ནང་དོན་གནད་བསྡུས། རྩོམ་ཡིག་འདིའི་བརྗོད་བྱ་ནི་ཁ་བྱང་གིས་ཀྱང་གསལ་བ་ལྟར་འདུལ་བ་དང་མངོན་པའི་ལུགས་ཀྱི་ལོ་ཡི་མགོ་གང་ནས་འཛིན་པ་དང་ཉི་ལྡོག་ཟླ་བ་གང་ལ་འཁེལ་བ། གསོ་སྦྱོང་བཅུ་བཞི་པ་དང་དབྱར་གནས་དག་དུས་ཚོད་གང་ལ་ཐུག་པ། ཚེས་ཞག་ཉིན་ཞག་གི་ཁྱད་པར་དང་ཟླ་བཤོལ་འདོན་ལུགས་སོགས་ཇི་ལྟར་ཡིན་པ། དེ་དག་གི་སྐོར་ལ་བཞེད་ཚུལ་ཅི་འདྲ་ཡོད་པ། བཞེད་ཚུལ་དེ་དག་ཇི་ལྟར་གྱུར་ཡོད་པ་སོགས་ཡིན། དེ་ཡང་སྔོན་བྱོན་མངོན་འདུལ་གྱི་སློབ་དཔོན་ཆེན་པོ་ཚོས་ལོ་མགོ་དང་ཉི་ལྡོག་སོགས་ཀྱི་ཐད་ལ་ག་འདྲ་འདོད་ཚུལ་དང་། མཚུངས་མེད་མི་བསྐྱོད་རྡོ་རྗེས་ཇི་ལྟར་བཞེད་ཚུལ་ཏེ་དོན་ཚན་རྣམ་པ་གཉིས་ཀྱི་སྒོ་ནས་གྲུབ་པར་བྱས་ཡོད།
༡ དོན་ཚན་དང་པོའི་ནང་ལ་ཡོང་བའི་བརྡ་ཆད་གཙོ་གྲས།《སྟོན་ཟླ་ཐ་ཆུང་། ཐ་སྐར་ཟླ་བ། སྨིན་དྲུག་ཟླ་བ། མགོ་ཟླ་བ། ལོ་མགོ །མདོ་སྡེ་ཉི་མའི་སྙིང་པོའི་ལུང་། ཉི་ལྡོག །གསོ་སྦྱོང་བཅུ་བཞི་པ། བུ་སྟོན། མཚོ་སྨྲ་པ། མཆིམས་འཇམ་པའི་དབྱངས།》
༢ དོན་ཚན་གཉིས་པའི་ནང་ལ་ཡོང་བའི་བརྡ་ཆད་གཙོ་གྲས། སྟོན་མཉམ། དཔྱིད་མཉམ། དབྱར་ཉི་ལྡོག །དགུན་ཉི་ལྡོག ལོ་མགོ །མཛོད་རྩ་འགྲེལ། མཚུངས་མེད་མི་བསྐྱོད་རྡོ་རྗེ། དྲང་སྲོང་རྔ་བོང་། སི་ཏུ་པཎ་ཆེན། དབྱར་གནས། ཚེས་ཞག །ཉིན་ཞག །ཁྱིམ་ཞག །ཟླ་བཤོལ།
དོན་ཚན་དང་པོ། སྔོན་བྱོན་མངོན་འདུལ་གྱི་སློབ་དཔོན་ཆེན་པོ་ཚོས་ལོ་མགོ་དང་ཉི་ལྡོག་སོགས་ཀྱི་ཐད་ལ་ག་འདྲ་འདོད་ཚུལ།
གཅིག །རྒྱ་གར་གྱི་འདུལ་མངོན་པ་དག་གིས་ལོ་མགོ་གང་ནས་འཛིན་པའི་ལུང་འདྲེན་པ།
སློབ་དཔོན་ཡོན་ཏན་འོད་ཀྱིས་མཛད་པར་གྲགས་པའི་འདུལ་བ་མདོའི་འགྲེལ་ཆུང་ལས། སྟོན་ཟླ་ཐ་ཆུངས་ཉ་ནས་མགོ་བཟུང་སྟེ་བརྩིའོ། །ཞེས་པ་དང་། སྟོན་ཟླ་ཐ་ཆུངས་ཉ་ནས་དཔྱིད་ཟླ་ར་བ་ཉའི་བར་ཟླ་བ་བཞི་ནི་དགུན་གྱི་དུས་སོ། །ཞེས་གསུངས། དེ་བཞིན་དུ་སློབ་དཔོན་ཆོས་བཤེས་ཀྱིས་མཛད་པའི་འདུལ་མདོའི་རྒྱ་ཆེར་འགྲེལ་པ་ལས། དུས་ཚིག་དྲུག་པོ་དགུན་དང་དགུན་སྨད་དང་དཔྱིད་དང་སོས་ཀ་དང་དབྱར་དང་སྟོན་རྣམས་ལ་གཉིས་གཉིས་ཡོད་དེ། སྟོན་ཟླ་ཐ་ཆུངས་ཉ་ནས་དགུན་ཟླ་འབྲིང་པོ་ཉའི་བར་གྱི་ཟླ་བ་གཉིས་ནི་དགུན་གྱི་དུས་ཚིགས་སོ། །ཞེས་གསུངས། ལོ་མགོ་ནི། སློབ་དཔོན་རྒྱལ་བའི་སྲས་གྲགས་པ་བཤེས་གཉེན་གྱིས། སངས་རྒྱས་པ་ཐམས་ཅད་ཀྱི་དུས་དང་པོ་ནི་དགུན་དག་ཡིན་ནོ། །གཉིས་པ་ནི་དཔྱིད་དོ། །གསུམ་པ་ནི་དབྱར་རོ། །ཞེས་གསུངས། དེ་ལ་སོགས་པ་གཞུང་མང་ཡང་མཚོན་ཙམ་གྱིས་ཆོག་པར་བྱས་ནས་དགུན་ཟླ་དང་པོ་ལོ་མགོ་ཡིན་ན་དགུན་ཟླ་དང་པོ་གང་ཡིན་པ་ནི། གོང་དུ་འགྲེལ་ཆུང་སོགས་སུ་བཤད་པ་ལྟར་སྟོན་ཟླ་ཐ་ཆུང་ཉ་ནས་དགུན་གྱི་མགོ་འཛིན་དགོས་པར་བཤད། འོ་ན་སྟོན་ཟླ་ཐ་ཆུང་དེ་གང་ཡིན་ནམ་སྙམ་ན།
གཉིས། བོད་དུ་མདོ་ཉི་མའི་སྙིང་པོའི་ལུང་ལ་བརྟེན་ནས་ལོ་མགོ་འཛིན་ཚུལ་མི་འདྲ་བ་གཉིས་སུ་གྱུར་པ།
མདོ་སྡེ་ཉི་མའི་སྙིང་པོ་ལས། ཟླ་རངས་ཉ་ཚེ་ཐ་སྐར་ཡིན། །དེ་ནི་ཟླ་བ་ཕྱེད་ཡིན་ཏེ། །སྟོན་ཟླ་འབྲིང་པོའི་ངོ་ལ་ནི། །ལོ་སྐོར་བདག་གིས་བརྗོད་པར་བྱ། ། ཞེས་ཐ་སྐར་ཟླ་བར་སྟོན་ཟླ་འབྲིང་པོ་ཡིན་པ་དང་སྟོན་འབྲིང་དེ་ལ་ལོ་སྐོར་བཅུ་གཉིས་རྫོགས་འགྲོ་བར་གསུངས། ཐ་སྐར་ནི་དབྱུག་གུ་དང་དོན་གཅིག་སྟེ་དབྱུག་གུ་ཟླ་བའོ། །དབྱུག་གམ་ཐ་སྐར་ཟླ་བ་ནི་ཧོར་ཟླ་བརྒྱད་པའི་བཅུ་དྲུག་ནས་དགུ་པའི་བཅོ་ལྔ་བར་ཏེ་བཅོ་ལྔ་ལ་རྫོགས་པའོ། །དེས་ན་སྟོན་འབྲིང་ནས་སྟོན་ཟླ་ཐ་ཆུང་དང་དབྱུག་གུ་ནས་སྨིན་དྲུག་ཡིན་པས་སྟོན་ཟླ་ཐ་ཆུང་དེ་སྨིན་དྲུག་ཟླ་བར་ཁེལ་ཡོད། སྨིན་ཟླ་ནི་ཧོར་ཟླ་དགུ་པའི་བཅུ་དྲུག་ནས་བཅུ་པའི་བཅོ་ལྔ་བར་རོ། །སྟོན་ཐའི་ཉ་ནས་ལོ་མགོ་འཛིན་པ་དང་སྟོན་ཐ་སྨིན་ཟླ་ཡིན་པ་དང་སྨིན་ཟླ་ཧོར་ཟླ་དགུ་པའི་བཅུ་དྲུག་ནས་བཅུ་པའི་བཅོ་ལྔ་བར་ཡིན་པ་དེ་དག་གྲུབ་ཀྱང་། བོད་ཀྱི་འདུལ་བའི་མཁས་དབང་རྣམ་པའི་ཁྲོད་སྟོན་ཐ་སྨིན་ཟླ་ཉིད་དུ་འདོད་པའི་ཕྱོགས་ལ་སྨིན་ཟླའི་ཚེས་གཅིག་ནས་ལོ་མགོ་འཛིན་དགོས་པར་འདོད་པ་དང་སྨིན་ཟླ་ཡོལ་མ་ཐག་པའི་མགོ་ཟླའི་ཚེས་གཅིག་ནས་ལོ་མགོ་འཛིན་དགོས་པར་འདོད་པ་གཉིས་བྱུང་། སྨིན་ཟླའི་ཚེས་གཅིག་དང་མགོ་ཟླའི་ཚེས་གཅིག་ཅེས་པ་རྒྱ་གར་འདུལ་བའི་བསྟན་བཅོས་ལུགས་ཏེ་དོན་ལ་ཚེས་བཅུ་དྲུག་ཡིན་ཡང་མར་ངོ་སྔོན་འགྲོ་བྱས་པའི་ཟླ་བ་འཇོག་ལུགས་ལྟར་ན་ཟླ་བ་དེའི་མགོ་ཚེས་བཅུ་དྲུག་ནས་འཛིན་པས་དེ་ཚེས་གཅིག་བྱས་པའོ། །
གསུམ། ལུགས་གཉིས་པོ་འཛིན་མཁན་དེ་སུ་དང་སུ་ཡིན་པ།
དེ་ལྟར་ལུགས་གཉིས་ལས་དང་པོ་ནི་བུ་སྟོན་རྗེས་འབྲངས་དང་བཅས་པས་བཞེད་པ་སྟེ། གོང་དུ་ཉི་སྙིང་གི་ལུང་དྲངས་པ་དེའི་ནང་སྟོན་འབྲིང་ཐ་སྐར་ཟླ་བའི་ཉ་ལ་ལོ་སྐོར་བཅུ་གཉིས་རྫོགས་པར་གསུངས་པས། དེའི་ཕྱི་ཉིན་སྨིན་ཟླའི་ཚེས་གཅིག་ལ་ལོ་གསར་པ་མགོ་འཛིན་དགོས་པར་འདོད། དེ་ལྟར་ན་ཧོ་ཟླ་དགུ་པའི་ཚེས་པ་བཅུ་དྲུག་ཉིན་འདུལ་མངོན་ལུགས་ཀྱི་དགུན་དང་པོའི་དབུ་ཚུགས་ཤིང་ལོ་མགོ་ཐོན་པ་ཡིན་ནོ། །
ལུགས་གཉིས་པ་ནི་མཚོ་སྣ་པ་རྗེས་འབྲང་དང་བཅས་པས་བཞེད་པ་སྟེ། དེ་ཡང་མདོ་སྡེ་ཉི་སྙིང་ལས། བདག་གིས་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེ་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བ། །འདི་ནི་རབ་ཏུ་བརྗོད་པ་ཡིན། །ཞེས་སྨིན་དྲུག་གི་ཉ་ལ་སྨིན་ཟླ་རྫོགས་པ་ཡིན་ཞིང་ཟླ་བ་དེ་ནི་སྟོན་ཟླ་ཐ་ཆུང་ཡིན་པར་གསུངས་པས། འགྲེལ་ཆུང་སོགས་ལས་སྟོན་ཐའི་ཉ་ལ་ལོ་མགོ་འཛིན་པར་གསུངས་པ་ནི་ཉ་ཟད་པའམ་ཡོལ་བའི་ཕྱི་ཉིན་ཚེས་པ་བཅུ་དྲུག་ཉིན་ཏེ་མགོ་ཟླ་བའི་ཚེས་གཅིག་ལ་ལོ་མགོ་འཛིན་དགོས་པར་འདོད། དེ་ལྟར་ན་ཧོར་ཟླ་བཅུ་པའི་ཚེས་པ་བཅུ་དྲུག་ནས་འདུལ་བའི་ལོ་མགོ་འཛིན་ཞིང་དགུན་དང་པོ་དབུ་ཚུགས་པའོ། །
བཞི། མདོ་ལུང་གི་དབང་དུ་བཏང་ན་ལོ་མགོ་འཛིན་ཚུལ་ཐད་བུ་མཚོ་གཉིས་སྒྲུབ་བྱེད་སུ་ཆེ་བ།
དེ་ལྟར་ལུང་ལ་བསམ་བློ་བཏང་ན་འགྲེལ་ཆུང་སོགས་ནས་སྟོན་ཐའི་ཉ་ལ་ལོ་མགོ་འཛིན་དགོས་ཚུལ་ལས་སྟོན་ཐའི་ཉ་ཡི་སྔོན་རྗེས་གང་ནས་འཛིན་དགོས་པར་གསལ་ཁ་མེད། བུ་མཚོ་རྣམ་པ་གཉིས་ཀས་སྟོན་ཐ་སྨིན་ཟླ་ཡིན་པར་དགོངས་པ་མཐུན་ན་ཡང་བུས་སྨིན་ཟླ་རང་དང་མཚོས་སྨིན་ཟླ་ཡོལ་བའི་མགོ་ཟླ་ལོ་མགོ་ཡིན་པར་ངོས་བཟུང་བས་ཟླ་བ་གཅིག་གིས་སྔ་ཕྱི་བྱུང་། མདོ་ལུང་གཞིར་བཞག་ན་མཚོ་སྣ་པས་དྲངས་པའི་ཉི་སྙིང་གི་ལུང་ལས་སྟོན་ཐ་སྨིན་ཟླ་ཡིན་པ་ཙམ་འགྲུབ་པ་ལས་ལོ་མགོ་གང་ནས་འཛིན་དགོས་པ་ནི་མི་འགྲུབ་པར་འདུག །བུ་སྟོན་གྱིས་དྲངས་པའི་ཉི་སྙིང་གི་ལུང་ལས་སྟོན་འབྲིང་དབྱུག་ཉ་ལ་ལོ་སྐོར་རྫོགས་པར་གསུངས་པ་གྲུབ་ན་ལོ་མགོ་གང་ནས་འཛིན་དགོས་པའང་གསལ་བོར་འགྲུབ་པས་ལོ་མགོ་གང་ནས་འཛིན་པར་མདོ་ལུང་སྒྲུབ་བྱེད་ནི་བུ་སྟོན་ཆེ་འདུག་སྙམ།
