བོད་དུ་ལེགས་སྦྱར་གྱི་སྒྲ་མདོ་ཐོག་མར་འགྱུར་ཚུལ་ལ་དཔྱད་པ།

བོད་དུ་ལེགས་སྦྱར་གྱི་སྒྲ་མདོ་ཐོག་མར་འགྱུར་ཚུལ་ལ་དཔྱད་པ།
ཐར་ལོ་ཡན་ལ་སྒྲ་འགྱུར་བ་མེད་ཅེས་པར་བརྟག་པ།

གནད་བསྡུས། རྩོམ་ཡིག་འདིར་ཐར་ལོ་ཡན་དུ་སྒྲ་མདོ་འགྱུར་བ་མེད་ཅེས་གྲགས་པའི་གླེང་གཞི་ལ་དབྱེ་ཞིབ་དང་འབྲེལ། ས་སྐྱ་པའི་སྐབས་ཀྱི་ལོ་ཙཱ་བ་ཤོང་སྟོན་དང་ཐར་ལོ་ཡར་ལོ་གསུམ་གྱིས་ཀ་ཙན་གྱི་གཞུང་བསྒྱུར་ཚུལ། འགྱུར་བྱང་དང་དུས་ཚིགས། དུས་རབས་བཅུ་གཅིག་པའི་ནང་དུ་སྒྲའི་གཞུང་ཐོར་བུ་འགྱུར་ཚུལ། བོད་བཙན་པོའི་སྐབས་ནས་སྨྲ་སྒོ་མཚོན་ཆའི་བར་དུ་ལེགས་སྦྱར་སྒྲ་རིག་པའི་གཞུང་དང་ཆ་ལག་སྐོར་གང་བྱུང་བཅས་ལ་རྣམ་ཐར་དང་ཆོས་འབྱུང་། དཀར་ཆག་འགྱུར་བྱང་སོགས་ཁུངས་གང་རྙེད་ཀྱིས་དཔྱད་པ་དང་དོགས་སློང་བྱས་ཡོད། 

གནད་ཚིག །ལེགས་སྦྱར་སྒྲ་རིག་པ། སྒྲ་གཞུང་། སྒྲ་མདོ། ཐར་ལོ། ཤོང་སྟོན། གྲགས་རྒྱན། འགྱུར། འགྱུར་བྱང་། དཀར་ཆག།།

གླེང་གཞི།

དེ་ཡང་སྟག་ཚང་ལོ་ཙཱ་བ་ཤེས་རབ་རིན་ཆེན་(༡༤༠༥-༡༤༧༧)གྱི་རིག་གནས་ཀུན་ཤེས་ལས། ཐ་སྙད་རིག་པའི་གནས་ལྔར་གྲགས་པ་རྣམས། །ཆོས་རྗེ་ས་པཎ་ཡན་ལ་མ་དར་ཞིང། །ཐར་ལོ་ཡན་ལ་སྒྲ་མདོ་འགྱུར་བ་མེད། །[1]ཅེས་གསུངས་པ་འདི་ཉིད་བོད་དུ་ཐ་སྙད་རིག་གནས་དར་ཚུལ་འཆད་སྐབས་ཡོངས་ཁྱབ་ཏུ་འདྲེན་རྒྱུའི་ལུང་ལྟ་བུ་ཞིག་ཏུ་ཆགས་ཡོད་མོད། འདིའི་ནང་དོན་ལ་ཐད་ཀར་བརྟག་ན་ཀུན་ཤེས་ཀྱི་རྩ་བ་དང་རང་འགྲེལ་གཉིས་ཀྱི་དངོས་བསྟན་ཅུང་མི་མཐུན་པ་ལྟར་སྣང་སྟེ། རྩ་བའི་ཚིག་ཟིན་ལྟར་ན་ཐར་ལོའི་རིང་དུ་སྒྲ་མདོ་དངོས་སམ་ཡང་ན་ཡི་གེའི་མདོ་དང་ཉེར་སྒྱུར་སོགས་བསྒྱུར་ཡོད་པས་སྐབས་དེར་སྒྲ་མདོ་འགྱུར་བར་བརྩིས་པ་ལྟར་ལ། དེའི་ཐད་ཀྱི་རང་འགྲེལ་དུ། སྤྱིར་ཆོས་རྗེ་ས་པཎ་ཡན་ལ་ཐ་སྙད་ཀྱི་རིག་གནས་མ་དར་ཞིང་དེ་ནས་ཐར་ལོ་ཉི་མ་རྒྱལ་མཚན་ཡན་ལ་དར་ཡང་བོད་སྐད་དུ་མ་བསྒྱུར་མོད་ཀྱི། སྒྲ་རིག་དངོས་ནི་དཔང་ལོ་ཡབ་སྲས་ཀྱིས་བསྒྱུར་ཅིང་བཤད་ནས་དར་ཞིང་རྒྱས་པར་མཛད་པས་རིག་གནས་འདི་ལ་བཀའ་དྲིན་ཆེའོ། །[2]ཞེས་བྱུང་བས་འདི་ལྟར་ན་ཐ་སྙད་རིག་གནས་ཀྱི་གཞུང་དེའི་ཡན་དུ་མ་འགྱུར་ཞིང་སྒྲ་རིག་དངོས་དཔང་ལོ་ཡབ་སྲས་ཀྱིས་བསྒྱུར་ཞེས་བསྟན། དེས་ན་ཐར་ལོས་སྒྲའི་ཆ་ལག་གི་གཞུང་བསྒྱུར་བ་ལ་དགོངས་ནས་སྒྲ་རིག་ཙམ་དེ་ནས་འགྱུར་བར་བཤད་པ་འདྲ་སྟེ། སྒྲ་རིག་དངོས་དཔང་ལོའི་བར་དུ་མ་འགྱུར་བ་དེའི་ཕྱིར། འོན་ཀྱང་ཐར་ལོ་དང་ཤོང་སྟོན་གཉིས་ཀས་སྒྲ་རིག་གི་གཞུང་དངོས་བསྒྱུར་ཡོད་པ་ཁོང་གིས་མ་མཁྱེན་པ་ནི་ཡིན་ཨེ་སྲིད་སྙམ་པས། ཡང་ན་བསྒྱུར་ཅིང་བཤད་ནས་དར་ཞིང་རྒྱས་པ་དཔང་ལོའི་སྔོན་དུ་མ་བྱུང་ཞེས་དགོངས་པ་ལེན་དགོས་སམ་བརྟག་གོ། །སྤྱིར་ཁོང་གིས་ཤོང་སྟོན་དང་ཐར་ལོ་གཉིས་ཐར་ལོ་སྔ་བར་མཛད་འདུག་སྟེ། ཤོང་སྟོན་སྔ་ན་སྙན་ངག་དང་ཟློས་གར་སྒྲ་གཞུང་བཅས་བསྒྱུར་བས་ཐ་སྙད་རིག་གནས་སྤྱི་དང་བྱེ་བྲག་སྒྲ་གཞུང་གང་གི་སྐབས་སུ་ཡང་ཐར་ལོ་ཡན་དུ་ཞེས་བརྗོད་དོན་མེད་པས་སོ། །མང་ཐོས་ཀྱི་སློབ་མ་འདར་སྟོད་དགྲ་འདུལ་དབང་པོས་མཛད་པའི་ཐ་སྙད་རིག་གནས་ལྔའི་བྱུང་ཚུལ་བློ་གསལ་མགྲིན་རྒྱན་དུ། རིག་གནས་ཀུན་ཤེས་ཀྱི་སྒྲ་རིག་སྐོར་གྱི་ལུང་ཚིག་དག་དྲངས་ནས། དང་པོར་བཀའ་དྲིན་ཆེ་བ་བདག་ཉིད་ཆེན་པོ་ས་པཎ་བྱོན་ཚུལ། བར་དུ་བཀའ་དྲིན་ཆེ་བ་ཤོང་དཔང་ཡབ་སྲས་བྱོན་ཚུལ། མཐར་བཀའ་དྲིན་ཆེ་བ་ཞ་ལུ་ལོ་ཙཱ་བ་བྱོན་ཚུལ་སོགས་[3]ཀྱིས་བསྟན་ཡོད་ཀྱང་ཐར་ལོའི་སྐོར་ལ་འགྲེལ་བཤད་གང་ཡང་བྱས་མེད། སྡེ་སྲིད་ཀྱི་བཻ་དཀར་གཡའ་སེལ་དུ། ཐར་ལོ་ཉི་མ་རྒྱལ་མཚན་ཡན་ལ་དར་ཡང་བོད་སྐད་དུ་གཞུང་ཡོངས་རྫོགས་མ་འགྱུར་ཞེས་དང་ཙནྡྲ་པ་ཕྱོགས་ཙམ་བསྒྱུར་བར་བཤད་པ་[4]སོགས་ཀྱང་གཞུང་དངོས་དང་འགྱུར་བྱང་ཞིབ་ཏུ་མ་གཟིགས་པ་ཡིན་པ་འོག་ནས་གསལ། ཕྱིས་ཀྱི་ཡིག་ཆ་ཕལ་མོ་ཆེ་ཞིག་ཏུ་འདི་དག་གི་རྗེས་བརྗོད་བྱས་པ་ཙམ་ལས་ཞིབ་ཏུ་འགྲེལ་བཤད་བྱས་ཡོད་པ་མ་མཐོང་ངོ་། །

དེ་བས་སྒྲ་མདོ་ཆེན་པོ་རྣམས་ལས་བོད་ལ་སྔ་བར་འགྱུར་བ་ནི་ཀ་ཙན་གཉིས་ཡིན་པས། དེ་གཉིས་ཇི་ལྟར་བསྒྱུར་ཚུལ་ཐད་འདིར་རགས་པ་ཙམ་དུ་དུས་མཚུངས་པའི་ལོ་ཙཱ་བ་ཤོང་སྟོན་དང་ཐར་ལོ། ཡར་ལུང་གྲགས་རྒྱན་པ་[5]གསུམ་གྱིས་སྒྲ་གཞུང་གང་བསྒྱུར་སྐོར་ལ་དཔྱད་ཞིབ་བྱ་རྒྱུ་ཡིན།

གཅིག །ས་སྐྱ་པའི་སྐབས་སུ་སྒྲ་མདོ་ཐོག་མར་འགྱུར་བའི་སྐོར།
༡ ཙནྡྲ་བྱཱ་ཀ་ར་ཎའི་[6]འགྱུར་གྱི་སྐོར།

ཀུན་སྤངས་ཆོས་གྲགས་དཔལ་(༡༢༨༣-༡༣༦༣)གྱི་བླ་མའི་བརྒྱུད་རིམ་གསལ་བ་ལས། ཙནྡྲ་པའི་མདོ་ལ་སོགས་པ་སྔོན་གངས་ཅན་དུ་མ་འགྱུར་བ་གསར་དུ་བསྒྱུར་ཞིང་[7]ཞེས་དང་། ཤེས་བྱ་ཀུན་ཁྱབ་ལས། ལེགས་བསྡུས་ཉུང་གསལ་ཀུན་རྫོགས་ཙནྡྲའི་མདོ། །འགྲེལ་དང་ཡན་ལག་རང་གཞན་གཞུང་མང་ལས། །རྩ་བ་ཐོག་མར་ཤོང་ལོས་བསྒྱུར་ཏེ་འཆད[8]། །ཅེས་ཙནྡྲ་པའི་མདོ་ཤོང་སྟོན་རྡོ་རྗེ་རྒྱལ་མཚན་གྱིས་བསྒྱུར་བར་བསྟན་པ་ལྟར། དཔང་ལོ་ཡབ་སྲས་ནས་ཕྱིས་སི་ཏུ་པཎ་ཆེན་གྱི་བར་དུ་གཙོ་བོ་ཤོང་འགྱུར་གཞིར་མཛད་ནས་སྤེལ་བར་སྣང་ངོ་། །འོན་ཀྱང་བུ་སྟོན་ཆེན་པོའི་(༡༢༩༠–༡༣༦༤)ཆོས་འབྱུང་དང་། དབུས་པ་བློ་གསལ་གྱི་བསྟན་འགྱུར་དཀར་ཆག་གཉིས་མཚུངས་པར། སློབ་དཔོན་ཙནྡྲ་གོ་མིས་མཛད་པ་ལུང་དུ་སྟོན་པ་ཙནྡྲ་པའི་མདོ། ཉེར་བསྒྱུར་ཉི་ཤུ་པ་རྩ་འགྲེལ། ཡི་གེའི་མདོ། དེའི་འགྲེལ་པ་སློབ་དཔོན་ཆོས་སྐྱོང་གིས་མཛད་པ་རྣམས་ཉི་མ་རྒྱལ་མཚན་གྱི་འགྱུར།[9] ཞེས་དང་བུ་སྟོན་གྱི་བསྟན་བཅོས་འགྱུར་རོ་འཚལ་གྱི་དཀར་ཆག་ཏུ་ཡང་དེ་དང་མཐུན་པར་ཙནྡྲ་པ་ཐར་ལོ་ཉི་མ་རྒྱལ་མཚན་གྱི་འགྱུར་དུ་བཞག་[10]ཡོད་ལ། བུ་སྟོན་དང་དབུས་པ་བློ་གསལ་གཉིས་ནི་ཐར་ལོའི་སློབ་མ་ཡང་ཡིན།[11]

