[ནང་དོན་གནད་བསྡུས།] མདོ་དང་སྔགས་ཀྱི་ལྟ་བ་སོ་སོའི་ངོ
[བརྡ་ཆད་གཙོ་བོ།] ལྟ་བ། མདོ་སྔགས། ཕྱི་རྒྱུད་སྡེ་གསུམ། ནང་རྒྱུད་སྡེ་གསུམ།
ཀ་དག་ཆོས་དབྱིངས་སྟོང་པའི་ཐིག་ལེ་རུ།།
རྣམ་པར་བཟླུམས་པའི་རང་བྱུང་བྱང་ཆུབ་སེམས།།
རང་བཞིན་འོད་གསལ་མཁྱེན་རབ་ཡེ་ཤེས་སྐུ།།
ངེས་དོན་སེམས་ཉིད་དཔའ་བོར་ཕྱག་འཚལ་ལོ།།
བདེ་གསལ་མི་རྟོག་ཆོས་སྐུའི་དགོངས་པ་ལས།།
རང་སྣང་ལོངས་སྤྱོད་རྫོགས་སྐུའི་ཞིང་སྣང་གསལ།
ཀུན་ཁྱབ་བདེ་ཆེན་ཡེ་ཤེས་རྫོགས་པའི་དཔལ།།
རྒྱལ་དབང་ཀློང་ཆེན་རབ་འབྱམས་རྒྱལ་གྱུར་ཅིག།
འོད་གསལ་གཉུག་མའི་ཡེ་ཤེས་འབར་བའི་ཁམས།།
རྣམ་པར་མི་རྟོག་རིག་པའི་རྩལ་ཆེན་གྱིས།།
ཟབ་ལམ་མདོ་རྒྱུད་དགོངས་པའི་སྐྱེལ་སོ་ཀུན།།
གཅིག་ཏུ་དྲིལ་མཛད་འཇམ་མགོན་བླ་མ་དྲན།།
དེ་ལ་འདིར་མདོ་སྔགས་ཀྱི་ཟབ་མོ་ལྟ་བའི་རྣམ་གཞག་ལ་རགས་དཔྱད་ཀྱི་སྒོ་ནས་འཇུག་པ་ལ་ས་བཅད་བཞིར་ཕྱེས་པ་ལས། དང་པོ་མདོ་སྔགས་ཀྱི་ལྟ་བ་སོ་སོའི་ངོས་འཛིན་ནི། དེ་ཡང་འོད་གསལ་སྙིང་པོ་ལས། མདོ་སྔགས་ཀྱི་ལྟ་བ་ལ་ཁྱད་པར་ཡོད་དམ་མེད་ཅེ་ན། གཞལ་བྱ་ཆོས་དབྱིངས་སྤྲོས་བྲལ་དུ་གཏན་ལ་འབེབས་པ་ཙམ་ལ་ཁྱད་མེད་ཀྱང་། ཆོས་དབྱིངས་མཐོང་ཚུལ་གྱི་ཡུལ་ཅན་ལ་ཁྱད་ཡོད་ལ། ལྟ་བ་ནི་ཡུལ་ཅན་གྱི་ངོས་ནས་འཇོག་པས་ན་ཁྱད་ཤིན་ཏུ་ཆེའོ།། ཞེས་གསུངས་པ་ལྟར་ལྟ་བའི་ཡུལ་སྟོང་ཉིད་ཀྱི་ཆ་ལ་མི་མཚུངས་པ་མེད་ཀྱང་། མདོ་སྔགས་གཉིས་ཀྱི་ལྟ་བ་ཐོག་མར་སྐྱེས་པའི་མཚམས་མི་འདྲ་བར་སོ་སོར་འཇོག་དགོས་པ་ཡིན་པའི་ཕྱིར་རོ།། དང་པོ་མདོ་ཕར་ཕྱིན་ཐེག་པས་གཏན་ལ་ཕབ་པའི་ཡུལ་སྟོང་ཉིད་རྣམ་གྲངས་མ་ཡིན་པའི་དོན་དམ་བདེན་པ་དང་། སྔགས་ལུགས་ཀྱི་དག་མཉམ་གཉིས་ལས་ཟླས་དྲངས་པའི་མཉམ་པ་གཉིས་ལ་ཁྱད་མེད་པར་འདོད་པ་ཡིན་ཏེ། འོད་གསལ་སྙིང་པོ་ལས། དེ་ལ་ལྟ་བས་གཏན་ལ་དབབ་བྱའི་ཡུལ་ཆོས་དབྱིངས་དེ་བཞིན་ཉིད་གཅིག་མིན་ན། ཆོས་རྣམས་ཀྱི་དེ་བཞིན་ཉིད་ལ་རིགས་མི་འདྲ་བ་ཡོད་པར་ཐལ་བ་དང་། མདོ་ཡི་མཐོང་ལམ་གྱིས་དེ་བཞིན་ཉིད་མ་མཐོང་བར་ཐལ་བ་དང་། མཐའ་བཞིའི་སྤྲོས་པ་ལས་ལྷག་པའི་སྤྲོས་པ་གཅོད་རྒྱུ་རིགས་པས་གྲུབ་དགོས་པས་ན། མདོ་སྔགས་ཀྱི་མཐོང་ལམ་ཆོས་ཉིད་མངོན་སུམ་དུ་མཐོང་བ་ལ་གནད་གཅིག་པར་མཁས་གྲུབ་ཐམས་ཅད་བཞེད་པ་མཐུན་ནོ།། ཞེས་གསུངས་པས་སོ།།
གཉིས་པ་མཚམས་སོ་སོར་འཛིན་དགོས་ཏེ། མདོ་ལམ་ནས་གཏན་ལ་དབབ་བྱའི་ཡུལ་སྟོང་ཉིད་དེ་རྗེས་དཔོག་གི་ལམ་ནས་རྟོགས་པ་ནས་མདོའི་ལྟ་བ་རྟོགས་པར་བཤད་ཆོག་ཅིང་། སྔགས་ལམ་ནས་རྟོགས་བྱའི་དོན་དེ་མྱོང་བའི་སྒོ་ནས་རྟོགས་པ་སྟེ་སྔགས་ལམ་གྱི་ཐབས་ཁྱད་པར་བས་ཟིན་སྟོབས་ཀྱིས་ཡུལ་ལ་ངེས་པ་རྙེད་པའི་མྱོང་བ་ཞིག་ལ་འཇོག་དགོས་པ་འདྲ་སྟེ། འོད་གསལ་སྙིང་པོ་ལས། དང་པོ་མདོ་ལམ་དུ་ཆོས་དབྱིངས་དེ་རྗེས་དཔག་ལ་བརྟེན་ནས་ཡིད་དཔྱོད་ཀྱིས་སྒོམ་ཞིང་། ཚོགས་རྒྱ་ཆེན་པོ་བསགས་པ་དང་བཅས་པས་གདོད་རིང་པོ་ཞིག་ན་མངོན་དུ་རྟོགས་པར་བྱ་བ་དེ། འདིར་རང་གི་སེམས་ཉིད་ཀྱི་སྟེང་དུ་ཡིད་དཔྱོད་དང་བྲལ་བར་ཐད་ཀར་མྱོང་བའི་ཚུལ་གྱིས་རྟོགས་ནུས་པ་སྟེ། དེ་ཡང་དབང་གིས་སྨིན་པར་བྱས་པ་དང་། མན་ངག་གི་གནད་ཁྱད་པར་ཅན་དང་ལྡན་པའི་སྟོབས་ཀྱིས་གནས་ལུགས་ལ་གསལ་སྣང་ཐོབ་པ་ནི། མིག་སྨན་ལ་སོགས་པའི་སྦྱོར་བས་རྒྱང་རིང་པོའི་གཟུགས་གསལ་བར་མཐོང་བའམ། འཁྲུལ་འཁོར་གཅད་པའི་གནད་ལ་མཁས་པས་གསང་ཐག་བཀྲོལ་བ་ལ་སོགས་པ་བཞིན་ནོ།། ཞེས་གསུངས་སོ།། དེས་ན་ཚོགས་སྦྱོར