ནང་དོན་གནད་བསྡུས། དཔྱད་རྩོམ་འདིར་མཉམ་མེད་ཐུབ་པའི་དབང་བོའི་ལུང་གི་ཆོས་འཁོར་གསུམ་ལ། གསུང་རབ་ཡན་ལག་བཅུ་གཉིས་སུ་དབྱེ་ཚུལ་དང་། དེ་ལྟར་དབྱེ་དགོས་པའི་རྒྱུ་མཚན་དང་ཕན་ཡོན།གསུང་རབ་ཡན་ལག་བཅུ་གཉིས་བཀའ་སྡེ་སྣོད་གསུམ་དུ་འདུ་ཚུལ། སྒོས་སུ་བོད་འགྲེལ་རྣམས་སུ་གསུང་རབ་ཡན་ལག་བཅུ་གཉིས་སུ་འདྲེན་པའི་ལུང་ཁུངས་གང་འཇོག་པ་དང་། ཁུངས་དེ་ན་གསལ་བའི་ཡན་ལག་བཅུ་གཉིས་འདྲེན་ཚུལ་དང་བོད་འགྲེལ་རྣམས་སུ་དྲངས་བའི་ཚིག་མཐུན་མི་མཐུན་ལ་རྒྱ་བོད་མཁས་པའི་གཞུང་གོང་འོག་བསྡུར་ནས་དཔྱད་པ་བཏང་ཡོད།
བརྡ་ཆད་གཙོ་བོ། གསུང་རབ་ཡན་ལག་བཅུ་གཉིས། འགྲེལ་ཆེན་སྙིང་བོ་མཆོག སྡེ་སྣོད་གསུམ།
དང་པོ། གསུང་རབ་ཀྱི་གོ་དོན་དང་གསུང་རབ་ཡན་ལག་དུ་མར་དབྱེ་ཚུལ།
སྤྱིར་གསུང་རབ་ཞེས་པ་སྒྲ་ཡང་འཇུག་གི་དབང་དུ་བྱས་ན། རྒྱལ་བའི་བཀའ་དང་དགོངས་འགྲེལ་བསྟན་བཅོས་ཐམས་ཅད་ལ་འཇུག་ཆོག་ལ། སྒྲ་དོག་པའི་དབང་དུ་བྱས་ན་སངས་རྒྱས་ཀྱི་གསུང་བའི་མདོ་འམ་བཀའ་ལ་གསུང་རབ་ཞེས་བརྗོད། ཅིའི་ཕྱིར་གསུང་རབ་ཅེས་བརྗོད་ན། ཆོས་རྣམས་ཀྱི་ངོ་བོ་གནས་ལུགས་སམ་དེ་ཁོ་ན་ཉིད་ཀྱི་དོན་འགྲེལ་བའི་གསུང་རྣམས་ཀྱི་ནང་ནས་མཆོག་དང་རབ་དང་ཕུལ་དུ་བྱུང་བས་ན་གསུང་རབ་ཞེས་བརྗོད་པ་ཡིན་ཏེ། ཆོས་ལུགས་གྲུབ་མཐའ་སོ་སོའི་རང་རང་གི་སྟོན་པའི་གསུང་ལ་གསུང་རབ་ཞེས་བརྗོད་པའི་ཐ་སྙད་འདི་སྤྱི་མཐུན་གྱི་སྐད་ཆ་ཞིག་ཡིན་པར་སྣང་། དཔེར་ན་ཡེ་ཤུ་ཆོས་ལུགས་ཀྱི་སྟོན་པ་མ་ཤི་ཀའི་རྩ་བའི་ཁྲིམས་བཅུ་བརྗོད་བྱར་བྱས་པའི་གཞུང་རྣམས་ལ་དམ་པའི་གསུང་རབ་ཞེས་བརྗོད་པ་དང་། དེ་ལ་གསུང་རབ་གསར་མ་དང་གསུང་རབ་རྙིང་མ་གཉིས་སུ་དབྱེ་བ་ལྟ་བུ། ཡང་ཁ་ཆེའི་སྟོན་པ་མོ་ཧཱ་མ་ཏི་ཆོས་གཞུང་དང་ཁྲིམས་སོགས་ལའང་གསུང་རབ་ཞེས་བརྗོད་པ་ལྟར། རང་རང་གི་སྟོན་པའི་གསུང་ལ་ཆེ་བཀུར་དང་བརྩི་འཇོག་གི་ཕྱིར་དུ་གསུང་རབ་ཞེས་པའི་ཐ་སྙད་འདི་སྤྱོད་པར་འདོད། ཡང་གསུང་རབ་ལ་ཡན་ལག་སམ་གྲངས་ཀྱི་ཆ་ནས་དུ་མར་དབྱེ་ཚུལ་ཡོད་དེ།གསུང་རབ་ཡན་ལག་གཉིས་དང་། གསུང་རབ་ཡན་ལག་གསུམ། གསུང་རབ་ཡན་ལག་ལྔ། གསུང་རབ་ཡན་ལག་དགུ གསུང་རབ་ཡན་ལག་བཅུ་གཉིས། གསུང་རབ་ཡན་ལག་དྲུག་ཅུ། གསུང་རབ་ཡན་ལག་དྲུག་ཅུ་རྩ་བཞི་སོགས་གྲངས་ཀྱི་ཆ་ནས་དབྱེ་ཚུལ་སྣ་ཚོགས་ཡོད། ཡིན་ནའང་ཁོ་བོའི་སྐབས་འདིར་མདོ་དང་རྒྱ་བོད་པཎ་གྲུབ་ཀྱི་གཞུང་རྣམས་ལས་ཆེས་ཤུན་ཏུ་མང་བར་འདོམས་ཡོད་པ་ནི་གསུང་རབ་ཡན་ལག་བཅུ་གཉིས་སུ་དབྱེ་ཚུལ་འདི་ཡིན་པར་མཐོང་བའི་རྒྱུ་མཚན་གྱིས་འདིར་གསུང་རབ་ཡན་ལག་བཅུ་གཉིས་སུ་དབྱེ་ཚུལ་དང་། གསུང་རབ་ཡན་ལག་བཅུ་གཉིས་སུ་འཇོག་པའི་དགོས་པ། ཇི་ལྟར་འཇོག་ཚུལ་སོགས་ལ། རྒྱ་གར་མཁས་པའི་གཞུང་དང་བོད་གངས་རིའི་ལྗོངས་ཀྱི་མཁས་པའི་དབང་བོ་རྣམས་ཀྱི་གཞུང་འགྲེལ་རྣམས་ལས་གསུང་རབ་ཡན་ལག་བཅུ་གཉིས་འདྲེན་ཚུལ་དང་། ཡན་ལག་བཅུ་གཉིས་སྟོན་པའི་ཁུངས་གང་ཡོད། ཡན་ལག་བཅུ་གཉིས་ཀྱི་ངོ་བོ་དང་དེ་སྡེ་སྣོད་གསུམ་དུ་འདུ་ཚུལ་གྱི་སྐོར་རགས་ཙམ་གླེང་ན། འཇམ་དཔལ་རྩ་རྒྱུད་དང་འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་སོགས་བཅོམ་ལྡན་འདས་ཀྱི་མདོ་ལས་བསྟན་ཚུལ། སློབ་དཔོན་རིན་ཆེན་འབྱུང་གནས་ཀྱིས་མཛད་པའི་བརྒྱད་སྟོང་འགྲེལ་ཆེན་སྙིང་པོ་མཆོག་དང་། སེང་གེ་བཟང་པོའི་འགྲེལ་ཆེན་རྒྱན་སྣང་། འཕགས་པ་ཐོགས་མེད་ཀྱི་ཉན་ས་དང་བྱང་ས་མངོན་པ་ཀུན་བཏུས། མདོ་སྡེ་རྒྱན་དང་དབུས་མཐའ། གཞི་བསྡུ་བ་སོགས་རྒྱ་གར་མཁས་པའི་གཞུང་མང་པོར་བསྟན་ཡོད་ལ། འཇམ་མགོན་བླ་མ་ཡབ་སྲས་སོགས་བོད་གངས་ཅན་གྱི་མཁས་པའི་དབང་པོ་རྣམས་ཀྱིས་དེ་དག་གི་དགོངས་པ་རྒྱས་པར་བཀྲལ་ཡོད།
དང་པོ། མདོ་ཁུངས་ནི། “འཇམ་དཔལ་རྩ་བརྒྱུད་ལས། ཐུབ་པ་མ་ལུས་འདུས་ནས་ནི། །གསུང་རབ་ཡན་ལག་བཅུ་གཉིས་དང༌། །འདུལ་བ་མ་ལུས་སྡུང་པར་བྱེད། །གང་ཞིག་ཆོས་ནི་ངས་བསྟན་དང༌། །དེ་བཞིན་སྔོན་གྱི་རྒྱལ་བ་མཆོག །དེ་ནི་སློབ་མའི་མཆོག་དེས་ཀྱང༌། །རྣམ་པ་གསུམ་དུ་ཡང་དག་བསྟན། །འདུལ་བ་དང་ནི་མངོན་པ་དང༌། །མདོ་སྡེའི་དབྱེ་བས་གཞུང་དུ་བྱས། །” ཞེས་གསུངས་པ་དང་། “འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ་ལས། དེ་བཞིན་གཤེགས་པས་སེམས་ཅན་རྣམས་ལ་གསུང་རབ་ཡན་ལག་བཅུ་གཉིས་རྒྱས་པར་བསྟན་པས་ཕན་གདགས་སོ་སྙམ་དུ་མི་དགོངས་མོད་ཀྱི། སྔོན་གྱི་ཐུགས་རྗེ་དང༌། དགེ་བའི་རྩ་བའི་མཐུས་སེམས་ཅན་འདི་དག་ལ་ཕྱི་མའི་མཐར་ཐུག་པ་མེད་པར་ཆོས་རྒྱས་པར་སྟོན་པ་དེ་ནི་དེ་བཞིན་གཤེགས་པ་རྣམས་ཀྱི་སྤྱོད་པའོ། །” ཞེས་གསེར་འོད་དམ་པའི་མདོ་ལས་ཡང་གསུང་རབ་ཡན་ལག་བཅུ་གཉིས་ཀྱི་རྣམ་བཞག་གསུངས་ཡོད་ལ། གཙོ་བོ་གསུང་རབ་ཡན་ལག་བཅུ་གཉིས་རྒྱས་པར་ངོས་བཟུང་པའི་རྒྱ་གར་གྱི་པཎ་གྲུབ་ཀྱི་གཞུང་ལ་འཕགས་པ་ཐོགས་མེད་ཀྱི་གཞུང་རྣམས་ཆེས་རྒྱས་པར་སྣང་ལ། འཕགས་པ་ཐོགས་མེད་ཀྱི་ཉན་ས་དང་བྱང་ས་མངོན་པ་ཀུན་བཏུས།མདོ་སྡེ་རྒྱན་དང་དབུས་མཐའ།གཞི་བསྡུ་བ་སོགས་སུ་གསུང་རབ་ཡན་ལག་བཅུ་གཉིས་ཀྱི་ངོ་བོ་དང་རྒྱུ་མཚན་ཅིའི་ཕྱིར་གསུང་རབ་ཡན་ལག་བཅུ་གཉིས་སུ་འཇོག་ཚུལ་རྒྱས་པར་གསུང་ཡོད། གསུང་རབ་ཡན་ལག་བཅུ་གཉིས་འཇོག་ཚུལ་ཡང་། བརྒྱད་སྟོང་འགྲེལ་ཆེན་སྙིང་པོ་མཆོག་ལས་མཚན་གཞི་ཞིག་ངོས་བཟུང་ཡོད་པ་དེའི་རྗེས་སུ་འབྲང་ནས་གསུང་རབ་ཡན་ལག་བཅུ་གཉིས་སུ་དབྱེ་ཚུལ་བོད་ཀྱི་མཁས་པ་ཕལ་ཆེ་བ་ཞལ་མཐུན།
བོད་འགྲེལ་དུ་མར་གསུང་རབ་ཡན་ལག་བཅུ་གཉིས་སྟོན་པའི་རྒྱ་གཞུང་ལ་འགྲེལ་ཆེན་སྙིང་བོ་མཆོག་ཁུངས་སུ་དྲངས་ཡོད་ལ། ཡང་གཞུང་འགར་བརྒྱད་སྟོང་འགྲེལ་ཆེན་ལས་ཞེས་པ་ཙམ་ལས་འགྲེལ་ཆེན་རྒྱན་སྣང་དང་སྙིང་བོ་མཆོག་གང་ཡིན་གསལ་ཁ་ཐོན་མེད་པ་ཡང་ཡོད། ནིའུ་ཛི་ལེན་ཌི་བྱམས་པ་ཤེར་རབ་ཀྱི་བརྩམས་པས་ལེགས་བཤད་གསེར་ཕྲེང་གི་འཆན་འགྲེལ་འོད་ཀྱི་ཕུང་པོ་ལས། ” ཇི་སྐད་དུ། འགྲེལ་ཆེན་རྒྱན་སྣང་དུ་དྲངས་པ་ལས” ཞེས་རྒྱན་སྣང་དུ་ལུང་དྲངས་བ་ཡིན་བཤད་པ་དང་། སེར་ཤུལ་ལྷ་རམས་བཀྲ་ཤིས་བསོད་ནམས་ཀྱི་ལེགས་བཤད་གསེར་གྱི་ཕྲེང་བའི་བརྗེད་བྱང་ཚིག་དོན་རབ་གསལ་ལས།རྒྱན་སྣང་ལས་ཞེས་འགྲེལ་ཆེན་