ཏུན་ཧོང་ཡིག་རྙིང་ལས་སྲོང་བཙན་སྒམ་པོ་དང་དབའ་དབྱི་ཚབ་ཀྱི་མགུར་ལ་དཔྱད་པ།

[ནང་དོན་གནད་བསྡུས།] སྲོང་བཙན་སྒམ་པོ་དང་དབའ་དབྱི་ཚབ་གཉིས་ཀྱི་མགུར་གྱི་རྒྱབ་ལྗོངས་དང་འབྲེལ་ཏེ། ཚིག་དོན་ཅུང་ཞིབ་ཙམ་བཀྲལ་ཏེ། མགར་སྟོང་བཙན་གྱི་མགུར་ལའང་གཤིབ་སྡུར་བགྱིས་ཤིང་། བྱེ་བྲག་ཏུ་སྐབས་བབ་ཀྱི་མགུར་ཚིག་གི་སྒྱུ་རྩལ་སོགས་ལའང་དབྱེ་ཞིབ་ཅི་ནུས་བགྱིས་ཡོད།

[གནད་ཚིག] སྲོང་བཙན་སྒམ་པོ། དབའ་དབྱི་ཚབ། རྩང་། མདོ། ལྷོ། བྱང་། གཡང་།

གཅིག བཙན་པོ་དང་དབའ་དབྱི་ཚབ་བར་གྱི་འབྲེལ་བ།

སྤྱིར་ན་དབའ་ཡི་རྒྱུད་པ་ནི་རྒྱན་ཕྲན་སིལ་མའི་དུས་སུའང་། ཏུན་ཧོང་ཡིག་རྙིང་ལས། PT 1286,0012/0013 ཡུལ་འོ་ཡུལ་གྱི་སྤང་གར་ན་། ། རྗེ་འོལ་རྗེ་འྀ་ཟིན་བྲང་ཚ། བློན་པོ་རྔོ་དང་དབའས་གཉིས། ཞེས་དབའ་ཡི་རུས་རྒྱུད་མཐོང་དུ་ཡོད་མོད། ཕྱིས་ཀྱི་དབའ་དབྱི་ཚབ་དང་ཁྱིམ་རྒྱུད་གཅིག་ཏུ་བརྗོད་དཀའ་ནའང་། དབའ་ཡི་རུས་རྒྱུད་དེ་སྔར་ནས་བློན་པོའི་གོ་ཐོབ་བཟུང་མྱོང་ཞིང་དཔའ་མཛངས་ལྡན་པ་བྱུང་བ་ཤེས་ཐུབ། སྔར་གྱི་ཡིག་ཆར་གསལ་བོར་བཀོད་པ་གཞན་ཞིག་ནི། བཙན་པོ་སྟག་བུ་སྙ་གཟིགས་ནས་དབའ་དང་འབྲེལ་བ་བྱུང་ཡང་བཙན་པོ་དགུང་དུ་གཤེགས་པས། གནམ་རི་སྲོང་བཙན་གྱི་དུས་སུ། ཏུན་ཧོང་ཡིག་རྙིང་ལས། PT1287,0181/0182 དབའས་དབྱྀ་ཚབ་དང།། ཚེས་པོང་ནག་སེང་གཉིས་ནྀ་། བཙན་པོ་འི་སྤྱན་འདྲེན་ནོ། ཆུ་བོ་ནི་རབ་དུ་བཏོད་དོ་། དྲ་ལ་ནྀ་དབྱེ་རུ་བཏྀང་ངོ། མཁར་ཡུ་སྣ་ནྀ་ཕབ་བོ།། དགུ་གྲྀ་ཟིང་པོ་རྗེ་ནྀ་བཅག་གོ། ཞེས་བཙན་པོའི་རུ་སྣ་འདྲེན་མཁན་གཙོ་བོ་དབའ་དབྱི་ཚབ་ཡིན་པར་མ་ཟད། དབའ་ཡི་རུས་རྒྱུད་ཀྱིས་བཙན་པོའི་མངའ་ཐང་ཡར་ལུང་གཙང་བོའི་བྱང་རྒྱུད་དང་སྨད་དུ་རྒྱ་བསྐྱེད་པར་ཐོག་མར་གསང་ཇུས་བཏོན་པ་དང་། དེ་ནས་དཔུང་འདེགས་བླ་མེད་བྱས་ཏེ་གཡུལ་འཁྲུག་ལས་རྒྱལ་ཁ་ཐོབ་པས། དེ་ལྟར་མྱང་དབའས་མནོན་གསུམ་ཞེས་མིང་དུ་གྲགས་པ་བྱུང་།

དེར་བརྟེན་བཙན་པོ་གནམ་རི་སྲོང་བཙན་གྱིས་ཀྱང་། ཏུན་ཧོང་ཡིག་རྙིང་ལས། PT1287 དབའས་དབྱི་ཚབ་ཀྱྀ་བྱ་དགའར་།། ཟ་གད་གཤེན་ཀྱི་ཡུལ་ས་དང། མལ་ཏྲོ་པྱོགས་ནས་བྲན་ཁྱྀམ་སྟོང་ལྔ་བརྒྱའ་སྩལ་ཏོ།། ཞེས་དབའ་ལའང་ཟ་གད་དང་མལ་ཏྲོའི་ཕྱོགས་ཀྱི་ཁྱིམ་ཚང་སྟོང་དང་ལྔ་བརྒྱ་བྱ་དགར་སྤྲད་དེ། དབའ་ཡི་མཛད་རྗེས་ལ་གཟེངས་བསྟོད་ཆེས་ཆེར་གནངས་ཤིང་། དེ་བཞིན་དུ་དབའ་དབྱི་ཚབ་ཀྱི་ཆབ་སྲིད་གོ་གནས་ཀྱང་ཆེས་ཆེར་མཐོ་སྟེ། ཏུན་ཧོང་ཡིག་རྙིང་ལས། PT1287 འབྲིང་ཐོ་རེ་སྦུང་བརྩན། དང།། ཕངས་ཏོ་རེ་དབྱི་ཚབ་དང་ཁྱེད་གཉྀས།། ཆབ་ཕ་རོལ་ཚུ་རོལ་གྱི།། རྒུང་བློན་འཚོལ་ཅིག་པར་དགོད་། དགོད་པ་ལས། ཞེས་པས་བཙན་པོ་གནམ་རི་སྲོང་བཙན་དུས་སུ་དབའ་དབྱི་ཚབ་ནི་གུང་བློན་གྱི་ཐོབ་གནས་ཡོད་པ་ཞིག་ཏུ་གྱུར་ཡོད།  ཕྱིས་སུ་མང་སྲོང་གིི་དུས་སུའང་ཁོང་གི་བུ་དབའས་སྣང་ཏོ་རེ་སུམ་སྣང་བློན་ཆེན་འོག་དཔོན་དུ་གྱུར་ཚུལ་ནི། ཏུན་ཧོང་ཡིག་རྙིང་ལས། PT1287.0106/0107 བློན་ཆེ་འྀ་ལུགས་སློབ་པ་འི་འོག་པོན་། དབའས་སུམ་སྣང་གིས་བྱས་ཏེ། ཞེས་བློན་ཆེའི་འོག་དཔོན་ཞེས་པའི་ཐོབ་ཐང་སྤྲད་ཡོད་ལ། དེ་ནི་བཙན་པོའི་དུས་སུ་ཀྱི་ཐོབ་གནས་ཀྱི་ལམ་ལུགས་གསར་བ་ཞིག་ཀྱང་དབའ་ནས་འགོ་ཚུགས་པ་ཞིག་ཡིན། དེ་ཙམ་དུ་མ་ཟད་དབའ་དབྱི་ཚབ་ཀྱི་ཚ་བོ་སོགས་ཀྱང་། ཏུན་ཧོང་ཡིག་རྙིང་ལས། 1287,0195/0196 དབའས་དབྱྀ་ཚབ་ཀྱི་ཚ་བོ།། སྟག་པོ་རྗེ་མྱེས་སྣང་དང། མང་པོ་རྗེ་པུ་ཚབ་གཉྀས་དཀུའ་རྒྱལ་ལ་གཐོགས་སོ།། ཞེས་བཙན་པོ་གནམ་རིའི་དུས་ནས་མནའ་ཁོངས་སུ་གཏོགས་པ་དང་།  ཕྱིས་སུའང་དབའ་ཡི་ཁྱིམ་རྒྱུད་ཀྱི་བློན་ཆེན་མང་དུ་བྱུང་ནི། ཏུན་ཧོང་ཡིག་རྙིང་ལས། ST0750,0104 དབའས:ཁྲྀ་གཟིགས:ཞང་ཉེན:བློན་ཆེན་ཕོར:བཀའ་སྩལདེ། (༧༠༥ ལོ)ཞེས་དང་། ST0750,0172 དབའས:ཁྲྀ་སུམ་རྗེ་རྩང་བཞེར:བློན་ཆེན་པོར:བཀའ་སྩལད་། (༧༢༡ ལོ)ཞེས་དང་། ST 0750,0194 དབའས:སྟག་སྒྲ:ཁོང་ལོད:བློན་ཆེན་པོར:བཀའ་སྩལད། (༧༢༧ ལོ) ཞེས་དང་། PT1287,0112/0113 དབའས་སྣང་བཞེར་ཟུ་བརྩན་གྱིས་བྱས་སོ།། ཞེས་དང་། PT1287,0116 དབའ་མང་རྗེ་ལྷ་ལོད་ཀྱིས་བྱས་སོ།། PT1287,0117 དབའས་རྒྱལ་ཏོ་རེ་སྟག་སྙས་བྱས་སོ་།། ཞེས་པ་སོགས་དབའ་རྒྱུད་ལས་བྱུང་བའི་བློན་ཆེན་མང་དུ་བྱུང་བར་མ་ཟད། བཙན་པོའི་དུས་སུ་ཆོས་ཀྱི་དགེ་བའི་བཤེས་གཉེན་ཡང་། ཏུན་ཧོང་ཡིག་རྙིང་ལས། དབའ་བཙུན་ཡེ་ཤེས་དབང་པོ། དབའ་དཔལ་དབྱངས། ཞེས་སུ་བཀོད་པས་ཀྱང་དབའ་ཡི་རྒྱུད་པ་ཆོས་ཕྱོགས་སུ་ཤུགས་རྐྱེན་ཆེ་བ་ཤེས་ཐུབ།

དེ་ལྟར་དབའ་ཡི་རྒྱུད་པ་ཆབ་སྲིད་བློན་པོའམ་དབང་འཛིན་པ་སོགས་ཤིན་ཏུ་མང་བས་རེ་རེ་བཞིན་མ་བཀོད་དོ།། གང་ལྟར་བཙན་པོའི་དུས་སུ་དབའ་ཡི་རྒྱུད་པ་ནི་དར་བའི་རྩེ་མོར་ཟིན་པའི་ཆབ་སྲིད་ཀྱི་གྲལ་ཐབས་མཐོ་བར་འཛིན་པ་ཤ་སྟག་བྱུང་མྱོང་ནའང་། དེ་ལའང་འགལ་རྐྱེན་སོགས་རྒུད་པའི་གོ་རིམ་ཆེས་ཆེར་བརྒྱུད་མ་མྱོང་བར་བཙན་པོའི་རྒྱལ་རབས་སིལ་བུར་མ་འཐོར་བར་དུ་གནས་ཐུབ་ཡོད། མགུར་འདི་ལས་བྱེ་བྲག་གནས་ཚུལ་གྱི་ཟུར་ཕྲ་མོ་རེ་ལས་ཅུང་ཟད་མངོན་པའི་སྣང་ཚུལ་མཆིས་ཀྱང་། སྐབས་བབ་ཏུ་བཀྲོལ་བར་བྱ།

གཉིས་པ། སྲོང་བཙན་སྒམ་པོ་དང་དབའ་དབྱི་ཚབ་ཀྱི་མགུར་ལ་དཔྱད་པ།

མགུར་འདི་ནི་ཏུན་ཧོང་ཡིག་རྙིང་ལས། PT1287 གསལ་ལ། བཙན་པོའི་མགུར་ཚིག་ལ་ཚིག་རྐང་བཅོ་ལྔ་དང་དབའ་དབྱི་ཚབ་ཀྱི་མགུར་ལ་ཚིག་རྐང་བརྒྱད་དེ། བསྡོམས་པས་ཚིག་རྐང་ཉེར་གསུམ་མཆིས། མགུར་བླངས་པའི་དུས་ཚོད་ནི་ཅུང་གཏན་འཁེལ་བྱེད་དཀའ་བ་ཞིག་ཏུ་མཆིས་ནའང་། ཏུན་ཧོང་ཡིག་རྙིང་ལས། PT1287,0254/0255 དེ་ཙམ་ན་མྱང་དང་ཅོག་རོ་སྟོད་རྀམས་ལ་བཀྱོན་དབབ་པར་བགྱིས་སྟེ། ཁྲ་ཁྲུག་གི་རྗེས་ལ་བབ་པས། ཞེས་པ་ནི་དབའ་དབྱི་ཚབ་གཉེན་ཚན་གྱིས་བཙན་པོར་མནའ་འདོར་བའི་བྱུང་རིམ་དངོས་ཀྱི་ཁྲོད་དུ་གསལ་བས། མགུར་འདི་ནི་མྱང་ལ་བཀྱོན་ཕབ་པའི་རྗེས་ཙམ་དུ་བྱུང་བ་ཤེས། སྐབས་འདིའི་མྱང་ནི་མྱང་ཙེང་སྐུའི་བུ་སྟེ་མྱང་མང་བོ་རྗེ་ཞང་སྣང་ཡིན་པས། ཏུན་ཧོང་ཡིག་རྙིང་ལས། PT1287,0312/0313 འུང་ནས་བཙན་པོ་ཞ་སྔ་ནས། ཞང་སྣང་གློ་བ་འདྲྀང་ཡང་དག་ཆེས་བཀའ་སྩལ་ནས། ཞང་སྣང་གྀ་མཁར་སྔུར་བ་ཡང་བསྡིགས་སོ།། ཞེས་པའི་ཞང་སྣང་ནི་མྱང་མང་བོ་རྗེ་ཞང་སྣང་ངམ་མྱང་ཞང་སྣང་ཡིན་པས། ཕལ་ཆེར་སྲོང་བཙན་སྒམ་པོའི་དུས་ཀྱི་བློན་ཆེན་པོ་ཐོག་མ་ཡིན་ནའང་།  ཁྱུང་པོ་སྤུང་ཟད་ཟུ་ཙེས་བཙན་པོར་བློ་ལོག་ཚུལ་དུ་ཕྲ་མ་བཅུག་སྟེ་མྱང་ཞང་སྣང་བཀྲོངས་པས། མགུར་འདི་ཡང་གནས་ཚུལ་དེའི་རྗེས་ཙམ་དུ་བྱུང་བ་གོ་ཆོག གནས་ཚུལ་འདི་དུས་ཚོད་ཏག་ཏག་ཅིག་གཏན་ཁེལ་དཀའ་ནའང་། ཏུན་ཧོང་ཡིག་རྙིང་ལས། PT1288,0004 ་་་་བཀྱོན་ཕབ་ནས:བཀུམོ། མཁར:སྔུར་བ:བཤྀག་གོ། ཞེས་པ་ནི་མྱང་ཞང་སྣང་གི་གནས་ཚུལ་བཀོད་པ་ཞིག་ཡིན་ལ། འདི་ཡང་སྲོང་བཙན་སྒམ་པོའི་ལོ་ཚིགས་གནད་བསྡུས་སུ་གསལ་བར་མ་ཟད། སྲོང་བཙན་དུས་ཀྱི་དོན་ཆེན་གྱི་གནས་ཚུལ་གོ་རིམ་བསྒྲིགས་པ་ལས་ཐོག་མར་བཀོད་ཀྱང་། ཤོག་དྲིལ་རལ་བས་ཡིག་ཆ་ཕྱེད་ཙམ་ལས་མ་གསལ་ཡང་། ཏུན་ཧོང་ཡིག་རྙིང་ལས། PT 1287,0314 ཞང་སྣང་བརླག་གོ།། མཁར་སྔུར་བ་ཡང་བཤིག་གོ། ཞེས་པའི་དོན་དང་ཚིག་འགྲོས་ཕལ་ཆེར་འདྲ་བས། སྲོང་བཙན་དུས་ཀྱི་གནས་ཚུལ་ཐོག་མ་འདི་ཡང་མྱང་ཞང་སྣང་གི་དོན་རྐྱེན་ཡིན་པ་ར་འཕྲོད་པས། དེས་ན་དོན་རྐྱེན་འདི་ཡང་སྲོང་བཙན་དུས་ཀྱི་བློན་ཆེན་གཞན་ལས་སྔ་བར་བྱུང་བ་ཤེས་ཐུབ།

ཡང་སྲོང་བཙན་སྒམ་པོའི་དུས་སུ་མྱང་ཞང་སྣང་གིས་སུམ་པ་དབང་དུ་བསྡུས་པའི་མཛད་རྗེས་དེ་ནི་ཆེས་ངོ་མཚར་བ་ཞིག་སྟེ། ཏུན་ཧོང་ཡིག་རྙིང་ལས། PT 1287,0303/0304 འུང་གི་འོག་དུ་མྱང་མང་པོ་རྗེ་ཞང་སྣང་གྀས། སུམ་པ་མཐའ་དག་དམག་གིས་གདབ་མྱི་དགོས་པར་། ཞེས་སྲོང་བཙན་དུས་ཀྱི་ངོ་ལོག་སླར་བཀུག་པའི་མ་ཡིག་ཏུའང་། ཞང་སྣང་གི་མཛད་རྗེས་འདི་ནི་ཐོག་མར་བཀོད་ཡོད་ལ། ལྷག་པར་དུ་སུམ་པ་དམག་གིས་དྲག་འདུལ་བགྱིད་མ་དགོས་པར། ལྗགས་རྩལ་ལ་བརྟེན་ནས་བཀུག་པའི་ངོ་མཚར་བའི་གནས་ཚུལ་བཀོད་ཡོད། ད་དུང་ཏུན་ཧོང་ཡིག་རྙིང་གི་བློན་རབས་སུའང་ཞང་སྣང་གིས་སུམ་པ་སྔར་བཞིན་བདེ་ལ་འཁོད་སྟངས་ནི། PT1287,0085/0086 མྱང་མང་པོ་རྗེ་ཞང་སྣང་གྀས། འཛངས་ཀྱི་བློ་སྒྱུ་གཉྀས་ཀྱིས། མྱྀ་རྟ་གཉིས་ཚེགས་མ་བྱུང་བར། ། དཔྱའ་ཕབ་་། ཞེས་མྱང་ཞང་སྣང་གི་བློ་ཐབས་ཀྱིས་སུམ་པ་དབང་དུ་ཇི་ལྟར་བསྡུས་པའི་ཚུལ་གསལ་བོར་བསྟན་པར་མ་ཟད། ཏུན་ཧོང་གི་ལོ་རྒྱུས་ཡིག་ཆ་འདི་དག་ཏུ་མྱང་ཞང་སྣང་གི་མཛད་རྗེས་དང་དོན་རྐྱེན་གཉིས་ཀྱང་སྲོང་བཙན་དུས་ཀྱི་གནས་ཚུལ་དག་གི་ཐོག་མར་བཀོད་པར་གཞིགས་ན། མྱང་ཞང་སྣང་གིས་སུམ་པ་དབང་དུ་བསྡུས་ནས་རིང་བོ་མ་སོང་བར་ཁོང་གི་སྐུ་སྲོག་ལ་འཚེ་བའི་དོན་རྐྱེན་དེ་བྱུང་ཡོད་པར་མངོན། ཏུན་ཧོང་ཡིག་རྙིང་ལས། ST1284,r002/003  ཞང་སྣང་བཀུཾ་ནས་ཟུ་ཙེ་གློ་བ་ཉེའོ།། ཞེས་ཀྱང་གསལ། དེས་ན་སུམ་པ་དབང་བསྡུས་པའི་ལོ་ཚིགས་དེ་ཡིག་ཆ་དག་ཏུ་གསལ་བོར་མེད་ཀྱང་། རྒྱ་ནག་གི་སྲིད་སྐྱོང་མེ་ལོང་ཞེས་པར། བོད་ནི་ཐུ་ལུ་ཧུན་གྱི་ལྷོ་ནུབ་ཏུ་ཡོད། འདིའི་སྔོན་ཙམ་ནས་སྟོབས་ཤུགས་ཆེར་རྒྱས་ཏེ་རྒྱལ་ཁབ་གཞན་དབང་དུ་བསྡུས། ཞེས་པ་ནི། ༦༣༤ ལོའི་བོད་ཀྱི་གནས་ཚུལ་ཞིག་ཡིན་པས། སྐབས་དེར་སླར་ཡང་བཙན་པོའི་སྟོབས་ཤུགས་རྒྱས་པར་མ་ཟད། རྒྱལ་ཁབ་གཞན་དབང་དུ་བསྡུས་ཚུལ་བཀོད་ཡོད་པས། སུམ་ཁམས་དབང་དུ་བསྡུས་པ་དེ་དུས་གོ་རྒྱུ་ཡིན་ནམ། གཞན་དུ་ན་སྲིད་སྐྱོང་མེ་ལོང་ལས། བོད་ཀྱིས་ཧུང་ཀྲོའུ་ལ་དམག་དྲངས། ཞེས་པ༦༣༨ ལོར་ཁེལ་བས། སུམ་པ་དབང་དུ་བསྒྱུར་བ་འདིའི་ཡར་སྔོན་ཙམ་དུ་གོ་ཡང་ཆོག་པས། དེས་ན་ཡིག་ཆ་འདི་དག་གུང་བསྒྲིག་ཚེ་མགུར་འདི་ཡང་ཕལ་ཆེར་སྤྱི་ལོ༦༣༤ ལོ་ནས་༦༣༨ ལོའི་སྔ་རྗེས་ཙམ་དུ་བྱུང་བར་བསམ་ན་འགྲིག་སྙམ།

དབའ་དབྱི་ཚབ་ནི་སྲོང་བཙན་སྒམ་པོའི་མེས་པོ་དག་གི་རིང་ནས་ཁྱད་དུ་འཕགས་པའི་བྱས་རྗེས་བཞག་པར་གོང་དུ་བརྗོད་ཟིན་པས། སྲོང་བཙན་སྒམ་པོ་དང་ཁོང་གཉིས་ཀྱི་འབྲེལ་བ་ཡང་མེས་པོ་ནས་བརྒྱུད་པའི་འབྲེལ་བ་དམ་པར་མ་ཟད། ལྷག་པར་དུ་བཙན་པོའི་མངའ་ཐང་རྒྱ་བསྐྱེད་པར་བྱས་རྗེས་རླབས་ཆེ་བ་བཞག་མྱོང་བས། བཙན་པོ་དང་བློན་འདི་གཉིས་ཀྱི་འབྲེལ་བ་ནི་སྤྱིར་བཏང་བ་ཞིག་མིན་ནོ།། སྐབས་འདིར་མཚོན་ན། དབའ་དབྱི་ཚབ་ཀྱང་རྒས་ཤིང་འཁོགས་ཏེ་ངལ་གསོས་ནས་བཞུགས་པའི་སྐབས་ཏེ། ཏུན་ཧོང་ཡིག་རྙིང་ལས། PT1287,0247 དབའས་ཕངས་ཏོ་རེ་དབྱི་ཚབ་རྒས་ཏེ། ཉྀ་མ་འདེ་ཞིང་མཆིས། ཞེས་དང་། ཡང་། PT 1287,0258 ཁྱོད་ནྀ་རྒས་སྟེ་ཉྀ་མ་འདེར་གནང་སྟེ་བཞག ཅེས་པས། སྐབས་འདིར་དབའ་དབྱི་ཚབ་ནི་རྒས་ཤིང་ངལ་གསོས་ཏེ་ཆབ་སྲིད་ཀྱི་ཕྱག་ལས་གནང་བཞིན་མེད་པར་བཞུགས་ཡོད་པར་མ་ཟད། སྲོང་བཙན་གྱིས་ཀྱང་དབའ་དབྱི་ཚབ་ཆེད་དུ་སྐུ་ངལ་གསོ་རུ་བཅུག་པའི་རྣམ་པ་ཞིག་ཀྱང་མངོན་ཡོད། དོན་དུ་དབའ་དབྱི་ཚབ་ཀྱང་བཙན་པོ་སྟག་བུ་སྙ་གཟིགས་དང་གནམ་རི་སྲོང་བཙན་རིང་ནས་ཆབ་སྲིད་ཀྱི་ཕྱག་ལས་གནང་མྱོང་བར་མ་ཟད། བཙན་པོ་འདི་ཉིད་ཀྱི་སྐབས་སུའང་དེ་བཞིན་དུ་གནངས་ཏེ། ད་ནི་རང་ཉིད་ཀྱི་བུ་རབས་ཚ་རྒྱུད་དག་ཀྱང་སྔར་བཞིན་བཙན་པོའི་ཆབ་སྲིད་ཀྱི་གནས་བབ་ལེགས་པོ་ཞིག་འཐོབ་རྒྱུ་ནི་རེ་བ་ཆེས་ཆེར་བརྟས་པས། སྲོང་བཙན་སྒམ་པོ་དང་དབའ་དབྱི་ཚབ་ཀྱི་རྒྱུད་པའི་བར་དུ་མནའ་གན་འཇོག་པའི་སྙན་ཞུ་ཕུལ་ཏེ། སྲོང་བཙན་གྱིས་ཀྱང་དེ་ལྟར་ཞལ་བཞེས་གནངས། མགུར་འདི་ཡང་རྒྱལ་བློན་གཉིས་ཀྱི་མནའ་ཚིག་གི་མདོ་ལྟ་བུ་ཞིག་ཏུ་གྱུར་ཡོད་པས། སྐབས་དེའི་ལོ་རྒྱུས་གནས་ཚུལ་བྱེ་བྲག་ཏུ་རྟོགས་ཐུབ་པར་མ་ཟད། དབའ་ཡི་ཁྱིམ་རྒྱུད་ལ་མཚོན་ན་ཆབ་སྲིད་ཀྱི་དཀྱོགས་མཚམས་ཤིག་ཏུ་གདབ་པའི་གསེར་གྱི་གཟེར་བུ་ལྟ་བུར་གྱུར་ཡོད།

བཙན་པོ་སྲོང་བཙན་སྒམ་པོ་དང་དབའ་དབྱི་ཚབ་ཀྱི་མགུར་ལས། སྲོང་བཙན་གྱི་མགུར་ལ་ཚིག་རྐང་བཙོ་ལྔ་དང་། དབའ་དབྱི་ཚབ་ཀྱི་མགུར་ལ་ཚིག་རྐང་བརྒྱད་དེ་བསྡོམས་པས་ཚིག་རྐང་ཉེར་གསུམ་མཆིས། དེ་ལས་ཤོ་ལོ་ཀ(ཕྱི་མ་ལ་ཚིག་རྐང་བདུན་ཡོད)ཐོག་མ་གསུམ་ནི་སྲོང་བཙན་གྱི་མགུར་དང་ཤོ་ལོ་ཀ་ཕྱི་མ་གཉིས་ནི་དབའ་དབྱི་ཚབ་ཀྱི་མགུར་དུ་གཏོགས་པས།  ཐོག་མར་བཙན་པོའི་མགུར་ལ་དཔྱད་པར་བྱ་སྟེ། ཏུན་ཧོང་ཡིག་རྙིང་ལས། PT1287,0266 ཡར་མོ་ནི་ཆུ་ཐུངས་ཀྱིས།། མདོ་ནས་ནྀ་རྩང་དུ། བསྲིང། ཡར་མོ་ནི་ཞེང་ཆུངས་ཀྱིས། ལྷོ་ནས་ནྀ་བྱང་དུ་བསྐྱེད་།། ཅེས་པ་ལས། སྲོང་བཙན་སྒམ་པོས་ཐོག་མར་མགུར་གྱི་འགོ་འཛུགས་སྐབས་ཀྱང་ཡར་ལུང་གཙང་བོ་གཞིར་བཟུང་ནས་བཙན་པོའི་མངའ་རིས་དང་ཆབ་སྲིད་ཀྱི་ཁྱབ་ཁོངས་ཀྱིབསྟན་ཡོད་དེ། ཡར་མོ་ནི་ཆུ་ཐུངས་ཀྱིས།། མདོ་ནས་ནྀ་རྩང་དུ། བསྲིང། ཞེས་པ་ལས་ཡར་ལུང་གཙང་བོའི་སྲིད་ཀྱི་རིང་ཚད་ལ་བརྟེན་ནས་བཙན་པོའི་ཆབ་སྲིད་ཀྱི་ཁྱབ་ཁོངས་བསྟན་པས། འུ་ཚོས་ད་ལྟའི་ཆབ་སྲིད་ཅེས་པའི་བརྡ་ཆད་ཀྱི་ཐོག་མའི་འགོ་ཁུངས་ཀྱང་འདི་ལྟ་བུའི་བཤད་སྲོལ་ལ་ཐུག་ཡོད་དེ། ཐོག་མའི་ཡར་ཆབ་གཙང་བོའི་འགྲམ་རྒྱུད་ཀྱི་རྒྱལ་ཕྲན་དང་ཚོ་ཁག་དབང་དུ་བསྡུས་པ་ལས་བྱུང་བ་ཞིག་ཡིན་པས། མཚམས་རེར་ཆབ་སྲིད་ལ་ཆུ་སྲིད་ཀྱང་ཟེར་ཏེ། ཏུན་ཧོང་ཡིག་རྙིང་གི་མོ་ཡིག་ལས། PT 1047 ཆུ:སྲིད:མྱྀ:ཉམས:ཕའི:ངོ། ཞེས་པས་ཆབ་སྲིད་མི་ཉམས་པའི་མོ་ལྟས་བཟང་བར་བརྩི་བའི་སྐབས་སུའང་ཆབ་སྲིད་ལ་ཆུ་སྲིད་ཅེས་སུ་བཀོད་པ་དང་། ཡང་དེ་ལས། མྱི:ཐ:མལ:ཕ:གཆིག:ཆུ:སྲིད:དམས:ཕའི་ངོ།::།།། ཞེས་ཆབ་སྲིད་ལ་ཆུ་སྲིད་དུ་གོ་ཞིང་། ཡང་། ST ལས། སོ་ནམ་དང་ཆུ་སྲྀད་བར་དུ་ཡང་ཞུགས་ཞྀང་འདུག་པས། ཞེས་པ་སོགས་ལས་ཀྱང་ཆུ་སྲིད་ནི་ཆབ་སྲིད་དང་གོ་དོན་གཅིག་ཏུ་ངེས་པས། ཡང་། ཁྲམ་བྱང་། ཨང439 ལས། ༄།:། སོགས་པ་གཡས་ལ། ན་ཆུ་སྲིད་ཡོད་དམ་མྱེད་ཤ་ནད་འོང་ངམ་མྱི་་་། ཞེས་དང་། ཡང་དེ་ལས་ཅུང་གསལ་དུ་བཀོད་པ་ནི། ཏུན་ཧོང་ཡིག་རྙིང་ལས། PT0002,115/116 གཞའ་གསང་ཡུན་གྀ་ཆུ་སྲིད་ཐོབ་འགྱུར་བ་།། ཡོན་ཏན་ཕུན་སུམ་དཔག་ཡས་དགོན་མཆོག་ལ་།། ཅེས་ཀྱང་བྱུང་། ད་དུང་དེ་བས་གསལ་བ་ཞིག་ནི། ཀོང་པོ་གཡུང་དྲུང་འཛིན་གྱི་རྡོ་རྐོས་ལས། བདེ་སྐྱྀད་ཅྀང་། ཆུ་སྲྀད་གཡུང་དྲུང་དང་འདྲ་བར་གནང་གྀས་ཀྱང་། ཞེས་པ་ལས་ཐད་ཀར་དུ་ཆབ་སྲིད་དང་ཆུ་སྲིད་གཉིས་ཀྱི་དོན་གཅིག་ཏུ་འབབ་པ་གསལ་བོར་རྟོགས་ནུས། ཡང་། ཨ་ལག་ཤ་ངག་དབང་བསྟན་དར་གྱི་བརྡ་ཡིག་བློ་གསལ་མགྲིན་རྒྱན་ལས། ཆབ་ནི་ཆུ། ཞེས་པས་ཆབ་དང་ཆུ་གཉིས་དོན་གཅིག་ཏུ་བསྟན་པར་མ་ཟད། རིམ་གྱིས་ཆུ་དང་སྲིད་ཀྱི་དོན་གཅིག་ཏུ་གྱུར་ཏེ་དཀྱུས་ཀྱི་རིང་ཚད་གོ་བའང་ཡོད་ངེས་ཏེ། ཡང་ཨ་ལག་ཤས། ཆུ་ནི་སྲིད་ལ་ཡང་འཇུག་སྟེ། བསྟོད་སྤྲིན་རྒྱ་མཚོ་ལས། ནྱ་གྲོའི་ལྗོན་པ་ལྟར་རྒྱས་ཆུ་ཞེང་གབ། ཅེས་པ་ལྟ་བུའོ།། ཞེས་པའང་བྱུང་།

