང་སྐོང་ཕྱག་རྒྱའི་གླེགས་བམ་སོགས་ནམ་མཁའ་ནས་བབས་སྟེ་དམ་པའི་ཆོས་ཀྱི་དབུ་བརྙེས་བར་བཤད།  སྲོང་བཙན་སྒམ་པོའི་སྐབས་ལ་དངོས་སུ་དར། གཙོ་བོ་དར་བ་ནི་མེས་ཨག་ཚོམ་དང་ཁྲི་སྲོང་ལྡེ་བཙན་གྱི་སྐབས་ལ་ཆས་ཆེར་དར་སྤེལ་བཏང་བ་ཡིན།  སྐབས་དེར་བོད་ལ་མ་ཧཱ་ཙི་ནའི་ཡུལ་ཀྱི་དར་བའི་ནང་བ་སངས་རྒྱས་བའི་ཆོས་དང་རྒྱ་གར་ནས་དར་བའི་ནང་བ་སངས་རྒྱས་བའི་ཆོས་གཉིས་དར་བ་ཡིན་ལ་དེ་གཉིས་ཀའི་བར་ལ་རྩོད་པ་ཆེན་པོ་ཞིག་བྱུང་བ་ནི་བསམ་ཡས་ཆོས་རྩོད་ཆེན་མོའམ་རྒྱ་ནག་ཧྭ་ཤང་དང་སློབ་དཔོན་ཀ་མ་ལ་ཤཱི་ལའི་བར་གྱི་རྩོད་པ་ཏོན་མུན་དང་རྩེན་མུན་གྱི་རྩོད་པ་འདི་བྱུང་བ་ཡིན།

ཏོན་མུན་རྩེན་མིན་ཞེས་བའི་དོན་ནི་བུ་སྟོན་ཆོས་འབྱུང་[1]ལས་ཏོན་མུན་དང་རྩེན་མུན་ནི་རྒྱའི་སྐད་དེ་ཅིག་ཅར་བ་དང་རིམ་གྱིས་པ་ཞེས་པའོ།  འོ་ན་ཅིག་ཅར་དང་རིམ་གྱིས་པ་ཞེས་བའི་དོན་ནི་ལོ་རྒྱུས་གཡུ་ཕྲེང་[2]ལས་སྟོན་རྩེན་ཞེས་པ་ནི་རྒྱ་སྐད་ཡིན་ཏེ་དེ་གཉིས་ཀྱི་དབྱེ་བ་ནི།  སྟོན་མེན་ཞེས་པ་སྟོན་ཆོས་ཀྱི་དོན་ནམ་གཅིག་ཆར་ཉིད་དུ་གྲུབ་པའི་ཆོས་བྱ་བ་ཡིན།  རྩེན་མིན་ཞེས་པ་ནི་རིམ་གྱིས་གྲུབ་པའི་ཆོས་བྱ་བ་སྟེ།  སངས་རྒྱས་ཀྱི་གོ་འཕངས་ཐོབ་པར་སྒྲིབ་གཉིས་སྦྱོང་ཞིང་།  ཚོགས་གཉིས་གསོག་པའི་དཀའ་སྤྱད་ལ་རིམ་གྱིས་བརྟེན་ན་ད་བཟོད་མཆོག་གི་འབྲས་བུ་ཐོབ་པའི་དོན་ཡིན་པར་གྲགས།   འདི་ལ་ཏོན་མུན་དང་སྟོན་མིན་ཞེས་འབྲི་ཚུལ་གཉིས་ཡོད་ལ་བུ་སྟོན་ཆོས་འབྱུང་དུ་ཏོན་མུན་དང་རྒྱལ་རབས་གསལ་མེ་[3]རུ་སྟོན་མིན་ཞེས་གཉིས་ཡོད་ལ་དེ་གཉིས་ལས་སྔ་ཤོས་ནི་བུ་སྟོན་ཆོས་འབྱུང་ཡིན་ལ་རབ་བྱུང་ལྔ་པའི་ཆུ་ཁྱི་ལོ་ཕྱི་ལོ ༡༣༢༢ལོར་ཁྲོ་ཕུ་བ་བུ་སྟོན་རིན་ཆེན་གྲུབ་ཀྱིས་བསྒྲིགས།  སྐབས་དེར་ས་སྐྱ་བ་བསོད་ནམས་རྒྱལ་མཚན་དགུང་ལོ་བཅུ་ཡིན་པར་སྙམ།  དེའི་སྟབས་ཀྱི་ཡིག་ཆ་རྙིང་བའི་རྗེས་སུ་འབྲང་བར་བྱ། ཞིབ་འཇུག་པ་ལ་ལས་སྟོན་རྩེན་གཉིས་ཀ་ཧྭ་ཤང་གི་ལུགས་ཡིན་པར་འདོད་ཀྱང་འདིར་བཤད་ན་སྐབས་དོན་འབོར་བས་བྱུང་རིམ་རེ་ཞིག་བཞག་གོ  །

བཤད་བྱ་དཀྱུས་ལ་འཇུག་ན། རྦ་བཞེད་[4]ལས་རྒྱ་ནག་གི་ཧྭ་ཤང་མ་ཧྭ་ཡ་ན་བྱ་བ་གཅིག་བྲག་དམར་དུ་མཆིས་པ་ལ། དེས་ལུས་ངག་གི་ཆོས་བྱ་མི་དགོས།  ལུས་ངག་གི་དགེ་བས་སངས་མི་རྒྱ།  དྲན་པ་མེད་ཅིང་ཡིད་ལ་བྱར་མེད་པ་བསྒོམས་པས་སངས་རྒྱ་ཟེར་ནས་སྒོམ་བསླབས་པས།  བོད་ཀྱི་བན་ཏེ་རིལ་པོ་ཕལ་གྱིས་ཁོའི་ཆོས་ལ་བསླབས་ཏེ།  བསམ་ཡས་ལ་མཆོད་པ་འཕྲོ་བཅད།  སློབ་གཉེར་དང་ལུས་ངག་གི་དགེ་སྦྱོར་འཕྲོ་བཅད་ཅེས་གསུངས།  སྐབས་དེར་ཆོས་རྩོད་ནི་སྤང་ལ་མེ་མཆེད་པ་བཞིན་ཚ་ཚ་འུར་འུར་དུ་བྱིན་ཡོད་པའི་དོན་དེ་ལ་གཞིག་ནས་མཁན་ཆེན་ཞི་བ་འཚོའི་ལུང་བསྟན་པ་ཅི་བཞིན་རྦ་ཡེ་ཤེས་དབང་པོས་སློབ་དཔོན་ཀ་མ་ལ་ཤཱི་ལ་གདན་དྲངས་ཏེ་བོད་དུ་བྱོན།   དེ་ནས་བྱང་ཆུབ་གླིང་དུ་སེང་གེའི་ཁྲི་བཤམས་ཏེ་བཙན་པོ་གོང་ལ་བཞུགས།  སློབ་ དཔོན་གཉིས་ཀྱི་རྗེས་འབྲང་འཁོར་དང་བཅས་བའི་དབུས་སུ་རྩོད་པའི་མགོ་ཚུགས།  དེ་ལ་ཧྭ་ཤང་ན་རེ།  ང་གཞི་ལ་སྔ་བས་ངས་འདྲིའམ་ལན་གདབ་ཅེས་གསུངས།  ཀ་མ་ལ་ཤཱི་ལའི་ཞལ་ནས།  ཁྱེད་དགོངས་པ་ལྟར་དམ་བཅའ་ཞོག་ཅིག་ཅེས་གསུངས།  དེ་ནས་ཧྭ་ཤང་ན་རེ།  ཐམས་ཅད་སེམས་ཀྱི་རྣམ་རྟོག་གིས་བསྐྱེད་པས།  དགེ་མི་དགེའི་དབང་གིས་ལས་དགེ་མི་དགེས་མཐོ་རིས་དང་ངན་སོང་གི་འབྲས་བུ་མྱོང་ཞིང་འཁོར་བ་ན་འཁོར་རོ། ། གང་ཞིག་ཅི་ལ་ཡང་མི་སེམས་ཤིང་།  ཅི་ཡང་ཡིད་ལ་མི་བྱ་བ་དེ་འཁོར་བ་ལས་ཡོངས་སུ་ཐར་པར་འགྱུར་རོ་ཞེས་དམ་བཅའ་བཞག  ལམ་རིམ་ཆེན་མོར་[5]ཧྭ་ཤང་གིས་གསེར་སྒྲོག་ཐག་སྒྲོག་གིས་བཅིངས་བ་ཁྱད་མེད་པ་དང་། སྤྲིན་དཀར་ནག་གཉིས་ཀས་ནམ་མཁར་བསྒྲིབས་པ་དང་། ཁྱི་དཀར་ནག་གང་གིས་ཕུག་ཀྱང་སྡུག་བསྔལ་བསྐྱེད་པ་དང་འདྲའོ། །དེས་ན་ཅིར་ཡང་མི་རྟོག་པར་བཞག་པ་ཉིད་འཚང་རྒྱ་བའི་ལམ་ཡིན་ནོ། ། སྦྱིན་པ་དང་ཚུལ་ཁྲིམས་སྲུང་བ་སོགས་ནི་དེ་ལྟ་བུའི་ངེས་དོན་བསྒོམས་པར་མི་ནུས་པའི་སྐྱེ་བོ་བླུན་པོའི་དོན་དུ་གསུངས་པ་ཡིན་པས།  ངེས་དོན་དེ་རྙེད་ནས་སྤྱོད་པ་དེ་དག་ལ་འཇུག་པ་ནི་རྒྱལ་བོ་དམངས་ཀྱི་སར་བབས་པའམ།  གླང་བོ་རྙེད་ནས་གླང་པོའི་རྗེས་ཚོལ་བ་དང་འདྲ་བར་སྨྲའོ།  །དེ་ལ་ཧྭ་ཤང་གིས་ནི་ཅིར་ཡང་མི་རྟོག་པ་ལ་བསྔགས་པ་མཛད་པའི་མདོའི་ཁུངས་བརྒྱད་ཅུ་དྲངས་ནས་བསྒྲུབས་སོ་ཞེས་གསུངས།