རྒྱན་སྣང་དུ་ཡོད་པ་ལྟ་བུར་་གསུངས་ཡོད། འགྲེལ་ཆེན་རྒྱན་སྣང་རང་གི་གཞུང་དུ་ཁ་གསལ་བོ་བྱས་ནས་གསུངས་ཡོད་པ་མི་སྣང་ངོ་། །རྒྱན་སྣང་ལས། “གང་ཅི་ཞེས་བྱ་བ་ནི། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་རྟོགས་པ་བརྗོད། །དེ་ལྟར་བྱུང་དང་གླེང་གཞི་དང་། །ཤིན་ཏུ་རྒྱས་པ་སྐྱེས་རབས་བཅས། །གཏན་ཕབ་རྨད་དུ་བྱུང་སྨོས་ཏེ། །དེ་ལྟར་ཡན་ལག་བཅུ་གཉིས་གསུང་། །ཞེས་བྱ་བའོ། །
རྒྱན་སྣང་དུ་ལུང་དྲངས་བ་ཡིན་པ་གསལ་བར་མི་སྣང་ལ། རང་གཞུང་ཡིན་པའང་གསལ་བར་མི་སྣང་ངོ་། ། “ནིའུ་ཛི་ལེན་ཌི་བྱམས་པ་ཤེར་རབ་དང་“ལྷ་རམས་པ་བཀྲ་ཤིས་བསོད་ནམས་གཉིས་ཀྱི་ལེགས་བཤད་གསེར་གྱི་ཕྲེང་བའི་མཆན་འགྲེལ་དུ་དེ་ལྟར་གསུང་མོད། ལེགས་བཤད་གསེར་ཕྲེང་རང་ན་དེ་ཡང་ཇི་སྐད་དུ་ཞེས་པ་ཙམ་ལས་རྒྱན་སྣང་དང་སྙིང་པོའི་མཆོག་གང་ཡིན་ཁ་མི་གསལ། བུ་སྟོན་རིན་པོ་ཆེ་དང་ཀུན་མཁྱེན་ཉི་མའི་གཉེན། རྗེ་བཙུན་ངག་དབང་ཡོན་ཏན་བཟང་པོ་སོགས་ཀྱིས་བརྒྱད་སྟོང་འགྲེལ་ཆེན་སྙིང་པོའི་མཆོག་གི་གཞུང་ཡིན་པ་གསུངས་འདུག “རྗེ་བཙུན་ངག་དབང་ཡོན་ཏན་བཟང་པོའི་མཛད་པའི་དཀར་ཆག་ཚིག་ཕྲེང་དོན་ཟབ་ཡིད་བཞིན་ནོར་བུའི་རྒྱན་ཕྲེང་ལས། གསུམ་པ་རྗོད་བྱེད་ཀྱི་སྒོ་ནས་དབྱེ་ན། གསུང་རབ་ཡན་ལག་བཅུ་གཉིས་ཏེ། བརྒྱད་སྟོང་འགྲེལ་བ་སྙིང་པོ་མཆོག་ལས། མདོ་སྡེ་དབྱངས་བསྙད་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེ་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་ཕབ་པ་དག། གསུང་རབ་ཡན་ལག་བཅུ་གཉིས་ཡིན། །”ཞེས་གསུངས་པ་ཡོད་པ་དང་། ཀུན་མཁྱེན་ཉི་མའི་གཉེན་གྱིས་འགྲེལ་ཆེན་སྙིང་པོ་མཆོག་གི་ལུང་དྲངས་བ་ནི། “གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་བ་ལས། གཉིས་པ་རྗོད་བྱེད་ཀྱི་སྒོ་ནས་དབྱེ་ན་གསུང་རབ་ཡན་ལག་བཅུ་གཉིས་ཏེ། བརྒྱད་སྟོང་འགྲེལ་བ་སྙིང་པོ་མཆོག་ལས། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པའི་སྡེ། །གསུང་རབ་ཡན་ལག་བཅུ་གཉིས་སོ། །” ཞེས་དེ་ལྟར་གསུངས་ཡོད་པ་རེད།
བུ་སྟོན་རིན་པོ་ཆེའི་བུ་སྟོན་ཆོས་འབྱུང་དུ་ཡང་གསལ་བར་གསུངས་ཡོད། མདོར་ན་རི་བོ་དགེ་ལྡན་པ་དང་ཇོ་ནང་སོགས་ཀྱི་མཁས་པ་མང་པོས་བརྒྱད་སྟོང་འགྲེལ་ཆེན་སྙིང་པོའི་མཆོག་གི་གཞུང་ཡིན་པ་གསུང་འདུག་ལ། གོང་དུ་འགྲེལ་ཆེན་རྒྱན་སྣང་གི་ལུང་དྲངས་བ་ལྟར་གང་ཅི་ཞེས་བྱ་བ་ནི་ཞེས་པའི་ཚིག་ལ་བལྟས་ན། རྒྱན་སྣང་རང་གཞུང་ཡིན་པ་ལས་གཞན་གྱི་ལུང་ཚིག་དྲངས་བ་གསལ་བར་མི་སྣང་། འགྲེལ་ཆེན་སྙིང་པོའི་མཆོག་གི་གཞུང་ཡིན་པར་བཞེད་པའི་བོད་སྔ་ཕྱིའི་མཁས་པ་རྣམས་ཀྱིས་འགྲེལ་ཆེན་སྙིང་པོའི་མཆོག་གསུང་རབ་ཡན་ལག་བཅུ་གཉིས་སྟོན་པའི་ཁུངས་སུ་འདྲེན་ཚུལ་མཚུངས་ཡང་། སྙིང་མཆོག་གི་ཚིག་དང་མི་མཐུན་པ་མ་ཟད་སྙིང་བོ་མཆོག་གི་ལུང་དྲངས་བའི་ཚིག་ལ་འདྲེན་ཚུལ་མི་མཐུན་པའི་ཁྱད་པར་ཡོད་པས་དཔྱད་གཞི་ཙམ་ཕུལ་ན། ལེགས་བཤད་གསེར་ཕྲེང་དང་བླ་མ་རྗེ་བཙུན་པའི་སྤྱི་དོན་སོགས་སུ་