ཆོས་མངོན་པ་མཛོད་ལས་མུན་པ་དང་མ་རིག་པའི་སྐོར་གླེང་བ།

ནང་དོན་གནད་བསྡུས། མུན་པ་དང་མ་རིག་པའི་འགྲེལ་བཤད་པ་དང་། རྒྱ་གར་མཁས་པས་མ་རིག་པའམ་མུན་པ་ངོས་འཛིན་བྱེད་སྟངས། བོད་མཁས་པས་མུན་པའམ་མ་རིག་པ་ངོས་འཛིན་བྱེད་སྟངས། སྤང་བྱ་སྤོང་ཚུལ་ངོས་འཛིན་གནང་སྟངས་སོགས་རྒྱས་པར་བྱས་ཡོད། 

བརྡ་ཆད།  མུན་པ། མ་རིག་པ། ཉོན་མོངས་དང་། ཉོན་མོངས་ཅན་མ་ཡིན་པ། སྤང་བྱ།  གཉེན་པོ།

སྔོན་གླེང་།

གང་ཞིག་ཀུན་ལ་མུན་པ་གཏན་བཅོམ་ཞིང་། ། འཁོར་བའི་འདམ་ལས་འགྲོ་བ་དྲངས་མཛད་པ། ། དོན་བཞིན་སྟོན་པ་དེ་ལ་ཕྱག་འཚལ་ནས། །[1] ཞེས་གསུངས་པ་ལྟར།  དེ་ལས་འཕྲོས་ཏེ་མུན་པ་དང་མ་རིག་པའི་སྐོར་ལ་དཔྱད་པ་ཞུས་ན།  དང་པོ། མུན་པ་དང་པ་མ་རིག་པའི་ཐ་སྙད་ཀྱི་འགྲེལ་བཤད་པ་དང་།  གཉིས་པ། རྒྱ་གར་མཁས་པས་མུན་པའམ་མ་རིག་པ་ངོས་འཛིན་གནང་སྟངས། གསུམ་པ། བོད་མཁས་པས་མུན་པའམ་མ་རིག་པ་ངོས་འཛིན་གནང་སྟངས། བཞི་པ། ཉོན་མོངས་ཅན་གྱི་མུན་པ་དང་། ཉོན་མོངས་ཅན་མ་ཡིན་པའི་མུན་པ་གཉིས་ངོས་འཛིན་གནང་སྟངས། ལྔ་པ། སྤང་བྱ་སྤོང་ཚུལ་བཤད་པ་དང་། དེ་ཉིད་ཇི་ལྟར་སྤོང་བའི་ཚུལ་ངོས་འཛིན་གནང་སྟངས།  དྲུག་པ།  སྤོང་བྱེད་ཀྱི་གཉེན་པོ་གང་ལ་ངོས་འཛིན་གནང་སྟངས་སྐོར་བཤད་པ་དོན་ཚན་དྲུག་གི་ལམ་ནས་བརྟགས་པ་བགྱིས་ཡོད། མངོན་པ་མཛོད་ཀྱི་མཆོད་བརྗོད་སྐབས་ཀྱི་མུན་པའམ་མ་རིག་པའི་སྐོར་ལ་བརྟགས་པ་བྱེད་དགོས་པའི་རྒྱུ་མཚན་ནི། ནང་པ་སངས་རྒྱས་པའི་ཐུན་མིན་གྱི་ལྟ་བ་རྟེན་འབྱུང་དང་། ཐར་བ་དང་ཐམས་ཅད་མཁྱེན་པའི་ལམ་ལ་ཐོབ་པར་འདོད་པའི་གང་ཟག་ཤ་སྟག་ཡིན་པས། དེའི་ཕྱིར་མུན་པའམ་མ་རིག་པའི་ངོ་བོ་ག་འདྲ་ཡིན་མིན་ཐད་ནས་བསམ་གཞིག་ངེས་པར་ཅན་དུ་གཏོང་དགོས་པ་ནི་ཆེས་འགངས་ཆེན་ཞིག་ཡིན། སྤྱིར་མ་རིག་པ་ངོས་འཛིན་ཚུལ་ལ་དབུ་མ་ཐལ་འགྱུར་བའི་སྐབས་སོགས་ནས་བཤད་པ་མང་དུ་ཡོད་པ་གསལ་མོད། གནས་སྐབས་མངོན་པ་མཛོད་ལུགས་ཀྱི་ལྟ་གྲུབ་དང་འབྲེལ་ནས་མུན་པའམ་མ་རིག་པའི་གནས་ཚུལ་ཐད་ནས་འགྲེལ་བཤད་དམ་བསམ་ཚུལ་ཉུང་ངུ་གླེང་བར་བྱའོ། །

དང་པོ། མུན་པ་དང་མ་རིག་པའི་ཐ་སྙད་ཀྱི་འགྲེལ་བཤད་གནང་སྟངས།

ཆེད་དུ་བརྗོད་པའི་ཚོམས་ཀྱི་འགྲེལ་པ་ལས།  འཇིག་རྟེན་མཐོང་བར་ནུས་པ་ལ། །ཇི་ལྟར་གེགས་ནི་བྱེད་པ་ཡི། །  མུན་པ་དེ་བཞིན་མ་རིག་པ། །[2]ཞེས་དང་། དེ་བཞིན་རང་འགྲེལ་ལམ་ཆོས་མངོན་པའི་མཛོད་ཀྱི་བཤད་པ་ལས།   གྲིབ་མ་ནི་གང་ལ་གཟུགས་རྣམས་སྣང་བའོ། ། དེ་ལས་བཟློག་པ་ནི་མུན་པའོ། །[3] ཞེས་གསུངས་པ་ལྟར། སྤྱིར་མུན་པ་ནི་སྣང་བ་མཐོང་བར་བྱེད་པ་ལ་གེགས་བྱེད་པས་ལྡོང་པར་བྱེད་པ་དང་། དེ་དང་དཔེ་མཚུངས་པའི་མ་རིག་པའམ་མི་ཤེས་པའང་རྨོངས་པ་སྟེ། དོན་མཐོང་བ་ལ་གེགས་བྱེད་པས་ལྡོང་པར་བྱེད་པའི་ཕྱིར་མུན་པའམ་མ་རིག་པ་སྟེ།  རང་འགྲེལ་ལམ་ཆོས་མངོན་པའི་མཛོད་ཀྱི་བཤད་པ་ལས། མི་ཤེས་པ་ནི་ཡང་དག་པའི་དོན་མཐོང་བ་ལ་གེགས་སུ་གྱུར་པའི་ཕྱིར་མུན་པ་སྟེ། [4]ཞེས་གསུངས་པ་ལྟར་དང་།  སློབ་དཔོན་རྒྱལ་སྲས་གྲགས་པའི་བཤེས་གཉེན་གྱི་ཆོས་མངོན་པ་མཛོད་ཀྱི་འགྲེལ་བཤད་ལས།   མུན་པ་ཞེས་བྱ་བའི་སྒྲ་མཚན་མོའི་མུན་པ་ཡིན་པར་གྲགས་ཏེ། བུམ་པ་དང་སྣམ་བུ་ལ་སོགས་པའི་གཟུགས་ཡོངས་སུ་མཐོང་བའི་གེགས་སུ་གྱུར་པའི་ཕྱིར་རོ། །སྐྱེ་བོ་ལོང་བ་དང་འདྲ་བར་བྱེད་པའི་ཕྱིར་མུན་པ་ཡིན་ནོ། །[5]ཞེས་གསུངས་པ་ལྟར་དཔེ་ཡི་སྒོ་ནས་མུན་པའམ་དོན་ལ་མི་ཤེས་པའམ་མ་རིག་པ་ཞེས་བྱའོ།།