ཐར་ལོའི་འགྱུར་ཙནྡྲ་པ་ནི་ད་ལྟ་སྣར་ཐང་བསྟན་འགྱུར་དུ་བཞུགས་ཡོད་ཅིང་ཤོང་དཔང་གི་འགྱུར་དང་འགྱུར་བྱང་བསྡུར་ཏེ་བཀོད་ན་འདི་ལྟར། སྣར་ཐང་གི་འགྱུར་བྱང་། བརྡ་སྤྲོད་པ་ཙནྟྲ་པའི་མདོ་ཞེས་བྱ་བ། སློབ་དཔོན་ཆེན་པོ་ཙནྟྲ་གོ་མི་ཞབས་ཀྱི་ཞལ་སྔ་ནས་མཛད་པ་རྫོགས་སོ།། །།བལ་པོའི་པཎྜི་ཏ་ཆེན་པོ་སྒྲ་པ་རྣམས་ཀྱི་གཙུག་གི་ནོར་ལྟ་བུ་བྲམ་ཟེ་ཆེན་པོ་ཛེ་ཏ་ཀརྞྞའི་ཞལ་སྔ་ནས་ལེགས་པར་མཉན་ཏེ། ལོ་ཙཱ་བ་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས། དཔལ་ཐར་པ་གླིང་གི་གཙུག་ལག་ཁང་དུ་ལེགས་པར་བསྒྱུར་བའོ།། །།ས་སྟེངས་སུ་ཉི་ཟླ་ལྟར་གྱུར་ཅིག། །།[12]སྡེ་དགེར། ལུང་དུ་སྟོན་པ་ཙནྡྲ་པའི་མདོ། མཁས་པ་རྣམས་ཀྱི་གཙུག་གི་ནོར་བུ་སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ། །སྐད་གཉིས་སྨྲ་བའི་དབང་པོ་ཤོང་སྟོན་རྡོ་རྗེ་རྒྱལ་མཚན་གྱིས་ལེགས་པར་བསྒྱུར་བ་ལས། སླར་ཡང་དཔལ་ལྡན་བློ་གྲོས་བརྟན་པས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།[13]

འདི་གཉིས་ཀྱི་འགྱུར་ཁྱད་མཚོན་པའི་ཕྱིར་གཞུང་ཀླད་ཀྱི་དོན་ཙམ་དྲང་ན། ཐར་འགྱུར། རྒྱ་གར་སྐད་དུ། ཙནྡྲ་བྱཱ་ཀ་ར་ཎ་སཱུ་ཏྲ་ནཱ་མ། བོད་སྐད་དུ་ལུང་དུ་སྟོན་པ་ཙནྡྲ་པའི་མདོ་ཞེས་བྱ་བ། ངག་གི་དབང་ཕྱུག་ལ་ཕྱག་འཚལ་ལོ། །རྟོགས་དང་ཀུན་ཕྱིར་འགྲོ་བའི་བླ། །ཐམས་ཅད་མཁྱེན་ལ་ཕྱག་འཚལ་ཏེ། །ཉུང་ཞིང་རྣམ་གསལ་ཡང་དག་རྫོགས། །སྒྲ་ཡི་མཚན་ཉིད་བརྗོད་བྱ་སྟེ། །[14]ཞེས་པ་ལ་ཤོང་འགྱུར་དུ། རྒྱ་གར་སྐད་དུ། ཙནྡྲ་བྱཱ་ཀ་ར་ཎ་སཱུ་ཏྲ། བོད་སྐད་དུ། ལུང་སྟོན་པ་ཙནྡྲ་པའི་མདོ། གཉིས་སུ་མེད་པར་གསུང་བ་སངས་རྒྱས་ལ་ཕྱག་འཚལ་ལོ། །གྲུབ་པ་ཀུན་མཁྱེན་ཀུན་ལ་སྨན། །འགྲོ་བའི་བླ་མར་ཕྱག་འཚལ་ནས། །ཉུང་ངུ་རྣམ་གསལ་ཡང་དག་རྫོགས། །སྒྲ་ཡི་མཚན་ཉིད་བརྗོད་པར་བྱ། །[15]ཞེས་འབྱུང་བ་ལྟར་རོ། །དེ་ལྟར་ཐར་ལོ་ཆེན་པོས་ཙནྡྲའི་གཞུང་རྫོགས་པར་བསྒྱུར་བ་དང་འཆད་སྤེལ་ཡང་མཛད་ཡོད་མོད།(སྐབས་གསུམ་པའི་རྐང་པ་བཞི་པའི་མཇུག་མ་ཚང་བས་ཆད་སྐྱོན་ཅུང་བྱུང་བར་སྣང་།) བར་སྐབས་སུ་འགྱུར་འདིའི་ཕྲིན་ལས་ཅུང་བག་ལ་ཞ་བར་མངོན་ནོ། །

(གཞན་ཡང་ཕྱིས་རིག་འཛིན་ཚེ་དབང་ནོར་བུས་བསྐུལ་བ་ལྟར་༡༧༥༤ལོར་སི་ཏུ་པཎ་ཆེན་ནམ་ཀརྨ་སི་ཏུ་བསྟན་པའི་ཉིན་བྱེད་ཀྱིས་ཙནྡྲ་པའི་འགྲེལ་ཆེན་རྩོམ་པའི་ཚེ་སྒྲ་རིག་གི་རྒྱ་འགྲེལ་མང་པོ་དང་སྦྱར་ནས་འགྱུར་བཅོས་ཀྱིས་ཞུ་ཆེན་བགྱིས་པ་དང་། སླར་ཀུན་གཟིགས་པཎ་ཆེན་བཅུ་པ་མཆོག་གི་བཀའ་ལྟར་མཁན་པོ་ཁྲོ་རུ་ཚེ་རྣམ་གྱིས་རབ་བྱུང་བཅུ་བདུན་པའི་ལྕགས་རྟ་༡༩༩༠ལོར་བརྡ་སྤྲོད་ཙནྡྲ་པའི་འགྲེལ་ཆེན་གྱི་འཆད་ཁྲིད་དང་འགྲེལ་བ་གསར་རྩོམ་སྐབས། མཚམས་སྦྱོར་ལྔའི་མདོ་ལོགས་སུ་ཕྱུངས་ཤིང་ས་བཅད་བསྒྲིགས་ཏེ་ཞུས་དག་གིས་གཏན་ལ་ཕབ་ཡོད་པ་བཅས་སོ། །)

༢ ཀ་ལཱ་པའི་འགྱུར་དང་གཞན་དག །

སྒྲ་མདོ་ཀ་ལཱ་པའམ་ཆ་བསགས་ཀྱི་མདོ་[16]ནི། ཤེས་བྱ་ཀུན་ཁྱབ་ཏུ། ཀ་ལཱ་པ་བསྟན་ཤོང་དཔང་དྲིན་ལས་བྱུང༌། །ཞེས་དང་། འགྲེལ་བར་གཞུང་ཐོག་མར་ཤོང་ལོས་བསྒྱུར་[17]ཞེས་གསུངས། བཻ་དཀར་གཡའ་སེལ་དུ་ཡང་། ཁྱད་པར་ཀ་ཙན་གྱི་གཞུང་བོད་སྐད་དུ་བསྒྱུར་འཆད་ཉན་གྱིས་གཏན་ལ་ཕབ་སྟེ་ཀུན་གྱིས་སློབ་ཏུ་རུང་བར་མཛད།[18] ཅེས་ཤོང་སྟོན་གྱིས་བསྒྱུར་བར་བཤད། དེ་ལྟར་ན་སྒྲ་མདོ་ཀ་ཙན་གཉིས་ཀ་ཤོང་སྟོན་གྱི་སྐབས་སུ་འགྱུར་ཡོད་པ་ཡིན། འོན་ཀྱང་ད་ལྟ་ཡོངས་གྲགས་ཀྱི་ཀ་ལཱ་པའི་འགྱུར་བྱང་དུ་དཔང་ལོ་ཆེན་པོས་དུརྒ་སིངྷའི་འགྲེལ་པར་བརྟེན་ནས་བསྒྱུར་ཚུལ་ལས་ཤོང་འགྱུར་ལ་འགྱུར་བཅོས་གནང་བའི་གསལ་ཁ་གང་ཡང་མེད།[19] བུ་སྟོན་ཆོས་འབྱུང་ལས། པཎྜི་ཏ་སརྦ་ཝརྨས་མཛད་པའི་སྒྲའི་བསྟན་བཅོས་ཀ་ལཱ་པའི་མདོ། །དེའི་འགྲེལ་པ་སློབ་དཔོན་བགྲོད་དཀའ་སེང་གེས་མཛད་པའི་སྟོད་གཉིས་གྲགས་པ་རྒྱལ་མཚན་གྱི་འགྱུར་[20]ཞེས་དང་། དབུས་པ་བློ་གསལ་ཡང་དེ་དང་མཚུངས་པར། ཀ་ལཱ་པ་དང་། དེའི་འགྲེལ་པ་པཎྜི་ཏ་བགྲོད་པར་དཀའ་བའི་སེང་གེས་མཛད་པ་ཇི་སྙེད་པ་གྲགས་པ་རྒྱལ་མཚན་གྱི་འགྱུར་[21]ཞེས་བཀོད། དེས་ན་ལོ་ཙཱ་བ་འདིས་སྡེབ་སྦྱོར་དང་འཆི་མེད་མཛོད་སོགས་སྒྲའི་ཆ་ལག་གི་གཞུང་དང་ཆ་བསགས་ཀྱི་མདོའི་འགྲེལ་བ་དུརྒ་སིངྷས་མཛད་པ་ཡང་བསྒྱུར་ཚུལ་ལས་དཔག་ན་ཀ་ལཱ་པའི་གཞུང་བསྒྱུར་བ་ཡང་ཤིན་ཏུ་འཐད་མོད། རྗེས་ནས་འགྱུར་འདི་ཉིད་ཀྱི་དཔེ་རྒྱུན་བཞུགས་ཡོད་མེད་མ་འཚལ། ཤོང་སྟོན་གྱི་གཅུང་ཤོང་བློ་གྲོས་བརྟན་པས་ཀྱང་སྒྲ་རིག་གི་གཞུང་བསྒྱུར་ཡོད་ཀྱང་གཅེན་ལས་འགྱུར་དུས་ཅུང་འཕྱི་བ་དང་སྒྲ་མདོའི་རྩ་བ་བསྒྱུར་མཁན་མིན་པས་འདིར་མ་བརྗོད་ཅིང་།[22] བཅོམ་ལྡན་རལ་གྲིའི་བསྟན་པ་རྒྱས་པ་རྒྱན་གྱི་ཉི་འོད་དུ། པཎྜི་ཏ་ད་ན་ཤཱི་ལས་སྒྲ་ཀ་ལཱ་པའི་ལེའུ་ལྔ་བསྒྱུར་ཚུལ་ཡང་བྱུང་།[23]

གོང་གི་ལོ་ཙཱ་བ་གསུམ་པོས་སྒྲ་རིག་གི་ཡན་ལག་སྐོར་གཞན་དག་བསྒྱུར་བ་ནི། ཤོང་སྟོན་གྱིས་སྙན་ངག་མེ་ལོང་དང་སྐྱེས་རབས་དཔག་བསམ་འཁྲི་ཤིང་། ཀླུ་ཀུན་ཏུ་དགའ་བའི་ཟློས་གར། སྡེབ་སྦྱོར་གྱི་ཕྲེང་བའི་བསྟོད་པ་སོགས་[24]དང་། ཐར་ལོས་ཙནྡྲ་གོ་མཱིས་མཛད་པའི་ཡི་གེའི་མདོ་དང་ཉེ་བར་སྒྱུར་བ་ཉི་ཤུ་པའི་འགྲེལ་པ། ཡི་གེའི་མདོའི་འགྲེལ་པ་སློབ་དཔོན་ཆོས་སྐྱོང་གིས་བྱས་པ་རྣམས་བསྒྱུར། གྲགས་རྒྱན་གྱིས། འཆི་མེད་མཛོད་རྩ་འགྲེལ། སྡེབ་སྦྱོར་རིན་ཆེན་འབྱུང་གནས། འཇིག་རྟེན་ཀུན་ཏུ་དགའ་བའི་ཟློས་གར་སོགས་ཏེ། དེ་དག་ནི་གཞུང་དངོས་ལ་འགྱུར་བྱང་འཁོད་ཡོད་པ་རྣམས་སོ། །

༣ ལོ་ཙཱ་བ་གསུམ་པོའི་དུས་ཚིགས་ལ་བརྟག་པ།

ས་སྐྱ་པའི་དུས་སྐབས་སུ་བྱུང་བའི་ལོ་ཙཱ་བ་འདི་གསུམ་ཀའི་རྣམ་ཐར་གྱི་རྒྱུ་ཆ་ཧ་ཅང་དཀོན་པས་འཁྲུངས་འདས་ཀྱི་ལོ་ཚིགས་སོགས་གསལ་བའི་ཡིག་ཆ་མ་རྙེད་མོད། དང་པོ་ཤོང་སྟོན་གྱི་སྐོར་རིག་པའི་ཁྱེའུ་ཞེས་པའི་དཔྱད་དེབ་ཏུ་བཀོད་པ་[25]བཞིན་སྙིང་བསྡུས་བྱས་ན། ༡༢༦༥ལོར་འགྲོ་མགོན་འཕགས་པ་བོད་དུ་ཕེབས་སྐབས་ཤོང་སྟོན་གྱིས་མཇལ་ཞིང་ཞལ་ཏ་དང་མཐུན་རྐྱེན་གནང་ནས་ལོ་དེར་བལ་པོར་ཕེབས། ༡༢༦༧ཙམ་དུ་ས་སྐྱར་དུས་འཁོར་ལ་འགྱུར་བཅོས་མཛད། དུས་འཁོར་རྒྱུད་ཀྱི་འགྱུར་བྱང་དུ། ལེགས་པར་སྦྱར་བའི་སྐད་ཀྱི་བརྡ་སྤྲོད་པའི་བསྟན་བཅོས་རིག་པའི་ལོ་ཙཱ་བ་དགེ་སློང་ཤོང་སྟོན་གྱིས་[26]ཞེས་གསུངས་པ་ལས་སྐབས་དེར་དགུང་ལོ་ཉི་ཤུ་ཡན་དུ་སོན་པ་ཤེས་ཐུབ། ཡང་འགྲོ་མགོན་གྱིས་ལྕགས་རྟ་༡༢༧༠ལོར་རྒྱ་ནག་ཅོང་ཏོ་ནས་གནང་བའི་འཕྲིན་ཡིག་[27]ལས་སྐབས་དེར་པཎྜི་ཏ་ལཀྵྨཱི་ཀ་ར་དང་ལྷན་དུ་ལོ་ཙཱའི་ཕྱག་ལས་གནང་བཞིན་པར་དཔོག །གྲུབ་ཆེན་ཨུ་རྒྱན་པའི་རྣམ་ཐར་དང་འབྲུག་པད་དཀར་གྱི་ཆོས་འབྱུང་སོགས་ལས་ཆུ་རྟ་༡༢༨༢ཙམ་ལ་གཉའ་ནམ་བདེ་ཆེན་སྟེང་དུ་ཨུ་རྒྱན་པའི་མདུན་ནས་ལྷན་ཅིག་སྐྱེས་སྦྱོར་གྱི་ཁྲིད་སོགས་གསན་པ་[28]དང་། བལ་པོར་ཕེབས་ནས་སྐུ་གཤེགས་པའི་སྐོར་གསལ།[29] འདིའི་མན་དུ་ཤོང་སྟོན་གྱི་གནས་ཚུལ་འཁོད་པའི་ལོ་རྒྱུས་གང་ཡང་མི་རྙེད་པས་དེ་ལས་མ་བཞུགས་པ་ཧ་ལམ་དཔོག་ནུས། དེའི་སྟེང་དུང་དཀར་ཚིག་མཛོད་དུ་༡༢༤༠ལ་འཁྲུངས་པར་ཚོད་རྩིས་བྱས་པ་ལྟར་ན་རེ་ཞིག་དཔྱད་གཞི་ཙམ་དུ་འཁྲུངས་འདས་༡༢༤༠-༡༢༨༢འདི་འདྲ་ཞིག་རྙེད་ཅིང་དགུང་ལོ་ཞེ་གསུམ་ཙམ་བཞུགས་པར་འགྱུར། དགུང་ལོ་བཞི་བཅུ་ཡས་མས་ལས་བཞུགས་མེད་པའི་རྒྱུ་མཚན་གཞན་ཡང་། དཔང་ལོ་ཙཱ་བས་(༡༢༧༦-༡༣༤༢)ཤོང་སྟོན་སློབ་དཔོན་དུ་བསྟེན་མ་ཐུབ་ཅིང་། ཚོགས་གསུམ་གསལ་བར། མཁས་པ་ཆེན་པོར་གྱུར་ནས་ཡུན་རིང་པོར་མ་བཞུགས་[30]ཞེས་གསུངས་པས་ཤེས། ཤོང་སྟོན་གྱི་འགྱུར་མང་པོ་དཔོན་ཆེན་ཤཱཀྱ་བཟང་པོའི་(ས་སྐྱའི་དཔོན་ཆེན་དང་པོ།?-༡༢༧༠) རིང་དུ་བྱས་པར་གསལ་བས་[31]སྒྲ་མདོའང་དེ་ཤེད་དུ་འགྱུར་བར་ཆ་འཇོག་བྱེད་འོས།