འགྲེལ་ཆེན་སྙིང་པོའི་མཆོག་དང་རྒྱན་སྣང་གང་ཡིན་ཁ་གསལ་མེད་པར་ཇི་སྐད་དུ་ཞེས་པ་དང་འགྲེལ་ཆེན་ལས་ཞེས་གསུང་རབ་ཡན་ལག་བཅུ་གཉིས་སྟོན་པའི་གཞུང་དྲངས་ཡོད་པ་ནི། ལེགས་བཤད་གསེར་ཕྲེང་ལས། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་རྟོགས་པ་བརྗོད། །དེ་ལྟར་བྱུང་དང་གླེང་གཞི་དང་། །ཤིན་ཏུ་རྒྱས་པ་སྐྱེས་རབས་བཅས། །གཏན་ཕབ་རྨད་དུ་བྱུང་ཆོས་ཏེ། །དེ་ལྟར་ཡན་ལག་བཅུ་གཉིས་གསུང་། ཞེས་དྲངས་ཡོད་པ་དང་། རྗེ་བཙུན་ངག་དབང་ཡོན་ཏན་བཟང་པོའི་མཛད་པའི་དཀར་ཆག་ཚིག་ཕྲེང་དོན་ཟབ་ཡིད་བཞིན་ནོར་བུའི་རྒྱན་ཕྲེང་ལས། མདོ་སྡེ་དབྱངས་བསྙད་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེ་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་ཕབ་པ་དག། གསུང་རབ་ཡན་ལག་བཅུ་གཉིས་ཡིན། །” ཞེས་དང་། ཀུན་མཁྱེན་ཉི་མའི་གཉེན་གྱི་འགྲེལ་ཆེན་སྙིང་པོ་མཆོག་གིས་ལུང་དྲངས་ཡོད་པ་ལས། མདོ་སྡེ་དབྱངས་བསྙད་ལུང་བསྟན་དང་། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེས་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པའི་སྡེ། །གསུང་རབ་ཡན་ལག་བཅུ་གཉིས་སོ། ། ཞེས་དང་། བུ་སྟོན་ཆོས་འབྱུང་དུ། མདོ་སྡེ་དབྱངས་བསྙད་ལུང་དུ་བསྟན། །ཚིགས་བཅད་ཆེད་བརྗོད་གླེང་གཞི་དང་། །རྟོགས་བརྗོད་དེ་ལྟ་བུ་བྱུང་དང་། །སྐྱེ་རབས་ཤིན་ཏུ་རྒྱས་པ་དང་། །རྨད་བྱུང་གཏན་ལ་དབབ་པ་དག། གསུང་རབ་ཡན་ལག་བཅུ་གཉིས་ཡིན། །”ཞེས་དྲངས་བ་སོགས་མི་འདྲ་བའི་ཁྱད་པར་ཡོད།
གསེར་ཕྲེང་ལས་ཚིགས་བཅད་ཆེད་བརྗོད་རྟོགས་པ་བརྗོད་ཞེས་དྲངས་ཡོད་པ་དང་གཞན་དག་ཏུ་ཚིགས་བཅད་ཆེད་བརྗོད་གླེང་གཞི་དང་ཞེས་དྲངས་ཡོད་པ་རེད། རྗེ་བཙུན་ངག་དབང་ཡོན་ཏན་བཟང་པོ་དང་ཀུན་མཁྱེན་ཉི་མའི་གཉེན་གཉིས་ཀྱི་ཁུངས་སྙིང་པོ་མཆོག་གི་གཞུང་ཚིག་དྲངས་ཚུལ་ཚིག་རིས་ཀྱི་ཆ་ནས་ཁྱད་པར་མེད། ཡིན་ནའང་གསེར་ཕྲེང་དང་བུ་སྟོན་ཆོས་འབྱུང་དུ་དྲངས་བ་སོགས་ལ་བརྗོད་བྱེད་ཚིག་གི་ཆ་ནས་ཁྱད་པར་ཆེན་པོ་ཡོད། ཡིན་ནའང་སློབ་དཔོན་རིན་ཆེན་འབྱུང་གནས་ཀྱི་འགྲེལ་ཆེན་སྙིང་པོ་མཆོག་རང་ལ་བལྟས་ན། ཚིག་ལྷུག་གི་རྣམ་པའི་གསུངས་ཡོད་པ་ལས་གོང་དུ་དྲངས་བའི་གཞུང་དེ་དག་ནང་ཡོད་པའི་ཚིགས་བཅད་ཀྱི་རྣམ་པ་དེ་ལྟ་བུ་ཞིག་རྙེད་མ་བྱུང་། འགྲེལ་ཆེན་སྙིང་པོ་མཆོག་ལས། ”བཅོམ་ལྡན་འདས་ཀྱི་གསུང་རབ་ཀྱི་ནང་ན། མདོ་སྡེ་རིན་པོ་ཆེ་ཉིད་ཡིན་པའི་ཕྱིར་ཏེ། དིའི་ཕྱིར་གསུང་རབ་ནི་བཅུ་གཉིས་ཏེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པ་དང་། གླེང་གཞི་དང་། རྟོག་པ་བརྗོད་པ་དང་། དེ་ལྟ་བུ་བྱུང་བ་དང་། སྐྱེས་པའི་རབས་དང་། ཤིན་ཏུ་རྒྱས་པ་དང་། རྨད་དུ་བྱུང་བའི་ཆོས་དང་། གཏན་ལ་དབབ་པ་དག་གོ། །” ཞེས་འབྱུང་ལ། གང་ལྟར་དཔར་གཞི་ལ་མི་འདྲ་བའི་ཁྱད་པར་ཡོད་པ་ཡིན་ནམ་ལོ་ཙྭ་བའི་འགྱུར་མི་འདྲ་བ་བྱུང་བ་གང་ཡིན་བཤད་དཀའ་ཡང་ཕལ་ཆེར་འགྱུར་གྱི་ཁྱད་པར་ཡིན་སྙམ་ཡང་དཔར་གཞི་མི་འདྲ་བ་གཞིབ་བསྡུར་བྱེད་མ་ཐུབ་པས་དཔྱོད་ལྡན་རྣམས་ཀྱིས་དཔྱད་པར་མཚལ།