གཉིས་པ།  རྒྱ་གར་མཁས་པས་མུན་པའམ་མ་རིག་པ་ངོས་འཛིན་གནང་སྟངས།

འདིར་བཤད་པའི་མུན་པའམ་མ་རིག་པ་ནི་མཆོད་བརྗོད་ཀྱི་སྐབས་ནས་བསྟན་པའི་མུན་པའམ་མ་རིག་པ་ལ་གོ་བ་ལས་གོང་དུ་བཤད་པ་ལྟར།[6]  དེས་ན་སྤྱིར་མངོན་པ་མཛོད་ཀྱི་རྒྱ་གར་མཁས་གྲུབ་ཀྱི་འགྲེལ་པ་ལ། ཡོངས་གྲགས་སུ་བསྟན་འགྱུར་ནང་ལ་བཞུགས་པའི་རང་འགྲེལ་གཙོས་འགྲེལ་པ་བརྒྱད་དང་དགུ་ཡས་མས་ཤིག་བཞུགས་པར་འདུག་མོད། གཙོ་ཆེ་བ་འགྲེལ་པ་ཁག་དྲུག་གི་ནང་དུ་བསྟན་པའི་མུན་པའི་ངོ་བོ་ངོས་བཟུང་ན། དང་པོ་ནི། སློབ་དཔོན་དབྱིག་གཉེན་གྱི་རང་འགྲེལ་ལམ་ཆོས་མངོན་པའི་མཛོད་ཀྱི་བཤད་པ་ལས།  མི་ཤེས་པ་ནི་ཡང་དག་པའི་དོན་མཐོང་བ་ལ་གེགས་སུ་གྱུར་པའི་ཕྱིར་མུན་པ་སྟེ་[7]ཞེས་དང་།  སློབ་དཔོན་འདུན་བཟང་གི་ཆོས་མངོན་པ་མཛོད་ཀྱི་བསྟན་བཅོས་ཀྱི་ཚིག་ལེའུར་བྱས་པའི་རྣམ་པར་བཤད་པ་ལས།  མི་ཤེས་པ་ནི་ཡང་དག་པའི་དོན་མཐོང་བ་ལ་གེགས་སུ་གྱུར་པའི་ཕྱིར་མུན་པ་སྟེ་[8]ཞེས་དང་། སློབ་དཔོན་བློ་གྲོས་བརྟན་པའི་ཆོས་མངོན་པ་མཛོད་ཀྱི་བཤད་པའི་རྒྱ་ཆེར་འགྲེལ་པ་དོན་གྱི་དེ་ཁོ་ན་ཉིད་ལས།  འདིར་ཡང་དག་པའི་དོན་མཐོང་བའི་གེགས་སུ་གྱུར་པས་འདྲ་བའི་ཕྱིར་མི་ཤེས་པ་ཁོ་ན་མུན་པའོ་ཞེས་བསྟན་པའི་ཕྱིར་མི་ཤེས་པ་ནི་[9]ཞེས་དང་།  སློབ་དཔོན་རྒྱལ་སྲས་ཀྱི་ཆོས་མངོན་པ་མཛོད་ཀྱི་འགྲེལ་བཤད་ལས།  མི་ཤེས་པ་ཡང་དེ་དང་ཆོས་མཐུན་པར་ཡང་དག་པའི་དོན་སྡུག་བསྔལ་ལ་སོགས་པའི་བདེན་པ་མཐོང་བའི་གེགས་སུ་གྱུར་པའི་ཕྱིར་མུན་པ་ཞེས་བྱ་བའི་མིང་ཐོབ་བོ་[10]ཞེས་དང་། སློབ་དཔོན་གང་སྤེལ་གྱི་ཆོས་མངོན་པ་མཛོད་ཀྱི་མཚན་ཉིད་རྗེས་སུ་འབྲང་བ་ལས།  འདིར་ཡང་དག་པའི་དོན་མཐོང་བའི་གེགས་སུ་འདྲ་བས་མི་ཤེས་པ་ཉིད་མུན་པ་ཡིན་ནོ་ཞེས་བསྟན་པའི་ཕྱིར། མི་ཤེས་པ་ནི་[11]ཞེས་དང་། སློབ་དཔོན་ཕྱོགས་གླང་གི་ཆོས་མངོན་པ་མཛོད་ཀྱི་འགྲེལ་པ་གནད་ཀྱི་སྒྲོན་མེ་ལས།   མི་ཤེས་པ་ནི་ཡང་དག་པའི་དོན་མཐོང་བ་ལ་གེགས་སུ་གྱུར་པའི་ཕྱིར་མུན་པ་སྟེ་[12]ཞེས་གསུངས་པ་ལྟར། འགྲེལ་བཤད་དྲུག་པོ་འདི་དག་གི་རྩ་བའི་སྡོམ་ནི། སློབ་དཔོན་དབྱིག་གཉེན་དང་། འདུན་བཟང་ཕྱོགས་གླང་གསུམ་གྱིས་ཚིག་དོན་གཉིས་ཆར་ནས་ངོ་བོ་གཅིག་ཏུ་བཞག་པ་དང་། སློབ་དཔོན་རྒྱལ་སྲས་ཀྱིས་དོན་ལ་གཅིག་ནའང་མི་འདྲ་བའི་ཁྱད་པར་ཡང་དག་པའི་དོན་སྡུག་བསྔལ་ལ་སོགས་ཞེས་ཡང་དག་པའི་དོན་ཅུང་ཙམ་ཁ་གསལ་དུ་བཏང་བ་དང་། སློབ་དཔོན་བློ་གྲོས་བརྟན་པ་དང་གང་སྤེལ་གཉིས་ཀྱིས་མི་ཤེས་པ་ལ་ཁོ་ནའམ་ཉིད་ཀྱི་སྒྲ་སྦྱར་བས་དམིགས་བསལ་གྱིས་ཟུར་མི་འདྲ་བ་རྩལ་དུ་བཏོན་ཡོད་པས་ཤེས་པར་བྱའོ། །

གསུམ་པ། བོད་མཁས་པས་མུན་པའམ་མ་རིག་པ་ངོས་འཛིན་གནང་སྟངས།

མཆིམས་འཇམ་པའི་དབྱངས་ཀྱི་ཆོས་མངོན་པ་མཛོད་ཀྱི་ཚིག་ལེའུ་བྱས་པའི་འགྲེལ་པ་མངོན་པའི་རྒྱན་ལས། མུན་པ་ནི་ཡང་དག་པའི་དོན་མཐོང་བ་ལ་གེགས་སུ་གྱུར་པའི་ཕྱིར་ཉོན་མོངས་པ་དང་ཤེས་བྱའི་སྒྲིབ་པ་སྟེ་མུན་པ་དང་འདྲ་བའི་ཕྱིར་རོ། །དེ་ལ་དང་པོ་ནི་འདོད་ཆགས་ལ་སོགས་པའི་བདག་ཉིད་ཡིན་ལ་[13]ཞེས་དང་། གཉིས་པ། མཆིམས་བློ་བཟང་གྲགས་པའི་ཆོས་མངོན་པ་གསལ་བྱེད་ལེགས་པར་བཤད་པའི་རྒྱ་མཚོ་ལས། མུན་པ་ནི། ཉོན་མོངས་པ་ཅན་དང་ཉོན་མོངས་ཅན་མ་ཡིན་པ་སྟེ། དེ་དག་ནི་འཇིག་རྟེན་ལ་གྲགས་པའི་མུན་པས་གཟུགས་མི་མཐོང་བར་བྱེད་པ་ལྟར་འདིས་ཀྱང་ཡང་དག་པའི་དོན་ཇི་ལྟ་བ་བཞིན་མཐོང་བ་ལ་གེགས་སུ་གྱུར་པས་མུན་པའོ་[14]ཞེས་དང་། ཀུན་མཁྱེན་མི་ཕམ་རྒྱ་མཚོའི་དམ་པའི་ཆོས་མངོན་པ་མཛོད་ཀྱི་མཆན་འགྲེལ་རིན་པོ་ཆེའི་དོ་ཤལ་བློ་གསལ་དགྱེས་པའི་མགུལ་རྒྱན་ལས། ཡང་དག་པའི་དོན་མཐོང་བ་ལ་གེགས་སུ་གྱུར་པ་ཉོན་ཤེས་ཀྱི་སྒྲིབ་པའི་མུན་པ་བག་ཆགས་དང་བཅས་པ་[15]ཞེས་གསུངས་པ་ལྟར། འདིར་བོད་འགྲེལ་དག་ཏུ་དམིགས་བསལ་ངེས་དགོས་པ། རང་གི་མཐོང་ཐོས་ཀྱི་ཡུལ་དུ་གྱུར་པའི་རྒྱ་འགྲེལ་ཁག་ཏུ་མི་གསལ་བའི་ཉོན་ཤེས་ཀྱི་སྒྲིབ་པ་སོགས་ཀྱི་ཐ་སྙད་དང་། མཚན་གཞི་སོགས་གསལ་ཁ་བཏོད་པས། སྤྱིར་ཆུ་འགོ་གངས་ལ་ཐུག་པ་བཞིན་རྒྱ་བོད་ཀྱི་མཁས་གྲུབ་དག་གིས་ཐ་སྙད་ཀྱི་རྣམ་གཞག་འབྱེད་སྟངས་ཀྱི་ཁྱད་པར་ཙམ་ལས་དོན་ལ་ཁྱད་པར་ཆེར་མེད་པར་སེམས་མོད། ཡིན་ནའང་ཞར་ལ་འདིར་གལ་ཆེ་ཤོས་ནི། ཉོན་མོངས་ཅན་དང་ཉོན་མོངས་ཅན་མ་ཡིན་པའི་སྒྲིབ་པ་དང་ཉོན་ཤེས་ཀྱི་སྒྲིབ་པ་ལ་ཁྱབ་ཆེ་ཆུང་སོགས་ཀྱི་ཁྱད་པར་ཡོད་པ། སྤྱིར་བྱེ་བྲག་སྨྲ་བའི་ལྟ་གྲུབ་ཀྱི་འཛིན་མཚམས་དང་། འོག་ནས་དྲངས་པ་ལྟར་གཉིས་པ་ནི་ཐེག་ཆེན་ལྟར་ན་གཟུང་འཛིན་གཉིས་སྣང་གི་རྟོག་པ་ལ་འདོད་མོད་ཀྱི། ཉན་ཐོས་སྡེ་པ་དག་གིས་ནི་མ་ཡིན་ཏེ། ཞེས་སོགས་མངོན་པའི་གཞུང་དག་ལ་གཟིགས་ན་དེ་དག་གི་ཁྱད་པར་གོ་བར་འདུག་མོད། ཐ་སྙད་འདི་ནི་ཆོས་བརྒྱུད་རིས་མེད་ཡོངས་གྲགས་སུ་གཅིག་མཚུངས་ལྟ་བུ་ཁས་ལེན་པའི་མཆིམས་འཇམ་པའི་དབྱངས་ཀྱིས་ཀྱང་མངོན་པ་མཛོད་ཀྱི་མཆོད་བརྗོད་མ་རིག་པའམ་མུན་པ་བཤད་པའི་སྐབས་འདིར་གོང་ནས་དྲངས་པ་ལྟར་ཉོན་ཤེས་ཀྱི་སྒྲིབ་པའི་ཐ་སྙད་དེ་ག་རང་སྦྱར་ཡོད་པས། མཁས་གྲུབ་འདི་ལྟ་བུའི་གསུང་ལ་ཁུངས་ཡང་དག་པ་ཡོད་ངེས་ལ། ཕྱིས་སུའང་བོད་གངས་རིའི་ལྗོངས་ཀྱི་མཁས་གྲུབ་གཉིས་ལྡན་གྱི་སྐྱེས་བུ་དཔེར་ན། པཎ་ཆེན་ཤཱཀྱ་མཆོག་ལྡན་དང་ཀརྨ་པ་མི་བསྐྱོད་རྡོ་རྗེ། ཀུན་མཁྱེན་མི་ཕམ་རྒྱ་མཚོ་སོགས་ཀྱིས་མཛད་པའི་མངོན་པ་མཛོད་ཀྱི་འགྲེལ་པ་དག་ནའང་ཉོན་ཤེས་ཀྱི་སྒྲིབ་པའི་ཐ་སྙད་འདི་སྦྱར་ཡོད་སྟབས། རང་གི་མཐོང་ཐོས་ཀྱི་རྒྱ་འགྲེལ་དག་ཏུ་མི་གསལ་བའི་སྐབས་འདི་ལ་ཉོན་ཤེས་ཀྱི་སྒྲིབ་པའི་ཐ་སྙད་དེ་དང་པོ་སྦྱོར་མཁན་སུ་ཡིན་པ་དང་། དེའི་དགོས་པ་དང་རྒྱུ་མཚན། ཡང་ན་ཐེག་ཆེན་གྱི་ཆོས་སྐད་ཀྱིས་ཤན་ཞུགས་མིན་སོགས་དཔྱད་དུ་མཆིས་མོད་རང་གིས་རེ་ཞིག་འདི་ནས་མ་དཔྱད་དོ། །

བཞི་པ། ཉོན་མོངས་ཅན་གྱི་མུན་པ་དང་། ཉོན་མོངས་ཅན་མ་ཡིན་པའི་མུན་པ་གཉིས་ངོས་འཛིན་གནང་སྟངས།