གཉིས་པ་ཡར་ལུང་ལོ་ཙཱ་བ་གྲགས་པ་རྒྱལ་མཚན་ནམ་ཤུད་ཀེ་གྲགས་པ་རྒྱལ་མཚན་[32]ཡང་འགྲོ་མགོན་འཕགས་པའི་སྐུ་རིང་ལ་ཕེབས་པ་ཞིག་ཡིན་པ་དང་། རོང་པ་ཤེས་རབ་སེང་གེ་༡༢༥༡-༡༣༡༥དང་བྱང་སེམས་རྒྱལ་བ་ཡེ་ཤེས་(༡༢༥༧-༡༣༢༠)སོགས་ཀྱིས་བླ་མར་བསྟེན་པའི་ལོ་རྒྱུས་གསལ། མང་ཐོས་ཀླུ་སྒྲུབ་རྒྱ་མཚོའི་བསྟན་རྩིས་ལས། ས་པཎ་གྱི་སློབ་མ་རྒྱལ་མཚན་གྱི་མཐའ་ཅན་བརྒྱད་ཀྱི་ཁོངས་སུ་བགྲངས་པ་དང་།[33] སྤྱོད་པའི་གླུའི་མཛོད་ཀྱི་འགྲེལ་པ་ཞེས་པའི་འགྱུར་བྱང་དུ། ཆོས་ཀྱི་རྗེ་དཔལ་ལྡན་ས་སྐྱ་པ་ཁུ་དབོན་རྣམས་ཀྱི་སྐུ་དྲིན་ལ་བརྟེན་ནས་བལ་ཡུལ་ཡམ་བུའི་གྲོང་ཁྱེར་དུ་བོད་ཀྱི་ལོ་ཙཱ་བ་བནྡེ་གྲགས་པ་རྒྱལ་མཚན་གྱིས་བསྒྱུར་རོ་[34]ཞེས་འཁོད། འོན་ཀྱང་ས་པཎ་གྱི་དངོས་སློབ་ཡིན་པའི་ཁུངས་གསལ་པོ་གང་ཡང་ད་སྔོན་རྙེད་མ་ཐུབ། ནག་པོ་ཆེན་པོའི་སྒྲུབ་ཐབས་སོགས་ཀྱི་འགྱུར་བྱང་ཁག་ཅིག་ལས་དཔག་ན་ཁོང་གིས་འགྱུར་མཛད་པའི་དུས་ནི་ས་སྐྱའི་སྲས་དྷརྨ་པཱ་ལ་རཀྵི་ཏ་དང་། དཔོན་ཆེན་ཀུན་དགའ་བཟང་པོ་(༡༢༧༠ལོར་དཔོན་ཆེན་གཉིས་པར་བསྐོས། ༡༢༨༡ལ་འདས།)དང་ཀུན་དགའ་གཞོན་ནུ།(དཔོན་ཆེན་བཞི་པ།) རོང་པ་ཤེར་སེང་སོགས་ཀྱི་སྐབས་སུ་ཁེལ་བས་[35]ཤོང་སྟོན་གྱི་འགྱུར་ལས་ཅུང་འཕྱི་བར་གྲུབ་སྙམ། ས་སྐྱ་ཨ་མེས་ཀྱི་ཚེ་མདོའི་རྣམ་བཤད་ལས་ཀྱང་། ཕྱིས་ས་སྐྱ་པའི་གདུང་བརྒྱུད་དྷརྨཱ་རཀྵི་ཏའི་དུས། ཡར་ལུང་ལོ་ཙཱ་བ་གྲགས་པ་རྒྱལ་མཚན་གྱིས་བསྒྱུར་པ་དང་། དེའི་རྗེས་ཀུན་སྤངས་ཆོས་གྲགས། མ་ཏི་པཎ་ཆེན། ཇོ་ནང་ལོ་ཙཱ་བ་བློ་གྲོས་དཔལ་གྱིས་བསྒྱུར་པ་རྣམས་[36]ཞེས་གསུངས། ཞེས་གསུངས་པ་བཅས་ལ་གཞིག་ན་ཤོང་བློ་བརྟན་དང་འགྱུར་དུས་མཉམ་པ་ཙམ་དུ་ཁེལ་ཡོད་ཅིང་། འགྲོ་མགོན་ཕྱག་ནའི་སྲས་དྷརྨ་པཱ་ལ་རཀྵི་ཏས་གདན་ས་སྐྱོང་ཡུན་༡༢༨༠ནས་༡༢༨༧བར་ཡིན། དེས་ན་ལོ་ཙཱ་བ་ཁོང་དུས་རབས་༡༡པའི་སྟོད་ནས་མཇུག་བར་དུ་བཞུགས་པའི་ཚོད་དཔག་ཐུབ་བམ་སྙམ་ལ། རྒྱལ་དབང་ལྔ་པའི་གསན་ཡིག་ཏུ་གྲགས་རྒྱན་དགུང་ལོ་བརྒྱ་དང་བདུན་བཞུགས་པར་གསུངས་པའི་ཁུངས་གང་ཡིན་དཔྱད་དགོས་སོ། །

གསུམ་པ་དཔྱལ་གྱི་རིགས་སུ་འཁྲུངས་པའི་ཐར་ལོ་ཉི་མ་རྒྱལ་མཚན་ཡང་། དཔྱལ་ཀུན་དགའ་སྙིང་པོའམ་ཨ་མོ་གྷའི་[37]སློབ་མ་དང་། རོང་པ་རྒ་ལོའི་སྲས་རོང་པ་ཤེར་སེང་ (༡༢༥༡- ༡༣༡༥) དང་དེའི་དབོན་བླ་མ་རྡོ་རྗེ་རྒྱལ་མཚན།(༡༢༢༣- ༡༢༦༥) བུ་སྟོན་རིན་པོ་ཆེ།(༡༢༩༠–༡༣༦༤) ཀུན་སྤངས་ཆོས་གྲགས་དཔལ་(༡༢༨༣-༡༣༦༣)སོགས་ཀྱི་བླ་མ་ཡིན་པ་ལས་གཞལ་ན་༡༢༥༠ཡར་མར་དུ་འཁྲུངས་པ་ཞིག་ཡིན་ལས་ཆེ། བདག་གིས་མཐོང་བའི་ཡིག་ཆ་དག་ལས་ཐར་ལོའི་མཛད་པ་ཆེས་འཕྱི་ཤོས་གཉིས་རྙེད་པ་ནི། བུ་སྟོན་རིན་པོ་ཆེ་དགུང་ལོ་༢༣པ་ཆུ་བྱི་༡༣༡༢ལོར་གཙང་གི་ཚོང་འདུས་འགུར་མོར་བསྙེན་པར་རྫོགས་པའི་རྗེས་སུ་ཐར་ལོ་ལོ་བཞི་ལྷག་ལ་བསྟེན་པ་[38]དང་། མི་ཉག་བཀའ་བཞི་པ་རིགས་པའི་སེངྒེའི་(༡༢༨༧-༡༣༧༥)རྣམ་ཐར་ལས་རབ་བྱུང་ལྔ་པའི་ཆུ་ཁྱི་༡༣༢༢ལོར་ཁོང་ཉིད་ས་སྐྱ་རིན་ཆེན་སྒང་དུ་བསྙེན་པར་རྫོགས་ཟིན་པའི་རྗེས་ནས་ཐར་ལོ་བསྟེན་[39]ཡོད་པས་མ་མཐའ་ཡང་འདིའི་བར་དུ་བཞུགས་དགོས། ཐར་ལོའི་རྣམ་ཐར་ཐོ་རེ་ལོང་ངེ་ཙམ་གསལ་བའི་ཡིག་ཆ་[40]དང་འགྱུར་བྱང་རྣམས་ལས་ལོ་དུས་གསལ་པོར་འཁོད་པ་མ་རྙེད་ཅིང་། གྲགས་ཚོད་ཙམ་དང་ཕྱིས་ཀྱི་སློབ་དེབ་འགར་ས་པཎ་གྱི་སློབ་མར་བཤད་འདུག་པ་ལྟར་ན། གོང་གི་༡༣༢༢ལོ་ནི་ས་པཎ་གྱི་འདས་ལོ་༧༢པ་ཡིན་ཕྱིར་དངོས་སློབ་ཡིན་པའི་དབང་དུ་བྱས་ཚེ་དགུང་ལོ་བརྒྱད་ཅུའམ་དགུ་བཅུའི་ནང་དུ་ཡོད་དགོས་པ་ལྟ་བུ་ཡིན་མོད། འོན་ཀྱང་འདི་ལ་སྒྲུབ་བྱེད་ཅི་ཡང་མ་མཐོང་ཞིང་རོང་པ་ཤེར་སེང་དང་དགུང་མཉམ་ཙམ་དུ་ཚོད་རྩིས་བྱས་ན་གནད་ལ་ཁེལ་སྲིད་པར་སྙམ་པས། འདིར་དཔྱད་གཞི་ཙམ་དུ་འཁྲུངས་འདས་༡༢༥༡-༡༣༢༥དང་དགུང་གྲངས་༧༥ཡར་མར་བཞུགས་པའི་ཆ་འཇོག་བགྱིས། དེས་ན་དེང་སྐབས་མཁས་པ་འགས་སྣར་ཐང་མཁན་ཆེན་ཉི་མ་རྒྱལ་མཚན་༡༢༢༥-༡༣༠༥ དང་ཐར་ལོ་གཉིས་གཅིག་ཏུ་འདོད་པ་ཡང་ནོར་བ་ཡིན་པར་གྲུབ་བོ། །

དེ་ལྟར་ཁོང་རྣམས་ཀྱི་ལོ་ཚིགས་ཞིབ་ཏུ་འཆད་པར་རྔོ་མི་ཐོགས་ཀྱང་འགྱུར་མཛད་པ་སྔ་བ་ནི་ཤོང་སྟོན་ཡིན་པའི་རྒྱུ་མཚན་ཆེ་བ་དང་། བུ་སྟོན་ཆོས་འབྱུང་གི་ལོ་པཎ་གྱི་མཚན་ཐོ་ལས། ཤོང་རྡོ་རྗེ་རྒྱལ་མཚན་དང་། ཤོང་བློ་གྲོས་བརྟན་པ་དང་། ཁམས་པ་བློ་གྲོས་རྒྱལ་པོ་དང་། འདན་མ་ཚུལ་སེང་དང་། ར་ས་གཞོན་བརྩོན་དང་། ཤུད་སྐྱེ་གྲགས་པ་རྒྱལ་མཚན་དང་། ཉི་མ་རྒྱལ་མཚན་དཔལ་བཟང་པོ་[41]ཞེས་དང་དེའི་གོང་དུ་ལོ་ཙཱ་བ་སོ་སོའི་སྐབས་ཀྱང་གོ་རིམ་འདི་དང་མཚུངས།  དབུས་པ་བློ་གསལ་གྱི་གངས་ཅན་གྱི་ལོ་ཙཱ་བ་ཆེན་པོ་རྣམས་ལ་ཕྱག་འཚལ་བ་ལས། ཤོངས་སྟོན་བློ་གྲོས་བརྟན་པ་དང་། །ཉི་མ་རྒྱལ་མཚན་དཔལ་བཟང་པོ། །ལེགས་སྦྱར་གྲགས་པ་རྒྱལ་མཚན་མཆོག །[42]ཅེས་བཀོད་ཅིང་ཁོང་གིས་མཛད་པའི་ཆོས་འབྱུང་དུ། ལོ་ཚ་བ་གྲགས་པ་རྒྱལ་མཚན། བླ་མ་ལོ་ཚ་བ་ཉི་མ་རྒྱལ་མཚན་དཔལ་བཟང་པོ་[43]ཞེས་བཀོད་པས། འདི་དག་གི་བབ་ལ་བལྟས་ན་ཡར་ལོ་དང་ཐར་ལོ་གཉིས་ཐོག་གཅིག་པ་ཙམ་ལ་ཡར་ལོ་ཅུང་ཟད་བགྲེས་པ་ལྟར་རམ། དཔང་ལོ་དང་ཐར་ལོ་གཉིས་ཀའི་སློབ་མ་ཀུན་སྤངས་ཆོས་གྲགས་དཔལ་གྱི་བརྒྱུད་ཡིག་ལས་ཁོང་དང་གྲགས་རྒྱན་གྱི་བར་དུ་བླ་མ་གསུམ་གྱིས་ཆོད་ཡོད་པས་[44]ཀྱང་ཡར་ལོ་སྔ་བ་ལྟར་ཡོང་ངམ་སྙམ། དཔྱད་ཐབས་འདི་ཙམ་གྱིས་འཁྲུན་ཐག་ཆོད་དཀའ་བར་འདུག་མོད། མདོར་ན་དུས་རབས་བཅུ་བཞི་པའི་ནང་དུ་ཡར་ལོ་བཞུགས་ཡོད་པའི་གསལ་ཁ་ཅི་ཡང་མ་རྙེད་དོ། །