་གྱི་གནས་སྐབས་སུ་མདོ་སྔགས་ཀྱི་ལྟ་བ་འདི་གཉིས་མ་འདྲེས་པའི་སྒོ་ནས་སོ་སོར་གནས་པའི་ཚུལ་འོག་ཏུ་དྲངས་པའི་ལུང་འགའ་ཞིག་གིས་ཀྱང་གསལ་ལོ།། སྤྱིར་མདོ་དང་སྔགས་ཀྱི་ཐུན་མོང་མ་ཡིན་པའི་ཁྱད་པར་འབྱེད་བྱེད་ནི། ཀུན་རྫོབ་ལམ་དུ་བྱེད་པ་དང་མི་བྱེད་པའི་ཁྱད་པར་གྱིས་སོ་སོར་འབྱེད་པ་ཡིན་ཏེ། གསང་བདག་ཞལ་ལུང་། ཡང་གོང་མ་རྣམས། ཀུན་རྫོབ་ལམ་དུ་བྱེད་ནུས་པ་དང་མི་ནུས་པའི་ཁྱད་པར་ཡོད་པར་བཞེད་དེ། ཕ་རོལ་ཏུ་ཕྱིན་པས་དོན་དམ་བསྒྲུབ་བྱ་དང་། ཀུན་རྫོབ་སྤང་བྱར་བྱེད་ལ། སྔགས་ལས་ནི་ཀུན་རྫོབ་ཏུའང་ཆོས་ཐམས་ཅད་མཉམ་པ་ཉིད་དུ་སྤྱོད་པས་ན། མི་སྤོང་བར་ལམ་དུ་བྱེད་པའི་ཕྱིར། བདེན་གཉིས་ཕྱོགས་སུ་མ་ལྷུང་བས་འཕགས་ཏེ། ཞེས་དང་། ཡང་དེ་ཉིད་ལས། ཚུལ་དེས་ཀྱང་འབྲས་བུ་ལམ་བྱེད་དུ་འགྱུར་ཏེ། ཆོས་ཐམས་ཅད་དབྱེར་མེད་འབྲས་བུའི་ངོ་བོ་སྣང་སྟོང་ཟུང་འཇུག་གི་ཆོས་སྐུར་ལྟ་ཞིང་ཐབས་ཀྱིས་གོམས་པར་བྱེད་པའི་ཕྱིར་རོ།། ཞེས་གསུངས་པས་སོ།།
ཀུན་རྫོབ་ལམ་དུ་བྱེད་ཚུལ་ནི། གཞི་ཀུན་རྫོབ་ཀྱི་ཆོས་རྣམས་དག་པ་སྐུ་དང་ཡེ་ཤེས་སུ་ད་ལྟ་ནས་དག་པའམ་དེ་ལྟར་བསྒྱུར་དུ་ཡོད་པ་གང་རུང་དུ་ལྟ་བའི་ལམ་ཞིག་ལ་འཇོག་དགོས་ཏེ། གསང་བདག་ཞལ་ལུང་ལས། དེའང་སྔགས་ཕྱི་པས་ལྷའི་སྐུ་གསུང་ཐུགས་སུ་བལྟས་ཏེ་བསྒོམ་པ་དང་། ནང་པ་ལྟར་ན་ཆོས་ཐམས་ཅད་སྐུ་གསུང་ཐུགས་ཀྱི་དཀྱིལ་འཁོར་གྱི་རང་བཞིན་དུ་རྟོགས་ནས་གོམས་པར་བྱེད་པའི་ཕྱིར་ན་འབྲས་བུ་ལམ་བྱེད་དང་རྡོ་རྗེ་ཐེག་པའི་ངེས་ཚིག་གྲུབ་སྟེ། ཞེས་གསུངས་པ་ལྟར་སྔགས་ཕྱི་པས་ཀུན་རྫོབ་ཀྱི་ཆོས་རྣམས་ཐབས་ཀྱི་སྟོབས་ལས་སྐུ་གསུང་ཐུགས་ཀྱི་ཡོན་ཏན་རྫོགས་པའི་ཆོས་སུ་བསྒྱུར་དུ་ཡོད་པར་བལྟས་པའམ་མོས་ཏེ་བསྒོམས་པ་དང་། ནང་པས་ད་ལྟ་ནས་དག་པར་རྟོགས་ནས་བསྒོམས་པར་གསུངས་པའི་ཕྱིར་རོ།། དེ་ལྟར་མི་བྱེད་པར་ཀུན་རྫོབ་དང་དོན་དམ་ལ་སྤང་བླང་བླང་དོར་དང་བཅས་པའི་སྒོ་ནས་ལམ་བགྲོད་པར་འདོད་པའི་ལུགས་ནི་མདོ་མཚན་ཉིད་ཐེག་པའོ།། དེས་ན་རྒྱུ་ལམ་དུ་བྱེད་པ་མདོ་དང་འབྲས་བུ་ལམ་དུ་བྱེད་པའི་སྔགས་ཀྱི་ལྟ་བར་འཇོག་པ་ཡིན་ནོ།། དེ་ཡང་ཕྱི་རྒྱུད་པས་ཀུན་རྫོབ་འབྲས་བུའི་ཆོས་སུ་བསྒྱུར་དུ་ཡོད་པར་ལྟ་བའི་ཚུལ་དེ་ནི། མདོ་ཕར་ཕྱིན་ཐེག་པས་སློབ་པ་བའི་རྒྱུད་ཀྱི་ཀུན་རྫོབ་སེམས་འདིའི་རྫས་རྒྱུན་ཕྱི་མ་འབྲས་བུ་མི་སློབ་པའི་ལམ་དུ་འགྱུར་དུ་ཡོད་པའི་གོ་བ་ཙམ་དང་མི་འདྲ་བར། ཐབས་ཁྱད་པར་བས་ཟིན་ན་རྫས་རྒྱུན་ཕྱི་མ་འཕོས་པ་ཙམ་ཡང་མིན་པ་དང་སློབ་པའི་སེམས་འདིས་ཀྱང་མི་ཚད་པར་ཀུན་རྫོབ་ཀྱི་ཆོས་ཀུན་ངོ་བོ་དག་པའི་རང་བཞིན་དུ་བསྒྱུར་ཐུབ་པར་ལྟ་བས་འདི་གཉིས་ལ་ཁྱད་པར་ཆེའོ།། མདོ་ཕར་ཕྱིན་པས་ཀུན་རྫོབ་ཀྱི་སེམས་འདི་ལ་ཡང་ཉོན་ཤེས་ཀྱི་སྒྲིབ་པའི་ཆ་ཕྱེས་ཏེ་སྤང་གཉེན་མཚན་ཉིད་པ་ཁས་ལེན་པའི་ཕྱིར་རོ།།
གཉིས་པ་ཕྱི་རྒྱུད་སྡེ་གསུམ་གྱིས་དག་མཉམ་བདེན་པ་གཏན་ལ་ཕབ་ཡོད་མེད་ལ་དཔྱད་པ་ནི།
ཕྱི་རྒྱུད་སྡེ་གསུམ་གྱི་རང་ལམ་ནས་དག་མཉམ་བདེན་པ་དབྱེར་མེད་གཏན་ལ་ཕབ་མེད་དེ། ཀུན་རྫོབ་ཀྱི་ཆོས་རྣམས་ཐབས་ལ་བརྟེན་ནས་འབྲས་བུའི་ཆོས་སུ་བསྒྱུར་དུ་ཡོད་པར་འདོད་པ་ལས། ཆོས་རང་ངོས་ནས་དག་པ་ཡེ་ཤེས་སུ་མི་འདོད་པས་དག་པ་མཚན་ཉིད་པ་གཏན་ལ་དབབ་ཐུབ་མེད་དེ། དག་མཉམ་ལས་ཟླས་དྲངས་བའི་དག་པ་དེ་ཀུན་རྫོབ་རང་ངོས་ནས་དག་པ་ཉིད་དུ་ཁས་ལེན་དགོས་པའི་ཕྱིར་ཏེ། འོད་གསལ་སྙིང་པོ་ལས། སྟོང་ཉིད་མཉམ་པ་ཆེན་པོའི་རང་བཞིན་དུ་མ་གྱུར་པའི་ཆོས་འགའ་ཡང་མེད་པའི་ཕྱིར་སྣང་སྲིད་ཐམས་ཅད་ཡེ་ནས་དག་པ་ཆེན་པོར་གྲུབ་བོ།། འདིའི་དག་ཚུལ་དེ་ཆོས་རྣམས་མ་གྲུབ་པའི་སྟོང་ཆ་ནས་དག་པར་བརྗོད་པ་ཙམ་མིན་གྱི་སྟོང་པ་དང་དབྱེར་མེད་པའི་ཕྱིར་ཇི་ལྟར་སྣང་བ་ཉིད་ཀྱང་ཡེ་ནས་དག་པ་ཀུན་བཟང་བདེ་བ་ཆེན་པོར་བསྟན་པ་ཡིན་ནོ།། ཞེས་གསུངས་སོ།།