གཉིས་པ། གསུང་རབ་ཡན་ལག་བཅུ་གཉིས་སུ་འཇོག་དགོས་པའི་དགོས་པ་དང་གསུང་རབ་ཡན་ལག་བཅུ་གཉིས་ཀྱི་ངོ་བོ།
སྤྱིར་རྒྱ་བོད་མཁས་གྲུབ་མང་པོས་གསུང་རབ་ཡན་ལག་བཅུ་གཉིས་ཀྱི་སྒོ་ནས་གཏན་ལ་ཕབ་པའི་དགོས་པ་གསུང་སྐབས། འཆད་པ་པོས་བཤད་བྱའི་དོན་ཚེགས་ཆུང་ངུས་སྟོན་པས་རྣམ་པར་གཞག་སླ་བ་དང་། ཚིག་ཉུང་ངུས་དོན་རྒྱ་ཆེན་པོ་གོ་བར་བྱེད་པས་བཤད་སླ་བ་དང་། ཉན་པ་པོས་ཀྱང་གཞུང་ཉུང་ཞིང་དོན་གསལ་བས་བཟུང་སླ་བ་དང་། ཆོས་འདི་བསྒོམས་པས་ཤེས་པར་བྱ་བ་རྟོགས་ནས་དེ་ལ་གུས་པས་གཅེས་སུ་འཛིན་ཅིང་མྱུར་དུ་ཚོགས་གཉིས་ཡོངས་སུ་རྫོགས་པར་བྱེད་པ་དང་། གུས་པའི་སྦྱོར་བས་ཤེས་རབ་རྣོན་པོར་གྱུར་ནས་མྱུར་དུ་ཆོས་ཉིད་རྟོགས་པར་འགྱུར་བ་དང་། ཆོས་ཉིད་རྟོགས་ནས་བསྟན་པ་ལེགས་པར་གནས་པ་རྟོགས་ཏེ། སྟོན་པ་པོ་སངས་རྒྱས་ལ་ཡོན་ཏན་ཤེས་ནས་མི་ཕྱེད་པའི་དད་པ་ཐོབ་པ་དང་། བསྟན་བྱ་དམ་པའི་ཆོས་དང་དེ་སྒྲུབ་པ་ལ་འཕགས་པའི་དགེ་འདུན་ལའང་དེ་དག་གི་ཡོན་ཏན་ཤེས་ནས་མི་ཕྱེད་པའི་དད་པ་ཐོབ་པ་དང་། དགོངས་པའི་དོན་འབད་དེ་རྟོགས་པས་རབ་ཏུ་དགའ་བ་ཐོབ་པའི་ཕྱིར་མཐོང་བའི་ཆོས་ཚེ་འདི་ཉིད་ལའང་བདེ་བར་གནས་པའི་མཆོག་ལ་རེག་པ་དང་། བརྒལ་ལན་ལ་སོགས་པའི་འབེལ་བའི་གཏམ་གྱིས་དོན་ཟབ་མོ་གཏན་ལ་འབེབས་ཤིང་རྣམ་པར་འབྱེད་པས་དམ་པ་མཁས་པ་རྣམས་ཀྱི་སེམས་མགུ་བར་བྱེད་དེ། དེ་ལ་བརྟེན་ནས་མཁས་པ་མཁས་པ་ཞེས་བྱ་བའི་གྲངས་སུ་འགྲོ་ཞིང་སྙན་པའི་གྲགས་པ་ཀུན་ཏུ་འབྱུང་བ་དང་། བཟང་སྦྱིན་གྱིས་འཁྲིག་པ་སྤྱད་པ་དང་ནོར་ཅན་གྱིས་ཤིང་བརྐུས་པ་ལ་སོགས་པ་བྱུང་བ་དང་ལྡན་པའི་དུས་སུ་ཕྱིན་ཆད་འདི་ལྟ་བུ་མི་བྱའོ་ཞེས་བསླབ་པ་བཅས་པ་གསུངས་པའི་དུས་ཕྱིན་ཆད་ནས་འཁྲིགས་སྤྱད་དང་མ་བྱིན་ལེན་སོགས་མི་བྱེད་པའི་བསླབ་པ་དང་བཅས་པ་དང་། ཀོ་ས་ལའི་རྒྱལ་པོ་རིང་ལེན་དང་ཀཱ་ཤིའི་རྒྱལ་པོ་ཚངས་བྱིན་གྱི་སྔོན་བྱུང་གསུངས་ནས། རྒྱལ་པོ་དེ་དག་ཀྱང་བཟོད་པ་དང་བཟོད་པའི་བསྔགས་པ་སྨྲ་ན། དགེ་སློང་རྣམས་ཀྱིས་སྨྲ་བ་ལྟ་སྨོས་ཀྱང་ཅི་དགོས་ཞེས་སོགས་གསུངས་བའི་བཟོད་པའི་མཉམ་ལེན་སོགས་ཕར་ཕྱིན་བཅུའི་མཉམ་ལེན་དང་ལྡན་པ་དང་། ཕ་རོལ་ཏུ་ཕྱིན་པ་བཅུ་ཉམས་སུ་བླངས་པས་གནས་སྐབས་ཀྱི་འབྲས་བུ་ས་བཅུ་དང་མཐར་ཐུག་གི་འབྲས་བུ་སྟོབས་བཅུ་དང་ལྡན་པའི་སངས་རྒྱས་ཉིད་ཀྱི་གོ་འཕང་རིན་པོ་ཆེ་མཆོག་འགྲུབ་པ་དང་།སྟོབས་བཅུ་དང་ལྡན་པའི་གོ་འཕང་རིན་པོ་ཆེ་འདི་ཉིད་ལ་བརྟེན་ནས་སྙིང་རྗེས་སེམས་ཅན་ཐམས་ཅད་ལ་དམིགས་པ་རྒྱ་ཆེ་བའི་སྒོ་ནས་ཟབ་པའི་ཆོས་སྟོན་ནུས་པ་སོགས་དགོས་པ་མང་དུ་འབྱུང་བའི་སྒོ་ནས་གཏན་ལ་ཕབ་པའོ། །