ལྔ། ལུང་གཞན་གྱི་དབང་དུ་བཏང་ན་ཇི་ལྟར་ཡིན་ཚུལ།
སློབ་དཔོན་དབྱིག་གཉེན་གྱི་མཛོད་རང་འགྲེལ་ལས། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་གསུངས། དེ་ལ་མཚོ་སྣ་པ་ལྟར་ན་དགུན་དང་པོ་མགོ་ཟླ་བ་སྟེ་ཧོར་ཟླ་བཅུ་པའི་མར་ངོའི་ཚེས་བཅུ་དྲུག་ནས་བཅུ་གཅིག་པའི་བཅོ་ལྔ་བར་ཟླ་བ་གཅིག །བཅུ་གཅིག་པའི་བཅུ་དྲུག་ནས་གནམ་གང་བར་ཟླ་བ་གཅིག་གི་ཕྱེད་འདས་ཤིང་དེ་ནས་བཅུ་གཉིས་པའི་བཅོ་ལྔ་བར་གྱི་ཕྱེད་དེ་ནི་ལུས་པས། ཕྱེད་སྔ་མ་འདས་མཚམས་བཅུ་གཅིག་པའི་མར་ངོ་གནམ་སྟོང་ལ་ཚེས་ཞག་གི་དབང་དུ་བྱས་པའི་ལོ་ཡི་མགོ་བཟུང་བ་ནས་ཟླ་བ་ཕྱེད་གཉིས་འདས་པ་ཡིན་ཞིང་དེའི་ཉིན་མོར་གསོ་སྦྱོང་བཅུ་བཞི་པ་དང་པོ་བྱ་དགོས་པར་བཞེད། གསོ་སྦྱོང་བཅུ་བཞི་པ་ཞེས་པ་ནི་ཉིན་ཞག་གི་དབང་དུ་བྱས་པ་སྟེ་དེའི་སྐོར་འོག་ནས་འབྱུང་།
བུ་སྟོན་ལྟར་ན། ལོ་ཡི་མགོ་དགུན་དང་པོ་ནི་སྨིན་དྲུག་ཟླ་བ་སྟེ་ཧོར་ཟླ་དགུ་པའི་ཚེས་བཅུ་དྲུག་ནས་བཟུང་བས། དེ་ནས་བཅུ་པའི་བཅོ་ལྔ་བར་ཟླ་བ་གཅིག །བཅུ་པའི་བཅོ་ལྔ་ནས་གནམ་གང་ལ་ཟླ་བ་ཕྱེད་གཉིས་འདས་ཤིང་གནམ་གང་དེ་ནས་བཅུ་གཅིག་པའི་བཅོ་ལྔ་བར་གྱི་ཕྱེད་ནི་ལུས་པ་སྟེ་ཟླ་བ་ཕྱེད་གཉིས་འདས་མཚམས་ཀྱི་ཧོར་ཟླ་བཅུ་པའི་ཚེས་པ་སྟོང་ངམ་གནམ་གང་ལ་གསོ་སྦྱོང་བཅུ་བཞི་པ་བྱ་དགོས་པར་བཞེད།
སློབ་དཔོན་ཡོན་འོད་ཀྱི་ལས་བརྒྱ་རྩ་གཅིག་པའམ་ཀརྨ་ཤ་ཏཾ་ལས། དེ་ལ་གསོ་སྦྱོང་བཅུ་བཞི་པ་དང་། བཅོ་ལྔ་པ་ནི་དུས་ཚིགས་དྲུག་པོ་དག་གིས་ཟླ་བ་བཅུ་གཉིས་ལ་གསོ་སྦྱོང་ཉི་ཤུ་རྩ་བཞི་ཡོད་པ་ལས་དྲུག་ནི་གསོ་སྦྱོང་བཅུ་བཞི་པ་ཡིན་ལ། བཅོ་བརྒྱད་ནི་གསོ་སྦྱོང་བཅོ་ལྔ་པ་ཡིན་ཏེ། དབྱར་ཟླ་གསུམ་དང་། དགུན་ཟླ་གསུམ་གྱི་ནི་ར་བ་དང་། ཐ་ཆུངས་མར་གྱི་ངོ་བཅོ་ལྔ་མི་ཐུབ་པས་ར་བ་དང་ཐ་ཆུངས་ཀྱི་གནམ་སྟོང་བཞི་གསོ་སྦྱོང་བཅུ་བཞི་པ་ཡིན་ལ། སྟོན་ཟླ་གསུམ་དང་དཔྱིད་ཟླ་གསུམ་གྱི་འབྲིང་པོར་མར་གྱི་ངོ་བཅོ་ལྔ་མི་ཐུབ་པས་འབྲིང་པོའི་གནམ་སྟོང་གཉིས་གསོ་སྦྱོང་བཅུ་བཞི་པ་ཡིན་ནོ། །ལྷག་མ་བཅོ་བརྒྱད་ནི་གསོ་སྦྱོང་བཅོ་ལྔ་པ་ཡིན་ནོ། །ཞེས་འབྱུང་།
དེ་ལ་དགུན་ར་བ་དང་ཐ་ཆུང་སོགས་ཀྱི་མར་ངོ་གནམ་སྟོང་ལ་ཞག་མི་ཐུབ་པར་བཤད་པ་འདི་ལོ་མགོ་མགོ་ཟླ་བ་ནས་འཛིན་པའི་མཚོ་སྣ་པ་ལྟར་ན། དགུན་རའི་མར་ངོའི་གནམ་སྟོང་ཧོར་ཟླ་བཅུ་པའི་གནམ་སྟོང་ལ་ཁེལ་བས། ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་མི་མཐུན་ཏེ་ལོ་མགོ་ནས་གསོ་སྦྱོང་བཅུ་བཞི་པ་ལ་ཟླ་ཕྱེད་ལས་ཕྱེད་གཉིས་མ་འདས་པས་སོ། །ལོ་མགོ་སྨིན་ཟླ་ནས་འཛིན་པའི་བུ་སྟོན་ལྟར་ན། དགུན་རའི་གནམ་སྟོང་ལ་ལོ་མགོ་ཧོར་ཟླ་དགུ་པའི་བཅུ་དྲུག་ཉིན་བཟུང་བ་ནས་བརྩིས་པའི་ཟླ་བ་ཕྱེད་གཉིས་ཏག་ཏག་འདས། ཧོར་ཟླ་བཅུ་པ་ལ་དགུན་ར་བྱེད་པ་འདི་ཡང་ཡར་ངོ་སྔོན་དུ་འགྲོ་བའི་འཇིག་རྟེན་པ་དང་སྒོ་བསྟུན་པ་ཡིན་པར་བཤད།
དེ་བཞིན་དུ། འདུལ་མདོའི་རྒྱ་ཆེར་འགྲེལ་པ་ལས། དུས་ཚིགས་དྲུག་པོ་དེ་དག་རེ་རེ་ལ་ཟླ་བ་གཉིས་གཉིས་ཏེ་ཟླ་བ་ཕྱེད་བཞི་བཞི་ཡོད་པ་ལ། ཕྱེད་དང་པོ་གཉིས་དང་ཐ་མ་དང་གསུམ་ལ་ནི་ཞག་བཅོ་ལྔ་བཅོ་ལྔ་ཐུབ་པར་བརྩིའོ། ཕྱེད་གསུམ་པ་ལ་ནི་ཞག་རེ་རེ་ཆད་ཅིང་བཅོ་ལྔ་མི་ཐུབ་པར་བཅུ་བཞི་ཐུབ་པར་བརྩི་སྟེ། དེ་དག་ནི་གསོ་སྦྱོང་བཅུ་བཞི་པ་ཡིན་པར་རིག་པར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དབྱར་ཟླ་གསུམ་དང་དགུན་ཟླ་གསུམ་གྱི་ནི་ར་བ་དང་ཐ་ཆུངས། མར་གྱི་ངོ་བཅོ་ལྔ་མི་ཐུབ་པས་ར་བ་དང་ཐ་ཆུངས་གནམ་སྟོང་ནི་གསོ་སྦྱོང་བཅུ་བཞི་པ་ཡིན་ནོ། །སྟོན་ཟླ་གསུམ་དང་དཔྱིད་ཟླ་གསུམ་གྱི་ནི་འབྲིང་པོ་མར་གྱི་ངོ་བཅོ་ལྔ་མི་ཐུབ་པས། འབྲིང་པོ་གནམ་སྟོང་གསོ་སྦྱོང་བཅུ་བཞི་པ་ཡིན་ནོ། །ལྷག་མ་ཐམས་ཅད་ནི་གསོ་སྦྱོང་བཅོ་ལྔ་པ་ཡིན་ནོ། ། ཞེས་འབྱུང་བ་ནི་གོང་གི་ཀར་ཤའི་ལུང་གི་དགོངས་དོན་དང་གཅིག་པས་བསྐྱར་བཤད་མི་བྱའོ། །
འཕགས་པ་ས་ག་ལྷས་མཛད་པའི་འདུལ་བ་ཚིག་ལེའུར་བྱས་པ་མེ་ཏོག་ཕྲེང་རྒྱུད་ལས། ཁ་བ་སོ་ག་དབྱར་རྣམས་ཀྱི། །ཟླ་བ་གཉིས་དང་བཞི་ཡི་ནི། །མར་ངོ་ལ་ནི་བཅུ་བཞི་པའི། །གསོ་སྦྱོང་སྡོམ་བརྩོན་དག་གིས་བྱ། །ས་ག་དང་ནི་ཆུ་སྟོད་དང་། །དེ་བཞིན་ཁྲུམས་སྨད་སྨིན་དྲུག་དང་། །རྒྱལ་དང་དབོ་ཞེས་བྱ་བ་ཉིད། །དྲུག་པོའི་མར་ངོ་བཅུ་བཞིར་བརྗོད། །ཅེས་ས་ག་ཟླ་བ་དང་། ཆུ་སྟོད་ཟླ་བ། ཁྲུམས་ཟླ། སྨིན་ཟླ། རྒྱལ་ཟླ། དབོ་ཟླ་སྟེ་ཟླ་བ་དྲུག་པོ་དེའི་མར་ངོ་ལ་གསོ་སྦྱོང་བཅུ་བཞི་པ་བརྗོད་པར་བཤད།
དེ་ལྟར་ན་འདིར་སྨན་ཟླ་དང་རྒྱལ་ཟླ་བཟུང་ནས་བཤད་ན། སྨིན་ཟླ་ནི་ཧོར་ཟླ་དགུ་པའི་བཅུ་དྲུག་ནས་བཅུ་པའི་བཅོ་ལྔ་བར་གྱི་ཟླ་བ་དེ་ཡིན་ལ་དེའི་མར་ངོ་དགུ་པའི་གནམ་སྟོང་ལ་ཁེལ། རྒྱལ་ཟླ་ནི་ཧོར་ཟླ་བཅུ་གཅིག་པའི་བཅུ་དྲུག་ནས་བཅུ་གཉིས་པའི་བཅོ་ལྔ་བར་གྱི་ཟླ་བ་དེ་ཡིན་པས་དེའི་མར་ངོ་བཅུ་གཅིག་པའི་གནམ་སྟོང་ལ་ཁེལ་བ་བཅས་སོ། །མཚོ་སྣ་པ་ལྟར་ན་ལོ་མགོ་ནས་བརྩིས་པའི་རྒྱལ་ཟླའི་མར་ངོར་ཟླ་བ་ཕྱེད་གཉིས་འདས་པས། ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་ཧ་ཅང་མཐུན།
ལོ་མགོ་སྨིན་ཟླ་ནས་བཟུང་བའི་བུ་སྟོན་ལུགས་ལ་ནི་སྨིན་ཟླ་དང་རྒྱལ་ཟླའི་མར་ངོ་ཧོར་ཟླ་དགུ་པའི་གནམ་སྟོང་དང་བཅུ་གཅིག་པའི་གནམ་སྟོང་ལ་བྱས་ནས་མཛོད་འགྲེལ་གྱི་ལུང་དེ་དང་བསྒྲིགས་ན་སྨིན་རྒྱལ་གང་གི་མར་ངོ་ལའང་ཟླ་བ་ཕྱེད་གཉིས་འདས་པ་མིན་པས་འགྲིག་པའི་སྐབས་མེད་མོད། བུས་སྐབས་འདིར་སྨན་དྲུག་གི་མར་ངོ་ཞེས་པ་སྨིན་དྲུག་གི་ཉ་ཟད་པའི་མར་ངོ་སྟེ། ཧོར་ཟླ་བཅུ་པའི་གནམ་སྟོང་ལ་སྦྱར་བས་དེ་ལྟར་ན་ནི་དེ་ཡང་། ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་འགྲིག་པ་ཡིན་ནོ། །
དེ་བཞིན་དུ། སློབ་དཔོན་རིན་པོ་ཆེས་མཛད་པར་གྲགས་པའི་དགེ་སློང་གི་ལོ་དྲི་བ་ལས། གསོ་སྦྱོང་དུ་ཡོད། ཉི་ཤུ་རྩ་བཞི་སྟེ། དགུན་ཟླ་འབྲིང་པོ་དང་། དཔྱིད་ཟླ་ར་བ་དང་། ཐ་ཆུངས་དང་། དབྱར་ཟླ་འབྲིང་པོ་དང་། སྟོན་ཟླ་ར་བ་དང་། ཐ་ཆུངས་རྣམས་ཀྱི་མར་ངོའི་གསོ་སྦྱོང་ནི་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །ཞེས་འབྱུང་། འདིའི་དགུན་ཟླ་འབྲིང་པོ་ནི་བུ་སྟོན་ལྟར་ན་བསྟན་བཅོས་ལ་གྲགས་པའི་ལུགས་བཞིན་མར་ངོ་སྔོན་འགྲོ་བྱས་པའི་དགུན་ཟླ་འབྲིང་པོ་སྟེ། དེ་ཡང་ཧོར་ཟླ་བཅུ་པའི་བཅུ་དྲུག་ནས་བཅུ་གཅིག་པའི་བཅོ་ལྔ་བར་གྱི་ཟླ་བ་དེ་ཡིན་པ་དང་དེའི་མར་ངོའི་གསོ་སྦྱོང་བཅུ་བཞི་པ་ནི་གོང་ལྟར་བཅུ་པའི་གནམ་སྟོང་ལ་ཁེལ་བས་ཡར་ངོ་མར་ངོ་གང་སྔོན་དུ་འགྲོ་བའི་དབང་དུ་བྱས་ཀྱང་གསོ་སྦྱོང་བཅུ་བཞི་པ་བབས་ས་གཅིག་ཡིན་པ་དང་། ཀར་ཤ་དང་རྒྱལ་ཆེར་འགྲེལ་སོགས་སུ་དགུན་འབྲིང་ཞག་ཐུབ་པར་བཤད་པ་དང་། དགེ་སློང་གི་ལོ་དྲི་སོགས་སུ་དེ་ཞག་མི་ཐུབ་པར་བཤད་པའང་དོན་ལ་འགལ་མེད་ཡིན་ཚུལ་བཤད། དེ་ལྟར་ན་འདི་ཡང་། ཟླ་བ་ཕྱེད་དང་གཉིས་འདས་ནས། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་ཡང་འགྲིག་པ་ཡིན་ནོ། །