དེས་ན་ཕྱི་རྒྱུད་པ་རྣམས་ཀྱིས་ཀུན་རྫོབ་ཀྱི་ཆོས་རྣམས་ད་ལྟ་ཉིད་ནས་དག་པ་ཉིད་དུ་མི་འདོད་པར་དག་པའི་གཞི་ཉིད་དུ་འདོད་པ་སྟེ། ཕྱོགས་བཅུའི་མུན་སེལ་ལས། གསང་སྔགས་ཐུན་མོང་པས་དག་བྱར་མཐོང་བ་དང་། ཐུན་མོང་མ་ཡིན་པས་བླང་བྱར་མཐོང་བ་ནི་དཔེར་ན། གསེར་ལས་བྱས་པའི་རང་བཞིན་གཅིག་ལ། ཆོལ་ཟངས་སུ་བྱས་ཚེ་བཙོག་པ་དང་། གཞོང་པར་བྱས་པའི་ཚེ་གཙང་བ་དང་། གདུ་བུར་བྱས་པའི་ཚེ་རྒྱན་དང་། ལྷའི་སྐུ་གཟུགས་སུ་བྱས་པའི་ཚེ་མཆོད་པའི་རྟེན་དུ་བྱེད་པ་བཞིན་དུ། རྐྱེན་གྱིས་ཐེག་པ་སོ་སོས་དེ་ལྟར་མཐོང་ཡང་ངོ་བོ་ཡེ་ནས་དག་པའི་ཡེ་ཤེས་ཡིན་པས། གཞི་ལམ་འབྲས་བུའི་ཆོས་སུ་ཉོན་མོངས་པ་དེ་ཉིད་འགྱུར་བས་སྤང་བར་བྱ་བ་མ་ཡིན་པའི་རྒྱུ་མཚན་འཐད་པ་དང་བཅས་པའོ།། ཞེས་གསུངས་པས་གསང་སྔགས་ཐུན་མོང་པ་ཕྱི་རྒྱུད་སྡེ་གསུམ་གྱིས་དག་བྱ་སྟེ་ལྕགས་ལ་གསེར་འགྱུར་གྱི་རྩི་བགོས་པས་གསེར་དུ་བསྒྱུར་དུ་ཡོད་པ་ལྟར་དག་པའི་གཞི་རུ་འདོད་པ་སྟེ། རང་ངོས་ནས་སམ་ད་ལྟ་ནས་དག་པའི་རང་བཞིན་དུ་འདོད་པ་ནི་སྔགས་ནང་པ་བ་ཡིན་པར་ཕྱེས་པའི་ཕྱིར་ཏེ། ཕྱོགས་བཅུའི་མུན་སེལ་ལས། དེའང་ཐུན་མོང་གི་རྒྱུད་དུ་སྦྱང་གཞི་མ་དག་པ་སྦྱངས་པས་དག་པའི་ཡེ་ཤེས་འདོད་ཀྱང་། གསང་བ་སྒྱུ་འཕྲུལ་ནི་ཐམས་ཅད་དག་པའི་རང་བཞིན་གཅིག་ཏུ་གནས་པར་འདོད་དོ།། ཞེས་གསུངས་པ་དང་། ཡང་འོད་གསལ་སྙིང་པོ་ལས། ལྷའི་མཚན་མ་སྐུ་དང་སྔགས་སོགས་ལ་གཞུང་ལས་བསྟན་པ་ལྟར་ཚུལ་བཞིན་དུ་ཞུགས་པའི་ཐབས་ཀྱིས་མྱུར་བ་ཉིད་དུ་བདག་ཉིད་ལྷའི་ངོ་བོར་སངས་རྒྱས་པར་བྱེད་པ་གསེར་འགྱུར་གྱི་རྩིས་ལྕགས་གསེར་དུ་བྱེད་པ་བཞིན་དུ་རྟོགས་པའི་རྣམ་པ་དག་པ་གཞིར་བྱས་ནས། ཞེས་བྱ་རྒྱུད་ཀྱི་ལྟ་བ་དང་སྦྱར་ཏེ་གསུངས་པ་ལྟར་རོ།།
དེ་བཞིན་དུ་ཀུན་མཁྱེན་མི་ཕམ་པས་མཛད་པའི་ཡིད་བཞིན་མཛོད་ཀྱི་གྲུབ་བསྡུས་ལས་ཀྱང་། དག་མཉམ་བླང་དོར་མེད་པར་ལྟ་བའི་དབང་གིས་བསྐྱེད་རྫོགས་ཟུང་འཇུག་རེས་འཇོག་མེད་པར་སྒོམ་པ་ནང་པ། དེ་མི་ནུས་པ་ཕྱི་པ་ཡིན། ཞེས་གསུངས་པ་དང་། དེ་བཞིན་དུ་ཐེག་མཆོག་མཛོད་འགྲེལ་ལས་ཀྱང་། ཕྱི་པས་ལྟ་བ་བདེན་པ་དབྱེར་མེད་མ་རྟོགས་ལ། ནང་པས་རྟོགས་པས་ཀྱང་འཕགས་པ་ཡིན་ནོ།། ཞེས་གསུངས་པའི་ཕྱིར་རོ།། དེ་བཞིན་དུ་གསང་བདག་ཞལ་ལུང་ལས། འདིར་ཐུགས་སྲས་ཀ་བ་བཞིའི་དགོངས་པ་རྗེ་སྒྲོ་ཕུག་པས་བསྡུས་ནས་ལྔར་གསུངས་ཏེ། དང་པོ་ལྟ་བའི་ཁྱད་པར་ནི། སྔགས་ཀྱི་ཐེག་པ་གང་ཞིག་སེམས་ཉིད་བདག་ཉིད་ཆེན་པོར་རྟོགས་པ་ནང་པ། མ་རྟོགས་པ་ཕྱི་པ་སྟེ། ཨིནྡྲ་བྷཱུ་ཏིའི་ལམ་རྣམ་བཀོད་ལས། རིགས་གསུམ་རིགས་ལྔར་འདོད་པ་དག། བདག་ཉིད་ཆེན་པོ་མ་རྟོགས་ཕྱིར།། ཐུན་མོང་མཉམ་པར་ང་སྨྲའོ།། ཞེས་གསུངས་པའི་སེམས་ཉིད་བདག་ཉིད་ཆེན་པོར་རྟོགས་དང་མ་རྟོགས་ཞེས་པའི་དོན་དེ། དག་མཉམ་བདེན་པ་དབྱེར་མེད་པའི་དོན་རྟོགས་དང་མ་རྟོགས་ལས་གཞན་མེད་པའི་ཕྱིར་རོ།། གཞན་ཡང་། སྔགས་ཕྱི་ནང་གཉིས་ལ་ད་ལྟ་ཉིད་ནས་དག་པ་ཁས་ལེན་དང་མི་ལེན་གྱི་ཁྱད་པར་ཡོད་ཚུལ་རྒྱས་པར་གསུངས་ཏེ། གསང་བདག་ཞལ་ལུང་ལས། དེའང་སྔགས་ཕྱི་པས་ལྷའི་སྐུ་གསུང་ཐུགས་སུ་བལྟས་ཏེ་བསྒོམ་པ་དང་། ནང་པ་ལྟར་ན་ཆོས་ཐམས་ཅད་སྐུ་གསུང་ཐུགས་ཀྱི་དཀྱིལ་འཁོར་གྱི་རང་བཞིན་དུ་རྟོགས་ནས་གོམས་པར་བྱེད་པའི་ཕྱིར་ན་འབྲས་བུ་ལམ་བྱེད་དང་རྡོ་རྗེ་ཐེག་པའི་ངེས་ཚིག་གྲུབ་སྟེ། ཞེས་གསུངས་པ་ལྟར། སྔགས་ཕྱི་པས་ཀུན་རྫོབ་ཀྱི་ཆོས་རྣམས་ཐབས་ཀྱི་སྟོབས་ལས་སྐུ་གསུང་ཐུགས་ཀྱི་ཡོན་ཏན་རྫོགས་པའི་ཆོས་སུ་བསྒྱུར་དུ་ཡོད་པར་བལྟས་པའམ་མོས་ཏེ་བསྒོམས་པ་དང་། ནང་པས་གཞི་དུས་སུ་དེ་ལྟར་ཡོད་པར་རྟོགས་ནས་བསྒོམས་པར་གསུངས་པ་ལྟར་ན། ཕྱི་རྒྱུད་པས་ཀུན་རྫོབ་ཀྱི་ཆོས་རྣམས་རང་ངོས་དག་པ་གཏན་ལ་ཕབ་མེད་དོ།།
དེས་ན་འོད་གསལ་སྙིང་པོ་ལས། ལྟ་བ་ཐམས་ཅད་ཀྱི་ཡང་རྩེ། གྲུབ་མཐའ་ཐམས་ཅད་ཀྱི་མཐར་ཐུག ལམ་ཐམས་ཅད་ཀྱི་སྐྱེལ་སོ། ཐེག་པ་བླ་ན་མེད་པ་འདི་པའི་ལུགས་ཀྱི་ལྟ་བ་ཐུན་མོང་མིན་པ་ནི། སྣང་སྲིད་དག་མཉམ་ཆེན་པོར་ངེས་པའི་བློ་ཡིན་ནོ།། ཞེས་གསུངས་པ་ཡང་སྔགས་བླ་མེད་ཀྱི་ལྟ་བར་སྦྱོར་དགོས་པའོ།། དེ་བཞིན་དུ་གསང་བདག་དགོངས་རྒྱན་ལས། ཉོན་མོངས་པ་ལྷ་དང་ཡེ་ཤེས་སུ་སྒྱུར་བའི་ཐབས་ལ་བརྟེན་ནས་དེ་དག་གིས་མི་གོས་སོ་ཞེས་སྟོན་པ་ཀྲྀ་ཡོག་སྡེ་གསུམ་གྱི་ཐེག་པ་དང་། ཀུན་རྫོབ་ཏུ་བཏགས་པའི་ཡོད་པར་འཛིན་པའང་ཆེར་ཟད་དེ་ལས་དང་ལས་ཀྱི་འབྲས་བུ་བདག་ཉིད་ཆེན་པོའི་རོལ་པར་རྟོགས་པས་ཉོན་མོངས་པ་ལྔ་ཉིད་ཡེ་ཤེས་ལྔའི་རང་མདངས་སུ་ཤེས་ཏེ་སྤང་གཉེན་གཉིས་མེད་པས་ན་གོས་པར་མི་འགྱུར་ཏེ། ཇི་ལྟར་སྤྱད་ཀྱང་ཡོན་ཏན་དུ་འཆར་བ་སྔགས་ནང་པ་གཉིས་ལ། ཞེས་དང་། དེ་བཞིན་དུ་འོད་གསལ་སྙིང་པོ་ལས། ཡང་འཁྲུལ་སྣང་རྟེན་འབྲེལ་གྱི་སྣང་བ་དེ་ཉིད་ལས་འབྲས་བསླུ་མེད་ཀྱི་ཚུལ་དུ་ཤར་ཡང་ལྷ་སྔགས་ཀྱི་ཐབས་མང་པོ་ལ་བརྟེན་ན་མྱུར་དུ་དེ་ལས་གྲོལ་བ་སྟེར་གྱི་སྲིད་པའི་ལས་དང་ལས་ཀྱི་འབྲས་བུས་མི་གོས་ཞེས་སྟོན་པ་ཕྱི་རྒྱུད་སྡེ་གསུམ་གྱི་གྲུབ་མཐའ་དང་། ཡང་སྡུག་བསྔལ་ཉིད་བྱང་ཆུབ། ཉོན་མོངས་ཉིད་རྣམ་གྲོལ་གྱི་ཡེ་ཤེས་སུ་ཆེན་པོར་རྟོགས་ནས་ལམ་སྦྱངས་ན་ལས་འབྲས་ཀྱིས་གོས་པར་མི་འགྱུར་བར་སྟོན་པ་རྣལ་འབྱོར་བླ་མེད་སྤྱི་ཡི་གྲུབ་མཐའ་དང་། ཞེས་གསུངས་པ་བཞིན་ཤེས་པར་བྱའོ།། མཛོད་ལྡེ་ལས། བླ་མེད་ཀྱི་རྒྱུད་ནས་གསུངས་པའི་གཉུག་སེམས་དང་འཁོར་ལོ་ཐ་མ་ནས་བསྟན་པའི་གཤེགས་སྙིང་གཉིས་མིང་མི་འདྲ་ཡང་དོན་གཅིག་ལ། དོན་དེ་འགྲོ་བ་ཐམས་ཅད་ལ་ཁྱབ་པར་བཞུགས་ཀྱང་གཟུང་འཛིན་འཁྲུལ་པའི་སེམས་ཀྱིས་བསྒྲིབས་ནས་མ་མཐོང་བ་ཡིན་པས། དེ་མངོན་དུ་བྱེད་པ་ལ་འཁྲུལ་བའི་སེམས་འདི་སྦྱང་དགོས་པར་བཞེད་པ་ལའང་མདོ་སྔགས་ཁྱད་མེད་མོད་ཀྱི། སྦྱང་ཚུལ་མི་འདྲ་སྟེ་མདོ་སྡེར་མ་ཟད་རྣལ་འབྱོར་རྒྱུད་མན་ཆད་དུའང་སེམས་རགས་པ་འདི་ཉིད་ཁོ་ནའི་སྟེང་ནས་ཟབ་ཅིང་རྒྱ་ཆེའི་ལམ་བསྒོམས་ཏེ་རིམ་གྱིས་རྣམ་པར་མི་རྟོག་པའི་དབྱིངས་སུ་སྦྱངས་ནས། མཐར་གཤེགས་སྙིང་དངོས་ལ་རེག་པར་སྟོན་པ་ཤ་སྟག་ཡིན་ལ། ཞེས་པ་ལྟར་ན་ཕྱི་རྒྱུད་པས་སེམས་རགས་པ་འདི་ཉིད་དག་གཞིར་བཟུང་སྟེ་དེའི་སྟེང་ནས་ལམ་བསྒོམས་ཏེ་རིམ་གྱིས་འབྲས་བུ་ལ་སྦྱོར་ཞེས་གསུངས་པ་ལྟར། དག་པ་སྦྱངས་ཚུལ་ཡང་རིམ་གྱིས་པའི་ལམ་ལ་ལྟོས་དགོས་པར་གསུངས་པ་ལྟར་འཐད་པར་འདོད་དོ།།
གསུམ་པ་མཐོང་ལམ་ནས་མདོ་སྔགས་ཀྱི་ལྟ་བ་དབྱེར་མེད་དུ་གྱུར་ཚུལ་ནི།