ཉོན་མོངས་ཅན་གྱི་མུན་པ་དང་། ཉོན་མོངས་ཅན་མ་ཡིན་པའི་མུན་པ་གཉིས་གསུངས།   མུན་པ་དང་པོའི་ངོས་འཛིན་ལ། མཆིམས་མཛོད་ལས། འདོད་ཆགས་ལ་སོགས་པའི་བདག་ཉིད་ཅན་ཡིན་ལ།[16] ཞེས་དང་། མཆིམས་ཆུང་དང་། ཐར་ལམ་གསལ་བྱེད་དང་། བློ་གཏེར་མཆན་འགྲེལ་བཅས་ལས། བདག་ཏུ་འཛིན་པའི་རྩ་བ་ཅན་གྱི་ཕྲ་རྒྱས་བརྒྱད་ཅུ་འཁོར་དང་བཅས་པ་ཡིན་ལ།[17] ཞེས་དང་། རྒྱལ་དབང་མཛོད་ལས། ཁམས་གསུམ་གྱི་ཉོན་མོངས་ཅན་ཐམས་ཅད་དང་།[18]  ཞེས་གསུངས་སོ། །  ཉོན་མོངས་ཅན་མ་ཡིན་པའི་མུན་པ་ངོས་འཛིན་བྱེད་སྟངས་ནི། ཀརྨ་པ་མི་བསྐྱོད་རྡོ་རྗེས་ཡེ་ཤེས་ཀྱི་འགལ་ཟླའི་མི་མཐུན་ཕྱོགས་སུ་གྱུར་པའི་སེམས་བྱུང་རྨོངས་པ་ལ་འཆད་དགོས་[19]ཞེས་གསུངས། པཎ་ཆེན་ཤཱཀྱམཆོག་གིས་ཡུལ་རབ་ཏུ་བསྐལ་བ་སོགས་མི་ཤེས་པ་ཡིན་ཞིང་དེ་ཡང་ཤེས་པ་བཀག་ཙམ་མ་ཡིན་གྱི་དེ་དང་དེ་ཤེས་པའི་ཡེ་ཤེས་ཀྱི་འགལ་བ་མི་མཐུན་ཕྱོགས་སུ་གྱུར་པའི་སེམས་བྱུང་རྨོངས་པ་ཡིན་[20]ཞེས་གསུངས། མང་ཐོས་ཀླུ་སྒྲུབ་རྒྱ་མཚོས་དེ་བཀག་སྟེ་སངས་རྒྱས་ཀྱི་ཆོས་ཤིན་ཏུ་བསྐལ་བ་སོགས་མི་ཤེས་པའི་རིག་པ་ལ་འཇོག་ཅིང་། དེ་ལ་སེམས་སེམས་བྱུང་གཉིས་ཀ་ཡོད་[21]ཅེས་བཤད། པཎ་ཆེན་ངག་ཆོས་ཀྱིས་རང་འགྲེལ་དུ་བཤད་པ་ལས་གཞན་ཞིབ་ཆ་བྱས་མེད་ཀྱང་མངོན་པའི་འབེལ་གཏམ་དུ་ཡུལ་གྱི་བསྐལ་བ་སོགས་བཞི་ནི་མ་སྒྲིབ་ལུང་མ་བསྟན་ཡིན་[22]ཞེས་བཤད།

མཛོད་ཀྱི་སྤྱི་དོན་ལས།  ངོ་བོའི་སྒོ་ནས་དགེ་བ་ཟག་བཅས་དང་མ་སྒྲིབ་ལུང་མ་བསྟན་གཉིས་ཡོད་[23]ཅེས་བཤད། འགྲེལ་པ་མངོན་པའི་རྒྱན་གྱི་མཆན་བུ་ལས། ཉོན་མོངས་ཅན་མ་ཡིན་པ་དགེ་བ་ཟག་བཅས་དང་མ་སྒྲིབ་ལུང་མ་བསྟན་གྱི་བྱེ་བྲག་འོག་ནས་འབྱུང་བའི་མི་ཤེས་པའི་རྒྱུ་བཞི་ལྟ་བུ་ཡིན་ཏེ་[24]ཞེས་བཤད། དགེ་བ་དེ་ཡང་། རྒྱལ་དབང་མཛོད་ལས། བྱིང་བ་ཕྲ་མོའི་ངོ་བོར་གྱུར་པའི་དགེ་བ་ཟག་བཅས་སོགས་སྙོམས་འཇུག་གི་སྒྲིབ་པའི་ངོ་བོར་གྱུར་པའི་དགེ་བ་ཟག་བཅས་དེར་འཇོག་ཆོག་པའི་ཕྱིར། ཞེས་བཤད་ཀྱང་འདི་དག་སློབ་དཔོན་དབྱིག་གཉེན་གྱི་དགོངས་པར་སོང་མིན་དཀའ་བའི་གནས་སོ། ། གང་ལྟར་ཡང་མུན་པ་དང་པོ་ནི་ཐར་བ་ཐོབ་པ་ལ་གེགས་བྱེད་དང་། གཉིས་པ་ནི་ཐམས་ཅད་མཁྱེན་པ་ཐོབ་པ་ལ་སྒྲིབ་བྱེད་ཡིན་ལ། དེས་ན་མུན་པ་དང་པོ་ནི་ཉན་རང་དགྲ་བཅོམ་གྱིས་ཀྱང་གཏན་ནས་བཅོམ་པ་སྲིད་པས་ཐུན་མོང་གི་སྤང་བྱ་ཙམ་དང་། ཕྱི་མ་ནི་སངས་རྒྱས་ཁོ་ནས་གཏན་ནས་བཅོམ་པས་སྐབས་འདིའི་ཐུན་མོང་མ་ཡིན་པའི་སྤང་བྱ་གཙོ་བོ་ཡིན་ནོ། །འདི་ལ་མཆིམས་འཇམ་དཔལ་དབྱངས་དང་པཎ་ཆེན་ཤཱཀྱ་མཆོག་ལྡན་སོགས་ཀྱིས་ཤེས་སྒྲིབ་ཅེས་པའི་ཐ་སྙད་མཛད།[25] ཞེས་གསུངས་སོ། །