དེ་བཞིན་དུ། མཛོད་འགྲེལ་རྒྱལ་སྲས་མ་ལས། དེ་ལ་འདིར་ཕྱེད་ལྷག་པ་ཡོད་པས་ན་ཟླ་བ་ཕྱེད་དང་གཉིས་སོ། །ཕྱེད་དང་གཉིས་པོ་དེ་འདས་ནས་ཏེ་དགུན་ཟླ་ར་བ་དགུན་ཟླ་འབྲིང་པོ་ཕྱེད་དང་བཅས་པར་འདས་ནས་ལྷག་མ་ཟླ་བ་ཕྱེད་ནི་ལུས་པ་ན་སྟེ། དགུན་ཟླ་འབྲིང་པོ་ཕྱེད་ལུས་པ་ན་མར་གྱི་ངོའི་ཚེས་བཅུ་བཞི་ལ་མཁས་པ་སངས་རྒྱས་པ་རྣམས་ཀྱིས་ཞག་མི་ཐུབ་པ་སྟེ་ཞག་གི་ཤོལ་དོར་བར་བྱ་བའོ་ཞེས་བྱ་བའི་ཐ་ཚིག་གོ །འདིར་ནི་དགེ་སྦྱོང་རྣམས་ཀྱི་བཅུ་བཞི་པའི་གསོ་སྦྱོང་བྱེད་དོ། །ཞེས་གསུངས་ཤིང་། འདིའི་དགུན་འབྲིང་ཡང་གོང་ལྟར་ཧོར་ཟླ་དགུ་པའི་བཅུ་དྲུག་ནས་བཅུ་པའི་བཅོ་ལྔ་བར་ཏེ་སྨིན་ཟླ་ལ་དགུན་ཟླ་དང་པོ་དང་། བཅུ་པའི་བཅུ་དྲུག་ནས་བཅུ་གཅིག་པའི་བཅོ་ལྔ་བར་གྱི་མགོ་ཟླ་ལ་དགུན་ཟླ་གཉིས་པའམ་འབྲིང་པོ་བྱས་པའི་དགུན་འབྲིང་དེ་ཡིན་པར་བྱས་ན་འགྲིག་པོ་ཡོང་།
མདོར་བསྡུས་ན་མཚོ་སྨྲ་པའི་གསུངས་སྟངས་དེ་ཉིད། དབྱིག་གཉེན་གྱིས། ཟླ་བ་ཕྱེད་དང་གཉིས་འདས་ནས། །ཞེས་པ་དབང་བཙན་དུ་བྱས་ནས་བལྟས་ན་ཉི་སྣང་གི་ལུང་ལས་སྟོན་འབྲིང་ཐ་ངོས་འཛིན་དང་མཐུན་པོ་ཡོང་མོད། ཀར་ཤ་དང་རྒྱ་ཆེར་འགྲེལ་ལས་དགུན་ར་ཐ་གཉིས་ལ་གསོ་སྦྱོང་བཅུ་བཞི་པ་འབྱུང་བར་བཤད་པ་དང་མི་འགྲིག་པ་དང་། བུ་སྟོན་ལྟར་ན་གཞན་དག་འགལ་མེད་ཀྱི་སྒོ་ནས་འགྲིག་པོ་ཞིག་ཡོང་གིན་འདུག་ན་ཡང་ཉི་སྣང་གི་ལུང་ལས་འབྱུང་བའི་སྟོན་གྱི་འབྲིང་ཐའི་ཟླ་བ་དང་རང་ཉིད་ཀྱིས་ངོས་འཛིན་བྱས་པའི་ར་འབྲིང་ཐའི་ཟླ་བ་འདོད་ཚུལ་གཉིས་པོ་འགལ་བ་ལྟ་བུར་ཆགས་པ་བཅས་སོ། །
འོན་ཏེ་ཉི་སྙིང་གི་མདོ་ལས་ཇི་སྐད་གསུངས་པ་བཞིན་སྨིན་ཟླ་སྟོན་ཐ་ཡིན་པ་བུ་རང་གིས་ཀྱང་བཞེད་པས་དེ་ནས་ནག་འདེད་ཀྱིས་བགྲངས་ན་མགོ་ཟླ་དགུན་ར་ཡིན་པ་ལས་དགུན་འབྲིང་དུ་ཡོང་བའི་སྐབས་མེད་མོད། ཁོང་གིས་སྨིན་དྲུག་ཟླ་བ་ལོ་མགོར་བཟུང་བས་དེ་ཉིད་དུས་ཚིགས་གསུམ་གྱི་དབང་དུ་བཏང་བའི་དགུན་ཟླ་དང་པོ་ཡིན་པ་དང་། མགོ་ཟླ་དགུན་ཟླ་གཉིས་པ་ཡིན་པར་དགོངས་ཏེ་དགུན་འབྲིང་དུ་བཞག་པ་ཡིན་པར་ཤེས་དགོས་འདུག་གོ །
དྲུག །དགེ་ཚུལ་གྱི་ལོ་དྲི་དང་མེ་ཏོག་ཕྲེང་རྒྱུད་གཉིས་ལས་ཐོན་པའི་ལུང་མི་འདྲ་བ་གཉིས།
དགེ་ཚུལ་གྱི་ལོ་དྲི་བ་ལས། རྒྱལ་དང་དབོ་དང་ས་ག་ཅན། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །ཞེས་གསོ་སྦྱོང་བཅུ་བཞི་པ་དྲུག་ལས་དང་པོ་རྒྱལ་ཟླ་ལ་ཁེལ་བ་ལྟ་བུའི་ཚིག་གོ་རིམ་བསྒྲིགས་སྟངས་ལ་བསམས་ན་ལོ་མགོ་མགོ་ཟླ་བ་ལ་འཛིན་པའི་མཚོ་སྨྲ་པ་དང་མཐུན་པོ་བྱུང་སྟེ། ཟླ་བ་ཕྱེད་གཉིས་ལ་གསོ་སྦྱོང་བཅུ་བཞི་པ་འབྱུང་བར་བཤད་པ་དེ་ལོ་ཡི་མགོ་གང་དུ་བཟུང་བ་ནས་བརྩིས་ན་འཐད་ཅིང་། མགོ་ཟླ་བའི་ཚེས་གཅིག་སྟེ་ཧོར་ཟླ་བཅུ་པའི་བཅུ་དྲུག་ནས་བརྩིས་ན་རྒྱལ་ཟླའི་མར་ངོའི་གནམ་སྟོང་ལ་ཟླ་བ་ཕྱེད་གཉིས་ཚང་བས་སོ། །བུ་སྟོན་ལྟར་ན་ནི་མགོ་ཟླའི་མར་ངོ་ལ་ཁེལ་བས་འགྲིག་པ་མིན།
ཡང་འཕགས་པ་ས་ག་ལྷས་མཛད་པའི་འདུལ་བ་ཚིག་ལེའུར་བྱས་པ་མེ་ཏོག་ཕྲེང་རྒྱུད་ལས། ས་ག་དང་ནི་ཆུ་སྟོད་དང་། །དེ་བཞིན་ཁྲུམས་སྨད་སྨིན་དྲུག་དང་། །རྒྱལ་དང་དབོ་ཞེས་བྱ་བ་ཉིད། །དྲུག་པོའི་མར་ངོ་བཅུ་བཞིར་བརྗོད། །ཞེས་བཅུ་བཞི་པ་དྲུག་ལས་དང་པོ་ས་ག་ཟླ་བའི་མར་ངོ་ལ་ཁེལ་བ་ལྟར་བཤད་པས། དེ་ལྟར་ན་མཚོ་ལུགས་ལ་ཧོར་ཟླ་གསུམ་པའི་གནམ་སྟོང་ལ་ཁེལ་ཅིང་། བུ་ལུགས་ལ་ཧོར་ཟླ་བཞི་པའི་གནམ་སྟོང་ལ་ཁེལ་བ་ཡིན་ཏེ་ས་གའི་མར་ངོ་ཞེས་པ་ས་གའི་ཉ་ཟད་ཀྱི་ཟླ་བ་དེའི་མར་ངོར་སྦྱར་བ་གང་ཞིག་དེ་བཞི་པའི་གནམ་གང་ཡིན་པས་སོ། །དེས་ན་ས་ག་ལྷས་ས་ག་ཟླ་བའི་མར་ངོ་གསོ་སྦྱོང་བཅུ་བཞི་པའི་དང་པོར་བགྲངས་པ་འདི་ནི་མཚོ་ལུགས་བུ་ལུགས་གང་གི་དབང་དུ་བྱས་ཀྱང་ལོ་མགོ་ནས་བརྩི་བའི་ཟླ་བ་ཕྱེད་གཉིས་ཀྱི་གསོ་སྦྱོང་བཅུ་བཞི་པ་དང་པོ་དེ་ཡིན་པར་འགྲིག་ཐབས་མེད་དོ། །དེ་དག་ཀྱང་ཐབས་ཤེས་ཕུད་ནས་དགོངས་དོན་བཞག་སྟེ་འགྲིག་ཙམ་ཞིག་བཟོ་རྒྱུ་ཡོད་སྲིད་ནའང་ཁོ་བོས་ནི་ངལ་བ་དེ་བསྟེན་པར་མི་བྱའོ། །
བདུན། དེ་ལྟར་བཤད་བཤད་པའི་གྲུབ་དོན་སྟོན་པ།
དེ་ལྟར་བཤད་པའི་གྲུབ་དོན་ནི། བུ་སྟོན་རྗེས་འབྲངས་བཅས་པ་ལྟར་ན་འདུལ་བའི་ལོ་མགོ་བསྟན་བཅོས་ལ་གྲགས་པའི་མར་ངོ་སྔོན་དུ་འགྲོ་བའི་ལུགས་ཀྱི་སྨིན་དྲུག་ཟླ་བ་སྟེ། ང་ཚོ་བོད་གངས་ཅན་པ་ལ་གྲགས་པའི་བོད་ཟླའམ་ཧོར་ཟླ་དགུ་པའི་ཚེས་པ་བཅུ་དྲུག་ནས་འཛིན་པ་ཡིན་ལ། དེ་ནས་ཧོར་ཟླ་བཅུ་པའི་བཅོ་ལྔ་བར་གྱི་ཟླ་བ་དེ་ནི་དུས་ཚིགས་གསུམ་དང་ལྔའི་དབང་དུ་བྱས་པའི་དགུན་ཟླ་དང་པོ་སྟེ་འདུལ་མངོན་ལུགས་ཀྱི་ལོ་མགོ་དང་། དུས་ཚིགས་དྲུག་གི་དབང་དུ་བྱས་པའི་དགུན་སྟོད་དང་པོ་དང་། དུས་ཚིགས་གསུམ་གྱི་དབང་དུ་བྱས་པའི་སྟོན་ཟླ་ཐ་ཆུང་ཡིན་པ་བཅས་སོ། །སྟོན་ཟླ་ཐ་ཆུང་ཡང་མར་ངོ་སྔོན་འགྲོ་བསྟན་བཅོས་ལུགས་ཀྱི་སྟོན་ཟླ་ཐ་ཆུང་ཡིན་པ་ལས་ཡར་ངོ་སྔོན་འགྲོ་ཅན་གྱི་འཇིག་རྟེན་ལ་གྲགས་པའི་སྟོན་ཟླ་ཐ་ཆུང་དེ་མིན་པས་དེ་གཉིས་ཀྱི་ཁྱད་པར་ཧ་གོ་དགོས། ར་འབྲིང་ཐ་གསུམ་གྱི་རྩི་ལུགས་འདི་ལ་བསྟན་བཅོས་ལུགས་དང་འཇིག་རྟེན་གྲགས་པའི་ལུགས་གཉིས་ཡོད་པས། རྣམ་པ་ཀུན་ཏུ་དེ་གཉིས་གང་གི་དབང་དུ་བྱེད་ཀྱིན་འདུག་པ་བལྟས་ནས་མ་འཛིངས་པར་བྱ་རྒྱུ་གལ་ཆེ་འདུག །དེ་བས་བུ་སྟོན་ཐམས་ཅད་མཁྱེན་པས་ཀྱང་། དེ་ལྟར་རྣམ་བཞག་མི་འདྲ་བའི་ཚུལ་འདི་གོང་འོག་ཐམས་ཅད་དུ་ཤེས་པར་བྱའོ། །ཞེས་གསུངས་པ་ཡིན།
བོད་ཀྱི་འདུལ་བ་འཛིན་པ་ཆེན་པོ་མཚོ་སྣ་པ་ཤེས་རབ་བཟང་པོ་རྗེས་འབྲངས་དང་བཅས་པས་ནི། འདུལ་བའི་ལོ་མགོ་བསྟན་བཅོས་ལ་གྲགས་པ་ལྟར་མར་ངོ་སྔོན་དུ་འགྲོ་བའི་མགོ་ཟླ་བ་སྟེ་ཧོར་ཟླ་བཅུ་པའི་ཚེས་པ་བཅུ་དྲུག་ནས་འཛིན་པ་ཡིན་ལ། དེ་ནས་བཅུ་གཅིག་པའི་བཅོ་ལྔ་བར་གྱི་ཟླ་བ་དེ་ནི་དུས་ཚིགས་གསུམ་དང་ལྔར་ཕྱེ་བའི་དབང་དུ་བཏང་ན་དགུན་ཟླ་དང་པོ་སྟེ་འདུལ་བ་པའི་ལོ་མགོ་དང་། དུས་ཚིགས་དྲུག་གི་དབང་དུ་བཏང་ན་དགུན་སྟོད་དང་པོ་དང་། དུས་ཚིགས་བཞིའི་དབང་དུ་བཏང་ན་དགུན་ཟླ་ར་བ་ཡིན་པ་བཅས་སོ། །
དེ་བཞིན་དུ་སྨིན་ཟླ་སོགས་ཀྱི་མར་ངོའི་གནམ་སྟོང་ལ་གསོ་སྦྱོང་བཅུ་བཞི་པ་འབྱུང་བར་བཤད་པ་དེ། བུ་སྟོན་གྱིས་ཧོར་ཟླ་བཅུ་པའི་གནམ་སྟོང་ལ་སྦྱར་བ་དང་མཚོ་སྣ་པས་ཧོར་ཟླ་དགུ་པའི་གནམ་སྟོང་ལ་སྦྱར་བ་སོགས་ཤིན་ཏུ་ཐ་དད་པའི་ལུགས་གཉིས་བཤད་པ་ཡིན་ནོ། །འདིའི་ཐད་ལ་རྒྱལ་དབང་མི་བསྐྱོད་རྡོ་རྗེས། བུ་སྟོན་གྱིས་འཇིག་རྟེན་ལ་གྲགས་པའི་དབང་དུ་བཏང་ནས་སྨིན་ཟླའི་མར་ངོ་བཅུ་པའི་གནམ་སྟོང་ལ་སྦྱར་ཞིང་། མཚོ་སྣ་པས་བསྟན་བཅོས་པའི་ལུགས་ལྟར་བྱས་ནས་སྨིན་ཟླའི་མར་ངོ་དགུ་པའི་གནམ་སྟོང་ལ་སྦྱར་བས། ཁྱད་པར་དེ་འདྲ་ཞིག་གིས་ཐ་དད་དུ་གྱུར་པ་དང་། འཇིག་རྟེན་གྲགས་རྗེས་འབྲངས་ཏེ་ལག་ལེན་བྱས་ན་བུ་སྟོན་དེ་སྐྱོན་མེད་དང་། བསྟན་བཅོས་ཀྱི་རྗེས་སུ་འབྲངས་ནས་ལག་ལེན་བྱེད་ན་མཚོ་སྣ་པ་སྐྱོན་མེད་དུ་གྲུབ་ཅེས་འགལ་སྤང་མཛད་དོ། །