མདོ་ལམ་ནས་མཐོང་ལམ་ཐོབ་པའི་ཚེ། མདོ་རང་ལམ་ནས་གཏན་ལ་ཕབ་ཟིན་པའི་ཆོས་ཉིད་སྤྲོས་བྲལ་མཉམ་པ་ཉིད་དེ་མངོན་སུམ་དུ་རྟོགས་པར་མ་ཟད། དེ་དང་རང་བཞིན་དབྱེར་མེད་དུ་གྱུར་པའི་དག་པ་ཡང་མངོན་སུམ་དུ་རྟོགས་ཏེ། དེ་འདྲའི་རྣལ་འབྱོར་མངོན་སུམ་ཚད་མ་དེ་ཆོས་ཉིད་ལ་སྒྲུབ་པས་འཇུག་པའི་ཕྱིར་རོ།། དེས་ན་སྔགས་བླ་མེད་ཀྱིས་གཏན་ལ་ཕབ་པའི་དག་པའང་མངོན་སུམ་དུ་རྟོགས་པ་ཡིན་ནོ།། དེ་ལྟར་མདོ་ལམ་ནས་མཐོང་ལམ་ཐོབ་ཚེ་དག་མཉམ་མངོན་སུམ་དུ་རྟོགས་པར་བཤད་པ་དེས་ཕྱི་རྒྱུད་སྡེ་གསུམ་དུའང་མཐོང་ལམ་ཐོབ་པའི་ཚེ་དག་མཉམ་བདེན་པ་མངོན་སུམ་དུ་རྟོགས་པ་ནི་སྨྲོས་མ་དགོས་མོད། གོང་དུ་བཤད་པ་ནི་ཕྱི་རྒྱུད་པས་དག་པའི་དོན་གཏན་ལ་ཕབ་མེད་པར་བཤད་པའོ།།
དེ་ཡང་གྲུབ་མཐའ་གང་ལ་སྦྱར་ཡང་དེས་གཏན་ལ་ཕབ་ནས་འདོད་དང་མི་འདོད་དང་། གྲུབ་མཐའ་དེ་ལ་ཞུགས་པའི་གང་ཟག་དེས་རྟོགས་མིན་ནི་ནམ་ཡང་རྣམ་གཞག་གཞན་དུ་ཤེས་པར་བྱའོ།། མཐོང་ལམ་ནས་མདོ་སྔགས་ཀྱི་རྟོགས་བྱ་དག་མཉམ་དབྱེར་མེད་པའི་དོན་དེ་མངོན་སུམ་དུ་རྟོགས་པས་མདོ་སྔགས་ལྟ་བ་དབྱེར་མེད་དུ་གྱུར་བར་འདོད་པ་ཡིན་གྱི། སྔགས་ཀྱི་འཇུག་སྒོ་དབང་ལ་བརྟེན་ནས་སྔགས་ལམ་ལ་ཞུགས་པར་ནི་མི་འདོད་དོ།། རྩ་རྒྱུད་ལས། དབུ་རྒྱན་ཅོད་པན་ཕྲེང་བ་དང་།། གོ་ཆ་རྒྱལ་མཚན་ཕྱག་རྒྱ་དང་།། གདུགས་དང་བུམ་པ་བཟའ་བཏུང་དང་།། སྙིང་པོ་ལྔ་ཡིས་དབང་བསྐུར་ན།། དུས་འདི་ཕྱིན་ཆད་རྒྱལ་བའི་སྲས།། ངན་སོང་ཐམས་ཅད་མེད་པ་དང་།། ཚེ་རིང་བདེ་བ་ཕུན་སུམ་ཚོགས།། མཐོ་རིས་ཐར་པའི་བདག་པོར་འགྱུར།། ཞེས་གསུངས་པ་དང་། དེའི་ཐད་ཀྱི་ཕྱོགས་བཅུའི་མུན་སེལ་དང་། གསང་རྒྱུད་ལས། གསང་བའི་དབང་ནི་ཐོབ་མ་ཐག། ཀུན་བཟང་དོན་གྱི་སྲས་སུ་འགྱུར།། ཞེས་པ་དང་། འོད་གསལ་སྙིང་པོ་ལས། དབང་འདི་ནི་སྔགས་ཉམས་སུ་ལེན་པ་ལ་ཐོག་མའི་འཇུག་སྒོ་མེད་དུ་མི་རུང་བ་སྟེ། ཞེས་དང་། ཡང་དེ་ཉིད་ལས། མདོར་ན་རྡོ་རྗེ་ཐེག་པའི་ལམ་གྱི་ཐོག་མའི་འཇུག་སྒོ་གཅིག་པུར་གྱུར་པ་དབང་ཞེས་བྱ་བ་ནི། ལམ་བསྒོམ་པ་དང་། འབྲས་བུ་ཐོབ་པ་ལ་དབང་བར་བྱེད་པའི་ཐབས་ཁྱད་པར་ཅན་ཡིན་པས་ན། འདི་ལ་བརྟེན་ནས་སྔགས་ཀྱི་ལྟ་བ་རྒྱུད་ལ་སྐྱེ་བ་དང་། ཞེས་སོགས་ཀྱིས་སྔགས་ལམ་ལ་ཞུགས་པ་ལ་དབང་ལ་བརྟེན་དགོས་པར་གསུངས་པས་སོ།།
དེས་ན་འདིར་སྔགས་ལམ་ལ་བརྟེན་པ་དང་སྔགས་ལམ་ལ་ཞུགས་གཉིས་ཐ་དད་དུ་ཕྱེས་དགོས་པ་ཡིན་ཏེ། དག་མཉམ་བདེན་པ་དབྱེར་མེད་དུ་རྟོགས་པའི་ལམ་ལ་བརྟེན་པ་ནས་སྔགས་ལམ་ལ་བརྟེན་པ་ཡིན་ཡང་། དེ་ཙམ་གྱིས་སྔགས་ལམ་ལ་ཞུགས་པར་མི་འགྲོའོ།། དག་མཉམ་བདེན་པ་དབྱེར་མེད་དུ་རྟོགས་པའི་སྔགས་ལམ་ལ་མ་བརྟེན་པར་སངས་རྒྱས་པ་དང་འཕགས་པའི་རྟོགས་པ་གང་ཡང་མེད་དེ། རིག་འཛིན་འཇིགས་མེད་གླིང་པས་མཛད་པའི་རྣམ་མཁྱེན་ཤིང་རྟ་ལས། སྔགས་ལ་མ་བརྟེན་པར་འཕགས་པའི་རྟོགས་པ་མེད་པར་ཚད་མས་གྲུབ་པའི་ཤེས་བྱེད་དུ་རྣམ་སྣང་མངོན་བྱང་ལས། རྫོགས་པའི་སངས་རྒྱས་གང་འདས་དང་།། དེ་བཞིན་གང་དག་མ་བྱོན་དང་།། ད་ལྟར་བྱུང་བའི་མགོན་པོ་རྣམས།། འགྲོ་ལ་ཕན་ཕྱིར་ཞུགས་པ་དག། དེ་དག་ཀུན་གྱི་གསང་སྔགས་ཀྱི།། ཆོ་ག་ཟབ་མོ་འདི་མཁྱེན་ནས།། དཔའ་བོས་བྱང་ཆུབ་ཤིང་དྲུང་དུ།། ཐམས་ཅད་མཁྱེན་པ་ཚད་མེད་བརྙེས།། ཞེས་པ་འདི་ངེས་དོན་དུ་འདོད་པའི་ཕྱོགས་ལེགས་པ་ཡིན་ནོ།། ཞེས་གསུངས་པ་དང་། དེ་བཞིན་དུ་འོད་གསལ་སྙིང་པོ་ལས་ཀྱང་། རྒྱུ་འབྲས་དབྱེར་མེད་སྔགས་ཀྱི་དག་མཉམ་ཆེན་པོའི་དོན་འདི་ལྟ་བུ་མ་རྟོགས་པར་སངས་རྒྱ་བ་ཕར་ཞོག