གཉིས། དུས་རབས་༡༣པའི་སྔོན་ནས་སྒྲའི་གཞུང་ཐོར་བུ་འགྱུར་ཚུལ།
༡ ཕོ་བྲང་ཞི་བ་འོད་ཀྱི་སྐབས།

ས་སྐྱ་པའི་སྐུ་རིང་ལས་ཆེས་སྔ་བར་སྒྲའི་གཞུང་ལུགས་བོད་སྐད་དུ་འགྱུར་ཡོད་པ་ནི། ལྷ་བླ་མ་ཡེ་ཤེས་འོད་ཀྱི་དབོན་པོ་ལྷ་ལྡེ་བཀྲ་ཤིས་བཙན་གྱི་སྲས།[45] ཕོ་བྲང་ཞི་བ་འོད་དམ་ལྷ་བླ་མ་ཞི་བ་འོད་ཀྱིས་ཀ་ལཱ་པའི་འགྲེལ་པ་ཉུང་ངུ་ལས་སློབ་མ་ལ་ཕན་པ་ཞེས་པ་བསྒྱུར་ཡོད། འགྲེལ་བ་འདི་ནི་ཇོ་བོ་གྲགས་འབྱོར་གྱིས་མཛད་པའི་སློབ་ཕན་དཔང་ལོ་ཡབ་སྲས་ཀྱིས་བསྒྱུར་བ་[46]འདི་ཉིད་མིན་པར་པཎྜི་ཏ་སྒྲོལ་བའི་དབང་ཕྱུག་ཞེས་པས་བརྩམས་པར་གསལ། འོན་ཀྱང་གཞུང་འདི་ཉིད་རྫོགས་པར་མ་འགྱུར་བའམ་གང་ལྟར་སྒྲ་གཞུང་གི་བརྗོད་བྱ་ཆེན་པོ་བཞི་སྟེ། མཚམས་སྦྱོར་དང་མིང་ལེ། ཀུན་བཤད་དང་ཀྲྀཏ྄་བཞི་ལས་ཀུན་བཤད་ཀྱི་ལེའུ་བཞིའི་འགྲེལ་པ་ཙམ་ཞིག་རེད། འདི་ལ་ལོ་ཙཱ་བ་བློ་བཟང་ནོར་བུ་ཤཱསྟྲཱི་མཆོག་ནས་སློབ་ཕན་གྱི་དོན་བསྡུས་[47]ཞེས་གསུངས་པ་དང་། གཞུང་ཉིད་ཀྱི་མཛད་བྱང་དུ། དཔལ་ལྡན་ཏིང་འཛིན་བཟང་པོའི་ཞབས། །བསྙེན་པའི་སྒྲོལ་བའི་དབང་ཕྱུག་གིས། །སློབ་མ་ལ་ཕན་རྒྱ་མཚོ་ལས། །འགྲེལ་པ་ཉུང་ངུ་འདི་བཏུས་བྱས། །[48]ཞེས་པ་གཉིས་མཐུན་ཞིང་འགྱུར་བྱང་དུ། ལྷ་བླ་མ་ཞི་བ་འོད་ཀྱིས་ཞང་ཞུང་གི་ས་ཆ། ཐོ་ལིང་གསེར་གྱི་གཙུག་ལག་ཁང་དུ་བསྒྱུར་བའོ། །[49]ཞེས་འཁོད། ལོ་ཙཱ་བ་འདིའི་འགྱུར་ཆོས་ཞི་བ་འཚོའི་ཚད་ཆེན་སོགས་འགའ་ཞིག་བསྟན་འགྱུར་ཁྲོད་བཞུགས་ཤིང་།  སྒྲ་བསྒྱུར་གྱི་ལོ་ཙཱ་བ་ཆེན་པོ་དཔལ་ལྷ་བཙན་པོ་ཤཱཀྱའི་དགེ་སློང་ལྷ་བླ་མ་ཞི་བ་འོད་དང་། བོད་ཀྱི་རྒྱལ་པོ་ཕོ་བྲང་ཞི་བ་འོད་སོགས་ཀྱི་མཚན་བཀོད་ཡོད། ཁོང་གི་འཁྲུངས་ལོ་གསལ་པོར་མི་རྙེད་ནའང་དུས་རབས་བཅུ་གཅིག་པའི་སྟོད་དུ་སྐུ་འཁྲུངས་ནས་མཇུག་ཙམ་ལ་གཤེགས་པར་མངོན།[50](༡༠༥༦ལ་རབ་ཏུ་བྱུང་། འདས་ལོ་༡༠༩༧དང་༡༡༡༡ལྕགས་ཡོས་ལ་འདོད་པ་གཉིས་འདུག།)

༢ རོང་ཟོམ་ཆོས་བཟང་གི་སྐབས།

འདིའི་ཡར་མར་དུ་བྱོན་པའི་ལོ་ཙཱ་བ་རོང་ཟོམ་ཆོས་བཟང་གིས་ཀྱང་སྒྲ་རིག་པའི་གཞུང་ལུགས་བསྒྱུར་བརྩམས་ཅི་རིགས་གནང་ཡོད་དེ། རོང་ཟོམ་པའི་གསུང་ཆོས་ཀྱི་དཀར་ཆག་རོང་པ་མེ་དཔུང་གིས་མཛད་པ་སོགས་ལས་སྒྲའི་བསྟན་བཅོས་མང་པོ་བཞུགས་ཞེས་པ་དང་། སྨྲ་སྒོ་དང་གནས་བརྒྱད་སོགས་ཀྱི་འགྲེལ་པ། མཚམས་སྦྱོར་རབ་དབྱེ། སྔགས་བཀླག་པ་སོགས་དང་། སྒྲའི་བསྟན་བཅོས་ཀྱི་ཡི་གེ་ཕལ་ཆེར་མར་པ་ཆོས་གྲགས་ཀྱི་དོན་དུ་མཛད་ཚུལ་སོགས་[51]བཤད་ཡོད། ད་ལྟ་སྡེ་དགེའི་བསྟན་འགྱུར་དུ་བཞུགས་པའི་རྐྱེན་གསུམ་བཤད་པ་ཞེས་པ་འདི་ནི་རོང་ཟོམ་ཆོས་ཀྱི་བཟང་པོ་དང་དགེ་སློང་ཆོས་ཀྱི་ཤེས་རབ་གཉིས་ཀྱིས་བསྒྱུར་བ་ཡིན་ལ། གཙོ་བོར་དེ་ཕན་གྱི་རྐྱེན་རིགས་གསུམ་ཞིབ་ཏུ་བསྟན་པའི་སྒྲ་གཞུང་འཁྲུལ་མེད་ཅིག་སྟེ། གཞུང་གི་དཀྱུས་སུ། དེ་ལ་རྐྱེན་ཞེས་བྱ་བ་ནི་ཁམས་ཉེ་བར་སྒྱུར་བར་བྱེད་པ་སྟེ་དེའང་དུ་ཞིག་ཅེ་ན། གསུམ་སྟེ། ཙནྡྲ་བྱཱ་ཀ་ར་ཎ་ཞེས་བྱ་བའི་ལེགས་སྦྱར་དག་ལས་འདི་སྐད་དུ། སྤྱི་དང་གྲངས་མེད་དངོས་བཤད་པ། །རྐྱེན་ནི་རྣམ་པ་གསུམ་དུ་གནས། །[52]ཞེས་སོགས་ཀྱི་ལུང་ཚིག་བཤད་གཞིར་དྲངས་སྟེ། སྤྱི་ལ་འཇུག་པའི་རྐྱེན་ལྔ་བཅུ་རྩ་དྲུག་དང་། གྲངས་མེད་པའི་ཚིག་གི་རྐྱེན་ཉི་ཤུ་རྩ་བདུན། དངོས་པོའི་རྐྱེན་བཅུ་གཅིག་བསྟན་པ་བཅས་ལེའུ་གསུམ་གྱིས་བསྡུས་ཤིང་འགྱུར་བྱང་དུ། འབྲེལ་པ་གྲུབ་པའི་རྐྱེན་ཞེས་བྱ་བའི་ལེའུ། སློབ་དཔོན་མཁས་པ་ཆེན་པོ་ཁྱད་པར་དུ་རྗོད་བྱེད་རྣམ་པར་དག་པའི་སྒྲ་ལ་མཁས་པ་ཉི་མའི་སྙིང་པོས་བྱཱ་ཀ་ར་ཎ་ལས་ཕྱུང་སྟེ་མཛད་པ། ཀཱ་ལཱ་པའི་རྩ་བའི་དོན་གསལ་བར་བྱེད་པ་སཾ་སྐྲྀ་ཏའི་སྐད་ཀྱི་དེ་ཁོ་ན་ཉིད་འཆུགས་[པ]མེད་པར་སྟོན་པའི་རབ་ཏུ་བྱེད་པ་[53]ཞེས་འཁོད། དེས་ན་ཕྱིས་འགོས་ལོ་ཙཱ་བ་ཆོས་སྐྱོང་བཟང་པོས་བསྒྱུར་བའི་ལེགས་སྦྱར་བརྡ་སྤྲོད་ཀྱི་ཐུན་མིན་གྱི་གནད་བསྡུས་པའི་གཞུང་། འབྲེལ་བ་གྲུབ་པའི་རབ་ཏུ་བྱེད་པ་[54]ཞེས་པ་འདི་ཡང་པཎྜི་ཏ་ཉི་མའི་སྙིང་པོས་མཛད་པ་ཡིན་པས་པཎྜི་ཏ་འདི་ཡང་ལེགས་པར་སྦྱར་བ་ལ་ཤིན་ཏུ་མཁས་པ་ཞིག་ཡིན་པར་ངེས། གོང་གི་རོང་ཟོམ་དང་ལྷན་དུ་ལོ་ཙཱ་མཛད་མཁན་དགེ་སློང་ཆོས་ཀྱི་ཤེས་རབ་འདིའི་འགྱུར་མང་པོ་བཀའ་བསྟན་ཁྲོད་ན་བཞུགས་ཤིང་། འདི་ཉིད་རོང་ཟོམ་ལ་དང་པོར་དགག་པ་མཛད་ཅིང་ཕྱིས་སློབ་མར་གྱུར་པའི་མཁས་པ་གོ་རུབ་ལོ་ཙཱ་བ་ཆོས་ཀྱི་ཤེས་རབ་ཉིད་ཡིན་དགོས་འདུག་ཀྱང་རྣམ་ཐར་སོགས་མ་མཐོང། དུས་རབས་༡༡པའི་ནང་བྱོན་པའི་རོང་ཟོམ་པ་ཡང་ལོ་ཚིགས་ངེས་གཏན་ཞིག་རྙེད་མི་ཐུབ་ཀྱང་[55]དུས་རབས་༡༢པའི་དཀྱིལ་ཙམ་གྱི་བར་དུ་བཞུགས་པར་མངོན་ནོ། །

གསུམ། བསྟན་པ་སྔ་དར་གྱི་སྒྲ་རིག་སྐོར།

སྤྱིར་ན་སྔོན་བྱོན་པའི་ལོ་ཙཱ་བ་གོང་མ་རྣམས་ནི་རྒྱ་བལ་དང་ཁ་ཆེ་སོགས་ཡུལ་དངོས་སུ་ཕེབས་ཏེ་ལེགས་སྦྱར་བསླབས་པར་མཛད་པ་ཤས་ཆེ་བས་སྒྲ་གཞུང་རྩ་འགྲེལ་དག་བོད་སྐད་དུ་བསྒྱུར་བ་དང་འཆད་ཉན་བྱས་པ་དཀོན་པར་སྣང་ཡང་། སྒྲ་རིག་པའི་གཞུང་ལུགས་མ་དར་བ་མིན་ཏེ།  དེ་ཡང་གནས་བརྒྱད་ཆེན་མོ་རྩ་འགྲེལ་འདི་དཀར་ཆག་རྣམས་དང་བོད་ཀྱི་མཁས་པ་ཕལ་མོ་ཆེས་ལྕེ་ཁྱི་འབྲུག་གིས་བརྩམས་པར་འདོད་པ་ཡིན་ཡང་། གནས་བརྒྱད་རྩ་བའི་མཇུག་ཏུ། ཅེ་ཁྱི་འབྲུག་གིས་བྱཱ་ཀ་ར་ཎའི་སྐད་མདོ་ཙམ་ཞིག་བསྒྱུར་བ་གནས་བརྒྱད་པོའི་རྩ་བ་རྫོགས་སོ། །[56]ཞེས་འཁོད་པ་ལྟར་ལོ་ཙཱ་བ་ལྕེ་ཁྱི་འབྲུག་གིས་སྒྲའི་གཞུང་ལུགས་ལས་བཏུས་པའི་སྒོ་ནས་བསྒྱུར་བ་ཞིག་ཡིན་སྲིད་དེ། བོད་སྐད་དུ་བརྩམས་པའི་ཚིག་ཉམས་ཀྱང་ལྷག་པོ་མ་མཐོང་ངོ་། །དབུས་པ་བློ་གསལ་གྱི་དཀར་ཆག་ཏུ། ལོ་པཎ་མང་པོས་མཛད་པའི་བཀའ་བཅད་སྒྲ་སྦྱོར་བམ་པོ་གཉིས་པ། སྒྲའི་རྣམ་པར་དབྱེ་བ་བསྟན་པ།[57] ཞེས་བཤད་པའི་ཕྱི་མ་འདི་ནི་གནས་བརྒྱད་ཀྱི་ནང་ཚན་རྣམ་པར་དབྱེ་བའི་གནས་ཀྱི་འགྲེལ་བཤད་ཅིག་ཡིན་པ་དང་གཞུང་དེར། དེ་ཡང་སློབ་དཔོན་ཤྲཱི་དྷ་རས་གནས་བརྒྱད་པོ་དཔེས་མཚོན་ནས་བཤད་དེ། ཇི་སྐད་དུ། ཤིང་བཟངས་རི་ལ་གནས་པར་གྱུར་པ་སྟེ། །ཤིང་ལ་འབད་དེ་ཁྱོད་ཀྱིས་བལྟ་བར་གྱིས། །[58]ཞེས་སོགས་ཀྱི་གཞུང་ཞིག་དྲངས་སྟེ་རྣམ་དབྱེ་བརྒྱད་ཀྱི་དོན་རྒྱས་པར་བསྟན་ཡོད། འདིའི་དཔེ་རྙིང་ཁ་ཅིག་ལ་སྒྲའི་གནས་བརྒྱད་ཀྱི་བཤད་པ་ཆེན་མོ་ཤིན་ཏུ་དཀོན་པ་ཞེས་བྲིས་[59]འདུག་ལ། ད་ལྟ་སྣར་ཐང་དང་ཅོ་ནེའི་བསྟན་འགྱུར་གཉིས་ལས་གཞན་ན་མི་བཞུགས། དེ་ལྟར་གནས་བརྒྱད་ཅེས་པའི་བརྗོད་བྱ་ལ་སྤྱིར་སྒྲའི་གནས་བརྒྱད་དང་དེའི་ནང་གསེས་རྣམ་དབྱེའི་གནས་བརྒྱད་དེ་ཁྱབ་ཆེ་ཆུང་གཉིས་ལ་གོ་བའི་སྐབས་ཡོད་པ་ཤེས།