དེས་ན་མདོ་ལུང་བརྒྱད་ཅུ་ལས་འཁྲུལ་གཞིའི་མདོ་གཅིག་ནི་ཚངས་པས་ཞུས་པ་ལས་སྤྱོད་པ་ཇི་སྙེད་པ་དེ་དག་ཐམས་ཅད་ནི་ཡོངས་སུ་རྟོག་པའོ།  །ཡོངས་སུ་མི་རྟོག་པ་ནི་བྱང་ཆུབ་བོ། །  ཞེས་སོགས་ཀྱི་མདོ་འདི་ཡིན།  མདོར་ན་ཧྭ་ཤང་གི་འདོད་པའི་ཅིག་ཅར་བའི་སྒོམ་ནི་དམིགས་རྟེན་ཟེར་བ་ཞིག་མེད་པར་རྣམ་རྟོག་གི་མཚན་མ་ཐམས་ཅད་བཀག་ནས་ཅི་ཡང་ཡིད་ལ་མི་བྱེད་པ་ནི་ཧྭ་ཤང་གི་ལུགས་སྨྲ་མེད་པ་ཡིན་ནོ། ། ཧྭ་ཤང་གི་ཅིག་ཅར་བའི་སྒོམ་དེ་ཀ་མ་ལ་ཤཱི་ལས་སུན་འབྱིན་ནི་སྤྱིར་སློབ་དཔོན་ཀྱིས་ཧྭ་ཤང་འགོག་ཚུལ་སྒོམ་རིམ་ཐོག་མཐའ་བར་གསུམ་དུ་རྒྱས་པར་ཡོད་པ་དེ་ལྟ་བུ་རེད། དེ་དག་གི་ནང་ནས་མཚོན་ཙམ་ཞིག་བཀོད་ན།  སྒོམ་རིམ་ཐ་མ་[6]ལས་དེ་སྐད་ཀྱང་སྨྲ་བ་དེས་ཐེག་པ་ཆེན་པོ་མཐའ་དག་སྤངས་པ་ཡིན་ནོ། །ཐེག་པ་ཐམས་ཅད་ཀྱི་རྩ་བ་ནི་ཐེག་པ་ཆེན་པོ་ཡིན་པས། དེ་སྤངས་ན་ཐེག་པ་ཐམས་ཅད་སྤངས་པར་འགྱུར་རོ། ། འདི་ལྟར་ཅི་ཡང་མི་བསམ་མོ་ཞེས་སྨྲ་བ་ན།  ཡང་དག་པར་སོ་སོར་རྟོག་པའི་མཚན་ཉིད་ཀྱི་ཤེས་རབ་སྤངས་པར་འགྱུར་རོ།  །ཡང་དག་པའི་ཡེ་ཤེས་ཀྱི་རྩ་བ་ནི་ཡང་དག་པར་སོ་སོར་རྟོག་པ་ཡིན་པའི་དེ་སྤངས་པ་ན་རྩ་བ་བཅད་པའི་ཕྱིར་ཞེས་གསུངས། དེ་ལྟར་སློབ་དཔོན་གཉིས་ཀྱི་རྩོད་པ་མང་དུ་བྱས་མཐར་ཧྭ་ཤང་གིས་ཕམ་པ་ཁས་བླངས་ཏེ་ཕྱིར་རྒྱ་ནག་ཏུ་ལོག  དེ་ནས་བཟུང་རྒྱལ་བོས་ལུང་རིགས་དང་མི་འགལ་བ་རྒྱ་གར་གྱི་ལུགས་བཞིན་གྱིས་ཤིག  བྱིན་ཆད་ཧྭ་ཤང་གི་ལུགས་བྱེད་མཁན་ཡོད་ན་ཆད་པ་བཅོད་དོ་ཞེས་རྒྱལ་བོའི་བཀས་བཅད་བྱས་ཟེར་མོད་འདི་ལ་ཡང་དཔྱད་རྒྱུ་ཡོད། ཡང་བཤད་རྒྱུན་ཞིག་ལ་བསམ་ཡས་ཆོས་གྲྭར་ཧྭ་ཤང་གི་ལྷམ་ཞིག་ལུས་སོང་བའི་ཧྭ་ཤང་གིས་འཁོར་རྣམས་ལ་སངས་རྒྱས་ཀྱི་བསྟན་པ་འཇིག་ཁར་ངའི་བསྟན་པ་ཡང་ལྷམ་ཙམ་ཞིག་ལུས་པར་འགྱུར་རོ་ཞེས་ལུང་བསྟན་པར་གྲགས་སོ། །

འདི་བཤད་རྒྱུན་ཙམ་ཞིག་མ་ཡིན་པར་ཚད་ཐུབ་ཀྱི་ལོ་རྒྱུས་འགའ་རེ་ན་འདུག  ཡིན་ཡང་མཁས་གྲུབ་ཆེན་པོ་ལྕང་སྐྱ་རོལ་བའི་རྡོ་རྗེས་བོད་དུ་བྱུང་བའི་ཧྭ་ཤང་མ་ཧཱ་ཡ་ནའི་ལྟ་བ་འཛིན་མཁན་དེང་སང་རྒྱ་ཡུལ་ན་མི་འདུག་ཅེས་གསུངས།  བྱེས་སུ་བོད་ཀྱི་མཁས་གྲུབ་མང་པོས་ཀ་མ་ལ་ཤཱི་ལའི་ལུགས་འཐད་ལྡན་དུ་བཟུང་ནས་ཧྭ་ཤང་གི་ལྟ་བར་ལུང་རིགས་གཉིས་ལྡན་གྱི་སྒོ་ནས་བཀག་པ་རྒྱས་བར་མཛད་ཡོད་པ་རེད། རྗེ་བདག་ཉིད་ཀྱི་ལམ་རིམ་ཆེན་མོའི་ཞི་ལྷག་གི་སྐབས་སུ་བཀག་ཡོད་པ་དེ་བཞིན་དུ་ས་སྐྱ་པཎྜི་ཏ་བུ་སྟོན་རིན་པོ་ཆེ་ཀུན་མཁྱེན་རོང་སྟོན་བོ་དོང་པཎ་ཆེན་འབྲུག་པ་པད་མ་དཀར་པོ་སོགས་ཀྱི་མཚོན་པའི་ཧྭ་ཤང་གི་ལུགས་བཀག་ཚུལ་མང་དུ་ཡོད་ཀྱང་འདིར་བཀོད་ན་ཚིག་གི་ཚོགས་མང་སུ་དོགས་ནས་འགོད་སྙིང་མ་ཆོད།   ཕྱོགས་གཅིག་ནི་མཁས་པའི་དབང་བོ་ཀློང་ཆེན་རབ་འབྱམས་དང་ཇོ་ནང་ཏཱ་ར་ན་ཐ་སོགས་ཀྱིས་ཧྭ་ཤང་གི་ལུགས་དེ་ཉིད་ལ་གདེང་འཇོག་བྱས་ཚུལ་སོགས་ཀྱང་ཡོད།

དེ་དག་ཡོངས་སུ་བསྡུས་ན་ཧྭ་ཤང་གི་ལུགས་ནི་ཅི་ཡང་ཡིད་ལ་མི་བྱེད་ཅེས་བའི་སྐབས་སུ་ཁོ་རང་ལ་དམིགས་རྟེན་མེད་རྣམ་རྟོག་གི་མཚན་མ་ཐམས་ཅད་བཀག་ཅེས་བའི་སྐབས་སུ་དཔྱད་སྒོམ་མེད། སྒོམ་ལ་འཇོག་སྒོམ་གྱིས་ཁྱབ་པར་འདོད་པ་དེ་ལྟ་བུ་ཁོས་སྒོམ་འདོད་སྟངས་ཡིན་ནོ། ། སྒོམ་ལ་འཇོག་སྒོམ་གཅིག་པུའི་མ་ཁྱབ་པ་ས་བཅད་གཉིས་པར་སྤྲོས་ཡོད། །  ཐོས་བས་ཆོས་མང་པོ་ཤེས་མི་འོང་སྒོམ་པས་ཆོས་མང་པོ་ཤེས་འོང་གསུངས་བ་བཞིན་མི་གཡོ་གཏན་གྱི་བདེ་བ་ཐོབ་པར་འདོད་པ་དག་ལ་སྒོམ་ནི་ཧ་ཅང་གལ་ཆེན་ཡིན་ལ་དེ་ཉམས་སུ་ལེན་པར་འདོད་པ་རྣམས་གྱི་སྒོམ་སྟངས་མ་ནོར་བ་ཞིག་འོང་རྒྱུ་གལ་ཆེ་བས་རང་ལུགས་གསལ་ཁ་ཐོན་པ་བྱས་ནས་བདག་ལྟ་བུའི་ལས་དང་པོ་བ་རྣམས་ལ་ཕན་པར་སེམས་ནས་འདིར་ས་བཅད་བཀར་བ་ཡིན་ནོ།  །

 ༢ བཤད་བྱ་དངོས་སྤྱིར་སྒོམ་གྱི་ངོ་བོ་དང་དེའི་དབྱེ་བ།

སྤྱིར་སྒོམ་ཞེས་བ་ནི་ང་ཚོ་ནང་པ་སངས་རྒྱས་པའི་ཆོས་ལུགས་སུ་མ་གཏོགས་ཆོས་ལུགས་གཞན་དག་ལ་མེད་པ་ཞིག་མ་ཡིན་པར་འཛམ་གླིང་གི་ཆོས་ལུགས་ཆེན་པོ་བཞི་ལ་རང་རང་གི་འདོད་པའི་སྒོམ་རེ་དང་།  ཆོས་ལུགས་གཅིག་ཡིན་ཀྱང་ལྟ་སྒོམ་ཀྱི་སློབ་དཔོན་དང་ཆོས་ཀྱི་སྙིང་བོ་ལེན་སྟངས་མ་འདྲ་བས་ཡུལ་ལུང་བྱེ་བྲག་སོ་སོ་ལ་ཡང་སྒོམ་གྱི་ངོ་བོ་འདོད་སྟངས་མ་འདྲ་བ་རེ་ཡོད། དཔེར་ན་ཉན་ཐོས་ཀྱི་སྡེ་སྣོད་དར་བའི་(斯里兰卡Sri Lankaསིངྒ་ལའི)ཡུལ་ཀྱི་སྒོམ་བྱེད་སྟངས་ནི་གཏམ་རྒྱུད་གསེར་ཐང་[7]ལས་དགེ་སློང་འགའ་རེས་ཕྲེང་བ་བཟུང་ནས་སྔགས་འདྲ་བ་ཞིག་འདོན་གྱིན་འདུག་པར་མཉན་ན་གོང་གི་ཚིག་དེ་རྣམས་འདོན་གྱིན་འདུག

ཡང་འགའ་རེས།  བཅོམ་ལྡན་འདས་དེ་བཞིན་གཤེགས་པ་ཞེས་པ་ནས་ལྷ་དང་མི་རྣམས་ཀྱི་སྟོན་པ་བྱ་བའི་བར་དང་། འགའ་རེ་ཚིག་དེ་རྣམས་ཀྱི་རྒྱ་སྐད་ཐོག་མའི་ཡིག་འབྲུ་རྣམས་བཟླ་བཞིན་འདུག   ཁོང་རྣམས་དེ་ལ་སྒོམ་བྱེད་པ་ལས་སྔགས་བཟླས་པའི་ཐ་སྙད་མི་འདོགས། མི་ཞིག་ཕྲེང་བ་ཐོགས་པ་མཐོང་ན་ཡང་། ཁོང་གིས་བྷཱ་བན། སྒོམ་བྱེད་ཀྱིན་འདུག་ཅེས་ཟེར།  ཞེས་པ་དང་ཡང་ན་མ་ཧཱ་ཙི་ནས་ཡུལ་ཀྱི་སློབ་དཔོན་ཧྭ་ཤང་མ་ཧཱ་ཡ་ནའི་ཅི་ཡང་ཡིད་ལ་མི་བྱེད་པའི་སྒོམ་སོགས་འདོད་སྟངས་མ་འདྲ་བ་རེ་ཡོད། སློབ་དཔོན་འདི་ཉིད་ཀྱི་སྒོམ་འདོད་སྟེངས་ས་བཅད་གཉིས་པར་གླེང་ཆོག  ང་ཚོའི་ཡིག་ཆ་ཁག་དང་མཁས་བའི་གསུང་འབུམ་རྣམས་སུ་སྒོམ་གྱི་ངོ་བོ་བཞག་ཡོད་པ་དང་འདི་ལ་བཤད་པ་ཟུར་དུ་བྱས་ཡོད་པ་ཆ་མ་འཚལ་མོད།  རྗེ་བདག་ཉིད་ཆེན་མོའི་བྱང་ཆུབ་ལམ་རིམ་[8]ལས་དེ་ལྟར་ཐོས་བསམ་གྱིས་ངེས་པར་བྱས་ཏེ་ཐེ་ཚོམ་དང་བྲལ་བ་ན་ཡང་དང་ཡང་དུ་འདྲིས་པར་བྱེད་པ་ལ་བསྒོམ་པ་ཞེས་ཟེར།  ཞེས་གསུངས་པ་འདིའི་དོན་ནི་ལྟ་ཐོག་ནས་སྒོམ་འཚོལ་ལུགས་ཡིན་པ་ལས་སྤྱིར་སྒོམ་གྱི་ངོ་བོ་མ་ཡིན།  འོན་ཏེ་ཡིན་ན་ནི་ཞི་གནས་སྒོམ་པ་མེད་པར་འགྱུར་བའི་ཕྱིར།  ལྟ་ཐོག་ནས་སྒོམ་འཚོལ་ལུགས་དང་སྒོམ་ཐོག་ནས་ལྟ་བ་འཚོལ་ལུགས་གཉིས་ཡོད་པ་ནི་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱི་ཕྱག་ཆེན་རྩ་བ་རྒྱལ་བའི་གཞུང་ལམ་[9]ལས།  དེས་ན་འདི་ལ་ལྟ་ཐོག་ནས་སྒོམ་པ་འཚོལ་དང་སྒོམ་ཐོག་ནས་ལྟ་བ་འཚོལ་བའི་ལུགས་གཉིས་ཡོད།  ཞེས་གསུངས་པའི་དོན་ནི་དང་པོར་དེ་ཁོ་ན་ཉིད་ཐོས་བསམ་གྱིས་གཏན་ལ་ཕབ་སྟེ་རྩེ་གཅིག་ཏུ་བཞག་པ་ལས་ཞི་གནས་སྒྲུབ་ཚུལ་ནི་ལྟ་ཐོག་ནས་སྒོམ་ཚོལ་ལུགས་ཡིན་ལ་དེ་དང་པོ་དང་།  སྔར་དམིགས་པ་གང་རུང་ལ་དམིགས་པ་རྩེ་གཅིག་པའི་འཇོག་སྒོམ་གྱིས་ཞི་གནས་བསྒྲུབས།  དེ་ནས་གཟུགས་སོགས་བདེན་པར་གྲུབ་མིན་ལ་སོ་སོར་དཔྱོད་པའི་ཤེས་རབ་ཀྱིས་དཔྱད་སྒོམ་བྱས་ཏེ་གཏན་ལ་འབེབ་ཚུལ་ནི་ཕྱི་མ་ཡིན་ནོ། །