ཆོས་ཉིད་ཀྱི་བདེན་པ་ཇི་ལྟ་བ་བཞིན་དུ་མཐོང་མི་ནུས་སོ།། ཞེས་གསུངས་པ་ལྟར་རོ།། དེ་ལྟར་མདོ་ལམ་ནས་མཐོང་ལམ་མ་སྐྱེས་པའི་ཚོགས་སྦྱོར་གྱི་སྐབས་སུ་སྔགས་ལམ་དང་མ་འདྲེས་པའི་ཚུལ་དུ་བསླབས་ཏེ། མཐོང་ལམ་ནས་ཆོས་ཉིད་ཀྱི་བདེན་པ་མངོན་སུམ་དུ་རྟོགས་པའི་དུས་ན། རང་ལམ་གྱི་བསྟན་ཚུལ་ལྟར་ན་སྦས་དོན་དུ་སོང་བའི་དག་མཉམ་ཆེན་པོའི་དོན་དེ་ཡང་མངོན་སུམ་དུ་རྟོགས་ཏེ་སྔགས་ལམ་ལ་མ་ཞུགས་ཀྱང་སྔགས་ཀྱི་ལྟ་བ་ལ་དགོས་པ་ཡིན་ཏེ། སེམས་ཉིད་ངལ་གསོ་ལས། དེ་ཡང་མཐོང་ལམ་མ་སྐྱེས་ཀྱི་བར་དུ་ལམ་ལ་རིགས་དེ་གཉིས་སུ་སྦྱངས་པས། སྐྱེས་དུས་བྱང་སེམས་ཀྱི་ས་ལས་མཐོང་ལམ་རྣམ་པར་མི་རྟོག་པའི་ཡེ་ཤེས་ཞེས་བྱ་ལ། སྔགས་ལས་ཕྱག་རྒྱ་ཆེན་པོ་མཆོག་གི་དངོས་གྲུབ་ཅེས་བཏགས་པ་དེ་མངོན་དུ་བྱེད་པ་ཡིན་ནོ།། དེ་ཚུན་ཆད་དུ་ལམ་ལ་བསླབ་ཚུལ་སོ་སོར་བསྟན་པས་དུས་རིང་བ་དང་ཉེ་བ་བྱུང་སྟེ། ཞེས་གསུངས་པས་སོ།།
དེ་བཞིན་དུ་གསང་འགྲེལ་ཕྱོགས་བཅུའི་མུན་སེལ་ལས་ཀྱང་། དེའི་ཕྱིར་འཕགས་པའི་གོ་འཕང་ཐོབ་པ་ཚུན་ཆད་ལ་ལམ་ཟབ་མི་ཟབ་ལ་སོགས་པ་ཉེ་རིང་དུ་སྣང་ཡང་། དེ་ཕན་ཆད་སེམས་ལ་དབང་ཐོབ་པས་ཇི་ཙམ་གྱི་གྲོལ་བར་རང་དབང་ཡོད་དེ། ཡུམ་བར་མ་ལས། རབ་འབྱོར་གང་གི་ཚེ་ཆོས་རྣམས་ལ་ཆོས་ཀྱི་མིག་དྲི་མ་མེད་པ་ཐོབ་པ་དེའི་ཚེ། འདོད་ན་ཞག་བདུན་གྱིས་བླ་ན་མེད་པའི་བྱང་ཆུབ་ཏུ་འཚང་རྒྱ་ལ། འདོད་ན་བསྐལ་པ་བྱེ་བ་ཁྲག་ཁྲིག་རབ་ཏུ་མང་པོས་ཀྱང་བླ་ན་མེད་པའི་བྱང་ཆུབ་ཏུ་འཚང་རྒྱ་སྟེ། འདི་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐབས་ལ་མཁས་པའི་ཁྱད་པར་དང་པོའོ།། ཞེས་གསུངས་པས་སོ།། འཕགས་པའི་ས་ཐོབ་པ་ནས་དག་མཉམ་གྱི་ལྟ་བ་མངོན་དུ་གྱུར་པ་ཡིན་ཏེ། འོད་གསལ་སྙིང་པོ་ལས། དེ་ལྟར་འོད་གསལ་བའི་དབྱིངས་དེ་ཇི་ལྟ་བ་བཞིན་དུ་གཟིགས་པ་མདོ་ཡི་མཐོང་ལམ་གྱི་ཡེ་ཤེས་ཐོབ་པས་ནི། མཉམ་བཞག་ཏུ་གཟུང་འཛིན་གཉིས་སུ་མེད་པའི་ཚུལ་གྱིས་ཆོས་དབྱིངས་མཉམ་པ་ཆེན་པོའི་དོན་གཟིགས་པ་ན། དེའི་ངོར་དག་མ་དག་དང་ཡོད་མེད་ལ་སོགས་པའི་སྤྲོས་པ་མི་མངའ་ཡང་། ཆོས་དབྱིངས་མངོན་དུ་མཐོང་བའི་སྟོབས་ཀྱིས། རྗེས་ཐོབ་ཀྱི་ངེས་ངོར་དག་མཉམ་ཆེན་པོའི་དོན་ཇི་ལྟ་བ་བཞིན་དུ་རྟོགས་པ་ཡིན་ཏེ། ཞེས་གསུངས་པས་སོ།། ཡང་དེ་ཉིད་ལས། དཔེར་ན་དག་ས་གསུམ་ན་སྣོད་བཅུད་དག་པར་མཐོང་བ་དང་། སྲིད་ཞི་མཉམ་ཉིད་རྟོགས་པ་ཡོད་པ་བཞིན་ནོ།། དག་ས་པའི་ཉམས་ལེན་སྲིད་ཞི་མཉམ་ཉིད་དང་ཞིང་དག་སྦྱོར་གཉིས་པོ་འདི་ནི་སྔགས་ནས་བཤད་པའི་དག་མཉམ་མངོན་དུ་གྱུར་པ་ཡིན་ལ། དེས་ཐབས་མཁས་སྦྱོར་བས་མྱུར་དུ་འཚང་རྒྱ་བ་སྔགས་ཀྱི་ཐབས་རྣམས་ཀྱང་རང་སྟོབས་ཀྱིས་མངོན་དུ་བྱེད་ནུས་པ་ལྟ་བུའོ།། ཞེས་གསུངས་པ་འདིའི་དོན་ལ་ཅུང་ཟད་དཔྱད་ན། དག་ས་གསུམ་གྱི་ཁྱད་པར་ཅན་གྱི་སྦྱོར་བ་དེ་གསུམ་གྱིས་དག་པའི་དོན་ཡང་རང་སྟོབས་སུ་རྟོགས་པར་སྔགས་ཀྱིས་བཞེད་དགོས་པ་ཡིན་ཏེ། འཕགས་ལམ་དང་པོར་ཐོབ་པ་ནས་རྟོགས་རིམ་གྱིས་དག་མཉམ་མངོན་སུམ་དུ་རྟོགས་པར་སྔགས་ཀྱིས་བཞེད་ལ། དེས་ན་སྲིད་ཞི་མཉམ་ཉིད་དུ་རྟོགས་པའི་སྦྱོར་བ་དེས་མཉམ་གཞག་ཏུ་དག་མཉམ་གྱི་དོན་མངོན་སུམ་དུ་རྟོགས་ཤིང་རྗེས་ཐོབ་ཏུ་ངེས་པ་འདྲེན་པའི་དོན་དུ་འགྱུར་གྱི། མདོ་ཕར་ཕྱིན་ཐེག་པའི་རང་ལམ་ནས། སྦྱོར་བ་དེ་གསུམ་གྱི་ཡུལ་ལ་སྔགས་བླ་མེད་ནས་བསྟན་པའི་དག་པའི་དོན་མཚན་ཉིད་པ་འཇོག་པ་དང་། དག་ས་ནས་སྣང་སྲིད་འཁོར་འདས་ཀྱི་ཆོས་ཀུན་སྔགས་ཀྱིས་བཤད་པ་ལྟར་སྐུ་དང་ཡེ་ཤེས་སུ་རྟོགས་པར་མི་བཞེད་དོ།། འདི་ཡང་གྲུབ་མཐའི་བཞེད་ཚུལ་དང་ལམ་དང་གང་ཟག་གི་རྟོགས་རིམ་གཉིས་མི་འདྲ་བ་ལ་ཐུག་པར་ཡང་བསམས་སོ།།