རཀ་ར་བཀྲས་མཐོང་ཐུབ་བསྟན་ཆོས་དར་གྱི་གནས་བརྒྱད་ཀྱི་བསྡུས་དོན་དུ། ལོ་ཙཱ་བ་ཆེན་པོ་ལྕེ་ཁྱི་འབྲུག་གིས་བསྒྱུར་བའི་སྒྲའི་བསྟན་བཅོས་གནས་བརྒྱད་དང་། དེའི་འགྲེལ་པ་མཁན་པོ་དཔལ་བརྩེགས་ཀྱིས་མཛད་པ་ལ་གཞི་བྱས་ཏེ་[60]ཞེས་གསུངས་པ་ལ་བརྟག་ན་འགྲེལ་བ་མཛད་མཁན་དཔལ་བརྩེགས་ཡིན་པའི་ཁུངས་ཤིག་ཡོད་པར་མངོན། ཡང་ལོ་ཙཱ་བ་རོང་ཟོམ་ལ་ཡང་གནས་བརྒྱད་ཀྱི་འགྲེལ་པ་ཡོད་པར་གསལ་ཡང་བསྟན་འགྱུར་དུ་འཁོད་པ་འདི་རོང་ཟོམ་གྱི་ཡིན་མིན་གསལ་ཁ་མ་རྙེད། དེ་དག་གིས་མཚོན་གནས་བརྒྱད་དང་འབྲེལ་བའི་གཞུང་ཅི་རིགས་ཤིག་སྔ་མོ་ནས་དར་ཞིང་ཕྱིས་ས་པཎ་གྱི་སྒྲ་ལ་འཇུག་པ་སོགས་ཀྱང་གནས་བརྒྱད་ཀྱི་དོན་བཀྲལ་བའི་གཞུང་ཡིན།

མདོར་ན་གནས་བརྒྱད་ཆེན་མོ་ནི་སུཔ྄་མཐའི་རྣམ་དབྱེ་ཉེར་གཅིག་དང་། ཚིག་སྡུད་དང་བསྒྱུར་བའི་རྣམ་གཞག་སོགས་སྡེ་ཚན་བརྒྱད་ཀྱིས་སྟོན་པ་ཞིག་ཡིན་པས་ལེགས་སྦྱར་གྱི་བརྡ་སྤྲོད་བརྗོད་བྱར་བྱས་པའི་གཞུང་དངོས་ཤིག་ཡིན་མོད། གཙོ་བོར་སྐབས་དེའི་བོད་ཀྱི་བརྡ་སྤྲོད་པ་ལ་ཉེ་བར་མཁོ་བའི་ཆ་རྐྱེན་དུ་བསྒྱུར་བའམ་བརྩམས་པ་ཡིན་ལས་ཆེ་སྟེ། སཾ་བོད་གཉིས་ཀྱི་རྣམ་དབྱེ་བརྒྱད་པོ་དོན་ལྡོག་གཅིག་པར་གནས་པ་དང་། འདིའི་བྱེད་པའི་གནས་དང་དྲང་བའི་གནས། ཡི་གེ་འཇུག་པའི་གནས་སོགས་ཐུན་མོང་དུ་སྦྱོར་ཆོག་པའི་ཕྱིར་དང་། གཞན་ཀུན་བཤད་ཀྱི་རྣམ་དབྱེ་ལ་སོགས་པ་ནི་བོད་སྐད་ལ་མི་འབྱོར་བའི་ཕྱིར་རོ། ། བོད་ཀྱི་ཚིག་མཛོད་ཆེས་སྔ་ཤོས་སམ་བཙན་པོའི་དུས་ཀྱི་སྐད་གཉིས་ཤན་སྦྱར་བའི་ཚིག་མཛོད་བྱེ་བྲག་ཏུ་རྟོགས་བྱེད་ཆེན་མོ་[61]དང་། བྱེ་རྟོགས་འབྲིང་པོའམ་སྒྲ་སྦྱོར་བམ་གཉིས་ཏེ། བཙན་པོ་ཁྲི་ལྡེ་སྲོང་བཙན་གྱི་དུས་ཕོ་བྲང་འོན་ཅང་དོར་ལོ་པཎ་དང་རྗེ་བློན་གདན་འཛོམས་ནས་མཛད་པའི་བཀས་བཅད་ཀྱི་བསྟན་བཅོས་ཏེ། དེ་ཉིད་ཀྱི་མཇུག་ཏུ། ཆེན་པོའི་དཀའ་བའི་གནས་དང་སྒྲའི་གཞུང་དང་སྦྱར་ཏེ་བཤད་པའི་པཉྫི་ཀ་(དཀའ་འགྲེལ་)མ་དྷྱ་བྱུཏྤ་ཏ་(བྱེ་རྟོགས་འབྲིང་པོ་)ཡིན་ནོ་[62]ཞེས་གསུངས་པ་ལྟར་གཞུང་འདི་རྣམས་ལེགས་སྦྱར་སྒྲ་རིག་པའི་ཆ་ལག་གལ་ཆེན་ཡིན།

ཏུན་ཧོང་ཡིག་རྙིང་ལས་ཚར་འགའ་འབྱུང་བའི་འཇུག་པའི་སྒྲ་བརྒྱད་བསྟན་པའི་ཚིག་ལེའུར་བྱས་པ་འདི་ཡང་། ལོ་ཆེན་འགོས་ཆོས་འགྲུབ་ཀྱིས་བསྒྱུར་བ་རྣམ་དབྱེ་བརྒྱད་ཀྱི་ངོས་འཛིན་དཔེར་བརྗོད་དང་སྦྱར་ནས་བསྟན་པ་ཞིག་ཡིན། གཞན་བསྟན་འགྱུར་དུ་འཁོད་པའི་སུ་བནྟ་དང་། སྨྲ་བ་ཀུན་ལ་འཇུག་པའི་སྒྲའི་བསྟན་བཅོས་རྩ་འགྲེལ། རབ་ཏུ་སྦྱོར་བའི་སྒོའི་འགྲེལ་པ། ལྡོག་པ་བསྡུས་པ་བསྟན་པའི་རྣམ་འགྲེལ་སོགས་མང་པོ་ཞིག་སྒྲའི་བརྗོད་བྱ་བསྟན་པའི་རྒྱ་གཞུང་ཡིན་ཡང་འགྱུར་བྱང་མ་འཁོད་དོ། །པནྜི་ཏ་སྨྲྀ་ཏིའི་སྨྲ་སྒོ་མཚོན་ཆ་ཡང་གཙོ་བོར་ལེགས་སྦྱར་གྱི་ཚོགས་གསུམ་བརྗོད་བྱར་བྱས་པ་ཞིག་སྟེ། དཔང་ལོས་འདི་ལ་རྒྱ་གཞུང་མིན་པ་དང་སྒྲ་མདོ་དང་མི་མཐུན་པའི་དགག་པ་ཡང་མཛད་ཡོད།[63] གང་ལྟར་སྒྲ་མདོ་ཆེན་པོ་རྣམས་དང་སུམ་རྟགས་ཀྱི་གཞུང་རྒྱ་ཁྱབ་ཏུ་དར་བ་དང་བསྟུན་གནས་བརྒྱད་དང་སྨྲ་སྒོ་རྩ་འགྲེལ་སོགས་ཀྱི་ཕྲིན་ལས་ཅུང་ཉམས་སོང་བར་སྣང་ངོ་། །

མཇུག་བསྡུ་བ།

དེ་ལྟར་སྒྲ་མདོ་ཐོག་མར་བསྒྱུར་ཚུལ་གྱི་གླེང་གཞི་དང་འབྲེལ་ནས་ལོ་ཙཱ་བ་དེ་དག་ལ་རྣམ་ཐར་གང་ཡོད་དང་དུས་ཚིགས་སྔ་ཕྱི། སྒྲ་གཞུང་གང་ཞིག་སྔོན་ལ་འགྱུར་བ་དང་འགྱུར་གང་གི་དཔེ་རྒྱུན་གནས་ཡོད་པ་སོགས་ལ་གསར་དུ་དོགས་སློང་བྱུང་ཞིང་། མཐའ་སྡོམ་དུ་སྒྲ་མདོའི་རྩ་བ་དངོས་དུས་རབས་༡༣པར་ཤོང་སྟོན་གྱིས་ཐོག་མར་བསྒྱུར་བ་དང་། སྒྲའི་གཞུང་ཐོར་བུ་བསྒྱུར་བ་དུས་རབས་༡༡ནང་བྱུང་བ། སྒྲ་རིག་པའི་བརྗོད་བྱ་ཆ་ལག་བཅས་ཅི་རིགས་བསྟན་པ་སྔ་དར་ནས་བྱུང་བའི་ཚུལ་བཅས་བརྗོད་ཡོད་ལ། སྤྱིར་བཏང་ཞི་བ་འོད་ཀྱིས་སློབ་ཕན་དང་ཤོང་སྟོན་གྱིས་ཀ་ཙན་བསྒྱུར་བ་སོགས་གླེང་མཁན་བྱུང་ཡོད་ཀྱང་[64]ཐར་ལོས་སྒྲ་མདོ་གང་བསྒྱུར་བ་དང་དུས་ཚིགས་ནམ་ཡིན། དུས་མཉམ་གྱི་ལོ་ཙཱ་བ་གང་ཡོད་སོགས་བསྡུར་བ་སྔར་མ་མཐོང་བས་དེ་ཙམ་གྱི་ཆ་ནས་རྩོམ་ཡིག་འདིས་སྟོང་ཆ་ཅུང་ཟད་བསྐང་ཡོད་སྲིད། འདི་བཞིན་དུ་ཕྱིས་བྱུང་བའི་སྒྲ་གཞུང་རྩ་འགྲེལ་དང་གཞུང་གཞན་རྣམས་ཀྱི་འགྱུར་དང་ལོ་ཙཱ་བའི་སྐོར་དཔྱད་པར་རིགས་ཤིང་། གྲགས་ཆེན་གྱི་ལོ་ཙཱ་བ་པ་ཚབ་དང་རྩ་མི། ཡོལ། འགོས། དཔྱལ། གཉན། ཁེ་གད། རྨ། འབྲོ། རྒ་ལྟ་བུ་རྣམས་ཀྱི་ལོ་རྒྱུས་འཚོལ་དགོས་པའི་གལ་གནད་ཀྱང་ཤུགས་ཀྱིས་མཚོན་ཡོད། དགེ་བར་གྱུར་ཅིག །

དཔྱད་ཡིག་དང་ཞབས་མཆན།

[1] རིག་གནས་ཀུན་ཤེས་ནས་བདག་མེད་གྲུབ་པ་ཞེས་བྱ་བའི་བསྟན་བཅོས། སྟག་ཚང་ལོ་ཙཱ་བའི་གསུང་འབུམ་པོད་གཉིས་པ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༨ ལྡེབ་ངོས།༨

[2] རིག་གནས་ཀུན་ཤེས་ནས་བདག་མེད་གྲུབ་པ་ཞེས་བྱ་བའི་བསྟན་བཅོས་ཀྱི་རྣམ་པར་བཤད་ཉུང་གསལ་ཀུན་དགའ། གོང་མཚུངས། ལྡེབ་ངོས།༥༢།

[3] ཐ་སྙད་རིག་གནས་ལྔའི་བྱུང་ཚུལ། འདར་སྟོད་དགྲ་འདུལ་དབང་པོ། མཚོ་སྔོན་མི་རིགས་དཔེ་སྐྲུན་ཁང་། ༢༠༢༢ ལྡེབ་ངོས། ༣༣

[4] བསྟན་བཅོས་བཻ་ཌཱུར་དཀར་པོ་ལས་དྲིས་ལན་འཁྲུལ་སྣང་གཡའ་སེལ་དོན་གྱི་བཞིན་རས་སྟོན་བྱེད་ཅེས་བྱ་བའི་གླེགས་བམ་གཉིས་པ། སྡེ་སྲིད་སངས་རྒྱས་རྒྱ་མཚོ། སི་ཁྲོན་མི་རིགས་དཔེ་སྐྲུན་ཁང་།༢༠༢༠ ལྡེབ་ངོས།༣༦༧/༣༦༨