གསུང་རབ་ཡན་ལག་བཅུ་གཉིས་ཀྱི་ངོ་བོ་འཇོག་ཚུལ་ཡང་སློབ་དཔོན་རིན་ཆེན་འབྱུང་གནས་དང་འཕགས་པ་ཐོགས་མེད། མཆིམས་འཇམ་པའི་དབྱངས་སོགས་ཀྱི་གསུང་རབ་ཡན་ལག་བཅུ་གཉིས་ཀྱི་ངོ་བོ་གཏན་ལ་ཕབ་པའི་གཞུང་ཤིན་ཏུ་མང་མོད། ཁོ་བོས་སྐབས་འདིར་སྙིང་མཆོག་གི་ལུགས་གཞིར་བཟུང་ནས་ཡན་ལག་བཅུ་གཉིས་ཀྱི་ངོ་བོ་འཇོག་པར་འདོད། འོ་ན་ལུགས་དེའི་འཇོག་ཚུལ་གང་ཡིན་ཞེ་ན། འགྲེལ་ཆེན་སྙིང་པོའི་མཆོག་ལས། “དེ་ལ་མདོའི་སྡེ་གང་ཞེ་ན། གང་ཚིག་རྐྱང་པས་ཟབ་པའི་དོན་སྟོན་པའོ། །དབྱངས་ཀྱིས་བསྙད་པ་གང་ཞེ་ན། མདོ་སྡེ་གང་ཡིན་པ་དེ་ལ་བར་དང་ཐ་མར་ཚིགས་སུ་བཅད་པ་བརྗོད་པའོ། །གང་ཡང་དྲང་བའི་དོན་གྱི་མདོ་སྡེ་དེ་ཡང་དབྱངས་ཀྱིས་བསྙད་པ་ཡིན་ཏེ། རྟོགས་པར་བྱ་བ་ཡིན་པའི་ཕྱིར་རོ། །ལུང་བསྟན་པ་གང་ཞེ་ན། གང་དུ་ཉན་ཐོས་འདས་ཤིང་དུས་བྱེད་པར་འགྱུར་བ་སྐྱེ་བའི་ལུང་བསྟན་པའོ། །གང་ཡང་ངེས་པའི་དོན་གྱི་མདོ་སྡེ་གསལ་བར་དགོངས་པས་བསྟན་པ་ཡང་ཡིན་ནོ། །ཚིགས་སུ་བཅད་པ་གང་ཞེ་ན། ཚིགས་སུ་བཅད་པ་བཤད་པ་གང་ཡིན་པ་སྟེ། ཚིག་རྐང་གཉིས་ དང་། ཚིག་རྐང་གསུམ་དང་། ཚིག་རྐང་བཞི་དང་། ཚིག་རྐང་ལྔ་དང་། ཚིག་རྐང་དྲུག་གོ། །ཆེད་དུ་བརྗོད་པ་གང་ཞེ་ན། གང་ཡི་རང་བ་ནས་བརྗོད་པའོ། །གླེང་གཞི་གང་ཞེ་ན། གང་བསྟན་པ་བརྗོད་པའམ། བྱུང་བ་དང་བཅས་པའི་བསླབ་པ་བཅས་པ་བརྗོད་པའོ། །རྟོག་པ་བརྗོད་པ་གང་ཞེ་ན། དཔེ་དང་བཅས་པ་བརྗོད་པའོ། །དེ་ལྟ་བུ་བྱུང་བ་གང་ཞེ་ན། སྔོན་གྱི་སྦྱོར་བ་དག་དང་ལྡན་པའོ། །སྐྱེས་པའི་རབས་གང་ཞེ་ན། བྱང་ཆུབ་སེམས་དཔའི་སྤྱོད་པ་དང་ལྡན་པའོ། །ཤིན་ཏུ་རྒྱས་པ་གང་ཞེ་ན། བྱང་ཆུབ་སེམས་དཔའི་སྡེ་སྣོད་དང་ལྡན་པ་སྟེ། སེམས་ཅན་ཐམས་ཅད་ལ་ཕན་པ་དང་། བདེ་བའི་གནས་ཡིན་པའི་ཕྱིར་རོ། །རྨད་དུ་བྱུང་བའི་ཆོས་གང་ཞེ་ན། གང་དུ་ཉན་ཐོས་དང་། བྱང་ཆུབ་སེམས་དཔའ་དང་། སངས་རྒྱས་རྣམས་ཀྱི་ངོ་མཚར་རྨད་དུ་བྱུང་བའི་ཆོས་བསྟན་པའོ། ། གཏན་ལ་དབབ་པ་གང་ཞེ་ན། གང་དུ་ཕྱིན་ཅི་མ་ལོག་པའི་ཆོས་ཀྱི་མཚན་ཉིད་བསྟན་པ་སྟེ། དེ་ལྟར་བསྟན་པ་དེ་དག་གི་ནང་ན་འདི་ནི་བཅོམ་ལྡན་འདས་ཀྱི་མདོ་སྡེ་རིན་པོ་ཆེ་སྟེ། སྐྱེས་བུ་དམ་པའི་དོན་སྒྲུབ་པ་དང་། ཟབ་པ་དམ་པའི་ཆོས་ཐམས་ཅད་ཀྱི་རྣམ་པ་སྟོན་པའི་ཕྱིར་རོ།།”
གསུམ་པ། གསུང་རབ་ཡན་ལག་བཅུ་གཉིས་སྡེ་སྣོད་གསུམ་དུ་བསྡུ་ཚུལ།
གསུང་རབ་ཡན་ལག་བཅུ་གཉིས་པོ་དེ་ལ་མདོ་སྡེའི་སྡེ་སྣོད་དང་། འདུལ་བའི་སྡེ་སྣོད། མངོན་པའི་སྡེ་སྣོད་གསུམ་ཀ་ཡོད་དེ། འཇམ་དཔལ་རྩ་རྒྱུད་ལས། ཐུབ་པ་མ་ལུས་འདུས་ནས་ནི། ། ”གསུང་རབ་ཡན་ལག་བཅུ་གཉིས་དང༌། །འདུལ་བ་མ་ལུས་སྡུང་པར་བྱེད། །གང་ཞིག་ཆོས་ནི་ངས་བསྟན་དང༌། །དེ་བཞིན་སྔོན་གྱི་རྒྱལ་བ་མཆོག །དེ་ནི་སློབ་མའི་མཆོག་དེས་ཀྱང༌། །རྣམ་པ་གསུམ་དུ་ཡང་དག་བསྟན། །འདུལ་བ་དང་ནི་མངོན་པ་དང༌། །མདོ་སྡེའི་དབྱེ་བས་གཞུང་དུ་བྱས། ། “ཞེས་མཉམ་མེད་ཤཱཀྱའི་རྒྱལ་པོ་ཐུབ་པ་སངས་རྒྱས་བཅོལ་ལྡན་འདས་ཀྱི་ཆོས་ཀྱི་འཁོར་ལོ་རིམ་པ་གསུམ་གསུང་རབ་ཡན་ལག་བཅུ་གཉིས་སུ་བསྡུ་ལ། དེ་ཡང་སྡེ་སྣོད་གསུམ་དུ་འདུ་བར་གསུང་ལ། བསྡུ་ཚུལ་ལ་ཡང་མཁས་པ་སོ་སོའི་བཞེད་ཚུལ་མི་འདྲ་བ་དུ་མ་ཡོད་མོད། ཁོ་བོའི་སྐབས་འདིར་སློབ་དཔོན་ཐོགས་མེད་ཀྱི་གཞུང་ལས་ཇི་ལྟར་བསྡུ་ཚུལ་རང་ལུགས་སུ་བཟུང་ནས་འཆད་པར་འདོད།