བཞི་པ་མདོ་ལམ་ན་མཐར་ཐུག་གི་འབྲས་བུ་ཡོད་མེད་ལ་དཔྱད་པ་ནི།
དེ་ཡང་དཔལ་སྤྲུལ་རིན་པོ་ཆེས་མཛད་པའི་བསྐྱེད་རིམ་ལྷའི་ཁྲིད་ཀྱི་དཀའ་གནད་ལས། སྤྱིར་མདོ་སྔགས་གཉིས་པོ་ལམ་ཉེ་རིང་ཙམ་ལས་འབྲས་བུ་སངས་རྒྱས་ཀྱི་གོ་འཕང་ཐོབ་པ་ལ་ཁྱད་མེད་པར་བཞེད་པ་དང་། གསང་སྔགས་རྡོ་རྗེ་ཐེག་པའི་ལམ་ལ་མ་བརྟེན་པར་མཐར་ཐུག་རྫོགས་པའི་བྱང་ཆུབ་ཀྱི་གོ་འཕང་མངོན་དུ་བྱེད་མི་ནུས་པར་འདོད་པ་དང་། མདོ་ལམ་ནས་རང་ལམ་གྱི་ས་བཅུ་གཅིག་ཀུན་ཏུ་འོད་ཀྱི་སའི་བར་འགྲོ་ནུས་ཀྱང་མདོ་ལམ་གྱི་སངས་རྒྱས་བཏགས་པ་བ་དེས་སྔགས་སུ་བསྟན་པའི་སྐུ་དང་ཡེ་ཤེས་རྒྱ་མཚོའི་བདག་ཉིད་ཟུང་འཇུག་རྡོ་རྗེ་འཆང་གི་གོ་འཕང་མཚན་ཉིད་པ་དེའི་དོད་མི་ཐུབ་པས་མདོ་སྔགས་ཀྱི་སངས་རྒྱས་ལ་ཁྱད་པར་དབྱེ་བའི་ལུགས་དང་གསུམ་ལས། ཞེས་པ་ལྟར་འདོད་ཚུལ་གསུམ་བྱུང་ལ། འདི་ལ་བཀའ་སྡེ་ཟུར་པ་རྣམས་དང་ཀུན་མཁྱེན་ཆེན་པོ་རྣམས་དགོངས་པ་ཅུང་མི་འདྲ་བར་སོང་འདུག་སྟེ། མཛོད་ལྡེ། ཟུར་པ་རྣམས་ཀྱིས་མདོ་ལམ་ནས་སངས་རྒྱས་མཚན་ཉིད་པ་མི་འགྲུབ་པར་གསུངས་ཀྱང་། ཀུན་མཁྱེན་ཆེན་པོ་དང་འཇམ་མགོན་བླ་མ་མི་ཕམ་གཉིས་ཀྱིས་མདོ་ལམ་ན་མཐར་ཐུག་གི་འབྲས་བུ་ཡོད་པར་བཞེད་པའི་ལུགས་དང་པོ་ལྟར་ཡིན་ཏེ། རྡོ་གྲུབ་ཀྱིས་མཛད་པའི་སྒྱུ་འཕྲུལ་དྲ་བའི་རྒྱུད་ཀྱི་སྤྱི་དོན་ངག་འགྲོས་སུ་བཀོད་པ་ལས། འདིར་ནི་རོག་བདེ་གཤེགས་ཆེན་པོ་དང་། རྒྱལ་བ་ཀློང་ཆེན་ཞབས་མདོ་སྔགས་སོ་སོའི་ལུགས་ཀྱིས་སངས་རྒྱས་ལ་ཁྱད་པར་མེད་ནའང་། སྔགས་བླ་མེད་མ་བརྟེན་པར་མདོ་ནས་བཤད་པའི་སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་སངས་རྒྱས་དེ་ཉིད་མི་འགྲུབ་པར་བཞེད་པ་ཤིང་རྟ་ཆེན་པོའི་ལུགས་ཡིན་ནོ།། ཞེས་དང་། འོད་གསལ་སྙིང་པོ་ལས། དེས་ན་སྔགས་ལ་བརྟེན་ནས་མྱུར་དུ་སངས་རྒྱ་བ་དང་། སྔགས་ནས་བསྟན་པའི་དོན་རིང་མོ་ཞིག་ན་རྟོགས་པ་སྟེ་གཉིས་སུ་གནས་ཀྱི། དགོངས་པ་མི་འགལ་བར་གནད་གཅིག་ཏུ་ཤེས་པར་བྱའོ།། ཞེས་མདོ་སྔགས་གཉིས་ཀྱི་ལམ་སོ་སོར་སྦྱར་བའི་སྐབས་སུ་དེ་ལྟར་གསུངས་པ་དང་། དེ་བཞིན་དུ་འཇམ་མགོན་བླ་མས་མཛད་པའི་བཀའ་བརྒྱད་རྣམ་བཤད་ལས་ཀྱང་། འོ་ན་དེ་ལྟར་ལམ་ལ་ཁྱད་པར་ཡོད་པའི་ཕྱིར་རྒྱུ་དང་འབྲས་བུའི་ཐེག་པའི་ཐོབ་བྱ་འབྲས་བུ་ལ་ཁྱད་ཡོད་དམ་སྙམ་ན། མེད་དེ། ཞེས་གསུངས་པ་དང་། དེ་བཞིན་དུ་གཞུང་སྤྱིའི་དཀའ་གནད་ལས། དེ་ལྟར་འཕོ་ཆགས་ཟད་པ་ན་གཞི་རང་བྱུང་གི་ཡེ་ཤེས་འགྱུར་མེད་ཉིད་མངོན་དུ་གྱུར་བའི་ཡེ་ཤེས་ཀྱི་སྐུ་ཡིན་པས། སྔགས་ལམ་འདེམ་མི་དགོས་ཏེ། རྒྱུན་མཐའི་རྡོར་ཏིང་གིས་དེ་ལྡོག་ནུས་པས་མདོར་ན་འཕོ་ཆགས་ཀྱི་གཉེན་པོ་མེད་པ་མིན་ནོ།། དཔེར་ན་རྫོགས་ཆེན་གྱི་སྣང་བཞི་བཞིན་ནོ།། ཞེས་གསུངས་པས་སོ།།
རྣམ་གཞག་འདི་ལ་རིག་འཛིན་འཇིགས་མེད་གླིང་པའི་བཞེད་ཚུལ་བཀའ་སྡེ་ཟུར་པ་དང་མཐུན་པའི་ཚུལ་དུ་སོང་འདུག་སྙམ་སྟེ། རྣམ་མཁྱེན་ཤིང་རྟ་ལས། གལ་ཏེ་ས་བཅུ་པ་ཐོབ་ཀྱི་བར་དུ་ཡང་སྔགས་ཀྱི་ཐེག་པ་ལ་འཇུག་པའི་ངེས་པ་མེད་དོ་ཞེས་པ་ནི་ཐེག་ཆེན་འཕགས་པ་ལ་བརྒྱུད་ནས་སྐུར་པ་བཏབ་པ་ཡིན་ཏེ། འདི་ལྟར་ཆོས་ཉིད་སྤྲོས་བྲལ་མངོན་སུམ་པར་གཟིགས་པའི་ལྷག་མཐོང་གི་དབང་པོ་མཆོག་ཐོབ་ལ་མ་ཉམས་པ་དེ་སྔགས་ཀྱི་སྣོད་མ་ཡིན་ལ། འཆིང་བ་ཀུན་གྱིས་དཀྲིས་པའི་སོ་སོ་སྐྱེ་བོ་མཐའ་