དེས་ན། ཐེངས་འདིར་བདག་གིས་བཤད་བྱ་སྤྱིར་སྒོམ་གྱི་ངོ་བོ་ཡིན་པ་ལས་ཆོས་གཅིག་བྱེ་བྲག་བ་ཞིག་གི་སྒོམ་ལུགས་མ་ཡིན།  འཛམ་གླིང་སྤྱི་མཐུན་གྱི་འདོད་པའི་སྒོམ་གྱི་ངོ་བོ་ཡོད་མེད་ལ་བདག་གིས་ངལ་བ་མི་བརྟེན།  ཐེངས་འདིར་ནང་བའི་ཁྱད་པར་དུ་བྱས་ནས་སྒོམ་གྱི་ངོ་བོ་གཞི་དང་མ་འབྲེལ་བར་གླེང་བར་བྱ།   སྤྱིར་རྗེ་བདག་ཉིད་ཀྱིས་སྔོན་གྱི་ལོཙྪ་བ་ཆེན་པོ་རྣམས་ཀྱི་འགྱུར་ལ་ཁུངས་བཅོལ་ནས་གོམས་དང་སྒོམ་གཉིས་དོན་གཅིག་ཏུ་བཞེད་ཚུལ་ཡོད་མོད་འདི་ལ་དཔྱད་པ་བྱེད་རྒྱུ་འདུག་པར་སྙམ་མོ། །

འོ་ན་བདག་གིས་སྒོམ་འདོད་ཚུལ་ནི་རྣམ་ཤེས་ཀྱི་འཁོར་དུ་བྱུང་བའི་སེམས་བྱུང་ཀུན་འགྲོ་ལྔའི་ཡ་གྱལ་སེམས་པ་དང་ཡིད་བྱེད་ཀྱིས་བྱེད་པ་ཟུང་འབྲེལ་གཙོ་བོ་ལ་བརྟེན་ནས་ཡང་ཡང་དམིགས་པ་ལ་འཇོག་པའི་སེམས་བྱུང་སྒོམ་ཡིན་པར་འདོད།  གང་ཟག་བཏགས་ཡོད་པ་ཡིན་ན་རྒྱུད་ལ་སྒོམ་ཡོད་པའི་ཁྱབ།  སྒོམ་པའི་སྐབས་ལ་དགེ་མི་དགེ་ཡི་ཆ་གཉིས་ཡོད།   གལ་ཏེ་གང་ཟག་ཡིན་ན་སྒོམ་རྒྱུད་ལ་ཡོད་པའི་མ་ཁྱབ་ན། གང་ཟག་དེའི་ཞི་གནས་བསྒོམ་པ་ལ་སྒོམ་བསྒྲུབ་པ་སྔོན་དུ་འགྲོ་དགོས་པ་རེད།  དེ་ལྟ་བུ་ཞིག་མེད་པའི་ཕྱིར།  གང་ཟག་ཡིན་ན་སྒོམ་རྒྱུད་ལ་ལྡན་པའི་ཁྱབ་ཅེས་པ་ཐོས་མ་ཐག་བློ་ངོར་མི་བདེ་བའི་དམ་བཅའ་ཞིག་ཡིན་ཀྱང་ཞིབ་ཏུ་བསམ་ན་མི་བདེ་བ་ཅུང་ཟད་ཀྱང་མེད་པར་སྙམ།   ཆོས་དེ་དང་དེ་སྒོམ་པ་ནི་ཕྱིའི་བཟོ་ལྟ་ཞིག་གི་སྒོམ་པ་མ་ཡིན་པར་ནང་སེམས་བྱུང་འགའི་བྱེད་པ་ཟུང་འབྲེལ་ལ་བརྟེན་ནས་ཡུལ་དམིགས་པའི་སྟེང་ནས་སེམས་འཛིན་ཐུབ་པ་ཞིག་ནི་སྒོམ་ཡིན་པ་རེད།   ང་ཚོའི་མཚན་གཞི་རྣམ་ཤེས་ཀྱི་འཁོར་དུ་བྱུང་བའི་ཀུན་འགྲོ་ལྔའི་ནང་ཚན་གྱི་སེམས་པ་དང་ཡིད་བྱེད་ཀྱི་སེམས་བྱུང་འདི་གཉིས་ཀྱི་བྱེད་པ་ཟུང་འབྲེལ་གཙོ་བོ་ལ་བརྟེན་ནས་ཡུལ་དམིགས་པ་འཇུག་པའི་ཚེ་ན་སྒོམ་ཞེས་པའི་སེམས་བྱུང་ནུས་པ་མ་འདྲ་བ་ཞིག་གྲུབ་པ་རེད། དེས་སྟབས་ཀྱིས་གང་ཟག་ཡིན་ན་སེམས་བྱུང་ཀུན་འགྲོ་ལྔ་རྒྱུད་ལ་ཡོད་པའི་ཁྱབ་པས་རྒྱུ་མཚན་གྱིས་གང་ཟག་ཡིན་ན་སྒོམ་རྒྱུད་ལ་ཡོད་པའི་ཁྱབ་ཟེར་བ་ཡིན་ནོ།   དཔེར་ན་རྒྱུའི་མིང་ལ་འབྲས་བས་བཏགས་པ་ལྟ་བུའོ།  དེས་ཕྱིར་རང་རྒྱུད་ན་སྒོམ་གྱི་ས་བོན་ཡོད་པ་ཞིག་གི་ངོ་བོ་གོང་འཕེལ་དུ་བཏང་བ་ལ་བརྟེན་ནས་བསམ་གཏན་དང་ཞི་གནས་ཀྱི་ངོ་བོར་གྱུར་བ་ཡིན་པ་རེད།  ཁ་ཅིག་གིས་སྒོམ་པ་ལ་ཐོག་མར་ཐོས་བསམ་སྔོན་དུ་འགྲོ་དགོས་ཞེས་ཟེར་མོད་འདི་ནི་སྒོམ་ལ་གོ་རྒྱ་ཆུང་བས་སྐྱོན་དུ་སྣང་ལ་དེ་ཁོ་ན་ཉིད་དང་ཤེས་བྱའི་གྲུབ་ཚུལ་སྒོམ་པ་ལ་ཐོས་བསམ་སྔོན་དུ་འགྲོ་དགོས་བ་ཡིན་དུ་ཆུག་ཀྱང་སྤྱིར་ཆོས་གང་ཞིག་སྒོམ་པ་ལ་ཐོས་བསམ་སྔོན་དུ་འགྲོ་མི་དགོས་བར་སྙམ། དཔེར་ན་ལྷ་སྐུ་སྒོམ་ན་དེའི་སྔོན་དུ་ཐོས་བསམ་མ་སོང་བར་ལྷ་སྐུ་སྒོམ་ཐུབ་པ་མྱོང་བའི་གྲུབ་པ་ཡིན་ནོ།  ཁྱེད་ལྟར་ན་ཐོས་བསམ་མ་བྱས་བར་མའི་ཞལ་རིས་སྒོམ་པ་མེད་པར་འགྱུར་ལ།  མའི་ཞལ་རིས་སྒོམ་པ་ཙམ་ལ་གཞུང་ཆེན་པོ་ཐོས་བསམ་སྔོན་དུ་འགྲོ་དགོས་ན་ཧ་ཅང་ཐལ་བར་འགྱུར་བའི་མི་འཐད་དོ། །   འོ་ན་འཕགས་པ་ཐོགས་མེད་[10]ཀྱིས་མངོན་པ་ཀུན་བཏུས་སུ་ཐོས་བསམ་ལ་མ་བརྟེན་པར་སྒོམ་པ་ཡང་དག་མི་ཡོང་། ཞེས་ཟེར་ན་འདིས་ནི་སྒོམ་པ་ཡང་དག་མི་ཡོང་ཞེས་ཟེར་བ་ལས་སྒོམ་མི་ཡོང་ཞེས་མ་གསུངས་སོ། །