དེ་ཡང་འཇིག་རྟེན་ལ་གྲགས་པའི་སྨིན་དྲུག་ཟླ་བ་ནི་ཧོར་ཟླ་བཅུ་པའི་ཡར་ཚེས་གཅིག་ནས་གནམ་སྟོང་བར་གྱི་ཟླ་བ་རིལ་བོ་དེ་ཡིན་པར་བཤད་པས། དེ་ལྟར་ན་སྨིན་ཟླའི་མར་ངོ་བཅུ་པའི་གནམ་སྟོང་ལ་བྱས་པ་འཐད་ལ། མར་ངོ་སྔོན་དུ་འགྲོ་བའི་བསྟན་བཅོས་ལ་གྲགས་པའི་སྨིན་ཟླ་ནི་ཧོར་ཟླ་དགུ་པའི་བཅུ་དྲུག་ནས་བཅུ་པའི་བཅོ་ལྔ་བར་གྱི་ཟླ་བ་ཕྱེད་གཉིས་ཚོགས་པ་དེ་ཡིན་པས། དེ་ལྟར་ན་སྨིན་ཟླའི་མར་ངོ་ཧོར་ཟླ་དགུ་པའི་གནམ་སྟོང་ལ་སྦྱར་བའང་འཐད་པ་ཡིན་པའི་རྒྱུ་མཚན་གྱིས་སོ། །ལོ་མགོ་འཛིན་ཚུལ་ཐ་དད་དུ་གྱུར་པའི་རྒྱུ་མཚན་གཙོ་བོ་གཅིག་ནི་མདོ་ཉི་སྙིང་གི་ལུང་ལ་ཐུག་འདུག་ཀྱང་ལུགས་གཉིས་ཀའི་ལུང་ཁུངས་མདོ་གཅིག་ཡིན་ཞིང་། མདོ་ལུང་ཁོ་རང་གི་བབ་ལ་བལྟས་ན་བུ་ལུགས་དེ་སྒྲུབ་བྱེད་ཆེ་འདུག་ཚུལ་ནི་གོང་དུ་ཞུས་ཟིན་པ་ལྟར་རོ། །འོན་ཏེ་དེ་དག་གི་དོན་དངོས་གང་ཡིན་པ་ནི་འོག་ནས་དོན་ཚན་གཉིས་པའི་སྐབས་སུ་བཤད་པར་འགྱུར་རོ། །
བརྒྱད། ལུགས་དེ་གཉིས་ལྟར་ན་ཉི་ལྡོག་ཟླ་བ་གང་ལ་ཁེལ་ཚུལ།
དེ་ཡང་མངོན་པ་མཛོད་ལས། དབྱར་གྱི་ཟླ་བ་གཉིས་པ་ཡི། །ཐ་མའི་ཚེས་དགུ་ནས་མཚན་རིང་། །དགུན་རྣམས་ཀྱི་ནི་བཞི་པ་ལ། །ཐུང་ངུར་འགྱུར་རོ་ཉིན་མོ་ལྡོག །ཅེས་འབྱུང་། རང་འགྲེལ་དུ། དབྱར་རྣམས་ཀྱི་ཟླ་བ་གཉིས་པ་དབྱར་ཟླ་ཐ་ཆུང་ཡར་གྱི་ངོའི་ཚེས་དགུ་ནས་མཚན་མོ་རིང་ངོ་། །ཞེས་དང་། དེ་བཞིན་དུ་དགུན་རྣམས་ཀྱི་ཟླ་བ་བཞི་པའི་ཐ་མའི་ཚེས་དགུ་ནས་ཐུང་ངུར་འགྱུར་ཞེས་བྱ་བར་སྦྱར་ཏེ། དགུན་ཟླ་ཐ་ཆུངས་ཡར་གྱི་ངོའི་ཚེས་དགུ་ནས་སོ། །ཞེས་དང་། དེ་དག་གི་འགྲེལ་བཤད་ཁག་ནས་ཀྱང་དེ་ལྟར་འབྱུང་། འོན་ཏེ་བུ་སྟོན་གྱིས་མཛོད་རང་འགྲེལ་གྱི་འགྱུར་འདི་ནོར་བ་ཡིན་པ་དང་། དོན་ལ་སྟོན་ཟླ་ར་བ་དང་དཔྱིད་ཟླ་ར་བའི་ཚེས་དགུ་ཡིན་པར་གསུངས་ལ། སི་ཏུ་པཎ་ཆེན་གྱིས་ཀྱང་རང་འགྲེལ་གྱི་བོད་དཔེ་ལ་དབྱར་ཟླ་ཐ་ཆུང་གི་ཚེས་དགུ་ནས་མཚན་རིང་བ་དང་། དགུན་ཟླ་ཐ་ཆུང་གི་དགུ་ནས་ཐུང་བར་བྲིས་འདུག་པ་ཕྱིས་སུ་རྟོག་གེ་པ་འགའ་ཞིག་གིས་བསླད་པར་མངོན་ཏེ། རང་འགྲེལ་གྱི་རྒྱ་དཔེར་ཟླ་མིང་ཡོད་ཚུལ་བཤད་པ་བཞིན་ཁྲུམས་ཟླ་སྟོན་ར་དང་དབོ་ཟླ་དཔྱིད་རར་གྲུབ་པའི་ཕྱིར་དང་ཞེས་སོགས་གསུངས་ཤིང་། མཚུངས་མེད་མི་བསྐྱོད་རྡོ་རྗེའི་ཡིག་ཆ་ཁག་ཏུའང་རང་འགྲེལ་གྱི་ལུང་འདྲེན་སྐབས་བུ་སྟོན་སོགས་ཀྱིས་གསུངས་པ་བཞིན་འབྱུང་བས་ཁོང་རྣམ་པས་གསུངས་པ་ལྟར་དོན་ལ་དབྱར་ཟླ་གཉིས་པ་དང་དགུན་ཟླ་བཞི་པའི་ཚེས་དགུ་ནི་དབྱར་དགུན་ཐ་ཆུང་གི་ཚེས་དགུ་མིན་པར་སྟོན་དཔྱིད་ར་བའི་ཚེས་དགུ་ཡིན་པར་གྲུབ་བོ། །
དེས་ན་བུ་སྟོན་ལུགས་སུ་ལོ་ཡི་མགོ་བོ་སྨིན་ཟླ་ནས་བརྩིས་པའི་དགུན་ཟླ་བ་བཞི་པ་ནི་མཆུ་ཟླ་བ་སྟེ་ཧོར་ཟླའི་དབང་དུ་བྱས་ན་བཅུ་གཉིས་པའི་བཅུ་དྲུག་ནས་དང་པོའི་བཅོ་ལྔ་བར་རོ། །ར་འབྲིང་ཐ་གསུམ་གྱི་དབང་དུ་བཏང་ན་བསྟན་བཅོས་པའི་དགུན་ཟླ་ཐ་ཆུང་ཡིན་ཡང་དང་པོའི་ཚེས་དགུ་ནི་འཇིག་རྟེན་པའི་དཔྱིད་ཟླ་ར་བའི་ཚེས་པའོ། །དེས་ན་མཛོད་རང་འགྲེལ་ལས་དཔྱིད་ཟླ་ར་བའི་ཡར་གྱི་ངོའི་ཚེས་དགུ་ནས་སོ། །ཞེས་པ་དང་ཏག་ཏག་འགྲིགས། དེ་བཞིན་དུ་དབྱར་ཟླ་བ་གཉིས་པ་ནི་གྲོ་བཞིན་ཟླ་བ་སྟེ་ཧོར་ཟླ་དྲུག་པའི་བཅུ་དྲུག་ནས་བདུན་ཉ་བར་རོ། །ར་འབྲིང་ཐ་གསུམ་གྱི་དབང་དུ་བཏང་ན་བསྟན་བཅོས་པའི་དབྱར་ཟླ་ཐ་ཆུང་ཡིན་ཡང་བདུན་པའི་ཚེས་དགུ་ནི་འཇིག་རྟེན་པའི་སྟོན་ཟླ་ར་བའི་ཚེས་པའོ། །དེས་ན་དེ་ཡང་དབྱར་རྣམས་ཀྱི་ཟླ་བ་གཉིས་པ་སྟོན་ཟླ་ར་བའི་ཡར་གྱི་ངོའི་ཚེས་དགུ་ནས་མཚན་མོ་རིང་ངོ་། །ཞེས་སོགས་དང་འགྲིགས་པ་ཡིན་ནོ། །དེ་ལྟར་སྟོན་རའི་ཡར་ངོའི་ཚེས་དགུ་ནི་ཧོར་ཟླ་བདུན་པའི་ཚེས་དགུ་དང་། དཔྱིད་རའི་ཚེས་དགུ་ནི་ཧོར་ཟླ་དང་པོའི་ཚེས་དགུ་ཡིན་པ་སྟེ། དུས་དེ་དག་དབྱར་དགུན་གྱི་ཉི་མ་ལྡོག་པའི་དུས་སུ་བཤད་དོ། །
བུ་སྟོན་གྱི་འདུལ་བ་སྙིང་གསལ་དུ། ཟླ་བ་ཉ་བའི་ཟླ་རངས་ལ། །ཁྲུམས་སྟོད་ཅེས་ནི་བྱ་བ་ཡིན། །བདག་གིས་སྟོན་ཟླ་ར་རིམ་བརྗོད། །ལྷོ་ཕྱོགས་ཉི་མའི་འཁོར་ལོ་ལྡོག །ཅེས་དང་། ཟླ་རངས་ཚེས་བཅོ་ལྔ་ལ་དབོ། །འདིར་ནི་དཔྱིད་ཟླ་ར་བ་ཡི། །རང་བཞིན་ཡང་ནི་བརྗོད་པར་བྱ། །བྱང་ཕྱོགས་སུ་ནི་ཁ་བལྟས་ཏེ། །ཉི་མ་ཡོངས་སུ་འཁོར་བར་བྱེད། །ཅེས་དྲང་སྲོང་རྔ་བོང་གི་དུས་སུ་དབྱར་ཉི་སྟོན་ཟླ་ར་བ་དང་དགུན་ཉི་དཔྱིད་ཟླ་ར་བ་ལ་ལྡོག་ཚུལ་གསུངས་པའི་ཉི་སྙིང་གི་ལུང་འདི་དྲངས་ནས། རྔ་བོང་གི་དུས་དེ་ནས་སངས་རྒྱས་བྱོན་གྱི་བར་ཉི་ལྡོག་ཟླ་བ་གཅིག་གིས་ཇེ་སྔ་ལ་སོང་བར་བཤད། ཉི་སྙིང་གི་ལུང་ལས་གསུངས་པའི་སྟོན་ར་ནི་མར་ངོ་སྔོན་འགྲོ་ཅན་གྱི་བསྟན་བཅོས་པའི་སྟོན་ར་ཧོར་ཟླ་བདུན་པའི་བཅུ་དྲུག་ནས་བརྒྱད་ཉ་བར་ཏེ་དཔྱིད་རའང་དེ་བཞིན་ནོ། །དེས་ན་རྔ་བོང་གི་དུས་སུ་དབྱར་ཉི་བསྟན་བཅོས་ལ་གྲགས་པའི་སྟོན་ར་བརྒྱད་པའི་ཚེས་དགུ་ཙམ་ལ་ལྡོག་གིན་ཡོད་ན་སངས་རྒྱས་བྱོན་པའི་དུས་སུ་དེ་ལས་ཟླ་བ་གཅིག་གིས་སྔ་བ་ནི་འཇིག་རྟེན་ལ་གྲགས་པའི་སྟོན་ར་བདུན་པའི་ཚེས་དགུ་སྟེ་གོང་བཞིན་ནོ། །དེ་བཞིན་དུ་དགུན་ཉི་ལྡོག་ལའང་སྦྱར་རོ། །
དེ་ལྟར་བཤད་པའི་གྲུབ་དོན་ནི། རགས་རྩིས་ཙམ་བྱས་ན་བུ་སྟོན་གྱིས་འདུལ་མངོན་གཉིས་ཀའི་ལུགས་སུ་དབྱར་ཉི་ལྡོག་ཧོར་ཟླ་བདུན་པའི་ཚེས་དགུ་དང་། དགུན་ཉི་ལྡོག་དང་པོའི་ཚེས་དགུ་ལ་ཁེལ་བ་འདི་གྲུབ་པ་ཡིན། ཚེས་དགུ་དེ་དག་ཉ་སྐར་གྱི་དབང་དུ་བྱས་ན་རིམ་བཞིན་གྲོ་བཞིན་དང་མཆུ་ཟླ་བའི་ཚེས་དགུ་དང་། ར་འབྲིང་ཐ་གསུམ་གྱི་དབང་དུ་བྱས་ན་འཇིག་རྟེན་ལ་གྲགས་པའི་སྟོན་ར་དང་དཔྱིད་རའི་ཚེས་དགུ་ཡིན་པ་བཅས་སོ། །
མཚོ་སྨྲ་པ་ལྟར་ན། དགུན་ཟླ་དང་པོ་མགོ་ཟླ་བ་ནས་བརྩིས་པའི་བཞི་པ་ནི་དབོ་ཟླ་བ་ཡིན་ཞིང་། ཧོར་ཟླ་དང་པོའི་བཅུ་དྲུག་ནས་གཉིས་པའི་བཅོ་ལྔ་བར་ལ་ཁེལ་ཡོད། བསྟན་བཅོས་ལུགས་ཀྱི་དཔྱིད་ཟླ་ར་བ་ཡིན། དེས་ན་མཛོད་ལས། དགུན་རྣམས་ཀྱི་ནི་བཞི་པ་ལ། །ཐུང་ངུར་འགྱུར་རོ་ཉིན་མོ་ལྡོག །ཅེས་པ་དང་འགྲིག་སྟེ། དེའི་རང་འགྲེལ་དུ། དེ་བཞིན་དུ་དགུན་རྣམས་ཀྱི་ཟླ་བ་བཞི་པའི་ཐ་མའི་ཚེས་དགུ་ནས་ཐུང་ངུར་འགྱུར་ཞེས་བྱ་བར་སྦྱར་ཏེ། དཔྱིད་ཟླ་ར་བའི་ཡར་གྱི་ངོའི་ཚེས་དགུ་ནས་སོ། །ཞེས་ཉིན་མཚན་རིང་ཐུང་འགྱུར་བའི་དགུན་ཟླ་བཞི་པའི་ཚེས་དགུ་དེ་དཔྱིད་རའི་ཡར་ངོའི་ཚེས་དགུ་ཡིན་པར་བཤད་པ་དང་། དེ་བཞིན་དུ་དབྱར་ཟླ་གཉིས་པའང་མཚུངས་ལ་རྒྱུ་མཚན་དེའི་ཕྱིར་མངོན་པ་མཛོད་རྩ་འགྲེལ་གྱི་དངོས་བསྟན་དེ་དག་ཉི་ལྡོག་ཡིན་པ་བྱས་ནས་བསྒྲིགས་ན་མཚོ་སྨྲ་པ་རྗེས་འབྲངས་དང་བཅས་པའི་ལོ་མགོ་དེ་ཡང་མངོན་པ་ནས་བཤད་པའི་ཉི་ལྡོག་གི་དུས་ཚོད་དང་འགྲིག་པ་ཡིན་ནོ། །