དག་སྔགས་ཀྱི་སྣོད་ཡིན་པར་བསྒྲུབས་པས་ཆེས་ཟབ་པའི་ཆོས་ཀྱི་སྣོད་དང་སྣོད་མ་ཡིན་པའི་རྣམ་གཞག་ཤིན་ཏུ་འཆོལ་བ་ཡིན་ནོ།། ཞེས་དང་། ཡང་དེ་ཉིད་ལས། སྔགས་ལ་མ་བརྟེན་པར་ཕར་ཕྱིན་ཐེག་པའི་རང་ལམ་ནས་སངས་རྒྱས་མི་འགྲུབ་པར་འདོད་པ་འདི་སྔགས་རང་སའི་གྲུབ་མཐར་བསྙོན་དུ་མེད་པ་རྡོ་རྗེའི་ལུང་གིས་ཁ་ཚོན་ཆོད་ཀྱང་། དྲང་དོན་དུ་མཚན་ཉིད་ཐེག་པའི་རང་ལམ་ནས་ཀྱང་ས་བཅུ་རྒྱུན་མཐའི་བར་གྱི་ལམ་ཚང་ལ་མ་ནོར་བ་བསྟན་ནས་བློ་བྲིད་དེ་སྔགས་ལ་བྲོད་པ་སྐྱེ་བའི་ཐབས་སུ་བསྟན་པ་སྒྲ་ཇི་བཞིན་པར་བཟུང་སྟེ་རྒྱུ་ཚང་ནས་འབྲས་བུ་མི་འགྲུབ་པ་ནི་ཡིད་གཉིས་དང་བཅས་པའོ་ཞེས་རྒྱུ་འབྲས་དག་གྲོལ་དུ་འཛིན་ཅིང་རེ་ཞིག་སྔགས་ཀྱི་མྱུར་ལམ་བློར་མི་ཆུད་པའི་གང་ཟག་རིམ་གྱིས་པ་ལ་བརྟེན་ནས། ཞེས་སོགས་གསུངས་ལ། དེའི་སྐབས་ཀྱི་སྔགས་ལ་མ་བརྟེན་པར་སངས་རྒྱས་མི་འགྲུབ་ཅེས་པ་ནི། སྔགས་ལམ་ལ་མ་ཞུགས་པར་སངས་རྒྱས་མི་འགྲུབ་པར་འདོད་པ་ལ་བསམ་པ་ཡིན་གྱི། དག་མཉམ་རྟོགས་པའི་མཐོང་ལམ་ལ་མ་བརྟེན་པར་ཞེས་པའི་དོན་དུ་མི་འགྱུར་བར་སེམས་སོ།། མདོར་ན་རིག་འཛིན་འཇིགས་མེད་གླིང་པས་སྔགས་ལམ་ལ་མ་ཞུགས་པར་སངས་རྒྱས་མི་འགྲུབ་པར་འདོད་པ་དང་། མདོ་ཡི་སངས་རྒྱས་བཏགས་པ་བར་གསུངས་པ་སྟེ། རྣམ་མཁྱེན་ཤིང་རྟ་ལས། ཁྱད་པར་མདོ་སྔགས་ཀྱི་སངས་རྒྱས་ལ་ཁྱད་འབྱེད་པ་ནི་སྒྱུ་འཕྲུལ་དང་མཚན་བརྗོད་ཀྱི་ལུང་གིས་སྒྲུབ་ཏུ་ཡོད་ལ། འཕགས་ཡུལ་གྱི་སློབ་དཔོན་སངས་རྒྱས་ཡེ་ཤེས་ཞབས་ཀྱིས་རྩལ་དུ་བཏོན་ནས་བཤད་ཅིང་། དེ་ལས་གཞན་པའི་ལུང་ཡང་དུ་མ་ཡོད་པས་གནས་སྐབས་ཀྱི་འདོད་པ་གྱི་ན་ཙམ་དུ་བལྟ་བར་ནི་མི་བྱའོ།། ཞེས་གསུངས་པས་སོ།།
ཡང་དེ་ཉིད་ལས། མདོ་རང་ལམ་ནས་བཤད་པའི་འབྲས་བུ་དེ་ལམ་དེའི་ཐོབ་མི་ནུས་ན་ནི་ལམ་དང་འབྲས་བུ་ཡ་བྲལ་བ་མུ་སྟེགས་བྱེད་ཀྱི་ཐར་ལམ་ལྟར་འགྱུར་བས་མཚན་ཉིད་ཐེག་པ་ལ་སྐུར་བ་མི་བཟད་པ་བཏབ་པར་འགྱུར་ལ། ཞེས་གསུངས་པས། མདོ་རང་ལམ་གྱིས་རང་ལམ་གྱི་འབྲས་བུ་ཐོབ་ནུས་ཀྱང་། དེ་དང་སྔགས་ཀྱི་འབྲས་བུ་གཉིས་ལ་འབྲས་བུ་མཆོག་དམན་ཏེ་སྔ་མ་སངས་རྒྱས་ཀྱི་ས་མཚན་ཉིད་པར་ཁས་མི་ལེན་པ་འདྲའོ།། མཛོད་ལྡེ་ལས། གསང་སྔགས་ཐུན་མིན་གྱི་ལམ་ལ་མ་བརྟེན་པར་དེའི་ཐུན་མིན་གྱི་འབྲས་བུ་འགྲུབ་པ་མི་འཐད་པས་ཞེས་གསུངས་པ་ཡང་དེ་དང་མཐུན་པར་འདུག་ཅིང་། གཞན་ཡང་། རྣམ་མཁྱེན་ཤིང་རྟ་ལས། མདོ་སྔགས་ཀྱི་ལམ་སེམས་བསྐྱེད་ནས་ཟུང་འཇུག་གི་རིམ་པ་ལ་སློབ་པའི་ཚུལ་དབང་པོ་མཆོག་ལ་དགོངས་པ་གཅིག་ཏུ་བསྒྲུབ་པར་རིགས་པར་བྱའོ།། ཞེས་པ་དང་། ཡང་དེ་ཉིད་ལས། མདོ་སྔགས་གཉིས་ཀྱི་ལྟ་བ་ལ་མངོན་སུམ་དང་རྗེས་དཔག་གི་ཁྱད་པར་དུ་ཁ་ཚོན་ཀྱང་ལེགས་པར་ཆོད་པ་ཡིན་ནོ།། ཞེས་པ་སོགས་རྣམ་གཞག་ཅུང་མི་འདྲ་བའི་ཚུལ་མང་བས་རེ་ཞིག་དགོངས་པ་བསྒྲིགས་པའི་ཚུལ་ནི་མ་ཤེས་ཀྱང་དཔྱད་པའི་གཞི་ཙམ་དུ་བྲིས་སོ།།
ཟབ་ལྡན་རྒྱུད་ཀྱི་དགོངས་དོན་བརླིང་པ་དང་།།
བློ་ཆུང་གོམས་པའི་བག་ཆགས་ཕྲ་བ་ཡིས།།
རྟོགས་དཀའི་གནས་ལ་བློ་གདེང་མ་ཟིན་ཡང་།།
ཐོས་བསམ་སྙིང་པོ་ལེན་ཕྱིར་བདག་ཡིད་སྤྲོ།།
དེ་ལྟར་ལེགས་ཉེས་གཏམ་གྱི་སོ་མཚམས་ལས།།
རྣམ་པར་ཤོར་བའི་ཐོས་བསམ་སྙིང་པོའི་རྡུལ།།
བླང་དོར་གསལ་བའི་ཡིད་ཀྱི་འཁྲི་ཤིང་ལ།།
འབྲས་ལྡན་ཡོན་ཏན་ནོར་བུས་མཛེས་གྱུར་ཅིག།
ཅེས་བོད་རབ་རྒྱན་ལྕགས་གླང་ལོའི་གྲོ་ཞུན་ཟླ་བའི་ཡར་ངོས་སུ་གཡུ་ཁོག་པ་བྱང་ཆུབ་རྡོ་རྗེས་བྲིས་པ་དགེའོ།།
– – – – –