སློབ་དཔོན་ཐོགས་མེད་ཀྱི་མངོན་པ་ཀུན་བཏུས་དང་ཉན་ས་གཞི་བསྡུ་བ་སོགས་ཀྱི་སྡེ་སྣོད་གསུམ་དུ་བསྡུ་ཚུལ་ལ་ཡང་མི་འདྲ་བའི་ཁྱད་པར་ཡོད་དེ། དང་པོ་ཀུན་འདུས་དང་ཉན་ས་གཉིས་ཀྱི་གསུང་རབ་ཡན་ལག་བཅུ་གཉིས་སྡེ་སྣོད་གསུམ་དུ་བསྡུ་ཚུལ་མི་འདྲ་བ་ནི། ཀུན་བཏུས་སུ་”མདོའི་སྡེ་དང་། དབྱངས་ཀྱི་བསྙད་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པའི་སྡེ་དང་ལྔ་ནི་ཉན་མདོ་སྡེའི་སྡེ་སྣོད་དང་། ། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་འཁོར་དང་བཅས་པ་འདི་ནི་འདུལ་བའི་སྡེ་སྣོད་དུ་བྱེད་པ་དང་།ཤིན་ཏུ་རྒྱས་པའི་སྡེ་དང་། རྨད་དུ་བྱུང་བ་ཆོས་ཀྱི་སྡེ་གང་ཡིན་པ་འདི་ནི་བྱང་ཆུབ་སེམས་དཔའི་མདོ་སྡེའི་སྡེ་སྣོད་དོ། །གཏན་ལ་དབབ་པར་བསྟན་པའི་སྡེ་ནི་གཉིས་ཀའི་ཆོས་མངོན་པའི་སྡེ་སྣོད་དུ་བྱེད་པ་དང་། མདོར་ན་ཐེག་པ་ཆེ་ཆུང་གི་སྡེ་སྣོད་ཀྱི་ཁྱད་པར་དུ་མ་བྱས་ན་མདོའི་སྡེ་དང་། དབྱངས་ཀྱི་བསྙད་པ་དང་། ལུང་དུ་བསྟན་པ་དང་། ཚིགས་སུ་་བཅད་པ་དང་། ཆེད་དུ་བརྗོད་པ་དང་། ཤིན་ཏུ་རྒྱས་པ་དང་། རྨད་དུ་བྱུང་བའི་ཆོས་ཀྱི་སྡེ་རྣམས་ནི་མདོ་སྡེའི་སྡེ་སྣོད་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་འཁོར་དང་བཅས་པ་རྣམས་ནི་འདུལ་བའི་སྡེ་སྣོད་དང་། གཏན་ལ་དབབ་པར་བསྟན་པའི་སྡེ་མངོན་པའི་སྡེ་སྣོད་དུ་འཇོག་ལ། ཀུན་བཏུས་ལས་བཤད་པ་འདི་ཉན་ས་ལས་གསུང་ཚུལ་དང་མི་མཐུན་ཏེ།ཀུན་བཏུས་སུ་སྐྱེ་རབས་འཁོར་དང་བཅས་པ་འདུལ་བའི་སྡེ་སྣོད་དུ་འཇོག་པ་དང་། ཉན་ས་ལས་གླེང་གཞི་གཅིག་པོ་ལས་གཞན་རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་རྣམས་མདོ་སྡེའི་སྡེ་སྣོད་དུ་འཇོག་པ་ལས་འདུལ་བའི་སྡེ་སྣོད་དུ་མི་འཇོག་པའི་གསུང་མཁན་མཁས་པ་གཅིག་ཡིན་ནའང་ནའང་གསུང་ཚུལ་ལ་མི་འདྲ་བའི་ཁྱད་པར་ཡོད།
ཀུན་བཏུས་དང་གཞི་བསྡུ་བར་སྡེ་སྣོད་གསུམ་ཏུ་བསྡུ་ཚུལ་ཚིག་རིས་མི་མཐུན་པ་ཡོད་ཡང་དོན་ལ་འགལ་བ་མེད་དེ། ཀུན་བཏུས་ལས་མདོའི་སྡེ་དང་། དབྱངས་ཀྱི་བསྙད་པ་དང་། ལུང་དུ་བསྟན་པ་དང་། ཚིགས་སུ་བཅད་པ་དང་། ཆེད་དུ་བརྗོད་པའི་སྡེ་རྣམས་མདོ་སྡེའི་སྡེ་སྣོད་དུ་འཇོག་པ་དང་། གླེང་གཞིའི་སྡེ་འདུལ་བའི་སྡེ་སྣོད་འཇོག་པ་དང་། གཏན་ལ་དབབ་པའི་སྡེ་མངོན་པའི་སྡེ་སྣོད་དུ་འཇོག་པ་རྣམས་ནི་ཉན་ས་དང་འཇོག་ཚུལ་མཚུངས། གཞི་བསྡུ་བ་ལས་གསུང་རབ་ཡན་ལག་བཅུ་གཉིས་སྡེ་སྣོད་གསུམ་ཏུ་བསྡུ་ཚུལ་དང་། ཀུན་བཏུས་ལས་བསྡུ་ཚུལ་མཚུངས་ལ། འོ་ན་“གསེར་ཕྲེང་ལས་འདི་དང་བཤད་གཞི་དང་བཤད་ཚུལ་མི་མཐུན་ནོ་ཞེ་ན། སྐྱོན་མེད་དེ། དེ་གཉིས་འགལ་བར་མི་བསམ་སྟེ། ཀུན་བཏུས་ལས་བཤད་གཞི་སྡེ་སྣོད་གསུམ་ཀ་དང་། བཤད་ཚུལ་བརྗོད་བྱའི་སྒོ་ནས་བཞག་པ་ཡིན་ལ། གཞི་བསྡུ་བར་བཤད་གཞི་མདོ་སྡེའི་སྡེ་སྣོད་གཅིག་པུ་བཞག་ནས། བཤད་ཚུལ་ཐེག་པ་མཆོག་དམན་གྱི་སྒོ་ནས་བཞག་པ་ཡིན་པའི་སྐྱོན་མེད་དོ། །
མཇུག་བསྡུ་བ།