དེ་ཙམ་མ་ཟད་མདོ་ཉི་སྙིང་ལས་དྲང་སྲོང་རྔ་བོང་དུས་ཀྱི་ཉི་མ་ལྡོག་དུས་བཤད་པ་དང་ཡང་མཐུན་ཏེ། ཟླ་རངས་ཚེས་བཅོ་ལྔ་ལ་དབོ། །འདིར་ནི་དཔྱིད་ཟླ་ར་བ་ཡི། །རང་བཞིན་ཡང་ནི་བརྗོད་པར་བྱ། །བྱང་ཕྱོགས་སུ་ནི་ཁ་བལྟས་ཏེ། །ཉི་མ་ཡོངས་སུ་འཁོར་བར་བྱེད། །ཅེས་དཔྱིད་ར་ལ་དགུན་ཉི་ལྡོག་པར་བཤད་པ་དང་། ཟླ་བ་ཉ་བའི་ཟླ་རངས་ལ། །ཁྲུམས་སྟོད་ཅེས་ནི་བྱ་བ་ཡིན། །བདག་གིས་སྟོན་ཟླ་ར་རིམ་བརྗོད། །ལྷོ་ཕྱོགས་ཉི་མའི་འཁོར་ལོ་ལྡོག །ཅེས་སྟོན་ར་ལ་དབྱར་ཉི་ལྡོག་པར་བཤད་པས་སོ། །འོན་ཏེ་བུ་མཚོ་གཉིས་ཀའི་ལོ་མགོ་དེ་ཟླ་བ་ངོས་འཛིན་བྱེད་སྟངས་ཤིག་གིས་མངོན་པའི་ཉི་ལྡོག་དང་འགྲིག་ཙམ་བྱུང་ཡང་དོན་ལ་ཟླ་བ་གཅིག་གིས་སྔ་ཕྱི་ཤོར་ཡོད་པ་ནི་གོང་ལྟར་རོ། །
དགུ །མཆིམས་འཇམ་པའི་དབྱངས་སོགས་ཀྱིས་ལོ་མགོ་གང་ནས་འཛིན་ཚུལ།
གཞན་ཡང་མཆིམས་འཇམ་པའི་དབྱངས་ཀྱིས་མཛོད་འགྲེལ་མངོན་པའི་རྒྱན་དུ། འོན་ཀྱང་འདིར་ནི་སྒྲོག་ཁྲུམས་ཀྱིས་ཉ་བའི་ཟླ་བ་ནི་སྟོན་ཟླ་ཐ་ཆུང་ཡིན་ལ། དེའི་ཚེས་བཅུ་དྲུག་ནས་ཐ་སྐར་གྱི་ཟླ་བ་ཡིན་པས་དེའི་མར་ངོ་དང་ཐ་སྐར་གྱི་ཟླ་བའི་ཡར་ངོ་བསྡོམས་པ་ནི་དགུན་ཟླ་དང་པོ་དང་ཐ་སྐར་གྱི་ཟླ་བའང་ཡིན་པར་ཤེས་ཏེ། དགུན་རྣམས་ཀྱི་ཟླ་བ་བཞི་པའི་ཡར་ངོ་ལ་ཉི་མ་ལྡོག་པར་བཤད་ཅིང་། དེ་ཉིད་དཔྱིད་ཟླ་ར་བ་ཡིན་པར་འགྲེལ་པ་ལས་བཤད་པའི་ཕྱིར་དང་། ཞེས་སོགས་གསུངས། དེ་ལ་སྒྲོག་ཁྲུམས་ཀྱིས་ཉ་བའི་ཟླ་བ་ཞེས་པ་ནི་ཁྲུམས་སྟོད་ཟླ་བ་དང་དོན་གཅིག་སྟེ་ཧོར་ཟླའི་དབང་དུ་བྱས་ན་ཟླ་བ་བརྒྱད་པའོ། །དེས་ན་འཇམ་པའི་དབྱངས་ཀྱིས་ཁྲུམས་ཟླ་སྟོན་ཐ་ཡིན་པར་བཤད་པ་ལ་ཁུངས་ལུང་ཅི་ཡོད་ནི་ཤེས་མ་བྱུང་། དགུན་ཟླ་དང་པོ་དང་ཐ་སྐར་གྱི་ཟླ་བའང་ཡིན་པར་ཤེས་ཏེ་ཞེས་ཁོང་གིས་ཐ་སྐར་རམ་དབྱུག་གུ་ཟླ་བ་ཧོར་ཟླ་བརྒྱད་པའི་བཅུ་དྲུག་ནས་ལོ་མགོ་འཛིན་དགོས་པར་འདོད་པའི་ཐུགས་རྩེ་གཏད་ས་ནི། དོན་དངོས་ཀྱི་དབྱར་དགུན་ཉི་ལྡོག་གང་ལ་ཁེལ་བའི་དུས་ཚོད་དང་སྒྲིག་ཆེད་ཡིན་འདུག་སྟེ། མཛོད་འགྲེལ་མངོན་རྒྱན་ལས། དེ་ལྟར་མ་ཡིན་ན་མཆུ་དང་དབོའི་ཟླ་བ་ལ་དགུན་དང་། བྱི་ཞུན་དང་སྒྲོག་ཁྲུམས་ཀྱི་ཟླ་བ་ལ་དབྱར་གྱི་ཉི་མ་ལྡོག་པར་འགྱུར་ན། དགུན་རྒྱལ་དང་། དབྱར་ཆུ་སྟོད་ལ་ལྡོག་པར་མངོན་སུམ་གྱིས་གྲུབ་པ་དང་འགལ་བའི་ཕྱིར་ཞེས་གསུངས་པ་འདིས་གྲུབ་འདུག་པས་སོ། །
ལུང་དེས་གང་ཞིག་བསྟན་པ་ནི། ཁ་ཅིག་ཁྱོད་ཅག་ལྟར་སྨིན་ཟླ་ནས་ལོ་མགོ་བཟུང་ན་དགུན་ཉི་མཆུ་ཟླ་བ་དང་དབྱར་ཉི་བྱི་ཞུན་ནམ་གྲོ་ཞུན་ཟླ་བར་ལྡོག་པར་འགྱུར་ཞིང་། མགོ་ཟླ་ནས་ལོ་མགོ་བཟུང་ན་དགུན་ཉི་དབོ་ཟླ་བ་དང་དབྱར་ཉི་ཁྲུམས་ཟླ་ལ་ལྡོག་པར་འགྱུར་རོ། །དེ་ལྟར་ན་ནི་དོན་དངོས་སུ་དགུན་ཉི་རྒྱལ་ཟླ་བ་དང་དབྱར་ཉི་ཆུ་སྟོད་ཟླ་བར་ལྡོག་པ་མངོན་སུམ་གྱིས་གྲུབ་པ་དང་འགལ་ཞེས་བཤད་པ་ཡིན། དེས་ན་ཁོང་གིས་སྨིན་ཟླ་ནས་ལོ་མགོ་འཛིན་མཁན་བུ་སྟོན་སོགས་ཀྱིས་བཞེད་པ་ལྟར་འདོད་པའི་ཕྱོགས་དང་མགོ་ཟླ་ནས་ལོ་མགོ་འཛིན་མཁན་མཚོ་སྨྲ་པ་སོགས་ཀྱིས་བཞེད་པ་ལྟར་དུ་འདོད་པའི་ཕྱོགས་གཉིས་ཀ་བཀག་ནས་དོན་དངོས་ཀྱི་ཉི་ལྡོག་དང་མཐུན་པར་བྱས་ཏེ་ལོ་མགོ་དབྱུག་ཟླ་ནས་བཟུང་བ་ཡིན་འདུག་གོ །འོན་ཏེ་དེ་ནི་ཉི་ལྡོག་དངོས་ཀྱི་དུས་ཚོད་དང་ཕྱོགས་མགོ་ཙམ་འགྲིག་ཏུ་ཆུག་ཀྱང་སྟོན་ར་ཐ་དང་དཔྱིད་ར་སོགས་ཀྱི་ངོས་འཛིན་མདོ་ཉི་སྙིང་སོགས་ཀྱི་ལུང་དང་ཡོངས་སུ་གྲགས་པ་ལྟར་བྱས་ན་མཛོད་རྩ་འགྲེལ་གྱི་དགོངས་པ་དངོས་དང་མཐུན་ཞེས་བཤད་དཀའ་བར་འགྱུར་རོ། །
དོན་ཚན་གཉིས་པ། མཚུངས་མེད་མི་བསྐྱོད་རྡོ་རྗེས་སློབ་དཔོན་དབྱིག་གཉེན་གྱི་དགོངས་པ་ཇི་ལྟར་བཀྲལ་ནས་ཉི་ལྡོག་སོགས་ངོས་བཟུང་ཚུལ།
གཅིག །ཉི་ལྡོག་དང་ལོ་མགོ
༡ ཉི་ལྡོག
རྒྱལ་དབང་ཀརྨ་པ་མཚུངས་མེད་མི་བསྐྱོད་རྡོ་རྗེས། དབྱར་གྱི་ཟླ་བ་གཉིས་པ་ཡི། །ཞེས་སོགས་མངོན་པ་མཛོད་རྩ་འགྲེལ་ནས་བསྟན་པ་རྣམས་ནི་རྒྱ་བོད་ཀྱི་ཆེན་པོ་ཚོས་བཤད་པ་བཞིན་ཉི་མ་ལྡོག་པའི་དུས་བསྟན་རྒྱུ་བྱས་ནས་ཕྲ་ཞིབ་རིགས་པས་རྩད་བཅད་ན་སློབ་དཔོན་དབྱིག་གཉེན་ཞབས་ལ་ཉེས་པའི་མི་གཙང་བ་འགོ་བར་འགྱུར་ཞིང་། དོན་དངོས་སུ་གཞུང་དེ་དག་གིས་དངོས་བསྟན་ལ་ཉི་ལྡོག་བསྟན་པ་མིན་པར་ལོ་གཅིག་ལ་ཉིན་མཚན་མཉམ་པའི་དུས་གཉིས་འབྱུང་བ་དེ་ཉིད་བསྟན་པ་ཡིན་ཚུལ་གསུངས། དེ་ཡང་དབྱར་གྱི་ཟླ་བ་གཉིས་ཡི། །ཐ་མའི་ཚེས་དགུ་ནས་མཚན་རིང་། །ཞེས་པ་རང་འགྲེལ་དུ་སྟོན་རའི་ཚེས་དགུ་དང་། དགུན་རྣམས་ཀྱི་ནི་བཞི་པ་ལ། །ཞེས་པ་རང་འགྲེལ་དུ་དཔྱིད་རའི་ཚེས་དགུ་ལ་སྦྱར་བས། སྟོན་རའི་ཚེས་དགུ་ནི་ཧོར་ཟླ་བརྒྱད་པའི་ཚེས་དགུ་དང་དཔྱིད་རའི་དགུ་ནི་ཧོར་ཟླ་གཉིས་པའི་ཚེས་དགུ་ཡིན་པ་ལ། ཟླ་བ་དེ་གཉིས་ཀྱི་ཚེས་དགུ་དེ་དག་གི་སྔོན་རོལ་ཚེས་བརྒྱད་ཀྱི་ཉིན་མཚན་ཆ་གཅིག་དེ་དག་ལ་རིམ་བཞིན་སྟོན་དང་དཔྱིད་ཉིན་མཚན་མཉམ་སྟེ། སྟོན་མཉམ་གྱི་ཕྱི་ཉིན་ཚེ་དགུ་ནས་ཉི་མ་ལྷོ་ཕྱོགས་སུ་རྒྱུ་བ་ན་མཚན་མོ་ཇེ་རིང་དུ་འགྲོ་ཞིང་ཉིན་མོ་དེ་ལས་ལྡོག་སྟེ་ཇེ་ཐུང་དུ་འགྲོ། དུས་ཡུན་ཅི་ཙམ་གྱིས་རིང་ཐུང་འགྲོ་ཞེ་ན་ཞག་རེ་བཞིན་ཐང་ཅིག་གཅིག་གི་ཡུན་ཙམ་མོ། །ཐང་ཅིག་གཅིག་གི་ཡུན་ནི་ཉིན་ཞག་ཆ་གཅིག་ཆ་དགུ་བརྒྱར་བགོས་པའི་ཆ་གཅིག་གི་ཡུན་ཡིན་ལ། དེའི་སྐད་ཅིག་མ་དྲུག་ཅུའི་ཡུན་ཚད་ཡིན་པའང་བཤད།
དེ་བཞིན་ཧོར་ཟླ་གཉིས་པའི་ཚེས་བརྒྱད་ལ་དཔྱིད་ཉིན་མཚམ་མཉམ་ཞིང་དེའི་ཕྱི་ཉིན་ཚེས་དགུ་ནས་ཉི་མ་བྱང་ཕྱོགས་སུ་རྒྱུ་བ་ན་མཚན་མོ་ཞག་རེ་བཞིན་ཐང་ཅིག་གཅིག་གི་ཡུན་ཙམ་ཇེ་ཐུང་དང་ཉིན་མོ་ནི་དེ་ལས་ལྡོག་སྟེ་རིང་དུ་འགྲོ། དེ་ལྟར་སྟོན་ཟླ་ར་བ་ཧོར་ཟླ་བརྒྱད་པའི་ཚེས་དགུ་ནས་མཚན་མོ་རིང་ལ་ཉིན་མོ་ཐུང་དུ་སོང་སྟེ་དགུན་ཟླ་ར་བ་ཧོར་ཟླ་བཅུ་གཅིག་པའི་ཚེས་བརྒྱད་ལ་དགུན་ཉི་ལྡོག་པས། ཉིན་དེའི་མཚན་མོར་ཡུད་ཙམ་བཅོ་བརྒྱད་དང་ཉིན་ལ་བཅུ་གཉིས་ཡོད། ཡང་ཉི་ལྡོག་གི་ནུབ་མོ་ནས་མཚན་མོ་ཐང་ཅིག་གཅིག་གིས་ཇེ་ཐུང་དང་ཉིན་མོ་རིང་དུ་འགྲོ། དེ་བཞིན་དུ་དཔྱིད་ར་ཧོར་ཟླ་གཉིས་པའི་ཚེས་དགུ་ནས་མཚན་མོ་ཐུང་ལ་ཉིན་མོ་རིང་དུ་སོང་སྟེ་དབྱར་ཟླ་ར་བ་ཧོར་ཟླ་ལྔ་པའི་ཚེས་བརྒྱད་ལ་དབྱར་ཉི་ལྡོག་པས། ཉི་ལྡོག་གི་ཉིན་དེའི་མཚན་ལ་ཡུད་ཙམ་བཅུ་གཉིས་དང་ཉིན་ལ་བཅོ་བརྒྱད་ཡོད། དེ་ནས་བཟུང་མཚན་མོ་ཐང་ཅིག་གཅིག་ཙམ་གྱིས་རིང་བ་དང་ཉིན་མོ་ཇེ་ཐུང་ལ་འགྲོ། དབྱར་ཉི་དབྱར་རའི་ཚེས་བརྒྱད་དང་དགུན་ཉི་དགུན་རའི་ཚེས་བརྒྱད་ལ་ལྡོག་ཚུལ་བཤད་པ་འདི་དག་ཀྱང་ཉི་ལྡོག་གི་དུས་ངོས་གཟུང་སླ་ཆད་རགས་བཤད་ཙམ་ལས་མཐའ་གཅིག་ཏུ་དུས་དེ་དག་ལ་ལྡོག་པའི་ངེས་པ་ནི་མེད་ཅིང་། ཞིབ་མོར་རྩིས་ཀྱི་རིགས་པས་གཏན་ལ་འབེབས་དགོས་པར་གསུངས།