དེ་བཞིན་དུ་ས་པཎ་གྱིས་ཐོས་བ་མེད་པའི་བསྒོམ་པ་དེ། ། རེ་ཞིག་གྲུབ་ཀྱང་མྱུར་དུ་འཇིག།[11] ཅེས་གསུངས་པའི་དོན་ནི་ཐོས་པ་མེད་ཀྱང་བསྒོམ་ཡོད་པ་ཤུགས་ལ་འཕང་བའི་ཕྱིར།   སྤྱིར་སྒོམ་ཞེས་བ་རྒྱ་ཆུང་ཆུང་ཞིག་མ་ཡིན་ཏེ་ རྒྱལ་སྲས་ཞི་བ་ལྷའི་བསླབ་བཏུས་[12]ལས་དེ་ལྟ་བས་ན་ལུས་དང་ལོངས་སྤྱོད་དང་བསོད་ནམས་རྒྱུན་མི་འཆད་པར་བཏང་བ་དང་བསྲུང་བ་དང་དག་པ་དང་སྤེལ་བ་ཅི་རིགས་པར་བསྒོམ་པར་བྱའོ། །  ཞེས་པའི་དོན་ནི་བྱང་ཆུབ་ལམ་རིམ་[13]ལས་ལུས་དང་ལོངས་སྤྱོད་དགེ་རྩ་རེ་རེ་ལ་བཏང་བསྲུང་དག་སྤེལ་བཞི་བཞི་བྱེད་པ་ཐམས་ཅད་སྒོམ་དུ་གསུངས་པའི་ཕྱིར་སྒོམ་ཞེས་པ་དེ་རྒྱ་ཆུང་ཆུང་ཞིག་ལ་མི་བཟུང་ངོ་།།  ཞེས་གསུངས་པ་དང་ཡང་ལམ་རིམ་[14]ལས་དེས་ན་སྒོམ་ཐམས་ཅད་འཇོག་སྒོམ་དུ་འདོད་པ་ནི་དཔེར་ན་ནས་རྡོག་གཅིག་བཟུང་ནས་འབྲུ་ཐམས་ཅད་འདི་ཁོ་ན་ཡིན་ནོ་ཞེས་ཟེར་བ་དང་འདྲ་བ་ཡིན་ནོ། ། ཞེས་གསུངས།   དེ་བཞིན་དུ་སྒོམ་ལ་དཔྱད་སྒོམ་དང་འཇོག་སྒོམ་གཉིས་ལས་མེད་པར་འདོད་པ་དག་གིས་ཀྱང་ནས་རྡོག་གཉིས་བཟུང་ནས་འབྲུ་ཐམས་ཅད་འདི་ཁོ་ན་ཡིན་ནོ་འདི་ལས་མེད་པ་ཡིན་ནོ་ཞེས་ཟེར་ན་གོང་གི་གནོན་བྱེད་དེའི་ཕྱིར།   ས་བཅད་དང་པོའི་ཟུར་གཉིས་པའི་དབྱེ་བ་ནི་སྤྱིར་སྒོམ་གྱི་དབྱེ་བ་མཐའ་ཡས་བ་ཞིག་ཡོད་པས་འདིར་བརྗོད་ཀྱིས་མི་ལངས་མོད་དཔེར་ན་གཡང་དྲུང་བོན་གྱི་ལུགས་ལ་སྒོམ་གྱི་དབྱེ་བ་རྒྱས་བར་ཕྱེས་ན་དགུ་ཡོད་བསྡུས་ན་ཐུན་སྒོམ་ངང་སྒོམ་ཀློང་སྒོམ་གསུམ་དུ་འདུ་བར་བཤད།  ཐེངས་འདིར་བདག་གིས་དགེ་ལྡན་པའི་ལུགས་ཀྱི་ལམ་རིམ་སྒོམ་གྱི་དབྱེ་བ་བཤད་པ་ལས་སྤྱིར་སྒོམ་གྱི་དབྱེ་བ་བཤད་མི་ནུས་སོ།   །

དེ་ལ་ཞི་གནས།  ལྷག་མཐོང་།  འཇོག་སྒོམ།  དཔྱད་སྒོམ།  ཤར་སྒོམ་སོགས་ལམ་གྱི་རིམ་པ་སྒོམ་པ་ལ་འདི་ལས་མ་འདུས་བ་མེད་པར་སྙམ། རྗེ་གུང་ཐང་བསྟན་པའི་སྒྲོན་མེའི་སྐབས་བཞི་བའི་བསྡུས་དོན་[15]ལས་སྒོམ་ཚུལ་སྣ་ཚོགས་དབྱེ་བ་ཤེས་དགོས་ཏེ། ། སྟོང་དང་བདེན་བཞི་འཛིན་སྟངས་ཡུས་བྱས་བསྒོམ། ། བྱམས་སོགས་ཡུལ་ཅན་ངོ་བོར་བསྐྱེད་ནས་བསྒོམ། ། ཚོགས་ལ་དབང་སྟོབས་རྗེས་མཐུན་རྣམ་པས་བསྒོམ། །སོ་སྐྱེས་མཁྱེན་གསུམ་རྟོགས་རིགས་སྒོ་ནས་བསྒོམ། །ཕལ་བའི་དངོས་བརྒྱད་མཚན་ཉིད་རྗེས་དཔྱོད་བསྒོམ། །རྒྱལ་ཀུན་གསང་གསུམ་སྨོན་ལམ་རྣམ་པས་བསྒོམ། །ལ་སོགས་འཕྲོས་དོན་སྣ་ཚོགས་ཤེས་པར་བྱ། ། ཞེས་གསུངས།  ཞི་གནས་དང་ལྷག་མཐོང་སྒོམ་ཚུལ་རྗེ་རིན་པོ་ཆེའི་ལམ་རིམ་དུ་རྒྱས་བར་གསུངས་ཡོད་པས་འདིར་བརྗོད་པའི་ངལ་བ་བྱེད་མི་དགོས་སོ། །  འཇོག་སྒོམ་དང་དཔྱད་སྒོམ་ནི་ཞི་ལྷག་རྗེས་མཐུན་པ་ཙམ་ཡིན་གྱི་མཚན་ཉིད་པ་མ་ཡིན་ཏེ། གང་ཞེ་ན་དཔེར་ན་དལ་འབྱོར་རྙེད་དཀའ་བ་བསྒྲུབ་བྱ་རུ་དམིགས་ནས་དེ་ལ་ངེས་ཤེས་རྙེད་པའི་ཐབས་སུ་ལུང་རིགས་རྣམ་དག་གི་ཞིབ་མོས་དཔྱད་པ་རྒྱུན་སྐྱོང་བ་ཞིག་ལ་དཔྱད་སྒོམ་དུ་འདོད།  ལྷག་མཐོང་མཚན་ཉིད་པ་ལ་སོ་སོར་རྟོག་པའི་ཤེས་རབ་ཀྱི་དཔྱད་ནས་བསྒོམ་པའི་ཤིན་སྦྱངས་ཐོབ་དགོས་པ་ཡིན་གྱི་འདི་ལ་དེ་མི་དགོས་བའི་ཕྱིར།ལྷག་མཐོང་ལ་དེའི་ཁྱབ་ཀྱང་དེ་ལ་ལྷག་མཐོང་གིས་མ་ཁྱབ་པོ། །

འཇོག་སྒོམ་ནི་དམིགས་རྟེན་ཞིག་ལ་སེམས་བཏགས་ནས་རྩེ་གཅིག་ཏུ་འཇོག་པ་རྒྱུན་སྐྱོང་བ་ཞིག་ལ་ཟེར་བ་ལས་དམིགས་རྟེན་མེད་པར་སེམས་ཁོ་རང་གང་ལ་ཡང་མི་འཇུག་པར་ཙེན་ནེ་འཇོག་པ་ལ་མི་ཟེར་དེ་རྗེ་བདག་ཉིད་ཀྱི་དྲི་བ་ལྷག་བསམ་རབ་དཀར་[16]ལས་ཡང་འཇོག་སྒོམ་བྱེད་དུས་སེམས་འདི་དམིགས་པ་གཅིག་ལ་བཏགས་ནས་འཇོག་གམ་མི་འཇོག  མི་འཇོག་ན་འདི་ལ་འདི་འཇོག་མེད་པའི་འཇོག་སྒོམ་དེ་ཇི་འདྲ་ཞིག་འོང་བ་ཡིན།  འོན་ཏེ་དམིགས་པ་འདི་ལ་འཇོག་མི་དགོས་ཀྱི།  སེམས་ཁོ་རང་གང་དུ་ཡང་འཕྲོར་མི་འཇུག་པར་ཙེན་ནེ་འཇོག་པས་ན་འཇོག་སྒོམ་ཟེར་བ་ཡིན་སྙམ་ན་ནི།  དམིགས་པ་གང་ཡང་སེམས་ངོ་ན་འཁྱེར་རྒྱུ་མེད་པའི་སེམས་ཧད་དེ་བ་དེ་འདྲ་འཇོག་སྒོམ་ཡང་དག་ཏུ་གང་ནས་བཤད་ཞེས་དེ་ལྟ་བུ་མི་བཞེད་དོ། ། འཇོག་སྒོམ་ནི་ཞི་གནས་འགྲུབ་པའི་ཐབས་དམ་པ་ཡིན་གྱི་དངོས་མ་ཡིན་ལ་ཞི་གནས་ལ་འཇོག་སྒོམ་གྱི་ཁྱབ་ཀྱང་འཇོག་སྒོམ་ལ་ཞི་གནས་ཀྱིས་མ་ཁྱབ།   ཤར་སྒོམ་ཞེས་བའི་ཐ་སྙད་འདི་རྗེ་ལམ་རིམ་སོགས་ན་མི་འདུག་མོད་། འོན་ཀྱང་སྒོམ་གྱི་ཆ་ཤས་ཤིག་གམ་གཞུང་དོན་ངེས་བའི་ཐབས་ཤིག་ཡིན་པར་འདོད།  ཤར་སྒོམ་ཞེས་པའི་དོན་ནི་དམ་པ་རྣམས་ཀྱི་གསུངས་རྒྱུན་དང་མཐུན་པར་སྨྲས་ན་བརྗོད་བྱ་སྤྱི་ལ་དམིགས་ནས་ཚིག་རིས་དང་བསྟུན་ཏེ་དོན་ཡིད་ལ་ཤར་དུ་བཅུག་པ་ཡང་ན་ལམ་གྱི་ངོ་བོ་འདི།  འདིའི་གོ་རིམ་འདི།  དབྱེ་བ་ནི་འདིའོ་སྙམ་པ་ཞིག་ལ་ཤར་སྒོམ་ཡིན་པར་འདོད་དོ། །  བཤད་བྱ་དངོས་ཏེ་ཙམ་གྱིས་འཐུས་པར་བྱས་སོ། །