ལྔ་པ།  སྤྱིར་སྤང་བྱ་སྤོང་ཚུལ་ངོས་འཛིན་གནང་སྟངས།

སྤང་བྱ་དེའི་ངོ་བོ་སྤོང་བ་དང་། སྤང་བྱ་དེ་འདུན་པའི་འདོད་ཆགས་དང་བྲལ་བའི་ཚུལ་གྱིས་སྤོང་བ་གཉིས་ཡོད། དང་པོ་ནི་ཐོབ་པ་བཅད་པའི་ཚུལ་གྱིས་སྤོང་བ་སྟེ། སྤང་བྱ་སྒྲིབ་པ་དེ་སྤོང་བྱེད་ཀྱི་གཉེན་པོ་ཉིད་ཀྱིས་ཆེད་དུ་གཏད་ནས་སྤོང་བ་ལ་འཇོག་གོ །འདི་ལ་ཡང་ཕྱིས་མི་སྐྱེ་བའི་ཆོས་ཅན་བྱེད་པའི་སྒོ་ནས་སྤོང་བ་དང་། དེ་མི་ནུས་པའི་སྒོ་ནས་སྤོང་བ་གཉིས་ཡོད་ཅིང་།  སྔ་མ་ནི་གཏན་ནས་བཅོམ་ཞེས་པའི་དོན་ཡིན་ཏེ། རང་འགྲེལ་ལས། དེ་ཡང་སངས་རྒྱས་བཅོམ་ལྡན་འདས་ཀྱིས་གཉེན་པོ་བརྙེས་ནས་ཤེས་བྱ་ཐམས་ཅད་ལ་ཕྱིས་མི་སྐྱེ་བའི་ཆོས་ཅན་དུ་གྱུར་པའི་ཕྱིར་གཏན་ནས་ཡེ་བཅོམ་པ་སྟེ། དེའི་ཕྱིར་འདི་ནི་ཀུན་ལ་མུན་པ་གཏན་བཅོམ་པའོ། །[26] ཞེས་དང་། སློབ་དཔོན་རྒྱལ་པོ་སྲས་ཀྱི་འགྲེལ་བཤད་ལས། འདིའི་དོན་ནི། གཏན་ནས་ཡེ་བཅོམ་པ་ཞེས་བྱ་ནི་ཀུན་ཏུ་མི་འབྱུང་བར་སྤང་བར་བྱས་སོ་ཞེས་བྱ་བའི་ཐ་ཚིག་གོ་ཞེས་བཤད་པའི་ཕྱིར། ཕྱི་མ་དེ་ལྟ་བུ་ཞིག་ཀྱང་ཁས་ལེན་དགོས་ཏེ། ཉམས་པའི་ཆོས་ཅན་གྱི་དགྲ་བཅོམ་པ་ཞིག་ཡོད་པ་གང་ཞིག དེས་རང་གི་སྤང་བྱ་ཐོབ་པ་བཅད་པའི་ཚུལ་གྱིས་སྤངས་ཀྱང་ཕྱིས་མི་སྐྱེ་བའི་ཆོས་ཅན་དུ་བྱེད་མི་ནུས་པའི་ཕྱིར་ཏེ། ཆོས་ཅན་དེ་ཡིན་པའི་ཕྱིར་རོ།  །[27]   གཉིས་པ་འདུན་པའི་འདོད་ཆགས་དང་བྲལ་བས་སྤོང་ཚུལ་ནི། སྤང་བྱ་སྒྲིབ་པ་དེ་ལ་ཆགས་པའི་ཟག་པ་དང་བྲལ་བ་ཙམ་གྱིས་དེ་སྤངས་བར་འདོད་ཅིང་། དེ་ཡང་གང་ཟག་གང་ཞིག་གིས་དེ་ལྟ་བུ་ཚུལ་གྱིས་སྤངས་ཀྱང་དེའི་རྒྱུད་ལ་དེ་ཡོད་ཆོག་པ་ཡིན་ཏེ། རང་འགྲེལ་ལས། རང་སངས་རྒྱས་དང་ཉན་ཐོས་རྣམས་ཀྱང་ཉོན་མོངས་པ་ཅན་གྱི་རྨོངས་པ་དང་བྲལ་བའི་ཕྱིར་ཀུན་ལ་མུན་པ་བཅོམ་པ་ནི་འདོད་མོད་ཀྱི་གཏན་ནས་མ་ཡིན་ཏེ་འདི་ལྟར་དེ་དག་ལ་སངས་རྒྱས་ཀྱི་ཆོས་ཤིན་ཏུ་བསྐལ་བ་སོགས་ཉོན་མོངས་ཅན་མིན་པའི་མི་ཤེས་པ་ཡོད་པ་ཉིད་དོ། །[28]ཞེས་དང་། རྒྱལ་སྲས་མ་ལས། དེ་ནི་སྤངས་ཀྱང་དེ་དག་ལ་མིག་ལ་སོགས་པ་བཞིན་དུ་ཀུན་ཏུ་འབྱུང་ལ་[29]ཞེས་གསུངས་པའི་ཕྱིར་རོ། །   སྤང་བྱ་མུན་པ་གཉིས་པོ་གཏན་ནས་བཅོམ་པའི་གཉེན་པོ་ངོས་བཟུང་བ། གཉེན་པོས་དེ་ཇི་ལྟར་སྤོང་བའི་ཚུལ་ལོ། །དང་པོ་ནི། རང་འགྲེལ་དུ། སངས་རྒྱས་བཅོམ་ལྡན་འདས་ཀྱིས་གཉེན་པོ་བརྙེས་ནས་[30]ཞེས་བྱུང་། དེའི་དོན་ལ། ཁ་ཅིག་གིས་གཉེན་པོ་དེ་ཉིད་རྡོ་རྗེ་ལྟ་བུའི་ཏིང་ངེ་འཛིན་ལ་བཤད་པ་དང་།  ཁ་ཅིག་གིས་འཕགས་པའི་ལམ་བརྙེས་པ་དང་། ཁ་ཅིག་གིས་ཡེ་ཤེས་ཟག་པ་མེད་པ་ལ་བཤད་པ་དང་། ཁ་ཅིག་གིས་རྡོ་རྗེ་ལྟ་བུའི་ཏིང་ངེ་འཛིན་ཁོ་ན་མ་ཡིན་པར། སྡུག་བསྔལ་ཆོས་བཟོད་ནས་བཟུང་སྟེ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་སྤོང་ལམ་ཐམས་ཅད་དེའི་གཉེན་པོར་འདོད་པ་དང་། ཁ་ཅིག་གིས་སངས་རྒྱས་ཀྱི་ཡེ་ཤེས་ཁོ་ན་ཡིན་པར་བཤད་པ་དང་། བཤད་ཚུལ་དེ་དག་ལས་གང་བདེ་བར་དཔྱད་པར་ཞུ།

སློབ་དཔོན་རྒྱལ་པོ་སྲས་ཀྱིས། ཆོས་མངོན་པ་མཛོད་ཀྱི་འགྲེལ་བཤད་ལས།  གཉེན་པོ་བརྙེས་ནས་ཞེས་བྱ་བ་ནི་འཕགས་པའི་ལམ་བརྙེས་ནས་ཏེ་[31]ཞེས་དང་། རྣམ་པ་གཅིག་ཏུ་ན་ཡེ་ཤེས་ཟག་པ་མེད་པ་ནི་མི་ཤེས་པའི་གཉེན་པོ་ཡིན་པས་དེ་བརྙེས་ནས་ཞེས་བཤད།     སློབ་དཔོན་གང་སྤེལ་གྱི་ཊཱིཀ་ལས། འདོད་ཚུལ་མི་འདྲ་བ་གཉིས་བཀོད་ཡོད་པ་སྟེ། ཁ་ཅིག་གིས། རྒྱུད་མཐའ་རྡོ་རྗེ་ལྟ་བུའི་ཏིང་ངེ་འཛིན་ལ་བཞེད་པ་དང་། ཁ་ཅིག་གིས། རྡོ་རྗེ་ལྟ་བུ་ཁོ་ན་མ་ཡིན་གྱི། སྡུག་བསྔལ་ཆོས་བཟོད་ནས་བཟུང་སྟེ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་སྤོང་ལམ་ཐམས་ཅད་དེའི་གཉེན་པོར་འདོད། [32]ཅེས་པའོ། ། མང་ཐོས་ཀླུ་སྒྲུབ་རྒྱ་མཚོས་ཀྱང་མཛོད་ཀྱི་སྤང་བྱ་སྤོང་ཚུལ་གྱི་དཀའ་འགྲེལ་ལས། རྡོ་རྗེ་ལྟ་བུའི་ཏིང་ངེ་འཛིན་ཡིན་[33]པར་བཤད་དོ། ། ཀརྨ་པ་མི་བསྐྱོད་རྡོ་རྗེས་མཛད་པའི་གྲུབ་བདེ་དཔྱིད་འཇོ་ལས།  སངས་རྒྱས་ཀྱི་ཡེ་ཤེས་ཁོ་ན་ཡིན་[34]པར་བཤད།  བྱེ་བྲག་བཤད་མཚོ་ཆེན་པོ་ལས། འདི་བསྟན་གྱི་གཉེན་པོ་ལ་མི་ཤེས་པའི་རྒྱུ་བཞི་པོ་མངོན་དུ་མི་འགྱུར་བའི་གཉེན་པོ་དངོས་དང་། དེ་བཞི་པོ་སེལ་བྱེད་ཀྱི་གཉེན་པོ་དངོས་ཏེ་གཉིས་ཡོད་ཅིང་། དང་པོ་ནི། སློབ་པའི་གནས་སྐབས་ཀྱི་ཡེ་ཤེས་ཀྱི་ཚོགས་དང་། མི་སློབ་པའི་གནས་སྐབས་ཀྱི་སྟོབས་བཅུའོ། །གཉིས་པ་ནི། སངས་རྒྱས་ཀྱི་སའི་སྟོབས་བཅུ་པོ་དེ་ཁོ་ན་ཡིན་[35]པར་གསུངས་སོ། །དེ་ལྟར་འདོད་ཚུལ་མི་འདྲ་བ་བཞི་བྱུང་བ་ལས་འཐད་ཕྱོགས་གང་ཡིན་འོག་སྤང་བྱ་སྤོང་ཚུལ་སྐབས་ཀྱི་རྒྱུ་མཚན་དང་བསྒྲིགས་ཏེ་དཔྱད་པར་བྱའོ། །