དེ་བས་ཅུང་གསལ་དུ་གཏང་ན། སྐྱོགས་སྟོན་རིན་ཆེན་བཀྲ་ཤིས་ཀྱི་ལི་ཤིའི་གུར་ཁང་དུ། ཁ་ཅིག་ནི་བོད་སྐད་ཉིད་ལ་ཞེ་ས་སྦྱར་བ་མ་གོ་བར་བརྡ་རྙིང་དུ་འཁྲུལ་བར་སྣང་སྟེ། ཆུ་ལ་ཆབ་དང་། ཞེས་གསུངས་ཏེ། ཆབ་ནི་ཆུའི་ཞེ་ས་ཡིན་པར་བསྟན་ཞིང་། ཡང་དེ་ལས། ཆབ་ཤོག ཆབ་སྲིད། ཆབ་འབངས། ཆབ་སྒོ་སོགས་ཀྱང་ཞེ་སའི་ཚིག་གོ། ཞེས་པས་ཆབ་དང་ཆུའི་འབྲེལ་བ་དང་། ཆབ་སྲིད་དང་ཆུ་སྲིད་དོན་གོ་སླ་བ་ཞིག་གོ། མདོར་ན། ཡར་མོ་ནི་ཆུ་ཐུངས་ཀྱིས།།  མདོ་ནས་ནྀ་རྩང་དུ། བསྲིང། ཞེས་པ་ལས་ལྟོས་བཅས་ཀྱིས་ཡར་ཆབ་གཙང་བོའི་སྲིད་ཀྱི་རིང་ཚད་གང་འཚམ་ལ་བཙན་པོས་དབང་བསྒྱུར་བའི་མངའ་ཁོངས་ཀྱི་ཚད་ཐིག་ཏུ་གཞལ་བས། ཐོག་མའི་ཆབ་སྲིད་དང་ཆུ་སྲིད་ཀྱི་ཐ་སྙད་ཀྱང་དེ་ལྟར་བྱུང་བར་ངེས། དེས་ན་སྐབས་འདིར། ཡར་མོ་ནི་ཆུ་ཐུངས་ཀྱིས།། ཞེས་པས། དོན་དུ་ཡར་ལུང་གཙང་བོ་ཆུ་རྒྱུན་ཐུང་ཐུང་ཞིག་མིན་ནའང་། ཕྱོགས་གཅིག་ནས་མགུར་ཚིག་ལ་རབ་བཏགས་ཀྱི་མཛེས་ཉམས་ཀྱིས་སྤྲས་པའི་དཔེ་རུ་གྱུར་ཞིང་། རིམ་གྱིས་དོན་གྱི་ངོ་བོ་དང་གཅིག་ཏུ་འདྲེས་ཏེ་དབྱེར་མེད་དུ་བཤད་པའི་བརྡ་སྲོལ་དུ་དར་བར་སྣང་།  སྟག་བུ་སྙ་གཟིགས་ཀྱི་སྐབས་སུ་བཙན་པོའི་མངའ་ཐང་གཙང་བོའི་འགྲམ་རྒྱུད་ནས་རིང་བར་བསྲིང་ཐུབ་མེད་པས། མྱང་དབའས་མནོན་སོགས་གཙོ་བྱས་ཏེ། བཙན་པོ་གནམ་རི་སྲོང་བཙན་དུས་ནས་མངའ་ཐང་རིམ་གྱིས་དར་འགོ་ཚུགས་པས། མདོ་ནས་ནྀ་རྩང་དུ་བསྲིང། ཞེས་པའང་དོན་དངོས་དང་མཐུན་པར་གྱུར། དེ་བཞིན་ཚིག་རྐང་ཕྱི་མ་ལས། ཡར་མོ་ནི་ཞེང་ཆུངས་ཀྱིས་། ལྷོ་ནས་ནྀ་བྱང་དུ་བསྐྱེད།། ཅེས་པ་ཡང་གོང་བཞིན་ཡར་ལུང་གཙང་བོའི་ལྷོ་ནས་བྱང་དུ་བཙན་པོའི་མངའ་ཐང་རྒྱ་བསྐྱེད་པར་བརྗོད་ཅིང་། གཙང་བོའི་ལྷོ་ནས་བྱང་དུ་བསྐྱེད་ཚུལ་ནི། མྱང་ཙེང་སྐུའི་མགུར་དུའང་། PT1287,0148/0149/0150 ཆབ་ཆབ་ནྀ་ཕ་རོལ་ན་།། ཡར་ཆབ་ནྀ་ཕ་རོལ་ན།། མྱྀ་འི་ནི་མྱྀ་བུ་སྟེ། ལྷ་འྀ་ནི་སྲས་པོ་བཞུགས།། ཞེས་པའང་མྱང་དང་དབའ་གཉིས་ཡར་ཆབ་བམ་ཡར་ལུང་གཙང་བོའི་བྱང་རྒྱུད་ནས་ལྷོ་ཕྱོགས་སུ་གནས་པའི་སྤུ་རྒྱལ་བཙན་པོར་སྨོན་པར་འཆོར་སྟངས་ཤིག་བསྟན་ཡོད།

དེ་ནས་བཙན་པོ་གནམ་རི་སྲོང་བཙན་གྱི་དུས་སུ། PT1287,0182 ཆུ་བོ་ནི་རབ་དུ་བཏོད་དོ་། ཞེས་མྱང་དང་དབའ་སོགས་དངོས་སུ་བཙན་པོ་མཉམ་འབྲེལ་གྱིས་ཡར་ལུང་གཙང་བོའི་རབ་ཁ་བརྒལ་ཏེ་གཡུལ་ལ་ཞུགས་ཤིང་། ཟིང་པོ་རྗེ་སོགས་ཕམ་པར་བརྒྱབ་སྟེ་གཡུལ་ལས་རྣམ་པར་རྒྱལ་ཏེ་གཙང་བོ་ཁ་ཞེང་ཆེ་རུ་བསྐྱེད་ཅེས་པའི་དོན་དེ་བྱུང་། ཡར་ལུང་གཙང་བོའི་བྱང་དུ་བཙན་པོའི་དམག་དྲངས་ཚུལ་ནི། ཕྱིས་སུ་མྱང་ཞང་སྣང་གི་མགུར་དུའང་། PT1287,0233/0234 ཀྱེ་ན་ནིང་ནྀ་གཞེ་ནིང་སྔ་།། ཆབ་ཆབ་ནྀ་ཕ་རོལ་ན་།། ཡར་ཆབ་ནྀ་ཕ་རོལན། དགུ་གྲྀ་ནི་ཟིང་པོ་རྗེ།། ཉ་ལས་ནྀ་ཁམ་དུ་བཀོང།། ཁམ་ལས་ནྀ་རྨེག་དུ་བཏའ།། ཞེས་དབའ་དབྱི་ཚབ་སོགས་ཀྱིས་ཆབ་ཀྱི་ཕ་རོལ་ཏེ་ཡར་ལུང་གཙང་བོའི་ཕ་རོལ་བྱང་རྒྱུད་ཀྱི་ཟིང་པོ་རྗེའི་མངའ་ཐང་རྨེག་མེད་བཏང་སྟེ། བཙན་པོ་དང་མཉམ་འབྲེལ་བྱས་ཏེ་རྒྱལ་ཁ་ཐོབ་ཅིང་བཙན་པོའི་ལྷོ་ནས་བྱང་དུ་བསྐྱེད་པའི་དབའ་དབྱི་ཚབ་ཀྱི་མཛད་རྗེས་ལ་བསྔགས་བརྗོད་གནངས་ཡོད། དེ་ལྟར་བཙན་པོའི་དུས་སུ་ཡར་ཆབ་སྔོན་མོའམ་ཡར་ལུང་གཙང་བོ་བརྒལ་ཏེ་རྒྱ་བསྐྱེད་པ་ནི། ཆབ་སྲིད་འགྱུར་ལྡོག་གི་དཀྱོགས་མཚམས་ཆེས་འགངས་ཆེན་ཞིག་ཡིན་པ་མ་ཟད། བཙན་པོའི་བྱང་ལམ་གྱི་རབ་ཁ་ཕྱེས་ཐོག་མའི་རྟེན་འབྲེལ་ཞིག་ཀྱང་ཡིན། དེ་ལྟར་རིམ་གྱིས་གཙང་བོ་འབྲེལ་བའི་མགུར་ཡང་མང་དུ་བྱུང་ཡོད་དེ། འདུས་སྲོང་གི་དུས་སུའང་། PT 1287,0464/0465 ཡར་ཆབ་ནྀ་སྔོན་པོ་ལ། ཆུ་བཆད་ནྀ་ཡུར་དྲངས་ཀྱང་། ཡར་ཆབ་ནི་གཞུང་མྱི་སྐམས། ཞེས་དང་།  PT1287,0468/0469 སྐྱི་ཅུ་ནྀ་སྔོན་མོ་དང་། ཡར་ཆབ་ནྀ་ཆུ་བོ་ཆེ། གང་རྀང་ནི་གང་ཐུང་བ། ཞེས་དང་། ཁྲི་ལྡེ་གཙུག་བཙན་དུས་སུའང་། PT1287,0354/0355 ཆབ་ཆབ་ནྀ་མ་གཞུག་ནས། ལ་བོང་ནི་རྗེ་དང་སྐོལ། ཞེས་པ་སོགས་ཡར་ཆབ་གཙང་བོ་ནི་མགུར་གྱི་སྲོག་རྟ་ལྟ་བུར་གྱུར་ཏེ། ཡར་ཆབ་བམ་ཡར་ལུང་གཙང་བོ་གཞི་བྱས་ཏེ་ཕྱོགས་བཞི་མངའ་ཁོངས་རྒྱ་བསྐྱེད་ཅིང་། ཆབ་སྲིད་ཅེས་པའང་འདི་ལྟ་བུ་བརྒྱུད་ནས་བྱུང་ཞིང་། དེ་ལྟར་ཡར་ལུང་གཙང་བོ་ནི་ཆབ་སྲིད་ཀྱི་ཚད་གཞི་ཞིག་གམ་མིང་བརྡ་ཞིག་ཏུ་གྱུར་བར་མ་ཟད། ཡར་ཆབ་གཙང་བོ་རིག་གནས་ཀྱི་གཟུངས་ཐག་ལྟ་བུར་གྱུར་ཏེ། ཡར་ཆབ་གཙང་བོའི་རིག་གནས་ཤིག་རིམ་གྱིས་ཆེས་ཆེར་དར་ཞིང་རྒྱས་པར་གྱུར། གང་ལྟར་སྐབས་འདིར་གཙང་བོའི་ལྷོ་ནས་བྱང་དུ་རྒྱ་བསྐྱེད་པར་དབའ་དབྱི་ཚབ་དང་འབྲེལ་བ་དམ་པོར་ཡོད་པས། དབའ་དབྱི་ཚབ་ཀྱིས་ཀྱང་གོང་གི་མགུར་དང་དོན་འདྲ་བ་ཞིག་གསུངས་པ་ནི། PT1287,0249 གནའ་ཟྀང་པོ་རྗེ་རྒྱབ་དུ་བོར། སྤུ་རྒྱལ་ཕང་དུ་ལེན་ལེན། ཆབ་སྲིད་ཆུར་ནྀ་བསྲིངས། ཞེང་དུ་ནྀ་བསྐྱེད་བསྐྱེད་ན། ཞེས་གསུངས་ཏེ། དབའ་དབྱི་ཚབ་སོགས་ཀྱིས་སྤུ་རྒྱལ་བཙན་པོར་སྐྱབས་བཅོལ་ཏེ། བཙན་པོའི་ཆབ་སྲིད་རྒྱ་བསྐྱེད་པར་ནུས་པ་མངོན་སུམ་དུ་བྱུང་བ་ཚིག་ཉུང་ལ་དོན་འདུས་ཀྱི་མགུར་འདི་ལས་གསལ་བོར་བགྱིས་ཡོད། དེ་ལྟར་གཙང་བོའི་ལྷོ་ནས་བྱང་དུ་བསྐྱེད་པས། བཙན་པོའི་ཆབ་སྲིད་ཀྱི་ཁེ་ཕན་དང་དམངས་ཀྱི་འཚོ་བར་འགྱུར་ལྡོག་ཆེས་ཆེར་བྱུང་ཡོད་པས། ཏུན་ཧོང་ཡིག་རྙིང་ལས། ST མོ་ཡིག་ལས། ཀྱེ་བཀའ་མཆིད་ནི་སྦྱངས་ཤིང་གདའ།། ལྷོ་ག་དང་བྱང་ཀ་གཉིས།། གཡང་མོ་ནི་བྱང་ལ་འཕན།། འབྲས་དྲུག་ནི་ལྷོ་ན་མོད།། གང་བདམ་ནི་ཆ་མ་མཆིས།། ཞེས་པས། བཙན་པོའི་དུས་ཀྱི་འཚོ་བའི་ཆ་ནས་ཀྱང་ལྷོོ་ཁ་ནས་ཞིང་ལས་ཆེར་འཕེལ་བ་དང་། བྱང་ཁ་ནས་འབྲོག་ལས་གཙོ་ཆེར་གཏོགས་པས། བཙན་པོའི་ཆབ་སྲིད་ལྷོ་ནས་བྱང་དུ་བསྐྱེད་པའི་འགྱུར་ལྡོག་མཉམ་དུ་འཚོ་བའི་འགྱུར་ལྡོག་ཀྱང་ཆེས་ཆེར་བྱུང་།

དེ་ལྟར་རིམ་གྱིས་བཙན་པོའི་རུ་དཔུང་གིས་བྱང་ག་སྣམ་བརྒྱད་ལྟ་བུ་སོགས་སུ་རྒྱ་བསྐྱེད་པས། ཡར་ལུང་གཙང་བོའི་སྲིད་ཀྱི་ཁྱབ་ཁོངས་རིང་ཞིང་ཆེ་བར་གྱུར་ཞིང་། ཏུན་ཧོང་ཡིག་རྙིང་ལས། PT1287,0525 སྟོད་པྱོགས་དང་ལྷོ་པྱོགས་ཀྱི་རྒྱལ་པྲན་མང་པོ་ཡང་འབངསུ་བསྡུས་སྰོ།། ཞེས་པས་ཀྱང་སྟོད་རྒྱུད་དང་ལྷོ་རྒྱུད་སོགས་ཀྱི་རྒྱལ་ཕྲན་དབང་དུ་བསྡུས་ཚུལ་བརྗོད་པ་ཡང་།  ཡར་ལུང་གཙང་བོའི་སྟོད་དང་ལྷོ་ལ་གོ་བས། གཙོ་བོ་གཙང་བོ་གཞིར་བཞག་སྟེ་བརྗོད་པས། ཡར་ལུང་གཙང་བོའི་དཔལ་ཡོན་དར་རྒྱས་འགྲོ་བཞིན་པའི་སྐབས་སུ་ཁེལ་ཞིང་། མུ་མཐུད་དུ་བཙན་པོའི་མངའ་ཐང་རྒྱ་བསྐྱེད་པར་མཚམས་བཞག་མ་མྱོང་སྟེ། ལྷག་པར་སྐབས་འདིའི་བྱང་རྒྱུད་དང་འབྲེལ་བརྗོད་ན།  མང་སྲོང་མང་བཙན་སྐབས་སུའང་། PT1288,0043 (༦༤༤ལོ)བཙན་པོ་བྱང་རོལད་དུ་གཤེགས་ཤིང་། ཞེས་བྱང་རོལ་ཞེས་པ་བྱུང་ལ། དེ་མིན་འདུས་སྲོང་གི་དུས་སུའང་། ST0750,0076 (༦༩༨ལོ)བཙན་པོ་དབྱརད་བྱ་རོལ་དུ་གཤེགས། ཞེས་དང་། ཁྲི་ལྡེ་གཙུག་བཙན་གྱི་སྐབས་སུའང་། ST0750,0181 (༧༢༤ལོ)བཙན་པོ་དབྱརད་སྤེལ་ན་བཞུགས་ཤྀང། བྱང་རོལ་དུ་གཤེགསྟེ། ཞེས་དང་། ST0750,0245 (༧༤༤ལོ)བཙན་པོ་དབྱརད་བྱང་རོལ་དུ་གཤེགས་པ་ལས་སླར་འཁོར་ཏེ། ཞེས་དང་། ཡང་། ST8212,0002 (༧༤༤ལོ)བཙན་ཕོེ་ཕོ་བྲང། མཙར་དུ་བཏབ་སྟེ། བྱང་རོལ་དུ་གཤེགས ཞེས་པ་སོགས་འདི་ལྟར་བཙན་པོ་ཕྱི་མ་དག་གི་ཆབ་སྲིད་ཀྱི་དམིགས་ཡུལ་ཡང་བྱང་ནས་བྱང་དུ་བསྐྱེད་པའི་གནས་ཚུལ་བྱུང་བར་མ་ཟད། དེ་ཡང་བྱང་དང་བྱང་ག བྱང་རོལ་ཞེས་བྱང་དང་འབྲེལ་བའི་མིང་བརྡ་ཡང་ཡང་མངོན་ཞིང་། དེ་ལས་བྱང་གི་གོ་དོན་ཡང་དྲུ་གུ་དང་མདོ་སྨད་སོགས་སུ་གོ་བའང་ཡིག་ཆ་དག་གི་བབ་ལས་ཤེས། འདི་ལྟར་བྱང་ངམ་བྱང་རོལ། བྱང་ག་ཞེས་པའང་ལོ་རྒྱུས་པ་རེ་ཟུང་གིས། རྒྱ་ནག་གིས་བརྗོད་པའི羌དང་羌戎ཞེས་བོད་སྐད་ལས་སྒྲ་འགྱུར་བར་བཤད་པའང་ཡོད་པས་དཔྱད་དགོས་ཏེ། སྔར་བཙན་པོའི་དུས་ཀྱི་བྱང་ཞེས་པའི་གདངས་ནི་སྐབས་དེའི་བོད་སྐད་དུ་བེང་ལྟ་བུའི་སྒྲ་ཙམ་ལས། ད་ལྟའི་དབུས་གཙང་གིས་ཆང་ལྟ་བུའི་སྒྲ་རུ་མི་འབྱུང་བར་འདོད། དེ་བཞིན་དུ་རྒྱ་ཡིག་གི羌ཞེས་པའང་དུས་རབས་བདུན་པ་དང་བརྒྱད་པར་ཁེང་ཞེས་པའི་སྒྲ་ཙམ་ལས་ཆང་དུ་མི་འབོད་པར་སྙམ། དེས་ནས་བེང་དང་ཁེང་གི་བར་དུ་སྒྲའི་སྐྱེས་གནས་སོགས་ཀྱི་འབྲེལ་བ་ཡེ་ནས་མེད་པས། དེ་བས་རྒྱ་ནག羌ནི་བོད་སྐད་ཀྱི་ཁེང་ཞེས་པ་དང་འབྲེལ་བ་མེད་དམ་སྙམ། ལྡེའུ་ཆོས་འབྱུང་ལས། རྗེ་ཁེང་ལོག་ཀྱང་འགྲོ། ཞེས་རྗེ་དང་ཁེང་ངམ་འབངས་ལ་གོ་བར་སྣང་། ཡང་། ཆོས་འབྱུང་མཁས་པའི་དགའ་སྟོན་ལས། རྒོད་ཀྱི་སྟོང་སྡེ་དྲུག་ཅུ་རྩ་གཅིག་ཕྱེ།། གཡུང་གི་མི་སྡེ་ཁེང་དང་ཡང་ཁེང་འབྱེད།། ཅེས་དང་། ཡང་དེ་ལས། གཡུང་གི་མི་སྡེ་འབྱེད་པ་ནི་གཡུང་ངམ་ཁེང་ཞེས་པ་འབངས་ལས་བྱེད་ཀྱི་མིང་ཡིན་ལ་ཡང་ཁེང་ཞེས་པ་ཡང་བྲན་དང་ཉིང་གཡོག་གི་མིང་ཡིན་ནོ།། ཞེས་པས་ཀྱང་གསལ་བར་བགྱིས།

སྲིད་པ་རྒྱུད་ཀྱི་ཁ་བྱང་དུ། ཞབས་ཞ་སྟེ་ཁྱེང་ལོག་བྱུང་ངོ་།། ཞེས་པའི་ཁྱེང་ལོག་ཀྱང་ཁེང་ལོག་ཏུ་གོ་ཆོག་པས། སྒྲ་བསྒྲགས་པ་གླིང་གྲགས་སུ། འབངས་ཀྱི་ཁེང་ལོག་བྱུང་། ཞེས་པས་འབངས་དང་ཁེང་གི་དོན་གཅིག་ཏུའང་འབབ་པས། དེས་ན་བོད་ཀྱི་ཁེང་ཞེས་པའི་སྒྲ་ལས་རྒྱ་ནག་གིས་羌 ངམ་ཁེང་ཞེས་སུ་ཟློས་ཏེ་བྱུང་བར་སེམས། སྔར་བྱང་རྒྱུད་ཀྱི་ཡུལ་ཁམས་སྤྱི་ལ་བྱང་དང་བྱང་རོལ་ཞེས་སུ་གྲགས་པ་བདེན་ཡང羌དང་འབྲེལ་ཐབས་མེད་པར་འདོད། དེ་ནི་འཕྲོས་པ་ཙམ་དུ་ཟད། དཀྱུས་སུ་ཞུགས་ན། གཙང་བོར་གཞིར་བཞག་སྟེ་ལྷོ་བྱང་དང་སྟོད་ལྟ་བུ་སོགས་ཀྱི་ཕྱོགས་ཙམ་གྱི་མིང་ལས་བྱེ་བྲག་གི་ཡུལ་སྡེ་སོགས་མིང་མེད་ཀྱང་། མཚམས་རེར་གཙང་བོ་དང་འབྲེལ་ཏེ་ཡར་ལུང་གཙང་བོའི་ཕུ་མདའི་ཡུལ་ལུང་བྱེ་བྲག་པ་རེ་ཟུང་ངོས་བཟུང་ནི་སྐབས་འདིའི་མགུར་ཚིག་ལྟ་བུ་སྟེ། མགུར་འདི་ལས། མདོ་ནས་ནྀ་རྩང་དུ། བསྲིང། ཞེས་པའི་མདོ་དང་རྩང་ཞེས་པ་གཉིས་བྱུང་། སྤྱིར་ན་རྩང་ཞེས་པ་ནི་ས་ཁོངས་བྱེ་བྲག་པ་ཞིག་གི་མིང་དུ་ད་ལྟའང་ཡི་གེ་ཅུང་ཟད་འགྱུར་བ་ལས་མིང་སོ་ན་གནས་ཡོད་དེ། བཙན་པོའི་དུས་སུ་ད་ལྟའི་གཙང་གི་ཡུལ་ལ་རྩང་ཁོ་ནར་བྲིས་ཡོད་དེ། ཕལ་ཆེར་བཙན་པོའི་དུས་ཀྱི་རུ་བཞི་ལས་གཡས་རུ་དང་རུ་ལག་གི་མངའ་ཁོངས་ཀྱི་སྤྱི་མིང་ལྟ་བུར་གྱུར་ཡོད། རྩང་ཞེས་པའང་ཅུང་སྔ་སྟེ། རྒྱལ་ཕྲན་བཅུ་གཉིས་ཀྱི་དུས་སུའང་། ཏུན་ཧོང་ཡིག་རྙིང་ལས། PT1286,0007/0008 མྱང་རོའི་པྱེད་ཀར་ན། རྗེ་རྩང་རྗེ་འི་ཐོད་ཀར་། བློན་པོ་སུ་དུ་དང་གནང་གཉིས། ཞེས་པར་མྱང་རོ་ཕྱེད་དཀར་གྱི་རྗེ་བོ་རྩང་རྗེ་ཐོད་དཀར་ཞེས་རྩང་ཞེས་པ་མངོན་ཞིང་། ཡང་། རྒྱལ་ཕྲན་སྐོར་གྱི་ཏུན་ཧོང་ཡིག་རྙིང་ཕྱི་མོ་གཞན་ཞིག་ལས། PT1060,0074 ཡུལ་ཁ་ལ་རྩང་སྟོད་རྩང་གྱི་དངོ་མཁར་གྱྀ་ནང་ནའ། ལྷ་རྩང་ལ་འི་བྱེའུ་། རྗེ་རྩང་རྗེའི་ཕྱྭའ།། བློན་པོ་སུདུ། དང་གནང་། ཁོལ་རྩང་ཀོལ་རེའུ་རྫྀ།། རྟ་རྩང་རྟ་དགློ་ལོང་ལེག་པའ།། ཞེས་རྩང་སྟོད་དང་རྩང་རྗེ། རྩང་ཀོལ། རྩང་རྟ་ཞེས་སྔར་ལས་ཀྱང་ངོས་འཛིན་གསལ་བར་བྱུང་།

ཡང་ཏུན་ཧོང་ཡིག་རྙིང་གི་ཤོག་དྲིལ་གཞན་ཞིག་ཏུ། PT1136 ༄།། ཡུལ་ཆབ་ཀྱི་ཡ་བགོ་ན་རྩང་ཧོ་དེ་འི་ཧོས་བདག་དང་་་། ཞེས་ཡར་ཆབ་རྩང་བོའི་ཡ་མགོ་ན་རྩང་ཞེས་པ་ཡོད་ཚུལ་བསྟན། དེས་ན་རྒྱལ་རྒྱལ་བཅུ་གཉིས་སུ་རྩང་ཡུལ་དུའང་རྒྱལ་ཕྲན་རེ་འགའ་ཡོད་པས་ཡིན་ནམ། དེ་དག་གི་རྩང་གི་མིང་བཀོད་སྟངས་སོགས་ཁྱད་པར་ཅུང་ཟད་ཡོད་ནའང་གཞི་རྩའི་ཆ་ནས་འདྲ་བས། གང་ལྟར་རྒྱལ་ཕྲན་དེ་དག་གི་སྐབས་སུ་གཙང་བོའི་སྟོད་རྒྱུད་ན་རྩང(གཙང)ཞེས་པའི་ཞིག་ཡོད་པ་ར་འཕྲོད་ཐུབ་པ་དེ་ཡིན། དེ་བཞིན་དུ་འུ་ཅག་ལ་ཆ་རྒྱུས་ངེས་ཅན་ཡོད་པ་ནི་གནམ་རི་སྲོང་བཙན་གྱི་དུས་ཏེ། PT1287,0198/0199 ཁྱུང་པོ་སྤུང་སད་ཀྱིས། རྩང་བོད་ཀྱི་རྗེ་བོ་མར་མུན་མགོ་བཆད་དེ།། རྩང་བོད་ཁྱིམ་ཉི་གྲི་།། བཙན་པོའི་པྱག་དུ་པུལ་ཏེ། ། ཟུ་ཙེ་གློ་བ་ཉེ་འོ།། ཞེས་གནམ་རི་སྲོང་བཙན་དུས་སུ་རྩང་བོད་ཅེས་པའི་གནས་ཚུལ་འདི་ཡང་གསལ་བར་མ་ཟད། དེ་ལ་དུད་ཁྱིམ་ཉིས་ཁྲི་ཡོད་པ་ཁྱུང་པོ་སྤུང་སད་ཟུ་ཙེས་བཙན་པོར་ཕུལ་ཚུལ་བཤད་ཡོད། ཟུ་ཙེས་ཀྱང་རྩང་གི་ཡུལ་ཁམས་ཆེན་པོ་དེ་ཉིད་དབང་བསྒྱུར་བ་གཟི་བརྗིད་དུ་ངོམ་སྟེ། ཕྱིས་སུའང་ཁོང་གི་མགུར་ལས། PT1287,0222 རྩང་བྲང་ནྀ་ཡ་སྟོད་ཀྱི་ཐང་པྲོམ་ནྀ་རྒོད་ལྡིང་བའ། ། རྒོད་བཀུཾ་ནྀ་ཟུ་ཙེས་བཀུམ།། ཞེས་རྩང་བྲང་ཞེས་པ་ནི་གོང་དུ་བརྗོད་པའི་རྩང་བོད་མར་མུན་གྱི་ཕོ་བྲང་དུ་གོ་ཆོག་པས། རྩང་བོད་མར་མུན་ལ་གཏོགས་པའི་ཡུལ་ཁམས་དབང་བསྒྱུར་བས་རང་གི་ཆེ་བ་ངོམ་ཞིང་གཞན་ཟུར་ཟའང་བགྱིས་ཡོད་མོད། དོན་དུ་རྩང་བོད་དབང་སྒྱུར་མཁན་ཡང་ཁོང་གཅིག་པུའི་མཛད་རྗེས་ག་ལ་ཡིན་ཏེ། བློན་རབས་ལས། PT1287,0074/0075 དེའི་འོག་དུ་མོང་། ཁྲི་དོ་རེ་སྣང་ཚབ་ཀྱིས་བྱསྟེ།། འཛངས་ཀྱི་ཚད་ནྀ་། ། རྩང་བོད་ཀྱི་ཇོ་བོ་མར་མུན་བརླགས་ཏེ། ཞེས་པས་རྩང་བོད་བརླགས་པ་ནི་ཟུ་ཙེའི་ཁོ་ནའི་དཔའ་མཛངས་ལས་བྱུང་བ་མིན་པར་དེའི་ཟླ་ལ་མོང་ཁྲི་དོ་རེ་སྣང་ཚབ་སོགས་ཀྱང་ཡོད་པ་ཤེས་ཐུབ། དེ་ལྟར་རིམ་གྱིས་རྩང་ནི་རུ་བཞི་ལས་གཉིས་སུ་གཏོགས་ལ། དེའང་མུ་མཐུད་དུ་རྒྱ་བསྐྱེད་པའམ་ལོག་པ་རྣམས་སླར་བཅུག་པ་གང་ལྟར་ཡང་། PT1288,0020 བློན་ཆེ་སྟོང་རྩན་གྱིས་གློ་བོ་དང་རྩང་ཧྱའ་བཀུར་ཕར་ལོ་གཅྀག ཅེས་གསལ་བས། མགར་སྟོང་བཙན་གྱིས༦༥༢ ལོར་ལྷོ་ནུབ་མཚམས་ཀྱི་གློ་བོ་དང་རྩང་རྒྱ་ཞེས་པའང་དབང་དུ་བསྡུས་ཚུལ་བཀོད་པ་དེ་བཞིན་ནོ།།