༣ ཉེ་རབས་སྒོམ་གྱི་མཛད་འཕྲིན་དང་གལ་ཆེ་ཚུལ།

སྒོམ་ནི་ཐོག་མཐའ་བར་གསུམ་ལ་གལ་ཆེན་ཡིན་ལ་སྐྱེ་བུ་ཆུང་འབྲིང་གི་ལམ་ལ་བློ་སྦྱངས་པ་དང་ཐེག་གསུམ་གང་གི་ལམ་ལ་ཞུགས་པ་ལ་ཡང་ཐོག་མའི་སྐས་རིམ་ཡིན་ལ་བར་དུ་སྤངས་རྟོགས་གི་ཡོན་ཏན་དག་རང་རྒྱུད་ལ་མ་སྐྱེས་བ་རྣམས་སྐྱེ་བའི་ཐབས་དམ་པ་ཡང་འདི་ཡིན་ལ་མཐའ་མར་རྟོགས་ཟིན་པའི་ཆོས་རྣམས་གོམས་པ་མཐར་ཕྱིན་པའི་ཡེ་ཤེས་སྐྱེད་བྱེད་ཡང་འདི་ཡིན་པས་ཐོག་མཐའ་བར་གསུམ་ལ་གལ་ཆེན་ཡིན། འཕགས་པ་དགོངས་པ་ངེས་འགྲེལ་[17]ལས། བྱམས་པ། ཡང་ཉན་ཐོས་རྣམས་ཀྱིའམ།  བྱང་ཆུབ་སེམས་དཔའ་རྣམས་ཀྱིའམ།  དེ་བཞིན་གཤེགས་པ་རྣམས་ཀྱི་དགེ་བའི་ཆོས་འཇིག་རྟེན་པ་དང་འཇིག་རྟེན་ལས་འདས་པ་ཐམས་ཅད་ཀྱང་ཞི་གནས་དང་ལྷག་མཐོང་གི་འབྲས་བུ་ཡིན་པར་རིག་པར་བྱའོ། ། ཞེས་གསུངས་པའི་ཕྱིར།  ཉེ་དུས་ཀྱི་སློབ་གཉེར་བ་དག་གིས་མི་ཚེ་ཐོས་བ་ལ་བསྟིམས་ནས་མཐར་གང་ཤེས་བ་དེ་ཚོགས་ཀྱི་དབུས་སུ་སྨྲར་མཁས་བོ་བྱེད་པ་ཙམ་ལས་གང་ཤེས་པའི་དོན་ལ་སྒོམ་པའི་ཉམས་ལེན་ཅུང་ཟད་ཙམ་ཡང་མི་བྱེད་པའི་རིགས་ཅན་རྣམས་ནི།  དཔེར་ན་དུས་ཡུན་རིང་མོ་ཞིག་ནས་རྒྱ་གར་ལ་འགྲིམ་པའི་སྟ་གོན་བྱས་དེ་ལམ་ཆས་དངུལ་སྒོར་སོགས་རང་ལ་མཁོ་བའི་བཅའ་ལག་མ་ཚང་བ་མེད་པར་བསྒྲིགས་ནས་འགྲོ་བའི་དུས་ལ་ཐོན་པ་ན་ཡུལ་ལ་ཞེན་ཆགས་ནས་འགྲོ་མ་ཐུབ་པ་དང་ཀུན་ནས་མཚུངས།  ལམ་རིམ་[18]ལས་ཐོས་བསམ་གྱིས་གཏན་ལ་ཕབ་པ་དེ་བསྒོམ་པའི་ཕྱིར་མིན་པར་ཕྱིའི་གོ་རྒྱ་གཅོད་པ་ཙམ་དང་བསྒོམ་པ་ན་གཞན་དེ་དང་འབྲེལ་མེད་ཅིག་བསྒོམ་པ་ན་ནི་དཀྱུས་ས་གཞན་དུ་བསྟན་ནས་རྒྱུག་ས་གཞན་དུ་བྱེད་པ་ལྟར་ཞེས་གསུངས།