དྲུག་པ།  སྤོང་བྱེད་ཀྱི་གཉེན་པོ་དེ་དག་གང་ལ་ངོས་འཛིན་གནང་སྟངས།

སྤོང་བྱེད་ཀྱི་གཉེན་པོ་དེ་རྡོ་རྗེ་ལྟ་བུའི་ཏིང་ངེ་འཛིན་ཁོ་ནར་འདོད་པ་དག་གིས་ནི། གོང་དུ་དྲངས་པའི་རང་འགྲེལ་གྱི་ལུང་དོན་སངས་རྒྱས་བཅོམ་ལྡན་འདས་ཀྱིས་གཉེན་པོ་རྡོ་རྗེ་ལྟ་བུའི་ཏིང་ངེ་འཛིན་བརྙེས་ནས་ཞེས་པའི་དོན་དུ་བཤད་ཅིང་། དེའི་རྒྱུ་མཚན། སྟོན་པ་སངས་རྒྱས་ནི་མུན་པ་གཉིས་པོ་གཏན་བཅོམ་པའི་གང་ཟག་ཡིན་པ་དང་། ཤེས་བྱ་ཐམས་ཅད་ཐོགས་མེད་དུ་མཁྱེན་པའི་ཡེ་ཤེས་ལ་མངའ་བའི་གང་ཟག་ཡིན་པའི་ཕྱིར་ན་ཐོབ་པ་གཅོད་པའི་དངོས་ཀྱི་གཉེན་པོ་དེ་རྡོ་རྗེ་ལྟ་བུའི་ཏིང་ངེ་འཛིན་ལས་འོས་མེད་དོ་སྙམ་དུ་དགོངས་པའི་ཕྱིར་ཏེ། སློབ་དཔོན་གང་སྤེལ་གྱིས་ཊཱིཀ་ལས། གཉེན་པོ་ནི་སྤོང་བར་བྱེད་པའི་ཕྱོགས་ཏེ། དེ་ཡང་ཁ་ཅིག་ན་རེ་རྡོ་རྗེ་ལྟ་བུའི་ཏིང་ངེ་འཛིན་ཡིན་ཏེ། འདི་ལྟར་རྡོ་རྗེ་ལྟ་བུ་ཏིང་ངེ་འཛིན་གྱི་མཇུག་ཐོགས་སུ་བཅོམ་ལྡན་འདས་གཉིས་ཀའི་ཆ་ལས་རྣམ་པར་གྲོལ་བ་དང་། ཐམས་ཅད་ལ་ཐོགས་པ་མེད་པའི་ཡེ་ཤེས་ཀྱི་ནུས་པ་མངའ་བར་འགྱུར་རོ། །[36]ཞེས་དང་། མང་ཐོས་ཀླུ་སྒྲུབ་རྒྱ་མཚོས་མཛད་པའི་མཛོད་ཀྱི་སྤང་བྱ་སྤོང་ཚུལ་གྱི་དཀའ་འགྲེལ་ལས། ཉན་རང་གི་རྒྱུད་ཀྱི་སྲིད་ཉོན་སྤོང་བའི་བར་ཆད་མེད་ལམ་དགུ་པ་དེས། སྲིད་རྩེའི་སས་བསྡུས་ཀྱི་ཉོན་མོངས་པ་མ་ཡིན་པའི་མི་ཤེས་པ་ངོ་བོའི་སྒོ་ནས་སྤོང་བར་མི་ནུས་ཀྱི། བྱང་སེམས་ཀྱི་རྒྱུད་ཀྱི་སྲིད་ཉོན་སྤོང་བའི་སྒོམ་ལམ་རྡོ་རྗེ་ལྟ་བུའི་ཏིང་ངེ་འཛིན་དེས་དེ་ངོ་བོ་སྒོ་ནས་སྤོང་བར་ནུས་ཏེ། དེས་དེའི་ཐོབ་པ་གཅོད་ནུས་པའི་ཕྱིར་ཏེ། སངས་རྒྱས་འཕགས་པ་དེའི་ཐོབ་པ་བཅད་པའི་གང་ཟག་ཡིན་པའི་ཕྱིར་ཏེ། དེ་དེ་གཏན་ནས་བཅོམ་པའི་གང་ཟག་ཡིན་པའི་ཕྱིར་རོ། །[37]ཞེས་གསུངས་པའི་ཕྱིར་རོ། །

འོན་ཀྱང་། འདི་ལ། རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་ཅན་མིན་པའི་མི་ཤེས་པའི་རྒྱུ་བཞི་པོ་དེ་ངོ་བོ་སྒོ་ནས་སྤོང་ཚུལ་དཀའ་བའི་གནས་སུ་སྣང་སྟེ། གཉེན་པོ་དེས་སྤང་བྱ་དེའི་ཐོབ་པ་གཅོད་ཚུལ་མེད་པའི་ཕྱིར། དེ་ཡིན་ཏེ། སྤང་བྱ་དེ་དང་འཛིན་སྟངས་འགལ་བའི་ཡེ་ཤེས་མ་ཡིན་པའི་ཕྱིར་ཏེ། སློབ་ལམ་ཡིན་པའི་ཕྱིར། གལ་ཏེ་སྤང་བྱ་དེའི་ཐོབ་པ་གཅོད་པ་ལ་སྤང་བྱ་དེ་དང་འཛིན་སྟངས་འགལ་བའི་གཉེན་པོ་ཞིག་དགོས་པའི་ངེས་པ་མེད་ཀྱི་སྤང་བྱ་དེ་སྤོང་བའི་ཆེད་དུ་ལམ་གྱི་གཉེན་པོ་སྒོམ་པས་ཆོག་གོ་ཞེ་ན། འོ་ན་སྡུག་བསྔལ་ཆོས་བཟོད་ནས་བཟུང་སྟེ་རྡོ་རྗེ་ལྟ་བུའི་ཏིང་ངེ་འཛིན་གྱི་བར་སྤོང་ལམ་ཐམས་ཅད་དེའི་གཉེན་པོར་ཅིའི་ཕྱིར་མི་འདོད་དེ་མཚུངས་སོ། །གཞན་ཡང་ཉན་རང་གི་རྒྱུད་ཀྱི་སྲིད་ཉོན་སྤོང་བའི་བར་ཆད་མེད་ལམ་དགུ་པ་དེས་ཀྱང་དེའི་ཐོབ་པ་གཅོད་མི་ནུས་པའི་རྒྱུ་མཚན་མེད་པའི་ཕྱིར། གལ་ཏེ་ཚོགས་གཉིས་རྫོགས་པའི་མ་མཐའ་གང་ཡིན་པ་དེ་ན་འཇོག་ཅིང་སྡུག་བསྔལ་ཆོས་བཟོད་སོགས་དང་ཉན་རང་གི་རྒྱུད་ལ་ལམ་དེ་མེད་པས་སྐྱོན་མེད་དོ་ཞེ་ན། དེ་ལྟར་ཡིན་མོད། དེ་ལྟར་ན་པཎ་ཆེན་ཤཱཀྱ་མཆོག་གིས་རྡོ་རྗེ་ལྟ་བུ་ཏིང་ངེ་འཛིན་དེ་མི་ཤེས་པའི་རྒྱུ་བཞི་པོ་སེལ་བྱེད་ཀྱི་གཉེན་པོ་དངོས་མ་ཡིན་གྱི། མི་ཤེས་པའི་རྒྱུ་བཞི་པོ་མངོན་དུ་མི་འགྱུར་བའི་གཉེན་པོ་དངོས་ཡིན་ཞེས་པ་ལྟར་ཁས་བླངས་ན་ལེགས་སྙམ། ལུགས་གཉིས་པ་ལའང་འདི་བཞིན་དཔྱད་དེ་འཐད་མིན་ཤེས་པར་བྱའོ། །