དེ་ལྟར་རིམ་གྱིས་རྩང་གི་ཡུལ་ཁམས་ལ་རྩང་ཆེན་ཞེས་པའི་མིང་བརྡའང་བྱུང་སྟེ། ST0750,0038 (༦༨༤ལོ)རྩང་ཆེན་གྱྀ་མངན་བཞྀ་ལས། གཉིས་སུ་བཅོས་ཕར་ལོ་གཆིག ཅེས་པས་རྩང་ཆེན་དུ་མངན་དཔོན་བཞི་ཡོད་པ་ལས་གཉིས་སུ་བཅོས་པའི་གནས་ཚུལ་བྱུང་ཞིང་། དེ་ལྟར་བཅོས་པའང་རྒྱུ་རྐྱེན་དུ་མ་ཡོད་ངེས་ཏེ། རྩང་ཆེན་དུ་ངོ་ལོག་གི་གནས་ཚུལ་བྱུང་བ་དང་གནག་ནད་བྱུང་བ་སོགས་ལས་རྩང་ཆེན་གྱི་མངན་དཔོན་སྒྲིག་གཞི་བསྐྱར་བཅོས་བྱེད་པར་འདོད། ST0750,0048 (༦༨༧ལོ)རྩང་ཆེན་གྱྀ་ལོག་ཕོ་དང་ཕོ་བཙུད་པར་ལོ་གཆྀག ཅེས་པས་ངོ་ལོག་པ་སླར་བཅུག་པའི་གནས་ཚུལ་བཀོད་པ་དང་། ST0750,0055 (༦༩༠ལོ)རྩང་གྱྀ་གླིང་ཀར་ཚལ་དུ་བསྡུསྟེ། རྩང་ཆེན་པོའྀ་ཁྲམ་དམར་པོ་བཏབ་ཕ་དང་། ཞེས་པས་རིམ་གྱིས་་རྩང་ཆེན་པོའི་བྱེ་བྲག་གླིང་དཀར་ཚལ་དུ་རྩང་ཆེན་གྱི་དམག་བསྡུ་བའི་ལས་འགུལ་སྤེལ་བའང་དཔག་ཐུབ། ST0750,0064 (༦༩༣ལོ)རྩང་ཅེན་པོའི་འབྲོག་བསྐོས་ནས། ཞེས་དང་། ST0750,0148 (༧༡༥ལོ)རྩང་ཅེན་གྱྀ་བྲུང་པ་ལང་ས་ཙེང་གུམ་སྟེ། ཞང་ཁྲྀ་མཉེས་སྨོན་ཟུང་བཅུག ཅེས་དང་། ST0750,0162 (༧༡༩ལོ) རྩང་ཆེན་གྱྀ་རྗེ་ཞིང་གྱྀ་པྱིང་རིལ་བཏབ། ཅེས་རྩང་ཆེན་དུ་ཁྲལ་བསྡུས་ཤིང་། ST0750,0165 (༧༢༠ལོ)རྩང་ཆེན་གྱྀ་རྗེ་ཞིང་གླྀངས་གྱི་པྱྀང་རིལད་གྱི་རྩིས་བགྱྀས། ཞེས་རྩང་ཆེན་དུ་འབྲོག་ཁྲལ་བསྡུས་པའི་རྩིས་བླངས་ཚུལ་བཀོད་ཅིང་། ST0750,0209/0210 (༧༣༡ལོ)རྩང་ཆེན་གྱྀ་བྲུང་པ། ཞ་སྔ་ཐང་རྩན་བྱུང་ནས། ཞེས་རྩང་ཆེན་གྱི་བྲུང་པ་ལས་གནས་ནས་ཕྱུང་ཚུལ་བཀོད་པ་ལྟ་བུའོ།།

དེས་ན་རྩང་ཆེན་ནི་རུ་ལག་དང་གཡས་རུ་གཉིས་ལ་གོ་ཞིང་། མཚམས་རེར་སྲིད་ཀྱི་དོན་རྐྱེན་རེ་འགའ་ལས་རུ་ལག་ཚང་མ་དང་གཡས་རུའི་སུམ་ཆ་གཅིག་ཙམ་ཏུ་འཇུག་པ། ཡང་ལན་རེར་སྟོད་ཀྱི་གུ་གེར་ཉེ་འཁོར་བར་དུ་འཇུག་པའང་ཡོད་པར་འདོད། ཁྲམ་བྱང་དུ། སྤྱི་རྩང་གི་སྡེ། ཞེས་དང་། ཡང་། ཡར་རྩང་གི་སྡེ་གུ་རིབ་ངང་པ་གསེར་སྒོང་འདྲ་བ་ཤི་བ། ཞེས་པ་ལྟ་བུ། ཡིན་ནའང་། ད་ལྟའི་ལོ་རྒྱུས་པ་རེ་ཟུང་གིས་རྩང་ཆེན་ནི་མི་སྣའམ་བྱ་དགར་འཇུག་ཚུལ་སོགས་ཀྱི་ཀླན་ཀ་ཅུང་ཟད་ཡོད་ནའང་། སྔ་མ་ནི་རྗེ་ཞིང་ཞེས་པ་ལས་བྱུང་བར་ངེས་ཀྱང་། ST0750,0157 རུ་གསུམ་གྱྀ་རྗེ་ཞྀང་གླྀངས་གྱི་པྱིང་རྀལ་དང་། ཞེས་དང་། ཡང་ན། ST0750,0160 རུ་གསུམ་གྱྀ་རྗེ་ཞིང་གྱྀ་ཕྱིང་རྀལ་གྱྀ་རྩིས་དང་། ཞེས་པས་རུ་གསུམ་གྱི་རྗེ་ཞིང་ཞེས་པ་དང་རྩང་ཆེན་གྱི་རྗེ་ཞིང་ཞེས་པས་རྗེ་ཞིང་གི་འཇུག་ཡུལ་ཅུང་འདྲ་བས། རྩང་ཆེན་རུ་གསུམ་དུ་གོ་བར་མི་འཁྲུལ་བར་མི་སྣ་ལ་འཁྲུལ་བ་ནི་ཨ་མཚར་ཆེ། ཕྱི་མ་རྩང་ཆེན་ནི་ཡིག་ཚང་གི་བྱ་དགར་གོ་བའི་འཁྲུལ་རྐྱེན་ནི་ཡིག་ཚང་ཆེན་མོ་ཞེས་པའི་གོ་བ་ཡོད་པར་མ་ཟད། འཇང་ཡུལ་གྱི་ཀོ་ཙིའི་རྡོ་རིང་ལས། ལོང:ལ:དག:གཙང:ཅེན:སྩལད: ཅེས་པས། གཙང་ཆེན་དང་རྩང་ཆེན་གོ་བ་གཅིག་ཏུ་ཉ་ཉུང་བསྲེས་པ་ཙམ་ལས། སྔ་དུས་བཙན་པོའི་སྐབས་སུ་རྩང་དང་གཙང་གཉིས་སྒྲ་གདངས་ཐ་དད་དུ་ཡིན་པར་མ་ཟད། དེང་དུས་ཀྱང་མདོ་སྨད་སོགས་སུ་མིང་བརྡ་དེ་གཉིས་ཀྱི་གདངས་ཐ་དད་དུ་ཡོད། སྐབས་དེར་མཚོན་ན་རྩང་ཆེན་དང་གཙང་ཆེན་གཉིས་ནི་ལོ་རྒྱུས་ཀྱི་ཆེད་སྤྱོད་བརྡ་ཆད་ཤིན་ཏུ་གལ་ཆེན་གཉིས་ཡིན་པས་དེ་བས་ཀྱང་ནོར་མི་སྲིད་དོ།།  ཡང་དེང་དུས་ཀྱི་ལོ་རྒྱུས་པ་རེ་ཟུང་གིས། གནའ་བོའི་རྩང་གི་ཡུལ་མིང་ལ་ད་ལྟའི་འབྲི་ཚུལ་ལྟར་གཙང་ཞེས་པའང་སྔར་ནས་འཇུག་སྟངས་ཡོད་ཚུལ་དུ། དེའི་ཁུངས་སུ་ཞྭ་ལྷ་ཁང་གི་རྡོ་རིང་ཤར་མ་ལས་དཔེར་དྲངས་ཡོད་དེ། བློན་སྣང་བཟང་འདུས་ཀྔོ་གི་བུ་ཚ་འཕེལ་རྒྱུད་དམངས་ཀྱི་རྣམས་ཀྱང་གཙྔ་དང་སྟོང(སྟོད)ལས་སྩོགས་པ་སྒོར་བདེ་བའྀ་རྣཾས། ཞེས་པ་ལས་གཙང་ཞེས་པ་རྩང་གི་དོན་དང་གཅིག་ཏུ་བཞེད་དེ་དྲངས་ཀྱང་། སྐབས་འདིའི་གཙང་ནི་ཡིག་གཙང་ངམ་ཡིག་ཚང་གི་གོ་དོན་ལས་ཡུལ་མིང་ལ་ཡེ་ནས་མི་འཇུག་སྟེ། ཚིག་འདིའི་གོང་འོག་ཏུའང་ནན་བརྗོད་བྱས་པ་ནི། ཡྀ་གེ་གཡུང་དྲུང་སྔར་གནང་བ་བས་བསྟོད་དེ་ཆེར་གནྔ་བ།། ཞེས་དང་། ཡང་། ཞང་ལོན་ཡྀ་གེ་ཅན་གྱི་ཐང་དུ་གནང་བ་དྔ་། ཞེས་པ་གཙང་ནི་ཡིག་གཙང་ལ་གོ་བ་ལས་གཞན་མིན་ནོ།། དེས་ན་རྩང་གི་ཡུལ་མིང་གཙང་དུ་དུས་ནམ་ཞིག་ཏུ་འགྱུར་རམ་ཞེ་ན། ཕལ་ཆེར་དུས་རབས་བཅུ་གསུམ་པའི་སྔ་རྗེས་ཙམ་བྱུང་བར་འདོད་དེ། དེ་ནི་ས་སྐྱ་པཎ་ཆེན་འབྲེལ་བ་ཡོད་པར་སེམས། ཁོང་གིས་བརྩམས་པར་གྲགས་པའི་དག་པར་བྱེད་པ་སྡེབ་སྦྱོར་རིན་ཆེན་རྒྱ་མཚོ་ལས། གཙང་དང་གཙང་མ་ག་གཙང་ལ།། ཞེས་གཙང་སྔ་མ་ནི་ཡུལ་རྩང་ལ་གཙང་དུ་འཇུག་ཚུལ་གསུངས་ཏེ་དག་ཡིག་ཏུ་བཀོད་པ་དང་།  ཡང་ཁོང་གིས། དག་པར་བྱེད་པ་སྡེབ་སྦྱོར་རིན་ཆེན་རྒྱ་མཚོ་རྒྱས་པ་ལས་ཀྱང་། དབུས་གཙང་གཙང་མ་ག་གཙང་ལ།། ཞེས་སྔར་ལས་ཀྱང་དབུས་གཙང་ཞེས་ཁ་གསལ་དུ་བཏང་སྟེ་གསུངས་པས་རིམ་གྱིས་རྩང་གི་ཚབ་ཏུ་གཙང་འབྲི་བའི་སྲོལ་བྱུང་བར་ངེས།

ཡིན་ནའང་། སྐབས་འདི་དུས་ཀྱང་རྩང་ཡུལ་ལ་གཙང་ཡུལ་ཞེས་པའི་དར་སྲོལ་ཤིན་ཏུ་མི་ཆེ་བར་འདོད་དེ། དཔེར་ན། བཅོམ་ལྡན་རིག་རལ་གྱིས། སྒྲའི་བསྟན་བཅོས་སྨྲ་བ་རྒྱན་གྱི་མེ་ཏོག་ཅེས་པར། གཙང་བ་དྲི་མེད་རྩང་ནི་ཡུལ།། ཞེས་གཙང་དང་རྩང་གི་འཇུག་ཡུལ་ཐ་དད་ཡིན་པར་གསུངས་མོད། རིམ་གྱིས་ཆོས་སྲིད་རིག་གནས་གང་གི་ཐད་ནས་ཤུགས་རྐྱེན་ཆེ་བའི་ས་པཎ་གྱི་རྗེས་སུ་འབྲངས་ཏེ་རྩང་ལ་གཙང་ཞེས་པའི་འབྲི་སྲོལ་དར་བའམ། ཡང་ན། སློབ་དཔོན་བསོད་ནམས་རྩེ་མོས་གསུངས་པ་བཞིན། དེ་ལ་རང་གི་ཡུལ་གྱི་སྐད།། མ་དག་པ་ཡི་ནོར་བ་མཐོང་།། དབུས་པས་ར་ཡི་མགོ་ཅན་དང་།། རྐྱང་པར་འདྲ་ཞིང་ཡ་སྟ་དང་།། ར་སྟ་ཡང་ནི་ནོར་བ་ཡོད།། གཙང་པས་མས་འཕུལ་འས་འཕུལ་དུ།། ནོར་ཅིང་ར་ཡི་མགོ་ཅན་དང་།། གས་འཕུལ་དས་འཕུལ་ནོར་བ་ཡོད།། ཅེས་པའི་དབུས་གཙང་གི་ཡུལ་ལུང་དུ་མགོ་འདོགས་ཕུལ་རྟེན་གྱི་སྒྲ་ཟུར་ཕྱིན་པ་མེད་པར་ཉམས་བཞིན་པ་དང་དཀྱུས་གཅིག་ཏུ་བྱུང་བ་ཡིན་ཡང་སྲིད་དོ།།  དེས་ན་སྲོང་བཙན་སྒམ་པོའི་མགུར་ལས། མདོ་ནས་ནྀ་རྩང་དུ། བསྲིང་། ཞེས་པའི་རྩང་ནི་ཡར་ལུང་གཙང་བོའི་སྟོད་རྒྱུད་ཀྱི་ཡུལ་ཁམས་ཏེ་རྩང་ངམ་རྩང་ཆེན་གྱི་ཁམས་བར་སྲིད་དུ་བཙན་པོའི་མངའ་ཐང་རིང་དུ་བསྲིངས་པར་གོ་བའོ།། སྲོང་བཙན་སྒམ་པོ་ཡབ་སྲས་ཀྱི་རིང་དུ་ཐོག་མར་མངའ་ཐང་རྒྱ་བསྐྱེད་སྐབས་ཡར་ལུང་གཙང་བོ་གཞིར་བཞག་སྟེ་བྱུང་བ་ནི་གོང་དུའང་བརྗོད་ཟིན་པས། འདི་ནས་ཀྱང་མདོ་ནས་རྩང་དུ་རྒྱ་བསྐྱེད་པར་བརྗོད་པའང་མདོ་ཡང་ཡར་ལུང་གཙང་བོའི་མདོ་ལ་གོ་དགོས་ཤིང་། དེ་ཡང་གཙང་བོའི་ཕུ་དང་མདའ་ཞེས་སུ་བརྗོད་པ་ནི། PT0126,0165/0166 ཕུ་ནི་སྟོང་སྡེ། མདའ་ནི་རྒྱ་སྡེ། ཞེས་པ་དོན་དུ་ཡར་ལུང་གཙང་བོའི་ཕུ་དང་མདའ་ལ་གོ་བ་དང་། ཡང་ན། གཙང་བོའི་ཡ་མགོ་དང་མ་གཞུག་ཅེས་ཀྱང་བརྗོད་སྲོལ་ཡོད་དེ། PT 1136 ༅།། ཡུལ་ཆབ་ཀྱི་ཡ་བགོ་ན་རྩང་ཧོ་དེ་འི་ཧོས་བདག་དང་། ཞེས་ཆབ་ཀྱི་ཡ་བགོའམ་ཡ་མགོ་ཞེས་པས་ཀྱང་ཡར་ལུང་གཙང་བོའི་མགོ་སྟོད་དུ་གོ་བ་དང་། ཡང་། PT1136 ཡུལ་ཆབ་ཀྱི་ཡ་བགོར། རྗེ་གུ་གེ་རྐང་ཕྲན་གྱི་གཉེ་བོ་མི་བརྒྱ་རྐྱང་བརྒྱ་ཞིག་ཡས་སེ་བྱུང་ན།། ཞེས་པས་ཀྱང་གཙང་བོའི་ཡ་མགོ་གོ་བར་བྱེད། PT1287,0354/0355 ན་ནིང་ནྀ་གཞེ་ནིང་སྔ། ཆབ་ཆབ་ནྀ་མ་གཞུག་ནས། ལ་བོང་ནི་རྗེ་དང་སྐོལ། ཞེས་པ་ནི་ཁྲི་ལྡེ་གཙུག་བཙན་དུས་ཀྱི་ཆབ་ཆབ་མ་གཞུག་ནི་འཇང་ཡུལ་དུའང་གོ་བའི་སྐབས་ཀྱང་བྱུང་། PT1287,0032/0033 རྩང་པོའི་གཞུང་ལ་བཏང་ངོ་། ཆབ་གཞུག་སེར་ཚངས་སུ། ཞེས་པ་ནི་དྲི་གུམ་གྱི་དུས་སུ་ཁེལ་བས་གཙང་བོའི་མ་གཞུག་གམ་ཆབ་མཇུག་ནི་ཀོང་ཡུལ་དུའང་གོ་བར་སྣང་། ཡང་ལན་རེར་རྩང་དང་མདོ་ཞེས་སུ་བརྗོད་སྲོལ་ཡང་འདུག་པས། མདོ་ནི་ཕལ་ཆེར་ལྟོས་བཅས་སུ་ཀོང་ཡུལ་དང་སྤོ་བོའི་ཡས་མས་ཤིག་ཏུ་གོ་ཆོག་པར་སྙམ་སྟེ། ཏུན་ཧོང་ཡིག་རྙིང་གི་མོ་ཡིག་ལས། ST6878 མ་སྲིན་ནི་འདུན་ཕྲན་གྱིས་ ཡུལ་གྱི་ནི་མདོ་ཡང་བཅད།། ཅེས་ཡུལ་གྱི་མདོ་ཞེས་པ་གསལ་ཞིང་། ཡང་དེ་ལས། མདོ་རུ་ནི་ཤྰ་རྒལ་འབྱུང། བྱང་མཚར་ནི་དཀར་བླང་སྙམ།། ཞེས་པའི་མདོ་སོགས་ཡོད་ཀྱང་། སྐབས་འདིའི་མདོ་དང་འབྲེལ་མིན་བཤད་དཀའ་ཡང་མདོ་ཞེས་པའི་བརྡ་སྲོལ་གྱི་དཔྱད་གཞིར་འོས་པ་ཞིག་གོ།

ལྟམ་ཤུལ་དགའ་ཐང་འབུམ་པ་ཆེའི་ཡིག་རྙིང་ལས། མདོ་རི་ལུང་གསུམ་དུ། མདོ་རྗེ་བཙན་བའི་ཁབ་དུ་གཤེགས། ཞེས་མདོ་རི་ཞེས་པ་དང་། ཡང་། དེ་ལས། ཡུལ་མདོ་རོ་ལུང་གསུམ་ན།། མདོ་རྗེ་སུམ་པོ་དང། ཞེས་མདོ་རོ་ཞེས་པའང་གསལ་བས། མདོ་རི་དང་མདོ་རོ་གང་ཡིན་ཡང་ཕལ་ཆེར་ཡར་ལུང་གཙང་བོའི་མདོ་ཕྱོགས་སུ་གོ་ན་འགྲིག་པར་སྙམ་ཡང་དཔྱད་འོས། དེ་ལས་ཅུང་ཁ་གསལ་བར་བགྱིས་ན། ཏུན་ཧོང་ཡིག་རྙིང་ལས། PT0126,0118 བདག་ཅག་རྩང་སྨད་མདོ་ནས་ཚུར་མཆིས་ན། ཞེས་པས་རྩང་སྨད་མདོ་ཞེས་པའང་ཀོང་ཡུལ་དུ་གོ་བཞིན་འདུག་པས། སྐབས་འདིའི་ཆབ་སྲིད་ཀྱི་མངའ་ཐང་མདོ་ནས་རྩང་དུ་བསྲིང་ཚུལ་ཡང་། ཀོང་པོ་བྲེ་སྣ་ཞེས་པར་བཅད་ཚུལ་སོགས་དང་ཅུང་མཐུན་པས་ཕལ་ཆེར་ཀོང་ཡུལ་ཡས་མས་ཙམ་དུ་མདོ་ལ་གོ་ཆོག་པར་སྙམ། རིམ་གྱིས་མདོ་ཞེས་པའི་གོ་བའང་གཙང་སྨད་ཙམ་དུ་མ་ཡིན་པར། བྱང་གི་མཐའ་མཚམས་སོགས་སུའང་མདོ་སྨད་ཅེས་པ་ལྟར་མདོ་ཁྱབ་ཁོངས་ཀྱང་གཞན་ནས་གཞན་དུ་མཆེད་དོ།། དེ་ལྟར་ན་སྐབས་འདིའི་མདོ་ནི་གཙང་སྨད་ཙམ་དུ་གོ་བས་ཆོག སྤྱིར་ན་ཡར་ལུང་གཙང་བོའི་ལྷོ་བྱང་དང་ཕུ་མདའ་དག་ཏུ་ཆབ་སྲིད་རྒྱ་བསྐྱེད་པར། བློན་དབའ་དབྱི་ཚབ་སོགས་དཔའ་མཛངས་ཀྱི་མཛད་རྗེས་ཉག་གཅིག་ལ་བརྟེན་ནས་བྱུང་བར་བསྔགས་པར་བརྗོད་པ་ཡིན་ཏེ། ཕྱིས་སུ་ཞྭ་ལྷ་ཁང་གི་རྡོ་རིང་དུའང་། སྔོན་མྱང་དབྰས་སྙྀང་ཉེ་ཞྔི་ཞོ་ཤ་ཕུལ་བར་འདྲ་བ་ལས། དབྰས་ཀྱྀ་ཟླ་དྔ་སྦྱར་ན། ཞེས་པས་ཁྲི་ལྡེ་སྲོང་བཙན་གྱིས་ཀྱང་དབའ་ཡིས་སྐབས་འདིའི་མཛད་རྗེས་དག་ཀྱང་། མྱང་གི་ཆེ་བ་དང་མཉམ་དུ་བསྐྱར་དུ་བཀོད་པས་ཀྱང་ཤེས་ཐུབ། མདོར་ན་ཚིག་རྐང་བཞི་ལས་དབའ་ཡི་ཁྱིམ་རྒྱུད་ཀྱིས་འདས་པའི་དུས་སུ་བཙན་པོའི་ཆབ་སྲིད་མངའ་ཐང་བསྐྱེད་པར་མཛད་ཆེས་ཆེར་བཞག་པར་གཟེངས་བསྟོད་དང་འབྲེལ་བའི་གནས་ཚུལ་གསལ་བཤད་བགྱིས་ཡོད།

PT1287,0267/0268 འཐམ་འཐམ་ནྀ་འདུ་འདུ་ན། ངག་རྗེས་ནྀ་མྱིས་མྱྀ་བརྗོད་།། འགྲོ་འགྲོ་ནི་འཆམ་འཆམ་ན།། ཆགས་ལྷམ་ནྀ་ཆུས་མྱྀ་སྦང། ཞེས་པའི་མགུར་ཚིག་ཤོ་ལོ་ཀ་བར་མའི་བསྟན་དོན་ནི། གཙོ་བོ་རྒྱལ་བློན་བར་གྱི་མཐུན་སྒྲིལ་ནི་གལ་འགངས་ཆེ་བར་བརྗོད་ཡོད་དེ། བཙན་པོ་དག་གི་རིང་དུ་བཙན་པོ་གཉའ་ནས་གནོན་ཞིང་། ཆབ་སྲིད་ལ་བྱས་རྗེས་ཆེ་བ་དཔའ་བ་དང་མཛངས་པའི་ལས་བྱེད་པ་དག་མཐུན་ཞིང་བཀུར་བའི་སྲོལ་ཡོད་དེ། གཉའ་ཁྲི་བཙན་པོའི་དུས་སུའང་ཞི་དྲག་གཉིས་ཀྱི་རྒྱལ་ཕྲན་ཆམ་ལ་ཕབ་ཚུལ་བརྗོད་པ་ནི། PT1286,0028/0029 མཐའ་མ་འོ་ལྡེ་སྤུ་རྒྱལ་གྱྀ་དབུ་རྨོག་མ་ཐུབ་སྟེ། མནར་ནྀ་ལྷ་ནར་གྱིས་མནརད། ཐུན་ནྀ་རྗེ་ཐུན་གྱིས་བཐུན་ཏེ་བཀུག་གོ།། ཞེས་པའང་དྲག་འདུལ་བྱ་དགོས་པ་དྲག་པོའི་དཔུང་གིས་བཏུལ་ཞིང་། ཞི་བའི་དམངས་ལ་འཆམ་ཞིང་མཐུན་པའི་ཐབས་སུ་བསྐྱངས་ཏེ་མངའ་ཞབས་སུ་བཀུག་པ་ནི། བཙན་པོའི་དམག་ཇུས་ཀྱི་གཞི་རྩའི་རིང་ལུགས་ལྟ་བུ་ཞིག་ཏུ་གྱུར་བ་ནི། ཕྱིས་སུ་སྲོང་བཙན་སྐབས་ཀྱི་སུམ་པ་དབང་དུ་བསྡུ་ཚུལ་ཡང་ཆེས་ཞི་ཞིང་མཐུན་པའི་ཐབས་སུ་བཀུག་པ་དེ་ལྟ་བུའོ།། ད་དུང་སྲོང་བཙན་གྱི་ཐུན་མིན་གྱི་ཆབ་སྲིད་སྐྱོང་ཐབས་བརྗོད་སྐབས་ཀྱང་། PT1287,0450/0451 གནོད་པ་ནྀ་པྱེ། བཙན་བ་ནྀ་བཅུགས། སྡོ་བ་ནི་སྨད། འཇིགས་པ་ནྀ་མནན།། བདེན་བ་ནྀ་བསྙེན། འཛངས་པ་ནྀ་བསྟོད། དཔའ་བོ་ནྀ་བཀུར། ཞེས་པ་ནི་ཚིག་ཉུང་ལ་དོན་འདུས་པའི་བཙན་པོའི་མཛད་སྟངས་ཀྱི་སྡོམ་ཚིག་ཅིག་ཡིན་པས། དེ་ལས་ཀྱང་རྒྱལ་བློན་བར་གྱི་མཐུན་ལམ་སྐྱོང་སྟངས་ཀྱི་ཐབས་ཤེས་རྙེད་ཐུབ། ཁྲི་སྲོང་ལྡེ་བཙན་སྐབས་སུའང་། PT1287,0368 ལེགས་ཀྱི་བྱ་དགའ་ནྀ་རངས་པར་བྱིན། ཉེས་གྱྀ་ཆད་ནྀ་དམྱིགས་སུ་ཕོག་པར་མཛད་དོ།། ཞེས་ལེགས་ཉེས་ཀྱི་དབྱེ་བ་ཆེས་ཆེར་ཕྱེས་ཏེ། ལེགས་པ་བྱ་དགས་ཡིད་ཚིམ་པར་བྱེད་པའི་མཐུན་ལམ་སྐྱོང་བ་ལྟ་བུ་ཡིན།