ཡང་དེ་ཉིད་ལས་བསམ་གཏན་ལ་བྱེད་ལས་ཀྱིས་ཕྱེ་ན། ཚེ་འདི་ལ་ལུས་སེམས་བདེ་བར་གནས་པར་བྱེད་པའི་བསམ་གཏན་སོགས་གསུངས་ཡོད་ལ་སྤྱིར་དངོས་གཙོ་སྨྲ་བ་དང་སེམས་གཙོ་སྨྲ་བ་གཉིས་ལས་ང་ཚོ་སེམས་གཙོ་སྨྲ་བ་ཡིན་པས་ཞི་ལྷག་ཟུང་དུ་འབྲེལ་བའི་སྒོམ་བྱུང་གི་མྱོང་བ་ཞིག་ཡོད་ན་མཆོག་ཡིན་ཀྱང་།  དེ་མི་ནུས་ཀྱང་ཚེ་འདིའི་ལུས་སེམས་བདེ་བར་གནས་བའི་ཐབས་ལ་སྒོམ་གྱི་ཉམས་ལེན་ཅུང་ཟད་ཡོད་དགོས་བར་སྙམ།  འདི་ནི་ང་ཚོ་སེམས་གཙོ་སྨྲ་བ་ཡིན་པའི་དན་རྟགས་ཡིན། ད་ལྟ་འཛམ་གླིང་གི་རྒྱལ་ཁབ་ཡོངས་ན་སྤྱི་ཚོགས་ཀྱིས་བསྐྱེད་པའི་སེམས་ནད་དོགས་འཚེར་གྱི་ནད་(抑郁症）ཅེས་པ་གང་སར་ཁྱབ་བཞིན་ཡོད།  དོགས་མཚེར་གྱི་ནད་དེ་སློང་རྐྱེན་ནི་མི་སོ་སོའི་འདོད་པ་མ་ཁེངས་བ་དང་འཚོ་བའི་གནོན་ཤུགས་མ་ཐེག་པ་བྱས་ནས་ཡོང་བ་དང་སློབ་མ་ཚོའི་རྒྱུག་འབྲས་མ་ལེགས་པ་དང་སློབ་གྲོགས་གཞན་གྱི་གྲུབ་འབྲས་ལ་བསྡུར་གཤིབ་བྱས་ནས་བསྐྱེད་པ་ཞིག་ཡིན་ལ་སེམས་ནད་འདིའི་རང་སྲོག་གཅོད་པའི་གནས་ཚུལ་ཡང་འབྱུང་བཞིན་ཡོད། འདི་འདྲ་བའི་གནོན་ཤུགས་བྱུང་ཡང་གནས་ཚུལ་དེ་འདྲའི་འོག་ནས་ང་ཚོའི་ནང་པའི་དྲན་པ་ཉེར་བཞག་སྒོམ་གྱི་རིམ་པ་འདིས་ཕན་པ་ཆེན་པོ་འབྱུང་བཞིན་ཡོད།  ནང་བའི་བླང་དོར་དང་འབྲེལ་བའི་དྲན་པ་ཉེར་བཞག་མཚན་ཉིད་པ་སྒོམ་པ་མ་ཡིན་ཡང་ལུས་སེམས་རང་སོར་བཞག་པའི་མྱོང་ཚོར་སྟངས་འཛིན་བྱེད་པའི་སྒོམ་ཡིན་ནོ། །ངས་དེ་རིང་སྒོམ་བརྒྱབ་པ་ཡིན་ཞེས་བཤད་ན་ཕ་རོལ་བ་གད་མོ་འཆོར་སྲིད།  མ་གཞི་ཁོའི་སེམས་ནང་ན་སྒོམ་ཞེས་བ་ནི་ཧ་ཅང་ཚད་རིམ་མཐོན་པོ་ཞིག་ལ་ངོས་འཛིན་ཡོད་པའི་ཡིན།  སྒོམ་ལ་ཚད་རིམ་མཐོ་བའི་སྒོམ་ཡང་ཡོད་ལ་དམའ་བའི་སྒོམ་ཡང་ཡོད།  ང་ཚོའི་ཉིན་རེའི་འཚོ་བའི་ནང་ལ་སྒོམ་གྱི་ཉམས་ལེན་ཅུང་ཙམ་ཡོད་ན་ཕར་བལྟས་བ་ཙམ་གྱི་སྤྱོད་ལམ་དང་སེམས་ཞི་དུལ་ཀྱི་རྣམ་པ་ཞིག་ངང་གིས་སླེབས་ཐུབ་པ་འདྲ།  ང་ཚོ་སེམས་ངལ་བྱུང་བ་དང་སེམས་མ་སྐྱིད་པ་བྱུང་སྐབས་དབུགས་ཀྱི་སྟེང་དུ་སྒོམ་བརྒྱབ་ཟེར་བ་ཞིག་ཐོན་ཀྱིན་འདུག་འདི་ནང་སེམས་ཀྱི་དཀའ་ངལ་སེལ་བའི་སྒོམ་གྱི་བྱེ་བྲག་ཅིག་ཡིན་པ་རེད་འདི་ལ་བརྟེན་ནས་ལུས་དང་སེམས་ཀྱི་ན་ཚ་སེལ་ཐུབ་པའི་ཐབས་མཆོག་ཅིག་རེད་དཔེར་ན་རྗེ་བདག་ཉིད་ཀྱི་སྐྱོར་མོ་ལུང་དུ་འདུལ་བ་མདོ་རྩ་བའི་རང་འགྲེལ་ཤིན་ཏུ་རྒྱས་པ་དེར་ཤུགས་ཀྱིས་ཐུགས་སྦྱོང་གནང་བཞིན་པའི་སྐབས་ལ་སྐུ་སྟོད་ལ་ཟུག་གཟེར་དྲག་པོས་སྙུང་གཞི་བྱུང་ཞིང་།  སྙུང་གཞི་དེ་ཕྱིས་སུ་བཅོས་ཐབས་ཅི་རིགས་པ་ཞིག་མཛད་ཀྱང་ཕན་པ་མ་བྱུང་།  མཐར་དབུགས་གཏོང་ལེན་མ་ནིང་ཧ་འདོན་ལ་བརྟེན་ནས་དྲག་སྐྱེད་བྱུང་བ་གངས་ཅན་ལྗོངས་སུ་སངས་རྒྱས་བྱོན་པའི་ནང་དུ་གསལ།[19]

ད་དུང་ད་ལྟའི་དུས་སུ་ནུབ་ཕྱོགས་སུ་སྒོམ་གྱི་བསྟན་པ་ཆེས་ཆེར་སྤེལ་མཁན་ཡོངས་དགེ་མི་འགྱུར་མཆོག་གི་དགའ་བའི་འཚོ་བ་[20]ཞེས་བའི་ནང་དུ་བྱིས་པའི་དུས་སྐབས་ནས་ང་ལ་གོམས་འདྲིས་ཕྱིན་པའི་སེམས་འཚབ་པ་འདི་འཇོམས་པར་བྱེད་པ་ལ། བདུན་ཕྲག་གཉིས་ལྷག་སྒོམ་ཉམས་ལེན་ཐོག་བློ་རྩེ་གཅིག་ཏུ་གཏོད་དགོས་བྱུང་། དུས་དེ་ནས་བཟུང་འཇིགས་སྣང་གི་གནོན་འཚེ་སྣ་གཅིག་ཀྱང་མ་བྱུང་། ཞི་འཇམ་བག་ཕེབས་དང་། སྤོབས་པ། དགའ་བདེའི་ཚོར་སྣང་བྱུང་སྟེ། ཞེས་གསུངས། དེ་བཞིན་དུ་འཛམ་གླིང་གི་གསར་འགྱུར་ལས་ཁུངས་གྲགས་ཅན་དབྱིན་ཇིའི་རླུང་འཕྲིན་ཁང་(BBC)ནས་སྤེལ་བའི་སྒོམ་སྐོར་གྱི་གནས་ཚུལ་ཞིག་ལྟར་ན།  སྒོམ་རྒྱག་སྐབས་མིའི་ཀླད་པ་ལས་རྫས་རྒྱུ་ཁྱད་པར་བ་ཞིག་འབྱེད་ཅིང་། རྫས་རྒྱུ་དེས་ལོ་རྒས་པའི་རྐྱེན་བྱས་ཏེ་རིམ་བཞིན་ཉམས་ཞན་དུ་འགྲོ་བཞིན་པའི་ཀླད་ནུས་རྩོལ་ཁག་སླར་གསོ་བྱེད་ཐུབ་པ་མ་ཟད།  ད་དུང་མིའི་ནད་འགོག་མ་ལག་གི་སྟོབས་ཤུགས་ཇེ་ཆེར་གཏོང་ཐུབ་ཀྱི་ཡོད་པས་ལུས་སེམས་ཀྱི་བདེ་ཐང་ཆེད་སྒོམ་རྒྱུག་རྒྱུར་སྐུལ་མ་བྱས་འདུག  འདིའི་མཚོན་པའི་སྒོམ་གྱི་ཕན་ནུས་མང་ཡང་འདིར་བཀོད་ན་ཚིག་ཚོགས་མང་འགྲོ་བས་འདི་ཙམ་གྱི་འཐུས་བར་བྱས་སོ། །

མཇུག་བསྡུ་བའི་གཏམ།

སྒོམ་གྱི་ཉམས་ལེན་ཕྲན་ཙམ་ཡང་མེད་པར་སྒོམ་གྱི་རྣམ་བཞག་བཤད་ན་འཕྱ་སྨོད་ཀྱི་གནས་སུ་འགྱུར་སྲིད་མོད་འོན་ཀྱང་ང་ཚོའི་དགོན་སྡེ་དག་གི་བཤད་གྲྭ་ཁག་ཏུ་ཕར་བལྟས་ཚོད་ལ་རྩོད་པའི་རིག་གནས་ཆེས་ཆེར་གཙུག་འཛིན་བྱེད་པ་ལས་ཉིན་རེའི་འཚོ་བའི་ཁྲོད་དུ་ནང་བའི་བླང་དོར་དང་འབྲེལ་བའི་སྒོམ་རྒྱག་མཁན་ཉིན་མོའི་སྐར་མ་ལྟ་བུར་སྣང་ལ།   གཞན་ཡང་གཞུང་ལུགས་ལ་མ་སྦྱངས་པ་རྣམས་ཀྱིས་ཀྱང་ནང་བའི་བླང་དོར་དང་འབྲེལ་བའི་སྒོམ་གནང་མ་ཐུབ་ཀྱང་།  ཉིན་རེའི་འཚོ་བའི་ཁོམ་ལོང་དང་བསྟུན་ནས་མྱོང་ཚོར་སྟངས་འཛིན་གྱི་སྒོམ་རེ་གནང་ཐུབ་ན་འཚོ་བའི་གནོན་ཤུགས་དང་སེམས་ནད་ལུས་ཀྱི་ན་ཚ་སོགས་མ་སྐྱིད་པའི་ཚོར་བ་མང་བོ་ཞིག་སྔོན་འགོག་བྱེད་ཐུབ་པར་ཕན་པ་ཆེན་པོ་ཡོང་གི་ཡོད།    མི་སོ་སོའི་འཚོ་བའི་ནང་དུ་སྒོམ་ལ་དེ་ཙམ་དོ་སྣང་མེད་པའི་སྣང་ཚུལ་ཞིག་འདུག་ལ་ཧ་ཅང་གལ་ཆེན་ཞིག་གལ་ཆུང་ཞིག་དང་དོ་སྣང་མི་བྱེད་པའི་གནས་སུ་གྱུར་འདུག་པས་དོ་སྣང་རེ་སླེབས་པའི་སྔོན་བརྡ་རུ་རང་ནུས་ཅི་ལྕོགས་ཀྱིས་དུས་ཚོད་ཐུང་ཐུང་ཞིག་གི་ནང་ལ་བརྗོད་བྱ་དང་འབྲེལ་བའི་ཁུངས་རེ་འཚོལ་ཅི་ཐུབ་བྱས་ནས་རྩོམ་ཡིག་འདིར་འབད་བརྩོན་ཉུང་ཙམ་བགྱིས་པ་ཡིན།  སྒོམ་ནི་ཧ་ཅང་རྒྱ་ཆེ་ལ་རིགས་མང་དུ་ཡོད་པ་ཞིག་ཡིན་པས་ཐེངས་འདིར་སྒོམ་གྱི་ངོ་བོ་ཙམ་གླེང་ཡོད་པ་ལས་སྒོམ་གྱི་བྱུང་རིམ་དང་དབྱེ་བ་མཐའ་དག་ལ་སྤྲོས་པ་བྱེད་མ་ཐུབ།   མདོར་ན་ནོར་སྐྱོན་གྱི་ཆ་ཅི་མཆིས་ཁྱེད་མཁྱེན་ལྡན་ཀློག་པ་བོ་ཡོངས་དང་ཐོས་པ་རྒྱ་མཚོས་ལྟོ་འགྲངས་ཤིང་ཐབས་ཤེས་གཤོག་རྩལ་ཀྱིས་སྟོང་བའི་དབྱིངས་ན་གར་དུ་རྩེན་པའི་མཁས་མང་མཁའ་ལྡིང་དབང་བོ་རྣམས་ཀྱིས་ཐུགས་ཀུན་གསལ་ཀྱི་ཀློང་ནས་དགོངས་ཡང་མཛོད་ཅིག། །  བཀྲ་ཤིས་པར་གྱུར་ཅིག