སངས་རྒྱས་ཀྱི་ཡེ་ཤེས་སུ་བཞེད་པ་དག་གིས་ནི། རང་འགྲེལ་སྒྲ་ཇི་བཞིན་དུ་བཤད་ནས། མི་ཤེས་པའི་རྒྱུ་བཞི་པོ་དེ་དང་འཛིན་སྟངས་དངོས་སུ་འགལ་བའི་རྣམ་པ་ཅན་གྱི་གཉེན་པོ་སློབ་ལམ་ན་མེད་པའི་ཕྱིར་ན་སངས་རྒྱས་ཀྱི་ཡེ་ཤེས་ལ་བཞག་པ་ཡིན་ཏེ། པཎ་ཆེན་ཤཱཀྱ་མཆོག་གིས། དེ་ཉིད་ལས།  མི་ཤེས་པའི་རྒྱུ་བཞི་པོ་སེལ་བྱེད་ཀྱི་གཉེན་པོ་དངོས་ནི་སློབ་ལམ་ན་ཡོད་པ་མ་ཡིན་ཏེ། དེ་དང་འཛིན་སྟངས་འགལ་བའི་རྣམ་པ་ཅན་གྱི་ཤེས་རབ་མེད་པའི་ཕྱིར་རོ། །འོ་ན་ཅི་ཞེ་ན། སངས་རྒྱས་ཀྱི་སའི་སྟོབས་བཅུ་པོ་དེ་ཉིད་དོ། །[38]ཞེས་དང་། གྲུབ་བདེ་དཔྱིད་འཇོ་ལས། ཚོགས་གཉིས་རྫོགས་པའི་མཐར་མི་ཤེས་པའི་རྒྱུ་བཞི་སྤོང་བྱེད་ནི། མི་སློབ་པའི་སར་སྟོབས་བཅུའི་ཡེ་ཤེས་ཉིད་ལ་འཇོག་སྟེ། སྔར་སློབ་ལམ་ན་མི་ཤེས་པའི་རྒྱུ་བཞིའི་ངོ་བོ་དང་འགལ་བའི་འཛིན་སྟངས་ཅན་གྱི་ཐམས་ཅད་མཁྱེན་པའི་ཤེས་རབ་མེད་པའི་ཕྱིར།[39] ཞེས་པའོ། ། ལུགས་འདིར་སངས་རྒྱས་ཡེ་ཤེས་ཁོ་ན་བཞག་པ་དང་པཎ་ཆེན་གྱིས་གཉེན་པོ་ལ་གཉིས་བྱས་ནས་བཞག་ཡོད་པ་གཉིས་ལས་པཎ་ཆེན་གྱི་ལུགས་དེ་ལེགས་པར་སྣང་། འོན་ཀྱང་གཉིས་ཀའི་ལུགས་ལ་སྤང་བྱའི་ཐོབ་པ་གཅོད་ཚུལ་ལ་དཀའ་བར་སྣང་སྟེ། གཉེན་པོ་དངོས་དེ་སངས་རྒྱས་ཀྱི་ཡེ་ཤེས་ཡིན་ན་སངས་རྒྱས་ལ་ཉོན་མོངས་ཅན་མིན་པའི་མུན་པ་ལྡན་པར་ཐལ་ཏེ། དེའི་ཐོབ་པ་ལྡན་པའི་ཕྱིར། དེ་ཡིན་ཏེ། ཡེ་ཤེས་དེ་དེའི་ཐོབ་པ་གཅོད་པའི་སྤོང་གཉེན་ཡིན་པའི་ཕྱིར། ཞེས་པའོ། ། འདིའི་ལན་ལ། སངས་རྒྱས་ཀྱི་ཡེ་ཤེས་ད་ལྟ་བས་སྤང་བྱ་ད་ལྟ་བ་སྤོང་བ་ནི་མ་ཡིན་ཏེ། དེའི་ཚེ་དེའི་ཐོབ་བཅད་ཟིན་པའི་ཕྱིར། ཞེས་དང་། སངས་རྒྱས་ཀྱི་ཡེ་ཤེས་མ་འོངས་པ་དེ་ཉིད་སྐྱེས་ཟིན་པ་དང་། དེའི་སྤང་བྱ་ད་ལྟ་བའི་ཐོབ་པ་འགགས་ཟིན་པ་དུས་མཉམ་དུ་འབྱུང་བ་ཡིན་ཏེ། དཔེར་ན། མར་མེ་མ་འོངས་པ་སྐྱེས་ཟིན་པ་དང་། དེའི་འགལ་ཟླ་མུན་པ་བསལ་ཟིན་པ་དུས་མཉམ་པ་བཞིན་ནོ། །  ཞེས་ཁོང་རྣམ་པ་གཉིས་ཀས་གསུངས་སོ། །

མཇུག་བསྡུ་བ།

འདི་ནི་ཉིན་ཤས་སྔོན་ནས་རྒྱུགས་སྤྲོད་ཀྱི་ཆེད་དུ་མཛོད་འགྲེལ་འགའ་ལ་དཔེ་ཀློག་འགའ་ཙམ་བྱས་རྗེས་སུ་དཔྱད་རྩོམ་འདི་ཉིད་བྲིས་པ་ཡིན། དཔྱད་རྩོམ་འདི་ནི་གཙོ་བོ་རྒྱ་འགྲེལ་དང་བོད་འགྲེལ་རྣམས་ཀྱི་འདོད་པ་དག་བཀོད་ནས་འཛིན་མཚམས་མི་འདྲ་བ་འགའ་ལ་དཔྱད་ཞིབ་དང་དོགས་སློང་འགའ་ཞུས་ཡོད། སྤྱིའི་ཆ་ནས་ཆོས་མངོན་པ་མཛོད་ཀྱི་གཞུང་ལུགས་འདི་ཉིད་ནི་གཏིང་ཟབ་པའི་གཞུང་ལུགས་ཤིག་ཡིན་པས། ཕྲན་རང་ཉིད་ཀྱིས་དེ་ཉིད་ལ་བསམ་གཞིག་བྱེད་དགོས་ན་ཐོས་རྒྱ་སོགས་གང་ནས་ཚད་དུ་ཐོན་མེད་ཀྱང་། འདི་ནི་གཞུང་ཚན་འདི་དག་ལ་སློབ་གཉེར་ཅུང་ཙམ་བྱེད་པ་དེ་དག་མི་བརྗེད་པའི་ཕྱིར་དུ་དཔྱད་རྩོམ་གྱི་དོད་དུ་རང་དང་སྐལ་བ་མཉམ་པའི་སློབ་སྦྱོང་པ་དག་ལ་ཕུལ་བ་ཡིན།