འདི་དང་མཚུངས་པར་ཏུན་ཧོང་ཡིག་རྙིང་གི་ལེགས་ཀྱི་དོན་བྱེ་བྲག་བསྟན་པ་ཞེས་པར། ཉེས་པའི་ཆད་པ་དམྱིགས་སུ་མ་བབ་དང་།། ལེགས་པའི་དམྱིག་འགགས།། ལེགས་པའི་བྱད་ག་(བྱ་དགའ)ཐོག་དུ་མ་བབ་དང་། ཉེས་པའི་སྐྱོན་འཕེལ་ལོ།། ཞེས་པས་ཀྱང་། བཙན་པོའི་རྒྱལ་བློན་གྱི་ཆབ་སྲིད་ཀྱི་མཁས་མཛངས་ཀྱང་མི་ཆོས་རིག་གནས་རྒྱབ་བརྟེན་འདི་ལྟ་བུ་ཡོད་པས། ད་གཟོད་ཉམས་མྱོང་མང་བོ་གཅིག་ཏུ་བསྡུས་ནས་ཆབ་སྲིད་སྐྱོང་བའི་ལས་ལ་ཞུགས་ཡོད། ཕྱྭ་དང་དམུ་ཡི་སྐོར་ལས་ཀྱང་། PT0126,0166/0167 རྗེ་གཅིག་གི་འབངས་ལ་ཡུལ་ཅྀག་གི་མྱི་། ས་ཅིག་གི་འབྲས་། རི་ཅིག་གི་རྡོ་། ཁྱེད་འོ་སྐོལ་ལ་དབྱར་མྱེད་པས། ཞེས་པའང་ཕྱྭ་དམུ་གཉིས་དབྱེར་མེད་གཅིག་ཡིན་ཚུལ་བརྗོད་པས། དོན་དུ་གཉེན་གཅིག་གམ་མཐུན་སྒྲིལ་གཅིག་གྱུར་ཡིན་ཚུལ་བསྟན་པ་ལྟར་ཡིན། དེ་བཞིན་དུ་གནམ་རི་སྲོང་བཙན་དུས་སུ་གཙང་བོའི་བྱང་རྒྱུད་ཀྱི་ཟིང་པོ་རྗེ་ཁྲི་པངས་སུམ་དབང་བསྡུས་པའང་། མཉམ་འབྲེལ་གྱི་མཐུན་སྒྲིལ་ལ་བརྟེན་ནས་རྒྱལ་ཁ་བླངས་པ་ཡིན་ཚུལ་མྱང་ཞང་སྣང་གི་མགུར་དུའང་གསལ་ཏེ།PT1287,0240/0241/0242 ན་ནྀང་ནི་གཞེ་ནིངསྔ།། ཕོ་མ་འྀ་ནི་འབྲོང་བཀུཾ་བ། ལྷོ་ཤིང་ནི་སྨྱུག་མོ་རྒྱལ།། ལྕགས་ཀྱྀས་ནྀ་མ་དྲལ་ན།། སྨྱུག་གྀས་ནི་རེ་མྱི་པུགས།། རྒོད་ཀྱིས་ནི་མ་བསྒྲོན་ན་། འབྲོང་ལ་ནྀ་རེ་མྱི་འཇེན།། ཞེས་པ་ནི་ཟིང་པོ་རྗེ་འབྲོང་ལ་དཔེར་བླངས་ནས། དེ་གསོད་པར་མདའ་ཞིག་དགོས་ཤིང་། མདའ་ལའང་སྨྱུག་མ་དང་ལྕགས། སྒྲོ་བཅས་མཉམ་དུ་འདུས་ཏེ་གྲུབ་པས་ད་གཟོད་འབྲོང་བསད་པར་བརྗོད་པ་ནི། གཙོ་བོ་མཉམ་འབྲེལ་དང་མཐུན་སྒྲིལ་གྱི་ནུས་པར་བརྟེན་ནས་ཕ་རོལ་བོ་ཕམ་པར་བརྒྱབ་ཚུལ་གྱི་གནས་ལུགས་བསྟན་པའོ།། ཁྲི་ལྡེ་གཙུག་བཙན་གྱི་དུས་སུའང། PT1287,0363/0364 དྀ་རིང་ནི་སང་ལྟ་ན་། ཅུང་ཀོག་ནྀ་དཔོན་དང་གཡོག། གནམ་ས་ནྀ་ཡིད་སྦྱོར་བ། ཞེས་པས་ཀྱང་སྔར་འཇང་ཡུལ་ནི་རྒྱ་བོད་ཀྱི་རྩོད་གཞིར་གྱུར་བའི་ཡུལ་ཁམས་གལ་ཆེན་ཞིག་ཡིན་པས། མཚམས་རེར་བོད་ལ་གཏོགས་ཤིང་ལན་རེར་རྒྱ་ལ་གཏོགས་པའི་གནས་ཚུལ་མང་དུ་བྱུང་བས། སྐབས་འདིར་གནམ་ས་ཡིད་སྦྱོར་ཞེས་པས་བཙན་པོ་ཁྲི་ལྡེ་གཙུག་བཙན་གྱི་མངའ་ཁོངས་སུ་ལོག་པའི་མཐུན་སྒྲིལ་བྱུང་ཚུལ་བསྟན་ཡོད།

འདི་ལྟར་རྒྱལ་བློན་བར་དུ་མཐུན་སྒྲིལ་གྱི་ནུས་པ་བྱུང་བའི་ལམ་ལུགས་གཞན་ཞིག་ནི་མནའ་འབྲེལ་གྱི་ནུས་དེ་ཡིན་ངེས་ཏེ། སྤུ་དེ་གུང་རྒྱལ་གྱི་དུས་ནས་བཟུང་མནའ་འབྲེལ་གྱི་གནས་ཚུལ་ཡིག་ཆར་མངོན་འགོ་ཚུགས་ཡོད་དེ། PT1287,0048 མནའ་བཆད་མཐོའ་བཆད་། དམ་བགྱྀས་ཚྀག་བགྱིས་ནྶ།། ཞེས་པ་ནི་ད་སྔ་མནའ་སྲོལ་གྱི་ལམ་ལུགས་ཡི་གེར་བཀོད་པ་ཅུང་སྔ་གྲས་སུ་བགྲང་ཆོག དེ་ནས་བཟུང་མྱང་དབས་མནོན་གསུམ་སོགས་ཀྱིས་མནའ་འབྲེལ་དང་། དེ་བཞིན་དུ་རྒྱལ་བློན་བར་གྱི་མཐུན་སྒྲིལ་གྱི་རྩ་བར་གྱུར་བའི་མནའ་ཡི་ལམ་ལུགས་ཆེས་ཆེར་འཕེལ་ཏེ་རྡོ་རིང་སོགས་སུ་གསལ་བས། དེ་ལས་དཔེར་མཚོན་རེ་ཟུང་དྲངས་ན། ཞོལ་རྡོ་རིང་ལས། བློན་སྟག་སྒྲ་ཀླུང་ཁོང་གི་བུ་ཚ་རྒྱུད་འཕེལ་ལ་ནམ་ནམ་ཞ་ཞར་དངུལ་གྱྀ་ཡི་གེ་ཆེན་པོ་གཅིག།། ཅེས་ཁྲི་སྲོང་ལྡེ་བཙན་གྱིས་བློན་སྟག་སྒྲ་ཀླུ་ཀོང་གི་བུ་ཚ་གང་རུང་ལ་དངུལ་ཆེན་པོའི་བྱ་དགའ་གཅིག་སྤྲད་ཅིང་དུས་ནམ་ཡང་བླར་མི་བཞེས་པར་སྩལ་ཚུལ་བཀོད་པར་མ་ཟད། ཡང་། རབས་ཆད་ན་རབས་ཆད་། གྱྀ་ཁོལ་ཡུལ་དང་། ནོར་ཕྱུགས། བླར་མྱི་བཞེས་པར། ཕུ་ནུ་ཕོ་གང་ཉེ་བ་སྩལད་པར་གནངོ་།། ཞེས་བློན་གང་དུ་རྒྱུད་ཆད་ཀྱང་རྒྱུ་ནོར་ལོངས་སྤྱོད་ཡོད་ཚད་ཕུ་ནུ་སོགས་ཉེ་བར་དུས་གཏན་དུ་དབང་བའི་ཐོབ་ཐང་སྤྲད་ཡོད། དེ་ནི་རྒྱལ་བློན་བར་གྱི་མཐུན་ཞིང་བརྟན་པར་ཁོལ་ཡུལ་བསྩལ་བ་དང་མནའ་ཚིག་རྡོ་རིང་ལ་བརྐོས་པ་སོགས་བྱས།

ཡང་། འཇང་གི་ཀོ་ཙིའི་རྡོ་རིང་དུའང་། ཕོ་ཚེད་ཟང་མང་ནྀ། གསེར་ཆེན་པོ་སྩལད། ཅེས་གསེར་གྱི་བྱ་དགའ་སྤྲད་པ་ལྟ་བུ་དང་། འདི་དག་གང་འདོད་དུ་གསེར་ཆེན་པོའི་ཡིག་ཚང་སྤྲད་པ་ཞིག་ཀྱང་མིན་པར། ཆབ་སྲིད་ལ་མཛད་ཆེ་བ་སོགས་ལ་བྱིན་པ་ཡིན་པ་ལས།  ཏུན་ཧོང་ཡིག་རྙིང་ལས། གཡོ་སྒྱུ་གུང་སྟག་གྱོན་པ་ནི་རང་གི་རྒྱབ་གཡའ།། ངན་པས་ཡིག་ཚང་མནོས་པ་ནི་ཡུན་དུ་ཁུར་ལྕི།། ཞེས་ལྟར་དཔའ་བོས་གུང་སྟག་ལེན་པ་དང་བློན་འབངས་ཀྱི་ཡིག་ཚང་ལེན་རྒྱུའང་སླ་བ་ཞིག་མིན་པའི་སྡོམ་ཚིག་བཀོད་པ་ལྟར་ཡིན། ཞྭ་ལྷ་ཁང་གི་རྡོ་རིང་ཤར་མར་ཡང་། ངའྀ་སྐུ་རིང་ལ། སྐུ་དྔ་ཆབ་སྲྀད་ལ་འཕྲལ་ཡུན་གཉིས་སུ་སུ་ལེགས་པའྀ་ལས་ཆེན་པོ་བྱས་པ་དྔ་། བླ་འོག་ཕྱོགས་སུ་བདེ་བ་དང་། ཕན་པའྀ་མདོ་ཆེན་པོ་བྱེད་བྱེད། སྙིང་ཉེ་ཉེ་སྟེ། བཀའ་དྲིན་གཙྀགས་བསྐྱེད་པར། ཞེས་མྱང་ཏིང་ངེ་འཛིན་གྱིས་བཙན་པོའི་ཆབ་སྲིད་ལ་ཕན་པའི་ལས་དོན་རླབས་ཆེ་བ་བསྒྲུབས་པའི་བཀའ་དྲིན་བརྗོད་པར་མ་ཟད། ད་དུང་རྗེ་བློན་ནང་གཤིན་པའི་མཐུན་ལམ་གྱིས་སྙིང་ཉེ་ཉེ་རུ་ཡོད་པར་བརྗོད་ཡོད། ཡང་། ལྷོ་བྲག་བྲག་རྐོས་ཡི་གེ་ལས། ལྡེ་སྨན་ལྡེ་ཅུང་། གློ་བ་ཉེ་ཉེ། ཞེས་དང་། ཡང་། ལྡེའུ་ཅུང་གྀ་མཆད་གྱྀ་རྀམ་གྲོ་བླ་ནས་མཛདེ། ནམ་ཅྀག་དབོན་སྲས་གྔ་གྀ་རིང་ལ་རལ་ཡྔ། བླ་ནས་སྟོང་སྡེས་བརྩྀག་ཕར་གནངོ། ཞེས་བློན་ལྡེ་སྨན་དང་ལྡེ་ཆུང་གིས་བཙན་པོར་གློ་བ་ཉེ་ཞིང་ཕྱག་ལས་དཀའ་ཚེགས་ཆེ་བ་མང་དུ་བསྒྲུབས་པས། བཙན་པོས་ཀྱང་དེ་བཞིན་དུ་བཙན་པོར་གཏོགས་པའི་སྟོང་སྡེས་བློན་དེ་དག་གི་བང་སོ་བརྩིག་ཚུལ་བཀོད་ཡོད། འདི་ལྟ་བུའི་སྲོལ་ནི་བཙན་པོའི་དུས་ཀྱི་ཆབ་སྲིད་སྐྱོང་བའི་ཐབས་ཇུས་ཤིན་ཏུ་ལེགས་པ་ཡིན།

PT1287,0264 དབྱྀ་ཚབ་གློ་བ་ཉེ་བས། གུམ་ན་མཆད་པྱག་དར་ཏེ་བརྩིག་པར་གནང་། ཞེས་དང་། གསེར་གྱྀ་ཡི་གེ་མྱྀ་ཆད་པར་སྩལ་པར་བཀའ་སྩལ་ཏོ། ཞེས་འདི་ལྟར་རྒྱལ་བློ་མཐུན་ཞིང་གོང་བུ་གཅིག་ཏུ་བསྒྲིལ་ཏེ། མཐར་བློན་སྐུ་གཤེགས་པའི་བང་སོ་ཡང་བཙན་པོ་རང་ཉིད་ཀྱིས་བརྩིགས་པར་མ་ཟད། སྔར་གྱི་མནའ་རྡོ་དཀར་བོ་ཡང་བང་སོའི་རྩིག་རྨང་དུ་བཞག་ཚུལ་སོགས་ཀྱང་བཀོད་ཡོད། མནའ་ཡིས་ཀྱང་རྒྱལ་བློན་སོགས་ཀྱི་མཐུན་པའི་འབྲེལ་ལམ་ལ་ནུས་པ་དམིགས་བསལ་ཞིག་བྱུང་བ་ནི། ཆོས་འབྱུང་མཁས་པའི་དགའ་སྟོན་ལས། མནའ་དང་དམ་བཅའ་སྲོག་ལྟར་གཅེས་པར་འཛིན།། ཞེས་པའང་དོན་ལ་གནས་པ་ཞིག་གོ། འདི་ལྟ་བུའི་རྒྱལ་བློན་བར་གྱི་མཐུན་སྒྲིལ་གྱི་ནུས་པ་སྲ་བརྟན་དུ་གནས་པར་རྒྱུ་རྐྱེན་གཞན་ཡང་ཡོད་དེ། དེ་ནི་བཙན་པོའི་མི་ཆོས་ཀྱི་ལམ་ལུགས་ཤིན་ཏུ་འཐུས་ཚང་ཞིག་ཡོད་པ་དང་འབྲེལ་བ་ངེས་ཅན་ཡོད་སྙམ།  ཕུ་ནུའི་མདོ་ལས། PT1283 མྱིའི་ཆོས་ནི།། དྲང་ཞིང་སྲི་ཞུ་དང་། དེས་ཤིང་མཉེན་བ་དང་། སྙིང་རྗེ་འེ་ཞིང་། དངན་ཆན་མྱེད་རྗེས་དང་ཁྲེལ་ཡོད། སྙིང་ཆུང་ཞིང་བརྩོན་འགྲུས་ཆེ་བ་ཡིན་ཏེ། འཛངས་ཡིད་མྱུར་མྱེད་གྱང་།། འདི་རྣམས་ལུས་ལ་ཡོད་ན།། ཀུན་གྱི་སྙིང་དུ་འོང་ཞིང་སྲིད་བརྟནད་ནོ།། ཞེས་པ་ལྟ་བུའི་མི་ཆོས་ཀྱི་ལྟ་བ་བཙན་པོའི་ཆབ་སྲིད་སྐྱོང་བའི་སྲོག་ཤིང་བྱས་པ་དཔག་ཐུབ་ལ། ཡང་དེ་ལས། དཔོན་པོའི་སེམས་དང་མཐུན་བར་བྱོས་ཤིག དེ་ལྟ་སྟེ། གཞུང་མ་ནོར་པར་བཟང་ལ།། སེམས་འཐུན་བས། བསྡུས་ན།། ཀུན་ཀྱང་བདེ་བར་རུངོ་། སེམས་མྱི་འཐུན་བ་ལས་།། ནད་ཆེ་བ་མྱེདོ།། ཞེས་པས་ཀྱང་བཙན་པོའི་ཆིག་སྒྲིག་དང་མཐུན་པའི་སྟོབས་ཤུགས་འབྱུང་བར། དེའི་རྒྱབ་ལྗོངས་ཀྱི་མི་ཆོས་རིག་གནས་འཐུས་ཚང་དུ་གྲུབ་ཅིང་། མི་ཆོས་ལྟ་བ་ལག་ལེན་གནད་དུ་འཁེལ་བ་ལས་བྱུང་བ་གདོན་མི་ཟའོ།། སུམ་པའི་མ་ཤགས་ལས་ཀྱང་། རྗེ་སྒམ་པོ་ཡང་དཔེ་མྱི་ལས་ལེན་ལ་།། མགྱིགས་བཅུ་རི་ཡང་བང་ལྕུག་ཀྱིས་འབྱུང་།། ཞེས་དང་། ཡང་། ཏུན་ཧོང་ཡིག་རྙིང་ལས། ཕྱི་དགྲ་རྡེ་པོ(གཏེ་བོ)འདུལ་བ་ནི་ནང་ཆིས་ལེགས་པར་བསྡམ་།། ཞེས་པའང་ཕྱི་དགྲ་འདུལ་བར་ནང་ཚིས་ལེགས་པར་དམ་དགོས་པར་བཤད་པ་བཞིན། བཙན་པོའི་དུས་ཀྱི་མི་ཆོས་རིག་གནས་ནི་མི་ཆོས་ཀྱི་སྙིང་སྟོབས་རྩེར་སོན་དུ་གྱུར་བའང་མཚོན་ཐུབ། ཡང་། ཏུན་ཧོང་ཡིག་རྙིང་ལས། རྒྱལ་པོ་མྱི་ལ་དགྱེས་ཤིང་འདམ་མཁས།། བློན་པོ་དྲང་དཀན་ཆེ་ཞིང་འཛངས་སྐྱོང་།། ཞེས་པ་ལྟ་བུ་ཡིན་པས། དེ་ལྟར་བཙན་པོའི་དུས་ཀྱི་མི་ཆོས་རིང་ལུགས་དེ་ཉིད་ལག་ལེན་ཡུན་རིང་དུ་གནས་སྲིད་ཀྱི་ཕུག་ཀྱང་བརྟན་པར་གནས་པ་ཞིག་གོ། མི་ཆོས་དེ་དག་ནི་དངོས་གནས་ངོ་མཚར་ཞིག་ཏུ་སྣང་སྟེ། ཏུན་ཧོང་ཡིག་རྙིང་ལས། གཅིག་དུ་དྲང་ཞིང་མདོད་ཆེན་ཆུང་བ་།། གཉིས་སུ་གཞུང་བཟང་ཞིང་བྱ་བ་ཉུང་བའ་།། གསུམ་དུ་ང་རྒྱལ་ཆུང་ཞིང་དུས་ཀར་མྱི་འདོར་བའ་།། བཞིར་གྲོས་མཐུན་བའ་།། ལྔར་ཡངས་པའ་།། དྲུག་དུ་ཆོས(མི་ཆོས)ལ་དགའ་ཞིང་དོན་ལ་མཁས་པའ་།། ཞེས་གྲོགས་སུ་བདམས་པར་ཡང་མི་ཆོས་ཀྱི་རྩ་དོན་ཆེས་ཆེར་ཡོད་པས། རྒྱལ་བློན་གྱི་མཐུན་ལམ་ལ་སེལ་མ་ཞུགས་པར་རྒྱལ་ཁ་དང་འཕེལ་རྒྱས་ཀྱི་རྩེར་སོན་པ་ཞིག་ཏུ་སྣང་ལ། བཙན་པོའི་མི་ཆོས་ཀྱི་དོན་སྙིང་སྟོབས་དང་ལག་ལེན་ཉམས་རྗེས་ད་གཟོད་ཕམ་ཉེས་ཀྱི་འགོ་ཚུགས་པ་ཞིག་ཏུ་སེམས་སོ།།

དེ་ལྟར་མགུར་ཚིག་ཤོ་ལོ་ཀ་གཉིས་པའི་དོན་སྙིང་དངོས་ནི་མཐུན་སྒྲིལ་ལ་གཞོལ་བས། མཐུན་སྒྲིལ་གྱི་ནུས་པའི་འབྱུང་རྩའང་བཙན་པོ་འདིའི་རིང་གློ་བུར་དུ་བྱུང་བ་ཞིག་མིན་པར། བཙན་པོ་རིམ་བྱོན་ནས་དེའི་རྒྱབ་ལྗོངས་ཀྱི་ཆབ་སྲིད་ལྟ་བ། མི་ཆོས་རིག་གནས་ཀྱི་རྫོང་མཐུག་པོ་དང་འབྲེལ་བ་ངེས་ཅན་ཡོད་པ་དེ་ལྟར་ན། མགུར་ཚིག་འདི་ཉིད་ཚིག་ཉུང་དོན་འདུས་ཀྱི་དོན་སྙིང་ཤིན་ཏུ་ཟབ་པས། དེ་ལྟར། འཐམ་འཐམ་ནྀ་འདུ་འདུ་ན། ངག་རྗེས་ནྀ་མྱིས་མྱྀ་བརྗོད།། ཞེས་པ་ཡང་། PT1283 སྤུན་དུ་འཐམས་པ་གཉིས་ཤིག།།། ཅེས་པའི་འཐམས་པ་དང་དོན་གཅིག་སྟེ། ཧ་ཅང་མཐུན་པ་ལ་སྔར་འཐམ་འཁྱུད་ལྟ་བུའི་ལུས་པོ་ཕན་ཚུན་དམ་པོ་སྦྱར་ཞིང་བསྡམས་པའི་ཚུལ་དུ་བརྗོད་པའང་རྒྱུ་མཚན་ངེས་ཅན་ཡོད་པ་དང་། འདུ་འདུ་ཞེས་པའང་། PT1283 རྗེ་གོལ་གཉིས། དཔོན་གཡོག་གཉིས་རྒན་གཞོན་གཉིསུ་། དྲང་པོ་ལེགས་པའི་ཆོས་བྱེད་ན།། དེ་ལ་མྱི་སྨོན་མྱི་འདུའ་བའྀ་མྱི་སུ་ཞིག་ཡོད། ཅེས་པས། གོང་གི་འདུ་བའི་གོ་དོན་ཆུ་ལ་ཆུ་བཞག་ཡིན་ཏེ། དྲང་མོའི་སྲོལ་བསྐྱང་ན་ཀུན་ཀྱང་སྨོན་ཞིང་ངང་གིས་འདུ་ཞིང་འཛོམས་པར་འགྱུར་བ་བཞིན། རྒྱལ་བློན་མཉམ་དུ་བཞུགས་པའི་ཚེ་འཆམ་མཐུན་དུ་འདུས་ཏེ་བསྡད་ན། རང་གི་ངག་རྗེས་སམ་ཁ་ཤུལ་ལ་གཞན་གྱིས་གཏམ་ངན་མི་ཁ་དང་ཕྲ་མ། ཕྲག་དོག་གང་གིས་ཀྱང་གནོད་མི་ཚུགས་ཤིང་གཏམ་ངན་འཇུག་ཏུ་མེད་པར་བརྟན་པོར་གནས་ཐུབ་པར་བསྟན་ཡོད་དེ། ཏུན་ཧོང་ཡིག་རྙིང་གི་མོ་ཡིག་ལས། མྱི་ག:ངན:ག:ལངས་ཏེ:མྱི:ཆྀག:ཤི་བའྀ:ངོ་སྟེ:ཇི:ལ:བཏབ:གྱང་ངནད་རབ།::། སྔར་བཙན་པོའི་དུས་སུ་མི་ཁ་སོགས་ལ་འཛེམས་སྲོལ་ཆེ་བར་མ་ཟད། དེ་ནི་ཆབ་སྲིད་ཀྱི་དཀྲུགས་མར་འགྱུར་བ་བཞིན་དུ། འདིར་ཡང་རྒྱལ་བློན་མཐུན་པའི་ངག་རྗེས་ལ་གཞན་གྱིས་མི་ཁ་དང་ཕྲ་མ་བརྗོད་དུ་མེད་ཚུལ་བསྟན། ཡང་། PT1287,0280 འཕྲའ་མ་མྱི་ངག་གསན་རེ། ཞེས་སྲོང་བཙན་སྒམ་པོ་དང་དབའ་དབྱི་ཚབ་གཉིས་ཀྱི་གནས་ཚུལ་བཀོད་པའི་ཡིག་རྙིང་དུའང་གསལ་བ་དེ་བཞིན་ཡིན། PT1283 ལས། གཡོག་བྲན་གྱིས་ནི་རྗོ་བོ་དང་དཔོན་པོ་མྱི་གཤེ་བར་ནུས་ན།། སྲི་ཞུའི་མཆོགོ།། ཞེས་པ་ལྟར། ཕན་ཚུན་མཐུན་ཞིང་འཐམ་སྟེ་རང་གིས་ཀྱང་རྗེ་བོར་གཤེ་བ་སོགས་ཚིག་མངོན་ལྐོག་ཅན་དུ་མ་བགྱིས་ན་སྲི་ཞུ་མཆོག་སྟེ། རྒྱལ་བློན་གཉིས་ལ་མཚོན་ན་དམ་ཚིག་གཙང་མར་འགྱུར་བའི་རྒྱུ་རྐྱེན་གཙོ་བོ་ཞིག་གོ།

ཡང་དེ་ལས། ངོར་བློན་མ་ཐེབས་ན།། དཀོག་དཔྱས་མ་བྱེད་ཆིག།། ཅེས་པ་བཞིན། དེ་ལྟར་འཐམ་ཞིང་འདུས་ནའང་སྐབས་རེར་རྒྱལ་བོའི་གསུང་གནད་འགག་ཅན་ལ། རང་ཉིད་ཀྱི་བློར་ངོར་མི་འཚམ་པ་འདྲ་བྱུང་ཚེ། ཐད་ཀར་ལན་མ་བཏབ་ཀྱང་ལྐོག་ཏུ་འཕྱ་སྨོད་མི་རུང་ཚུལ་དུ་བརྗོད་པ་ཡང་སྔར་གྱི་མི་ཆོས་དོན་སྙིང་ཞིག་ཡིན་ཏེ། དེ་ལྟར་ལྐོག་ཏུ་འཕྱ་སྨོད་སོགས་བགྱིས་ཚེ་མི་གཞན་གྱི་ངག་རྗེས་ལ་འདྲ་མིན་སྣ་ཚོགས་བརྗོད་དེ། རྒྱལ་བློན་འཆམ་མཐུན་གྱི་འགལ་རྐྱེན་འགྲོ་བར་བཤད། དེ་ལྟར་རྒྱལ་བློན་གཉིས་མཐུན་ཏེ་ཁོང་གཉིས་གསུང་ལ་གཞན་གྱི་གཏམ་ངན་བརྗོད་དུ་མེད་པར་བྱེད་པ་ལ།  ཕན་ཚུན་མཐུན་པར་རྒྱལ་བློན་རང་ངོས་ཀྱི་དམ་ཚིག་གཙང་སྟེ། ཞོལ་རྡོ་རིང་ལས། ཕྲ་མ་མྱྀ་གསྩནྡ་ཀླན་ཀ་མྱྀ་བཙལ། ཞེས་པ་བཞིན། གཞན་གྱིས་རྒྱལ་བློན་གྱི་ངག་རྗེས་ནས་ཕྲ་མ་སོགས་འཇུག་པའི་གཏམ་ངན་བཙལ་དུ་མེད་པས་བརྗོད་ཀྱང་མི་སྲིད། སྔར་རྒྱལ་བློན་སོགས་ཀྱི་བར་དུ་ཕྲ་མ་བྱེད་སྟངས་འདྲ་མིན་ཡོད་དེ། སྐར་ཆུང་རྡོ་རིང་ལས། སྡིག་གོ་ཞེའམ། མ་ལེགས་སོ་ཞེས། མོ་དང་རྨྱི་ལྟས་ལས་སྩོགས་སྟེ་ཅྀའི་ཕྱིར་ཡང་རུང་སྟེ། མྱྀ་གཞིག་གོ། མྱྀ་སྤང་ངོ་། ཞེས་པ་ལྟར། མཚམས་རེར་མོ་མི་ལེགས་ཚུལ་ལམ་རྨི་ལམ་མི་བཟང་ཚུལ་སོགས་ལ་ཁག་བཞག་སྟེ་ཕྲ་མའི་ལས་རྩོམ་མཁན་ཡང་ཡོད་པས། རྒྱལ་བློན་ཕན་ཚུན་འཐམ་ཞིང་འཆམ་སྟེ་གཏན་དུ་མཉམ་པོར་འདུས་ནས་ནང་ཚགས་དམ་ཚེ། ཁ་རྗེས་ལ་གཏམ་མི་ཁ་གང་ཡང་བརྗོད་དུ་མེད་ཚུལ་བསྟན་ཡོད། དེ་བཞིན་དུ། འགྲོ་འགྲོ་ནི་འཆམ་འཆམ་ན།། ཆགས་ལྷམ་ནྀ་ཆུས་མྱི་སྦང། ཞེས་པའང་། རྒྱལ་བློན་ག་ཤེད་དུ་འགྲོ་ཚེ་མཉམ་དུ་འཆམ་ཞིང་མཐུན་ཏེ་སོང་ན། རྐང་གི་ལྷམ་ཆུ་ལ་སྤོས་ཀྱང་ཆུས་ནང་བརྟོལ་ཏེ་སྦང་བར་མི་འགྱུར་བའི་དཔེར་བཀོད་ཡོད། མདོར་ན་རྟག་ཏུ་འགྲོ་བའི་དུས་སུའང་འཆམ་ཞིང་མཐུན་ན་གཞན་གྱིས་གནོད་འཚེས་ནང་ལ་སེལ་འཇུག་མི་ཐུབ་པར་བརྗོད། འགའ་རེས་སྐབས་འདིའི་མྱི་སྦང་ཞེས་པ་མྱི་སྣང་ཞེས་སུ་བཀོད་ཀྱང་། དོན་དུ་ཡིག་རྙིང་ཕྱི་མོ་ལ་རྒྱུས་མ་ལོན་པའམ། ནོར་བ་རྒྱུན་འབྱམས་སུ་སོང་བ་ཞིག་སྟེ། འདུས་སྲོང་གི་མགུར་ལས་ཀྱང་། PT1287,0462 སྦལ་བ་ནི་འཔུར་དུ་རེ།། ཞེས་པའི་བཤུས་ཡིག་འགའ་རེར་སྦལ་ཡང་སྣལ་དུ་འབྲི་ནོར་བྱུང་ཡོད་པས། གཙོ་བོ་ཡིག་རྙིང་དུ་སྦ་ཞེས་པའི་བ་ཡི་ཕྱི་རྐང་ཅུང་རིང་བས་སྣ་རུ་ནོར་བ་ཡིན། དེ་ལ་དཔང་རྟགས་གཞན་ཡང་ཡོད་དེ། མགར་སྟོང་བཙན་གྱི་མགུར་ལས། PT1287,0445/0446 ཆགས་ལམ་ནྀ་ཆུས་མྱི་སྦང་། ཞེས་པས་ཚིག་རྐང་གཉིས་ལྷམ་དང་ལམ་གྱི་ཁྱད་པར་ཙམ་ལས་གཅིག་མཚུངས་སུ་ཡོད་པས་ཀྱང་ཤེས་ཐུབ། མདོར་ན། རྒྱལ་བོ་སྲོང་བཙན་སྒམ་པོ་དང་དབའ་དབྱི་ཚབ་གཉིས་བཞུགས་ཚེ་མཉམ་དུ་མཐུན་པའི་གྲོས་ལ་གཞོལ་ཞིང་། བཞུད་ཚེ་ལྷན་དུ་མཐུན་པའི་དཔུང་བསྡེབ་ན་གཞན་གྱིས་གནོད་འཚེའི་གཏམ་ངན་དང་འགལ་རྐྱེན་གང་ཡང་མི་འབྱུང་ཚུལ་བརྗོད་དེ། ད་ལྟའི་གནས་བབ་ཀྱི་མཐུན་སྒྲིལ་ལ་སེལ་མི་འཇུག་པའི་གསལ་འདེབས་བགྱིས་པ་ཞིག་གོ།