འདིར་ཁོ་བོས་གསུང་རབ་ཡན་ལག་བཅུ་གཉིས་ཀྱི་ངོ་བོ་དང་ཁྱད་ཆོས་སོགས་ལ་རྒྱ་བོད་མཁས་པའི་གཞུང་གོང་འོག་བསྡུར་ནས་རང་ནུས་ཅི་ལྕོག་གིས་དཔྱད་པའི་ཁུལ་ཙམ་བྱས་ཡང་འདིར་དཔྱད་གཞིའི་རྒྱུ་ཆ་མ་རྙེད་པ་དང་། ཚད་ལྡན་གྱི་ཁུངས་ལུང་གི་མ་འདང་བ་སོགས་སྟོང་ཆ་ཤིན་ཏུ་མང་ལ། སྤྱིར་རང་ཉིད་ལ་སྐྱེས་སྟོབས་ཀྱི་ཤེས་རབ་ཆུང་བ་སྦྱང་སྟོབས་ཀྱི་ཡོནཏན་དམན་པ།སྒོས་སུ་དེང་རབས་ལུགས་ཀྱི་དཔྱད་རྩོམ་འབྲི་བའི་ཉམས་མྱོང་དང་ཆུ་ཚད་དབེན་པ་སོགས། རྒྱུ་རྐྱེན་དུ་མས་འདིར་བརྗོད་བྱ་ཆེན་པོ་འདི་ལྟ་བུའི་སྟེང་དཔྱད་རྩོམ་འབྲི་བ་ནི་ཤིན་ཏུ་མི་འོས་པའི་ལས་སུ་གྲུབ་མོད། ཡིན་ནའང་འདིར་རང་གི་ཤེས་ནུས་དང་འཚམས་པའི་དཔྱད་བསྡུར་ཕྲན་བུ་ཞིག་བྱས་པ་ལགས་ལ།ལྟ་རྒྱ་ཐོས་རྒྱ་ཆུང་བ་སོགས་མི་ཤེས་ཤིང་མ་རིག་པས་དབང་གིས། འབྲི་ནོར་བཤད་ནོར་བྱས་ཡོད་པ་དང་།གནས་ལུགས་ལ་དཔྱོད་པའི་རིགས་པ་དང་འགལ་བ་ཚད་མར་གྱུར་བའི་ལུང་དང་འགལ་བ་སོགས།མ་རྟོགས་པ་དང་ལོག་པར་རྟོག་པའི་དབང་གིས་རྒྱ་བོད་པཎ་གྲུབ་རྣམས་ཀྱི་དགོངས་པ་ཕྱིན་ཅི་ལོག་ཏུ་བཤད་པ་སོགས་ཤིན་ཏུ་མང་བས་དཔྱོད་ལྡན་མཁས་པའི་དབང་པོ་དག་ལ་སོར་བཅུའི་ཐལ་མོ་སྙིང་ཀར་སྦྱར་ཏེ་འཆགས་སོ།།།།
དཔྱད་གཞིའི་ཡིག་ཆ།
- ཐུབ་པ་སངས་རྒྱས་བཅོམ་ལྡན་འདས། འཇམ་དཔལ་རྩ་བརྒྱུད། ལྷ་སའི་བཀའ་འགྱུར། རྒྱུད་འབུམ། ༼ན༽ཤོག 273
- ཐུབ་པ་སངས་རྒྱས་བཅོམ་ལྡན་འདས། གསེར་འོད་དམ་པའི་མདོ། ལྷ་སའི་བཀའ་འགྱུར། རྒྱུད་འབུམ། ༼པ༽ ཤོག 233
- སློབ་དཔོན་སེང་གེ་བཟང་པོ། འགྲེལ་ཆེན་རྒྱན་སྣང་། སྡེ་བསྟན། ཤེར་ཕྱིན། ༼ཆ༽ ཤོག 23
- ནིའུ་ཛི་ལེན་ཌི་བྱམས་པ་ཤེར་རབ། ལེགས་བཤད་གསེར་ཕྲེང་གི་འཆན་འགྲེལ་འོད་ཀྱི་ཕུང་པོ། ཤོག 182
- སེར་ཤུལ་ལྷ་རམས་བཀྲ་ཤིས་བསོད་ནམས། ལེགས་བཤད་གསེར་གྱི་ཕྲེང་བའི་བརྗེད་བྱང་ཚིག་དོན་རབ་གསལ། ཤོག 221
- རྗེ་བཙུན་ཡོན་ཏན་ངག་དབང་བཟང་པོ། དཀར་ཆག་ཚིག་ཕྲེང་དོན་ཟབ་ཡིད་བཞིན་ནོར་བུའི་རྒྱན་ཕྲེང་། མི་རིགས་དཔེ་བསྐྲུན། ༼ཅ༽ ཤོག59
- ཀུན་མཁྱེན་ཉི་མའི་གཉེན། གཏམ་ངོ་མཚར་ཆུ་གཏེར་འཕེལ་བའི་ཟླ་བ་གསར་བ། སྡེ་བསྟན། ༼ཤྲཱིཿ༽ ཤོག104
8.རྗེ་ཙོང་ཁ་པ། ལེགས་བཤད་གསེར་ཕྲེང་། ཀིརྟིའི་དཔར་མ། ཤོག 60
- བུ་སྟོན་རིན་པོ་ཆེ། བུ་སྟོན་ཆོས་འབྱུང་། འཕྲུལ་དེབ། ཤོག 86
- སློབ་དཔོན་རིན་ཆེན་འབྱུང་གནས། བརྒྱད་སྟོང་འགྲེལ་ཆེན་སྙིང་པོའི་མཆོག། སྡེ་བསྟན། ༼ཐ༽ ཤོག2
- སློབ་དཔོན་རིན་ཆེན་འབྱུང་གནས། བརྒྱད་སྟོང་འགྲེལ་ཆེན་སྙིང་པོའི་མཆོག། སྡེ་བསྟན། ༼ཐ༽ ཤོག3 འཇོག་ཚུལ་གཞན་བཞི་ཡོད་པ་འདི་དག་ལས་གསལ།
- མཆིམས་འཇམ་པའི་དབྱངས། མཆིམས་མཛོད། ནང་བསྟན་རུས་མེད་དཔར་བསྐྲུན། ཤོག 379
- སློབ་དཔོན་ཐོགས་མེད། མངོན་པ་ཀུན་འདུས། སྡེ་བསྟན། སེམས་ཙམ། ༼ རི ༽ ཤོག 101
- སློབ་དཔོན་ཐོགས་མེད། ཉན་ས། སྡེ་བསྟན། སེམས་ཙམ། ༼ ཛི ༽ ཤོག 56
- ས་བཟང་མ་ཏི་པན་ཆེན། དམ་པའི་ཆོས་མངོན་པ་ཀུན་ལས་བཏུས་པའི་འགྲེལ་བ་ཤེས་བྱ་རབ་གསལ་སྣང་བའི་དཀར་ཆག ༼ཀ ༽ ཤོག 659
- རྗེ་ཙོང་ཁ་པ། ལེགས་བཤད་གསེར་ཕྲེང་། ཀིརྟི་དཔར་མ། ཤོག 61
– – – – –