དཔྱད་གཞིའི་ཡིག་ཆ། 

[1] བུ་སྟོན་ཆོས་འབྱུང་། བོད་ལྗོངས་མི་དམངས་དཔེ་སྐྲུན་ཁང་།  ཤོག་གྲངས། ༢༤༩  མཛད་པ་པོ་བུ་སྟོན་རིན་ཆེན་གྲུབ།

[2] ལོ་རྒྱུས་གཡུ་ཡི་ཕྲེང་བའི་པོད་དང་པོ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་།  ཤོག་གྲངས། ༣༠༡  སྒྲིག་རྩོམ་པ་ཆབ་སྤེལ་ཚེ་བརྟན་ཕུན་ཚོགས་དང་ནོར་བྲང་ཨོ་རྒྱན་གཉིས།

[3] རྒྱལ་རབས་གསལ་བའི་མེ་ལོང་། མི་རིགས་དཔེ་སྐྲུན་ཁང་།  ཤོག་གྲངས། ༢༢༡  མཛད་པ་པོ་ས་སྐྱ་བསོད་ནམས་རྒྱལ་མཚན།

[4] རྦ་བཞེད་ཕྱོགས་བསྒྲིགས། མི་རིགས་དཔེ་སྐྲུན་ཁང་།  ཤོག་གྲངས།  ༤༧  མཛད་པ་པོ་སྦ་གསལ་སྣང་།

[5] ལམ་རིམ་ཆེན་མོ། སི་ཁྲོན་མི་རིགས་དཔེ་སྐྲུན་ཁང་།  ཤོག་གྲངས། ༣༣༦  མཛད་པ་པོ་རྗེ་ཙོང་ཁ་བ།

[6] བསྒོམ་རིམ་མཐའ་མ། སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་། ཤོག་གྲངས། ༡༠༨  མཛད་པ་པོ་སློབ་དཔོན་ཀ་མ་ལ་ཤཱི་ལ།

[7] གཏམ་རྒྱུད་གསེར་ཐང་། སི་ཁྲོན་མི་རིགས་དཔེ་སྐྲུན་ཁང་།  ཤོག་གྲངས། ༣༧༠   མཛད་པ་པོ་དགེ་འདུན་ཆོས་འཕེལ།

[8] ལམ་རིམ་ཆེན་མོ།  སི་ཁྲོན་མི་རིགས་དཔེ་སྐྲུན་ཁང་།  ཤོག་གྲངས། ༦༨  མཛད་པ་པོ་རྗེ་ཙོང་ཁ་བ།

[9] ཕྱག་ཆེན་རྩ་བ་རྒྱལ་བའི་གཞུང་ལམ། ཀྲུང་གོའི་བོད་རིག་པ་དཔེ་སྐྲུན་ཁང་།  ཤོག་གྲངས། ༥༤  མཛད་པ་པོ་པཎ་ཆེན་བློ་བཟང་ཆོས་ཀྱི་རྒྱལ་མཚན།

[10] མངོན་པ་ཀུན་བཏུས། སེར་བྱེས་རིག་མཛོད་ཆེན་མོའི་རྩོམ་སྒྲིག་ཁང་།  ཤོག་གྲངས། ༡༦༠ མཛད་པ་པོ་འཕགས་པ་ཐོགས་མེད།

[11] གསུང་འབུམ་པོད་གསུམ་པ་ཚད་མ་རིགས་གཏེར། ཀྲུང་གོའི་བོད་རིག་པ་དཔེ་སྐྲུན་ཁང་།  ཤོག་གྲངས། ༣༦  མཛད་པ་པོ་ས་པཎ་ཀུན་དགའ་རྒྱལ་མཚན།

[12] བསླབ་པ་ཀུན་ལས་བཏུས་པ། སྡེ་དགེ་བསྟན་འགྱུར་ཁི་དུམ་པ། གློག་རྡུལ་ཤོག་གྲངས་མི་གསལ།  མཛད་པ་པོ་རྒྱལ་སྲས་ཞི་བ་ལྷ།

[13] ལམ་རིམ་ཆེན་མོ། སི་ཁྲོན་མི་རིགས་དཔེ་སྐྲུན།  ཤོག་གྲངས། ༧༠ མཛད་པ་པོ་རྗེ་ཙོང་ཁ་བ།

[14] ལམ་རིམ་ཆེན་མོ། སི་ཁྲོན་མི་རིགས་དཔེ་སྐྲུན། ཤོག་གྲངས། ༦༨   མཛད་པ་པོ་རྗེ་ཙོང་ཁ་བ།

[15] སྐབས་བཞི་པའི་བསྡུས་དོན། ནང་བསྟན་གཙུག་ལག་དཔེ་ཚོགས་བསྡུ་སྒྲིག་ཁང་།  ཤོག་གྲངས། ༡༦༡  མཛད་པ་པོ་རྗེ་གུང་ཐང་བསྟན་པའི་སྒྲོན་མེ།

[16] བཀའ་འབུམ་ཐོར་བུ།  མི་རིགས་དཔེ་སྐྲུན་ཁང་།  ཤོག་གྲངས།  ༣༤༠  མཛད་པ་པོ་རྗེ་ཙོང་ཁ་བ།

[17] འཕགས་པ་དགོངས་པ་ངེས་འགྲེལ་ཐེག་པ་ཆེན་པའི་མདོ། སྡེ་དགེ་བཀའ་འགྱུར་མདོ་སྡེ་ཅ་པར།  གློག་རྡུལ་ཤོག་གྲངས་མི་གསལ།  མདོ།

[18] ལམ་རིམ་ཆེན་མོ། སི་ཁྲོན་མི་རིགས་དཔེ་སྐྲུན།  ཤོག་གྲངས། ༦༩  མཛད་པ་པོ་རྗེ་ཙོང་ཁ་བ།

[19] གངས་ཅན་ལྗོངས་སུ་སངས་རྒྱས་བྱོན་པ། དཔེ་སྐྲུན་མི་གསལ།  དེབ་སྟོད་དཀར་སྨད་དམར་ནག་ཞིག  ཤོག་གྲངས། ༥༥  མཛད་པ་པོ་ལྷ་རམས་པ་ཐུབ་བསྟན་སྦྱིན་པ།

[20] དགའ་བའི་འཚོ་བ། དཔེ་རྟགས་དཔེ་སྐྲུན་མེད་དཔེ་ཆའི་མདུན་ངོས་ན་མཛད་པ་པོ་ཁོང་གི་སྐུ་པར་བཞུགས། ཤོག་གྲངས། ༤ མཛད་པ་པོ་ཡོངས་དགེ་མི་འགྱུར།

– – – – –