སྲོང་བཙན་སྒམ་པོའི་མགུར་ཚིག་ཕྱི་མ་སྟེ། PT1287,0268/02690270 ཁྱོད་ཀྱྀས་ནྀ་ང་མ་གཏང་།། ང་འྀས་ནི་ཁྱོད་མྱྀ་གཏང།། ང་འྀས་ནི་ཁྱོད་བཏང་ན་།། དགུང་མཐའྀ་ནི་སྲུང་དུ་རུང།། ཁྱོད་ཀྱིས་ནྀ་ང་བཏང་ན་།། ངས་པོ་ནི་རྨད་དུ་རུང་། ཞེས་གསུངས། འདི་ལས་སྲོང་བཙན་སྒམ་པོ་དང་དབའ་དབྱི་ཚབ་ཀྱི་འབྲེལ་བ་མུ་མཐུད་དུ་ཡུན་རིང་གནས་པར་ཁས་ལེན་དུ་མནའ་བཅད་པའི་གནས་ཚུལ་བཀོད་ལ། སྐབས་འདིར་དབའ་དབྱི་ཚབ་ཀྱི་གཉེན་ཚན་བདུན་ལ་དཀྱུས་གཅིག་ཏུ་མནའ་ཁ་དབུད་ཡོད། བཙན་པོས་ཀྱང་མགུར་ལས་ཁྱོད་ཀྱིས་ང་རང་བློས་བཏང་སྟེ་གློ་བ་རིང་མི་རུང་བ་བཞིན་དུ། ངས་ཀྱང་ཁྱོད་ཀྱི་གཉེན་ཚན་སོགས་ལ་མི་རུང་བའི་བྱ་བ་བསྒྲུབ་མི་སྲིད་ཅིང་། གལ་སྲིད་བསྒྲུབ་ཚེ་གནམ་སྔོན་པོས་བསྲུང་ངེས་ཞེས་གནམ་སྔོན་པོ་དཔང་བོར་བྱས་ཏེ་བདེན་པའི་མཐའ་གསལ་ཚུལ་དུ་བརྗོད། སྤྱིར་ན་སྲོང་བཙན་སྒམ་པོའི་དུས་སུ་ནམ་མཁའ་དང་ཉི་ཟླ་སོགས་བཀུར་ཞིང་དཔང་དུ་འཇོག་པའི་སྲོལ་ཡོད་དེ། ཕྱིས་སུའང་འདུས་སྲོང་མང་རྗེས་མགར་ལ་མགུར་བླངས་པ་ལས། PT1287,0472 གཉྀ་ཟླ་ནི་ཡ་བྀས་གཟིགས། ཞེས་ཉི་ཟླའི་སྤྱན་གྱིས་གཟིགས་ཚུལ་དུ་གསུངས་པ་ལྟ་བུ་དང་། གཞན་ཡང་། ཁྲི་གཙུག་ལྡེ་བཙན་གྱི་དུས་སུའང་། བོད་ཐང་རྡོ་རིང་ལས། གཉི་ཟླ་དང་གཟ་སྐར་ལ་ཡང་དཔང་དུ་གསོལ་ཏེ། ཐ་ཚིག་གྀ་རྣམ་པས་ཀྱང་བཤད། ཅེས་གསུངས། ད་ལྟའང་ཡུལ་ལུང་རེ་འགར་དེའི་རྒྱུན་གནས་ཏེ་གནམ་སྔོན་པོ་ཞེས་མནའ་བསྐྱལ་བའི་སྲོལ་རྒྱུན་དེ་དམངས་ཀྱི་ངག་ཏུ་ཅུང་ཟད་གནས་པ་བཞིན་ནོ།། ཚིག་རྐང་ཕྱི་མ་གཉིས་ལས། ཁྱོད་ཀྱིས་ཀྱང་བཙན་པོ་ང་རང་བློས་བཏང་བའམ་ཁྲེལ་མེད་པའི་བྱ་བ་བརྩམ་ཚེ། ཁྱོད་ལ་གཏོགས་པའི་ཡུལ་ངས་པོའམ་འཕན་པོ་སྨད་དུ་རུང་ཚུལ་གསུངས་ཤིང་། མདོར་ན་རྒྱལ་བློན་གཉིས་ཀྱི་མ་འོངས་པར་དཀའ་ངལ་དང་གནས་ཚུལ་གང་ཞིག་ཐུག་ཀྱང་གདོང་ལེན་བྱེད་པར་སྐྱིད་སྡུག་མཉམ་མྱོང་བྱེད་པར་ཁས་བླངས་ཤིང་དམ་དུ་བཅས་པ་དབུ་སྙུང་བོར་བ་ཞིག་གོ།

དེ་ལྟར་དབའ་དབྱི་ཚབ་ཀྱི་མི་རྒྱུད་ཀྱིས་ཀྱང་བཙན་པོའི་སྲི་ཞུ་བླ་མེད་དུ་བསྒྲུབས་ཤིང་། བོད་རྒྱལ་ཁམས་སིལ་བུར་མ་འཐོར་བར་དུ་དབའ་ཡི་ཁྱིམ་རྒྱུད་ཀྱང་བཙན་པོའི་མངའ་འོག་ཏུ་ཆོས་སྲིད་ཀྱི་གོ་གནས་ཤིན་ཏུ་མཐོ་ཞིང་དབང་ཚད་ཀྱང་ཆེས་ཆེར་རྒྱས་ཏེ་ཡུན་རིང་གནས་པ་གོང་དུའང་བརྗོད་པ་བཞིན་ནོ།།

དབའ་དབྱི་ཚབ་ཀྱི་མགུར་ལན་དུ། PT1287,0270/0271/0272 བཙན་དུ་ནྀ་བདག་འཚལ་ན་། ཆུང་ན་ནི་རྗེ་ཁུར་ཆིག།། པྱུག་དུ་ནྀ་བདག་འཚལ་ན་།། ལྷ་རྀ་ནི་གཡང་སྐྱོང་ཤྀག།། རྗེ་འྀས་ནི་བཀའ་སྩལ་ན་གཞའ་མ་ནྀ་ཡུན་ཀྱི་སྲིད།། བྱ་འྀས་ནི་ཞུ་པུབ་ན་ལ་པྱི་ནི་གདངས་སུ་དྲོ། ཞེས་པ་ལས་ཚིག་རྐང་ཐོག་མ་གཉིས་ནི། བཙན་དུ་ནྀ་བདག་འཚལ་ན་། ཆུང་ན་ནི་རྗེ་ཁུར་ཆིག།། ཅེས་པས། དབའ་དབྱི་ཚབ་ནི་བཙན་པོ་གདུང་རྒྱུད་གསུམ་དུ་འདྲིས་ཆེ་བའི་བློན་པོ་གལ་ཆེན་ཞིག་ཡིན་པས། བཙན་པོ་སྲོང་བཙན་སྒམ་པོའི་འཕྲིན་ལས་རྒྱས་བཞིན་པའི་དུས་སུ་དབའ་དབྱི་ཚབ་ཕལ་ཆེར་རྒས་ཤིང་འཁོགས་ཡོད་དེ། PT1287,0247/0258 ཉྀ་མ་འདེ་ཞིང་མཆིས། ཞེས་དང་། ཡང་། ཁྱོད་ནྀ་རྒས་སྟེ་ཉྀ་མ་འདེར་གནང་སྟེ་བཞག།། ཞེས་པ་བཞིན། བཙན་པོ་དང་མནའ་བོར་སྐབས་སུ་དབའ་དབྱི་ཚབ་རྒས་ཏེ་ཉི་མར་ལྡེ་ཞིང་ལྷོད་དུ་བཞུགས་པར་མ་ཟད། དེ་ལྟར་སོས་དལ་ངང་དུ་ངལ་གསོ་བའང་བཙན་པོས་ཆེད་དུ་གནང་དུ་བཅུག་པའང་ཤུགས་སུ་རྟོགས་ཐུབ། གནའ་བོའི་མོ་ཡིག་ལས། ཀོས་དང:ཐོད:སར:ཕ:གྱོནད:ཆྀང་དག:ར:ན:ཉི:མ:འདེ:བའི:ངོ། ཞེས་མོ་ལྟས་ལེགས་པའི་མཚོན་བྱེད་དུ་ཉི་མར་ལྡེ་བའམ་འདེ་ཚུལ་བརྗོད་པས། སྐབས་འདིར་དབའ་དབྱི་ཚབ་ཀྱང་ཉི་མར་ལྡེ་བ་ནི་འཆི་བར་སྒུག་པ་ལྟ་བུ་མ་ཡིན་པར། ཚེ་མཇུག་སོས་དལ་བག་ཕེབས་ངང་བདེ་ཞིང་སྐྱིད་པར་གནས་བཞིན་པ་ཤེས་ཐུབ། དེས་ན་སྲོང་བཙན་སྒམ་པོའི་དུས་སུ་དབའ་དབྱི་ཚབ་དགུང་ན་མཐོ་བར་མ་ཟད། དེ་ལྟར་བཙན་པོར་མགུར་ལན་ལེན་སྐབས་ཀྱང་། བཙན་པོར་ད་བར་དུ་སྲི་ཞུ་བསྒྲུབས་ཚུལ་བཤད་ན། བཙན་པོ་སྐུ་ན་ཆུང་དུས་ནས་དབའ་དབྱི་ཚབ་བདག་གིས་རྗེ་བཀུར་བར་མ་ཟད། གནམ་རི་སྲོང་བཙན་སྐུ་གཤེགས་པའི་རྗེས་སུ་སྲོང་བཙན་སྒམ་པོ་སྐུ་ན་ཕྲ་བས། དབའ་དབྱི་ཚབ་ཀྱིས་ཀྱང་རྗེ་ཁུར་ཞིང་བསྐྱངས་ཏེ་སྙིང་ཉེ་བའི་གཞོགས་འདེགས་བླ་མེད་གནངས་ཚུལ་བརྗོད་ཅིང་། བཙན་པོ་གང་གི་སྐབས་སུའང་སྐུ་ན་ཆུང་དུས་ཉེ་ཞོ་མང་བས། ཞོལ་རྡོ་རིང་ལས། བཙན:ཕོ:ཡབ:ཁྲྀ:ལྡེ། གཙུག:བརྩན:གྱི་སྐུ:ལ:དརད:ཏེ།། དགུང:དུ:གཤེགས:སོ།།། བཙན:ཕོ:སྲས:ཁྲྀ:སྲོང:ལྡེ:བརྩྣ:གྱི་སྐུ:ལ:ནི:དརད:དུ:ཉེ་།། ཞེས་ཁྲི་སྲོང་ལྡེ་བཙན་གྱི་ཡབ་བཀྲོངས་ཤིང་། བཙན་པོ་རང་ཉིད་ཀྱང་སྐུ་སྲོག་ལའང་ཉེན་ཁར་འཕྲད་སྐབས་སུ་བློན་སྟག་སྒྲ་ཀླུ་ཁོང་གིས་མཛད་རྗེས་བཞག་པ་རྡོ་རིང་བཀའ་གཙིགས་སུ་གསལ་བ་དང་། ཡང་། ཞྭ་ལྷ་ཁང་གི་རྡོ་རིང་ནུབ་མ་ལས། ང་། སྐུ་ཆུང་ངུ་ནྶ་ཆབ་སྲྀད་མ་བཞེས་པའི་བར་དུ་ཡབ་ཡུཾ་གྱྀ་གོ་བྱ་སྟེ་ལེགས་པ་ལ་ཞེན་པར་བྱས། ཞེས་པས་མྱང་ཏིང་ངེ་འཛིན་གྱིས་ཀྱང་། བཙན་པོ་ཁྲི་ལྡེ་སྲོང་བཙན་སྐུ་ན་ཆུང་དུས་སུ་ཡབ་ཡུམ་གྱི་གོ་བྱས་ནས་བསྐྱངས་ཚུལ་གྱི་མཛད་པར་བསྔགས་བརྗོད་གནངས་ཡོད་པས། བཙན་པོ་ཕྱི་མ་དག་གི་གནས་ཚུལ་དེ་དག་ལ་གཞིགས་ཚེ། སྐབས་འདིར་ཡང་དབའ་དབྱི་ཚབ་ཀྱིས་སྲོང་བཙན་སྒམ་པོ་སྐུ་ན་ཕྲ་དུས་ཀྱང་ཕན་པའི་ཕྱག་ལས་རྒྱ་ཆེར་བསྒྲུབས་ཚུལ་བསྟན་ཞིང་། ཡང་། པྱུག་དུ་ནྀ་བདག་འཚལ་ན་།། ལྷ་རྀ་ནི་གཡང་སྐྱོང་ཤྀག།། ཞེས་པས་ཀྱང་། བདག་གིས་བཙན་པོའི་ལྷ་རིས་ལེགས་པར་བསྐྱངས་ཏེ་ཕྱི་ནོར་གྱི་གཡང་གིས་ཕྱུག་པར་བྱས་ཚུལ་ཡང་བཀོད་པ་ལྟ་བུ་སྟེ། སྔར་གནམ་རི་སྲོང་བཙན་གྱི་དུས་སུ། PT1287,0192 དབའས་དབྱི་ཚབ་ཀྱྀ་བྱ་དགའར། ཟ་གད་གཤེན་ཀྱི་ཡུལ་ས་དང། མལ་ཏྲོ་པྱོགས་ནས་བྲན་ཁྱྀམ་སྟོང་ལྔ་བརྒྱའ་སྩལ་ཏོ། ཞེས་པས་ཀྱང་དབའ་དབྱི་ཚབ་ཀྱི་ཁོལ་ཡུལ་རྒྱ་ཆེ་བར་མ་ཟད། ཕྱིས་སུ་བཙན་པོ་འདིའི་དུས་སུ་མྱང་ལ་བཀྱོན་ཕབ་པས་དབའ་དབྱི་ཚབ་ཀྱི་ཁོལ་ཡུལ་ཡང་དེ་བས་རྒྱ་ཆེ་རུ་འགྱུར་ཡོད་སྲིད་པས།  གང་ལྟར་ལྷ་རིའམ་ལྷ་བཙན་པོའི་མངའ་རིས་ཀྱི་ཁྱབ་ཁོངས་ཆེན་པོ་ཞིག་ལ་དབའ་དབྱི་ཚབ་ཀྱིས་བདག་སྐྱོང་བྱས་པར་མ་ཟད། འབྱོར་ཕྱུག་གི་འཕེལ་ཁ་ཡང་དར་བར་བགྱིས་ཡོད་པས། པྱུག་དུ་ནྀ་བདག་འཚལ་ན་།། ཞེས་པས་བདག་གིས་བཙན་པོའི་མངའ་ཐང་འབྱོར་ཕྱུག་ཅན་དུ་ཇི་ལྟར་བྱེད་ཅེ་ན་ལྟ་བུར་བརྗོད་ཡོད།

ལྷ་བཙན་པོར་གཏོགས་པའི་མངའ་རིས་ཀྱི་གཡང་བསྐྱངས་ཚུལ་བརྗོད་པ་སྟེ། ཕྱྭ་དང་དམུ་ཡི་སྐོར་ལས་ཀྱང་། PT0126,0154 མཚན་མོ་ནི་གཡང་མོ་འི་མཐའ་སྐྱོང་བ་ཙམ་དུ་འབུལ་བར་བསཾས་ཏེ། ཞེས་པ་བཞིན་དུ་དབའ་དབྱི་ཚབ་བུ་རྒྱུད་ཀྱིས་བཙན་པོའི་སྲི་ཞུར་གཡང་མོ་མཐའ་སྐྱོང་བྱས་ཏེ་ཕྱུག་པར་བཏང་ཚུལ་གཉིས་ཀྱི་བརྗོད་དོན་ཡང་ཕན་ཚུན་ར་འཕྲོད་པ་ལྟ་བུར་འདུག་གོ། ST 6878 ལས་ཀྱང་། གཡང་མོ་ནི་ལྷས་དཀྱིལ་ན།། ལུག་དང་ནི་ར་འདྲེས་ན།། ཞེས་པས་ཀྱང་གཡང་མོ་ལྷས་ལ་འཁོར་ཚུལ་སོགས་ལས་ཀྱང་གོང་གི་གཡང་སྐྱོང་ཞེས་པའི་གོ་དོན་རྙེད་ཐུབ་བོ།། མདོར་ན་ཚིག་རྐང་བཞི་གས་དབའ་དབྱི་ཚབ་ཀྱི་རྒྱུད་པས་བཙན་པོའི་ཆབ་སྲིད་ཀྱི་ཕྱི་ནང་གཉིས་སུ་མཛད་རྗེས་བཞག་པའི་དྲན་གསོའམ་རང་གི་ཆེ་བ་བརྗོད་པའི་མགུར་དུ་གཏོགས་ཤིང་།  ཏུན་ཧོང་ཡིག་རྙིང་དུ། ST6878 མྱིའི་ཕྱ་མྱི་ཉམས།། ཕྱུགས་ཀྱི་གཡང་མྱི་ཉམས།། ཞེས་གནའ་བོའི་སྒྲོས་སྲོལ་དང་ཤིན་ཏུ་མཐུན་པས། དབའ་དབྱི་ཚབ་ཀྱིས་ཀྱང་དེ་ལྟར་རང་གིས་བཙན་པོའི་སྲིད་གཞུང་གི་ཕྱི་ནང་གཉིས་སུ་སྲི་ཞུ་ཆེས་ཆེར་བསྒྲུབས་པའི་འདས་པའི་བྱས་རྗེས་དག་བསྐྱར་དུ་གསལ་འདེབས་དང་དྲན་སྐུལ་བགྱིས་པའོ།།

ཡང་དེའི་འཕྲོ་རུ། རྗེ་འྀས་ནི་བཀའ་སྩལ་ན་གཞའ་མ་ནྀ་ཡུན་ཀྱི་སྲིད།། ཅེས་པ་ལས། རྗེ་སྲོང་བཙན་སྒམ་པོས་དེ་ལྟར་བློན་རང་ཉིད་ཀྱིས་སྔར་བཙན་པོར་སྲི་ཞུ་བསྒྲུབས་པ་སོགས་དྲང་བདེན་གྱིས་གཟེངས་བསྟོད་གནང་ན། གཞའ་མ་ནྀ་ཡུན་ཀྱི་སྲིད།། ཅེས་པ་ནི་ཅུང་གོ་དཀའ་ཙམ་མཆིས་པས་འགྲེལ་ཚུལ་མི་འདྲ་བ་དུ་མ་མཆིས་ཀྱང་། ཞིབ་ཏུ་བསམ་ན། ཏུན་ཧོང་ཡིག་རྙིང་གི་མོ་ཡིག་ལས། གཞའ:གསང:དུ་མྱི་སྟོརད་ཏེ་དམུ་ཡད་ལྷུང་བའི་ངོ།། དབྱ་གཡང་ལོན་བའི:ངོ: ཞེས་པས་ཀྱང་ཐ་སྙད་རེ་ཟུང་གི་གོ་དོན་བསྡུར་གཞི་ཞིག་མཆིས་ལ། ཡང་། དགའ་ཐང་འབུམ་པ་ཆེའི་ཡིག་རྙིང་ལས། གཞའ་གདན་ཡུན་དུ་གཤགས་ཤྀག།། ཅེས་ཀྱང་གོ་བ་གཅིག་ཏུ་འཕྲོད་པ་ཞིག་མིན་ཡང་དཔྱད་སྒོ་ཞིག་བཏོད་ཡོད། དེ་བས་ཀྱང་ཅུང་གསལ་བ་ནི། ཏུན་ཧོང་ཡིག་རྙིང་ལས། PT0002,0115 སྐྱེས་བུ་གང་ཞིག་ཉན་ཏམ་འདོན་པ་ཡང་།། གཞའ་གསང་ཡུན་གྀ་ཆུ་སྲིད་ཐོབ་འགྱུར་བ་།། ཞེས་པ་སྐབས་དོན་དང་ཤིན་ཏུ་འབྲེལ་ཆགས་ཤིང་གསལ་བར་བྱ་ནུས་པས། ཚིག་རྐང་དེའི་དོན་ནི། རྗེ་སྲོང་བཙན་སྒམ་པོ་ཁྱེད་ཉིད་ཀྱིས་བསྔགས་བརྗོད་དང་འབྲེལ་བའི་ལེགས་པའི་བཀའ་གནང་ན་ཆབ་སྲིད་གཡུང་དྲུང་དུ་ཡུན་རིང་བརྟན་པར་འགྱུར་བར་བརྗོད་པར་མ་ཟད།  དེ་དང་མཚུངས་སུ། མགུར་ལས། བྱ་འྀས་ནི་ཞུ་པུབ་ན་ལ་པྱི་ནི་གདངས་སུ་དྲོ། ཞེས། བྱ་ཡིས་གཤོག་སྒྲོ་བརྐྱངས་ཏེ་རུམ་ཚེ་ལ་ཕྱི་གངས་རི་དྲོད་ཁོལ་ལྡན་ཞིང་རྒྱལ་ཁམས་བདེ་ཞིང་སྐྱིད་པའི་དཔལ་དུ་འགྱུར་ཞེས། བློན་བདག་གི་བུ་རབས་ཚ་རྒྱུད་ཀྱིས་ཀྱང་དེ་བཞིན་དུ་བྱ་ཡིས་གཤོག་ཟུང་བརྐྱངས་ཏེ་ལ་ཕྱི་གངས་ལ་དྲོ་ཁོལ་བ་བཞིན་དུ་བཙན་པོའི་མངའ་ཁོངས་བདེ་སྐྱིད་ལྡན་པར་འགྱུར་བའི་རེ་སྨོན་དང་ཡིད་ཆེས་གཏམ་དུ་བགྱིས་པའོ།།

གསུམ་པ། མགུར་ཚིག་བསྡུར་བ་དང་སྒྱུ་རྩལ་བཀྲོལ་བ།

སྤྱིར་ན་རྒྱལ་བློན་གཉིས་ཀྱི་མགུར་ཚིག་ཚིག་རྐང་བཞི་མ(རྐང་བདུན་ཡང་ཡོད)ལྔ་ཡིས་གྲུབ་ཅིང་། དེ་ལས་བཙན་པོས་བླངས་པའི་མགུར་ལ་ཚིག་རྐང་བཞི་མ་གསུམ(རྐང་བདུན་ཡང་ཡོད)དང་། དབའ་དབྱི་ཚབ་ཀྱིས་བླངས་པ་ཚིག་རྐང་བཞི་མ་གཉིས་མཆིས། མགུར་ཚིག་འདི་གཉིས་ནི་ཚིག་ཉུང་ཞིང་དོན་འདུས་པ་ཤིག་ཡིན་པར་མ་ཟད། རྩོམ་རིག་སྒྱུ་རྩལ་གྱི་རིན་ཐང་ཆེས་ཁྱད་དུ་འཕགས་པས། གོང་གི་རྒྱལ་བློན་གཉིས་ཀྱི་མགུར་ཚིག་འདི་དང་མཉམ་དུ། གཞན་སྲོང་བཙན་སྒམ་པོ་དང་མགར་སྟོང་བཙན་གཉིས་ཀྱི་མགུར་ལའང་འདྲ་ས་ཅུང་མང་བ་དག་དཔྱད་གཞིའི་ཚུལ་དུ་ཁོལ་དུ་ཕྱུང་ནས་ཅུང་ཟད་བསྡུར་ནས། བྱེ་བྲག་ཏུ་སྲོང་བཙན་སྒམ་པོ་དང་དབའ་དབྱི་ཚབ་གཉིས་ཀྱི་མགུར་ནི་དམིགས་སུ་བཀར་ཏེ་དབྱེ་ཞིབ་ཅུང་ཟད་བགྱིད་ན།

ཏུན་ཧོང་ཡིག་རྙིང་ལས། PT1287,0266/0267 ཡར་མོ་ནི་ཆུ་ཐུངས་ཀྱིས།། མདོ་ནས་ནྀ་རྩང་དུ། བསྲིང། ཡར་མོ་ནི་ཞེང་ཆུངས་ཀྱིས་། ལྷོ་ནས་ནྀ་བྱང་དུ་བསྐྱེད་།། ཅེས་པ་ཐོག་མར་བཙན་པོའི་མགུར་གཞན་དང་བསྡུར་ན། ཏུན་ཧོང་ཡིག་རྙིང་ལས། PT1287,0437/0438 ཡར་མོ་ནི་ཆུ་ཐུངས་ཀྱིས་།། མདོ་ནས་ནྀ་རྩང་དུ་བསྲིང།། ཡར་མོ་ནྀ་ཞེང་ཆུངས་ཀྱིས་ལྷོ་ནས་ནྀ་བྱང་དུ་བསྐྱེད།། ཅེས་པའི་མགུར་འདི་གཉིས་ཀྱི་དང་པོ་སྲོང་བཙན་སྒམ་པོས་དབའ་དབྱི་ཚབ་བླངས་པ་དང་། ཕྱི་མ་ནི་སྲོང་བཙན་སྒམ་པོས་བློན་མགར་སྟོང་བཙན་ལ་བླངས་པས། མགུར་འདི་གཉིས་ལ་ཚེག་དང་ཤད་ཀྱི་མང་ཉུང་ཙམ་དང་། ནི་སྒྲའི་གུ་གུ་ཕྱིར་ལོག་མ་ལོག་གཅིག་གི་ཁྱད་པར་ལས། གཞན་རྩ་བའི་གསལ་བྱེད་སོགས་ལ་འགྱུར་བ་ཅི་ཡང་བྱུང་མེད་པར་ཚིག་དོན་གཅིག་མཚུངས་སུ་ཡོད།

༡ ཐ་སྙད་གདམ་གསེས་དང་སྒྲིག་གཞི་གྲུབ་སྟངས་ནི། ཡར་མོ་དང་ཡར་མོ། མདོ་དང་རྩང་། ལྷོ་དང་བྱང་།  ཆུ་དང་ཞེང་། ཆུ་ཐུངས་དང་ཞེང་ཆུངས།  བསྲིང་དང་བསྐྱེད། བཅས་བཙན་པོའི་དུས་ཀྱི་མགུར་ཚིག་དཀྱུས་ལྟར་ཚིག་རྐང་རེ་རེར་ཚེག་བར་བདུན་གྱིས་གྲུབ་ཅིང་། འདིར་ཡང་བསྡོམས་པས་ཐ་སྙད་གཙོ་བོ་བཅུ་གཉིས་ཙམ་བདམས་ཤིང་གྲུབ།

ཐ་སྙད་དེ་དག་གི་འཇུག་ཡུལ་ནི། གཙང་བོའི་མིང་ཡར་མོ་ཞེས་ཐེངས་གཉིས་ཟློས་ཤིང་། ཡུལ་མིང་མདོ་དང་རྩང་། ཕྱོགས་སྟོན་མིང་ནི་ལྷོ་དང་བྱང་། ཚད་གཞི་སྟོན་པའི་མིང་ཆུ་དང་ཞེང་། ཚད་སྟོན་པའི་མིང་ལ་ཐུངས་དང་ཆུངས། བྱ་བའི་མིང་སྟོན་པ་ལ་བསྲིང་དང་བསྐྱེད།

ཐ་སྙད་ཀྱི་སྒྲིག་རིམ་ནི། ཚིག་རྐང་གཉིས་གཉིས་ཀྱི་ཐོག་མར། ཡར་མོ་ཞེས་པ་བཀོད་ཅིང་། དེ་ནས་ཡུལ་དང་ཕྱོགས་གཉིས། དེའི་ཚད་གཞི་དང་ཚད་ཀྱི་རིང་ཐུང་དང་ཆེ་ཆུང་། དེ་ནས་བྱ་ཚིག་མཐར་བཞག་སྟེ་ཚིགས་བཅད་མའི་རྣམ་པར་གྲུབ་པའི་གོ་རིམ་ལྡན་པར་བཀོད།

ཆ་འདྲ་བའམ་དོ་མཉམ་པའི་སྒྲིག་སྟངས་ཤིག་ཀྱང་ཡོད་དེ། ཚིག་རྐང་གོང་མ་གཉིས་དང་འོག་མ་ཆ་འདྲ་བའམ་དོ་མཉམ་པར་བྱས་པ་ནི། ཚིག་རྐང་གཉིས་གཉིས་ཀྱི་ཐོག་མར་ཡར་མོ་ཞེས་འདྲ་བར་བཀོད་རྗེས། ཚིག་རྐང་ཐོག་མ་གཉིས་སུ་ཆུ་ཞེས་པ་སྐབས་འདིར་སྲིད་དུ་གོ་ཆོག་ལ། དེ་དང་མཉམ་དུ་ཞེང་ཞེས་པ་དང། དེ་བཞིན་ཐུངས་དང་ཆུངས་ཚད་ཀྱི་རིང་ཐུང་ངམ་ཆེ་ཆུང་འདྲ་བར་བཀོད། དེ་ནས་མར་གྱི་མདོ་དང་ཡར་གྱི་རྩང་བརྗོད་དེ། ཅིག་ཤོས་སུའང་ཕར་གྱི་ལྷོ་དང་ཚུར་གྱི་བྱང་ཞེས་པའི་ཤུགས་སུ་ཡར་མར་དང་དེ་མཚུངས་པར་ཕར་ཚུར་ལྟ་བུར་བསྟན་ཡོད། མཐའ་མར་ཚིག་རྐང་གཉིས་ཀྱི་མཇུག་ཏུ་བྱ་ཚིག་གཅིག་རེ་འདྲ་མཚུངས་སུ་བསྣན་པ་ཞིག་གོ། ཤད་ཀྱིས་ཚིག་མཚམས་གཅོད་ཚུལ་ཅུང་འདྲེས་ཀྱང་། དོན་དུ་ཚེག་བར་དྲུག་མར་གཏོགས་པའི་རྣམ་པ་ཞིག་གོ།