དེ་ལྟར་རྒྱ་བོད་ཀྱི་མཁས་པ་ཆེན་པོར་གྲགས་པ་ཕལ་ཆེ་བས་ཇི་ལྟར་འགྲེལ་ཚུལ་ལས་ཐ་དད་དུ་ཀུན་མཁྱེན་གཉིས་པའི་དགོངས་པ་བཀྲལ་ཏེ་སྟོན་མཉམ་དཔྱིད་མཉམ་དང་དབྱར་དགུན་གྱི་ཉི་མ་ལྡོག་པའི་དུས་ངོས་བཟུང་བ་འདི་ནི་རྒྱ་གར་དང་བོད་ཡུལ་གྱི་འགྲེལ་པ་ཕལ་མོ་ཆེ་དང་མི་མཐུན་ཡང་སློབ་དཔོན་རང་གི་མངོན་པ་མཛོད་རྩ་བ་དང་དེའི་རང་འགྲེལ་གྱི་ཚིག་ཟིན་དང་ཤིན་ཏུ་མཐུན་པར་མ་ཟད། རིགས་པ་དང་ཡང་འགལ་བའི་སྐབས་ཡེ་མེད་པའོ། །གཞན་དུ་རྒྱ་བོད་ཀྱི་ཆེན་པོ་དག་གིས་ཇི་ལྟར་བཤད་པ་ལ་ཡིད་རྟོན་བྱས་ནས་སྟོན་དཔྱིད་ཀྱི་ཡར་ངོའི་ཚེས་དགུར་ཉི་མ་ལྡོག་པ་དང་ཉིན་མཚན་དེ་དག་གི་མཚན་མོ་ཡུད་ཙམ་བཅོ་བརྒྱད་དང་ཉིན་མོ་བཅུ་གཉིས་ཡིན་ཚུལ་སོགས་ལ་མི་ཚེ་གཅིག་ཏུ་བསམ་བློ་བཏང་ཡང་ལྗིད་ཏིག་ཏིག་གི་འགལ་བའི་ཁུར་ཆེན་པོ་ཞིག་ལས་ཅི་ཡང་ཐོབ་ཡོང་རྒྱུ་མེད་པ་རེད་འདུག་གོ །དེས་ན་ཤེས་རབ་ཀྱི་རྗེས་སུ་འབྲང་བ་རྣམས་ནི་རྒྱལ་དབང་ཀརྨ་པ་མཚུངས་མེད་མི་བསྐྱོད་རྡོ་རྗེ་སོགས་ཀྱི་གསུང་ཚུལ་འདིའི་རྗེས་སུ་མི་སྙེག་ཅི་ཞིག་བྱ་ཨང་།
བཤད་པ་དེ་དག་གི་གྲུབ་དོན་ནི། དབྱར་གྱི་ཟླ་བ་གཉིས་པ་སོགས་མཛོད་རྩ་འགྲེལ་གྱི་གཞུང་དེ་དག་གིས་རྒྱ་བོད་ཀྱི་མཁས་པ་ཕལ་མོ་ཆེས་བཤད་པ་བཞིན་དངོས་སུ་བསྟན་པ་ནི་ཉི་ལྡོག་མིན་པར་སྟོན་དཔྱིད་ཉིན་མཚན་མཉམ་པའི་དུས་ཡིན་པ་དང་། སྟོན་མཉམ་ནས་བརྩིས་པའི་ཟླ་བ་བཞི་པ་ན་དགུན་ཉི་ལྡོག་དང་། དཔྱིད་མཉམ་ནས་བརྩིས་པའི་ཟླ་བ་བཞི་པ་ན་དབྱར་ཉི་ལྡོག་ཡིན་པ་དང་། ཉི་མ་ལྡོག་པའི་ཉིན་མཚན་དེ་དག་ལ་ཉིན་དཀར་གྱི་ཡུན་དགུན་ལྡོག་སྐབས་ཡུད་ཙམ་བཅུ་གཉིས་དང་མཚན་ཡུན་ཡུད་ཙམ་བཅོ་བརྒྱད། དབྱར་ལྡོག་སྐབས་མཚན་ཡུན་ཡུད་ཙམ་བཅུ་གཉིས་དང་ཉིན་ཡུན་ཡུད་ཙམ་བཅོ་བརྒྱད་ཡིན་པ་དང་། དབྱར་ཟླ་གཉིས་པ་སྟོན་མཉམ་རྗེས་ནས་ཉི་མ་ལྷོ་ཕྱོགས་སུ་རྒྱུ་སྟེ་ཉིན་ཞག་རེ་བཞིན་ཐང་ཅིག་གཅིག་ཙམ་གྱིས་མཚན་མོ་ཇེ་རིང་དང་ཉིན་མོ་ཇེ་ཐུང་ལ་འགྲོ་བ་ཡིན་ཡང་དེ་ཉིད་ཉི་ལྡོག་མིན་ཞིང་ཉི་མ་ལྷོ་ཕྱོགས་སུ་བགྲོད་ནས་མཐར་ཐུག་པའི་དགུན་འབྲིང་ལ་ལྷོ་ནས་བྱང་ལ་འགྲིལ་བས་དེ་ནི་ད་གཟོད་དགུན་གྱི་ཉི་ལྡོག་ཡིན་པ་དང་། དགུན་ཟླ་བཞི་པ་དཔྱིད་མཉམ་རྗེས་ནས་ཉི་མ་བྱང་ཕྱོགས་སུ་རྒྱུ་སྟེ་ཉིན་ཞག་རེ་བཞིན་དུས་ཡུན་ཐང་ཅིག་གཅིག་ཙམ་གྱིས་མཚན་མོ་ཇེ་ཐུང་དང་ཉིན་མོ་ཇེ་རིང་ལ་འགྲོ་ཡང་དེ་ཉིད་ཉི་ལྡོག་མིན་ཞིང་། ཉི་མ་བྱང་ཕྱོགས་སུ་བགྲོད་ནས་མཐར་ཐུག་པའི་དབྱར་འབྲིང་ལ་སླར་ཡང་ལྷོ་རུ་འགྲིལ་བས་དེ་ནི་ད་གཟོད་དབྱར་ཉི་ལྡོག་ཡིན་པ་བཅས་སོ། །
༢ ལོ་མགོ།
དེ་ལྟར་ཉི་ལྡོག་གི་དུས་ཚོད་རགས་རྩིས་ཀྱིས་གཏན་ལ་ཕབ་པ་འདིའི་ཤུགས་ལ་ལོ་མགོ་ཡང་ངོས་བཟུང་བ་ཡིན་ཏེ། དཔྱིད་ཉིན་མཚན་མཉམ་པའི་དགུན་ཟླ་བ་བཞི་པ་དེ་དཔྱིད་ར་ཧོར་ཟླ་གཉིས་པའི་ཡར་ཚེས་ལ་སྦྱར་བས་དགུན་ཟླ་བ་དང་པོ་ནི་དགུན་ཟླ་ར་བ་སྟེ་ཧོར་ཟླ་བཅུ་པའི་མར་ངོ་ནས་འཇོག་པར་གྲུབ་པའི་ཕྱིར། རྒྱུ་མཚན་དེ་དག་གི་ཕྱིར་ན་ཧོར་ཟླ་བཅུ་པའི་ཚེས་བཅུ་དྲུག་ནས་ཏེ་མགོ་ཟླ་བ་ནས་འདུལ་མངོན་ལུགས་ཀྱི་ལོ་མགོ་འཛིན་པ་ནི་མཚུངས་མེད་མི་བསྐྱོད་རྡོ་རྗེའི་དགོངས་པར་སོང་འདུག་སྟེ། དགུན་ཟླ་བ་བཞིའི་དབང་དུ་བྱས་ནས་དགུན་ཟླ་ར་བ་མགོ །འབྲིང་པོ་རྒྱལ། ཞེས་སོགས་ཀྱང་གསུངས་པའི་ཕྱིར་རོ། །དེས་ན་འདུལ་འཛིན་མཚོ་སྨྲ་པ་ཆེན་པོ་དང་ལོ་མགོ་འཛིན་ཚུལ་ཐད་ནས་ནི་གཅིག་མཐུན་དུ་གྱུར།
དེ་བཞིན་སི་ཏུ་པཎ་ཆེན་གྱི་མཛོད་འགྲེལ་དུ་སྨིན་ཟླའི་བཅུ་དྲུག་ནས་དབོ་ཟླའི་བཅུ་དྲུག་བར་དགུན་ཟླ་བཞི་ཡིན་ཏེ། ཞེས་ལོ་མགོ་མགོ་ཟླ་བ་ནས་བཟུང་བ་དང་ཡང་མཐུན། སི་ཏུས་སྨིན་ཟླའི་བཅུ་དྲུག་ནས་ཞེས་ལོ་མགོ་སྨིན་ཟླར་བཞག་པ་མིན་ནམ་སྙམ་ན། མིན་ཏེ་སྨིན་ཟླའི་བཅུ་དྲུག་ནི་ཧོར་ཟླ་བཅུ་པའི་ཚེས་བཅུ་དྲུག་ཡིན་ལ་དེ་ནི་མར་ངོ་སྔོན་འགྲོ་ཅན་གྱི་མགོ་ཟླ་བའི་ཚེས་གཅིག་ཡིན་པའི་ཕྱིར། དེས་ན་སྨིན་ཟླའི་བཅུ་དྲུག་ནས་ཞེས་པ་སྨིན་ཉ་ཡོལ་བའི་བཅུ་དྲུག་གམ་རིལ་ཚེས་ཀྱི་དབང་དུ་བྱས་པའི་སྨིན་ཟླའི་བཅུ་དྲུག་གང་རུང་ཡིན་པར་ཧ་གོ་དགོས། གལ་ཏེ་སྨིན་ཟླའི་བཅུ་དྲུག་ཅེས་པ་སྨིན་ཟླ་མགོ་དང་པོ་ཚུགས་པའི་ཚེས་བཅུ་དྲུག་སྟེ་ཧོར་ཟླ་དགུ་པའི་བཅུ་དྲུག་མིན་ནམ་ཞེ་ན། མིན་ཏེ། ཅུང་ཟད་ཞིབ་མོས་ཞུས་ན་ཉིད་ཀྱི་མཛོད་འགྲེལ་ནོར་བུའི་འོད་སྣང་ལས། དེས་ན་འདུལ་མཛོད་ནས་བཤད་པའི་དུས་ཚིགས་རྣམས་ད་ལྟའི་དུས་དང་སྦྱར་ནས་རགས་རྩིས་སུ་བསྒྲིགས་ན་ཆུ་སྟོད་ཟླ་བའི་ཚེས་བརྒྱད་ལ་དབྱར་ཉི་ལྡོག་པ་ཞིག་བྱས་ན་འགྲིག་པར་མངོན་ཡང་དངོས་བསྟན་ལས་ཟླ་བ་གཉིས་སྔ་འདུག་པ་འདིའི་རྒྱུ་མཚན་དཔྱད་པར་དཀའ་བས་དཔྱད་པའི་ངལ་བ་མ་བྱས་སོ། །ཞེས་གསུངས་པ་འདི་ལ་བརྟགས་པས་ཤེས་ནུས་པའི་ཕྱིར། ཇི་ལྟར་ནུས་ན། ཆུ་སྟོད་ཟླ་བའི་ཚེས་བརྒྱད་ལ་དབྱར་ཉི་ལྡོག་པ་ཞིག་བྱས་ན་འགྲིག་པར་མངོན་ཡང་དངོས་བསྟན་ལས་ཟླ་བ་གཉིས་སྔ་འདུག་ཅེས་པའི་ཚིག་འདིས་ཤེས་ནུས་ཏེ། ཆུ་སྟོད་ཟླ་བའི་ཚེས་བརྒྱད་ནི་ཕྱེད་ཚེས་རིལ་ཚེས་གང་གི་དབང་དུ་བྱས་ཀྱང་ཧོར་ཟླ་དྲུག་པའི་ཚེས་བརྒྱད་ལ་ཁེལ་ཞིང་། ཧོར་ཟླ་དྲུག་པའི་ཚེས་བརྒྱད་དེ་དངོས་བསྟན་གྱི་ཉི་ལྡོག་ལས་ཟླ་བ་གཉིས་ཀྱིས་སྔ་ན་དངོས་བསྟན་གྱི་དབྱར་ཉི་ལྡོག་དེ་ཧོར་ཟླ་བརྒྱད་པའི་ཚེས་བརྒྱད་ལ་ཁེལ། དེ་ཁེལ་བས་ཧོར་ཟླ་བརྒྱད་པའི་ཚེས་བརྒྱད་དེའི་ཕྱི་ཉིན་ཚེས་དགུ་དེ་དབྱར་གྱི་ཟླ་བ་གཉིས་པ་ཡི་ཐ་མའི་ཚེས་དགུ་ཡིན་པར་གྲུབ། དེ་གྲུབ་པས་དགུན་ཉི་ལྡོག་གི་དུས་ཚོད་བསྟན་པར་བཤད་པའི་དགུན་ཟླ་བཞི་པའི་ཚེས་དགུ་དེའང་ཧོར་ཟླ་གཉིས་པའི་ཚེས་དགུ་ལ་ཁེལ། དེ་ཁེལ་བས་དགུན་ཟླ་བཞིའི་དང་པོ་མགོ་འཛིན་ས་དེ་ཧོར་ཟླ་བཅུ་པའི་ཚེས་བཅུ་དྲུག་སྟེ་སྨིན་དྲུག་ཟླ་བའི་ཚེས་གཅིག་ཡིན་པར་གྲུབ་པའི་ཕྱིར་རོ། །ཚུལ་འདི་དེ་ལྟར་ཞིབ་ཆས་བཤད་དགོས་པ་མིན་ཡང་སི་ཏུ་པཎ་ཆེན་གྱི་ལོ་མགོ་འཛིན་ཚུལ་བུ་སྟོན་དང་མཐུན་ཞེས་ཨུ་ཚུགས་བྱེད་མཁན་རྣམས་ལ་ར་འཕྲོད་པའི་ཆེད་དུ་སྟེ་ཞོར་འཕྲོས་ཙམ་མོ། །
འོ་ན་མཚུངས་མེད་མི་བསྐྱོད་རྡོ་རྗེས་རང་གི་འདུལ་མངོན་གྱི་ཊཱི་ཀ་ཁག་ཏུ་ལོ་མགོ་ངོས་འཛིན་ཐད་རྣམ་པ་གཞན་གསུངས་པ་མིན་ནམ་ཞེ་ན། གསུངས་མོད་ཀྱི་དེ་དག་ནི་རྒྱ་བོད་ཀྱི་ཆེན་པོ་རྣམ་པའི་བཤད་ཚུལ་བཀོད་པ་ཙམ་ལས་རང་ཉིད་ཀྱིས་རྣམ་པར་དཔྱད་པའི་གྲུབ་དོན་མིན་ཞེས་ཁོང་གིས་དངོས་སུ་རྩིས་ཀྱི་རྣམ་བཞག་ཏུ་གསུངས་པས་རྗེ་ཀརྨ་པའི་དགོངས་པ་དངོས་ཐོབ་འདོད་པ་རྣམས་ཀྱིས་ནི་འདི་ཉིད་ཁོ་ནར་གཅེས་སྤྲས་སུ་བྱ་རིགས་སོ། །མཛོད་རྩ་འགྲེལ་གྱི་དགོངས་པ་ཀརྨ་པས་ཇི་སྐད་བཤད་པ་འདི་དང་མཐུན་པར་སྨྲ་བ་དང་ཕྱོགས་ཙམ་མཐུན་པར་སྨྲ་བ་དང་ཐ་དད་དུ་སྨྲ་བའི་བོད་ཀྱི་མཁས་པ་གཞན་དང་གཞན་ཡང་ཡོད་འདུག་སྟེ་ཐམས་ཅད་འདིར་བརྗོད་པའི་སྐབས་སུའང་མ་བབ་ལ་བརྗོད་ཀྱང་མི་ལང་ངོ་། །