དཔྱད་གཞིའི་ཡིག་ཆ།

[1] ཨ་དར་ཤ། སྡེ་བསྟན། མངོན་པ།  མཛོད་རང་འགྲེལ། ཤོག་གྲངས། ༡༤༡

[2] སེར་བྱེས་པར་མ། དེབ་གཟུགས། ཤོག་གྲངས། ༠༤ པར་གསལ།

[3] ཡེ་ཤེས་སྡེ་པར་མ། བསྟན་འགྱུར་སྤྱིའི་དེབ་གྲངས། ༡༧༩ ཤོག་གྲངས། ༡༢ པར་གསལ།

[4] ཡེ་ཤེས་སྡེ་པར་མ། བསྟན་འགྱུར་སྤྱིའི་དེབ་གྲངས། ༡༧༩ ཤོག་གྲངས། ༠༣ པར་གསལ།

[5] སྣར་ཐང་པར་མ། དཔེ་རིང་དེབ་གྲངས། ༡༥༣ ཤོག་གྲངས། ༠༩ པར་གསལ།

[6] ༠༡ ཆོས་མངོན་པའི་མཛོད་ཀྱི་བཤད་པ། ༢ ཆོས་མངོན་པ་མཛོད་ཀྱི་བསྟན་བཅོས་ཀྱི་ཚིག་ལེའུར་བྱས་པའི་རྣམ་པར་བཤད་པ། ༣ ཆོས་མངོན་པ་མཛོད་ཀྱི་བཤད་པའི་རྒྱ་ཆེར་འགྲེལ་པ་དོན་གྱི་དེ་ཁོ་ན་ཉིད། ༤ ཆོས་མངོན་པ་མཛོད་ཀྱི་འགྲེལ་བཤད། ༥ ཆོས་མངོན་པ་མཛོད་ཀྱི་མཚན་ཉིད་རྗེས་སུ་འབྲང་བ། (ཆེ་བ།) ༦  ཆོས་མངོན་པ་མཛོད་ཀྱི་མཚན་ཉིད་རྗེས་སུ་འབྲང་བ། (ཆུང་བ།) ༠༧ ཆོས་མངོན་པ་མཛོད་ཀྱི་འགྲེལ་བཤད་ཉེ་བར་མཁོ་བ། ༨ ཆོས་མངོན་པ་མཛོད་ཀྱི་འགྲེལ་པ་གནད་ཀྱི་སྒྲོན་མེ། ༩ ཆོས་མངོན་པ་ལ་འཇུག་པ་རྒྱ་ཆེར་འགྲེལ་པ་སྙིང་པོ་ཀུན་ལས་བཏུས་པ།

[7] ཡེ་ཤེས་སྡེ་པར་མ། བསྟན་འགྱུར་དེབ་གྲངས། ༡༧༩ ཤོག་གྲངས། ༠༣ པར་གསལ།

[8] ཡེ་ཤེས་སྡེ་པར་མ། བསྟན་འགྱུར་དེབ་གྲངས། ༡༨༠ ཤོག་གྲངས། ༠༣ པར་གསལ།

[9] སྣར་ཐང་བསྟན་འགྱུར། དཔེ་རིང་དེབ་གྲངས། ༢༡༧ ཤོག་གྲངས། ༡༨ པར་གསལ།

[10] སྣར་ཐང་བསྟན་འགྱུར། དཔེ་རིང་དེབ་གྲངས། ༡༥༣ ཤོག་གྲངས། ༠༩ པར་གསལ།

[11] སྣར་ཐང་བསྟན་འགྱུར། དཔེ་རིང་དེབ་གྲངས། ༡༥༥ ཤོག་གྲངས། ༡༣ པར་གསལ།

[12] ཡེ་ཤེས་སྡེ་པར་མ། བསྟན་འགྱུར་དེབ་གྲངས། ༡༨༧ ཤོག་གྲངས། ༠༣ པར་གསལ།

[13] སེར་བྱེས་པར་མ། དེབ་གཟུགས། ཤོག་གྲངས། ༠༣ པར་གསལ།

[14] རྣམ་གླིང་པར་མ། དེབ་གཟུགས། ཤོག་གྲངས། ༠༧ པར་གསལ།

[15] སྨར་ཁམས་གསེར་ལྡན་དཔེ་ཚོགས།  དེབ་གཟུགས། ཤོག་གྲངས། ༠༣ པར་གསལ།

[16] སེར་བྱེས་པར་མ། དེབ་གཟུགས། ཤོག་གྲངས། ༠༣ པར་གསལ།

[17] མཆིམས་ཆུང་དང་། ཐར་ལམ་གསལ་བྱེད་དང་། བློ་གཏེར་མཆན་འགྲེལ་བཅས་ལས་གསལ།

[18] སེར་བྱེས་པར་མ། དེབ་གཟུགས། ཤོག་གྲངས་༠༨ པར་གསལ།

[19] མདོ་སྔགས་གཞུང་ཆེན་དཔེ་ཚོགས། དེབ་གཟུགས། ཤོག་གྲངས། ༠༢༦ པར་གསལ

[20] ཤཱཀྱ་མཆོག་གི་གསུང་འབུམ་ལས།དེབ་གཟུགས། ཤོག་གྲངས། ༠༦༨ པར་གསལ།

[21] སེར་བྱེས་པར་མ། དེབ་གཟུགས། ཤོག་གྲངས། ༠༦༩པར་གསལ།

[22] ངག་ཆོས་གསུང་འབུམ་དཔེ་ཚོགས། དེབ་གཟུགས། ཤོག་གྲངས། ༠༧༩པར་གསལ།

[23] སེར་བྱེས་པར་མ། དེབ་གཟུགས། ཤོག་གྲངས། ༠༡༥༥ པར་གསལ།

[24] སེར་བྱེས་པར་མ། དེབ་གཟུགས། ཤོག་གྲངས། ༠༦ པར་གསལ།

[25] སེར་བྱེས་པར་མ། དེབ་གཟུགས། ཤོག་གྲངས། ༠ ༤ པར་གསལ།

[26] སྐྱ་མདའ་དཔེ་ཚོགས། དེབ་གཟུགས། ཤོག་གྲངས། ༠༥ པར་གསལ།

[27] སེར་བྱེས་པར་མ། དེབ་གཟུགས། ཤོག་གྲངས། ༠༣ པར་གསལ།

[28] སྐྱ་མདའ་དཔེ་ཚོགས། དེབ་གཟུགས། ཤོག་གྲངས། ༠༥ པར་གསལ།

[29] སེར་བྱེས་པར་མ། དེབ་གཟུགས། ཤོག་གྲངས། ༠༤ པར་གསལ།

[30] སྐྱ་མདའ་དཔེ་ཚོགས། དེབ་གཟུགས། ཤོག་གྲངས། ༠༥པར་གསལ།

[31] སེར་བྱེས་པར་མ། དེབ་གཟུགས། ཤོག་གྲངས། ༥༦ པར་གསལ།

[32] སེར་བྱེས་པར་མ། དེབ་གཟུགས། ཤོག་གྲངས།  ༡༠ པར་གསལ།

[33] སེར་བྱེས་པར་མ། དེབ་གཟུགས། ཤོག་གྲངས། ༢༤ པར་གསལ།

[34] མདོ་སྔགས་གཞུང་ཆེན་དཔེ་ཚོགས། དེབ་གཟུགས། ཤོག་གྲངས། ༣༦ པར་གསལ།

[35] ཀུན་གསལ་མེ་ལོང་།  ཤོག་གྲངས། ༧ པར་གསལ།

[36] སེར་བྱེས་པར་མ། དེབ་གཟུགས། ཤོག་གྲངས། ༧ པར་གསལ།

[37] སེར་བྱེས་པར་མ། དེབ་གཟུགས། ཤོག་གྲངས། ༣༧༢པར་གསལ།

[38] ཤཱཀྱ་མཆོག་གི་གསུང་འབུམ་ལས། དེབ་གཟུགས། ཤོག་གྲངས། ༠༨ པར་གསལ།

[39] མདོ་སྔགས་གཞུང་ཆེན་དཔེ་ཚོགས། དེབ་གཟུགས། ཤོག་གྲངས། ༢༣པར་གསལ།

– – – – –