༢ མཚོན་ཐབས་ནུས་པ། བཙན་པོའི་དུས་ཀྱི་མགུར་གླུ་མཐའ་དག་ནི་སྤྱིར་བཏང་གི་ཚིག་ཙམ་ལྷུ་བསྒྲིགས་པ་མ་ཡིན་པར། ཚིག་རེ་རེ་ལ་མཚོན་བྱེད་དཔེའི་ཐབས་རྩལ་གྱིས་དོན་ལ་དམིགས་འབྱིན་ནུས་པའི་ཁྱད་ཆོས་ཕྱུག་ཅིང་། མཚོན་ཐབས་ཀྱང་བཙན་པོའི་དུས་ཀྱི་འཚོ་བ་དང་ཉེ་བའི་ཕྱོགས་པས་གོ་སླ་ཞིང་། ཡང་མགུར་ནི་ངག་ནས་ཐད་ཀར་དུ་ལེན་པའི་རྣམ་པར་ཡོད་པས། ཐ་སྙད་དག་ཀྱང་དམངས་དཀྱུས་མའི་སྐད་དང་ཉེ་བར་ཡོད་པ་གོར་མ་ཆག འདིར་ཡང་བཙན་པོའི་ཆབ་སྲིད་ཀྱི་མངའ་ཐང་མཚོན་བྱེད་དུ་ཡར་ལུང་གཙང་བོར་སྦྱར་ཞིང་། མཚོན་བྱེད་དཔེ་ཡང་མཚོན་བྱའི་དོན་དང་རིང་དུ་མ་བྲལ་བར། འཚོ་བ་དང་ཁོར་ཡུག་ལ་ཤིན་ཏུ་ཉེ་བའི་ཡར་ལུང་གཙང་བོར་སྦྱར་མ་ཟད། དེའང་རབ་བཏགས་ཀྱི་ཉམས་ཀྱིས་སྤྲས་ཏེ། ཡར་ལུང་གཙང་བོ་ཐུང་བ་ནས་རིང་བར་བཏང་ཚུལ་དང་། ཞེང་ཆུང་བ་ནས་ཆེ་བར་བསྐྱེད་ཚུལ་འུད་དུ་བརྗོད་དེ།  མདོར་ན་གཙང་བོ་ཐུང་ནས་རིང་དུ་བསྲིངས་པ་དང་ཁྱབ་རྒྱ་ཆུང་བ་ནས་ཆེ་བར་ཕྱོགས་པའི་སྣང་བརྙན་གྱི་འགུལ་སྐྱོད་ཅིག་ཡོད་པར་མ་ཟད།  དེ་ཡང་འགལ་འབྲེལ་རང་བཞིན་ནུས་པ་ཞིག་ལྷན་དུ་སྐྱེད་སྐུམ་གྱི་འགུལ་སྐྱོད་དམིགས་བསལ་བ་ཞིག་ཏུ་བསྒྱུར་ཞིང་། དོན་དངོས་སུ་ཡར་ལུང་གཙང་བོའི་སྐྱེད་སྐུམ་གྱི་འགྱུར་ལྡོག་ཁོ་ནར་མི་དམིགས་པར། གཙང་འགྲམ་དུ་འཚོ་སྡོད་བྱེད་པའི་སྤུ་རྒྱལ་བཙན་པོའི་ཆབ་སྲིད་མངའ་ཁོངས་སོགས་ཀྱི་འགྱུར་ལྡོག་ཆེན་པོ་ཞིག་གཙང་བོ་གཡོ་སྐྱོམ་དང་ལྷན་དུ་སྦྱར་ཏེ་མཚོན་པས། གཙང་བོའི་རླབས་ཤུགས་ཀྱི་འགྱུར་འགུལ་དང་བརྒལ་དཀའ་བའི་གཙང་བོའི་ལྷོ་བྱང་གི་སྤོ་སྐྱོད། རྔམ་དངཟིལ་གྱིས་འབབ་པའི་གཙང་བའི་སྣང་བརྙན་མང་བོ་ཞིག་ཀྱང་ཕན་ཚུན་སྡེབ་ཅིང་འདྲེས་ནས་ཡོམ་ཞིང་འཁྱོམ་པའི་ཚུལ་དུ་མངོན་ཡོད། ལྷག་པར་དུ་བྱ་ཚིག་བསྲིང་དང་བསྐྱེད་ཅེས་པས། འགུལ་སྐྱོད་དམ་འགྱུར་ཉམས་དེ་ཡང་སྤྱིར་བཏང་བའི་འགུལ་སྐྱོད་ལས་སྒྱུ་རྩལ་གྱི་རྣམ་པར་ཕྱོགས་ཏེ། ཉམས་འགྱུར་གསོན་ཤུགས་ལྡན་པར་བསྐྲུན་པས། བཙན་པོའི་རྒྱལ་ཁའི་སྤྲོ་སྣང་གི་ཚོར་བ་ཤུགས་དྲག་ཏུ་འཕྱོ་ཞིང་འབབ་པར་མཚོན་པས། དེའང་གཙང་བོ་དང་འདྲིས་པའི་འབངས་ཀྱི་སེམས་སུའང་། བཙན་པོའི་ཆབ་སྲིད་ཀྱི་སྟོབས་ཤུགས་དང་སྤོབས་པ་ཡང་། གཟི་བརྗིད་ལྡན་པའི་ངང་རྔམ་པའི་ཟིལ་དང་ངར་བའི་ཉམས་སུ་འབབ་པར་མ་ཟད། གཙང་བོའི་མདའ་དང་ཕུ་དང་ལྷོ་དང་བྱང་སོགས་རེ་རེས། ཐུང་བ་ནས་སྲིང་བ་དང་ཆུང་བ་ནས་བསྐྱེད་པའི་རྟོག་ཀློང་གི་ཁམས་ཡངས་མོར་འཕོས་ཤིང་། དེ་ལྟར་ཡུལ་དང་ཡུལ་ཅན་གཅིག་ཏུ་འདྲེས་ཤིང་ཀློང་ཡངས་ཀྱི་ཉམས་སུ་མངོན་ཏེ། དབའ་དབྱི་ཚབ་ལ་མཚོན་ན་དེ་བས་ཀྱང་བཙན་པོའི་ངོས་ལེན་ཐོབ་པའི་འདས་པའི་སྣང་བརྙན་རེ་རེ་དང་སྦྲགས་ཏེ། སྤྲོ་བའི་སྣང་བ་དགུང་དུ་འཕྱོ་བར་བྱེད་པའི་རྒྱལ་ཁ་དང་ཡིད་ཆེས་ཀྱི་ཚོར་ཤུགས་སློང་ནུས་པ་ཞིག་གོ།

༣ དབྱངས་འགྲོས་ཀྱི་ཁྱད་ཆོས་བཤད་པ།  བཙན་པོའི་དུས་ཀྱི་མགུར་ཚིག་གང་ཡིན་ཡང་ངག་རྩོམ་དུ་གཏོགས་པས་དབྱངས་འགྲོས་མེད་པ་མི་སྲིད་ལ། དབྱངས་འགྲོས་དེ་ཡང་། རྒྱལ་རབས་ཟླ་རིགས་མ་ལས། ཤད་ཀྱིས་བཅད་ནས་ཚེག་གིས་སྨྲ་བར་བྱེད།། ཅེས་པ་བཞིན་ཚིག་གི་གཅོད་མཚམས་སོགས་ཤིན་ཏུ་གལ་ཆེ་བས། སློབ་དཔོན་བསོད་ནམས་རྩེ་མོས་ཀྱང་། ཚིགས་བཅད་རྣམས་ལ་བཅད་ཅིང་བཀླག ཅེས་པ་བཞིན་བཅད་མར་བཅད་མའི་དབྱངས་འགྲོས་ཤིག་ཀྱང་ངང་གིས་འབྱུང་བཞིན་ཡོད་པས། ཚིགས་བཅད་དུ་ཀློག་སྟངས་དང་ལེན་སྟངས་སོགས་ལ་རྩོམ་ལུས་གཞན་དང་མི་འདྲ་བའི་ཁྱད་ཆོས་ཡོད་ཅིང་། བཙན་པོའི་དུས་ཀྱི་མགུར་ཚིག་མང་ཤོས་ཚེག་བར་དྲུག་མ་ཡིན་པར་མ་ཟད། ཆ་ཡ་སྡེབ་སྟངས་སོགས་ཀྱང་དམིགས་བསལ་གྱི་ཁྱད་ཆོས་ལྡན་ནོ།། མགུར་གྱི་དབྱངས་འགྲོས་སྤྱིའི་མཚམས་གཅོད་ཚུལ་སོགས་ཅུང་འདྲ་ནའང་། བྱེ་བྲག་ཏུ་དབྱངས་ཀྱི་མཐོ་དམན་དང་དྲག་ཞན། སྦོམ་ཕྲ་དང་རིང་ཐུང་། འགྱུར་ཁུགས་སོགས་མི་འདྲ་ས་མང་ངེས་ཏེ། ཁྲི་སྲོང་ལྡེ་བཙན་དུས་སུའང་།  འཕྲལ་སྦྱར་སྐྱོན་ཡོན་དང་ཤ་ཚ་ལྐོག་ཉལ། ཡ་རབས་སྐྱེམས་གསོལ། ཕོ་ཀྲོག་མོ་ཀྲོག གཞན་སུན་འདོན། མཛའ་མཐུན་ཡིད་འཕྲོག འདི་ཕྱིའི་བྱ་ར། ཅང་ཤེས་རྟ་རབས་སོགས་ཆོས་གླུ་ཙམ་དུ་མ་ཟད་དམངས་ཀྱི་གླུ་ཡང་མང་དུ་ཡོད་ཚུལ་བཀའ་ཐང་ཟུར་ཙམ་གསལ་བས། གླུ་དེ་དག་གི་ལེན་བྱའི་ཚིག་དོན་དང་མཐུན་པའི་གདངས་ཀྱི་ཉམས་འགྱུར་ཡང་རེ་རེའང་ཡོད་ངེས་པར་མ་ཟད། གླུ་ལེན་མཁན་དང་ལེན་ཡུལ་སོགས་ཀྱང་ཁྱད་པར་ཡོད་དེ། བཤད་མཛོད་ཡིད་བཞིན་ནོར་བུ་ལས། ཁྱུང་ཆེན་ནམ་མཁར་ལྡིང་བའི་གླུ།། ས་བདག་རྒྱལ་པོའི་སྤྱན་སྔར་བླངས།། སེང་ཆེན་གངས་ལ་འགྱིང་བའི་གླུ།། ཕ་བུ་རྒན་རིམ་ཚོགས་སར་བླངས།། མཚོ་མོ་མ་འཕང་འཁྱིལ་བའི་གླུ།། མ་སྲུ་སྐྱིད་པའི་སེབ་ཏུ་བླངས།། ཞེས་གསུངས་སོ།། དེ་ལྟར་སྐབས་འདིའི་དབྱངས་འགྲོས་ཀྱང་སྤྲོ་སྣང་དང་སྤོབས་པས་བཏེགས་སྟེ་མགུར་ཚིག་ཏུའང་གསལ་ཞིང་། བཤད་མཛོད་ཡིད་བཞིན་ནོར་བུ་ལས། དང་པོ་རྒོད་པོ་གནམ་འཕང་གཅོད་པ་འདྲ་སྟེ་ཐམས་ཅད་གནམ་འོག་ཏུ་ཚུད་པ་དང་། ཞེས་བཀའ་མཆིད་ལེགས་པའི་འགོ་འཛུགས་སྟངས་ཀྱི་དཔེ་ཞིག་བསྟན་ཞིང་། སྐབས་འདིར་ཡང་དེ་དང་མཐུན་པར། གཙང་བོའི་རླབས་རྒྱུན་དང་འགྲོགས་པའི་དབྱངས་འགྲོས་སྨད་ནས་སྟོད་ལ་འཐེན་ཞིང་འཕྱོ་བ་ལྟར་ཟིལ་ཤུལ་ལྡན་པའི་དབྱངས་ཀྱི་རྣམ་པར་ཡོད་པ་ཞིག་སྟེ། བསྲིངས་པ་དང་བསྐྱེད་པའི་ཉམས་སུ་བརྟས་པ་ཞིག་ཡིན་པས། བཙན་པོའི་མགུར་དབྱངས་ཀྱི་འགོ་འཛུགས་སྟངས་འདི་ཡང་གཙང་བོའི་ཀླུང་ཆེན་འབབ་པ་བཞིན། དམའ་ནས་མཐོ་རུ་འཕྱོ་བའི་དབྱར་འགྱུར་གྱིས་བརྟས་ཤིང་དམངས་ཀྱི་ཚོར་བ་ངང་གིས་དཀྲོགས་ནུས་པའི་འདུ་ནུས་པའི་ཟིལ་ཤུགས་ལྡན་པའི་དབྱངས་འགྲོས་ཤིག་ཏུ་ཅིས་ཀྱང་གཏོགས་པར་སྙམ་མོ།།

ཡང་བཙན་པོའི་མགུར་ཚིག་བཞི་མ་གཉིས་པ་ནི། PT1287,0267/0268 འཐམ་འཐམ་ནྀ་འདུ་འདུ་ན། ངག་རྗེས་ནྀ་མྱིས་མྱྀ་བརྗོད་།། འགྲོ་འགྲོ་ནི་འཆམ་འཆམ་ན།། ཆགས་ལྷམ་ནྀ་ཆུས་མྱི་སྦང། ཞེས་དང་། དེ་དང་ཅུང་འདྲ་མགར་སྟོང་བཙན་གྱི་མགུར་ལས། PT1287,0445/0446 མོལ་མོལ་ནྀ་འཆམ་འཆམ་ན་།། བཀའ་མཆིད་ནྀ་མྱིས་མྱྀ་མཉན།། འཆམ་འཆམ་ནྀ་འདྲུལ་འདྲུལ་ན་། ཆགས་ལམ་ནྀ་ཆུས་མྱི་སྦང། ཞེས་གསུངས། མགུར་ཚིག་གཉིས་ཀྱི་མི་འདྲ་ས་གཙོ་བོ་ནི་ཐོག་མ་བཙན་པོའི་མགུར་དང་ཕྱི་མ་མགར་སྟོང་བཙན་གྱི་མགུར་དུ་གཏོགས་པས། མགུར་བཞེངས་མཁན་གྱི་མི་སྣ་ཐ་དད་དུ་གྱུར་བར་མ་ཟད། ཚིག་རྐང་རེ་རེའི་ཁྲོད་དུའང་གོང་མ་ལས་མི་འདྲ་བ་ཅུང་ཟད་མཆིས་ཀྱང་། དོན་གྱི་ཆ་ནས་ཧེ་བག་ཆེས་ཆེར་མེད་པས། མགུར་ཚིག་གཉིས་བསྡུར་ཚེ་དཔེར་ན། འཐམ་འཐམ་དང་མོལ་མོལ། ངག་རྗེས་དང་བཀའ་མཆིད། མྱྀ་བརྗོད་དང་མྱྀ་མཉན། འགྲོ་འགྲོ་དང་འདྲུལ་འདྲུལ། ཆགས་ལྷམ་དང་ཆགས་ལམ་སོགས་ཅུང་ཟད་མི་འདྲ་བ་དག་གཅིག་གྲོགས་གཅིག་ཏུ་སོང་སྟེ། བརྗོད་དོན་འཐུས་ཚང་དུ་རྟོགས་པར་གཞོགས་འདེགས་ཀྱི་ཕན་ནུས་ངེས་ཅན་ལྡན་པ་ཞིག་གོ།

༡ ཐ་སྙད་གདམ་གསེས་དང་སྒྲིག་གཞི་གྲུབ་སྟངས་ནི། སྲོང་བཙན་གྱི་མགུར་གྱི་ཐ་སྙད་འདེམས་ཚུལ་ལ། འཐམ་འཐམ་དང་འདུ་འདུ། འགྲོ་འགྲོ་དང་འཆམ་འཆམ། ངག་རྗེས་དང་ཆགས་ལྷམ། མྱི་དང་ཆུ། མྱྀ་བརྗོད་དང་མྱྀ་སྦང་། ཞེས་སུ་ཚིག་རྐང་རེ་རེར་ཚེག་བར་དྲུག་གིས་གྲུབ་སྟངས་སྔར་བཞིན་ཡིན་ཡང་། མིང་བརྡ་གལ་ཆེན་བཅུ་ཙམ་བདམས་ཏེ་གྲུབ་པ་ཞིག་གོ།

ཟློས་སྒྲ་མང་བ། མགུར་ཚིག་འདིར་འཐམ་འཐམ་དང་འདུ་འདུ། འགྲོ་འགྲོ་དང་འཆམ་འཆམ། ཞེས་གོང་དང་མི་འདྲ་བར་ཚིག་རྐང་བཞི་མའི་མིང་བརྡའི་གྲུབ་ཆ་སུམ་ཆ་གཅིག་ཙམ་ཟློས་སྒྲས་ཟིན་ཡོད་པར་མ་ཟད། མྱྀ་བརྗོད་དང་མྱྀ་སྦང་ཞེས་མྱྀ་དགག་ཚིག་གི་སྒྲ་འདྲ་བའང་གཅིག་མཚུངས་ཀྱི་གནས་སུ་སྦྱར་ཡོད།

བྱ་ཚིག་མང་བ། འཐམ་དང་འདུ། འགྲོ་དང་འཆམ། བརྗོད་དང་སྦང་། ཞེས་པ་སོགས་བྱ་ཚིག་དྲུག་གིས་མགུར་ཚིག་གི་གྲུབ་ཆ་མང་ཤོས་བཟུང་ཡོད་པས། མགུར་ལ་འགྱུར་འགུལ་ཅུང་མང་བའི་ཉམས་སུ་ཡོད།

ཆ་འདྲ་བའམ་དོ་མཉམ་དུ་སྒྲིག་སྟངས་ནི། ཚིག་རྐང་གོང་མ་གཉིས་དང་འོག་མ་གཉིས་ཕན་ཚུན་ལྟོས་ཏེ་ཆ་མཉམ་པར་བསྒྲིགས་ཤིང་། ཐོག་མར་འཐམ་འཐམ་དང་འདུ་འདུ་ཞེས་ཟློས་སྒྲས་ཚིག་འགོ་བཟུང་ཞིང་། ཕྱི་མར་ཡང་འགྲོ་འགྲོ་དང་འཆམ་འཆམ་ཞེས་དེ་མཚུངས་ཀྱི་ཟློས་སྒྲ་བཀོད་ལྟ་བུ་དང་། དེ་ནས་ངག་རྗེས་དང་ཆགས་ལྷམ་ཞེས་བྱ་བའི་ཚིག་གཉིས་བཀོད། ཚིག་རྐང་ཕྱི་མ་གཉིས་ཀྱི་མཐའ་རུ། མྱིས་མྱྀ་བརྗོད་དང་ཆུས་མྱྀ་སྦང་། ཞེས་བྱེད་པོའམ་བྱེད་པ་གང་རུང་གི་བྱ་བར་དགག་ཚིག་འདྲ་མཚུངས་སུ་མགུར་ཚིག་མཐའ་མ་གཉིས་ཀྱི་མཇུག་ཏུ་སྦྱར་ཏེ་དོ་མཉམ་ཆ་མང་ཞིང་། ལྷག་པར་དུ་ཟློས་སྒྲས་མང་བོས་བྱེ་བྲག་ཐ་སྙད་ཆ་མཉམ་ལ་ནུས་པ་དམིགས་བསལ་བ་ཞིག་བྱུངཡོད།

༢ བརྩེ་དུང་གིས་ཁེངས་པ། མགུར་ཚིག་འདིའི་འཐམ་འཐམ་དང་འདུ་འདུ། འགྲོ་འགྲོ་དང་འཆམ་འཆམ་ཞེས་པའི་ཐ་སྙད་རེ་རེར་བརྩེ་བས་ཁེངས་ཤིང་དྲོད་ཀྱིས་བརྟས་པར་མ་ཟད། ཚོར་བས་ཤུགས་དྲག་ཏུ་ཟིན་པ་ཞིག་ཏུ་སྣང་ལ། དེའི་ཁྲོད་དུ་རྒྱལ་བློན་ཁ་འབྲལ་དུ་མེད་པའི་ཉམས་འགྱུར་གྱི་དབུགས་རྒྱུན་ལྷོག་ལྷོག་འཕྱུར་བཞིན་ཡོད་དེ། སྔར་གྱི་མནའ་ཚིག་ལས། ཏུན་ཧོང་ཡིག་རྙིང་ལས། PT1287,0283 ཕག་དང་མཚུངས་མཚོན་གྱིས་མྱྀ་དགར་རེ་། བྱ་དང་མཚུངས་པར་ཁྱུས་བདའ་རེ། ཞེས་པ་ལྟར། རྒྱལ་བློན་གཉིས་ཀྱི་འབྲེལ་བ་ནི་སྤྱིར་བཏང་བ་ཞིག་མིན་ཞིང་། དེ་བས་འཐམ་དང་འདུ། འགྲོ་དང་འཆམ་ཞེས་པའང་། བཞུགས་ཚེ་མཉམ་དུ་འཐམ་ཞིང་བཞུགས་ནས་གཏན་དུ་འདུ་བར་བྱེད་པའི་སྣང་བརྙན་དེ་ཡང་གྲིམ་ཞིང་འདྲིལ་བར་བྱེད་ལ། གཞན་དུ་ཕེབས་ཚེ་འཆམ་ཞིང་མཐུན་པར་དཔུང་གྲོགས་སུ་བསྡེབས་ཏེ་ལྷན་དུ་བཞུད་ཚེ། འགྲོ་འདུག་གང་དུའང་གཞན་གྱིས་ཉེན་ཁ་དང་ཕྲ་མ་སོགས་མི་འབྱུང་བར་བརྗོད་པའང་། ལྕགས་སྐུད་སྐྱ་མ་གཉིས་ལྷན་དུ་བརྒྱུས་ཏེ་ངར་ཁོལ་ལེ་བ་ཞིག་ཏུ་སྣང་བས། ཟློས་ཚིག་གི་ནུས་པས་དོན་གྱི་ངར་ཤུགས་ཀྱི་འཕེལ་ཚད་ཅིག་ཀྱང་མཚོན་ནུས་པས། གྲིམ་ཤ་ཤིན་ཏུ་ཆེ་བའི་ཚིག་འདི་དག་གིས་ཀྱང་ནང་སེམས་ཀྱི་བརྩེ་དུང་མཐོ་རུ་སྤར་བར་བྱེད་པར་མ་ཟད། ནན་ཏན་དང་གཟབ་ནན་ཆ་ཡང་ཟློས་ཚིག་ལས་མངོན་པས། ཚིག་གི་མཛེས་པ་སྟོན་པའི་ཉམས་འགྱུར་ཙམ་ལས་བརྒལ་ཏེ། ད་ལྟའི་རྒྱལ་བློན་གྱི་འབྲེལ་བ་ཇི་ལྟར་འཛིན་པར་བཀའ་མཆིད་གཟབ་ནན་དང་དྲོད་ཁོལ་ཟུང་དུ་འབྲེལ་ཏེ་ལྷོག་ལྷོག་ཏུ་རྒྱུ་ཞིང་གདུ་བར་བྱེད་ཅིང་། ནང་གི་དུང་སེམས་ཀྱི་མདུད་པ་ཤིན་ཏུ་དམ་པར་བྱེད་པའི་ཉམས་ཀྱིས་བརྟས་སོ།།

༣ དབྱངས་འགྲོས་ཀྱི་ཁྱད་ཆོས། མགུར་ཚིག་འདི་ལ་སྐྱེས་གནས་འདྲ་བའི་དབྱངས་ཀྱི་ཆ་ནི། འཐམ་འཐམ་དང་འདུ་འདུ། ལྟ་བུ་དང་། འཆམ་འཆམ་དང་ཆགས། ཆུ། རྗེས། བརྗོད། ཞེས་སྡེ་བ་མཚུངས་པའི་སྐྱེས་གནས་ཉེ་བ་དང་། ཡང་། མྱིས། མྱྀ། མྱྀ། ལྟ་བུ་སྐྱེས་གནས་འདྲ་བའི་གདངས་མང་བས་སྒྲ་ཡི་མཛེས་པར་རམ་གཞོགས་བྱེད་ནུས་པར་མ་ཟད། དེ་བས་ཀྱང་ཟློས་སྒྲ་དག་ཀྱང་ཚིག་རྐང་གི་གནས་ཆ་མཉམ་པར་སྤེལ་ཡོད་པས། དབྱངས་འགྲོས་ཀྱི་སྙན་ཆ་ལ་ཆ་མཉམ་པའི་མཛེས་པ་ཞིག་མངོན་ཞིང་། མྱྀ་བརྗོད་དང་མྱྀ་སྦང་ཞེས་པའི་དགག་ཚིག་འདྲ་ཡང་དགག་ཡུལ་མི་འདྲ་བ་གཉིས་ཀྱིས་མཐར་བརྒྱན་པས། དབྱངས་འགྲོས་འདི་དོན་གྱི་ཆ་ན་གྲིམ་ཤ་ཆེ་ཡང་། ཚིག་གི་ངོས་ནས་ལྷོད་ཤ་ཞིག་ཀྱང་ཡོད་པས། གྲིམ་ལྷོད་ཟུང་སྦྱོར་གྱི་གྲུབ་པའི་མཛེས་པ་ཞིག་ཀྱང་ངང་གིས་བྱུང་བས། ཆ་མཉམ་པའི་ཚིག་གི་སྒྲིག་རིམ་གྱིས་དབྱངས་ཀྱི་འདེགས་འཇོག་དང་མཐོ་དམན། སྦོམ་ཕྲ། འགྱུར་ཁུག རིང་ཐུང་། དལ་བྲེལ་སོགས་ལའང་ཤུགས་རྐྱེན་ངེས་ཅན་ཐེབས་པས། གནའ་བོའི་སྒྱུ་རྩལ་གང་ཞིག་ཡིན་ཡང་། ཆ་མཉམ་པའི་མཛེས་པར་གཞོལ་ཤུགས་ཆེ་བ་ཡང་ཅུང་མངོན་གསལ་དུ་ཡོད། མགུར་སོགས་གནའ་བོའི་ངག་རྩོམ་མང་བོ་ཞིག་ཀྱང་ཚིགས་བཅད་ཀྱི་རྣམ་པར་བྱུང་བ་དང་། དེ་དག་ཀྱང་གཞི་རྩའི་ཆ་མཉམ་གྱི་མཛེས་པར་ཕྱོགས་པ་ཡང་། ཆ་མཉམ་པའི་མཛེས་དཔྱོད་རིན་ཐང་ཆེས་མཐོ་བའི་ལྟ་ཚུལ་བྱུང་བའི་རྗེས་ཤུལ་ཞིག་ཀྱང་ཡིན།  དེ་ལྟར་དབྱངས་འགྱུར་གྱི་ཁུགས་པ་རེ་རེར་དོན་གྱི་གནད་རྣམས་འདུས་ཤིང་འཆུན་པའི་ཉམས་མངོན་ཚུལ་ནི། བཤད་མཛོད་ཡིད་བཞིན་ནོར་བུ་ལས། བར་དུ་བྱ་ཁྲ་ཟས་ལ་ཅུམ་པ་འདྲ་སྟེ། དགོས་དོན་ཐོག་སྡུག་མེད་པ། ཞེས་པ་བཞིན་དུ། བཙན་པོས་ཀྱང་གོང་དུ་དབའ་དབྱི་ཚབ་གྱི་འདས་དོན་མཛད་རྗེས་ལ་བསྔགས་བརྗོད་དང་འབྲེལ་ཏེ། ཁོད་ཡངས་ཤིང་དཀྱེལ་ཆེ་བའི་རྣམ་པར་བརྗོད་ཅིང་། སྐབས་འདིར་བྱེ་བྲག་ཏུ་བབས་ནས། སྒྲ་ལ་སྙན་ཆ་ཆེ་ཞིང་དོན་ལ་གཟབ་ནན་དང་གྲིམ་ཤ་ལྡན་པར། སྐབས་དོན་གྱི་གནད་འགག་དང་ཉེན་ཁ་སོགས་དམིགས་ཕུག་པར་ཚིག་ཉུང་དོན་འདུས་སུ་དབྱངས་ལ་གྱེར་ཞིང་བརྗོད་པའོ།།

ཡང་སྲོང་བཙན་སྒམ་པོའི་མགུར་ཚིག་ཕྱི་མ་ནི། PT1287,0268/0269/0270 ད་ནས་ནི་ཕན་ཆད་དུ་། ཁྱོད་ཀྱིས་ནྀ་ང་མ་གཏང། ང་འྀས་ནི་ཁྱོད་མྱྀ་གཏང།། ང་འྀས་ནི་ཁྱོད་བཏང་ན་།། དགུང་མཐའྀ་ནི་སྲུང་དུ་རུང།། ཁྱོད་ཀྱིས་ནྀ་ང་བཏང་ན་།། ངས་པོ་ནྀ་རྨད་དུ་རུང་ ཞེས་དང་། དེ་དང་ཅུང་མཚུངས་པར་སྲོང་བཙན་སྒམ་པོ་དང་མགར་སྟོང་བཙན་གཉིས་ཀྱི་མགུར་རེ་རེ་ལས། སྲོང་བཙན་སྒམ་པོའི་མགུར་ནི། PT1287,0438/0439 ཡུ་བུ་ནྀ་རྗེ་དང་བློན་།། རྗེ་འིས་ནྀ་འབངས་མ་གཏང་། རྗེ་འིས་ནྀ་འབངས་བཏང་ན་། གནམ་མཐའྀ་ནི་སྲུང་དུ་རུང།། འབངས་ཀྱིས་ནྀ་རྗེ་མ་གཏང་། འབངས་ཀྱྀས་ནི་རྗེ་བཏང་ན་། ངས་པོ་ནི་རྨད་དུ་རུང།། ཞེས་དང་། ཡང་མགར་སྟོང་བཙན་གྱི་མགུར་ལས། PT1287,0442/0443 རྗེ་འིས་ནྀ་འབངས་མ་གཏང་།། རྗེ་འྀས་ནི་འབངས་བཏང་ན། བྱ་བང་ནྀ་ཐང་ལ་ཐས། འབངས་ཀྱིས་ནྀ་རྗེ་མ་གཏང་། འབངས་ཀྱིས་ནྀ་རྗེ་བཏང་ན།། འཇོན་མོ་ནི་ཤིང་ཀ་རེབས།། ཞེས་གསུངས་པ་བཞིན། མགུར་ཚིག་འདི་གསུམ་གའི་སྤྱིའི་ཚིག་འགྲོས་མང་ཤོས་ཅུང་འདྲ་ཞིང་། ལྷག་པར་དུ་སྲོང་བཙན་སྒམ་པོའི་མགུར་ཚིག་གཉིས་ལ་ཧེ་བག་ཆེར་མེད་དེ། མགུར་དང་བོ་ལས། ཁྱོད་དང་ང་། ཞེས་པར། གཉིས་པ་ལས། རྗེ་དང་འབངས། ཞེས་དང་། མགུར་དང་བོ་ལས། དགུང་མཐའ། ཞེས་པར། གཉིས་པ་ལས། གནམ་མཐའ། ཞེས་པས་ཕལ་ཆེར་ཚིག་གི་འགོ་འཛིན་ཚུལ་དང་མཇུག་སྡུད་ཚུལ་སོགས་འདྲ་ས་ཧ་ཅང་མང་བར་མཆིས། ཕྱི་མ་མགར་སྟོང་བཙན་གྱི་མགུར་ལའང་། དགུང་མཐའྀ་ནི་སྲུང་དུ་རུང།། དང་། གནམ་མཐའྀ་ནི་སྲུང་དུ་རུང་།། ཞེས་པ་གཉིས་ཀྱི་ཚབ་ཏུ། བྱ་བང་ནྀ་ཐང་ལ་ཐས། ཞེས་ཚིག་ཧྲིལ་བོར་བརྗེས་ཡོད་པ་དང་། དེ་བཞིན་དུ། ངས་པོ་ནྀ་རྨད་དུ་རུང་ ཞེས་པའམ། ངས་པོ་ནི་རྨད་དུ་རུང་།། ཞེས་པའི་ཚབ་ཏུ། འཇོན་མོ་ནི་ཤིང་ཀ་རེབས།། ཞེས་ཡང་ཚིག་ངོས་ཡོངས་སུ་འགྱུར་བ་ལས་གཞན་དག་སྔ་ཕྱི་ཅུང་ཟད་བརྗེས་པ་ཙམ་ལས་ཁྱད་པར་ཆེར་མེད་པས། དོན་ལ་ཕན་ཚུན་གོ་སྟོབས་འབྱུང་བར་བསྡུར་ནས་དཔྱད་ཚེ་དེ་བས་ཀྱང་མགུར་ལུགས་ཀྱི་རྣམ་པའི་འབྲེལ་བ་ཞིག་ཀྱང་རྟོགས་ཐུབ་པའོ།།

༡ ཐ་སྙད་ཀྱི་གདམ་གསེས་དང་སྒྲིག་གཞི་གྲུབ་སྟངས་ནི། ད་དང་ཕན་ཆད། ཁྱོད་དང་ང་། མ་གཏང་། ང་དང་ཁྱོད།  མྱྀ་གཏང་། ང་དང་ཁྱོད། བཏང་། དགུང་མཐའ་དང་སྲུང་དུ་རུང་། ཁྱོད་དང་ང་། བཏང་། ངས་པོ་དང་རྨད་དུ་རུང་། ཞེས་ཚིག་རྐང་བདུན་ལ་ཐ་སྙད་དམ་མིང་བརྡ་གཙོ་བོ་བཅོ་བརྒྱད་ཙམ་གྱིས་གྲུབ།