[5] ཡར་ལུང་པ་ཤུད་ཀྱེ་གྲགས་པ་རྒྱལ་མཚན། གྲགས་རྒྱལ། ཡར་ལུང་དང་ཡར་ཀླུངས་ཡར་ལུང་། དེ་བཞིན་ཤུད་ཀྱེ་ཤུད་སྐྱེ། ཤུད་ཀེ་སོགས་འབྲི་སྟངས་མང་། གྲགས་རྒྱན་ཞེས་པ་དགེ་ཆོས་ཀྱི་གསུང་ལྟར་སྤྱད་ཡོད།

[6] ཙནྡྲ་པའི་མདོ། སློབ་དཔོན་ཙནྡྲ་གོ་མིས་པཱ་ཎི་པའི་དོན་འགྲེལ་དུ་བརྩམས་པ། གཞུང་སྐབས་དྲུག་ལ་རྐང་པ་བཞི་རེར་ཕྱེ་བའི་ལེའུ་ཉེར་བཞི་ཅན། པཎྜི་ཏའི་ལུགས་སུ་བཀྲལ་བའི་གཞུང་དུ་གྲགས།

[7] སེམས་འགྲེལ་སྐོར་གསུམ་གྱི་བླ་མའི་བརྒྱུད་རིམ་གསལ་བ། ཆོས་གྲགས་དཔལ་གྱི་གསུང་འབུམ། ལྡེབ་ངོས།༤༡༣ ཨ་དརྴ།

[8] ཤེས་བྱ་ཀུན་ཁྱབ་མཛོད་གླེགས་བམ་གཉིས་པ། འཇམ་མགོན་བློ་གྲོས་མཐའ་ཡས། འཕྲུལ་དེབ། ནི་ཏཱརྠ་ཤེས་རིག་དཔེ་སྐྲུན་ཁང་། ༢༠༢༣

[9] བསྟན་བཅོས་ཀྱི་དཀར་ཆག །དབུས་པ་བློ་གསལ་བློ་གསལ་ཞབས་ཀྱི་གསུང་འབུམ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་།༢༠༢༢ ལྡེབ་ངོས། ༡༢༢

[10] བསྟན་བཅོས་འགྱུར་རོ་འཚལ་གྱི་དཀར་ཆག །རྫོང་ཁམས་བྱེའི་སློབ་གླིང་ནས་བསྒྲིགས་པའི་བུ་སྟོན་ཐམས་ཅད་མཁྱེན་པའི་བཀའ་འབུམ་དཔེ་རིང་། པོད་༢༦པ།༼ལ༽ ལྡེབ་ངོས།༢༦༨

[11] བུ་སྟོན་ཡོངས་གྲགས་ལྟར་ལ། དབུས་པ་བློ་གསལ་ཐར་ལོའི་སློབ་མར་དཔྱལ་གྱི་གདུང་རབས་ལས་བཤད་པ་དང་། དབུས་པ་བློ་གསལ་གྱི་ཆོས་འབྱུང་། གོང་མཚུངས་གསུང་འབུམ་ལྡེབ་ངོས་༤༦༤པར། བླ་མ་ལོ་ཚ་བ་ཉི་མ་རྒྱལ་མཚན་དཔལ་བཟང་པོ་ཞེས་བྱུང་བས་ཀྱང་ཤེས་ནུས་སྙམ།

[12] བསྟན་འགྱུར་དཔེ་བསྡུར་མ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༥ པོད་༡༠༨པའི་ལྡེབ་ངོས། ༩༧༢

[13] གོང་མཚུངས། ལྡེབ་ངོས།༨༩༦

[14] གོང་མཚུངས། ལྡེབ་ངོས།༩༠༠

[15] གོང་མཚུངས། ལྡེབ་ངོས།༨༢༣

[16] རྒྱལ་པོ་བདེ་སྤྱོད་ཀྱི་བཀའ་ལྟར་བྲམ་ཟེ་སཔྟ་ཝརྨས་གཞོན་ནུ་གདོང་དྲུག་བསྒྲུབས་ནས་བརྩམས་པ། མཚམས་སྦྱོར་རྐང་པ་ལྔ་དང་། མིང་ལེ་རྐང་པ་དྲུག །ཀུན་བཤད་རྐང་པ་བརྒྱད། ཀྲྀ་ཏ་རྐང་པ་དྲུག་བཅས་ཡོད། རྟོགས་སླ་བ་རྒྱལ་པོའི་ལུགས་ཀྱི་གཞུང་དུ་གྲགས། གཞུང་འདིའི་བྱེད་པོར་སཔྟ་ཝརྨ་བདུན་པའི་གོ་ཆ་དང་། ཤ་ཝརྨ་དབང་ཕྱུག་གོ་ཆ། ཤརྨ་ཝརྨ་འཚེ་བའི་གོ་ཆ། སརྦ་ཝརྨ་ཐམས་ཅད་གོ་ཆ་སོགས་འདོད་ཚུལ་མང་།

[17] གོང་མཚུངས་ཤེས་བྱ་ཀུན་ཁྱབ་མཛོད་གླེགས་བམ་གཉིས་པར། ལྷ་ཡི་དབང་པོས་ཨིནྡྲ་དྷྲུ་བ་ལ། །བཤད་པའི་བརྡ་སྤྲོད་ཤེས་ཕྱིར་བདེ་སྤྱོད་ཀྱི། །བཀའ་ལྟར་སཔྟ་ཝརྨས་གདོང་དྲུག་བསྒྲུབས། །ཀ་ལཱ་པ་བསྟན་ཤོང་དཔང་དྲིན་ལས་བྱུང༌། །ཞེས་སོ། །

[18] གོང་མཚུངས་བཻ་དཀར་གཡའ་སེལ། ལྡེབ་ངོས།༣༦༧/༣༦༨

[19] གོང་མཚུངས་བསྟན་འགྱུར་དཔེ་བསྡུར་མ། སྒྲ་མདོ།༼ལེ༽ ལྡེབ་ངོས་༤༤པར། ཚུལ་འདི་དཔལ་ལྡན་ས་སྐྱ་རུ། །བློ་གྲོས་བརྟན་པ་གསུམ་པ་ཡིས། །དུར་ག་སིང་ཧའི་འགྲེལ་པ་ལ། །བརྟེན་ནས་སྒྲ་དོན་ཇི་བཞིན་བསྒྱུར། །འདི་ན་ཕྱོགས་ཀྱང་མ་མཐོང་བར། །མུན་སྤྲུལ་བསྒྱུར་དང་འཆད་བྱེད་པ། །དེ་དང་སྐྱེ་བོ་གཞན་གྱིས་ཀྱང༌། །འདི་དོན་མྱུར་དུ་རྟོགས་གྱུར་ཅིག །ཅེས་དང་། སྐད་གཉིས་སྨྲ་བའི་གཙུག་གི་ནོར་བུ་ཤོང་སྟོན་རྡོ་རྗེ་རྒྱལ་མཚན་གྱི། །ལེགས་བཤད་ལྡེ་མིག་མཆོག་གིས་ལེགས་སྦྱར་རིན་ཆེན་གཏེར་གྱི་ཁ་ཕྱེ་ནས། །སྣ་ཚོགས་གཞུང་ལུགས་ལེགས་པར་རྟོགས་པའི་འབྱོར་བར་དབང་བྱེད་འདི་ཙམ་ཞིག །དུས་འདིར་དཔལ་ལྡན་བློ་གྲོས་བརྟན་པའི་ཡིད་ཀྱི་ངལ་སོའི་གནས་སུ་གྱུར། །ཅེས་སོགས་གསུངས།

[20] བུ་སྟོན་ཆོས་འབྱུང་། བུ་སྟོན་རིན་ཆེན་གྲུབ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༩ལྡེབ་ངོས།༣༧༥

[21] བསྟན་བཅོས་ཀྱི་དཀར་ཆག །དབུས་པ་བློ་གསལ་བློ་གསལ་ཞབས་ཀྱི་གསུང་འབུམ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་།༢༠༢༢ ལྡེབ་ངོས།༡༢༢

[22] སྐུ་མཆེད་གཉིས་ལས་ཤོང་སྟོན་ཞེས་པ་གཅེན་ལ་གོ་བར་བྱས་ན་བརྡ་ལེགས་པར་མཐོང་བས་འདིར་དེ་བཞིན་བཀོལ་ཡོད། སྤྱིར་བློ་བརྟན་འདི་ཤོང་སྟོན་གྱི་སྐུ་མཆེད་དང་དབོན་དུ་བཤད་པའི་ཡིག་ཆ་རིགས་གཉིས་བྱུང་འདུག །

[23] བསྟན་པ་རྒྱས་པ་རྒྱན་གྱི་ཉི་འོད། བཅོམ་ལྡན་རིག་པའི་རལ་གྲིའི་གསུང་འབུམ། སི་ཁྲོན་ཞིང་ཆེན་བོད་ཡིག་དཔེ་རྙིང་བསྡུ་སྒྲིག་ཁང་གི་ནང་ཁུལ་ཡིག་ཆ། དེབ་དང་པོའི་ལྡེབ་ངོས།༧༡

[24] སློབ་དཔོན་སེང་གེ་བཟང་པོས་མཛད་པའི་རྣམ་དབྱེའི་ལེའུར་བྱས་པ། ཞེས་པ་བསྒྱུར་མཁན་ཤོང་བློ་བརྟན་ཡིན་ཡང་ཡིག་ཆ་མང་པོར་ཤོང་སྟོན་དང་ནོར་ཡོད། སརྦ་དྷ་རས་མཛད་པའི་ཏི་ལ་སོགས་པའི་མཐའི་བྱ་བ་རྣམ་པར་དཔྱད་པ་ཞེས་བྱ་བ་སི་ཏུ་པཎ་ཆེན་ནས་ཤོང་འགྱུར་དུ་བཞག་པ་ཡང་བོ་དོང་ལོ་ཙཱ་བ་རྡོ་རྗེ་རྒྱལ་མཚན་དང་ནོར། དེ་བཞིན་བཟློག་པ་བསྡུས་པ་དང་སྨྲ་བ་ཀུན་ལ་འཇུག་པའི་རྩ་འགྲེལ་སོགས་ཤོང་འགྱུར་དུ་བཞག་པ་མང་ཡང་དཀར་ཆག་རྣམས་སུ་ཤོང་འགྱུར་གྱི་གོང་དུ་བཀོད་པ་ལས་འཁྲུལ་གཞི་བྱུང་བ་འདྲ།

[25] རིག་པའི་ཁྱེའུ། དུས་རབས་བཅུ་གསུམ་པར་ཐ་སྙད་རིག་གནས་བོད་ལ་ཇི་ལྟར་སླེབས་པ་ལས་འཕྲོས་པའི་དཔྱད་རྩོམ་དང་གཞན། དགེ་འདུན་རབ་གསལ། བོད་ཀྱི་དཔེ་མཛོད་ཁང་།༢༠༡༧ ལྡེབ་ངོས༢༠༧ནས་༢༤༣བར་ཤོང་སྟོན་རྡོ་རྗེ་རྒྱལ་མཚན་གྱི་རྣམ་ཐར་བསྐྱར་དུ་འཚོལ་བ་ཞེས་པའི་ལེའུར་གཟིགས།

[26] མཆོག་གི་དང་པོའི་སངས་རྒྱས་ལས་ཕྱུང་བ་རྒྱུད་ཀྱི་རྒྱལ་པོ་དཔལ་དུས་ཀྱི་འཁོར་ལོ་ཞེས་བྱ་བ། སྡེ་དགེ་བཀའ་འགྱུར། རྒྱུད།༼ཐ༽ ལྡེབ་༡༠༧པའི་ཉིན།

[27] ས་སྐྱ་བཀའ་འབུམ། བ།༢༦༥-༢༦༦པར་གསལ་ཞེས་རིག་པའི་ཁྱེའུར་དྲངས་ཡོད། ལྡེབ་ངོས།༢༢༥

[28] གྲུབ་ཆེན་ཨུ་རྒྱན་པའི་རྣམ་པར་ཐར་པ་བྱིན་རླབས་ཆུ་རྒྱུན། བསོད་སྙོམས་པ་བསོད་ནམས་འོད་ཟེར། ལོ་པཎ་གྱི་རྣམ་ཐར་ཕྱོགས་བསྒྲིགས། ཀྲུང་གོའི་ཤེས་རིག་དཔེ་སྐྲུན་ཁང་།༢༠༡༩ ལྡེབ་ངོས།༢༨༩

[29] ཆོས་འབྱུང་བསྟན་པའི་པདྨ་རྒྱས་པའི་ཉིན་བྱེད། ཀུན་མཁྱེན་པདྨ་དཀར་པོ། ཕ་རན་སི་དཔལ་འབྲུག་པའི་ཆོས་ཚོགས་ནས་ཆོས་སྦྱིན་དུ་སྤེལ།༢༠༠༦འཕྲུལ་དེབ་ལྡེབ་ངོས།༣༡༨

[30] སྤང་ལོ་བློ་གྲོས་བརྟན་པའི་ཞབས་ཀྱི་གསུང་འབུམ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ལྡེབ་ངོས།༦༩

[31] དུས་འཁོར་རྩ་འགྲེལ་དང་། སྙན་ངག་མེ་ལོང་། ཀླུ་ཀུན་ཏུ་དགའ་བའི་ཟློས་གར། རྟོགས་བརྗོད་དཔག་བསམ་འཁྲི་ཤིང་བཅས་ཀྱི་འགྱུར་བྱང་དུ་བླ་མ་དམ་པ་ཆོས་ཀྱི་རྒྱལ་པོ་དང་དཔོན་ཆེན་ཤཱཀྱ་བཟང་པོའི་བཀའ་བཞིན་དུ་བསྒྱུར་བའི་ཚུལ་འཁོད།

[32] དགེ་ཆོས་ཀྱིས་ཡར་ལུང་གྲགས་རྒྱན་པ་ཞེས་གསུངས་པ་དེ་ཡིན། ལོ་ཆེན་བྱང་རྩེའི་དབོན་པོ་ལོ་ཙཱ་བ་གྲགས་པ་རྒྱལ་མཚན་དང་ནོར་བར་མི་བྱ། སྨོན་ལམ་ཚིག་མཛོད་དུ་ཡར་ལུང་གྲགས་པ་རྒྱལ་མཚན་གྱི་ལོ་རྒྱུས་བཀོད་པ་ནི་ཕྱི་མ་འདི་ཡིན་ནོ། །