ཡང་ཁྱིམ་ཟླའི་དབང་དུ་བྱས་ན་མདོ་སྡེ་ཉི་མའི་སྙིང་པོ་ལས་ཉི་མ་བུམ་ཁྱིམ་དུ་སླེབས་ཚེ་དགུན་ཉི་ལྡོག་པ་དང་། སེངྒེའི་ཁྱིམ་དུ་ཞུགས་ཚེ་དབྱར་ཉི་ལྡོག་པར་བཤད་ཅིང་། དུས་འཁོར་དུ་དེ་ལས་ཟླ་བ་གཅིག་གིས་སྔ་བ་ཆུ་སྲིན་གྱི་ཁྱིམ་དུ་དགུན་ཉི་དང་ཀརྐ་ཊའི་ཁྱིམ་དུ་དབྱར་ཉི་ལྡོག་པར་བཤད་པ་གཉིས་འགལ་བས་ཇི་ལྟར་ཡིན་ཞེ་ན། ཉི་སྙིང་དུ་གསུངས་པ་ནི་བདག་ཅག་གི་སྟོན་པ་དྲང་སྲོང་རྔ་བོང་དུ་གྱུར་པའི་དུས་སྐབས་ཀྱི་གླིང་གཞན་དེའི་ཉི་ལྡོག་བཤད་པ་ཡིན་ཞིང་། དུས་འཁོར་དུ་དེ་ལས་སྔ་བར་གསུངས་པ་ནི་བདག་ཅག་གི་སྟོན་པ་སངས་རྒྱས་པའི་དུས་ཀྱི་གླིང་འདིའི་ཉི་ལྡོག་བཤད་པ་ཡིན། དེས་ན་ཉི་སྙིང་དུ་སྐར་མའི་ཐོག་མ་སྨིན་དྲུག་ནས་བཟུང་བ་དྲང་སྲོང་རྔ་བོང་དུས་ཀྱི་གླིང་དེའི་དབང་དུ་བྱས་པ་དང་། གླིང་འདིའི་དབང་དུ་བྱས་ནས་བཤད་པའི་དུས་འཁོར་ལྟར་ན་སྐར་མའི་ཐོག་མ་ཐ་སྐར་ནས་བཀོད་པ་ཡིན་པར་གསུངས། དེས་ན་དུས་འཁོར་ལུགས་ལ་ཉ་སྐར་གྱི་ཟླ་བའི་མགོ་ཐོག་མ་ཐ་སྐར་རམ་དབྱུག་གུ་ནས་འཛིན་དགོས་པ་ཡིན་འདུག་པས་མཆིམས་འཇམ་དབྱངས་ཀྱིས་མཛོད་འགྲེལ་མངོན་པའི་རྒྱན་དུ་གསུངས་པའི་ལོ་མགོ་འཛིན་ཚུལ་དང་མཐུན་པར་སྣང་། འོན་ཏེ་འདུལ་མངོན་ལུགས་ལ་འགྲིག་མིན་ནི་བཤད་པར་དཀའ་སྙམ་མོ། །
གཉིས། དབྱར་གནས་པའི་དུས་ཚོད་ཟླ་བ་གང་ལ་ཁེལ་བ།
དེ་ལྟར་ཧོར་ཟླ་བཅུ་པའི་མར་ངོ་མགོ་ཟླ་བ་ནས་ལོ་མགོ་སྟེ་དགུན་ཟླ་བ་དང་པོར་བཟུང་བས། དེ་ནས་ཧོར་ཟླ་གཉིས་པའི་བཅོ་ལྔ་དབོ་ཉ་ལ་དགུན་ཟླ་བཞི་རྫོགས། མགོ་རྒྱལ་མཆུ་དབོ་སྟེ་བཞིའོ། །དེ་ནས་གཉིས་པའི་བཅུ་དྲུག་ནག་པ་ཟླ་བ་ནས་དྲུག་པའི་བཅོ་ལྔ་ཆུ་ཉ་ལ་དཔྱིད་ཟླ་བ་བཞི་རྫོགས། ནག་ས་སྣྲོན་ཆུ་བཞིའོ། །དེ་ནས་ཧོར་ཟླ་དྲུག་པའི་བཅུ་དྲུག་གྲོ་བཞིན་ཟླ་བ་ནས་བཅུ་པའི་བཅོ་ལྔ་སྨིན་ཉ་ལ་དབྱར་ཟླ་བ་བཞི་རྫོགས། གྲོ་ཁྲུམས་དབྱུག་སྨིན་བཞིའོ། །དེས་ན་དབྱར་སྔ་མ་དབྱར་གྱི་ཟླ་བ་དང་པོ་གྲོ་བཞིན་ཟླ་བ་ཧོར་ཟླ་དྲུག་པའི་བཅུ་དྲུག་ནས་ཁས་བླངས་ཏེ་དབྱུག་ཉ་ལ་དགག་དབྱེ་བྱ་བ་དང་། དབྱར་ཕྱི་མ་ཁས་ལེན་ན་དབྱར་ཟླ་གཉིས་པ་ཁྲུམས་སྟོད་ཟླ་བ་ཧོར་ཟླ་བདུན་པའི་བཅུ་དྲུག་ནས་ཁས་བླངས་ཏེ་སྨིན་ཉ་ལ་དགག་དབྱེ་བྱའོ། །དེ་དག་ནི་སློབ་དཔོན་ཡོན་ཏན་འོད་ཀྱི་འདུལ་བ་མདོ་རྩ་བ་སོགས་དང་ཡང་མཐུན་ནོ། །
དེ་ལྟར་ཧོར་ཟླ་དྲུག་པའི་མར་ངོ་ལ་དབྱར་ཁས་ལེན་པའི་དུས་ཚོད་དུ་བཤད་པ་ཡང་རགས་རྩིས་ཙམ་ལས་དབྱར་ཉི་ཧོར་ཟླ་ལྔ་པའི་ཡར་ངོ་ལ་ལྡོག་པའི་སྐབས་ནི་དབྱར་གནས་ཀྱང་ཧོར་ཟླ་ལྔ་པའི་བཅུ་དྲུག་ལ་ཁས་ལེན་དགོས་པ་ལས་དྲུག་པའི་བཅུ་དྲུག་ལ་བླངས་ན་དབྱར་ཐོན་ནས་ཟླ་བ་གཅིག་དང་གཅིག་ལྷག་ཙམ་འགོར་རྗེས་དབྱར་སྔ་མ་ཁས་བླངས་པར་འགྱུར་བ་སོགས་ཀྱིས་མི་འགྲིག་པ་དང་། དེས་ན་ཉི་མ་དབྱར་འབྲིང་གི་ཡར་ངོ་མར་ངོ་གང་ལ་ལྡོག་པའི་ཁྱད་པར་གྱིས་དབྱར་སྔ་མ་ཟླ་བ་ལྔ་པར་ཁས་ལེན་དགོས་པ་དང་དྲུག་པར་ཁས་ལེན་དགོས་པ་གཉིས་ཡོད་ཚུལ་ཤེས་དགོས་པ་སོགས་ནི་མཁས་པའི་དབང་པོ་མཚུངས་མེད་མི་བསྐྱོད་རྡོ་རྗེའི་ལེགས་བཤད་དོ། །
ལོ་མགོ་འཛིན་ཚུལ་དང་དབྱར་ཁས་ལེན་སོགས་ཀྱི་ཐད་འཇིགས་མེད་མཚོ་སྨྲ་པ་ཆེན་པོ་དང་མཐུན་འདུག་ཀྱང་། མཚོ་སྨྲ་པ་ཆེན་པོས་ནི་མདོ་སྡེ་ཉི་སྙིང་གི་ལུང་སོགས་ལ་བརྟེན་ནས་ལོ་ཡི་མགོ་དེ་ལྟར་བཞག་པར་སྣང་ཞིང་། མཚུངས་མེད་མི་བསྐྱོད་རྡོ་རྗེས་ནི་མཛོད་རྩ་འགྲེལ་གྱི་བསྟན་དོན་དང་མཐུན་པར་བཤད་པ་སྟེ། མདོ་སྡེ་ཉི་སྙིང་དུ་གསུངས་པ་དག་དུས་དང་གླིང་གཞན་གྱི་དབང་དུ་བྱས་པར་གསུངས་པའི་ཕྱིར་དང་། ཉི་སྙིང་དུ་ལོ་ཡི་མགོ་སྐར་མ་སྨིན་དྲུག་ནས་འཛིན་པ་ལས་སྐར་མ་མགོ་ནས་འཛིན་དགོས་པ་ལ་གསལ་ཁའང་མེད་ཚུལ་བུ་མཚོ་སོ་སོའི་ལུང་བསྡུར་ནས་བཤད་ཟིན་པ་ལྟར་རོ། །དེ་བཞིན་དུ་སི་ཏུ་དང་ཡང་ལོ་མགོ་འཛིན་ཚུལ་གྱི་ཆ་ནས་མཐུན་ཡང་ཉི་ལྡོག་ངོས་འཛིན་ཐད་མི་མཐུན་ཏེ་སི་ཏུས་ཀྱང་མཛོད་རྩ་འགྲེལ་གྱི་གཞུང་དེ་ཚོའི་དངོས་བསྟན་དབྱར་དགུན་གྱི་ཉི་ལྡོག་ཡིན་པར་གསུངས་འདུག་པས་སོ། །
གསུམ། ཚེས་ཞག་ཉིན་ཞག་དང་གསོ་སྦྱོང་བཅུ་བཞི་པ་ཇི་ལྟར་ཡིན་པ།
ཚེས་ཞག་དང་ཉིན་ཞག་གཤིབས་ནས་ཡོང་བས་ཚེས་ཞག་གཅིག་ཚང་བའི་ཚེ་ཉིན་ཞག་གཅིག་ཚང་བ་ལ་ཡུད་ཙམ་ཕྱེེད་ཀའམ་ཐང་ཅིག་བཅོ་ལྔ་དགོས། དེ་ལྟར་ཚེས་ཞག་རེ་ཚང་བའི་ཚེ་ཉིན་ཞག་ཚང་བ་ལ་ཡུད་ཙམ་ཕྱེད་རེ་དགོས་པ་དེ་ཕྲི་བས་ཚེས་ཞག་གི་དབང་དུ་བྱས་པའི་ཟླ་བ་གཅིག་ལ་ཉིན་ཞག་ཉེར་དགུ་དང་ཡུད་ཙམ་བཅོ་ལྔ་ལས་སོང་མེད་པས་ཉིན་ཞག་སུམ་ཅུ་ཚང་བ་ལ་ཉིན་ཞག་གི་ཕྱེད་གཅིག་སྟེ་ཡུད་ཙམ་བཅོ་ལྔ་དགོས། དེ་ནས་ཚེས་ཞག་གི་དབང་དུ་བྱས་པའི་ཟླ་བ་གཉིས་འདས་ཚེ་ཟླ་བ་སྔོན་མའི་ནང་གི་ཡུད་ཙམ་བཅོ་ལྔ་བྲི་བ་དེ་དང་། ཟླ་བ་གཉིས་པའི་ནང་ལའང་ཡུད་ཙམ་བཅོ་ལྔ་བྲི་བ་བསྡོམས་པའི་ཡུད་ཙམ་སུམ་ཅུ་སྟེ་ཉིན་ཞག་གཅིག་བྲི་བས་ཉིན་ཞག་ཉེར་དགུ་མ་གཏོགས་སོང་མེད། ཞག་བཅོ་ལྔ་རེའི་མཚམས་ན་གསོ་སྦྱོང་རེ་བྱ་དགོས་པར་གསུངས་པས་དེའི་ཚེ་གསོ་སྦྱོང་གཅིག་ལ་ཁེལ་ཡོད། ཉིན་ཞག་གི་དབང་དུ་བྱས་ན་གསོ་སྦྱོང་སྔོན་མ་བྱས་ནས་ཞག་བཅུ་བཞི་ལས་སོང་མེད་པས་གསོ་སྦྱོང་དེ་ལ་གསོ་སྦྱོང་བཅུ་བཞི་པ་ཟེར། ཞག་མི་ཐུབ་པ་ཟེར་བ་ནི་སྐབས་དེར་ཚེས་ཞག་སུམ་ཅུ་ལོན་ཞིང་དེ་ཙམ་གྱི་དོད་ཉིན་ཞག་གིས་མ་ལོངས་པའམ་མ་ཐུབ་པ་སྟེ་ཉིན་ཞག་གཅིག་ཙམ་གྱིས་འདངས་མེད་པས་སོ། །འདི་ལ་བཤད་ལུགས་གཞན་ཡང་འདུག །དེས་ན་ཞག་བཅོ་ལྔ་རེའི་མཚམས་སུ་གསོ་སྦྱོང་རེ་དགོས་ཞེས་པ་ནི་ཚེས་ཞག་གི་དབང་དུ་བྱས་པ་དང་། གསོ་སྦྱོང་བཅུ་བཞི་པ་ཟེར་བ་ནི་ཉིན་ཞག་གི་དབང་དུ་བྱས་ཏེ་མིང་ཙམ་བཏགས་པ་ཡིན་འདུག
ལག་ལེན་གྱི་སྐབས་སུ་གསོ་སྦྱོང་བཅུ་བཞི་པ་དེ་དག་ཉི་ཤུ་དགུ་ལ་མི་བྱ་བར་གནམ་གང་ལ་བྱས་ན་ཉིན་ཞག་གི་དབང་དུ་བྱས་ཀྱང་གསོ་སྦྱོང་བཅོ་ལྔ་པར་འགྱུར་རོ་ཟེར་ན། གནམ་གང་ལ་བྱས་ཀྱང་བཅུ་བཞི་པ་མིན་པར་ཡང་མི་འགྱུར་ཏེ་བཅོ་ལྔ་པ་ལ་ཉིན་ཞག་གཅིག་གིས་མ་འདངས་པ་དེ་ལའང་ཡོད་པའི་ཕྱིར་ཞེས་མཚུངས་མེད་མི་བསྐྱོད་རྡོ་རྗེས་གསུངས། དེ་ཡང་ཡིན་ཏེ་ཉིན་ཞག་བཅོ་ལྔ་ཚང་དགོས་ན་ཚེས་གཅིག་གི་སྐྱ་རེངས་མ་ཤར་པའི་བར་དུ་སྒུག་དགོས་པའི་ཕྱིར། འོན་ཏེ་དོན་དངོས་སུ་ནི་ཉི་ཤུ་དགུ་ལ་བྱ་དགོས་འདུག་སྟེ། གནམ་གང་ལ་ཚེས་ཞག་གི་དབང་དུ་བྱས་ན་ནི་ཞག་མ་བཅོ་ལྔ་ལས་བརྒལ་བའི་ཕྱིར་དང་ཉིན་ཞག་གི་དབང་དུ་བྱས་ན་ནི་ཞག་མ་བཅོ་ལྔ་མ་ཚང་བའི་ཕྱིར་རོ། །དེ་དག་ཀྱང་ཞག་མི་ཐུབ་དང་གསོ་སྦྱོང་བཅུ་བཞི་པ་ངོས་ཟིན་སླ་ཆེད་རགས་རིམ་ཙམ་གྱི་བརྩི་ལུགས་ཤིག་ཡིན་པར་ཤེས་དགོས་སོ། །
བཞི། ཟླ་བཤོལ་ལམ་ཟླ་ལྷག་ཇི་ལྟར་འཕུད་ཚུལ།