ཟློས་པའི་ཆ་མང་བ། དེ་ལས། ཁྱོད་དང་ང་། ང་དང་ཁྱོད། ང་དང་ཁྱོད། ཁྱོད་དང་ང་། ཞེས་ང་དང་ཁྱོད་དམ་ཁྱོད་དང་ང་ཞེས་ཐེངས་བཞི་ཙམ་བྱུང་བ་དང་། ཡང་། མ་གཏང་། མྱྀ་གཏང་། བཏང་། བཏང་། ཞེས་གཏང་ངམ་བཏང་གི་བྱ་ཚིག་གཅིག་ལ་དགག་སྒྲ་ཡོད་མེད་ཅི་རིགས་ཐེངས་བཞི་དང་། ཡང་། སྲུང་དུ་རུང་། རྨད་དུ་རུང་། ཞེས་པའི་རུང་ཐེངས་གཉིས་བཅས་ཟློས་བརྗོད་ཀྱི་ཐ་སྙད་ཐེངས་བཅུ་ཙམ་སྤེལ་ཡོད་པས། རགས་པར་བརྗོད་ན་དོན་སྣ་རིགས་གསུམ་ལ་ཟློས་པའི་ཐ་སྙད་ཆ་བཅུ་ཙམ་གྱི་དབྱེ་བ་མངོན་ལ། དེ་བས་རེ་འགའ་ཚིག་རྐང་གི་ཟུར་ཅུང་ཙམ་ལས་ཕལ་ཆེར་ཟློས་པའི་རྣམ་པའང་བྱུང་།

བྱ་ཚིག་མང་བ། མ་གཏང་། མྱྀ་གཏང་། བཏང་། བཏང་། སྲུང་། རྨད(སྨད) ཅེས་པའི་བྱ་ཚིག་དྲུག་ཙམ་ཡོད་པས། འདི་ལས་བྱ་ཚིག་བཞི་གཏང་གི་ཁྱད་པར་ཙམ་དུ་ཟད་ལ། སྲུང་དང་རྨད(སྨད)བཅས་གཙོ་བོ་རིགས་གསུམ་ཙམ་དུ་གཏོགས། དེ་བས་གཏང་གི་ཐ་སྙད་ནི་སྐབས་འདིས་བྱ་ཚིག་གི་ཆེས་ས་ཁོངས་མང་ཤོས་ཟིན་པའང་ཐ་སྙད་གལ་ཆེན་ཞིག་ཏུ་གྱུར་ཡོད།

༢  དམངས་སྐད་ལ་གཞོལ་བའི་མཛེས་པ། སྤྱིར་བཙན་པོའི་དུས་ཀྱི་མགུར་མང་ཤོས་ཚིག་ཉུང་དོན་འདུས་དང་། གོ་སླ་འཛིན་བདེ་ལྟ་བུའི་རྣམ་པར་ཡོད་ནའང་། བཙན་པོའི་མགུར་ཚིག་རྗེས་མ་འདི་ནི་ཕལ་ཆེར་ཚིག་རྐང་རེ་རེ་ཡང་ཡང་དུ་ཟློས་པའི་རྣམ་པ་ཞིག་ཡོད་པས། ཆེས་གོ་སླ་ཞིང་ངག་ལ་འབྱོར་བ་ཞིག་སྟེ། ཚིག་རྐང་ཟློས་པ་ལས་ཐ་སྙད་ཁྱོད་དང་ང་། གཏང་། ཞེས་པ་གསུམ་གྱི་གནད་འགག་གི་མིང་བརྡ་ལས་མེད་ཅིང་། ཐ་སྙད་དེ་གསུམ་ཀྱང་ཕལ་ཆེར་དམངས་དཀྱུས་མ་ནས་བྱིས་པའི་ངག་ཏུའང་འབྱོར་བ་ལྟ་བུའི་གོ་སླ་བར་སྣང་། དེས་ན་ཡང་ཡང་ཟློས་པ་ནི་གོང་གི་ཐ་སྙད་རེ་རེ་ཟློས་པ་ལྟ་བུའི་ཚགས་དམ་ལ་གྲིམ་ཤ་ཆེ་བ་ཞིག་མིན་ནའང་། དོན་ལ་གཞོལ་བར་གཟབ་ནན་དང་བརྣན་པའི་ཆ་ཤིན་ཏུ་ཆེ་བས། ཞི་བ་དང་ལྷོད་པའི་ཉམས་ཀྱིས་གནད་ཆེ་བ་གཅིག་ཏུ་དྲིལ་ཏེ། མཐར་བཏང་ངམ་མི་བཏང་ཞེས་པའི་བྱ་ཚིག་གཅིག་ཏུ་དོན་ལ་འབབ་པར་ཡོད། འུ་ཅག་གི་ཕྱི་རབས་ཀྱི་གླུ་ཚིག་ཏུའང་འདི་ལྟར་ཤོ་ལོ་ཀ་གོང་མ་གཉིས་ཀྱིས་དཔེ་བསྟན་ཏེ། ཕྱི་མས་ད་གཟོད་དོན་སྟོན་པ་བཞིན། སྔར་གྱི་མགུར་ཚིག་ཀྱང་ཕན་ཚུན་བསྡུར་ན་དེ་ལྟར་མགུར་འགོ་སློང་སྟངས་འདྲ་བ་དང་། ཡང་ན། དེ་ལས་ནང་གསེས་ཀྱི་ཚིག་རེ་འགའ་ཡང་ཡང་ཟློས་པའི་ཁྱད་ཆོས་ཡོད་པས། དེ་ནི་གཙོ་བོ་ཉན་མཁན་གྱི་གོ་བརྡ་ལེགས་པར་འཕྲོད་པའི་ཐབས་ཤིག་ཀྱང་ཡིན་ལ། ཡང་གཅིག་བསམ་ན། སྐད་ཆའི་སྒྱུ་རྩལ་ནར་སོན་པའི་གོ་རིམ་ཞིག་ཏུ་བརྩིས་ཀྱང་རིགས་པར་སྙམ། སྤྱིར་ན་མགུར་ཚིག་གང་ཡིན་ཡང་ད་ལྟར་དུས་ཀྱི་རྒྱང་ཁད་རིང་དུ་གྱེས་པའི་འུ་ཅག་གི་རྣ་བ་དང་རིང་བར་གྱེས་པས། བརྡ་འཕྲོད་དཀའ་བ་དང་དོན་གོ་དཀའ་བས་སྐབས་དེའི་དམངས་སྐད་དུ་གཞོལ་བའི་ཉམས་འགྱུར་ཚོར་མི་ཐུབ་ཀྱང་། སྐབས་དེའི་རྒྱུགས་ཆེ་བའི་མགུར་ཚིག་དང་གཏམ་རྒྱུད་དག་བསྡུར་ན། བཙན་པོའི་སྤྱི་ཚོགས་ཀྱི་སྐད་བརྡའི་ཁྱབ་ཁོངས་ཤེས་རྟོགས་བྱེད་སླ་བས། ལྷག་པར་དུ་སྐད་བརྡ་རིག་པས་ཀྱང་། རང་ཉིད་དང་ཆེས་ཉེ་བའི་ཁོར་ཡུག་གི་སྐད་བརྡ་ནི་ཐོག་མའི་མ་སྐད་དམ་གཞི་རྩའི་སྐད་དམ་མིང་བརྡ་དག་ཏུ་བརྩི་བས་ཀྱང་། ཁྱོད་དང་ང་། ང་དང་ཁྱོད་ཅེས་པའང་ཆེས་སླ་ལ་དམངས་དཀྱུས་མར་བྱང་ཞིང་འབྱམས་པར་བརྡ་ཆད་སྟབས་བདེ་དག་གིས་གྲུབ་ཅིང་། ལྷག་པར་སྐད་བརྡའི་གོ་རིམ་དུ་ཚིག་ཕྲེང་ཡང་ཡང་ཟློས་པའང་སྔ་མའི་མགུར་གྱི་ཁྱད་ཆོས་སུ་གྱུར་བས། དེ་ལས་ཡོངས་ཁྱབ་རང་བཞིན་གྱི་མིང་བརྡ་རེ་འགའ་ཡང་ཡང་མངོན་སྟངས་ཤིག་ཀྱང་བྱུང་།

སྐབས་འདིར་ཡང་ཡང་ཟློས་པས་ཀྱང་གོ་སླ་བ་ཙམ་དུ་མ་ཟད། དོན་གྱི་ཆ་ནས་ནན་ནན་ཏན་ཏན་དུ་བགྱིད་བཞིན་པའི་ཉམས་འགྱུར་ཞིག་ཀྱང་ཡོད་པ་དཔག་ཐུབ། དེ་བས་ད་དུང་འདི་ལས། དགུང་མཐའྀ་ནི་སྲུང་དུ་རུང་།། ཞེས་དང་། ངས་པོ་ནྀ་རྨད(སྨད)དུ་རུང་ ཞེས་པ་གཉིས་ནི་ཟློས་པའི་ཆ་མེད་པར། དོན་གྱི་གལ་འཛུགས་པའི་སྲོག་རྟ་ལྟ་བུར་གྱུར་ཏེ།  རྒྱལ་བློན་བར་གྱི་དམ་བཅའི་ཚིག་གི་འབབ་ས་དང་། མནའ་དཔང་ལྟ་བུར་གྱུར་བས། གནམ་སྔོན་པོ་དང་ཡུལ་ངས་པོ་གཉིས་དཔང་དུ་བཞག་སྟེ། གནམ་གྱིས་གཟིགས་པའམ་གནམ་གྱིས་སྲུང་བ། མདོར་ན་རྒྱལ་བློན་མཐུན་པའི་ཚིག་དང་འགལ་ན་གནམ་གྱིས་བཀའ་ཆད་ཕོག་པའམ། ཡང་ན་ཡུལ་ངས་པོ་འདོར་དགོས་པ་སོགས་མཐར་ཐུག་གི་གནད་དུ་བབས་ཏེ། མ་འོངས་པའི་རྒྱལ་བློན་གྱི་དམ་བཅས་དང་ཁས་ལེན་གཙིགས་སུ་བཏབ་པ་ཞིག་ཀྱང་ཡིན། མགུར་དང་གླུ་ནི་དམངས་ཀྱི་ཐད་ཀར་མཉན་བྱའི་ཡུལ་དུ་འབྲེལ་བ་ཡོད་པས། ཐད་རྟོགས་ཤུགས་ཆེ་ཞིང་གོ་སླ་ལ་ཆེས་སྟབས་བདེའི་མཛེས་པའི་སྒྱུ་རྩལ་གྱིས་ཕྱུག་པ་ཡིན་པས། བཙན་པོའི་དུས་མགུར་ལའང་དེ་བཞིན་དུ་ལྷོད་པའམ་འཇམ་པ། མཉེན་པའི་མཛེས་པ་ཡོད་པར་མ་ཟད། སྐབས་རེར་བརྗིད་པའམ་རྔམ་པའི་མཛེས་པའང་ཡོད་པས། མདོར་ན་སྐབས་དོན་ལ་དམིགས་ཏེ་དམངས་སྐད་དང་གཞོལ་ཤུགས་ཆེ་བའི་མགུར་དག་གི་མཛེས་པ་མངོན་སྟངས་མི་འདྲ་བས། འདུ་སྟོབས་དང་ལྷུག་ནུས་སོགས་ལ་ཅུང་ཁྱད་པར་ཆེ་བའང་ཤེས་ཐུབ། བཙན་པོའི་མགུར་ཚིག་རྐང་བཞི་མ་འདི་གསུམ་གའང་རེ་རེ་ལ་ཁྱད་ཆོས་ཐུན་མིན་རེ་ཡོད་པས་ཀྱང་གསལ་བར་རྟོགས་ནུས་པའོ།།

༣ དབྱངས་འགྲོས་ཀྱི་ཁྱད་ཆོས། བཙན་པོའི་མགུར་ཚིག་མཐའ་མ་འདིར་ཚིག་རྐང་ཟློས་པ་མང་བས། ཚིག་ལ་ལྷོད་ཤ་ཞིག་ངང་གིས་བྱུང་བས། ས་པཎ་གྱིས་གསུངས་པ་བཞིན། དབྱངས་ཀྱི་དྲངས་ལ་ཚིག་གིས་དགུག།། དབྱངས་ཀྱིས་བསྒྱུར་ལ་ཚིག་གིས་ལྟེངས།། ཞེས་པ་དང་། དེ་དག་བཟློག་སྟེ་ཚིག་གིས་དྲངས་ལ་དབྱངས་ཀྱིས་དགུག་ལྟ་བུར་བླངས་པས། སྐབས་འདིར། ཚིག་གིས་དྲངས་ལ་དབྱངས་ཀྱིས་དགུག་པའི་ཚིག་གི་ནུས་པས། དབྱངས་ཀྱི་འགྱུར་ཁུགས་ཤུགས་རྐྱེན་ངེས་ཅན་ཐེབས་ཏེ་དབྱངས་འགྲོས་ཀྱི་འགྱུར་ཁུགས་ལྷོད་ཆ་ཆེ་བར་གྱུར་ཡོད། ཚིག་ངོས་ནས་འཇམ་པོར་ཡང་ཡང་ཟློས་པས་དབྱངས་ཀྱི་འབབ་འདེགས་མང་ཤོས་ཤིག་ལྷོད་པའམ། འཇམ་པ། ཞི་བའི་ཆ་ལྡན་ནའང་། དགུང་མཐའྀ་ནི་སྲུང་དུ་རུང་།། ཞེས་དང་། ངས་པོ་ནྀ་རྨད(སྨད)དུ་རུང་།། ཞེས་པས། ཅུང་་དྲག་ཤུགས་དང་རྔམ་ཤུགས་ལྡན་པར་འཕོ་བ་སོགས་ཞི་དྲག་ཟུང་འབྲེལ་གྱི་དབྱངས་ཀྱི་འགྱུར་ཁུགས་ཡོད་པར་མ་ཟད། བཙན་པོའི་མགུར་ཚིག་འདི་ནི་མཇུག་བསྡུ་བའི་ཚིག་ཏུ་གཏོགས་པས། བཤད་མཛོད་ཡིད་བཞིན་ནོར་བུ་ལས། ཐ་མ་ཡུར་པོ་ཁ་རུབ་ལ་གྲངས(དྲངས)པ་འདྲ་སྟེ། དོན་འཕྲིལ(འདྲིལ)བ་གཅིག་དགོས་སོ།། ཞེས་པས། མཐར་དོན་གཅིག་ཏུ་དྲིལ་ཏེ་འབབ་སྐབས་དབྱངས་འགྲོས་ཀྱང་དྲག་ཤུགས་ཀྱིས་བསྡུས་ཤིང་། མགུར་ཚིག་འདི་ལས་མཐའ་མའི་གནད་གཅིག་ཏུ་དྲིལ་ཏེ་སྡོམ་དུ་བཀོད་ཅིང་ཐག་བཅད་པའི་ཉམས་ཀྱི་ཆོད་སྟོབས་ཆེ་བའི་ཟིལ་ཤུགས་ཆེ་ཞིང་། ཚིག་གི་སུམ་ཆ་གཉིས་ཙམ་དབྱངས་འགྲོས་དལ་ཞིང་ལྷོད་པོར་འབབ་པ་དང་། མཐའ་མའི་འགག་རྩ་རེ་རེ་དྲག་ཤུགས་ཀྱིས་མནན་ཏེ་མཇུག་བསྡུས་པའི་དབྱངས་ཀྱི་ཟིལ་ཤུགས་ལྡན་ནོ།།

དེ་ལྟར་མདོར་ན་བཙན་པོའི་མགུར་ཚིག་གོང་མ་ལས་བཙན་པོ་དང་བཙན་པོའི་མེས་པོ་དང་དབའ་དབྱི་ཚབ་དང་གཉིས་ཀྱི་འབྲེལ་བ་དང་དབའ་དབྱི་ཚབ་བཙན་པོར་བློ་དཀར་བ་དང་མཛད་རྗེས་ཆེ་བ་སོགས་འདས་པའི་གནས་ཚུལ་མང་བོ་མཐོངས་ཡངས་ས་ནས་བརྗོད་ཅིང་། གཉིས་པ་ལས་ད་ལྟའི་རྒྱལ་བློན་བར་གྱི་འབྲེལ་བ་འཛིན་སྟངས་དང་གཞན་གྱི་མི་ཁ་དང་སེལ་འཇུག་པར་གདོང་ལེན་བྱེད་སྟངས་བཅས་ཁེ་ཉེན་སོགས་དོན་གྱི་གནད་བྱེ་བྲག་ཏུ་བབས་ཏེ་གསལ་བར་བསྟན་ཞིང་། དེ་བཞིན་དུ་རྒྱལ་བློན་གཉིས་མཐུན་པ་དང་འཆམ་པའི་དཔུང་གཅིག་ཏུ་བསྒྲིལ་ཏེ་བསྐྱོད་དགོས་ཚུལ་སོགས། ཚིག་ཉུང་ལ་དོན་འདུས་པའི་དཔེ་དང་སྦྱར་ཏེ་ཞིབ་པར་བསྟན་པའོ།། མགུར་ཚིག་མཐའ་མ་ལས། མ་འོངས་པར་ཡང་མཐུན་པའི་གོང་བུ་མི་འཐོར་བའི་ཕྱིར་དུ་མནའ་ཚིག་གིས་གཟེར་བུ་བཏབ་སྟེ། མི་འགྱུར་བའི་མནའ་རྡོ་དང་ལྷན་དུ་དམ་བཅས་ཞིང་ཁས་བླངས་ཏེ། ཕན་ཚུན་ཡིད་ཆེས་དང་སྤོབས་པ་ལྡན་པར། རྒྱལ་བློན་གྱི་འབྲེལ་བ་ནི་གཏན་དུ་འགྱུར་བ་མེད་པའི་དམ་བགྱིས་ཚིག་བགྱིས་པ་ཞིག་སྟེ། བཤད་མཛོད་ཡིད་བཞིན་ནོར་བུ་ལས། མདོར་ན་གཞུང་སྲོང་ལ་ངག་འཇམ། བར་དུ་ཁོག་ཡངས་ལ་འགག་དམ་པ། ཐ་མ་དོན་གསལ་ལ་བྱེ་བྲག་ཕྱེད་པ། ཞེས་གསུངས་པའང་། བཙན་པོའི་མགུར་འདི་ཡང་དེ་ལྟར་གོ་རིམ་ལྡན་པར་གཏན་ལ་བབས་པའི་ཐུན་མིན་ཁྱད་ཆོས་མཆིས་སོ།།

གཞན་དབའ་དབྱི་ཚབ་ཀྱི་མགུར་ལན་ནི། ཏུན་ཧོང་ཡིག་རྙིང་ལས། PT1287,0271/0272 བཙན་དུ་ནྀ་བདག་འཚལ་ན་། ཆུང་ན་ནི་རྗེ་ཁུར་ཆིག།། པྱུག་དུ་ནྀ་བདག་འཚལ་ན་།། ལྷ་རྀ་ནི་གཡང་སྐྱོང་ཤིག།། ཅེས་པར་མགུར་གཞན་དུ་ཚིག་ངོས་ཆེར་འདྲ་བའི་དཔེར་བསྡུར་དུ་མེད་ནའང་། དོན་གྱི་ཆ་ནས་གོ་བ་ལེན་ཕྱོགས་གཅིག་ཏུ་ཅུང་གཞོལ་བ་ནི། མགར་སྟོང་བཙན་གྱི་མགུར་ལས། PT1287,0441/0442 གློ་བོ་ནི་མང་ཀུ་རྒྱ། ནམས་ཀྱང་ནི་ཡར་མྱི་པོ། གད་ཀྱྀ་གསེར་པོ་ཆེ།། ནམས་ཀྱང་ནྀ་པྱིང་བ་འྀ་བཅུད་། ཅེས་པ་ནི་གོང་དུ་དབའ་དབྱི་ཚབ་ཀྱིས་རང་གིས་བཙན་པོའི་མངའ་ཁོངས་སུ་སྲི་ཞུ་བསྒྲུབས་པའི་མཛད་རྗེས་ཀྱི་ཆེ་བ་བརྗོད་པ་བཞིན་དུ། འདིར་མགར་གྱིས་ཀྱང་གློ་བོ་མངའ་འོག་ཏུ་བཅུག་པ་དང་གད་ཀྱི་ཕྱོགས་དག་རང་གི་དབང་དུ་ཡོད་པ་དག་ཀྱང་། མདོར་ན་དེ་དག་ནི་ཡར་ལུང་གི་མི་ཡིན་པར་མ་ཟད། གད་ཀྱི་ཕྱོགས་ཐམས་ཅད་ཀྱང་བཙན་པོའི་ཁབ་སོའི་ནང་གི་བཅུད་ཡིན་ཚུལ་སྨྲས་པས། དབའ་དབྱི་ཚབ་ཀྱིས་བཙན་པོ་ཆུང་ནས་བཀུར་ཞིང་གཅེས་པར་བསྐྱངས་པ་དང་མངའ་རིས་ཀྱི་གཡང་བསྐྱངས་ཚུལ་བརྗོད་པ་དང་། མགར་གྱིས་ཀྱང་རང་གི་ཆེ་བ་བརྗོད་པ་གཉིས་དོན་དུ་གཅིག་མཚུངས་སུ་གྱུར་ཡོད་པས། མགུར་ཚིག་གཉིས་ཕན་ཚུན་བསྡུར་ཚེ་དོན་གྱི་ཁྱད་ཆོས་ཀྱང་གཅིག་ཏུ་འབབ་བོ།།

༡ ཐ་སྙད་ཀྱི་གདམ་གསེས་དང་སྒྲིག་གཞི་གྲུབ་སྟངས། བཙན། བདག འཚལ། ཆུང་། རྗེ། ཁུར། པྱུག(ཕྱུག) བདག འཚལ། ལྷ་རྀ། གཡང་། སྐྱོང་། བཅས་མིང་བརྡ་བཅུ་གཉིས་ཀྱིས་གྲུབ་ཡོད།

ཆ་མཉམ་པའི་སྒྲིག་སྟངས། ཚིག་རྐང་ཐོག་མ་གཉིས་དང་མཐའ་མ་གཉིས་ཕན་ཚུན་དོ་མཉམ་པར་བསྒྲིགས་ཡོད་དེ། ཚིག་རྐང་དང་པོར། བཙན། བདག འཚལ་ཞེས་པ་དང་ཆ་མཉམ་པར་ཚིག་རྐང་གསུམ་པར། པྱུག བདག འཚལ་ཞེས་པས། ཚིག་རྐང་རེ་རེར་བདག་དང་འཚལ་ཞེས་མཉམ་པོར་བཀོད་ཅིང་།  འཚལ་ཞེས་པའི་བྱ་ཚིག་གཉིས་ཀྱང་གནས་གཅིག་ཏུ་སྦྱར་ཡོད། དེ་བཞིན་དུ། རྗེ་ཁུར་དང་གཡང་སྐྱོང་ཞེས་པའང་། ཚིག་མི་འདྲ་ཡང་དོན་དུ་བྱ་བའི་ཡུལ་ལ་བྱ་བ་བྱེད་ཚུལ་འདྲ་བས། བྱ་ཚིག་གཉིས་ཀྱི་འཇུག་ཡུལ་དང་གནས་སོགས་ཀྱང་ཆ་མཉམ་དུ་ཡོད་པའོ།།

ཐ་སྙད་ཀྱི་སྒྲིག་རིམ་ནི། ཚིགས་རྐང་བཞི་གའི་ཚིག་རྐང་ཐོག་མ་གཉིས་དང་མཐའ་མ་གཉིས་ཕན་ཚུན་བསྡུར་ཏེ་བརྗོད་ན། སྒྲིག་རིམ་གྱི་ཞིབ་ཆ་ཞིག་ཀྱང་མངོན་ཐུབ་སྟེ། བཙན་དང་པྱུག(ཕྱུག) ཅེས་པའི་ཚིག་རྐང་རེ་རེའི་མཇུག་ཏུ། བདག་འཚལ་ན། ཞེས་པ་འདྲ་བར་བསྣན་ཏེ་བསྒྲིགས་ཤིང་། དེ་ནས་ཚིག་རྐང་གཉིས་པ་དང་བཞི་བར་ཡང་། ཆུང་དང་ལྷ་རི། ཞེས་པའི་ཡུལ་གྱི་ཁྱད་ཆོས་སམ་བདག་པོ་དང་ཡུལ་གྱི་འབྲེལ་བ་བསྟན་ཏེ། རྗེ་ཁུར་ཆིག་དང་གཡང་སྐྱོང་ཤྀག ཅེས་པས། ཡུལ་དང་འབྲེལ་བའི་བྱ་བ་རེ་མཐར་སྦྱར་ནས་གྲུབ་པར་བགྱིས་པ་ཞིག་གོ། སྐུལ་ཚིག་ལྟ་བུའི་ཆིག་དང་ཤྀག་ཅེས་པར་ཡོད་ཀྱང་། དོན་དང་འབྲེལ་བར་གཞིགས་ན། ཅིང་དང་ཤིང་ཡིན་པར་སྙམ་སྟེ། སྔར་གྱི་ཡི་གེར་དང་ག་དང་ང་སོགས་སྡེ་བ་གཅིག་པ་ཕན་ཚུན་བརྗེ་བ་ནི་རྒྱུན་སྲོལ་ཞིག་སྟེ། གང་ལ་གག ཅེས་པ་སོགས་མང་བས་སོ།།

བྱ་ཚིག་གི་ནུས་པ། འཚལ་དང་འཚལ། ཁུར་དང་སྐྱོང་། ཞེས་པའི་བྱ་ཚིག་བཞི་ནི་ཚིག་རྐང་རེ་རེའི་མཐར་མནན་ཞིང་། དེ་བས་འཚལ་ལྟ་བུར་མཚོན་ན་འགུལ་སྐྱོད་མ་ལག་གི་འཕྲུལ་བུ་ལྟ་བུར་འདུག་པས། བྱ་ཚིག་གི་དོན་ཆིག་རྐྱང་བ་ཞིག་མིན་པར་སྐྱེད་ནུས་ལྡན་པའི་བྱ་ཚིག་ཏུ་གཏོགས་པས། འགུལ་སྐྱོད་ཀྱི་འཕེལ་ཕྱོགས་ཀྱང་མཆེད་པའི་ཉམས་སུ་མངོན། ཁུར་དང་སྐྱོང་གི་བྱ་ཚིག་གིས་བྱེ་བྲག་གི་ཡུལ་ལ་དམིགས་ཏེ་གཟབ་ནན་གྱི་འགུལ་སྐྱོད་ཅིག་ཡོད་པས། ཧ་ཅང་གཟུ་ཞིང་དམིགས་ཕུག་པའི་ནུས་པ་མངོན་ཡོད།

༢ ཚོར་བས་བརྟས་པ། དབའ་དབྱི་ཚབ་ཀྱིས་མགུར་ལན་བླངས་པ་ཞིག་ཡིན་པས། མགུར་ཚིག་ཀྱང་གོང་མ་ནི་ཚོར་བའི་ཤེད་དང་སྤོབས་པའི་མཐོངས་ཕྱེས་པའི་ཉམས་ཤིག་མངོན་ཡོད། དེ་ནི་གཙོ་བོ་དབའ་དབྱི་ཚབ་ནི་གནམ་རི་སྲོང་བཙན་སྐབས་མཛད་རྗེས་ཆེ་བ་གོང་དུའང་བརྗོད་ཟིན་པ་ལྟར་ཡིན། ད་དུང་ཁོང་ནི་གུང་བློན་དུ་བཞུགས་མྱོང་བ་དང་། བཙན་པོར་སྲི་ཞུ་བསྒྲུབས་ཏེ་ཉེ་ཞོ་ཅི་ཡང་རྒན་པོ་རྒས་ཤིང་འཁོགས་པའི་བར་རམ། བཙན་པོ་འདི་ལ་ཐུག་གི་བར་དུ་སྲི་ཞུ་བསྒྲུབས་པས། ནང་སེམས་ཀྱི་ཚོར་བའི་ངར་ཤུགས་དང་སྤོབས་པ་ཡང་འཇགས་མེད་པར། བཙན་པོའི་ཆབ་སྲིད་ཀྱི་ཕྱི་ནང་ཡོད་ཚད་ལ་བདག་སྐྱོང་བྱས་ཚུལ་ཚོར་བའི་རྔམ་ཅུང་མཐོ་བར་བརྗོད་ཡོད་དེ། བཙན་དུ་ནྀ་བདག་འཚལ་ན་། ཞེས་དང་། པྱུག་དུ་ནྀ་བདག་འཚལ་ན།། ཞེས་པས་བདག་ཅེས་ཡང་ཡང་བྱུང་བས། དབའ་དབྱི་ཚབ་ཀྱིས་རང་གི་ཆེ་བ་གསལ་བསྒྲགས་ཐེངས་གཅིག་བྱས་ཡོད། གསལ་བསྒྲགས་ཀྱི་ངར་ཤུགས་འདི་ཉིད་བཙན་པོའི་རྒྱལ་རབས་མཇུག་མ་རྫོགས་བར་དུ་གནས་ཐུབ་པའི་ནུས་པ་ཞིག་བྱུང་། ཚོར་བའི་ངར་ཤུགས་ཀྱི་ཚད་ལ་གཞིགས་ཚེ། མགུར་གྱི་འགོ་འཛིན་སྐབས་ཀྱང་བཙན་པོ་ལས་དབའ་དབྱི་ཚབ་རང་ཉིད་ཐོག་མར་བཞག་སྟེ་བརྗོད་ཅིང་། བདག་འཚལ་ན། བདག་འཚལ་ན། ཞེས་ཐོག་མའི་ཚིག་རྐང་བཞི་ལས་རང་ཉིད་ཀྱི་བྱས་རྗེས་ལ་རང་ཉིད་སྤོབས་པ་དང་ཡིད་ཆེས་ཀྱིས་ཁེངས་པ་ཚོར་ཐུབ། སྐབས་དེར་མཚོན་ན་དངོས་གནས་སྒྲོ་བཏགས་ལྟ་བུ་མ་ཡིན་པར་དབའ་དབྱི་ཚབ་ཀྱི་མཛད་རྗེས་ནི་ངོ་མཚར་བ་ཞིག་ཡིན་པས། དེ་ལྟར་བརྗོད་ཀྱང་བརྗོད་དུ་རུང་བ་ཞིག་གོ། དེ་ལྟར་མགུར་ཚིག་འདི་ནི་གྲིམ་ཞིང་རྣོ་བ་ཞིག་ཏུ་ངེས་པས། དབའ་དབྱི་ཚབ་ལ་རྒྱུས་མེད་པ་ཞིག་ལ་མཚོན་ན་དང་ལེན་བྱ་དཀའ་བར་མཆིས་ནའང་། སྐབས་དེར་མཚོན་ན་བཙན་པོ་ལས་བློན་པོ་འདི་ཉིད་རྒས་ཤིང་ངལ་གསོ་བའི་དུས་སུ་བསླེབས་པས། གཟི་བརྗིད་དང་ཟིལ་ཤུགས་ཡོད་ཀྱང་སྲིད་དེ། ཁོང་གི་ཐོབ་གནས་དང་མཛད་རྗེས་ཙམ་དུ་མ་ཟད་བུ་རྒྱུད་དག་གིས་ཀྱང་བཙན་པོའི་མེས་པོ་གོང་མའི་སྐབས་སུ་དཔའ་མཚན་ལྡན་པ་ཤ་སྟག་ཡིན་པས། དབའ་དབྱི་ཚབ་ཀྱི་མི་རྒྱུད་ཀྱི་ཁོར་ཡུག་དང་ཆབ་སྲིད་ཀྱི་མཛད་རྗེས་གང་ནས་བསམ་ན། སྤྱིར་བཏང་བ་ཞིག་གིས་དོ་ཟླ་མེད་པས་བཙན་པོའི་འཁོར་དུ་གཟི་བརྗིད་ཆེ་བ་བསྙོན་དུ་མེད། དེ་ལྟར་མགུར་འདི་ལ་ཚོར་བའི་ངར་དང་སྤོབས་པའི་ཉམས་ཀྱིས་བརྟས་པའང་འོས་ཤིང་འཚམས་པ་ཞིག་གོ།