[33] བསྟན་རྩིས་གསལ་བའི་ཉིན་བྱེད་ལྷག་བསམ་རབ་དཀར། མང་ཐོས་ཀླུ་སྒྲུབ་རྒྱ་མཚོ། གངས་ཅན་རིག་མཛོད་དེབ་༤པ། བོད་ལྗོངས་མི་དམངས་དཔེ་སྐྲུན་ཁང་།༡༩༨༧ ལྡེབ་ངོས།༡༥༡

[34] སྡེ་བསྟན། རྒྱུད། ༼ཞི༽ ལྡེབ་༢༠༦པའི་ཉིན།

[35] ༡ ལྷ་སོ་སོའི་སྒྲུབ་པའི་ཐབས་རྒྱ་མཚོ་ཞེས་བྱ་བ་འདི་རྣམས་ནི་དཔལ་ལྡན་ས་སྐྱའི་གཙུག་ལག་ཁང་ཆེན་པོར་པཎྜི་ཏ་ཆེན་པོ་གཽ་ཏ་མ་ཤྲཱི་ལས་བརྒྱུད་ཅིང་། པཎྜི་ཏ་ཆེན་པོ་ཀཱིརྟི་ཙནྡྲའི་ཞལ་སྔ་ནས་ཞུས་ནས། སློབ་དཔོན་ཆེན་པོ་དྷརྨ་པ་ལ་རཀྵི་ཏའི་སྐུ་སྐྱབས་དང་། དཔོན་ཆེན་པོ་ཀུན་དགའ་གཞོན་ནུ་དང་། མ་གཅིག་པས་སྦྱིན་བདག་མཛད་པ་ལ་བརྟེན་ནས། དེ་ཤཱནྟ་རི་ཡོ་གི་གྲགས་པ་རྒྱལ་མཚན་གྱིས། བྱ་ལོ་ཟླ་བ་བཅུ་གཉིས་པའི་དཀར་པོའི་ཚེས་གསུམ་ལ་དབེན་གནས་དམ་པ་ཆུ་མིག་རྫིང་ཁར་ཡོངས་སུ་རྫོགས་པར་བསྒྱུར་རོ།།སྡེ་བསྟན། རྒྱུད།༼མུ༽ ལྡེབ་༢༤༧པའི་སྲིབ།

༢ དཔལ་ལྡན་གཤིན་རྗེ་གཤེད་དམར་པོའི་རྒྱུད་ཀྱི་རྒྱལ་པོ་རྫོགས་སྷོ།། །།བླ་མ་ཆོས་ཀྱི་རྒྱལ་པོའི་གསུང་གི་འོད་ཟེར་དང་། །བྷོ་ཊ་པཎྜི་ཏའི་གསུང་དང་། མིའི་དབང་པོ་ཀུན་དགའ་བཟང་པོའི་གསུང་དང་། དཔོན་ཀུན་གཞོན་གྱིས་གསེར་གནང་བ་ལ་བརྟེན་ནས། ཤཱཀྱའི་དགེ་སློང་ཙན་དྲ་ཤྲཱིའི་ཞལ་སྔ་ནས་ཞུས་ཤིང་། པཎྜི་ཏ་ཆེན་པོ་ཙནྡྲ་ཀཱིཪྟི་དང་། ཡར་ལུངས་པ་གྲགས་པ་རྒྱལ་མཚན་གྱིས་བལ་ཡུལ་ཡམ་བུའི་གྲོང་ཁྱེར་དུ་བསྒྱུར། སྡེ་བཀའ། རྒྱུད་འབུམ། ༼ཇ༽ ལྡེབ་༢༡༤པའི་སྲིབ།

༣ དཔལ་གཏུམ་པོ་ཁྲོ་བོ་ཆེན་པོའི་རྒྱུད་ཀྱི་རྒྱལ་པོ་རྫོགས་སོ།། །།ཐེག་པ་ཆེན་པོ་ཡང་དག་པའི་དགེ་བའི་བཤེས་གཉེན་མཁྱེན་པ་དང་བརྩེ་བ་དང་ཕྲིན་ལས་དཔག་ཏུ་མེད་པ་མངའ་བ་བླ་མ་ཆེན་པོ་རིན་ཆེན་རྒྱལ་མཚན་གྱི་སྐུ་དྲིན་ལ་བརྟེན་ནས་བླ་མ་དུས་འཁོར་བ་ཆེན་པོ་ཤེས་རབ་སེང་གེས་བསྐུལ་ཞིང་སྦྱིན་བདག་མཛད་པ་ལ་བརྟེན་ནས་དཔལ་ལྡན་ས་སྐྱའི་གཙུག་ལག་ཁང་ཆེན་པོར་པཎྜི་ཏ་རཏྣ་ཤྲཱིའི་ཞལ་སྔ་ནས་ལོ་ཙྪ་བ་གྲགས་པ་རྒྱལ་མཚན་གྱིས་སྦྲུལ་གྱི་ལོ་སྨིན་དྲུག་གི་ཟླ་བའི་དཀར་པོའི་ཚེས་བཅུ་ལ་རྫོགས་པར་བསྒྱུར་རོ།། །།སྡེ་བཀའ། རྒྱུད་འབུམ།༼ང༽ལྡེབ་༣༤༣པའི་ཉིན།

[36] ཚེ་དཔག་ཏུ་མེད་པའི་མདོའི་རྣམ་པར་བཤད་པ་ཚེ་དང་བསོད་ནམས་རབ་ཏུ་རྒྱས་པའི་ཉིན་བྱེད་ཅེས་བྱ་བ། ངག་དབང་ཀུན་དགའ་བསོད་ནམས་ཀྱི་གསུང་འབུམ། པོད་༼ཆ༽པའི་ལྡེབ།༤༡༡ ཨ་དརྴ།

[37] དཔྱལ་ལོ་ཆོས་བཟང་དང་རོང་པ་རྒ་ལོའི་སློབ་མ་དང་། བཅོམ་ལྡན་རལ་གྲི། དགེ་སྡིངས་པ་ཆོས་སྐུ་འོད་ཟེར་སོགས་ཀྱི་བླ་མ་ཡིན།

[38] བུ་སྟོན་ལོ་ཙཱའི་རྣམ་ཐར་སྙིམ་པའི་མེ་ཏོག །སྒྲ་ཚད་པ་རིན་ཆེན་རྣམ་རྒྱལ། གོང་མཚུངས་ལོ་པཎ་གྱི་རྣམ་ཐར་ཕྱོགས་བསྒྲིགས་དེབ་དྲུག་པ། ལྡེབ་ངོས།༥༠

[39] མཁན་ཆེན་བཀའ་བཞི་པ་རིགས་པའི་སེངྒེའི་རྣམ་པར་ཐར་པ་ཡོན་ཏན་རིན་པོ་ཆེའི་རྒྱ་མཚོ། དགེ་སློང་སེངྒེ་བཟང་པོ། མི་ཉག་བཀའ་བཞི་པ་རིག་པའི་སེངྒེའི་གསུང་འབུམ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་།༢༠༢༤ ལྡེབ་ངོས།༦༦༨/༦༧༠

[40] ༡དཔྱལ་གྱི་གདུང་རབས་ཟ་ར་ཚགས་དང་གང་གཱའི་ཆུ་རྒྱུན་གཉིས་གཅིག་ཏུ་བྲིས་པ་ཀུན་གསལ་མེ་ལོང་། བྱ་བཏང་པདྨ་རྡོ་རྗེ། བོད་ལྗོངས་མི་དམངས་དཔེ་སྐྲུན་ཁང་།༢༠༡༡

༢མྱང་ཡུལ་སྟོད་སྨད་བར་གསུམ་གྱི་ངོ་མཚར་གཏམ་གྱི་ལེགས་བཤད་མཁས་པའི་འཇུག་ངོགས། ཏཱ་ར་ནཱ་ཐས་མཛད་པར་གྲགས། སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་བསྒྲིགས་ཁང་།

༣གཞི་ལམ་འབྲས་གསུམ་ལས་བརྩམས་པའི་དྲིས་ལན་ཡིད་ཀྱི་མུན་སེལ། ཉ་དབོན་ཀུན་དགའ་དཔལ་གྱི་གསུང་འབུམ། ཨ་དརྴ། སོགས།

[41] གོང་མཚུངས་བུ་སྟོན་ཆོས་འབྱུང་། ལྡེབ་ངོས།༣༡༤

[42] གོང་མཚུངས་དབུས་པ་བློ་གསལ་གསུང་འབུམ། ལྡེབ་ངོས།༡༤༢

[43] གོང་མཚུངས། ལྡེབ་ངོས།༤༦༤

[44] བླ་མའི་བརྒྱུད་རིམ་གསལ་བ། ཀུན་སྤངས་ཆོས་གྲགས་དཔལ། ཇོ་ནང་དཔེ་ཚོགས་ལས་སྤྱིའི་དེབ་༤༥པ། མི་རིགས་དཔེ་སྐྲུན་ཁང་། ལྡེབ་ངོས།༤༣༣

[45] ལྷ་ལྡེ་ལ་སྲས་འོད་ལྡེ་བཙན་དང་བཀྲ་ཤིས་འོད། ཡོངས་སྲུང་ལྡེ་བཅས་གསུམ་ཡོད་པ་ལས་ཕྱི་མ་གཉིས་རབ་ཏུ་བྱུང་བ་ཕོ་བྲང་བྱང་ཆུབ་འོད་དང་ཞི་བ་འོད་གཉིས་ཡིན། ཐ་ཆུང་ཡོངས་སྲོང་ལྡེའམ་ཕོ་བྲང་ཞི་བ་འོད་དོ། །

[46] བོད་དུ་འགྱུར་བའི་ཀ་ལཱ་པའི་འགྲེལ་པ་དུར་སིང་དང་སློབ་ཕན་གཉིས་ཞེས་གྲགས་པའི་ཕྱི་མ་སྟེ་དཔང་ལོ་ཙཱ་བ་དང་ལོ་ཆེན་བྱང་རྩེ་གཉིས་ཀྱིས་རྫོགས་པར་བསྒྱུར་བ། ལུང་སྟོན་པ་ཀ་ལཱ་པའི་མདོའི་འགྲེལ་བ་སློབ་མ་ལ་ཕན་པ་ཞེས་བྱ་བ། བསྟན་འགྱུར་སྒྲ་མདོ་༼ལེ༽པར་བཞུགས།

[47] སློབ་དཔོན་བགྲོད་དཀའ་སེངྒེས་མཛད་པའི་ཀ་ལཱ་པའི་ཨུཎ་སོགས་ཀྱི་འགྲེལ་པ། བློ་བཟང་ནོར་བུ་ཤཱསྟྲཱིས་བསྒྱུར། ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གྲྭ།༡༩༩༦ གླེང་བརྗོད་ལྡེབ་ངོས།xxvii

[48] སྡེ་བསྟན། སྒྲ་མདོ་༼ལེ༽ ལྡེབ་༦༣པའི་ཉིན།

[49] གོང་མཚུངས་ལྡེབ༦༣པའི་ཉིན།

[50] ལྷ་བླ་མ་ཡེ་ཤེས་འོད་ཀྱི་རྣམ་ཐར་རྒྱས་པའི་མཆན་འགྲེལ། དོ་རྒྱ་དབང་དྲག་རྡོ་རྗེ། བོད་ལྗོངས་མི་དམངས་དཔེ་སྐྲུན་ཁང་། ལྡེབ་ངོས།༧༠

[51] རྗེ་དྷརྨ་བྷ་དྲས་མཛད་པའི་ཆོས་ཀྱི་རྣམ་གྲངས་ཀྱི་ཐོ་ཡིག །རོང་པ་མེ་དཔུང་། རོང་ཟོམ་ཆོས་བཟང་གི་གསུང་འབུམ་དེབ་གསུམ་པ། སི་ཁྲོན་མི་རིགས་དཔེ་སྐྲུན་ཁང་།༢༠༡༩ ལྡེབ་ངོས།༡༤༦

[52] རྐྱེན་གསུམ་བཤད་པ། ཉི་མའི་སྙིང་པོ། སྡེ་བསྟན། སྣ་ཚོགས།༼ནོ༽ ལྡེབ་༡༤༢པའི་ཉིན།

[53] གོང་མཚུངས་ལྡེབ་༡༤༩པའི་ཉིན།

[54] འབྲེལ་བ་གྲུབ་པ་ཞེས་བྱ་བའི་རབ་ཏུ་བྱེད་པ། པཎྜི་ཏ་ཉི་མའི་སྙིང་པོ། སྡེ་བསྟན། སྒྲ་མདོ།༼རེ༽

[55] ད་ལྟ་ལོ་ཚིགས་ངོས་འཛིན་མཁན་མང་པོས་ཇོ་བོ་རྗེ་གཙང་དུ་ཕེབས་སྐབས་རོང་ཟོམ་བྱིས་པ་ཆུང་ངུས་མཇལ་ཚུལ་ལ་གཞི་བཅོལ་བར་སྣང་ཡང་། ཇོ་ནང་གི་ཀུན་དགའ་གྲོལ་མཆོག་གི་སྔོན་དུ་དེའི་ཁུངས་མི་རྙེད་པ་དང་། དེ་བཞིན་རོང་ཟོམ་གྱི་སློབ་མ་ཡོལ་ལྕགས་རྡོ་རྗེ་དབང་ཕྱུག་ཇོ་བོ་རྗེའི་ལོ་ཙཱ་བ་ཡིན་པ་དང་། འབྲས་སྤུངས་གནས་བཅུ་ལྷ་ཁང་ནས་བྱུང་བའི་དཔེ་རྙིང་དུ་སེ་སྟོན་དབང་ཕྱུག་གཞོན་ནུའི་(འདི་སེ་བཙུན་ཡིན་དགོས།)སློབ་མར་བཤད་པ་སོགས་ཀྱིས། འཁྲུངས་ལོ་ལ་སླར་ཡང་དཔྱད་བྱ་ཆེ།

[56] གནས་བརྒྱད་ཆེན་པོའི་རྩ་བ། སྡེ་བསྟན། སྣ་ཚོགས།༼ཅོ༽ ལྡེབ་༡༦༥པའི་ཉིན།

[57] གོང་མཚུངས་དབུས་པ་བློ་གསལ་གྱི་གསུང་འབུམ། ལྡེབ་ངོས།༡༣༣

[58] སྒྲའི་རྣམ་པར་དབྱེ་བ་བསྟན་པ། བསྟན་འགྱུར་དཔེ་བསྡུར་མ། པོད་༡༡༥པ། སྣ་ཚོགས།༼ཅོ༽ ལྡེབ་ངོས།༤༤༣