དོན་དངོས་སུ་ཚེས་ཞག་ཉིན་ཞག་ལས་ཅུང་ཙམ་མགྱོགས་པས་མགྱོགས་ཆ་དེ་དག་བསགས་པ་ལས་ཉིན་ཞག་གི་དབང་དུ་བྱས་པའི་ཟླ་བ་གཉིས་འདས་ཚེ་ཚེས་ཞག་གི་དབང་དུ་བྱས་པའི་ཟླ་བ་གཉིས་དང་ཚེས་ཞག་གཅིག་ལྷག་མ་འབྱུང་། དེ་ལྟར་ཟླ་བ་གཉིས་རེ་ལ་ཚེས་ཞག་ལྷག་མ་རེ་འབྱུང་བ་དེ་དག་བསགས་ན་ལོ་གཅིག་ལ་ཚེས་ཞག་དྲུག་ཙམ་ལྷག་མ་འབྱུང་། དེ་ལྟར་ལོ་རེ་ལ་ཚེས་ཞག་ལྷག་མ་དྲུག་རེ་འབྱུང་བ་དེ་དག་བསགས་ན་ཉིན་ཞག་གི་དབང་དུ་བྱས་པའི་ལོ་ལྔ་ལ་ཚེས་ཞག་གི་དབང་དུ་བྱས་པའི་ལོ་ལྔ་དང་ཚེས་ཞག་སུམ་ཅུ་ཐམ་པ་སྟེ་ཟླ་བ་གཅིག་རྫོགས། དེས་ན་ཚེས་ཟླ་གཅིག་དེ་ལྷག་མའམ་བཤོལ་དུ་དོར་བས་འདུལ་ལུགས་ལ་ལོ་ལྔ་རེའི་མཚམས་སུ་ཟླ་ལྷག་རེ་འཕུད་པ་དང་ཟླ་ལྷག་དེའང་ཚེས་ཞག་ཉིན་ཞག་ལ་གཤིབས་པས་ཚེས་ཞག་ལྷག་མ་རྣམས་བསགས་པ་ཚེས་ཟླར་ལོངས་པ་དེ་དོར་བ་ཡིན་འདུག །འདི་ནི་ཉིན་ལོ་གཞིར་བྱས་ནས་ཚེས་ཞག་གི་དབང་དུ་བྱས་པའི་ཟླ་ལྷག་འཕུད་སྟངས་ཤིག་ཡིན་ནོ། །
ཚེས་ཞག་དེ་ཁྱིམ་ཞག་ལ་གཤིབ་པའི་དབང་དུ་བཏང་ན། དེ་ཡང་ཁྱིམ་ཞག་ཅེས་པ་སྔོན་ཆད་ཀྱི་བཤད་སྟངས་ལྟར་ན་ཉི་མས་ལུག་ཁྱིམ་སོགས་ཁྱིམ་བཅུ་གཉིས་བགྲོད་པ་ན་ཁྱིམ་རེ་བགྲོད་ཚེ་ཆ་སུམ་ཅུར་བགོས་པའི་ཆ་གཅིག་ལ་ཁྱིམ་ཞག་གཅིག་ཟེར། ཁྱིམ་ཞག་སུམ་བརྒྱ་དྲུག་ཅུ་འདས་པ་ན་ཉིན་ཞག་སུམ་བརྒྱ་རེ་ལྔ་དང་ཚེས་ཞག་སུམ་བརྒྱ་དོན་གཅིག་འདས། དེས་ན་ཁྱིམ་ལོ་གཅིག་གི་ཚེ་ཚེས་ལོ་གཅིག་དང་ཚེས་ཞག་བཅུ་གཅིག་སོང་། ཁྱིམ་ལོ་གཉིས་ཀྱི་ཚེ་ཚེས་ལོ་གཉིས་དང་ཚེས་ཞག་ཉེར་གཉིས་སོང་། ཁྱིམ་ལོ་གཉིས་དང་ཁྱིམ་ཟླ་དགུ་འདས་ཚེ་ཚེས་ལོ་གཉིས་དང་ཚེས་ཟླ་བཅུ་རྫོགས་པས་ཁྱིམ་ཟླ་དང་ཚེས་ཟླ་མཉམ་པའི་སྟེང་ལ་ཚེས་ཟླ་གཅིག་ལྷག་པས་ལྷག་ཟླ་དེ་དོར་བ་ཡིན་ནོ། །འདི་ནི་ཁྱིམ་ལོ་གཞིར་བྱས་ནས་ཚེས་ཞག་གི་དབང་དུ་བྱས་པའི་ཟླ་ལྷག་འཕུད་སྟངས་ཤིག་གོ །
ཡང་ཉིན་ཞག་ཁྱིམ་ཞག་ལ་གཤིབ་པའི་ཚེ་ནི་ཁྱིམ་ཞག་སུམ་བརྒྱ་དྲུག་ཅུ་སྟེ་ཁྱིམ་ལོ་གཅིག་འདས་པ་ན། ཉིན་ཞག་སུམ་བརྒྱ་དང་རེ་ལྔ་སྟེ་ཉིན་ལོ་གཅིག་དང་ཉིན་ཞག་ལྔ་ཙམ་འདས། དེ་ལྟར་ལོ་རེ་ལ་ཉིན་ཞག་ལྔ་རེ་ལྷག་རྒྱུ་བྱས་ན་ཁྱིམ་ལོ་དྲུག་འདས་ཚེ་ཉིན་ལོ་དྲུག་དང་ཉིན་ཟླ་གཅིག་རྫོགས་པས་ཉིན་ཟླ་གཅིག་དེ་ལྷག་མར་འདོར་བ་ཡིན་ཡང་། ཁྱིལ་ལོ་གཅིག་གི་ཚེ་ཉིན་ལོ་གཅིག་དང་ཉིན་ཞག་ལྔ་ཏག་ཏག་འདས་པ་མིན་པར་ཉིན་ཞག་ལྔ་ལྷག་ཅིག་འདས་པར་བཤད་པས། དེ་ལྟར་ན་ཁྱིམ་ལོ་དྲུག་མ་ཟིན་པར་ལྔ་ལྷག་ཅིག་ནས་ཟླ་ལྷག་འཕུད་པར་འདུག །འདི་ནི་ཁྱིམ་ལོ་གཞིར་བྱས་ནས་ཉིན་ཞག་གི་དབང་དུ་བྱས་པའི་ཟླ་ལྷག་འཕུད་སྟངས་ཡིན་པའོ། །
ཚེས་ལོ་གཞིར་བྱས་ན་ནི་ཚེས་ཞག་སུམ་བརྒྱ་དྲུག་ཅུ་སྟེ་ཚེས་ལོ་གཅིག་འདས་ཚེ་ཁྱིམ་ཞག་སུམ་བརྒྱ་ཞེ་དགུ་དང་ཉིན་ཞག་སུམ་བརྒྱ་ང་བརྒྱད་ཙམ་ལས་མ་འདས་པས་ཟླ་ལྷག་འཕུད་པ་ཕར་ཞོག་ཁྱིམ་ཞག་དང་ཉིན་ཞག་གིས་ལོ་ཙམ་ཡང་ལོན་མེད་པའོ། །དེ་ལྟར་བཤད་པ་དག་ཀྱང་རགས་རིམ་ཙམ་ཞིག་བརྩིས་ནས་བཞག་པ་ཡིན་པར་ཤེས་དགོས་ལ་ད་དུང་ཞིབ་ཆ་བྱ་རྒྱུ་ཡོད་ཅིང་ཕྲ་ཞིབ་རྩིས་ཀྱི་རིགས་པས་གཏན་ལ་དབབ་པའི་ལས་ཀ་ནི་རྩིས་མཁན་རྣམ་པ་ཁོ་ནའི་བགོ་སྐལ་ལས་བདག་ལྟ་བུའི་ཡུལ་དུ་གྱུར་པ་མ་ཡིན་ནོ། །
སྤྱིར་འདུལ་བ་པའི་ཟླ་བཤོལ་འདོར་ལུགས་ནི་གོང་གི་ཚེས་ཞག་ཉིན་ཞག་དང་འགྲོགས་པས་ལོ་རེར་ཚེས་ཞག་དྲུག་རེ་ལྷག་པ་དང་། དེ་བསགས་པས་ལོ་ལྔ་ལ་ཚེས་ཟླ་གཅིག་ལོངས་པ་དེ་ཉིད་དོར་བའོ། །འོན་ཏེ་རྒྱ་གར་རྒྱལ་པོའི་ལུགས་སུ་ལོ་གསུམ་རེར་ཟླ་ལྷག་རེ་འདོར་བ་ཡིན་པས་སྔོན་དགེ་སློང་རྣམས་ཀྱིས་ལོ་ལྔ་རེའི་མཚམས་ཀྱི་ལོ་དྲུག་པའི་སྟེང་ལ་ཟླ་ལྷག་འདོར་བ་དེ་དང་མ་མཐུན་ནས་བླུན་པོ་ཚོས་དགེ་སློང་རྣམས་ཀྱི་ཟླ་ལྷག་འདོར་སྟངས་དེར་འཕྱས་པ་ན། བཅོམ་ལྡན་འདས་ཀྱིས་ད་ནས་རྒྱལ་པོ་རྣམས་དང་མཐུན་པར་གྱིས་ཤིག་ཅེས་བཀའ་སྩལ། དེ་ནས་བཟུང་དགེ་སློང་རྣམས་ཀྱིས་ཀྱང་རྒྱལ་པོའི་ལུགས་ཀྱི་རྗེས་སུ་འབྲངས་ཏེ་ལོ་གསུམ་རེ་ན་ཟླ་ལྷག་རེ་དོར་བར་བྱས་པ་ཡིན་ནོ། །དེ་དག་གི་གླེང་གཞི་ནི་འདུལ་བ་གཞུང་དམ་པའི་ནང་རྒྱས་པར་འབྱུང་།
འོ་ན་རྒྱ་གར་རྒྱལ་པོའི་ལུགས་ཀྱི་ལོ་གསུམ་རེ་ན་ཟླ་ལྷག་འདོར་སྟངས་དེ་ག་འདྲ་ཡིན་སྙམ་ན། ལོ་གཅིག་གི་ཟླ་བ་བཅུ་གཉིས་ཕོ་ཟླ་དྲུག་དང་མོ་ཟླ་དྲུག་ཏུ་ཕྱེས་པའི་མོ་ཟླ་དྲུག་ལ་ཞག་ཉེར་དགུ་ལས་མེད་པས་ཞག་ལྷག་དྲུག་འབྱུང་བ་དང་དབྱར་ཉི་ལྡོག་སྐབས་ཞག་ལྷག་གཉིས་དང་དགུན་ཉི་ལྡོག་སྐབས་གཉིས་ཏེ་ཞག་ལྷག་བཞི་འབྱུང་བ་དྲུག་གི་ཁར་བསྣན་པ་ན་ལོ་རེར་ཞག་ལྷག་བཅུ་རེ་འབྱུང་བས་ལོ་གསུམ་གསུམ་མཚམས་སུ་ཟླ་བ་རེ་ལྷག་པ་དེ་ཉིད་འདོར་བ་ཡིན་པར་བཤད། དེས་ན་ཟླ་བ་དྲུག་ལ་ཞག་ཉེར་དགུ་ལས་མེད་ཅེས་པ་འདུལ་ལུགས་ལྟར་ཚེས་ཞག་ཉིན་ཞག་འགྲོགས་པས་ཟླ་བ་དྲུག་ལ་ཚེས་ཞག་སུམ་ཅུ་ཚེ་ཉིན་ཞག་ཉེར་དགུ་ལས་སོང་མེད་པ་དེ་ལྟར་ཡིན་པ་འདྲ་ལ། ཞག་ལྷག་པོ་དྲུག་འབྱུང་ཞེས་པའང་གོང་ལྟར་ཉིན་ཞག་སུམ་བརྒྱ་དྲུག་ཅུའི་ཚེ་ཚེས་ཞག་ལྷག་མ་དྲུག་འབྱུང་བ་དེ་ལྟར་ཡིན་པ་འདྲ། མི་འདྲ་བ་ནི་ཉི་ལྡོག་རེའི་སྐབས་ཞག་ལྷག་གཉིས་རེ་འབྱུང་བར་བཤད་པ་དེའོ། །དེ་དང་ལི་རྒྱལ་ལུགས་སུ་ལོ་གསུམ་རེ་ལ་ཟླ་ལྷག་རེ་འདོན་པ་འདྲ་ཡང་འདོན་ཚུལ་མི་འདྲ་སྟེ། ལི་རྒྱལ་ལྟར་ན་སྤྱིར་ཡུད་ཙམ་སུམ་ཅུའི་ཡུན་ལ་ཉིན་ཞག་རེ་ཡིན་ཡང་ཉིན་ཞག་རེར་ཡུད་ཙམ་ཉེར་དགུ་དང་ཐང་ཅིག་ལྔ་ལས་མི་འགྲོ་བས་ཉིན་ཞག་རེར་ཐང་ཅིག་ཉེར་ལྔ་རེ་ལྷག །ཐང་ཅིག་ཉེར་ལྔ་དེ་དག་བསགས་པས་ལོ་གཅིག་ལ་ཉིན་ཞག་བཅུ་རེ་ལྷག །དེ་བསགས་པས་ལོ་གསུམ་ན་ཟླ་བ་གཅིག་ལྷག་པ་དེ་འདོར་བ་ཡིན་འདུག་པས་སོ། །
རྒྱ་ནག་རྒྱལ་པོའི་ལུགས་སམ་ནག་རྩིས་ཀྱི་ལུགས་ལ་ནི། རྟ་བྱ་བྱི་བ་ཡོས་ལ་བཤོལ། །སྟོན་དགུན་དཔྱིད་དབྱར་འབྲིང་པོ་གཉིས། །ཞེས་ཟླ་ལྷག་སྔ་མ་བྱུང་ནས་ལོ་གསུམ་དང་ཟླ་བ་གསུམ་གྱི་མཚམས་སུ་ཟླ་ལྷག་རེ་འདོར་བ་ཡིན་པ་དང་། བོད་རྣམས་དེའི་རྗེས་སུ་འབྲངས་ཀྱང་དེ་ལ་ཟླ་བ་ཕྱེད་བདུན་ཙམ་གྱིས་ཟླ་ལྷག་འདོར་འཕྱིས་པའི་སྐྱོན་ཡོད་པ་དང་། སྐྱོན་དེ་མེད་པའི་ཟླ་ལྷག་འདོན་སྟངས་གང་ཡིན་ཞེ་ན། བཤོལ་ལམ་ཟླ་ལྷག་འབྱུང་བ་ནི་འདུལ་བའི་ལུགས་ལྟར་ཞག་མི་ཐུབ་དྲུག་བསགས་པས་མིན་པར་ཉི་མ་ལོག་ནས་ཕྱིར་མ་ལྡོག་པའི་བར་ལ་ལོ་གཅིག་ཡིན་ཞིང་ལོ་གཅིག་དེ་ལ་ཁྱིམ་ཟླ་བཅུ་གཉིས་རྫོགས་ཡག་མ་རེད་པས་ཞག་བཅུ་གཅིག་ལྷག་ཙམ་བསྣན་དགོས་ལ་དེ་འདྲའི་ཞག་བཅུ་གཅིག་ལྷག་ཙམ་དེ་དག་བསགས་པས། ཟླ་བ་སུམ་ཅུ་དང་ཕྱེད་གསུམ་སྟེ་ལོ་གཉིས་དང་ཟླ་བ་ཕྱེད་དགུའི་མཚམས་སུ་ཟླ་བ་གཅིག་ལྷག་པོ་འབྱུང་བ་ཡིན། དེས་ན་འདི་ནི་སྐར་མའི་བསྟན་བཅོས་རིག་པས་གཏན་ལ་ཕབ་པ་ཡིན་ཞིང་རྒྱལ་པོ་ལའང་ལྟོས་མི་དགོས་པའི་བོད་པ་ང་རང་ཚོ་ནི་འདིའི་རྗེས་སུ་འབྲངས་འོས་ཚུལ་བུ་སྟོན་རིན་པོ་ཆེས་གསུངས་སོ། །དེས་ན་འདི་ནི་གོང་དུ་ཁྱིམ་ལོ་གཞིར་བྱས་ནས་ཚེས་ཞག་དབང་གིས་ཟླ་ལྷག་འཕུད་ཚུལ་ཞིག་བཤད་པ་དེ་དང་ཕྱོགས་ཕྱོགས་ཤིག་འདྲ་བ་ཡིན་འདུག་གོ །
– – – – –