༣ དབྱངས་འགྲོས་ཀྱི་ཁྱད་ཆོས། དབའ་དབྱི་ཚབ་ཀྱི་མགུར་ཚིག་ཐོག་མའི་དབྱངས་འགྲོས་ནི་ཐུང་ལ་གྲིམ་ཤ་ཆེ་བ་ཞིག་ཏུ་སྣང་སྟེ། ཚིག་རྐང་གཉིས་རེ་དོ་མཉམ་དུ་བྱས་པས། ཕལ་ཆེར་ཚིག་བཞི་ལ་དབྱངས་འགྲོས་རིགས་གཉིས་ཙམ་བསྟུན་མར་བྱུང་བ་ལྟ་བུར་སྣང་སྟེ། ས་པཎ་གྱིས། ཚིག་གི་དུས་སུ་ཚིག་གསལ་ཞིང་།། དབྱངས་ལ་དབྱངས་ཉིད་གསལ་བ་དང་། དེ་དག་བསྲེས་ཚེ་ལེགས་འདྲེ་ལ།། འདྲེས་ནས་སོ་སོར་གསལ་བའོ།། ཞེས་པ་བཞིན། མགུར་ཚིག་འདི་ནི་དབྱངས་རྒྱུན་ལྷོད་པོར་འབབ་པ་ཞིག་མིན་པར། ཚིག་གི་ངོ་བོ་གསལ་བར་དབྱངས་ཀྱི་སྲོག་རྒྱུན་སྐྱོམ་པར་བྱེད་པའི་ཉམས་ཤིག་མངོན་པས། དེ་ནི་རི་གཟར་ལས་རྦབ་རྡོ་འདྲིལ་བ་ལྟ་བུའི་རྔམ་ཟིལ་དང་བརྗིད་ཉམས་གྱིས་བརྟས་ཡོད།  གཙོ་བོ་ཚིག་གིས་དོན་དེ་ཁ་ལོ་སྒྱུར་སྐབས་དོན་གྱི་སྙིང་བོ་རིགས་གཉིས་སུ་བསྡུས་ཤིང་། དེ་ཡང་སྟེང་ནས་མར་ལ་ཕྱོགས་པའི་ཉམས་ཀྱང་ཡོད་པས། ད་གཟོད་དབྱངས་ཀྱི་འགྲོས་རྒྱུན་མྱུར་ལ་ཐུང་ཞིང་། འབབ་ཤུགས་དྲག་ཏུ་ཆད་པའི་ཉམས་ཤིག་ངང་གིས་མངོན་ནོ།།

ཏུན་ཧོང་ཡིག་རྙིང་ལས་དབའ་དབྱི་ཚབ་ཀྱི་མགུར་དུ། PT1287,0272 རྗེ་འྀས་ནི་བཀའ་སྩལ་ན་གཞའ་མ་ནྀ་ཡུན་ཀྱི་སྲིད། ། བྱ་འྀས་ནི་ཞུ་པུབ་ན་ལ་པྱི་ནི་གདངས་སུ་དྲོ། ཞེས་ཚིག་རྐང་གཉིས་སུ་བྱས་མོད། དོན་དུ་ཚིག་རྐང་བཞི་ཡིན་པར་མགར་སྟོང་བཙན་གྱི་མགུར་དང་བསྡུར་ན་ཤེས་ཐུབ་སྟེ། PT1287 རྗེ་འྀས་ནི་བཀའ་སྩལ་པ་གཞའ་པྱྀ་ནི་ཡུན་ཀྱི་སྲྀད་། བྱ་འྀས་ནི་ཞུ་པུབ་པ། ལ་པྱི་ནྀ་གདངསུ་དྲོ་།། ཞེས་པས་ཚིག་རྐང་གཅོད་མཚམས་ཀྱི་ངེས་ཤེས་ཤིག་ཀྱང་རྙེད་པར་མ་ཟད། མགུར་གོང་མར། བཀའ་སྩལ་ན། ཞེས་པར་ཕྱི་མར་བཀའ་སྩལ་པ། ཞེས་ན་དང་པ་ཡི་ཁྱད་པར་ཙམ་དང་། ཡང་། མགུར་གོང་མར་གཞའ་མ། ཞེས་པར། ཕྱི་མ་ལས། གཞའ་པྱྀ(ཕྱི)ཞེས་པའི་ཁྱད་པར་ལས་མེད་ཅིང་། གོང་མར་ཞུ་པུབ་ན། ཞེས་པར། ཕྱི་མ་ལས། ཞུ་པུབ་པ། ཞེས་པའང་ན་དང་པ་ཙམ་ལས་ཧེ་བག་མེད། དེ་བཞིན་དུ་ཅུང་ཟད་བསྡུས་པ་དང་དབྱངས་ཡིག་ལོག་མ་ལོག་ལ་ཁྱད་པར་ཆེར་མི་འགྲོ་བས། དོན་དུ་མགུར་འདི་གཉིས་ཤིན་ཏུ་འདྲ་བར་གྱུར་ཡོད། དེས་ན་དབའ་དབྱི་ཚབ་ཀྱི་མགུར་དུ་དབབ་སྟེ་དབྱེ་ཞིབ་བགྱིད་ན།

༡ ཐ་སྙད་ཀྱི་གདམ་གསེས་དང་སྒྲིག་གཞི་གྲུབ་སྟངས། རྗེ། བཀའ། སྩལ། གཞའ་མ། ཡུན། སྲིད། བྱ། ཞུ། པུབ། ལ་པྱི། གདངས། དྲོ། ཞེས་ཐ་སྙད་བཅུ་གཉིས་ཀྱིས་མགུར་གྱི་ཚིག་རྐང་བཞི་དེ་གྲུབ་འདུག

༢ གཏན་ཚིག་རང་བཞིན་ལྡན་པ། མགུར་ཚིག་གོང་མ་ལས་ཚོར་བ་ཤུགས་ཆེར་འབྲེལ་ཏེ་གནས་ལུགས་ཤིག་གསེད་ཅིང་བཀྲོལ་ནའང་། སྐབས་འདིར་དེ་ལས་ལྡོག་སྟེ་རྒྱུ་མཚན་དང་གནས་ལུགས་ཀྱི་ངོ་བོར་ཕྱོགས་ཤིང་། དོན་དངོས་གཏན་ལ་འབེབ་པ་ལྟ་བུའི་ཉམས་ཚུལ་གྱིས་བརྟས་པས། ཤེས་རྟོགས་ཀྱི་ནུས་པ་ཆེས་ཆེར་ལྡན་ཞིང་། རྗེ་ཡིས་དེ་ལྟར་དྲང་བདེན་གྱིས་བཀའ་ལེགས་པར་སྩལ་ན། བཙན་པོའི་ཆབ་སྲིད་ཡུན་རིང་དུ་བརྟན་པའི་རྒྱུར་འགྱུར་བའི་རྒྱུ་མཚན་ལྷུག་པར་བཀྲོལ་ཏེ་བརྗོད་ཡོད། དེ་དང་འདྲ་བར་ཚིག་སྡེབ་ཀྱི་འགྲོས་མཉམ་པར། བྱ་ཡིས་ཀྱང་གཤོག་སྒྲོ་བརྐྱངས་ཏེ་ལ་ཕྱི་གངས་དཀར་ཡང་དྲོ་ཁོལ་ལེར་འགྱུར་བའི་གནས་ལུགས་གསལ་བཤད་བགྱིས་པ་ཞིག་ཡིན། ཚིག་རྐང་ཕྱི་མ་གཉིས་ཀྱང་སྔ་མའི་དཔེ་རུ་གོ་ཡང་ཆོག་ལ། ཡང་ན། དབའ་དབྱི་ཚབ་བྱ་རུ་དཔེར་བགྱིས་ཏེ་མཚོན་པར་གོ་ན་འགྲིག་མོད། ཕྱིས་ཀྱི་མགར་གྱི་མགུར་ལས་མགར་རང་ཉིད་ལ་སྦྱར་ན་འཕྲོད་པའི་ཉམས་ཤིག་ཀྱང་མངོན་པས། གཅིག་བྱས་ན་བློན་པོ་འདི་གཉིས་ཀྱི་མགུར་སྔ་ཕྱི་བར་དུ་དོན་གྱི་གོ་བར་འཕེལ་འགྱུར་བྱུང་ཡོད་ཀྱང་སྲིད་མོད། ཚིག་གི་སྡེབ་མཉམ་ཚུལ་ལ་དཔག་ན། ཕྱི་མ་འདི་ལས་དབའ་དབྱི་ཚབ་རང་ཉིད་དང་སྦྱར་ནའང་ཅུང་ཆ་མཉམ་པའི་ཉམས་ཤིག་འདུག གཞན་དུ་ན་ཕྱིས་སུ་ཡིག་མཁན་གྱིས་བློན་པོ་གཉིས་ཀྱི་མགུར་འདི་གཉིས་ཕན་ཚུན་ཅུང་ཟད་བསྲེས་པའི་ཆ་ཞིག་སྲིད། དེ་ནི་དཔག་གིས་ཟིན་དཀའ་ཞིང་ཁུངས་འཕེར་བའི་དཔང་རྟགས་རེ་ཞིག་མེད་པས་ཁ་ཚོན་གཅད་དུ་མི་འདོད་དོ།། རྒྱལ་བློན་གྱི་འབྲེལ་བའམ་བཙན་པོའི་ཆབ་སྲིད་ཀྱི་གནས་སྟངས་སོགས་ཀྱང་། རིགས་པ་ཡང་དག་ལ་བརྟེན་ནས་གཏན་ལ་ཕབ་པའི་དཀྱེལ་ཡངས་ཀྱི་གསུང་ཞིག་ཏུ་སྣང་བས། གཏན་ཚིག་གི་ལྷུ་ཁ་འཕྲོད་ཅིང་དཔེ་དོན་གྱི་སྡེབ་ངོ་འགྲིག་པ་ཞིག་ཏུ་གྲུབ་པས། མགུར་གྱི་ཆོད་སྟོབས་ཆེ་བ་ཞིག་ཏུ་སྣང་ངོ་།།

༣ དབྱངས་འགྲོས་ཀྱི་ཁྱད་ཆོས། དབའ་དབྱི་ཚབ་ཀྱི་མགུར་ཚིག་གོང་མ་ནི་མྱུར་ལ་དྲག་པའི་ངར་ཤུགས་ཆེ་བ་ཞིག་ཏུ་མཆིས་མོད། སྐབས་འདིར་ལྷོད་ཅིང་འཇམ་པའི་ངང་དབྱངས་འགྱུར་དལ་བའི་འགྲོས་ཉམས་ཤིག་ཀྱང་ལྡན་པས། ཚིག་གོང་འོག་ཞི་དྲག་ཟུང་འབྲེལ་གྱི་འགལ་བའི་མཐུན་སྦྱོར་གྱི་མཛེས་པ་ཞིག་མངོན་ཡོད། བཤད་མཛོད་ཡིད་བཞིན་ནོར་བུ་ལས། ཁྱུང་ཆེན་ནམ་མཁར་ལྡིང་བའི་གླུ།། ས་བདག་རྒྱལ་པོའི་སྤྱན་སྔར་བླངས།། ཞེས་པའང་འདི་ལྟ་བུ་ཞིག་ཏུ་གོ་རུང་བར་སྙམ་མོ།།

མདོར་ན་སྲོང་བཙན་སྒམ་པོ་དང་དབའ་དབྱི་ཚབ་ཀྱི་མགུར་མ་འདི་གཉིས་ལས་སྐབས་དེའི་ཆབ་སྲིད་ཀྱི་གནས་སྟངས་དང་རྒྱལ་བློན་གྱི་འབྲེལ་བ། སྒྱུ་རྩལ་གྱི་རིན་ཐང་། སྤྱི་ཚོགས་ཀྱི་ཟུར་ངོས་མང་བོ་ཞིག་མཐོང་ཐུབ་པའི་མེ་ལོང་ལྟ་བུར་འདུག་པས། དཔྱད་གཞིའི་རིན་ཐང་བླ་ན་མེད་པ་མཆིས་སོ།།

                    ༢༠༢༣ ༤ ༢༠ ནེའུ་ཡོག

 དཔྱད་གཞིའི་དཔེ་ཁུངས།

[1] སྤུ་རྒྱལ་བོད་ཀྱི་རྡོ་བརྐོས་ཡི་གེ་ཕྱོགས་བསྒྲིགས་ཀྱི་མ་ཡིག་དག་བཤེར་དང་དེའི་ཚིག་འགྲེལ་དྭངས་སང་གངས་ཆུ། པ་ཚབ་པ་སངས་དབང་འདུས་ཀྱིས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༡༣ལོའི་ཟླ༤ པར་པར་ཐེངས༢ བཏབ།

[2] བོད་ཡིག་རྡོ་རིང་ཞིབ་འཇུག ཆབ་འགག་རྟ་མགྲིན་གྱིས་བརྩམས། བོད་ལྗོངས་མི་དམངས་དཔེ་སྐྲུན་ཁང་།་༢༠༡༢ལོའི་ཟླ༤ པར་པར་ཐེངས༡ བཏབ།

[3] 敦煌吐蕃文书论文集。王尧，陈践编著。四川民族出版社。1988年4月第1版。

[4] བོད་བཙན་པོའི་རྒྱལ་རབས། རྩོམ་སྒྲིག་པ། འབྲི་གུང་སྐྱབས་མགོན་ཆེ་ཚང་། ༢༠༡༠ སྲོང་བཙན་དཔེ་མཛོད་ཁང་།

[5] 吐蕃简牍综录。王尧，陈践编著。文物出版社出版。1986年3月第一版第一印刷。

[6] བོད་ཀྱི་བརྡ་རྙིང་ཡིག་ཆ་བདམས་བསྒྲིགས། གཉའ་གོང་དཀོན་མཆོག་ཚེ་བརྟན་གྱིས་བརྩམས། ཀྲུང་དབྱང་མི་རིགས་སློབ་གྲྭ་ཆེན་མོའི་དཔེ་སྐྲུན་ཁང་། ༡༩༩༥ ལོའི་ཟླ༨ པར་པར་ཐེངས་དང་པོ་དཔར།

[7] བོད་ཀྱི་བརྡ་རྙིང་ཡིག་ཆ་རྩ་ཆེན་བདམས་བསྒྲིགས་རྣམས་ཀྱི་ཚིག་དོན་ཀུན་ནས་ཁྲོལ་བར་བྱས་པ་རབ་གསལ་མེ་ལོང་། གཉའ་གོང་དཀོན་མཆོག་ཚེ་བརྟན་གྱིས་བརྩམས། ཀན་སུའུ་མི་རིགས་དཔེ་སྐྲུན་ཁང་། ༢༠༠༡ལོའི་ཟླ༤བར་པར་ཐེངས་དང་བོ་བཏབ།

[8] གནའ་རྩོམ་གཅེས་བཏུས་སློབ་དེབ་གསར་མ་གཞོན་ནུའི་ལང་ཚོ།(སྟོད་སྨད) གོ་ཤུལ་གྲགས་པ་འབྱུང་གནས་ཀྱིས་བསྒྲིགས། མི་རིགས་དཔེ་སྐྲུན་ཁང་། ༢༠༡༢ལོའི་ཟླ༤པར་པེ་ཅིན་དུ་པར་ཐེངས་དང་པོ་བརྒྱབ།

[9] སྤུ་རྒྱལ་བཙན་པོའི་སྐབས་ཀྱི་བརྡ་རྙིང་ཡིག་ཆ་སློབ་གསར་སྟོང་གི་འཇུག་སྒོ། གོང་བ་ཀླུ་འབུམ་རྒྱལ་གྱིས་བརྩམས། མི་རིགས་དཔེ་སྐྲུན་ཁང་། ༢༠༠༦ལོའི་ཟླ༨པར་པེ་ཅིན་དུ་པར་ཐེངས་དང་པོ་བརྒྱབ།

[10] ཏུན་ཧོང་ནས་ཐོན་པའི་གནའ་བོའི་བོད་ཡིག་ཤོག་དྲིལ། བསོད་ནམས་སྐྱིད་དང་དབང་རྒྱལ་གྱིས་ཕྱོགས་སྒྲིག་དང་འགྲེལ་བཤད་བྱས་པ། མི་རིགས་དཔེ་སྐྲུན་ཁང་། ༡༩༨༣ལོའི་ཟླ༨པར་པེ་ཅིན་ལ་པར་ཐེངས༡པོ་བརྒྱབ་པ།

[11] རྒྱའི་ཡིག་ཚང་དུ་འཁོད་པའི་བོད་དང་འབྲེལ་བའི་ལོ་རྒྱུས། འཇམ་དབྱངས་དར་རྒྱས་ཀྱིས་བསྒྱུར་ཅིང་མཆན་བཏབ། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༡༣ལོའི་ཟླ༡༡པར་པར་ཐེངས་དང་པོ་བཏབ།

[12] བོད་བཙན་པོའི་རྒྱལ་རབས་ཀྱི་ཆབ་སྲིད་ལམ་ལུགས་ཞིབ་འཇུག རྨེ་རུ་ཡུལ་ལྷ་ཐར་གྱིས་བརྩམས། མི་རིགས་དཔེ་སྐྲུན་ཁང་། ༢༠༡༠ལོའི་ཟླ༩པར་པེ་ཅིན་དུ་པར་ཐེངས་དང་པོ་བརྒྱབ།

[13] བཙན་པོའི་རྒྱལ་རབས་སྐབས་ཀྱི་དཔོན་རིགས་ཞིབ་འཇུག པད་གཞུང་ཟླ་བ་ཆུང་བདག་གིས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༡༣ལོའི་ཟླ༩པར་པར་ཐེངས༡ བཏབ།

[14] ཧྥ་རན་སིར་ཉར་བའི་ཏུན་ཧོང་ཡིག་རྙིང་ཤོག་དྲིལ་གྱི་བཤུས་ཡིག་ཕྱོགས་བསྒྲིགས། (དེབ་དང་པོ།) གཙོ་སྒྲིག་པ། ཁ་སྒང་བཀྲ་ཤིས་ཚེ་རིང་། སྟོབས་ལྡན། ཤ་བོ་རབ་བརྟན། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༡༤ལོའི་ཟླ༦པར་པར་ཐེངས་དང་པོ་བཏབ།

[15] ཏུན་ཧོང་ཡིག་རྙིང་ཁྲོད་ཀྱི་སྒྲུང་རབས་ཕྱོགས་བསྒྲིགས། རྩོམ་སྒྲིག་པ། སྟོབས་ལྡན། རིན་ཆེན་སྒྲོལ་མ། བོད་ལྗོངས་མི་དམངས་དཔེ་སྐྲུན་ཁང་། ༢༠༡༦ལོའི་ཟླ༣པར་པར་ཐེངས༡བཏབ།

[16] གཏམ་ཤུལ་དགའ་ཐང་འབུམ་པ་ཆེ་ནས་རྙེད་པའི་བོན་གྱི་གནའ་དཔེའི་ཞིབ་འཇུག ལྕགས་མོ་མཚོས་བརྩམས། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༡༦ལོའི་ཟླ༨པར་པར་གཞི་དང་པོ་བསྒྲིགས་ཤིང་པར་ཐེངས་དང་པོ་བཏབ།

[17] དུས་རབས་རིམ་བྱོན་གྱི་ལོ་པཎ་དང་འགྱུར་བྱང་ཞིབ་འཇུག སྒོ་མེ་ཚེ་དབང་རྣམ་རྒྱལ་དང་སངས་རྒྱས་མཚོས་བརྩམས། མི་རིགས་དཔེ་སྐྲུན་ཁང་། ༢༠༡༧ལོའི་ཟླ༡༢པར་པེ་ཅིན་དུ་པར་ཐེངས་དང་པོ་བརྒྱབ།

[18] དུས་རབས་༩–༡༩པའི་བོད་ཡིག་གནའ་དཔེ་བྲིས་མའི་མཛད་བྱང་དང་མཆན་གྱི་ངོས་འཛིན།(སྟོད་སྨད།) པད་མ་བཀྲ་ཤིས་ཀྱིས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༡༨ལོའི་ཟླ༥པར་པར་ཐེངས༡བཏབ།

[19] ཏུན་ཧོང་ཡིག་རྙིང་ལས་བྱུང་བའི་བོད་བཙན་པོའི་དུས་ཀྱི་མགུར་གླུའི་ཞིབ་འཇུག རིག་འཛིན་གྱིས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༨ལོའི་ཟླ༡༠པར་དཔར་ཐེངས༡བཏབ།

[20] མདའ་དང་འཕང་། (སྟོད་སྨད།) མཁར་རྨེའུ་བསམ་གཏན་གྱིས་བརྩམས། བདེ་ཁང་བསོད་ནམས་ཆོས་རྒྱལ་གྱིས་བསྒྱུར། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༡༠ལོའི་ཟླ༡༡པར་པར་གཞི་གཉིས་པའི་པར་ཐེངས་དང་པོ་བཏབ།

[21] ཚིག་མཛོད། ཁ་སྒང་བཀྲ་ཤིས་ཚེ་རིང་སོགས། མི་རིགས་དཔེ་སྐྲུན་ཁང་། ༢༠༡༩ལོའི་ཟླ༡༡པར་པེ་ཅིན་དུ་དཔར་ཐེངས་དང་པོ་བརྒྱབ།

[22] བོད་ཀྱི་གནའ་བོའི་རྒྱལ་ཕྲན་དང་། རྒྱལ་ཕྲན་སིལ་མ། སྟོང་སྡེ། ཡུལ་དཔོན་ཚན་བཅས་ཀྱི་ཞིབ་འཇུག པ་ཚབ་པ་སངས་དབང་འདུས་ཀྱིས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༢༡ལོའི་ཟླ༩པར་པར་ཐེངས༢བཏབ།

[23] དམག་ཁྲིམས་ཡིག་རྙིང་ཡིག་ཆའི་ཚིག་འགྲེལ་དང་ཞིབ་འཇུག པད་གཞུང་ཟླ་བ་ཆུང་བདག་གིས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༢༡ལོའི་ཟླ༤པར་པར་ཐེངས༡བཏབ།

[24] ཏུན་ཧོང་ནས་ཐོན་པའི་བོད་ཀྱི་ལོ་རྒྱུས་ཡིག་ལས་བྱུང་བའི་བོད་ལྗོངས་ས་མིང་། མིག་དམར་ཚེ་རིང་ནས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༠༥ ལོའི་ཟླ་བ༨པར་དཔར་ཐེངས་དང་པོ་དཔར།

[25] རྦ་བཞེད་ཕྱོགས་བསྒྲིགས། བདེ་སྐྱིད་ཀྱིས་བསྒྲིགས། མི་རིགས་དཔེ་སྐྲུན་ཁང་། ༢༠༠༩ལོའི་ཟླ༨པར་པེ་ཅིན་དུ་པར་ཐེངས་དང་པོ་བརྒྱབ།

[26] བཀའ་ཐང་སྡེ་ལྔ། གུ་རུ་ཨུ་རྒྱན་གླིང་པས་ཡར་ཀླུངས་ཤེལ་གྱི་བྲག་ཕུག་ནས་བཏོན་པ། མི་རིགས་དཔེ་སྐྲུན་ཁང་། ༡༩༩༠ལོ་ཟླ༡༢པར་པེ་ཅིན་དུ་པར་ཐེངས༤པ་བརྒྱབ་པ།

[27] ཆོས་འབྱུང་མེ་ཏོག་སྙིང་པོ་སྦྲང་རྩིའི་བཅུད། ཉང་ཉི་མ་འོད་ཟེར་གྱིས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༠ལོའི་ཟླ༡༠པར་དཔར་ཐེངས་གཉིས་པ་བཏབ།

[28] ལྡེའུ་ཆོས་འབྱུང་། མཁས་པ་ལྡེའུས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༠ལོའི་ཟླ༡༢པར་དཔར་ཐེངས་གཉིས་པ་བཏབ།

[29] བོད་ཀྱི་ལོ་རྒྱུས་དེབ་ཐེར་ཁག་ལྔ། ནེའུ་པཎྚི་ཏ་སོགས་ཀྱིས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༡ལོའི་ཟླ༦པར་དཔར་ཐེངས་གསུམ་པ་བཏབ།

[30] ཡར་ལུང་ཇོ་བོའི་ཆོས་འབྱུང་། ཤྰཀྱ་རིན་ཆེན་སྡེས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༡༢ལོའི་ཟླ༤པར་པར་ཐེངས༡བཏབ།

[31] ས་སྐྱ་གོང་མ་རྣམ་ལྔའི་གསུང་འབུམ་དཔེ་བསྡུར་མ་ལས་ས་པཎ་ཀུན་དགའ་རྒྱལ་མཚན་གྱི་གསུང་པོད་དང་པོ་དང་བཞི་པ། དཔལ་བརྩེགས་བོད་ཡིག་དཔེ་རྙིང་ཞིབ་འཇུག་ཁང་ནས་བསྒྲིགས། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༧ལོའི་ཟླ་བཞི་པར་པར་ཐེངས་དང་པོ་བཏབ།

[32] བཤད་མཛོད་ཡིད་བཞིན་ནོར་བུ། དོན་དམ་སྨྲ་བའི་སེངྒེས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༦ལོའི་ཟླ༡༢པར་པར་ཐེངས་དང་པོ་བཏབ།

[33] ཉི་མའི་རིགས་ཀྱི་རྒྱལ་རབས་དང་ཟླ་བའི་རིགས་ཀྱི་རྒྱལ་རབས། གུ་གེ་པཎྚི་ཏ་སོགས་ཀྱིས་བརྩམས། བོད་ལྗོངས་མི་དམངས་དཔེ་སྐྲུན་ཁང་། ༢༠༡༤ལོའི་ཟླ༧པར་པར་ཐེངས༡བཏབ།

[34] དམ་ཅན་བསྟན་སྲུང་གི་རྣམ་ཐར། སླེ་ལུང་བཞད་པའི་རྡོ་རྗེས་བརྩམས། མི་རིགས་དཔེ་སྐྲུན་ཁང་། ༢༠༠༣ལོའི་ཟླ༦པར་པེ་ཅིན་དུ་པར་ཐེངས་དང་པོ་བརྒྱབ།

[35] ཞང་བོད་ལོ་རྒྱུས་ཏི་སེའི་འོད། ནམ་མཁའི་ནོར་བུས་བརྩམས། ཀྲུང་གོའི་བོད་རིག་པ་དཔེ་སྐྲུན་ཁང་། ༢༠༠༩ལོའི་ཟླ༡༢ པར་པར་ཐེངས་གཉིས་པ་བཏབ།

[36] བོད་སྐད་བརྡ་སྤྲོད་སྐོར་གྱི་དཔེ་རྒྱུན་དཀོན་རིགས་ཀྱི་བསྟན་བཅོས་ཐུང་ངུ་འགའ་ཕྱོགས་གཅིག་ཏུ་བསྒྲིགས་པ་མུ་ཐི་ལའི་ཕྲེང་བ་ཞེས་བྱ་བ་བཞུགས་སོ།། དུད་བླ་བུ་ཆུང་གིས་བསྒྲིགས། མི་རིགས་དཔེ་སྐྲུན་ཁང་། ༢༠༡༢ལོའི་ཟླ༣པར་པེ་ཅིན་དུ་པར་ཐེངས་དང་པོ་བརྒྱབ།

[37] དེབ་ཐེར་སྔོན་པོ།(སྟོད་སྨད།) འགོས་ལོ་གཞོན་ནུ་དཔལ་གྱིས་བརྩམས། སི་ཁྲོན་མི་རིགས་དཔེ་སྐྲུན་ཁང་། ༡༩༨༤ལོར་པར་དུ་བཏབ།

[38] སྲིད་པ་རྒྱུད་ཀྱི་ཁ་བྱང་། གཏེར་སྟོན་པ་ཁོད་པོ་བློ་གྲོས་ཐོགས་མེད། ཅང་ཧའོ་གློག་རྡུལ་དཔེ་སྐྲུན་ཁང་། ༢༠༡༡ལོའི་ཟླ༦ པར་དཔར་ཐེངས་དང་པོ་དཔར།

[39] བོན་གྱི་ལོ་རྒྱུས་ཡིག་ཆ་ཕྱོགས་སྒྲིག དྲན་པ་ནམ་མཁའ་སོགས་ཀྱིས་བརྩམས། བོད་ལྗོངས་བོད་ཡིག་དཔེ་རྙིང་དཔེ་སྐྲུན་ཁང་། ༢༠༡༠ལོའི་ཟླ༨པར་པར་ཐེངས་དང་པོ་བཏབ།

[40] ཆོས་འབྱུང་མཁས་པའི་དགའ་སྟོན། དཔའ་བོ་གཙུག་ལག་ཕྲེང་བས་བརྩམས། མི་རིགས་དཔེ་སྐྲུན་ཁང་། ༢༠༡༢ལོའི་ཟླགསུམ་པར་པེ་ཅིན་དུ་པར་ཐེངས་གཉིས་པ་བརྒྱབ།

[41] བྱེ་བྲག་རྟོགས་བྱེད་འབྲིང་བའམ། སྒྲ་སྦྱོར་བམ་གཉིས་བཞུགས་སོ།། བོད་གཞུང་ཤེས་རིག་དཔར་ཁང་།

[42] གངས་ལྗོངས་བརྡ་དག་ཀུན་བཏུས། འབྲས་གཙང་བསྟན་འཛིན་ཐབས་མཁས་ཀྱིས་བསྒྲིགས། བོད་གཞུང་ཤེས་རིག་ལས་ཁུངས་ཀྱིས་དཔར་འགྲེམས་བྱས། ༢༠༡༠ལོའི་ཟླ༡ དཔར་ཐེངས་དང་པོ་དཔར།

– – – – –