[59] བརྡ་སྤྲོད་དཔེ་རྙིང་གཅེས་བཏུས། ཐུ་མི་སཾ་བྷོ་ཊ་སོགས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ལྡེབ་ངོས།༣༧

[60] གནས་བརྒྱད་ཀྱི་འགྲེལ་པ་ཐ་སྙད་རིག་པའི་ཐི་གུ་དང་སྤྲིན་གྱི་ཕོ་ཉའི་འགྲེལ་པ་གློག་ཕྲེང་མ། རཀ་ར་བཀྲས་མཐོང་ཐུབ་བསྟན་ཆོས་དར། དྷ་ས་རིགས་ལམ་སློབ་གཉེར་ཁང་ནས་དཔར་སྐྲུན་ཞུས། ལྡེབ་ངོས།༡

[61] བྱེ་བྲག་ཏུ་རྟོགས་པར་བྱེད་པ། སྡེ་བསྟན། སྣ་ཚོགས།༼ཅོ༽པར་བཞུགས། མཁན་པོ་ཚུལ་ཁྲིམས་བློ་གྲོས་ཀྱི་དེང་རབས་ཚིག་མཛོད་རིག་པའི་རྣམ་གཞག་གནད་བསྡུས་ལས། གཞུང་འདིར་སྡེ་ཚན་༢༧༥དང་ཁྱོན་བསྡོམས་ཐ་སྙད་༩༡༡༦རྒྱ་བོད་ཤན་སྦྱར་གྱིས་བསྟན་ཡོད་པ་དང་། སྒྲ་སྦྱོར་བམ་གཉིས་སུ་སྡེ་ཚན་༤༧ལ་ཐ་སྙད་༤༡༥ཙམ་རྩ་བའི་ཐ་སྙད་རྒྱ་བོད་ཤན་སྦྱར་དང་བོད་སྐད་ཀྱི་འགྲེལ་བཤད་སྦྲགས་ནས་བསྟན་ཡོད་པར་གསུངས། འབུམ་རམས་པ་བློ་བཟང་རྡོ་རྗེ་རབ་གླིང་གིས་བྱེ་བྲག་རྟོགས་བྱེད་ཆེན་མོ་ལ་ཤན་སྦྱར་གྱི་ཐ་སྙད་ཚིག་གྲངས་༩༥༦༥ཡས་མས་ཡོད་པར་གསུངས།

[62] སྒྲ་སྦྱོར་བམ་པོ་གཉིས་པ། སྡེ་བསྟན། སྣ་ཚོགས།༼ཅོ༽ ལྡེབ་༡༦༠པའི་ཉིན།

[63] ཚོགས་གསུམ་གསལ་བ། གོང་མཚུངས་དཔང་ལོའི་གསུང་འབུམ་དེབ་དང་པོ། ལྡེབ་ངོས།༦༨/༢༢

[64] ན་ག་སངས་རྒྱས་བསྟན་དར་གྱིས་བོད་ཀྱི་བརྡ་སྤྲོད་ནག་ཊིཀ་ཏུ་ཕོ་བྲང་ཞི་བ་འོད་ཀྱིས་སློབ་མ་ལ་ཕན་པ་བསྒྱུར་བའི་སྐོར་ཙམ་བྲིས་ཡོད། ཤོང་སྟོན་གྱིས་སྒྲ་གཞུང་བསྒྱུར་ཚུལ་གོང་དུ་དྲངས་པའི་བཻ་དཀར་སོགས་ཡིག་ཆ་ཅི་རིགས་ལས་གསལ།

དཔྱད་གཞིའི་ཡིག་ཆ་གཞན།

[1] བུ་སྟོན་ཆོས་འབྱུང་། བུ་སྟོན་རིན་ཆེན་གྲུབ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༩

[2] ཆོས་འབྱུང་མཁས་པའི་དགའ་སྟོན། དཔའ་བོ་གཙུག་ལག་ཕྲེང་བ། སེར་གཙུག་ནང་བསྟན་དཔེ་རྙིང་འཚོལ་བསྡུ་ཕྱོགས་སྒྲིག་ཁང་གིས་བསྒྲིགས།

[3] དེབ་ཐེར་སྔོན་པོ། འགོས་ལོ་གཞོན་ནུ་དཔལ། འཕྲུལ་དེབ། སེར་སྨད་འཇམ་དབྱངས་བསོད་ནམས་ཀྱིས་བསྒྲིགས།

[4] བཀའ་གདམས་ཆོས་འབྱུང་གསལ་བའི་སྒྲོན་མེ། ལས་ཆེན་ཀུན་དགའ་རྒྱལ་མཚན། བོད་ཀྱི་ལོ་རྒྱུས་རྣམ་ཐར་ཕྱོགས་བསྒྲིགས། པོད་༼ག༽པ་ཤིང་སྤར་མ། མཚོ་སྔོན་མི་རིགས་དཔེ་སྐྲུན་ཁང་། ༢༠༡༠

[5] རྒྱ་བོད་ཡིག་ཚང་ཆེན་མོ། སྟག་ཚང་དཔལ་འབྱོར་བཟང་པོ། སི་ཁྲོན་མི་རིགས་དཔེ་སྐྲུན་ཁང་། ༡༩༨༥

[6] དཔལ་ལྡན་ས་སྐྱའི་གདུང་རབས་འདོད་རྒུའི་རྒྱ་མཚོ། སྟག་ཚང་ལོ་ཙཱ་བ་ཤེས་རབ་རིན་ཆེན་གྱི་གསུང་འབུམ་པོད་དགུ་པ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༨

[7] ས་སྐྱའི་གདུང་རབས་ངོ་མཚར་རིན་པོ་ཆེའི་བང་མཛོད། ཨ་མེས་ངག་དབང་ཀུན་དགའ་བསོད་ནམས་ཀྱི་གསུང་འབུམ་པོད། ༼ཁ༽ ཨ་དརྴ།

[8] དཔལ་དུས་ཀྱི་འཁོར་ལོའི་ཆོས་འབྱུང་ལེགས་བཤད་སྒྲོན་མེ། བླ་མ་དམ་པ་བསོད་ནམས་རྒྱལ་མཚན་གྱི་གསུང་འབུམ་པོད་༡༢པ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༦

[9] སྦྱོར་བ་ཡན་ལག་དྲུག་གི་ངོ་སྤྲོད་སྦས་དོན་གསལ་བའི་སྒྲོན་མ། བླ་མ་དམ་པ་བསོད་ནམས་རྒྱལ་མཚན། གོང་མཚུངས།

[10] དཔལ་དུས་ཀྱི་འཁོར་ལོ་སྤྱི་དོན་གྱི་སྒོ་ནས་གཏན་ལ་འབེབས་པར་བྱེད་པའི་ལེགས་བཤད་བསྟན་པའི་རྒྱ་མཚོ། སྟག་ཚང་ལོ་ཙཱ་བ་ཤེས་རིན་ཆེན་གྱི་གསུང་འབུམ་པོད་དྲུག་པ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༨

[11] རྒྱུད་རྒྱལ་གཤིན་རྗེ་གཤེད་སྐོར་གྱི་ཆོས་འབྱུང་རྒྱས་པ་ཡིད་ཆེས་ངོ་མཚར་ཅན། ཇོ་ནང་ཏཱ་ར་ནཱ་ཐ། ༢༠༡༧ལོའི་དབུ་གཞན་སྟོང་འཛིན་གྲས་བསྒྲིགས།

[12] ཤེལ་དཀར་ཆོས་འབྱུང་། ཤེལ་དཀར་ངག་དབང་སྐལ་ལྡན་རྒྱ་མཚོ། བོད་ལྗོངས་མི་དམངས་དཔེ་སྐྲུན་ཁང་། ༢༠༡༢

[13] བོད་ཀྱི་ལོ་རྒྱུས་རགས་རིམ་གཡུ་ཡི་ཕྲེང་བ། ཆབ་སྤེལ་ཚེ་བརྟན་ཕུན་ཚོགས་དང་ནོར་བྲང་ཨོ་རྒྱན། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༢༤

[14] ས་པཎ་རྣམ་ཐར་འབྲིང་པོ་དང་། ས་པཎ་རྣམ་ཐར་བསྡུས་པ་ཡན་ལག་བདུན་ལྡན། ཡར་ཀླུང་གྲགས་པ་རྒྱལ་མཚན། ལོ་པཎ་གྱི་རྣམ་ཐར་ཕྱོགས་བསྒྲིགས་དེབ་དགུ་པ། ཀྲུང་གོའི་ཤེས་རིག་དཔེ་སྐྲུན་ཁང་། ༢༠༡༩

[15] བཅོམ་ལྡན་རིག་པའི་རལ་གྲིའི་རྣམ་ཐར་དད་པའི་ལྗོན་ཤིང་། བཙུན་པ་བསམ་གཏན་བཟང་པོ། བཅོམ་ལྡན་རིག་པའི་རལ་གྲིའི་གསུང་འབུམ་པོད་དང་པོ། སི་ཁྲོན་ཞིང་ཆེན་བོད་ཡིག་དཔེ་རྙིང་བསྡུ་སྒྲིག་ཁང་གི་ནང་ཁུལ་ཡིག་ཆ།

[16] བོ་དོང་པཎ་ཆེན་འཇིགས་མེད་གྲགས་པའི་རྣམ་ཐར། རྩོམ་མཁན་མི་གསལ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༦

[17] དཀར་ཆག་འཕང་དང་དཀར་ཆག་ལྡན་དཀར་སོགས་བཞུགས་སོ། །ཁམས་སྤྲུལ་བསོད་ནམས་དོན་གྲུབ་ཀྱིས་བསྒྲིགས་ཤིང་ཞུས་དག་མཛད། སི་ཁྲོན་མི་རིགས་དཔེ་སྐྲུན་ཁང་། ༢༠༢༢

18] བསྟན་བཅོས་འགྱུར་རོ་འཚལ་གྱི་དཀར་ཆག་དྲི་མེད་འོང་ཀྱི་ཕྲེང་བ། ཆོས་རྗེ་ཕྱོགས་ལས་རྣམ་རྒྱལ་གྱི་གསུང་འབུམ་པོད་༧པ།༼ཇ༽ ཨ་དརྴ།

[19] སི་ཏུ་པཎ་ཆེན་ཆོས་ཀྱི་འབྱུང་གནས་ཀྱི་བཀའ་འབུམ།༼ཀ༽ སི་ཁྲོན་མི་རིགས་དཔེ་སྐྲུན་ཁང་། ༢༠༡༤

[20] ཤོང་དཔང་ཞལ་ལུང་མེ་ལོང་རྣམ་བཤད། རཀ་ར་བཀྲས་མཐོང་ཐུབ་བསྟན་ཆོས་དར། བོད་ཀྱི་དཔེ་མཛོད་ཁང་། ༢༠༠༧

[21] བོད་ཀྱི་བརྡ་སྤྲོད་ནག་ཊཱིཀཿ། སྐད་ཡིག་དེབ་ཕྲེང་༦པ། ན་ག་སངས་རྒྱས་བསྟན་དར། གངས་ལྷུན་པོའི་རིག་གནས་ཁྱབ་སྤེལ་ལྟེ་གནས། ༢༠༡༨

[22] སྨྲ་སྒོ་མཚོན་ཆའི་འབྲུ་འགྲེལ་ཅུང་ཟད་གསལ་བར་བྱེད་པ། བེ་རི་དགེ་བཤེས་འཇིགས་མེད་དབང་རྒྱལ། གངས་ཅན་རིག་མཛོད་དཔེ་ཁང་།

[23] བོད་སྐད་ཀྱི་བརྡ་སྤྲོད་གསར་བསྒྲིགས་སྨྲ་སྒོའི་ལྡེ་མིག།།གླང་རི་བ་ཐུབ་བསྟན་སྦྱིན་པ། བོད་ཀྱི་གཙུག་ལག་ཞིབ་དཔྱོད་ཁང་། ༢༠༡༠

[24] སྒྲ་རིག་ཊཱིཀ་ཆུང་དོན་གནད་གསལ་བའི་མེ་ལོང་། དུད་བླ་བུ་ཆུང་། མི་རིགས་དཔེ་སྐྲུན་ཁང་། ༢༠༢༢

[25] བོད་ཀྱི་བཤད་གྲྭ་ཆེན་མོ། གསང་ཕུ་ནེའུ་ཐོག་གི་བྱུང་བ་དང་ད་ལྟའི་གནས་བབ། དོ་རྒྱ་དབང་གྲགས་རྡོ་རྗེ། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༢༣

[26] བཀའ་གདམས་པའི་ལོ་རྒྱུས་ཡིག་ཚང་ཞིབ་འཇུག །གྲ་བཞི་མིག་དམར་ཚེ་རིང་། བོད་ལྗོངས་མི་དམངས་དཔེ་སྐྲུན་ཁང་། ༢༠༢༤

[27] གུ་གེ་རྒྱལ་རབས་ཀྱི་དར་རྒུད་ལོ་རྒྱུས་ཞིབ་འཇུག །གུར་མགོན་སྐྱབས། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༢༣

[28] སྙན་ངག་སྤྲིན་གྱི་ཕོ་ཉའི་འགྱུར་ལ་དཔྱད་པ། ཟླ་བ་གཞོན་ནུ། བོད་རིག་པ་དྲྭ་ཚིགས།

https://bodrigpa.org/archives/3867 ༢༠༢༤ལོར་བཀླགས།

[29] ལེགས་སྦྱར་སོགས་ནས་བོད་སྐད་དུ་བཀའ་བསྟན་ཕབ་བསྒྱུར་གྱི་བྱུང་བ་དང་བསྒྱུར་ཚུལ་བརྗོད་པ། འབུམ་རམས་པ་དགེ་བཤེས་བློ་བཟང་རྡོ་རྗེ་རབ་གླིང་། བོད་རིག་པ་དྲྭ་ཚིགས།

https://bodrigpa.org/archives/5146?amp=1 ༢༠༢༥ལོའི་ཟླ་༡༠པར་བཀླགས།

– – – – –